အခန်း (၁၁၂၉) - ဘဝထဲက အခြေခံဗဟုသုတတွေကို ထပ်ပြီးလေ့လာပါဦး

ဝမ်တုန်းက နှာခေါင်းရှုံ့ရင်း ခေါင်းညိတ်လိုက်ပြီး မျက်နှာချင်းဆိုင်ရှိ အမျိုးသမီးကို ကြည့်ကာ တည်ငြိမ်စွာ ပြောလိုက်သည်။

"ဝမ်တုန်း... အဆင့် ၂၃ ဝိညာဉ်ဆရာသခင်၊ သိုင်းဝိညာဉ်က အလင်းနတ်သမီးလိပ်ပြာ၊ ဝိညာဉ်သားရဲကတော့ ယန်ယန်နေကြာပန်း ဖြစ်တယ်"

မျက်နှာချင်းဆိုင်ရှိ အမျိုးသမီးမှာမူ အပြာနုရောင် ဝတ်စုံကို ဝတ်ဆင်ထားပြီး ကောက်ကြောင်းလှပကာ ချောမောသော မျက်နှာကို ပိုင်ဆိုင်ထားသည်။ သူမကလည်း တည်ငြိမ်စွာဖြင့်ပင် မိတ်ဆက်လိုက်၏။

"ရွှေးချင်း... အဆင့် ၃၇ ထိန်းချုပ်ရေးစနစ် ဝိညာဉ်ဆရာသခင်၊ သိုင်းဝိညာဉ်က ရေမှော် ဖြစ်တယ်"

ထိန်းချုပ်ရေးစနစ် ဝိညာဉ်စာချုပ်သခင်လား...။ ဝမ်တုန်းသည် အနည်းငယ် အံ့အားသင့်သွားမိသော်လည်း ရေမှော်ကဲ့သို့သော သိုင်းဝိညာဉ်၏ အရည်အသွေးမှာ သာမန်မျှသာ ဖြစ်သည်။ ယခုခေတ် ဝိညာဉ်ဆရာသခင် လောက၏ တိုက်ပွဲ ဖွံ့ဖြိုးတိုးတက်မှုနှင့် ဆင့်ကဲပြောင်းလဲမှုများအရ ထိန်းချုပ်ရေးစနစ်သည် တိုက်စစ်စနစ်နှင့် အမြန်နှုန်းစနစ်ကို လုံးဝနှိပ်ကွပ်နိုင်သည်ဟူသော အဆိုမှာ မရှိတော့ပေ။ အခြေခံအားဖြင့်မူ မည်သူ့၏ ဝိညာဉ်စွမ်းအားက ပိုမိုမြင့်မားသနည်းဆိုသည်နှင့် ဝိညာဉ်စွမ်းရည်များကို မည်သို့အသုံးချသနည်းဆိုသည့်အပေါ်တွင်သာ မူတည်နေပြီး အကြွင်းမဲ့ နှိပ်ကွပ်နိုင်ခြင်းမျိုး မရှိတော့ချေ။ တစ်ဖက်လူတွင် ဝိညာဉ်စွမ်းအား အဆင့်မြင့်မားနေသော်လည်း သူမအနေဖြင့် သူ့ကို ထိန်းချုပ်ရန်မူ ခက်ခဲလိမ့်မည် ဖြစ်သည်။

"စတင်စေ။" ဟု ဝတ်ရုံနက်နှင့် ဒိုင်လူကြီးက အမိန့်ပေးလိုက်သည်။

ဝမ်တုန်းက ဦးဦးဖျားဖျားပင် အလင်းနတ်သမီးလိပ်ပြာ သိုင်းဝိညာဉ်ကို ပူးပေါင်းစေလိုက်ပြီး ခါးတွင်ရှိသော ယန်ယန်နေကြာပန်းကို ခပ်ဖွဖွ တစ်ချက်ပုတ်ကာ ရွှေးချင်းဆီသို့ တိုက်ရိုက် ပြေးဝင်သွားတော့သည်။

ရွှေးချင်းသည် ရပ်နေသည့်နေရာမှာပင် ခပ်ဖွဖွ ပြုံးလိုက်၏။ သူမ၏ လက်ဝါးထက်တွင် လေးငါးလက်မခန့်သာရှိသော ရေပြာရောင် ရေမှော်ပင်တစ်ပင် ထွက်ပေါ်လာသည်။

"ပထမ ဝိညာဉ်စွမ်းရည်... မျိုးပွားခြင်း။"

ရွှေးချင်းက လက်ကို ခပ်ဖွဖွ တောက်လိုက်ရာ ပုံမှန်အတိုင်း ခရမ်းရောင်နှစ်ကွင်းနှင့် အမည်းရောင်တစ်ကွင်းရှိသော ဝိညာဉ်ကွင်းများ လင်းထိန်လာသည်။ ရေပြာရောင် ရေမှော်ပင်သည် ရေတွက်၍မရနိုင်သော စပိုး (မျိုးမှုန်) များကို ထွေးထုတ်လိုက်ရာ တိုက်ပွဲကွင်းပြင်နှင့် လေထုထဲသို့ ပျံ့လွင့်သွားတော့သည်။ မှိုကဲ့သို့ သေးငယ်လှသော စပိုးများသည် လေနှင့်အတူ လွင့်မျောနေပြီး အလွန်ပင် သိပ်သည်းလှသဖြင့် ရှောင်တိမ်းရန် ခက်ခဲလှသည်။

ဝမ်တုန်း ပြေးဝင်လာသည့် ခဏမှာပင် ထိုစပိုးများ၏ ကပ်ငြိခြင်းကို ခံလိုက်ရသည်။ အလွန်သေးငယ်လွန်းသဖြင့် ရှာဖွေရန် ခက်ခဲလှပြီး ၎င်းတို့သည် ဖုန်မှုန့်ထက်ပင် ပိုမိုနုနယ်လှသည်။ ကပ်ငြိမိသွားသည့် အခိုက်အတန့်တွင် ရွှေးချင်း၏ ကိုယ်ပေါ်ရှိ ပထမ ဝိညာဉ်ကွင်းသည် ပိုမိုလင်းထိန်လာခဲ့သည်။

ထို့နောက်ချက်ချင်းပင် ဝမ်တုန်း၏ ခန္ဓာကိုယ်ပေါ်မှ ရေမှော်ပင်ခက်များ ထွက်ပေါ်လာပြီး တစ်ကိုယ်လုံးသို့ လျင်မြန်စွာ ပျံ့နှံ့သွားတော့သည်။ မျက်စိတစ်မှိတ်အတွင်းမှာပင်ရေမှော်ပင်များဖြင့် အထပ်ထပ် အုပ်မိုးခံလိုက်ရ၏။ စူးစမ်းရလွန်းသဖြင့် ဝမ်တုန်းအနေဖြင့် တုံ့ပြန်ရန်ပင် အချိန်မရလိုက်ပေ။

ဝမ်တုန်းသည် အကြိမ်အနည်းငယ် ရုန်းကန်ကြည့်ရာ ရေမှော်ပင်များက အလွန်သိပ်သည်းလွန်းနေသည်ကို တွေ့လိုက်ရသည်။ တစ်ပင်တည်းဆိုလျှင် မမာကျောသဖြင့် သူ အလွယ်တကူ ဖြတ်တောက်နိုင်သော်လည်း မျိုးပွားခြင်းစွမ်းရည်၏ သက်ရောက်မှုကြောင့် သူ၏ကိုယ်ပေါ်တွင် သိန်းချီ၍ ရှိနေသဖြင့် ရုန်းထွက်ရန် ခက်ခဲနေခြင်း ဖြစ်သည်။

"ဒုတိယ ဝိညာဉ်စွမ်းရည်... အအေးဓာတ်ပိတ်ဆို့ခြင်း။" ရွှေးချင်း၏ ဒုတိယ ဝိညာဉ်ကွင်း လင်းထိန်လာသည်။

ဝမ်တုန်း၏ ကိုယ်ပေါ်ရှိ ရေမှော်ပင်များသည် အအေးဓာတ်များကို စတင်ထုတ်လွှတ်လာတော့သည်။ ထိုအအေးဓာတ်၏ သက်ရောက်မှုကြောင့် ရေမှော်ပင် တစ်ပင်ချင်းစီသည် စတင်ကျုံ့ဝင်သွားပြီး ၎င်းတို့၏ မာကျောမှုမှာ များစွာ မြင့်တက်လာခဲ့သည်။ ယင်းက ဝမ်တုန်းကို လှုပ်ရှားရ ပိုမိုခက်ခဲစေသည်။ သူ၏ ကျောနောက်ရှိ အတောင်ပံများကိုပင် ခါယမ်း၍မရတော့သလို ဝိညာဉ်စွမ်းရည်များကိုလည်း ထုတ်လွှတ်နိုင်ခြင်း မရှိတော့ပေ။ ထို့အပြင် ဝိညာဉ်စွမ်းအား ကွာဟချက်က ကြီးမားလွန်းသဖြင့် ဝမ်တုန်းအနေဖြင့် လုံးဝ ရုန်းမထွက်နိုင်တော့ချေ။

"တတိယ ဝိညာဉ်စွမ်းရည်... ဆုတ်ဖြဲခြင်း။" ရွှေးချင်း၏ နောက်ဆုံး အမည်းရောင် ဝိညာဉ်ကွင်းသည် ထပ်မံလင်းထိန်လာပြန်သည်။

ဒါသည် ဝမ်တုန်းနှင့် ဟော်ယွီယောက်တို့ ယခင်က ကြုံတွေ့ခဲ့ဖူးသော အတွေ့အကြုံမရှိသည့် တိုက်ပွဲများနှင့် ကွာခြားလှသည်။ ရွှေးချင်း၏ တိုက်ခိုက်မှုသည် အကယ်ဒမီကျောင်းတစ်ခု၏ ထူးချွန်ထက်မြက်သည့် အဆင့်အတန်းကို အမှန်တကယ် ကိုယ်စားပြုနေသည်ဟု ပြောနိုင်သည်။ ထူးချွန်ထက်မြက်သူဟူသည် ဝိညာဉ်စွမ်းအား ပါရမီအပြင် ပို၍အရေးကြီးသည်မှာ ဝိညာဉ်စွမ်းရည်များ၊ တိုက်ပွဲကွင်းပြင်ပေါ်ရှိ ဆုံးဖြတ်ချက်များနှင့် တိုက်ပွဲတွင်း ထူးခြားသော စတိုင်နှင့် အတွေ့အကြုံတို့ ဖြစ်ကြသည်။ ရွှေးချင်းသည် ထိုကဲ့သို့သောသူ ဖြစ်၏။ သူမ၏ ဝိညာဉ်စွမ်းအား ပါရမီမှာ အသင့်အတင့်သာ ရှိသော်လည်း သူမ၏ ဝိညာဉ်စွမ်းရည်များနှင့် တိုက်ခိုက်ရေးအတွေ့အကြုံမှာမူ မြန်ဆန်၊ တိကျပြီး ပြတ်သားလှကာ အမှားအယွင်းမရှိလှသဖြင့် ထိပ်တန်းအကယ်ဒမီတစ်ခု၏ လူရည်ချွန်ဖြစ်ရန် လုံလောက်လှသည်။ ဝမ်တုန်းကို တစ်မိနစ်မပြည့်မီ အချိန်အတွင်းမှာပင် လုံးဝ ချုပ်ကိုင်နိုင်ခဲ့ခြင်းက ယင်းကို သက်သေပြနေသည်။

"ပေဟဲအကယ်ဒမီက တကယ်ကို လည်တာပဲ။ ထိန်းချုပ်ရေးစနစ်က ဝမ်တုန်းလို တိုက်စစ်ပြင်းတဲ့ စနစ်ကို နှိပ်ကွပ်ပြီးသား ဖြစ်နေတာ" ဟု ဟော်ယွီယောက်က တစ်ခုခုကို တွေးမိပုံရပြီး ပြောလိုက်သည်။ "ဒီရေမှော်ရဲ့ ဂုဏ်သတ္တိက ယန်ယန်နေကြာပန်းကို အတော်လေး နှိပ်ကွပ်တယ်။ ပြီးတော့ ရွှေးချင်းရဲ့ ကျင့်ကြံမှုက မြင့်မားလွန်းတော့ ဝိညာဉ်စွမ်းအားက ဝမ်တုန်းနဲ့ ယန်ယန်နေကြာပန်းကို ဖိနှိပ်ဖို့ လုံလောက်နေတာပဲ။ အကယ်၍ ယန်ယန်နေကြာပန်းကို ခန္ဓာကိုယ်ပေါ်မှာ ကပ်မထားဘဲ ရွှေးချင်းကို နှစ်ဖက်ညှပ်ပြီး တိုက်ခိုက်မယ်ဆိုရင် တစ်ဖက်လူရဲ့ ထိန်းချုပ်မှုက များစွာ လျော့ကျသွားမှာ"

"ဒါပေမဲ့ ဝမ်တုန်းက ယန်ယန်နေကြာပန်းကို ကိုယ်နဲ့မကွာ ယူဆောင်လာခဲ့တယ်။ သူ အထိန်းချုပ်ခံရတာနဲ့ သူရော ယန်ယန်နေကြာပန်းပါ အတူတူ ထိန်းချုပ်ခံလိုက်ရတာပဲ။ ဒါကြောင့် တစ်ဖက်လူက ဝမ်တုန်း ထိန်းချုပ်ခံလိုက်ရတာကို မြင်မြင်ချင်းမှာပဲ မညှာမတာနဲ့ ဒုတိယ၊ တတိယ ဝိညာဉ်စွမ်းရည်တွေကို တိုက်ရိုက် ထုတ်သုံးလိုက်တာ။ တစ်ချက်တည်းနဲ့ အပြတ်ရှင်းဖို့ပဲ"

"နောက်တစ်ခါကျရင် သူတို့ကို အရင်ကစားခိုင်းရမယ်" ဟု ရှောင်ရှောင်က နှာခေါင်းရှုံ့ရင်း "သူတို့က ဂုဏ်သတ္တိချင်း နှိပ်ကွပ်မှုကနေတစ်ဆင့် ငါတို့နဲ့ ဝိညာဉ်သားရဲတွေရဲ့ စွမ်းအားကို ထုတ်မသုံးနိုင်အောင် လုပ်ဖို့ ကြိုးစားနေတာ။ ဘာပဲဖြစ်ဖြစ် နောက်ထပ် သုံးပွဲ ကျန်သေးတာပဲ၊ ဝမ်တုန်း ရှုံးရင်လည်း ငါတို့ ရှိသေးတယ်"

"ဝမ်တုန်း ရှုံးမှာမဟုတ်ဘူးလို့ ငါ ခံစားရတယ်" ဟု ဟဲချိုက်ထိုးက ပြောလိုက်ပြီး "သူ့မှာ ကိုယ်ပိုင်အတွေး ရှိမှာသေချာတယ်။ ဆရာဝမ်က ငါတို့ကို သင်ပေးထားတယ်လေ... မတူညီတဲ့ ဝိညာဉ်သားရဲတွေမှာ မတူညီတဲ့ တိုက်ခိုက်ရေးနည်းလမ်းတွေ ရှိတယ်ဆိုတာ။ ဝမ်တုန်းက ဝိညာဉ်သားရဲကို သူ့ခါးမှာ ပတ်ထားတယ်ဆိုကတည်းက အဲဒါမှာ နက်ရှိုင်းတဲ့ အဓိပ္ပာယ် ရှိရမယ်"

လူအချို့မှာ မှင်တက်သွားကြရသည်။

ထိုစဉ် တိုက်ပွဲကွင်းပြင်ထက်ရှိ ဝမ်တုန်းက ရယ်မောလိုက်သည်။

"မင်း ဘာလို့ ရယ်နေတာလဲ" မျက်နှာချင်းဆိုင်ရှိ ရွှေးချင်းသည် အနည်းငယ် နားမလည်နိုင်ဖြစ်ကာ မေးလိုက်သည်။ "မင်း ရှုံးနိမ့်သွားရင် ဆုတ်ဖြဲခြင်း ဝိညာဉ်စွမ်းရည်က မင်းကို များစွာ ထိခိုက်စေလိမ့်မယ်။ ဝိညာဉ်စွမ်းအားတွေ ယိုစိမ့်ပြီး ခန္ဓာကိုယ်ကလည်း လေဖြတ်သလို အခြေအနေမျိုး ဖြစ်သွားလိမ့်မယ်။ မင်း ရုန်းထွက်နိုင်ရင်တောင် ဝိညာဉ်စွမ်းအား အများကြီး ကျန်မှာမဟုတ်ဘူး။ ငါက ညှာတာတဲ့အနေနဲ့ ဝိညာဉ်ကိရိယာကို တောင် ထုတ်မသုံးသေးတာ။ မဟုတ်ရင် မင်း ဒီထက်ပိုပြီး မြန်မြန် ရှုံးလိမ့်မယ်"

"မင်း တစ်ခုခုကို လျစ်လျူရှုထားမိတယ် မဟုတ်လား" ဝမ်တုန်းက တည်ငြိမ်စွာ ပြောလိုက်သည်။

"ဘာကိုလဲ" ရွှေးချင်း ခေတ္တရပ်သွားပြီး "မင်း ဆိုလိုတာက မင်းရဲ့ ဝိညာဉ်သားရဲ ယန်ယန်နေကြာပန်းကိုလား။ ဒါက ရှားပါးတဲ့ အပင်စနစ် ဝိညာဉ်သားရဲဆိုတာ ငြင်းလို့မရပါဘူး။ ငါ့အတွက်ဆိုရင် အသက်သက်တမ်းကလွဲရင် သင့်တော်တဲ့ ဝိညာဉ်ကွင်းတစ်ခုပဲ။ ဒါပေမဲ့ ပထမဆုံးအနေနဲ့ ၎င်းရဲ့ သက်တမ်းက နိမ့်လွန်းပြီး စွမ်းအားက သာမန်ပဲ ရှိတယ်။ ဒုတိယအနေနဲ့ မင်းက အဲဒါကို ခါးမှာ ပတ်ထားတာဆိုတော့ ၎င်းရဲ့ စွမ်းအားကို လုံးဝ ထုတ်သုံးနိုင်မှာ မဟုတ်ဘူး"

"ချုပ်ရရင်... မင်းတို့ ပြောပြောနေတဲ့ ဝိညာဉ်စာချုပ်သခင်ဆိုတာက ပြောပလောက်စရာ မရှိပါဘူး။ မင်းတို့အတွက် ဘာမှ ပြောင်းလဲမသွားဘူး" ရွှေးချင်းက ခေါင်းခါလိုက်သည်။

"တကယ်လား" ဝမ်တုန်း၏ မျက်နှာထက်တွင် ကျေနပ်အားရသော အပြုံးတစ်ခု ပေါ်ပေါက်လာပြီး "ဒါဆိုရင် မင်း ဝိညာဉ်စာချုပ်သခင်ကို အထင်သေးလွန်းရာ ရောက်သွားပြီ။ ဒါ့အပြင် ငါက ရှောင်ခွေရဲ့ စွမ်းအားကို မပြဘူးလို့ ဘယ်သူပြောလဲ"

ရွှေးချင်းသည် ဝမ်တုန်းကို ကြည့်လိုက်သော်လည်း ပြန်မဖြေပေ။

နောက်တစ်ခဏတွင် ဝမ်တုန်း၏ ခန္ဓာကိုယ်တစ်ခုလုံးသည် ပူပြင်းလှသော အလင်းတန်းများဖြင့် စတင်တောက်ပလာခဲ့သည်။ ခါးနေရာမှ စတင်၍ ဖြစ်၏။

ပူပြင်းလှသော အလင်းတန်းများသည် ရေပြာရောင် ရေမှော်ပင်များတစ်လျှောက် ဝမ်တုန်း၏ ခန္ဓာကိုယ်ဆီသို့ ပျံ့နှံ့သွားတော့သည်။

"ငါက ဝိညာဉ်စာချုပ်သခင်ပဲ၊ တိုက်ပွဲစကတည်းက ငါ့ရဲ့ ဝိညာဉ်သားရဲက တိုက်ပွဲဝင်နေခဲ့တာ" ဝမ်တုန်းက ကျယ်လောင်စွာ ရယ်မောလိုက်ပြီး "ရှောင်ခွေ... ဒုတိယ ဝိညာဉ်စွမ်းရည်ကို သုံးလိုက်စမ်း၊ မီးတောက်ပေါက်ကွဲခြင်း။"

ပူပြင်းလှသော အသက်ရှူသံများ ဝမ်တုန်း၏ ခန္ဓာကိုယ်မှ ပေါက်ကွဲထွက်လာသည်။ ၎င်းသည် အတော်ကြာအောင် စုဆောင်းထားခဲ့ပုံရသည်။ ချက်ချင်းဆိုသလိုပင် ဝမ်တုန်း၏ မျက်နှာသည် ပူပြင်းနီရဲလာခဲ့ပြီး သူ၏ အရှိန်အဝါမှာ တဖြည်းဖြည်း မြင့်တက်လာတော့သည်။

"နှစ်ငါးရာသက်တမ်းရှိတဲ့ ယန်ယန်နေကြာပန်းက ငါ့ရဲ့ ဝိညာဉ်စွမ်းအားကို လုံးဝ မယှဉ်နိုင်ဘူး။ ဒီမီးတောက်စွမ်းအင်နဲ့ အအေးဓာတ်ရှိတဲ့ ရေမှော်တွေကို အရည်ပျော်အောင်၊ လောင်ကျွမ်းအောင် လုပ်ဖို့ဆိုတာ ဘယ်လိုမှ မဖြစ်နိုင်ဘူး" ရွှေးချင်းသည် လုံးဝ စိုးရိမ်ပူပန်ခြင်း မရှိပေ။

"ဘယ်သူက အရည်ပျော်အောင် လုပ်မယ်လို့ ပြောလဲ" ဝမ်တုန်းက ယုံကြည်မှုအပြည့်ဖြင့် ပြုံးလိုက်သည်။

ပြောပြီးသည်နှင့် ဝမ်တုန်းက တစ်ချက်လှုပ်ရှားလိုက်ရာ ဆူးများဖြင့် ဖုံးလွှမ်းနေသော ရေမှော်ပင်များသည် ရုတ်တရက် အလွန်ပင် ပျော့ပျောင်းသွားတော့သည်။ သူသည် ချက်ချင်းဆိုသလိုပင် ရုန်းထွက်နိုင်ခဲ့၏။

"အပူကြောင့် ပွပြီး အအေးကြောင့် ကျုံ့တယ်ဆိုတဲ့ ရိုးရှင်းတဲ့ အမှန်တရားကို မင်း နားမလည်ဘူးလား။ မင်းရဲ့ ရေမှော်တွေက အအေးဓာတ်နဲ့ ထိတွေ့တဲ့အခါ အလွန်မာကျောပြီး ကျုံ့ဝင်သွားလို့ ချုပ်ကိုင်မှုက ပိုအားကောင်းလာတာ။ ဒါပေမဲ့ ရှောင်ခွေ ထုတ်လွှတ်လိုက်တဲ့ မီးတောက်စွမ်းအင်နဲ့ ထိတွေ့လိုက်တဲ့အခါမှာတော့ ရေမှော်တွေက ပွလာပြီး ပျော့ပျောင်းသွားတာပဲ" ဝမ်တုန်းက ရယ်မောရင်း "ဒါ ဘယ်ခေတ် ရောက်နေပြီလဲ... ဝိညာဉ်စွမ်းရည်တွေက ဝိညာဉ်စွမ်းအား တစ်ခုတည်းအပေါ်မှာပဲ မူတည်နေတယ်လို့ မင်း ထင်နေတုန်းလား"

"မင်းတို့ရဲ့ ဆရာဆီကနေ ဘဝထဲက အခြေခံဗဟုသုတအချို့ကို ထပ်ပြီး လေ့လာပါဦး။"

ရွှေးချင်းသည် မှင်တက်သွားမိပြီး သူမ၏ မျက်နှာသည် ရုတ်တရက် မှောင်မှောင်မည်းမည်း ဖြစ်သွားတော့သည်။

"တစ်ချိန်တည်းမှာပဲ... ဒီမီးတောက်ပေါက်ကွဲခြင်းက ဝိညာဉ်ထိန်းချုပ်ရေး စွမ်းရည်တစ်ခုပဲ။ ချုပ်ကိုင်မှု အမျိုးမျိုးကို ဖြေဖျောက်ပေးတဲ့အပြင် ပေါက်ကွဲထွက်လာတဲ့ မီးတောက်တွေက ငါ့ရဲ့ ကိုယ်ပိုင်ခွန်အားနဲ့ အမြန်နှုန်းကို ၁၀ ရာခိုင်နှုန်း တိုးမြှင့်ပေးနိုင်တယ်။ ငါက ဘာဖြစ်လို့ ရှောင်ခွေကို ကိုယ်ပေါ်မှာ ပတ်ထားတယ်လို့ ထင်လဲ" ဝမ်တုန်းသည် ရွှေးချင်းဆီသို့ ပြေးဝင်သွားပြီး "ဒါ့အပြင် မင်းရဲ့ တတိယ ဝိညာဉ်စွမ်းရည်က ငါ့ရဲ့ ဝိညာဉ်စွမ်းအားကို တကယ်ပဲ အများကြီး ကုန်ဆုံးစေခဲ့တာ မှန်ပါတယ်။ ဒါပေမဲ့ နှမြောစရာကောင်းတာက... မင်း မသိတာတစ်ခုက ရှောင်ခွေရဲ့ ပထမ ဝိညာဉ်စွမ်းရည်ကို ခွေယွမ်ရဲ့ စွမ်းအားလို့ ခေါ်တယ်။ သူ ငါ့အနားမှာ ရှိနေသရွေ့ သူ့ရဲ့ ဝိညာဉ်စွမ်းအားကို ငါ့ဆီ လွှဲပြောင်းပေးနိုင်တယ်"

"မင်း စောစောက ငါ့ရဲ့ ဝိညာဉ်စွမ်းအားကို ကုန်ဆုံးစေခဲ့ပေမဲ့ ရှောင်ခွေကတော့ ကောင်းကောင်း ထိန်းသိမ်းထားနိုင်ခဲ့တာ။ ဒါကြောင့် အခု ငါ့မှာ ဝိညာဉ်စွမ်းအားတွေ အပြည့်ရှိနေပြီ။"

ခွန်အားမြှင့်တင်ပြီးနောက် ဝမ်တုန်း၏ ခန္ဓာကိုယ်မှ မီးတောက်များ ပေါက်ကွဲထွက်လာခဲ့ပြီး လေထုထဲတွင် ရေမှော်ပင်များ ထုတ်လွှတ်ထားသော စပိုး အားလုံးသည် လောင်ကျွမ်း ပျက်စီးသွားရတော့သည်။