အခန်း ၃၇ ။ ကြေကွဲဖွယ်ရာ နိဂုံးနှင့် မျှော်လင့်ချက်အသစ်

" နှောင့်ယှက်မိတဲ့အတွက် အားနာပါတယ်ဗျာ " ဟု ကျွန်တော်က အရင်ဆုံး နှုတ်ဆက်လိုက်သည်။

" အို... ရပါတယ်၊ ဘာမှအားနာစရာမလိုပါဘူး။ မနေ့ကလည်း မင်းတို့ရဲ့ အမေရိကန်သူငယ်ချင်း အော်စကာ ရောက်လာသေးတယ်။ သူကတော့ မင်းတို့စခန်းဆီ လိုက်ခဲ့ဖို့ ပြောရှာပါတယ်၊ ဒါပေမဲ့ ကျွန်တော်တို့က ဒီအိမ်မှာပဲ ဆက်နေချင်လို့ပါ။ အော်... ဒါနဲ့ ကျွန်တော့်နာမည်က အင်ဒရူး ဂျူနီယာ ပါ။ ဒါက ကျွန်တော့်ဇနီး အစ္စဘဲလ်၊ ဟိုကလေးတွေကတော့ ဂျိုနသန်၊ အက်စတာ၊ မဒီဆင် နဲ့ ဘီလီ တဲ့။ ကျွန်တော့်မိဘတွေကတော့ အခန်းထဲမှာ အိပ်ပျော်နေကြတယ်၊ သူတို့နာမည်က အင်ဒရူး စီနီယာ နဲ့ အက်စထရဲလား တဲ့လေ။ မင်းနာမည်က စကိုင်း ဟုတ်တယ်မလား "

သူက ရင်းရင်းနှီးနှီး မိတ်ဆက်ရင်း လက်ကမ်းပေးလာသည်။

" ဟုတ်ပါတယ်၊ တွေ့ရတာ ဝမ်းသာပါတယ်ဗျာ "

ကျွန်တော်လည်း သူ၏လက်ကို ဆဲလ်နှုတ်ဆက်ရင်း ကျွန်တော့်အဖွဲ့ဝင်များကိုပါ မိတ်ဆက်ပေးလိုက်သည်။ သူတို့အိမ်တွင်း အခြေအနေကို အကဲခတ်ကြည့်ရာ ရိက္ခာအလုံအလောက် ရှိပုံရသည်။ မှန်ဘီဒိုထဲတွင် စည်သွပ်ဗူးများစွာ စီစီရီရီရှိနေပြီး လူတိုင်းကလည်း ငတ်ပြတ်နေသည့် အရိပ်အယောင်မရှိကြချေ။ သူတို့က သက်လတ်ပိုင်းအရွယ် လင်မယားနှစ်ဦးဖြစ်ပြီး အကြီးဆုံးသားမှာ ကျွန်တော်နှင့် အသက်အရွယ်ချင်း သိပ်မကွာလှဘဲ အငယ်ဆုံးလေးမှာမူ အိုလီဗီယာနှင့် အရွယ်တူခန့် ရှိသည်။ မနေ့က အော်စကာ ရောက်လာစဉ်က သူ၏မိဘများကို ကျန်းမာရေးစစ်ဆေးပေးခဲ့ကြောင်းနှင့် အားလုံး ကောင်းမွန်ကြကြောင်းလည်း သိရသည်။ အကြီးဆုံးသား ဂျိုနသန်က ကျွန်တော်တို့၏ စူးစမ်းလေ့လာရေးအဖွဲ့ထဲသို့ ဝင်ရောက်ရန် စိတ်အားထက်သန်နေသော်လည်း သူ၏မိခင်ကမူ စိုးရိမ်သဖြင့် တားမြစ်နေသည်။ အိမ်ထောင်စုတစ်ခုလုံးတွင် အင်ဒရူးတစ်ဦးတည်းသာ သေနတ်ကိုင်ဆောင်ထားပြီး သူ၏ခါးတွင် အပေါ်အင်္ကျီအောက်၌ ဝှက်ထားသော FN Five-Seven ပစ္စတိုတစ်လက် ရှိနေသည်။

' သေနတ်ကောင်းလေးပဲ။ 9mm နဲ့ .45 ACP ကျည်တွေထက်တောင် ကျည်ထွက်ပိုမြန်တယ် ' ဟု ကျွန်တော် စိတ်ထဲက မှတ်ချက်ချမိသည်။

" ကဲ... ဦးအင်ဒရူး၊ ကျွန်တော်တို့က ဒီတစ်ဝိုက်ကို ဆက်ပြီး လုံခြုံရေးအရ စစ်ဆေးနေတာပါ။ ပြီးတော့ အပြင်ဘက်ကို သွားတုန်းက ကြုံခဲ့ရတဲ့ အခြေအနေအချို့ကိုလည်း မျှဝေပေးချင်လို့ပါ "

ကျွန်တော်က မနေ့က ကြုံတွေ့ခဲ့ရသမျှကို အသေးစိတ် ပြောပြလိုက်ရာ သူတို့ဇနီးမောင်နှံက အနည်းငယ် စိုးရိမ်တုန်လှုပ်သွားကြသည်။ ထိုစဉ် သူတို့သမီးဖြစ်သူက ကျွန်တော့်ကို စူးစိုက်ကြည့်နေသည်ကို ကေလီက သတိပြုမိသွားပြီး နယ်မြေပြသည့်အနေဖြင့် ကျွန်တော့်ဘေးနားသို့ တိုးကပ်၍ ဝင်ထိုင်တော့သည်။

ကျွန်တော်တို့ ခေတ္တမျှ စကားစမြည်ပြောဆိုပြီးနောက် ဂျိုနသန်ကို အတတ်ပညာလေ့ကျင့်ပေးရန်အတွက် ကျွန်တော်တို့နှင့်အတူ လိုက်ခွင့်ပြုရန် သဘောတူလိုက်ကြသည်။ လောလောဆယ်တွင်မူ သူက ဘေးနားကနေ စောင့်ကြည့်လေ့လာရုံသာ ဖြစ်သည်။ သူ၏မိခင်က အစပိုင်းတွင် သဘောမတူသော်လည်း ခင်ပွန်းဖြစ်သူနှင့် သေသေချာချာ တိုင်ပင်ပြီးနောက်တွင်မူ ခွင့်ပြုလိုက်တော့သည်။ ထို့အပြင် သူမကိုယ်တိုင်လည်း စခန်းဆီသို့ လိုက်ပါလာပြီး ထိုနေရာရှိ မိခင်များနှင့်တွေ့ဆုံကာ ကလေးများကို စာပေသင်ကြားပေးနိုင်မည့်အရေးကို ဆွေးနွေးလိုသည်ဟု ဆိုသည်။ သူမက ကျောင်းဆရာမတစ်ဦးဖြစ်ကြောင်း သိရသဖြင့် ကျွန်တော် ချက်ချင်းပင် ဝမ်းမြောက်ဝမ်းသာ လက်ခံလိုက်သည်။ ကမ္ဘာကြီးက မည်မျှပင် ပျက်စီးနေပါစေဦးတော့၊ နောင်လာနောက်သား ကလေးငယ်များကို စနစ်တကျ ပညာသင်ကြားပေးရန်မှာ အလွန်ပင် အရေးကြီးလှပေသည်။

ကျွန်တော်တို့ နှုတ်ဆက်ထွက်ခွာလာကြရာ သံတုတ်တစ်ချောင်း ကိုင်ဆောင်ထားသော ဂျိုနသန်က ကျွန်တော်တို့နှင့်အတူ ပါလာခဲ့ပြီး အက်စတာနှင့် မိခင်ဖြစ်သူ အစ္စဘဲလ်တို့ကိုမူ အင်ဒရူးကိုယ်တိုင် စခန်းသို့ လိုက်လံပို့ဆောင်ပေးခဲ့သည်။

" ဂျိုနသန်... မင်း သေနတ်ကိုင်တတ်လား " ဟု ကျွန်တော်က လှမ်းမေးလိုက်သည်။

" အာ... စိတ်မရှိပါနဲ့အစ်ကို၊ ကျွန်တော် မကိုင်တတ်ပါဘူး။ ဒါပေမဲ့ သေချာသင်ယူချင်ပါတယ် " ဟု သူက ရိုးရိုးသားသား ပြန်ဖြေသည်။

" ကောင်းပြီ၊ ဒါဆို လောလောဆယ်တော့ အဖွဲ့ရဲ့ နောက်နားကပဲ လိုက်ခဲ့ဦးနော် "

ကျွန်တော့်စကားကို သူက ခေါင်းညိတ်ထောက်ခံသည်။ အတန်ကြာ လျှောက်လာပြီးနောက် ဒုတိယမြောက်နေရာသို့ ရောက်ရှိလာခဲ့သည်။ ထိုနေရာတွင် အုတ်တံတိုင်းမြင့်မြင့်နှင့် အလတ်စား ခြံဝင်းတံခါးကြီးတစ်ခု ကာရံထားပြီး အထဲတွင် မျက်နှာချင်းဆိုင် တည်ဆောက်ထားသော နှစ်ထပ်အိမ်ကြီး နှစ်လုံး ရှိနေသည်။ ထိုနေရာတွင် လူလေးဦး နေထိုင်ကြပြီး ညာဘက်အိမ်တွင် သက်ကြီးလင်မယားနှစ်ဦး နေထိုင်ကာ ဘယ်ဘက်အိမ်တွင်မူ သူတို့၏သမီးနှင့် သမက်ဖြစ်သူတို့ နေထိုင်ကြသော်လည်း ကလေးမူ မရှိကြသေးချေ။

ကျွန်တော်က ခြံဝင်းတံခါးကို ခေါက်လိုက်သော်လည်း မည်သူမျှ ပြန်မထူးချေ။ အော်စကာ ပေးထားခဲ့သော ရေဒီယိုအဆက်အသွယ်ဖြင့် ခေါ်ကြည့်သော်လည်း ထူးမခြားနားပင်။ အိမ်ရှေ့ကားလမ်းတွင် ကားနှစ်စီး ရှိနေဆဲဖြစ်ပြီး နာရီကို ကြည့်လိုက်ရာ မနက် ၉ နာရီ ၂၂ မိနစ် ရှိနေပြီ ဖြစ်သည်။ ဘယ်ဘက်အိမ်၏ တံခါးက ပွင့်နေသဖြင့် လှမ်း၍ အကြိမ်ကြိမ် ခေါ်သော်လည်း အထဲမှ ဘာသံမျှ ပြန်မကြားရပေ။

ကေလီက စိုးရိမ်ပူပန်သော မျက်နှာဖြင့် " ဒီအချိန်အထိတော့ အိပ်နေကြမှာ မဟုတ်ဘူး ထင်တယ် " ဟု ဆိုသည်။

" တစ်ခုခုတော့ မှားနေပြီ။ အားလုံး အသင့်ပြင်ထားကြ။ မာ့ခ်... ငါ့ကို တစ်ချက်လောက် တွန်းတင်ပေးပါဦး "

မာ့ခ်က ခြံဝင်းတံခါးတွင် ကျောကပ်ရပ်လိုက်ပြီး လက်နှစ်ဖက်ကို ယှက်ကာ ခြေနင်းတစ်ခု ပြုလုပ်ပေးသည်။ ကျွန်တော်က အရှိန်ယူပြေးဝင်ကာ သူ၏လက်ကို နင်း၍ အပေါ်သို့ ခုန်တက်လိုက်ရာ တံခါးထိပ်ဖျားသို့ အလွယ်တကူ ရောက်ရှိသွားသည်။ အထဲသို့ ဆင်းရန် အနေအထားပြင်ပြီးနောက် ကြောင်တစ်ကောင်ကဲ့သို့ အသံအနည်းငယ်မျှပင် မထွက်စေဘဲ မြေပြင်ပေါ်သို့ သာသာယာယာ ဆင်းသက်လိုက်ပြီး ခြံတံခါးကို အမြန်ဖွင့်ပေးလိုက်သည်။ အိမ်အပြင်ဘက် ဝန်းကျင်ကို အရင်ဆုံး စစ်ဆေးပြီးနောက် ဘယ်ဘက်အိမ်ဆီသို့ ဦးတည်လျှောက်လာခဲ့ကြသည်။ အရာအားလုံးက ပုံမှန်အတိုင်း ရှိနေပြီး မည်သူမျှ အပြင်ထွက်သွားသည့် အရိပ်အယောင်မတွေ့ရချေ။

" လူရှိလားခင်ဗျာ။ ဒေါ်လူနာ... အထဲမှာ ရှိလား " ဟု ကျွန်တော် လှမ်းခေါ်သော်လည်း အခြေအနေက တိတ်ဆိတ်နေဆဲ ဖြစ်သည်။

ကျွန်တော်တို့ အပေါ်ထပ်သို့ တက်ကာ အခန်းတံခါးများနှင့် ရေချိုးခန်းများကိုပါမကျန် သေသေချာချာ လိုက်လံဖွင့်လှစ်စစ်ဆေးသော်လည်း လူရိပ်လူယောင်မျှ မတွေ့ရပေ။ နောက်ဆုံးတွင် အောက်ထပ်သို့ ပြန်ဆင်းလာခဲ့ပြီး ဘေးချင်းကပ်အိမ်ဆီသို့ သွားရန် ဆုံးဖြတ်လိုက်သည်။ ဘာကောင်နှင့်မဆို ရင်ဆိုင်နိုင်ရန် ကျွန်တော့်၏ ဝါကီဇာရှီ (Wakizashi) ဓားတိုကို အသင့်ဆွဲထုတ်ကာ အိမ်တံခါးကို အသာအယာ တွန်းဖွင့်လိုက်သည်။

တံခါးပွင့်သွားသည်နှင့် တစ်ပြိုင်နက် လူတိုင်း ပျို့အန်မတတ် ဖြစ်သွားကြသည်။ အားလုံးက နှာခေါင်းနှင့် ပါးစပ်ကို လက်ဖြင့် အမြန်အုပ်လိုက်ကြပြီး ကျွန်တော်လည်း ရင်ခေါင်းထဲမှ တက်လာသော အန်ဖတ်များကို အသာအယာ ထိန်းလိုက်ရသည်။ ဧည့်ခန်းတစ်ခုလုံးတွင် သွေးအိုင်များဖြင့် နီရဲနေတော့သည်။ ကြမ်းပြင်ပေါ်တွင် အလောင်းနှစ်လောင်းနှင့် ဆိုဖာပေါ်တွင် အလောင်းနှစ်လောင်း ရှိနေသည်။ အနံ့အသက်များ လွင့်စင်သွားစေရန် ပြတင်းပေါက်များကို အရင်ဆုံး ဖွင့်လှစ်လိုက်ကြသည်။

အတန်ကြာမှ အထဲသို့ ဝင်ရောက်ကာ အခြေအနေကို စစ်ဆေးကြည့်လိုက်သည်။ အသက်ကြီးပိုင်းလင်မယားဖြစ်သော ဦးလူနာနှင့် ဇနီးဖြစ်သူတို့က ကြမ်းပြင်ပေါ်တွင် လဲကျသေဆုံးနေပြီး သမီးနှင့် သမက်ဖြစ်သူတို့ကမူ ဆိုဖာပေါ်တွင် ရှိနေကြသည်။ ကြမ်းပြင်ပေါ်မှ အလောင်းများကို အရင်ကြည့်ရာ ဒေါ်လူနာသည် တံခါးနားတွင် လဲကျနေပြီး ခန္ဓာကိုယ်အနှံ့တွင် အကိုက်ခံထားရသည့် ဒဏ်ရာများနှင့် ကျည်ဆန်ရာအချို့ ရှိနေသည်။ ဦးလူနာ၏ ခန္ဓာကိုယ်တွင်မူ သေနတ်ဒဏ်ရာမရှိသော်လည်း ပါးစပ်ဝန်းကျင်တွင် သွေးများ ပေကျံနေပြီး လည်ပင်းက ပုံသဏ္ဌာန်မမှန်ဘဲ စောင်းနေကာ ဦးခေါင်းတွင်လည်း ပြင်းထန်သော ဒဏ်ရာရရှိထားသည်။ ဆိုဖာပေါ်မှ ဇနီးမောင်နှံကို စစ်ဆေးကြည့်ရာ သူတို့နှစ်ဦးမှာ အချင်းချင်း ဖက်တွယ်ထားကြပြီး ဦးခေါင်းချင်း ပူးကပ်လျက် ရှိနေကာ ကျည်ဆန်တစ်တောင့်တည်းက သူတို့နှစ်ဦးစလုံး၏ ဦးခေါင်းကို ချင်းနင်းဖောက်ဝင်သွားသည့် ဒဏ်ရာကို တွေ့ရသည်။ သူတို့၏ လက်များကို စစ်ဆေးကြည့်ရာ အမျိုးသားဖြစ်သူ၏ ညာလက်တွင် အသံတိတ်ပြောင်းတပ်ဆင်ထားသော P226 ပစ္စတိုသေနတ်တစ်လက်ကို ဆုပ်ကိုင်ထားဆဲ ဖြစ်သည်။

' ကိုယ့်ကိုယ်ကိုယ် သတ်သေကြတာလား '

အမျိုးသမီးငယ်ကို ကြည့်လိုက်ရာ သူမ၏ ပခုံးတစ်ဖက်မှာ အကိုက်ခံထားရသဖြင့် အသားစများ ပြတ်တောက်နေသော်လည်း ခန္ဓာကိုယ်တွင် အကြောပြာများ ထွက်ပေါ်လာခြင်း မရှိသေးချေ။ ကျွန်တော် အခြေအနေကို စဉ်းစားကာ ဤဖြစ်ရပ် မည်သို့ ဖြစ်ပျက်ခဲ့သည်ကို စိတ်ထဲက ပုံဖော်ကြည့်လိုက်သည်။ ထို့နောက် အော်စကာထံသို့ ရေဒီယိုဖြင့် အကြောင်းကြားလိုက်ရာ မိနစ်အနည်းငယ်အတွင်း သူတို့အဖွဲ့ ရောက်ရှိလာကြသည်။ အော်စကာသည် ဤမြင်ကွင်းကို မြင်လိုက်ရသောအခါ ဒေါသတကြီးဖြင့် ဘေးနားရှိ ပရိဘောဂတစ်ခုကို အားပြင်းပြင်း ကန်ကျောက်လိုက်တော့သည်။

" တောက်... အဓိပ္ပာယ်မရှိတာ " အော်စကာက ကျိန်ဆဲသည်။

" ဦးလူနာက အရင်ဆုံး ကူးစက်ခံရပြီး ပြောင်းလဲသွားတာ ထင်တယ်၊ သဘာဝအတိုင်း သေဆုံးပြီးမှ ဖြစ်တာလား " ဟု ကျွန်တော်က ဆိုသည်။

" ဒါပေမဲ့ သူ့လည်ပင်းက ကျိုးနေတာပဲ။ လှေကားပေါ်က ပြုတ်ကျတာလား။ ပြီးတော့ ဦးခေါင်းက ဒဏ်ရာကော " ဟု အော်စကာက အလောင်းကို စစ်ဆေးရင်း မေးသည်။

" ဖြစ်နိုင်ပါတယ်၊ ဒါပေမဲ့ ဦးခေါင်းက ဒဏ်ရာက လည်ပင်းကျိုးတဲ့ အနေအထားကြောင့် ဖြစ်လာတာမျိုး မဟုတ်ဘူး "

" အင်း... မင်းပြောတာ မှန်တယ် ငါ့တူ။ ကြည့်ရတာတော့ ဟိုကောင်လေးက ဦးလူနာရဲ့ ခေါင်းကို အားနဲ့ ထုရိုက်ပစ်လိုက်တာ ထင်တယ်၊ နံရံဘေးမှာ သွေးတွေ စင်နေတာပဲ။ ဦးလူနာက ညဘက်မှာ ပြောင်းလဲသွားပြီး သူ့ဇနီးကို အရင်ဆုံး ကိုက်ခဲစားသောက်ပုံရတယ်။ အဲဒီအချိန်မှာ သမီးဖြစ်သူ ရောက်လာပြီး ဒီနေရာမှာ အကိုက်ခံလိုက်ရတာလား "

ကျွန်တော်တို့သည် ဖြစ်နိုင်ခြေရှိသော အကွက်များကို တစ်ကွက်ချင်း စီစဉ်ကာ ပဟေဠိကို အဖြေရှာကြည့်ကြသည်။

" ဟုတ်တယ်၊ သမက်ဖြစ်သူက နောက်မှ ပြန်ရောက်လာတာ ဖြစ်ရမယ်။ သူ တံခါးဖွင့်လိုက်တဲ့အချိန်မှာပဲ အကိုက်ခံထားရတဲ့ ယောက္ခမဖြစ်သူက သူ့ဆီ ပြေးဝင်လာလို့ သေနတ်နဲ့ အချက်ပေါင်းများစွာ လှမ်းပစ်လိုက်တာ။ အဲဒီနောက် ဦးလူနာက သူ့ဇနီးကို ကိုက်ခဲနေတာ မြင်တော့ တွန်းထုတ်ပြီး နံရံနဲ့ ဆောင့်မိအောင် လုပ်လိုက်တာ ဖြစ်လိမ့်မယ် " ဟု ကျွန်တော်က သုံးသပ်ပြသည်။

အော်စကာက ခေါင်းညိတ်ရင်း " အဲဒီနောက်မှာတော့ သူ့ဇနီးရဲ့ အခြေအနေကို မြင်ပြီး ဆက်မရှင်သန်ချင်တော့လို့ အတူတူ အဆုံးစီရင်သွားကြတာ ဖြစ်ရမယ်။ နှမြောစရာကောင်းလိုက်တာကွာ၊ အဲဒီကောင်လေးက ရဲအရာရှိတစ်ယောက်ဗျ၊ နာမည်က ဂီလ်ဘတ် တဲ့။ ငါတို့ဆီကို ရေဒီယိုနဲ့ အရင်ဆုံး ဆက်သွယ်ခဲ့သင့်တာ "

ကေလီက ဝမ်းနည်းစွာဖြင့် " သူတို့က တကယ့်ကို ချစ်ကြတဲ့ ဇနီးမောင်နှံနှစ်ဦးပါ " ဟု ဆိုသည်။

ကျွန်တော်တို့အားလုံး ကွယ်လွန်သူများအတွက် ခေတ္တမျှ ငြိမ်သက်ကာ ဆုတောင်းပေးခဲ့ကြပြီးနောက် အလောင်းများကို မီးသင်္ဂြိုဟ်ရန်အတွက် အပြင်ဘက် ကွင်းပြင်ဆီသို့ သယ်ဆောင်လာခဲ့ကြသည်။ အလောင်းများ မီးလျှံထဲတွင် ပြာကျသွားသည်ကို ကြည့်ရင်း လူတိုင်း၏ မျက်နှာတွင် စိတ်မကောင်းခြင်းများစွာ ယှက်သန်းနေတော့သည်။ အော်စကာသည် အားလုံးထဲတွင် စိတ်အထိခိုက်ဆုံး ဖြစ်နေသည်ကို သတိပြုမိသဖြင့် ကျွန်တော် သူ၏ဘေးသို့ တိုးသွားလိုက်သည်။

" အဆင်ပြေရဲ့လား အစ်ကိုကြီး "

" အေးပါကွာ... ငါ စစ်ပွဲတုန်းကလည်း သေဆုံးခြင်းတွေ အများကြီး မြင်ဖူးခဲ့ပါတယ်၊ အခု ဒီကောင်တွေကို သတ်နေရတာလည်း အသားကျနေပြီလို့ ထင်ခဲ့တာ။ ဒါပေမဲ့ ကိုယ်နဲ့ ခေတ္တခဏပဲဖြစ်ဖြစ် သိကျွမ်းခဲ့ရတဲ့လူတွေ သေဆုံးသွားတာကို မြင်ရတဲ့အခါကျတော့လည်း ငါတို့က ခံစားချက်ရှိတဲ့ လူသားတွေပဲဆိုတာ ပြန်သတိရမိတာပေါ့ " ဟု သူက သက်ပြင်းချရင်း ဆိုသည်။

" အစ်ကိုကြီးက အခုမှ ကဗျာဆရာကြီး ဖြစ်နေတာလား " ဟု ကျွန်တော်က လေထုပေါ့ပါးသွားစေရန် စလိုက်သည်။

" မင်းကတော့ကွာ... ငါက ခံစားချက်အမှန်ကို ရိုးရိုးသားသား ပြောပြနေတာကို နှောက်ယှက်ပစ်ရလား " ဟု သူက စိတ်တိုသလိုဖြင့် အော်တော့သည်။

" စိတ်သက်သာရာရအောင် လုပ်ပေးတာပါဗျာ။ ကဲ... ငါတို့ စီမံကိန်းအတိုင်း ဆက်သွားကြရအောင် "

ကျွန်တော်တို့ ရှေ့သို့ ဆက်လက်ထွက်ခွာလာခဲ့ကြရာ မနေ့က ရပ်နားခဲ့သော နေရာသို့ ရောက်ရှိလာသည်။ ညာဘက်ခြမ်းတွင် ခြံဝင်းတံခါးကြီးများ ရှိသည့် လုံးချင်းအိမ် နှစ်လုံးရှိပြီး ထိုအိမ်များနောက်တွင် အိမ်အသေးစားလေး တစ်လုံး ရှိသည်။ ဘယ်ဘက်ခြမ်းတွင်မူ ကျယ်ဝန်းသော ငါးဖမ်းကန်ကြီး လေးကန် ရှိပြီး ပထမဆုံးကန်မှာ ကျွန်တော်တို့ ဖြတ်သန်းခဲ့သော ကျောက်ခဲလမ်းဘေးတွင် ရှိသည်။ မူလက ငါးကန် ငါးကန် ရှိခဲ့သော်လည်း ပဉ္စမမြောက်ကန်မှာ ပိုင်ရှင်၏ စီမံခန့်ခွဲမှု ညံ့ဖျင်းခြင်းကြောင့် ယခုအခါ ရွှံ့နွံပုပ်များ ပြည့်နှက်နေသည့် ကန်ပျက်ကြီး ဖြစ်နေပြီ ဖြစ်သည်။ ကံကောင်းသည်မှာ ထိုကန်ပျက်က ဒုတိယမြောက် ကွင်းပြင်၏ ညာဘက်တွင် ရှိနေသဖြင့် ဘယ်ဘက်ရှိ ကျန်ငါးကန်သုံးကန်ထဲသို့ ရေပုပ်များ စီးဝင်ခြင်းမရှိချေ။

ဤငါးဖမ်းကန်များသည် ပိုက်ကွန်များဖြင့် ကာရံထားသော ရေကန်ငယ်များ ဖြစ်ကြသည်။ ဒေသခံများက ငါးရံ့၊ ငါးမြစ်ချင်း စသည့် ငါးများကို စျေးကွက်သို့ တင်ပို့ရန် မွေးမြူကြခြင်း ဖြစ်သည်။ ငါးကန်များဆီသို့ သွားလိုပါက ရေပေါ်တွင် သစ်သားတိုင်များဖြင့် ဆောက်လုပ်ထားသော အိမ်ငယ်လေးဆီသို့ ဦးတည်သည့် တံတားငယ်များအတိုင်း လျှောက်လှမ်းသွားရပြီး ထိုနေရာတွင် ငါးစာကျွေးရန် သို့မဟုတ် ကန်အလယ်တွင် ငါးဖမ်းရန်အတွက် အသုံးပြုသည့် လှေငယ်လေးများ ရှိနေသည်။

ကျွန်တော်တို့ အိမ်တစ်လုံးထဲသို့ ဝင်ရန် ပြင်လိုက်စဉ်မှာပင် ခါးတွင် ချိတ်ထားသော ရေဒီယိုမှ အချက်ပေးသံ တုန်ခါလျက် ထွက်ပေါ်လာတော့သည်။