အခန်း ၂ သုံးဖက်မြင် ခန္ဓာကိုယ်

'ဒါပေမဲ့ ဒီ နယ်ပယ်စုံစောင့်ရှောက်သူ ဆိုတဲ့ အတန်းအစားက ဘာလဲ... ဒီလိုအတန်းအစားမျိုး တစ်ခါမှ မကြားဖူးဘူး။ ပြီးတော့ အရေးကြီးဆုံးက ငါ့မျိုးရိုးနာမည်က ဘာလို့ ဒီမှာ ဗွိုက်ဝေါလ်ကာ ဖြစ်နေတာလဲ'

စနစ်က သူ့ရဲ့နာမည်အရင်း မက်စ်မော်ဂန်အစား မက်စ် ဗွိုက်ဝေါလ်ကာလို့ ခေါ်ခဲ့တာကို သတိရရင်း မက်စ် တွေးတောနေမိသည်။

သူသည် ရှားပါးပြီး တစ်ခုတည်းသော SSS အဆင့်အတန်းကို နိုးထခွင့်ရခဲ့တာမို့ သူ့ရဲ့အတန်းအစားက ထူးခြားနေတာကို သူ နားလည်နိုင်သည်။ ထို့ကြောင့် ထိုကဲ့သို့ အတန်းအစားမျိုးကို သူ မသိရှိထားခြင်းမှာ အံ့ဩစရာ မဟုတ်ပေ။ SSS အဆင့်အတန်းဆိုသည်မှာ ထူးခြားဆန်းသစ်နေမည်သာ ဖြစ်သည်။ သို့သော် သူ့နာမည်ကမူ....အနှမြူစနစ်က သူ့နာမည်ကို မှားယွင်းစွာ ဖော်ပြလိမ့်မည်ဟု သူ မယုံကြည်ပေ။

'ငါ့ရဲ့ နာမည်အရင်းက မက်စ်မော်ဂန် မဟုတ်ဘဲ မက်စ် ဗွိုက်ဝေါလ်ကာ ဖြစ်နေလို့လား'

မက်စ် တုန်လှုပ်ဖွယ်ရာ ကောက်ချက်တစ်ခု ချလိုက်မိသည်။ စနစ်က မမှားနိုင်ဘူးဆိုတာ သူ သိထားသည်။ ထို့ကြောင့် ဖြစ်နိုင်ခြေ တစ်ခုတည်းမှာ သူ့နာမည်သည်

မက်စ်မော်ဂန် မဟုတ်ဘဲ အစောကတည်းက မက်စ် ဗွိုက်ဝေါလ်ကာ ဖြစ်နေခြင်းပင်။

"ဝူး!!!" "ဝူး!!!"

သူ့ခေါင်းထဲတွင် မေးခွန်းများစွာ ရစ်ဝဲနေသော်လည်း မှင်စာ(Goblin)တွေ၏ အော်ဟစ်သံများက ခန်းမတစ်ခုလုံး ဟိန်းထွက်နေသဖြင့် တွေးတောနေရန် အချိန်မရှိတော့ပေ။

'ဂူဗိမာန်ထဲက ထွက်မှပဲ ဒါတွေကို စဉ်းစားတော့မယ်' ဟု တွေးကာ စိတ်ထဲမှ "အခြေအနေ" ဟု ရွတ်လိုက်သည်။ သူ့မြင်ကွင်းထဲတွင် အတန်းအစားနှင့် အခြားအသေးစိတ် အချက်အလက်များကို ဖော်ပြထားသည့် စခရင်တစ်ခု ပေါ်လာသည်။

***

[မက်စ်] – အဆင့်: [အတွေ့အကြုံသစ်] – Level: 0 – အတန်းအစား: [နယ်ပယ်စုံစောင့်ရှောက်သူ] – ခန္ဓာကိုယ်: ၄ – ဝိညာဉ်: ၆ – စွမ်းအင်: ၅ – စွမ်းရည်များ: —» အတန်းအစား စွမ်းရည်များ: [သုံးဖက်မြင် ခန္ဓာကိုယ်၊ အချိန်နယ်ပယ်] —» ရရှိထားသော စွမ်းရည်များ: [ - ]

***

'သုံးဖက်မြင် ခန္ဓာကိုယ်နဲ့ အချိန်နယ်ပယ်လား'

မက်စ်သည် သူ့အတန်းအစားက ပေးအပ်သည့် စွမ်းရည်များကို ကြည့်ကာ အသေးစိတ် အချက်အလက်များကို စူးစမ်းလိုက်သည်။

***

[သုံးဖက်မြင် ခန္ဓာကိုယ်] – ဖော်ပြချက်: သရီးဒီ ဟင်းလင်းပြင် နယ်ပယ်အတွင်း ထူးခြားသော ထိန်းချုပ်နိုင်စွမ်း၊ အာရုံခံနိုင်စွမ်းနှင့် အပြန်အလှန် သက်ရောက်နိုင်စွမ်း ရှိသော ခန္ဓာကိုယ်ဖြစ်ပြီး လူသားတို့၏ ရုပ်ပိုင်းဆိုင်ရာ ကန့်သတ်ချက်များကို ကျော်လွန်သွားနိုင်သည့် အလားအလာ ရှိသည်။

[အချိန်နယ်ပယ်] – ဖော်ပြချက်: နက်နဲလှသော နယ်ပယ်စုံစောင့်ရှောက်သူ ပိုင်ဆိုင်သည့် အချိန်နယ်ပယ်တစ်ခု ဖြစ်သည်။ အချိန်စီးဆင်းမှုသည် အသုံးပြုသူ၏ အလိုအတိုင်း ကွေးညွှတ်နိုင်ပြီး မတွေးဆနိုင်သော အံ့ဖွယ်များကို လုပ်ဆောင်နိုင်သည်။

***

'ထူးဆန်းတယ်... ဒီစွမ်းရည်တွေမှာ အဆင့်တွေ၊ Level တွေ မပါပါလား' မက်စ်က အလွန်ထူးဆန်းသည်ဟု တွေးမိသည်။

ဤကမ္ဘာတွင် စွမ်းရည်များ၊ ရတနာများနှင့် မည်သည့်ပစ္စည်းမဆို အမျိုးအစား ခြောက်မျိုး ခွဲခြားထားသည်- အခြေခံ၊ အလတ်စား၊ ရှားပါး၊ ထူးကဲ၊ ဒဏ္ဍာရီ နှင့် နတ်ဘုရား အဆင့်တို့ ဖြစ်သည်။ သို့သော် သူ့အတန်းအစားမှ စွမ်းရည်များသည် မည်သည့်အဆင့် သတ်မှတ်ချက်မှ မရှိပေ။ ၎င်းတို့သည် နက်နဲလှသော SSS အဆင့်အတန်းမှ ဆင်းသက်လာသည်နှင့်အညီ ကောင်းမွန်ပါစေဟုသာ သူ မျှော်လင့်နိုင်သည်။

"ကြည့်စမ်း! မှင်စာတွေ လာနေပြီ"

တစ်စုံတစ်ယောက်က အော်ပြောလိုက်သဖြင့် ခန်းမ၏ အစွန်ဆုံးဘက်မှ သူတို့ဆီသို့ ချဉ်းကပ်လာနေသော မှင်စာတွေကို သူ သတိထားမိသွားသည်။

'အဆင့်မသတ်မှတ်ထားတဲ့ ဒီစွမ်းရည်တွေက တကယ်ပဲ အစွမ်းထက်သလားဆိုတာ အခုပဲ သိရတော့မယ်'

မက်စ်က သူ့အိတ်ထဲမှ ကျမ်းလိပ်နှစ်လိပ်ကို အမြန်ထုတ်လိုက်သည်။ သူက ပထမကျမ်းလိပ်ကို ဖွင့်ကာ ညာဘက်လက်နှင့် ထိလိုက်သောအခါ ကျမ်းလိပ်သည် အပြာရောင်တောက်သွားပြီး ပျောက်ကွယ်သွားသည်။

[မက်စ် ဗွိုက်ဝေါလ်ကာသည် 'အခြေခံ ဓားသိုင်း' စွမ်းရည်ကို ရရှိသည့်အတွက် ဂုဏ်ယူပါသည်]

အကြောင်းကြားစာကို မြင်ပြီးနောက် ဒုတိယကျမ်းလိပ်ကိုလည်း ထိုနည်းအတိုင်း လုပ်ဆောင်လိုက်သည်။

[မက်စ် ဗွိုက်ဝေါလ်ကာသည် 'မှော်ကျည်ဆန်' စွမ်းရည်ကို ရရှိသည့်အတွက် ဂုဏ်ယူပါသည်]

***

[အခြေခံ ဓားသိုင်း] – အဆင့်: [အခြေခံ] – Level: 0 – ဖော်ပြချက်: အတွေ့အကြုံသစ်များကို သင်ကြားပေးသည့် အရိုးရှင်းဆုံးနှင့် အသုံးအများဆုံး ဓားသိုင်း ဖြစ်သည်။ ဓားပညာ၏ အခြေခံ နည်းစနစ်များ၊ ဟန်ချက်ညီမှုနှင့် အချိန်ကိုက်မှုတို့ကို အလေးထားသည်။

[မှော်ကျည်ဆန်] – အဆင့်: [အခြေခံ] – Level: 0 – ဖော်ပြချက်: ဤစွမ်းရည်သည် အသုံးပြုသူအား စစ်မှန်သော မှော်စွမ်းအင်ဖြင့် ပြုလုပ်ထားသော အခြေခံ ပစ်ခတ်မှုများကို ဖန်တီး၍ ပစ်ခတ်နိုင်စေသည်။

***

'အစ်မ ပေးလိုက်တဲ့ ဒီစွမ်းရည်နှစ်ခုက ငါ့လို အစပြုသူအတွက် တကယ်ကောင်းတာပဲ။ တစ်ခုက အနီးကပ် တိုက်ခိုက်ဖို့ဖြစ်ပြီး နောက်တစ်ခုက အဝေးက တိုက်ခိုက်ဖို့ပဲ'

မက်စ်က ရရှိလာသည့် စွမ်းရည်သစ်များကို စစ်ဆေးရင်း ကျေနပ်စွာ ပြုံးလိုက်သည်။

'တိုက်ပွဲဝင်ဖို့ အချိန်ကျပြီ'

သူက ဓားကို ဆွဲထုတ်လိုက်ပြီး ကျောပိုးအိတ်ကို ကျောတွင် မြဲမြံစွာ ချည်နှောင်ကာ ခန်းမထဲသို့ ချဉ်းကပ်လာနေသော မှင်စာတွေကို တိုက်ခိုက်ရန် အသင့်ပြင်လိုက်သည်။

'Level 1 မှင်စာစုစုပေါင်း ဆယ်ကောင်'

မက်စ်က သူတို့ ကိုင်ဆောင်ထားသည့် ကျောက်ဓားများနှင့် လေးမြားတိုများကို သတိပြုလိုက်သည်။

'တကယ့် ပစ်မှတ်ကောင်းတွေပဲ'

"ငါတို့ တိုက်ခိုက်သင့်တယ်။ သူတို့က အရေအတွက် ပိုများပေမယ့် ငါတို့ အရင် စတိုက်ပြီး တစ်ကောင်၊ နှစ်ကောင်လောက်ကို အပြတ်ရှင်းနိုင်ရင် တိုက်ပွဲက လွယ်သွားလိမ့်မယ်" ဟု သူက တိုက်ပွဲအတွက် အသင့်ပြင်ထားသည့် အကယ်ဒမီ ကျောင်းသားများကို ပြောလိုက်သည်။

"ငါတို့ အဆင်သင့်ပဲ" ကျောင်းသားတစ်ဦးက ပြန်ဖြေသည်။

"ငါ့နောက်က လိုက်ခဲ့။ ငါ အပေါက်တစ်ခု ဖန်တီးပေးမယ်၊ အဲဒီကျမှ တိုက်ခိုက်ကြ"

မက်စ်က ခေါင်းညိတ်ပြီး ရှေ့သို့ ပြေးထွက်သွားသည်။ မှင်စာအချို့က သူ့ဆီသို့ မြားများဖြင့် ချက်ချင်း ပစ်ခတ်ကြသည်။

'ငါ့အတန်းအစားက ရထားတဲ့ စွမ်းရည်က ဘယ်လောက် အသုံးဝင်လဲ ကြည့်ရသေးတာပေါ့...'

သူက 'သုံးဖက်မြင် ခန္ဓာကိုယ်' ကို အသက်သွင်းလိုက်ရာ သူ ခံစားလိုက်ရသည့်အရာက သူ့ကို အံ့အားသင့်သွားစေသည်။

"ဒါ..! တောက်... ဒီစွမ်းရည်က အစွမ်းထက်လွန်းနေတာလား"

စွမ်းရည် စတင်အသက်ဝင်လာချိန်တွင် မက်စ် အံ့ဩတကြီး ရေရွတ်လိုက်မိသည်။ ရုတ်တရက် သူ့ရဲ့ အမြင်အာရုံက ပြောင်းလဲသွားသည်။ သူသည် သူ့ကိုယ်သူ တတိယလူ အမြင်ကနေ ကြည့်နေရသကဲ့သို့ ဖြစ်သွားပြီး ပတ်ဝန်းကျင်ရှိ အသေးစိတ် အချက်အလက်အားလုံးမှာ အထူးကြည်လင် လာသည်။

နံရံနားက ပိုးမွှားလေးတွေရဲ့ တိုးညင်းတဲ့ အသံ၊ ထောင့်တွေက ပင့်ကူအိမ်တွေရဲ့ အသေးစိတ် ပုံစံတွေ၊ ခန်းမရဲ့ ကြမ်းတမ်းတဲ့ ကျောက်နံရံမှာ ကပ်ငြိနေတဲ့ ရေငွေ့လေးတွေနဲ့ သူ့ဆီ ပျံသန်းလာတဲ့ မြားတွေရဲ့ လမ်းကြောင်းအထိ အားလုံးကို သူ့ရှေ့မှာ ကွက်ကွက်ကွင်းကွင်း သုံးဖက်မြင် အမြင်နဲ့ မြင်နေရသည်။

ကမ္ဘာကြီး တစ်ခုလုံး နှေးကွေးသွားသလို ခံစားရပြီး အသေးစိတ် အချက်အလက် တိုင်းကို အာရုံခံနိုင်စွမ်း မြင့်မားလာကာ သူ့ပတ်ဝန်းကျင်ကို အကဲခတ်ရာတွင် အပြတ်အသတ် သာလွန်သွားစေသည်။

'ဒါ တကယ် မိုက်တာပဲ!' မက်စ် စိတ်ထဲကနေ ဝမ်းသာနေမိသည်။

ရှူး... ရှူး... ရှူး... ရှူး...

မြားများ နီးကပ်လာသောအခါ မက်စ်က ၎င်းတို့၏ ရွေ့လျားမှုနှင့် လမ်းကြောင်းများကို အလွယ်တကူ သိရှိနိုင်သည်။ သူက ဘေးသို့ ရှောင်လိုက်ပြီး မြားတစ်စင်းကို ရှောင်ကာ နောက်ထပ် မြားတစ်စင်းကို ဓားဖြင့် ကာလိုက်သည်။ သို့သော် နောက်ထပ် မြားလေးစင်းက သူ့ကို ကျော်ပြီး နောက်က ကျောင်းသားများဆီသို့ ဦးတည်သွားနေသည်။

'သူတို့ကို နောက်ဆုံးတစ်ခေါက်လောက် ကူညီပေးလိုက်ဦးမယ်'

သူက သက်ပြင်းချရင်း 'မှော်ကျည်ဆန်' ကို အသုံးပြုကာ လေးချက် ပစ်လိုက်ရာ လာနေသော မြားများကို ကြားဖြတ် ဖျက်ဆီးလိုက်သည်။

ဒိန်း! ဒိန်း! ဒိန်း! ဒိန်း!!!

မြားအားလုံး ချက်ချင်း ပစ်ချခံလိုက်ရသည်။ မက်စ်က မှင်စာတွေဆီသို့ ချက်ချင်း အရှိန်မြှင့် ပြေးဝင်သွားသည်။ သူက ပထမတစ်ကောင်ကို ဓားဖြင့် ပခုံးမှ ခါးအထိ ခုတ်ပိုင်းချလိုက်သည်။ အစိမ်းရောင် သွေးများ လေထဲတွင် လွင့်စင်သွားသည့်အတွက် မက်စ်က ထိုညစ်ပတ်သော အရည်များကို ရှောင်တိမ်းလိုက်သည်။ မှင်စာ၏ ခန္ဓာကိုယ်သည် အနီရောင်တောက်သွားပြီး ပျောက်ကွယ်သွားကာ ပစ္စည်းအချို့ ကျန်ရစ်ခဲ့သည်။

'အကယ်ဒမီက လေ့ကျင့်မှုတွေက အလကား မဖြစ်သွားဘူးပဲ' ဟု မက်စ် တွေးလိုက်သည်။

ဘေးနှစ်ဖက်မှ တိုက်ခိုက်လာသော မှင်စာ နှစ်ကောင်ကို သတိပြုမိသဖြင့် သူက 'သုံးဖက်မြင် ခန္ဓာကိုယ်' ကို အသုံးပြုကာ တုံ့ပြန်လိုက်သည်။ သူက ဘယ်ဘက်မှ မှင်စာကို 'မှော်ကျည်ဆန်' ဖြင့် ပစ်ခတ်လိုက်ပြီး ညာဘက်မှ ကောင်ကိုမူ အလျားလိုက် ပိုင်းချလိုက်ရာ ၎င်းမှာ နှစ်ပိုင်း ပြတ်သွားသည်။ ခဏအကြာတွင် ၎င်း၏ ခန္ဓာကိုယ်မှာ ပျောက်ကွယ်သွားပြီး ပစ္စည်းအချို့ ကျန်ရစ်ခဲ့သည်။

'မှော်ကျည်ဆန်' ထိမှန်သွားသော မှင်စာမှာ ခန္ဓာကိုယ်တွင် အပေါက်တစ်ခု ဖြစ်သွားကာ နာကျင်စွာ တွန့်လိမ်ကွေးညွတ်နေသည်။ မသေသေးသော်လည်း ဒဏ်ရာများကြောင့် လှုပ်ရှားနိုင်စွမ်း မရှိတော့ပေ။

'တိုက်ခိုက်ရတာ တကယ် စိတ်လှုပ်ရှားဖို့ ကောင်းတာပဲ၊'

မှင်စာတွေကို တိုက်ခိုက်ရင်း မက်စ်၏ စိတ်ထဲတွင် ကျေနပ်မှုများ ပြည့်နှက်နေသည်။

'တခြားလူတွေကော ဘယ်လိုလဲ'

နောက်သို့ လှည့်ကြည့်လိုက်သောအခါ အခြားလူများလည်း မှင်စာတွေကို ရင်ဆိုင်နေသည်ကို သူ တွေ့လိုက်ရသည်။

'သူတို့ကတော့ မှင်စာ သုံးကောင်ကိုတောင် မနည်း ရင်ဆိုင်နေရတာပဲ၊ ဒါပေမဲ့ ငါ ဘာမှ မပြောတော့ပါဘူး'

သူက ကျန်ရှိနေသော မှင်စာ လေးကောင်ထံသို့ ရှေ့သို့ ပြေးထွက်သွားတော့သည်။