အခန်း (၃၄)-မှန်တွင်းမှ နှောင်ကြိုး

မာရုနီ ၏ ဝံပုလွေဟောင်သံကဲ့သို့ ပြင်းထန်လှသော သွေးမိစ္ဆာအတတ်

‘အရိပ်ဝံပုလွေအော်မြည်သံ’ (Shadow Wolf Howl) ကြောင့် လေထုတစ်ခုလုံး တုန်ခါသွားရသည်။ ထိုအသံလှိုင်းကြောင့် ရန်သူ့မှန်သားပြင်များ တစ်စစီ အက်ကွဲပျက်စီးသွားသည်ကို မြင်လိုက်ရသည့်အခါ ရှင်အိချီ သည် အခွင့်ကောင်းကို လက်လွတ်မခံဘဲ ချက်ချင်းပင် ရှေ့သို့ တိုးဝင်လိုက်တော့သည်။

“သစ်တောအသက်ရှူသွင်ပြင်၊ ပထမပုံစံ - သံပင်မော်ကွန်းဓားချက် (Iron Birch Slash)!”

ရှင်အိချီ၏ နီချီရင် ဓားသွားသည် လေကိုခွဲကာ ဂင်ခန် ၏ လည်ပင်းဆီသို့ ပြင်းထန်စွာ ဝှေ့ယမ်းသွားသည်။

သို့သော်လည်း ဂင်ခန်သည် လွယ်လွယ်နှင့် အရှုံးပေးမည့်ပုံမပေါ်ချေ။

၎င်း၏ လက်ကျန်မှန်သားတုံးများထဲမှ ရှင်အိချီနှင့် တစ်ပုံစံတည်းတူသော အရိပ်လူသားတစ်ယောက် ရုတ်တရက် ရုန်းထွက်လာပြီး ရှင်အိချီ၏ ဓားချက်ကို ကြားဖြတ်ခုခံလိုက်သည်။

ထိုအရိပ် သည် မိမိ၏ မူလစွမ်းအားနှင့် အဆင့်အတန်းချင်း တူညီနေကြောင်း ရှင်အိချီ ချက်ချင်း ရိပ်မိလိုက်သည်။

မိစ္ဆာတစ်ကောင်၏ စွမ်းအားကို တန်ပြန်ချေမှုန်းရန်အတွက် မိမိကိုယ်တွင်းရှိ တားမြစ်ထားသော စွမ်းအားကို ထုတ်သုံးရန်မှတစ်ပါး အခြားမရှိတော့ချေ။

“သွေးမိစ္ဆာအတတ်သွေးဆူသောင်းကျန်းခြင်း ”

ရှင်အိချီ စိတ်တွင်းမှ ကြွေးကြော်လိုက်သည်နှင့် တစ်ပြိုင်နက် သူ၏ ညာဘက်မျက်လုံးသည် တောက်ပသော သွေးရောင်အဖြစ်သို့ ပြောင်းလဲသွားပြီး အစွယ်များ ထွက်ပေါ်လာသည်။

သူ၏ ကြွက်သားများနှင့် ခန္ဓာကိုယ်ခွန်အားသည် ဆတိုး တိုးတက်လာပြီး ဓားချက်၏ အရှိန်အဟုန်မှာလည်း အဆပေါင်းများစွာ ပြင်းထန်သွားတော့သည်။

မိမိအား ခုခံနေသော အရိပ်လူသားနှင့် မှန်ချပ်ကာကွယ်ရေး အားလုံးကို တစ်စစီ ရိုက်ခွဲပစ်လိုက်ပြီးနောက်၊ ရှင်အိချီ၏ ဓားဖျားသည် မျက်စိတစ်မှိတ်အတွင်းမှာပင် ဂင်ခန်၏ လည်ပင်းကို ပြတ်တောက်သွားစေခဲ့သည်။

“အားးးးးးး!”

ဂင်ခန်၏ ဦးခေါင်းသည် မြေပြင်ပေါ်သို့ လိမ့်ဆင်းသွားသည်။ လိမ့်ဆင်းသွားသော ဦးခေါင်းက ရှင်အိချီကို ကြည့်ကာ မယုံကြည်နိုင်လောက်အောင် အော်ဟစ်လေသည်။

“မင်း... မင်းလည်း မိစ္ဆာတစ်ကောင်ပဲ မဟုတ်လား!

ငါတို့က အမျိုးအနွယ်တူတွေလေဗျာ! ငါ့ကို ချမ်းသာပေးပါ!”

ရှင်အိချီသည် မြေပြင်ပေါ်ရှိ ဦးခေါင်းကို ငုံ့ကြည့်ကာ သူ၏ နီချီရင်ဓားဖြင့် ခေါင်းလယ်တည့်တည့်သို့ ဆွဲစိုက်ချလိုက်ရင်း အေးစက်စွာ ပြောလိုက်သည်။

“မင်းတို့လို ယုတ်ညံ့တဲ့ မိစ္ဆာတွေနဲ့ ငါ့ကို လာမနှိုင်းနဲ့။ ငါက မိစ္ဆာတွေကို အမဲလိုက်တဲ့ ဓားသမား ရှင်အိချီပဲ!”

“သွေးမိစ္ဆာအတတ်သက်စောင့်အားစုပ်ယူခြင်း ”

ရှင်အိချီ၏ ဓားသွားမှတစ်ဆင့် နွယ်ပင်ငယ်များ ထွက်ပေါ်လာပြီး ဂင်ခန်၏ ဦးခေါင်းတွင်းရှိ လက်ကျန်အသက်စွမ်းအားနှင့် မိစ္ဆာသွေးများကို လောဘတကြီး စုပ်ယူပစ်လိုက်သည်။ ဂင်ခန်၏ ဦးခေါင်းသည် တဖြည်းဖြည်းနှင့် ပြာမှုန့်အဖြစ်သို့ ပြောင်းလဲကာ လေထဲတွင် လွင့်ပါးပျောက်ကွယ်သွားရတော့သည်။

ဂင်ခန်၏ အသက်စွမ်းအားများကို စုပ်ယူလိုက်သည့်အခါ ရှင်အိချီ၏ စိတ်အာရုံထဲသို့ ဂင်ခန်၏ အတိတ်မှန်ပြောင်းအမှတ်တရများ စီးဆင်းဝင်ရောက်လာသည်။

ထိုမိစ္ဆာသည် ဒဏ္ဍာရီလာ မှန်လက်သမားပညာရှင် အစစ်အမှန်မဟုတ်ဘဲ လောဘရမ္မက်ကြီးမားလှသည့် ကိုမိီယာအိီ မိသားစုမှ သစ္စာဖောက် အမျိုးအနွယ်တစ်ဦးသာ ဖြစ်ခဲ့သည်။ သူသည် မိသားစု၏ လျှို့ဝှက်မှန်သွန်းလုပ်နည်းပညာကို ခိုးယူရန်အတွက် ကလေးငယ်တစ်ဦးကိုပင် လှည့်ဖြားအသုံးချခဲ့သည်။ သို့သော် ကံကြမ္မာက မျက်နှာသာမပေးခဲ့ဘဲ ထိုနည်းပညာကို ခိုးယူပြီး ထွက်ပြေးသည့် ထိုညမှာပင် ဓားပြများ၏ တိုက်ခိုက်ခြင်းကိုခံရကာ သေလုမြောပါး ဖြစ်ခဲ့ရသည်။

သွေးအိုင်ထဲတွင် လဲလျောင်းနေစဉ်၊ သားရေဖိနပ်အမည်းကို စီးထားပြီး နက်ရှိုင်းအေးစက်သော အသံပိုင်ရှင် မူဇန် ကီဘွတ်ဆူဂျီ ရောက်ရှိလာခဲ့သည်။

မူဇန်က သူ၏ ရုပ်ဆိုးလှသော မျက်လုံးများကို လှောင်ပြောင်ပြီး မိစ္ဆာသွေးကို ဖြည့်တင်းပေးကာ မျက်လုံးများနေရာတွင် ငွေမှန်ချပ်များကို အစားထိုးပေးခဲ့ခြင်း ဖြစ်သည်။ ၎င်းနောက်တွင် ထိုမိစ္ဆာသည် တယ်ရာနီရှီ ရွာငယ်လေးတွင် အခြေချကာ လောဘဇောတိုက်နေသော ရွာသားများနှင့် ပူးပေါင်းပြီး၊ ကလေးငယ်များကို ယဇ်ပူဇော်သက္ကာအဖြစ် လက်ခံကာ တန်ဖိုးကြီးမှန်များကို လဲလှယ်ပေးခဲ့သည့် ရာဇဝတ်မှုများကို ကျူးလွန်ခဲ့ခြင်း ဖြစ်သည်။

ရှင်အိချီသည် သက်ပြင်းတစ်ချက်ချလိုက်ရင်း မိမိကိုယ်ကိုယ် ပြန်လည်ထိန်းချုပ်လိုက်သည်။

၎င်းနောက်တွင် နွားပေါက်တစ်ကောင်ခန့် ပမာဏရှိသော အနက်ရောင်ဝံပုလွေကြီး မာရုနီသည် သူ၏အနားသို့ ပြေးလွှားလာပြီး၊ ခန္ဓာကိုယ်တစ်ခုလုံး တဖြည်းဖြည်း ကျုံ့ဝင်သွားကာ ဝဝတုတ်တုတ်နှင့် ချစ်စရာကောင်းသော ရှီဘာအိနု ခွေးလေးအဖြစ်သို့ ပြန်လည်ပြောင်းလဲသွားတော့သည်။

“ကောင်းတယ်၊ မာရုနီ။ မင်း ဒီနေ့ အတော်လေး ကူညီပေးနိုင်ခဲ့တယ်။ ဒီညတော့ မင်းကို အသားကျွေးပြီး အစားအသောက်လျှော့တဲ့ အစီအစဉ်ကို ခေတ္တရပ်ဆိုင်းပေးမယ်”

ရှင်အိချီက ချီးမွမ်းလိုက်သဖြင့် မာရုနီသည် အမြီးကို တဖျတ်ဖျတ်ရမ်းကာ ဝမ်းသာအားရ ဖြစ်နေရှာသည်။

ထိုစဉ် မာရုနီသည် မြေပြင်ပေါ်မှ ဆုတ်ဖြဲခံထားရသကဲ့သို့ ရှိသော ငွေမှန်တစ်ချပ်ကို ကိုက်ချီ၍ ရှင်အိချီ၏ ခြေရင်းသို့ ချပေးလေသည်။

ထိုမှန်သည် ဂင်ခန်သေဆုံးသွားသော်လည်း ပြာအဖြစ် ပြောင်းလဲမသွားဘဲ ကျန်ရစ်ခဲ့ခြင်း ဖြစ်သည်။

ရှင်အိချီသည် မှန်ချပ်ကို ကောက်ယူကြည့်ရှုလိုက်ရာ၊ မှန်၏အတွင်းပိုင်း ဟင်းလင်းပြင်ထဲတွင် အသက်ရှူသံသဲ့သဲ့နှင့် သက်ရှိများ ရှိနေကြောင်း ခံစားလိုက်ရသည်။

သူသည် မိမိ၏ လက်သည်းများကို အသုံးပြုကာ မှန်သားပြင်၏ အက်ကွဲကြောင်းကို အားဖြင့် ဆွဲဖြဲပစ်လိုက်သည်။

ဖျတ်... ဝုန်း!

လင်းလက်တောက်ပသော အလင်းတန်းတစ်ခုနှင့်အတူ မှန်အတွင်းမှ လူသုံးဦး မြေပြင်ပေါ်သို့ လွင့်စင်ကျလာသည်။

၎င်းတို့မှာ သတိမေ့မြောနေသော အမဲလိုက်အဖွဲ့ဝင် လူကြီးနှစ်ဦးနှင့် မိန်းကလေးငယ်တစ်ဦးတို့ ဖြစ်ကြသည်။ ၎င်းတို့၏ ခန္ဓာကိုယ်တွင်းမှ သက်စောင့်အားများသည် တဖြည်းဖြည်း လျော့နည်းလာနေသဖြင့် ရှင်အိချီသည် အချိန်ဆွဲမနေတော့ဘဲ မိမိ၏ ဓားဖျားဖြင့် ၎င်းတို့၏ လက်ကောက်ဝတ်များကို အနည်းငယ်စီ တို့ထိကာ သွေးစအချို့ ထွက်စေလိုက်သည်။

“သစ်တောအသက်ရှူသွင်ပြင်၊ ဒုတိယပုံစံ - အသက်စောင့်မိုးမခ ”

ရှင်အိချီ၏ ဓားသွားမှတစ်ဆင့် စိမ်းစိုသော သစ်တောအရှိန်အဝါများနှင့် အသက်ဓာတ် စွမ်းအင်များသည် ဒဏ်ရာများမှတစ်ဆင့် ထိုလူသုံးဦး၏ ခန္ဓာကိုယ်အတွင်းသို့ စီးဝင်သွားပြီး ၎င်းတို့၏ အသက်ရှူသံများ ပြန်လည်မှန်ကန်လာစေသည်။

မကြာမီအချိန်အတွင်းမှာပင် သတိမေ့မြောနေသော အမဲလိုက်အဖွဲ့ဝင်တစ်ဦးသည် မျက်လုံးများကို ဖြည်းညှင်းစွာ ဖွင့်ဟလာပြီး ဝေဝါးသောအကြည့်များဖြင့် ဘေးပတ်ဝန်းကျင်ကို ကြည့်ရှုကာ ရုန်းထွက်ရန် ကြိုးစားနေတော့သည်။