အခန်း ၄၃ - မစ်ရှင် ပြီးမြောက်ခြင်းနှင့် စနစ်၏ လုပ်ဆောင်ချက်အသစ်များ

ဖုန်းယု၏ ခေါင်းဖြတ်ခြင်းကို ခံလိုက်ရပြီးနောက် နတ်ဆိုး၏ ခန္ဓာကိုယ်က ပြာအဖြစ် ဆက်လက်ပြောင်းလဲသွားပြီး၊ သွေးနီရောင် ဓားမကြီးမှာလည်း တဖြည်းဖြည်း အရောင်မှေးမှိန်သွားကာ ၎င်း၏ မူလပုံစံ ပေါ်လာတော့သည်။ ကျိုးပဲ့နေသော ခေါင်းဖြတ်ဓားတစ်လက်က မြေပြင်ပေါ်တွင် ထွက်ပေါ်လာပြီးနောက် သာမန်မျက်စိဖြင့် မြင်တွေ့နိုင်လောက်သော အမြန်နှုန်းဖြင့် ဆွေးမြည့်သွားခဲ့သည်။ တဖြည်းဖြည်းနှင့် သံချေးတုံးများနှင့် ဓားရိုးတစ်ခုအဖြစ်သာ ကျန်ရစ်တော့သည်။

ဖုန်းယု အနည်းငယ် စိတ်လှုပ်ရှားသွားသည်။ သူ၏ရှေ့မှ မြင်ကွင်းက သူ့ကို အနည်းငယ် တုန်လှုပ်သွားစေသည်။ သူတို့ရှေ့တွင် ကလေးများ၊ လူငယ်များနှင့် သက်ကြီးရွယ်အိုများ အပါအဝင် အရွယ်စုံ လူအုပ်ကြီးတစ်အုပ် ထွက်ပေါ်လာသည်။ ဖုန်းယုသည် ဤလူများကို ယခင်က တစ်ခါမှ မမြင်ဖူးခဲ့ပေ။ သူမြင်ဖူးသူဆို၍ ထိုညက အရက်သမားဖြစ်ခဲ့သော နီရှီမီယာ၏ ချမ်းသာကြွယ်ဝပုံပေါ်သည့် ဖခင်တစ်ဦးတည်းသာ ပါဝင်သည်။

သူတို့အားလုံးက ဖုန်းယုကို ကျေးဇူးတင်စကားဆိုသည့်အနေဖြင့် လက်ပြနှုတ်ဆက်ခဲ့ကြသည်။ ထို့နောက် ဖြည်းညင်းစွာ ပျောက်ကွယ်သွားကြသည်။

"ဒီလောကကြီးမှာ ဝိညာဉ်ဆိုတာ တကယ်ရှိနေတာလား..." ဟု ဖုန်းယုက ကိုယ့်ကိုယ်ကိုယ် မေးလိုက်သည်။ မည်သို့ပင်ဆိုစေ ဤကဲ့သို့သောအရာက အနည်းငယ်တော့ ယုံကြည်ရခက်နေသည် မဟုတ်ပါလား။

သို့သော် ထပ်မံတွေးကြည့်လိုက်သောအခါ၊ သူသည် ဝိညာဉ်များ ရှိနေခြင်းနှင့် ထိတွေ့ဖူးပြီးဖြစ်နေသလိုပင်။ ဆာမာဂီရိတောင်ထိပ်ရှိ ယူဆာဂီ၊ မာဆာတိုနှင့် ကလေးများလိုမျိုးပေါ့။ သူတို့အားလုံး၏ စိတ်ထဲတွင် စွဲလမ်းမှုများရှိနေကြပြီး၊ ထိုစွဲလမ်းမှုများကပင် သူတို့ကို ဤလောကတွင် အခြားပုံစံတစ်မျိုးဖြင့် ဆက်လက်တည်ရှိနေစေခြင်း ဖြစ်သည်။

"ကောင်းရာသုဂတိလားပါစေ!" ဖုန်းယုက ရိုသေကိုင်းရှိုင်းစွာဖြင့် ဆုတောင်းပေးလိုက်သည်။

ဤအချိန်မှာပင်။ နေမင်းကြီးကလည်း ထွက်ပေါ်လာခဲ့သည်။

ဖုန်းယုက မြင့်မြတ်လှသော နေရောင်ခြည်ကို ကြည့်ကာ တစ်စုံတစ်ခုကို သိမြင်နားလည်သွားသကဲ့သို့ ခံစားလိုက်ရပြီးနောက် အလင်းအသက်ရှူခြင်းက စတင် လည်ပတ်လာခဲ့သည်။ သူ၏လက်ထဲရှိ နီချီရင်ဓားကို လွှဲယမ်းလိုက်သည်နှင့်တစ်ပြိုင်နက်၊ အလင်းတန်းများ ပျံ့နှံ့ထွက်ပေါ်သွားပြီး မြို့ငယ်လေး၏ နေရာတိုင်းဆီသို့ ကျဆင်းသွားတော့သည်။

"ဒီသိုင်းကွက်ကို အလင်းအသက်ရှူခြင်း စတုတ္ထသိုင်းကွက် - ကယ်တင်ခြင်း လို့ခေါ်တယ်..." ဖုန်းယုက တီးတိုးရေရွတ်လိုက်သည်။

"လရောင်ဓားချက်၊ ကမ္ဘာမြေ၏ အလင်း ၊ အလင်း၏လမ်းပြမှု၊ ကယ်တင်ခြင်း..." ဤအခိုက်အတန့်တွင် ဖုန်းယုက သိုင်းကွက်လေးကွက်ကို ဖန်တီးနိုင်ခဲ့သည်။ဖုန်းယုသည် အလင်းအသက်ရှူခြင်း သိုင်းကွက်သုံးကွက်ကို ကျွမ်းကျင်ပိုင်နိုင်ရန် ခြေတစ်လှမ်းသာ လိုတော့ပြီး ယခုအခါလည်းဖုန်းယုကို စိတ်ကူးဉာဏ်များ ရရှိစေခဲ့သည်။

တစ်ပြိုင်နက်တည်း မစ်ရှင်နှစ်ခုကို ပြီးမြောက်ခဲ့ပြီးနောက် ဖုန်းယုတစ်ယောက် ပျော်ရွှင်သွားခဲ့သည်။

တခြားတစ်ဖက်တွင်တော့

လေနှင့် အလင်း၏ ခေါ်ဆောင်မှုနောက်သို့ လိုက်ပါကာ ကယ်တင်ခြင်းအလင်းရောင်များ မြို့လေး၏ ထောင့်တိုင်းဆီသို့ ကျရောက်သွားသောအခါ၊ အိပ်မောကျနေသော မြို့သူမြို့သားများက တစ်ယောက်ပြီးတစ်ယောက် စတင် နိုးထလာကြသည်။ မျက်လုံးပွင့်လာသည်နှင့်တစ်ပြိုင်နက် သူတို့ရှေ့ရှိ အပျက်အစီးများကို ကြောင်တောင်တောင်ဖြင့် ကြည့်နေမိကြသည်။

"ငါ့အိမ်လေးရော? ငါ့ရဲ့ အိမ်ကြီးက ဘယ်ရောက်သွားတာလဲ?"

"ငါ အိပ်မက်မက်နေတုန်းပဲ ဖြစ်ရမယ်..."

ဆူညံသံများ စတင်ထွက်ပေါ်လာသော်လည်း မြို့လေးရှိ ရဲစခန်းမှ လူများက လျင်မြန်စွာပင် ထိန်းချုပ်လိုက်နိုင်ခဲ့သည်။ သူတို့က သတင်းရရှိထားပြီးဖြစ်ကာ ဘာတွေဖြစ်ပျက်ခဲ့သည်ကို သိရှိထားကြသည်။ နေအိမ်များ ဆုံးရှုံးသွားသော မြို့ခံများကို လျော်ကြေးပေးမည်ဟု ကတိပြုလိုက်သည်။ ယင်းက မြို့ခံများ၏ မကျေနပ်မှုများကို ငြိမ်သက်သွားစေခဲ့သည်။

ဤအချိန်တွင် ဖုန်းယုသည် ဒဏ်ရာဗရပွဖြစ်နေသော ရှောင်ပိုင်နှင့်အတူ တည်းခိုခန်းသို့ ပြန်ရောက်နေပြီဖြစ်သည်။ ကုသရေးဆေးလုံးကို တိုက်ကျွေးပြီးနောက် ရှောင်ပိုင်၏ ဒဏ်ရာများမှာ သက်သာပျောက်ကင်းသွားခဲ့သည်။ ဖုန်းယုက ရေကန်တစ်ခုဆီသို့ လာခဲ့ပြီး ရှောင်ပိုင်၏ နီရဲနေသော အမွေးများကို ရေစိုအဝတ်ဖြင့် ညင်သာစွာ သုတ်သင်ပေးလိုက်သည်။

"ရှောင်ပိုင်၊ ပင်ပန်းသွားပြီ ကျေးဇူးပဲ..." ဖုန်းယုက သက်ပြင်းချလိုက်သည်။

သူ နတ်ဆိုး၏ ထိန်းချုပ်ခံရချိန်တွင် ရှောင်ပိုင်က သူ့ကိုယ်သူ ကာကွယ်ရန် အစွမ်းကုန် ကြိုးစားခဲ့ရလိမ့်မည်ဆိုတာကို သူ သိသည်။

"စိတ်စွမ်းအင် လျှို့ဝှက်သိုင်းကွက်က ပြီးပြည့်စုံတဲ့အဆင့်ကို ရောက်သွားတာနဲ့ စိတ်ပိုင်းဆိုင်ရာ တိုက်ခိုက်မှုတွေကို လျစ်လျူရှုနိုင်မယ်လို့ အစက ငါထင်ခဲ့တာ... အဲဒါက ငါ့ရဲ့ မသိနားမလည်မှုဖြစ်နေမှန်း သိလိုက်ရတယ်..."

ဖုန်းယုတစ်ယောက် သူ၏ မောက်မာမှုအတွက် နောင်တရသွားပြီး နတ်ဆိုး၏ မတော်တဆ ထိန်းချုပ်ခံလိုက်ရခြင်းအပေါ် ခံပြင်းနေမိသည်။

(-_-) (-_-)

"ဒင်! စနစ် အဆင့်မြှင့်တင်ခြင်း ပြီးမြောက်ပါပြီ၊ ကျေးဇူးပြု၍ သေချာစွာ စစ်ဆေးပါ။"

"ဒီတစ်ကြိမ် အဆင့်မြှင့်တင်တာက ဒီလောက်တောင် မြန်တာလား?"

ပထမအကြိမ် စနစ်အဆင့်မြှင့်တင်စဉ်က ရက်အတော်ကြာ အချိန်ယူခဲ့ရသည်ကို သူ မှတ်မိနေသေးသည်။ သို့သော် ဤတစ်ကြိမ်တွင်မူ နေ့တစ်ဝက်ပင် မကြာလိုက်သည်ကို သူ မျှော်လင့်မထားခဲ့ပေ။ ဖုန်းယုက စနစ်၏ လုပ်ဆောင်ချက်အသစ်များကို အလျင်အမြန် စစ်ဆေးကြည့်လိုက်သည်။

**ဉာဏ်ဖြင့် ဖြည့်စွက်တွေးခေါ်ခြင်း (Deduction)** - သိုင်းကွက်တစ်ခုကို အမြင့်ဆုံး ကန့်သတ်ချက်အထိ ရောက်ရှိသွားစေရန် ဓားလွှဲယမ်းရမည့် အကြိမ်အရေအတွက် အချို့ကို အသုံးပြု၍ ဖြည့်စွက်တွေးခေါ်ပါ။

**ပေါင်းစပ်ခြင်း (Synthesis)** - ပစ္စည်းများ၊ သိုင်းကွက်များနှင့် အခြားအရာများကို ပေါင်းစပ်ရန် ဓားလွှဲယမ်းရမည့် အကြိမ်အရေအတွက် အချို့ကို အသုံးပြုပါ။ ကျရှုံးနိုင်ခြေ ရာခိုင်နှုန်း အတိုင်းအတာတစ်ခုအထိ ရှိသော်လည်း ပေါင်းစပ်ထားသော ပစ္စည်းများကို ပြန်လည်ရရှိမည်ဖြစ်၍ ကျေးဇူးပြုပြီး ဂရုတစိုက် အသုံးပြုပါ!

"ဖြည့်စွက်တွေးခေါ်ခြင်း... ပေါင်းစပ်ခြင်း... စနစ်က မစ်ရှင်နှစ်ခုစလုံးက ဆုလာဘ်တွေကို ထုတ်ယူလိုက်တာလား?"

ဖုန်းယု ကြည့်လိုက်ရာ သူ၏ အချက်အလက်တွင် အရာများစွာ ထွက်ပေါ်လာသည်ကို အမှန်တကယ်ပင် မြင်တွေ့လိုက်ရသည်။

အမည် - နာကာဂါဝါ ဖုန်းယု

ဓားလွှဲချရမည့် အကြိမ်အရေအတွက် - ၇,၆၈၈,၅၂၁

အသက်ရှူခြင်းနည်းစနစ် - ရေအသက်ရှူခြင်း၊ အလင်းအသက်ရှူခြင်း

သိုင်းပညာ - ဓားရေးပညာ၊ ခန္ဓာကိုယ်ကြံ့ခိုင်မှု နည်းစနစ်၊ လေစီးနင်းခြင်းနည်းစနစ် ၊ ရွှေခန္ဓာသွန်းလောင်းခြင်းနည်းစနစ်၊ ကျားငါးကောင် လက်သီးသိုင်း၊ စိတ်စွမ်းအင် လျှို့ဝှက်သိုင်းကွက်

ခန္ဓာကိုယ်ဖွဲ့စည်းပုံ - မသေမျိုး ခန္ဓာကိုယ်

အိမ်မွေးသားရဲများ - ရှောင်ပိုင်၊ ရှောင်ဟေး

**မစ်ရှင် (၁)** - နတ်ဆိုးဘုရင် ကီဘူဆုဂျီ မူဇန်ကို သတ်ဖြတ်ပါ။

**မိတ်ဆက်** - နတ်ဆိုးဘုရင် ကီဘူဆုဂျီ မူဇန်သည် ဤလောကရှိ အရာအားလုံး၏ အစအနဖြစ်သည်။ ဤမကောင်းဆိုးဝါးများ၏ မြစ်ဖျားခံရာကို အဆုံးသတ်ရန် သူ့ကို သတ်ဖြတ်ပါ။

**ဆုလာဘ်များ** - ဓားလွှဲယမ်းအမှတ် - ၁၀ သန်း၊ သတ်မှတ်ထားသော ကမ္ဘာသို့ ခရီးသွားခွင့် - ၁ကြိမ်၊ လျှို့ဝှက်ဆန်းကြယ် လက်ဆောင်ထုပ် - ၁ထုပ်။

**အခြေအနေ** - မပြီးမြောက်သေးပါ။

**ဆက်တိုက်မစ်ရှင်** - နတ်ဆိုးများကို သတ်ဖြတ်ပါ။

**မိတ်ဆက်** - နေဝင်သွားပြီးနောက် အဆုံးမရှိသော နတ်ဆိုးများက အမဲစတင်လိုက်ကြသည်။ သင်က လူသားတစ်ယောက်ဖြစ်သည်၊ သွား၍ နတ်ဆိုးအားလုံးကို သတ်ဖြတ်ပါ။

**ဆုလာဘ်** - အမည်မသိ (ပြီးမြောက်မှု ရာခိုင်နှုန်းအပေါ် မူတည်သည်၊ ပြီးမြောက်မှု မြင့်မားလေ၊ ဆုလာဘ် ကြီးမားလေဖြစ်မည်)

**အခြေအနေ** - ဝ.၅ %

**မစ်ရှင် (၁)** - နတ်ဆိုးနှိမ်နင်းရေးတပ်ဖွဲ့၏ ဟာရှီရာ တစ်ဦး ဖြစ်လာစေရန်။

**မိတ်ဆက်** - ကမ္ဘာကြီး၏ ထိပ်တန်းအဆင့် စွမ်းအားကို ပိုင်ဆိုင်ထားပြီးသူများသည် ဤအတိုင်း ဆက်၍ ငြိမ်မနေသင့်ပေ။

**ဆုလာဘ်** - အရာခပ်သိမ်း ဈေးဝယ်စင်တာတွင် ဒဏ္ဍာရီလာအဆင့် ပစ္စည်းအသစ်ပြန်ခေါ်ခွင့် - ၁ကြိမ်၊ ဓားလွှဲယမ်းအမှတ် - ၃ သန်း၊ အစားထိုးကိုယ်ပွားအရုပ် - ၁ခု၊ ကျပန်း အိမ်မွေးသားရဲ စွမ်းရည် - ၁ခု။

**အခြေအနေ** - မပြီးမြောက်သေးပါ။

**မစ်ရှင် (၂)** - နတ်ဆိုးနှိမ်နင်းရေးတပ်ဖွဲ့၏ ဟာရှီရာများကို အနိုင်ယူပါ။

**မိတ်ဆက်** - နတ်ဆိုးနှိမ်နင်းရေးတပ်ဖွဲ့၏ ဟာရှီရာများကို စိန်ခေါ်ပြီး သူတို့၏ အသိအမှတ်ပြုမှုကို ရယူပါ။ အနိုင်ယူနိုင်သော သူတစ်ဦးချင်းစီအတွက် ဆုလာဘ်များ ကွာခြားပါမည်။

**ဆုလာဘ်များ** - ပြီးမြောက်မှုအပေါ် မူတည်၍ ရရှိမည်။

**အခြေအနေ** - ဝ %

"စနစ်ရဲ့ မစ်ရှင်စာရင်းက အသစ်ပြန်ဖြစ်သွားတာပဲ..."

"ပြီးတော့ ဒီအစားထိုးအရုပ်ဆိုတာ ငါထင်နေတဲ့အရာပဲလား..."

ဖုန်းယုမှာ အသံတိတ်သွားပြီး သူ၏ အချက်အလက်တစ်ခုလုံးကို တိတ်ဆိတ်စွာ စစ်ဆေးနေလိုက်သည်။

"ဖြည့်စွက်တွေးခေါ်တဲ့ လုပ်ဆောင်ချက်ကို... စမ်းကြည့်ရရင် ကောင်းမလား..."

ထို့နောက် သူက ရေအသက်ရှူခြင်းကို ဖြည့်စွက်တွေးခေါ်ခြင်း လုပ်ဆောင်ချက်ထဲသို့ တိတ်တဆိတ် ဆွဲထည့်လိုက်သည်။

"ဒင်! ဖြည့်စွက်တွေးခေါ်ခြင်းအတွက် ဓားလွှဲယမ်းအမှတ် (၂ သန်း) ကို အသုံးပြုလိုပါသလား?"

"သေချာတာပေါ့!" ဖုန်းယုက သွားကိုက်ကာ အတည်ပြုလိုက်သည်။

မျက်စိတစ်မှိတ်အတွင်းမှာပင် ခုနစ်သန်းကျော်ရှိနေသော ဓားလွှဲအကြိမ်ရေမှ ငါးသန်းကျော်သို့ လျော့ကျသွားခဲ့သည်။

"တကယ်ကို နာကျင်ရတာပဲ..." ဖုန်းယု၏ နှလုံးသားက သွေးထွက်မတတ် နာကျင်နေသော်လည်း ဖြည့်စွက်တွေးခေါ်ခြင်း၏ ရလဒ်ကို ကြီးမားသော မျှော်လင့်ချက်များဖြင့် ကြည့်နေမိသည်။

"ဒင်! ဖြည့်စွက်တွေးခေါ်ခြင်း အောင်မြင်ပါသည်။ ရေအသက်ရှူခြင်းသည် ကန့်သတ်ချက်များကို ချိုးဖျက်ကာ ပြီးပြည့်စုံသော အဆင့်သို့ ရောက်ရှိသွားသည့်အတွက် ဂုဏ်ယူပါသည်။"

"ဝုန်း"

ဖုန်းယု သူ၏ခေါင်း ပေါက်ကွဲထွက်သွားသကဲ့သို့ ခံစားလိုက်ရသည်။ သူ မျက်လုံးဖွင့်ကြည့်လိုက်သောအခါ ဟုန်းဟုန်းမြည်နေသော သမုဒ္ဒရာကြီး၏ အလယ်တွင် ရပ်နေသည်ကို တွေ့လိုက်ရသည်။ မျက်စိဖြင့်မမြင်နိုင်ဘဲ ခုခံ၍မရသော အင်အားတစ်ခုက သူ၏ ခန္ဓာကိုယ်ကို အဆက်မပြတ် ဆွဲငင်နေသည်။ ဖုန်းယု မခုခံနိုင်ခဲ့ပေ၊ ဤစွမ်းအားက အရမ်းကို ပြင်းထန်လွန်းနေသည်။ နောက်ဆုံး ဆူနာမီလှိုင်းလုံးကြီး ရိုက်ခတ်လာပြီး ဖုန်းယုကို ဖုံးလွှမ်းသွားတော့သည်။

"အား!"

လက်တွေ့ကမ္ဘာတွင် ဖုန်းယု ရုတ်တရက် မျက်လုံးများ ပွင့်လာခဲ့သည်။ အဝတ်အစားများအားလုံး ရေစိုရွှဲနေခဲ့သည်။ ဖုန်းယု ချက်ချင်းပင် မြေပြင်ပေါ်သို့ အားပျော့စွာ လဲကျသွားပြီး လေကို လုရှူနေရသည်။

"ငါ ခုလေးတင်... ငရဲကို ဖြတ်သန်းလာခဲ့ရတာလား...?" ဖုန်းယုက ခုလေးတင် သူကြုံတွေ့ခဲ့ရသောအရာများ မည်မျှ လက်တွေ့ဆန်ကြောင်းကို မယုံကြည်နိုင်အောင် ဖြစ်နေသည်။

"ဒါပေမဲ့... ငါ တကယ်ပဲ ရေအသက်ရှူခြင်းရဲ့ (၁၂)ခု‌မြောက် ပုံစံကို ဖန်တီးနိုင်ခဲ့ပြီ... ဧရာမ လှိုင်းလုံးကြီး..."

"(၁၁)ခုမြောက်ပုံစံက တည်ငြိမ်အေးချမ်းမှု... (၁၂)ခုမြောက်ပုံစံက ဧရာမ လှိုင်းလုံးကြီး... တစ်ခုက အမြင့်ဆုံး ကာကွယ်မှုဖြစ်ပြီး နောက်တစ်ခုက အမြင့်ဆုံး တိုက်ခိုက်မှုပဲ..."

"ကာကွယ်မှုတစ်ခု၊ တိုက်ခိုက်မှုတစ်ခု... ရေအသက်ရှူခြင်းက ပြီးပြည့်စုံသွားခဲ့ပြီ!"

ဖုန်းယု၏ ခန္ဓာကိုယ်က အားနည်းနေသော်လည်း သူ၏ မျက်နှာပေါ်တွင် အပြုံးတစ်ခု ရှိနေခဲ့သည်။

"အခုတော့... ငါ့ရဲ့ စွမ်းအားက ဟာရှီရာ အဆင့်ကို တကယ်ရောက်သွားပြီပဲ!"

သူ၏ ခွန်အားများ ဖြည်းညင်းစွာ ပြန်လည်ပြည့်ဝလာသည်နှင့်အမျှ ဖုန်းယုလည်း မတ်တတ်ရပ်လိုက်သည်။

"ပေါင်းစပ်ခြင်း... စွန့်စားရမှုက နည်းနည်းများတယ်... ပြီးတော့ ပေါင်းစပ်ဖို့ ဘာမှလည်း မရှိသေးဘူး..."

"သိုင်းကွက်တွေဆိုရင်တော့... ရနိုင်လောက်တယ်..."

"ထားလိုက်ပါတော့၊ အရာခပ်သိမ်း ဈေးဝယ်စင်တာထဲက ဒဏ္ဍာရီလာအဆင့် ပစ္စည်းတွေကို အရင်သွားကြည့်လိုက်ရအောင်..."

ဖုန်းယုက အရာခပ်သိမ်း ဈေးဝယ်စင်တာကို ဖွင့်လိုက်ပြီး ရွှေရောင်လင်းလက်နေသော ပစ္စည်းများကို မြင်တွေ့လိုက်ရသည်။

"ဒါက!"

…