အခန်း (၁၁၄၆) - နဂါးနတ်ဘုရား ဒိုလော်

"ဒီဝိညာဉ်စာချုပ်သခင်က ထင်သလောက်မရိုးရှင်းဘူးပဲ။ ဝိညာဉ်သားရဲတွေကို ယဉ်ပါးအောင်လုပ်တာသက်သက်တင် မဟုတ်ဘူး။ ဒါနဲ့ပတ်သက်ပြီး ပြောရရင် ငါ အခု ဝိညာဉ်စာချုပ်သခင်တွေကို တကယ်ပဲ စိတ်ဝင်စားလာပြီ"

သူက သက်ပြင်းချလိုက်သည်။

"မင်း စိတ်ဝင်စားတာ မဝင်စားတာထက်... အဓိကက အဲဒီ ဆရာဝမ်က တကယ်ကို ချောလွန်းတာပဲ။ ဖြစ်နိုင်ရင် ငါလည်း သူ့တပည့် ခံချင်တယ်"

ဟွမ်ယန်က တခစ်ခစ် ရယ်မောကာ ပြောသည်။

"ချောတာမချောတာထက် အဓိကက သူက သန်မာလွန်းလို့ပါ"

ရွှီချင်းက ခေါင်းခါရင်း ပြောလိုက်သည်။

"ဟိုကျောင်းသားလေးယောက် သုံးသွားတဲ့ တိုက်ပွဲဗျူဟာတွေက သေချာပေါက် တစ်ဖက်လူရဲ့ လမ်းညွှန်မှုကြောင့်ပဲ ဖြစ်ရမယ်။ လူတစ်ယောက်မှာ ဝိညာဉ်သားရဲနှစ်ကောင် ပိုရှိနေတာက ကူညီပေးမယ့်လူ နှစ်ယောက် ပိုရှိနေတာနဲ့ အတူတူပဲ။ ငါတို့တွေ သူတို့ကို ချုပ်ကိုင်ထားနိုင်ခဲ့ရင်တောင် ဘာမှတတ်နိုင်မှာမဟုတ်ဘူး။ ဒါကိုကြည့်ရင် သူတို့ရဲ့ ဝိညာဉ်စာချုပ်သခင်စနစ်က သမရိုးကျ ဝိညာဉ်ဆရာသခင်တွေရဲ့ အပြန်အလှန် အားနည်းချက်၊ အားသာချက် ချုပ်ကိုင်မှုဘောင်ထဲမှာ အကျုံးမဝင်ဘူးဆိုတာ သိသာတယ်။ ငါလည်း ဝိညာဉ်စာချုပ်သခင်တစ်ယောက် ဖြစ်ချင်လာပြီ..."

"ငါထင်တာတော့..."

ဖေးလုံက စကားစလိုက်သည်။ အခြားသူများက သူ့ကို လှမ်းကြည့်လိုက်ကြသည်။ ခုနက အပြင်းအထန်ဆုံး ကန့်ကွက်ခဲ့သူမှာ သူပင် ဖြစ်သည်။

"မင်းတို့ ပြောတာအားလုံး မှန်တယ်လို့ ငါထင်သည်..."

ဖေးလုံက ဖြဲစပ်စပ် ရယ်လိုက်၏။

"ကဲ... လျှောက်ပြောမနေကြနဲ့တော့။ မင်းတို့တွေ အကယ်ဒမီကို သစ္စာဖောက်ဖို့ ကြံနေကြတာလား"

ဟယ်ဝမ့်ထျန်းက ဒေါသတကြီးဖြင့် ပြောလိုက်သည်။

"မင်းတို့က နောင်တစ်ချိန်မှာ တုန်းဖုန်းအကယ်ဒမီကို တက်ရောက်ရမယ့် မျိုးဆက်သစ် လူရည်ချွန်တွေပဲ။ ကိုယ့်ကိုယ်ကိုယ် ယုံကြည်မှု မပျောက်ဆုံးစမ်းပါနဲ့။ ဝိညာဉ်စာချုပ်သခင်တွေက သန်မာတယ်ဆိုပေမဲ့ သမရိုးကျ ဝိညာဉ်ဆရာသခင်တွေရဲ့ စွမ်းအားကို အပြည့်အဝ ဖော်ထုတ်နိုင်သရွေ့တော့ သိပ်ပြီး ကွာခြားသွားမှာ မဟုတ်ပါဘူး။ နောက်ပြီးရင် ကုန်းမြေတိုက်ကြီးရဲ့ ဝိညာဉ်ဆရာသခင် ပြိုင်ပွဲအတွက် ပြင်ဆင်ကြတော့။ ဒါက ဒီကုန်းမြေတိုက်ကြီးရဲ့ အဆင့်အမြင့်ဆုံး ပြိုင်ပွဲကြီးဖြစ်ပြီး အင်ပါယာနှစ်ခုလုံး ပါဝင်ဆင်နွှဲကြလိမ့်မယ်။ အဲဒီအချိန်ကျရင် မင်းတို့ ကံကောင်းရင် ကုန်းမြေတိုက်ကြီးရဲ့ တကယ့် ထိပ်သီးစွမ်းအားရှင်တွေရဲ့ တိုက်ပွဲကို မြင်တွေ့ရလိမ့်မယ်"

"ဝိညာဉ်စာချုပ်သခင်တွေအနေနဲ့ ဒီကုန်းမြေတိုက်ကြီးရဲ့ ထိပ်သီးပြိုင်ပွဲကို ဝင်ရောက်နိုင်ပါ့မလားဆိုတာကတော့ မေးခွန်းထုတ်စရာ ရှိသေးတာပေါ့"

ယန်ရှောက်ကျဲ့နှင့် အခြားသူများကို နှုတ်ဆက်ပြီးနောက် ထိုလူစုမှာ ထွက်ခွာသွားကြသည်။

"ဂုဏ်ယူပါတယ်"

ဝမ်ဖုန်းကို ဝန်းရံလျက် ကျန်းလဲ့ရွှမ်းနှင့် မာရှောင်ထောက်တို့က ယန်ရှောက်ကျဲ့၏ အနားမှ ပြုံးရွှင်စွာ လျှောက်လှမ်းလာကြသည်။

"မင်းတို့ကောင်တွေ ငါ့ကို တကယ် အံ့ဩအောင် လုပ်နိုင်တာပဲ"

မာရှောင်ထောက်က ဟော်ယွီယောက်နှင့် အခြားသူများ၏ ပုခုံးကို ဆွဲဖက်ကာ အလွန် ဝမ်းသာအားရ ဖြစ်နေသည်။

"သူက အကယ်ဒမီကို စောင့်ရှောက်ပေးနေတဲ့လူပဲ! တစ်ယောက်ချင်းစီ တိုက်ခိုက်သွားတာ တကယ်ကို အံ့ဩစရာကောင်းလွန်းလို့ ငါတောင် လက်ယားလာမိတယ်။ ငါ့မှာသာ ဝိညာဉ်သားရဲတစ်ကောင် ရှိနေရင် ဝင်တိုက်လိုက်ချင်ပြီ"

သူမသည် တိုက်ပွဲကို အစမှအဆုံး တစ်ချက်မလွတ်ဘဲ ကြည့်ရှုနေခဲ့ခြင်း ဖြစ်ရာ စိတ်လှုပ်ရှားစရာ၊ ဝမ်းသာစရာနှင့် ရင်တထိတ်ထိတ် ဖြစ်စရာများဖြင့် ပြည့်နှက်နေခဲ့သည်။ အထူးသဖြင့် နောက်ဆုံးအခန်းနားတွင် ဖြစ်သည်။

"ဒါပေါ့... ရှောင်ထောက်ရဲ့... ကျွန်မတို့ကို ဘယ်သူသင်ပေးထားလဲဆိုတာ ကြည့်ဦးလေ"

ရှောင်ရှောင်က ပြုံးလျက် ပြောလိုက်သည်။

မာရှောင်ထောက်က ဝမ်ဖုန်းကို နက်ရှိုင်းသော လေးစားအားကျမှု၊ ကြည်ညိုမှု မျက်လုံးများဖြင့် ကြည့်လိုက်သည်။ ၎င်းတို့လေးယောက်အတွက် အံဝင်ခွင်ကျဖြစ်မည့် ဝိညာဉ်သားရဲလေးကောင်ကို ရှာဖွေပေးနိုင်ပြီး ရက်အနည်းငယ်အတွင်း ထိရောက်စွာ သင်ကြားပေးနိုင်ခဲ့သည့် တစ်ဖက်လူ၏ စွမ်းဆောင်ရည်ကို သူမ အလွန် လေးစားမိသည်။ တစ်ဖက်လူ၏ စွမ်းအားက အလွန်အမင်း သန်မာလှပြီး ဝိညာဉ်သားရဲကလည်း သန်မာကာ လူကလည်း သန်မာလှသည်။

ထိုသို့မဟုတ်ဘဲ ကျန်းလဲ့ရွှမ်းမှာမူ ဝမ်ဖုန်း၏ စွမ်းအားအပေါ် ပိုမို တုန်လှုပ်မိသည်။ ဝမ်ဖုန်းနှင့် ကိုယ်တိုင် တိုက်ခိုက်ဖူးပြီး သရေကျခဲ့ဖူးသူတစ်ဦးအနေဖြင့် တစ်ဖက်လူ၏ စွမ်းအား မည်မျှ ကြီးမားသည်ကို သူမ သဘာဝကျကျ နားလည်ထားသည်။

ဒါက တန်ဖိုးရှိရဲ့လား။

"ဒီနေ့ပြီးရင် လူအများကြီး မင်းဆီမှာ တပည့်ခံဖို့ လာကြလိမ့်မယ်လို့ ထင်သည်"

ကျန်းလဲ့ရွှမ်းက ဝမ်ဖုန်းကို ပြုံး၍ ကြည့်ကာ ပြောလိုက်သည်။

"နောက်ဆို မင်း အတော်လေး အလုပ်ရှုပ်တော့မှာပဲ"

ဝမ်ဖုန်းက ခေါင်းခါလျက် ပြောသည်။

"ငါ ဒီမှာ အကြာကြီး နေမှာ မဟုတ်ဘူး။ ဒီနေ့ပြီးရင် ငါ ထွက်သွားရင်လည်း ထွက်သွားလိမ့်မယ်"

ထိုစကားကို ကြားသောအခါ ကျန်းလဲ့ရွှမ်း ဆွံ့အသွားသည်။ ကျန်ရှိနေသူများမှာလည်း ခေတ္တမျှ တိတ်ဆိတ်သွားကြပြီး ၎င်းတို့အနေဖြင့် ကြိုတင်ပြင်ဆင်ထားပြီးသားလည်း ဖြစ်နိုင်သည်။

"မထွက်ခွာခင်... ဆရာ့မှာ တောင်းဆိုချက်တစ်ခု ရှိသည်... ပင်လယ်နတ်ဘုရားဆောင်ကပါ"

ကျန်းလဲ့ရွှမ်းက တိုးညင်းစွာ ပြောလိုက်သည်။

"စီနီယာ... ကျေးဇူးပြုပြီး ကြွခဲ့ပါဦး"

ကျန်းလဲ့ရွှမ်း၏ ဆရာမှာ ပင်လယ်နတ်ဘုရားဆောင်၏ အကြီးအကဲ မုလောင်၊ နဂါးနတ်ဘုရား ဒိုလော် မုအန် ဖြစ်သည်။ သူသည် ရှရက်ခ်အကယ်ဒမီ၏ အဆင့် ၉၉ ရှိသော ဘွဲ့အမည်ရဒိုလော် တစ်ဦးလည်း ဖြစ်ပြီး ကမ္ဘာပေါ်ရှိ ထိပ်သီးစွမ်းအားရှင်များထဲမှ တစ်ဦး ဖြစ်သည်။

"အို..."

ဝမ်ဖုန်းက အနည်းငယ် ပြုံးလိုက်သည်။ ပင်လယ်နတ်ဘုရားဆောင်သို့ ဝင်ရောက်ရမည့်အချိန် ရောက်လာပြီဖြစ်ကြောင်း သိလိုက်၏။ သူ၏ ယခု ရှရက်ခ်အကယ်ဒမီ ခရီးစဉ်သည်လည်း အဆုံးသတ်သို့ ရောက်ရှိလုနီးပါး ဖြစ်နေပြီ ဟု ဆိုနိုင်သည်။

"ကောင်းပြီ... မင်းတို့တွေ ဒီနေ့တိုက်ပွဲကို မှတ်သားထားပြီး အများကြီး ပြန်တွေးတောကြပါ။ ငါ နောက်ရက်အနည်းငယ်အတွင်း အကယ်ဒမီမှာ ရှိနေဦးမှာပါ"

ဝမ်ဖုန်းက ပြောလိုက်သည်။

"အဲဒီအချိန်ကျရင် ဝိညာဉ်စာချုပ်သခင်နဲ့ ပတ်သက်ပြီး နောက်ထပ် သင်ခန်းစာတစ်ခု ပေးဦးမယ်။ ဝိညာဉ်စာချုပ်သခင်အကြောင်း အသေးစိတ် ရှင်းပြပြီး ဖြည့်စွက်ပေးရမယ့်အရာအားလုံးကို ဖြည့်စွက်ပေးမယ်"

ဟော်ယွီယောက် အပါအဝင် လေးယောက်လုံး ခေါင်းငြိမ့်ကြသည်။ ဝမ်ဖုန်းသည် ကျန်းလဲ့ရွှမ်း၏ နောက်မှ လိုက်ပါလျက် တိုက်ကွင်းအတွင်းမှ ထွက်ခွာလာပြီး အတွင်းဝင်းရှိ အိုင်အလယ်ရှိ ကျွန်းငယ်ဆီသို့ ဦးတည်လျှောက်လှမ်းခဲ့သည်။

ယခုအချိန်သည် မွန်းလွဲပိုင်းဖြစ်၍ နေရောင်ခြည်က သိပ်မပြင်းလှဘဲ အိုင်အလယ်ရှိ ကျွန်းကလေးသည် အလွန် ခမ်းနားထည်ဝါနေဆဲ ဖြစ်သည်။ တစ်ခုတည်းသော လမ်းကြောင်းအတိုင်း ဝမ်ဖုန်းသည် ကျန်းလဲ့ရွှမ်း၏ နောက်မှ လိုက်ပါသွားခဲ့သည်။

ဝမ်ဖုန်း၏ အမြင်အာရုံဖြင့် ကြည့်လျှင် အိုင်အလယ်ရှိ ကျွန်းပေါ်တွင် ရှေးဟောင်းအငွေ့အသက်များ ပြည့်နှက်နေသည့် အဆောက်အအုံတစ်ခုကို မြင်တွေ့နိုင်ပြီး အများစုကို သစ်သားပစ္စည်းများဖြင့် အဓိက ဆောက်လုပ်ထားသဖြင့် အတော်ပင် ရှေးဆန်လှသည်။ ဗီလာအိမ်ကြီးတစ်လုံးနှင့် ဆင်တူလှ၏။ ဒါက အတွင်းဝင်းရှိ ကျောင်းသားများအတွက် ပတ်ဝန်းကျင်ဖြစ်ပြီး ပြင်ပဝင်းထက် အဆပေါင်းများစွာ ပိုမို ကောင်းမွန်သည်။

"မင်း အကယ်ဒမီကို ရောက်လာတာ ငါးလနီးပါး ရှိနေပြီဆိုတော့ ပြင်ပဝင်းမှာ ရှိတဲ့ မုလောင်အကြောင်း မကြားဖူးသေးဘူး ထင်သည်..."

ကျန်းလဲ့ရွှမ်းက အကျဉ်းချုပ် မိတ်ဆက်ပေးသည်။

ဤ နဂါးနတ်ဘုရား ဒိုလော် မုအန်သည် ပင်လယ်နတ်ဘုရားဆောင်၏ ယခင် အဆောင်မှူးဖြစ်ပြီး ယခုအခါ ရာထူးလွှဲပြောင်းပေးတော့မည့် အခြေအနေတွင် ရှိနေကာ နောက်ထပ် လွှဲပြောင်းယူမည့်သူမှာ အခြားသော ဘွဲ့အမည်ရဒိုလော် တစ်ဦးဖြစ်သည့် ရွှမ်ဇီ ဖြစ်သည်။ ကျန်းလဲ့ရွှမ်းသည် မုအန်၏ တပည့်ဖြစ်ပြီး ယခုအခါ အသက် ၂၃ နှစ်ပင် မပြည့်သေးသော်လည်း ဝိညာဉ်သူတော်စင် အဆင့်သို့ ရောက်ရှိနေပြီ ဖြစ်သည်။ နောက်လာမည့် သုံးနှစ်အတွင်း ဝိညာဉ်ဧကရာဇ် ဖြစ်လာရန် သေချာသလောက် ရှိနေသည်။ ပါရမီမှာ အကယ်ဒမီတစ်ခုလုံးတွင် အကောင်းဆုံး ဖြစ်သည်။

"အထွတ်အထိပ် ဒိုလော်"

ဝမ်ဖုန်းက သက်ပြင်းချလိုက်သည်။ ဤ မုအန်သည် ထိပ်တန်း သားရဲသိုင်းဝိညာဉ်ဖြစ်သော လင်းလက်တောက်ပသည့် သန့်ရှင်းသောနဂါးကို ပိုင်ဆိုင်ထားသည်။ နဂါးအနွယ်ဝင် သိုင်းဝိညာဉ်များထဲတွင် သူ့ကို ဖခင်ကဲ့သို့ တည်ရှိမှုဟု ခေါ်ဆိုနိုင်သည်။

အမှန်စင်စစ် ဝမ်ဖုန်းသည် ဤသိုင်းဝိညာဉ်အကြောင်း ကြားရသောအခါ အတော်ပင် အံ့ဩသွားခဲ့သည်။ ထိုစဉ်က နဂါးနတ်ဘုရား၏ တိုက်ရိုက်သွေးရင်း သားကိုးယောက်ထဲမှ တစ်ယောက်မှာ သန့်ရှင်းသော အလင်းစွမ်းအားကို ထိန်းချုပ်နိုင်ပြီး အလွန်အမင်း စွမ်းအားကြီးမားသည့် အလင်းနဂါးမြတ် ဖြစ်သည်။ လူသားတစ်ယောက်အနေဖြင့် အလင်းနဂါးမြတ်ကို သိုင်းဝိညာဉ်အဖြစ် ပိုင်ဆိုင်နိုင်သည့် ဝိညာဉ်ဆရာသခင် ရှိနေလိမ့်မည်ဟု မမျှော်လင့်ထားခဲ့ပေ။ ဒါက သိုင်းဝိညာဉ် ဗီဇပြောင်းလဲခြင်းဟု သတ်မှတ်နိုင်သော်လည်း ဒီအတိုင်းကြီးတော့ ဗီဇပြောင်းလဲရန် မဖြစ်နိုင်ပေ။

"လင်းလက်တောက်ပတဲ့ သန့်ရှင်းသောနဂါးဆိုတာ ဝိညာဉ်ဆရာသခင်တစ်ယောက်အတွက်တော့ အံ့ဩစရာပဲ"

လုံရှဲက လျှာသပ်ရင်း ပြောလိုက်သည်။

"အလင်းနဂါးမြတ် မိသားစုက နဂါးနတ်ဘုရားရဲ့ တိုက်ရိုက်မျိုးဆက်တွေ ဖြစ်ပြီး ကြယ်တာရာတောအုပ်ထဲက ဒီထျန်းရဲ့ ကလေးတွေနဲ့ အဆင့်အတန်း တူတူပဲ။ လူသားတွေက ဘယ်လိုလုပ် ဒီလိုအဆင့်ရှိတဲ့ သိုင်းဝိညာဉ်မျိုး ရှိနိုင်မှာလဲ။ ယေဘုယျအားဖြင့်တော့ အလွန်ဆုံးရှိမှ ယာလုံ အမျိုးအစား သိုင်းဝိညာဉ်ပဲ ဖြစ်နိုင်ပြီး ဒါကတောင် မယုံနိုင်စရာ ကောင်းနေပြီ"

"ဒီ မုအန်က အပြာရောင်လျှပ်စီး နဂါးမင်းဂိုဏ်းရဲ့ မျိုးဆက်ဖြစ်ပြီး ဗီဇပြောင်းလဲသွားတာ ဖြစ်ရမယ်"

ဝမ်ဖုန်းက မတတ်သာဘဲ ရှင်းပြလိုက်သည်။

သို့သော် သိုင်းဝိညာဉ်များ မွေးဖွားလာပုံမှာ တကယ့်ကို လျှို့ဝှက်ချက်တစ်ခု ဖြစ်သည်။ ဗီဇပြောင်းလဲမှုများက မျိုးကွဲများနှင့် ဖြစ်နိုင်ခြေများစွာကို ဖန်တီးပေးသည်။

"နဂါးနတ်ဘုရားရဲ့ တိုက်ရိုက်မျိုးဆက်အနေနဲ့ အဲဒီတုန်းက အင်အားအကောင်းဆုံး အလင်းနဂါးမြတ်က နတ်ဘုရားတွေနဲ့ ယှဉ်နိုင်ခဲ့သည်။ နောက်ပိုင်းမှာ အဲဒီနတ်ဘုရားတွေရဲ့ ဖျက်ဆီးခြင်းကို ခံခဲ့ရပေမဲ့... ငါ့အထင်တော့ ဒီအလင်းစွမ်းအားက ဒီအတိုင်း ဗီဇပြောင်းလဲသွားတာမျိုး မဖြစ်နိုင်ဘူး။ အလင်းနဂါးမြတ်ရဲ့ စွမ်းအားအချို့ကို ရရှိပြီး ဒီလိုသိုင်းဝိညာဉ်မျိုးကို ဆက်ခံနိုင်တာမျိုး ဖြစ်နိုင်သည်‌။ ဥပမာ- ကြွင်းကျန်ရစ်တဲ့ ခန္ဓာကိုယ်အစိတ်အပိုင်းတစ်ခုခုပေါ့... မဟုတ်ရင် လူသားတွေအနေနဲ့ ဒီလိုအဆင့်အတန်းမျိုးရှိတဲ့ သိုင်းဝိညာဉ်ကို မွေးဖွားပေးနိုင်ဖို့ မဖြစ်နိုင်ဘူး"

လုံရှဲက ခေါင်းခါရင်း ပြောသည်။

"ဒါက နတ်ဘုရားတစ်ပါးလိုပဲ။ မင်းက နတ်ဘုရားတစ်ပါးရဲ့ ပုံသဏ္ဌာန်ကို သိုင်းဝိညာဉ်အဖြစ် သုံးချင်ရင် အဲဒီနတ်ဘုရားရဲ့ ခွင့်ပြုချက် ရရမယ်၊ ဒါမှမဟုတ် အဲဒီနတ်ဘုရားရဲ့ စွမ်းအားအချို့ ရှိနေမှသာ ဒီလိုမျိုး ပိုင်ဆိုင်ခွင့်ရှိမှာ"

လုံရှဲ၏ စကားကို နားထောင်ရသည်မှာ အမှန်ပင် ဖြစ်သည်။ ထိုစဉ်က ပင်လယ်နတ်ဘုရားကျွန်းမှ ပင်လယ်နတ်ဘုရား ဒိုလော် ပိုဆိုင်ရှီသည် ပင်လယ်နတ်ဘုရားကိုယ်တိုင်၏ သိုင်းဝိညာဉ်ကို ပိုင်ဆိုင်ခဲ့သည်။ ပိုဆိုင်ရှီသည် ပင်လယ်နတ်ဘုရား၏ ဆက်ခံသူအဖြစ် ရွေးချယ်ခံခဲ့ရခြင်း ဖြစ်သည်။ ချန်းရန်ရွှဲ၏ အခြေအနေမှာလည်း ထို့အတူပင် ယုတ္တိရှိလှသည်။