အခန်း (၁၁၁၅) - မိစ္ဆာအမှောင်လောက
တိုက်ရိုက် ချေမှုန်းပစ်ခြင်းနှင့် မတူဘဲ တစ်ဖက်လူ၏ ဝိညာဉ်ကို ဝါးမြိုလိုက်ခြင်းသည် တစ်ဖက်လူ၏ မှတ်ဉာဏ်များကို ဆက်ခံရရှိခြင်းနှင့် အတူတူပင် ဖြစ်သည်။ အကယ်၍ ဥခွံမကျိုးပျက်မီက ဥထဲရှိ သတ္တဝါများ၏ မှတ်ဉာဏ်များ နိုးထခြင်း မရှိသေးပါက ဝါးမြိုပြီးနောက်တွင်လည်း သိရှိနိုင်မည် မဟုတ်ချေ။ သို့သော် မိုရင်သည် ဥထဲမှ အပြည့်အဝ ရုန်းထွက်လာခဲ့ပြီးပြီ ဖြစ်သည်။ ထို့ကြောင့် ယခုအခါ သူ၏ ဝိညာဉ်ကို ဝါးမြိုလိုက်မည်ဆိုပါက သူသိသမျှ အရာအားလုံးကို သဘာဝကျစွာပင် သိရှိသွားလိမ့်မည်။
“မလုပ်နဲ့... မလုပ်ပါနဲ့... ငါ့ရဲ့ ဝိညာဉ်ကို ဝါးမြိုလို့မရဘူး၊ မင်းသာ ဝါးမြိုလိုက်ရင် မင်းပါ ငါ့ရဲ့ ကူးစက်မှုကို ခံရမှာ သေချာတယ်! အဲဒီအခါကျရင် မင်းက လူသားတစ်ယောက် ဖြစ်နေတော့မှာ မဟုတ်ဘူး” မိုရင်က ပျာပျာသလဲ ပြောလိုက်သည်၊ “မင်းရဲ့ ကျင့်ကြံခြင်းနဲ့ စွမ်းရည်တွေက ကမ္ဘာမြေကြီး မှောက်ခုံဖြစ်သွားမတတ် ပြောင်းလဲသွားလိမ့်မယ်! ဒါကို သိရုံနဲ့တင် မင်းကိုယ်မင်း အရှုံးပေးစရာ မလိုပါဘူး။ ငါ ကိုယ်တိုင်လည်း ပြောပြနိုင်ပါတယ်”
“ကောင်းပြီလေ” ဝမ်ဖုန်း မျက်မှောင်ကြုတ်လျက် “ဒါဆိုရင် ပြောစမ်း” ဟု ဆိုလိုက်သည်။
“ဟုတ်ပါပြီ...” မိုရင်က သက်ပြင်းချရင်း “ဒါဆိုရင် ငါ မင်းကို ပြောပြပါ့မယ်...”
သို့သော်လည်း ထိုခဏ၌ပင် ဝမ်ဖုန်း၏ အသိစိတ်ပင်လယ်ထဲရှိ ဝိညာဉ်မုန်တိုင်းသည် ရုတ်တရက် ပိုမိုမြန်ဆန်လာခဲ့ပြန်သည်။ ချက်ချင်းဆိုသလို မိုရင်သည် ပိုမိုစူးရှလှသော အော်ဟစ်သံကြီးကို ထုတ်လွှတ်လိုက်ရတော့၏။
“စိတ်မရှိပါနဲ့၊ ငါ မင်းကို မယုံဘူး။ မင်းရဲ့ ဝိညာဉ်ကို ဝါးမြိုလိုက်တာက ပိုကောင်းပါတယ်။ အဲဒီအခါကျရင် ငါ အကုန်လုံးကို သိသွားမှာပဲ” ဝမ်ဖုန်းက တည်ငြိမ်စွာ ပြောလိုက်သည်။
“မင်း!” မိုရင် နာကျင်စွာ အော်ဟစ်လိုက်ရသော်လည်း ဒေါသထွက်လျက် ကူကယ်ရာမဲ့စွာဖြင့်သာ “ဒါဆိုရင်လည်း ဝါးမြိုလိုက်စမ်းပေါ့၊ ပြီးရင် ကူးစက်ခံရဖို့သာ ပြင်ထားလိုက်!” ဟု ဟိန်းဟောက်နိုင်တော့သည်။
ဝမ်ဖုန်း အေးစက်စွာ နှာခေါင်းရှုံ့လိုက်ပြီး ဝိညာဉ်မုန်တိုင်း၏ စွမ်းအားကို သုံးဆမျှ တိုးမြှင့်လိုက်သည်။ လျှို့ဝှက်ကျင့်စဉ်က ရူးသွပ်စွာ လည်ပတ်နေပြီး မိုရင်၏ ဝါးမြိုခံထားရသော ဝိညာဉ်ကို စုပ်ယူနေတော့သည်။ ခဏမျှအတွင်း၌ မိုရင်၏ ဝိညာဉ်သည် အမည်းရောင် မီးခိုးတန်းများအဖြစ်သို့ စတင်ပြောင်းလဲသွားပြီး စိတ်ဝိညာဉ်ရေစက်ကလေးထဲသို့ ပေါင်းစည်းတော့မည့်ဆဲဆဲ...
ထိုစဉ် အသံတစ်ခု ရုတ်တရက် ထွက်ပေါ်လာခဲ့သည် -
“မစုပ်ယူပါနဲ့ဦး! အစ်ကိုကြီး... မင်းသာ သူ့ကို စုပ်ယူလိုက်ရင် သူ့ရဲ့ မှတ်ဉာဏ်တွေကို ဖတ်ရှုနိုင်မှာ မှန်ပေမဲ့ မင်းရဲ့ အကြောင်းအရာ အားလုံးကိုလည်း အခြားကမ္ဘာက သတ္တဝါတွေက အထင်အရှား သိရှိသွားပါလိမ့်မယ်!”
ထိုအသံမှာ ရုတ်တရက် ထွက်ပေါ်လာခြင်း ဖြစ်သဖြင့် ဝမ်ဖုန်းကို ကြောင်အမ်းသွားစေသည်။ ဒါက နှင်းခဲခြင်္သေ့လင်းကျွင်း၏ အသံ ဖြစ်သည်။
ဝမ်ဖုန်းသည် ဝိညာဉ်ကာကွယ်ရေးကိရိယာထဲမှ နှင်းခဲခြင်္သေ့လင်းကျွင်း၏ ဥကို ထုတ်ယူလိုက်သည်။
“မင်း အထဲမှာ သန့်စင်မွေးဖွားနေတာ မဟုတ်ဘူးလား။ ဘာကို ဆိုလိုတာလဲ” ဝမ်ဖုန်းက နှင်းခဲခြင်္သေ့လင်းကျွင်း၏ ဥကို အာရုံခံလျက် မေးလိုက်သည်။
“မကြာခင်ပါပဲ။ ဒီကောင်တွေက မိစ္ဆာအမှောင်လောကလို့ ခေါ်တဲ့ နေရာကနေ လာကြတာ... အသေးစိတ်ကိုတော့ ငါလည်း မသိဘူး။ ဒါပေမဲ့ ဒီလို ဝိညာဉ်ဝါးမြိုခြင်းက လမ်းကြောင်းနှစ်ခုစလုံး ပွင့်သွားတာနဲ့ တူတူပဲ။ အစ်ကိုကြီးက သူတို့ရဲ့ ဝိညာဉ်ကို ဝါးမြိုလိုက်ရင် သူပြောတဲ့ မေးခွန်းတွေရဲ့ အဖြေကို သိနိုင်ချင်မှ သိနိုင်လိမ့်မယ်။ ဒါပေမဲ့ မင်းရဲ့ ဝိညာဉ်က တစ်ဖက်လူရဲ့ ဝိညာဉ်ကို ဝါးမြိုလိုက်တာနဲ့ တစ်ဖက်လူကလည်း မင်းရဲ့ အကြောင်းတွေကို သေချာပေါက် သိသွားလိမ့်မယ်!”
“ဒီလို ဝိညာဉ်စွမ်းရည်ကို ‘ဝိညာဉ်ချိတ်ဆက်ခြင်း’ လို့ ခေါ်တယ်! ဒါက မိစ္ဆာအမှောင်လောကရဲ့ အစွမ်းထက်တဲ့ ဝိညာဉ်စွမ်းရည်တစ်ခုပဲ”
“ဘာလို့လဲဆိုတော့ ငါ့ရဲ့ ဝိညာဉ်ကလည်း သည်ဥထဲက အသစ်စက်စက်မွေးဖွားလာတဲ့ ဝိညာဉ်ရဲ့ အစိတ်အပိုင်းတချို့ကို စုပ်ယူဝါးမြိုခဲ့ဖူးလို့ပဲ။ ကံဆိုးတာက သူ့ရဲ့ ဝိညာဉ်က အပြည့်အဝ မရင့်မှည့်သေးလို့ မပြည့်စုံဘူး၊ ဒါကြောင့် ဝိညာဉ်ချိတ်ဆက်ခြင်းက အာနိသင်မရှိခဲ့တာ။ အဲဒါကြောင့် ငါက သူ့ရဲ့ အစပိုင်း ဗီဇမှတ်ဉာဏ်တချို့ကိုပဲ သိခဲ့တာပေါ့။ ဆန့်ကျင်ဘက်အနေနဲ့ သူကတော့ ငါ့ရဲ့ အခြေအနေကို မသိဘူး” နှင်းခဲခြင်္သေ့လင်းကျွင်းက အချိန်ကိုက်ပင် ပြောပြလာခဲ့သည်။
“ဒီမိုရင်က စောစောတုန်းက တမင်သက်သက် ဒီလိုပြောပြီး မင်းကို သူ့ရဲ့ မှတ်ဉာဏ်ကွက်လပ်ကို သတိပြုမိစေကာ သူ၏ ဝိညာဉ်ကို တိုက်ရိုက် ဝါးမြိုလာအောင် တန်ပြန်တိုက်စစ် ဆင်လိုက်တာပဲ။ သူက သူ့ကိုယ်သူ သားကောင်အဖြစ် သုံးပြီး ထောင်ချောက်ဆင်လိုက်တာ”
ထိုစကားကို ကြားရသောအခါ ဝမ်ဖုန်း၏ မျက်လုံးထဲတွင် အလင်းတစ်ချက် ဖြတ်ပြေးသွားသည်။ သေချာပါသည်၊ ထိုမိစ္ဆာက တကယ်ပင် ကောက်ကျစ်လွန်းလှသည်။ အစပိုင်းတွင် သူသည် တစ်ဖက်လူ၏ ဝိညာဉ်ကို ဝါးမြိုရန် မရည်ရွယ်ခဲ့ဘဲ ချေမှုန်းပစ်ရန်သာ စဉ်းစားခဲ့ခြင်း ဖြစ်သည်။ မိုရင်က တမင်သက်သက် မိမိကိုယ်ကိုယ် အသုံးဝင်သေးကြောင်းနှင့် သူသိသမျှကို ပြောပြနိုင်ကြောင်း ပြောလာခဲ့ခြင်း ဖြစ်သည်။ သဘာဝကျစွာပင် သူ တကယ် ပြောပြလိမ့်မည် မဟုတ်ချေ။ သို့သော် သူသည် မိမိအား တစ်ဖက်လူ၏ ဝိညာဉ်ကို ဝါးမြိုလိုက်လျှင် အားလုံးကို သိနိုင်သည်ဟူသော အချက်ကို သတိပြုမိစေရန် လှည့်စားခဲ့ခြင်း ဖြစ်ပြီး ဝါးမြိုပြီးနောက် အန္တရာယ်ရှိနိုင်ကြောင်း ပြောဆိုခဲ့ခြင်းမှာလည်း မိမိကို ပို၍ စိတ်ဆွပေးရန်သာ ဖြစ်သည်။ အဘယ်ကြောင့်ဆိုသော် မိုရင်သည် မိမိ၏ အင်အားနှင့် မာနအရ ဤအရာကို ကြောက်ရွံ့လိမ့်မည် မဟုတ်ကြောင်း နားလည်ထားသောကြောင့်ပင်။
'ဝိညာဉ်ချိတ်ဆက်ခြင်း... မိစ္ဆာအမှောင်လောကရဲ့ ဝိညာဉ်စွမ်းရည်ပေါ့။' ဝမ်ဖုန်း တွေးတောနေမိသည်။
မိမိ၏ အကြောင်းအရာ အားလုံးကို၊ အားလုံးမဟုတ်သည့်တိုင် အစိတ်အပိုင်းအချို့ကိုပင် အခြားကမ္ဘာမှ လူများ သိရှိသွားမည်ဆိုပါက ၎င်းသည် ဘူးပေါ်သီးပေါ် ဖြစ်လာနိုင်သဖြင့် လုံးဝ မကောင်းသည့် ကိစ္စပင်။
ဤသို့တွေးမိပြီး ဝမ်ဖုန်း စိတ်ထဲမှ တိတ်တဆိတ် ရေရွတ်လိုက်မိသည်၊ တကယ်ကို အန္တရာယ်များလှသည်။ ကံကောင်းသည်မှာ နှင်းခဲခြင်္သေ့လင်းကျွင်းက ဥတစ်လုံးကို ဝါးမြိုခဲ့ဖူး၍သာ ဖြစ်သည်။ မဟုတ်လျှင် ယနေ့တွင် တကယ်ပင် အခက်ကြုံရတော့မည်။ အဆုံးတွင်မူ ဝမ်ဖုန်းသည် သည်မိစ္ဆာအမှောင်လောကနှင့် ပတ်သက်ပြီး ဘာမျှမသိရှိသေးချေ။
“အစ်ကိုကြီး... သူ့ရဲ့ ဝိညာဉ်ကို တိုက်ရိုက် ချေမှုန်းပစ်လိုက်ပါ” ထိုစဉ် နှင်းခဲခြင်္သေ့လင်းကျွင်းက ဆက်လက်၍ “ငါက ဒီဥခွံထဲမှာ ကျန်နေတဲ့ မိစ္ဆာအမှောင်စွမ်းအင်တွေကို သုံးပြီး တိုက်ရိုက် သန့်စင်မွေးဖွားလာလို့ရတယ်... ရက်အနည်းငယ်တော့ ကြာလိမ့်မယ်” ဟု ဆိုသည်။
“မိစ္ဆာအမှောင်စွမ်းအင် ဟုတ်လား”
“ဟုတ်တယ်၊ ဒီထူးခြားတဲ့ အမှောင်စွမ်းအင်တွေကို မိစ္ဆာအမှောင်စွမ်းအင်လို့ ခေါ်တယ်။ အဲဒီမိစ္ဆာဝိညာဉ်သားရဲတွေကလည်း ဒီမိစ္ဆာအမှောင်စွမ်းအင်တွေကို စုပ်ယူကြတာပဲ... ငါဝါးမြိုခဲ့တဲ့ ဥထဲက ဝိညာဉ်က အလွန် အားနည်းသေးပြီး မှတ်ဉာဏ်ကလည်း အကန့်အသတ်ပဲ ရှိတာမို့ မိစ္ဆာအမှောင်လောကအကြောင်း ငါသိတာ ဒါအကုန်ပဲ”
ဝမ်ဖုန်း ခေါင်းအနည်းငယ် ညိတ်လိုက်သည်။ သည်ထူးခြားသော အမှောင်စွမ်းအင်များက ဘာလဲဆိုသည်ကို သူ နောက်ဆုံးတွင် သိရှိသွားခဲ့ပြီ ဖြစ်သည်။ သေချာပါသည်၊ ၎င်းသည် ဝိညာဉ်ကုန်းမြေ တိုက်ကြီး၏ စွမ်းအင် မဟုတ်ချေ။
“ချေမှုန်းမယ်... ဝိညာဉ်ချိတ်ဆက်ခြင်း... စိတ်ဝင်စားဖို့ကောင်းသားပဲ” ဝမ်ဖုန်း ရုတ်တရက် ရယ်မောလိုက်ရင်း “သည်လောက်အမြန်ကြီး ချေမှုန်းပစ်ဖို့ မလိုဘူးလို့ ငါထင်တယ်။ ငါက စုပ်ယူလို့မရပေမဲ့ ငါ့ရဲ့ သိုင်းဝိညာဉ်နဲ့ စုပ်ယူဖို့ ကြိုးစားကြည့်လို့ရတာပဲ၊ ဘယ်လိုအပြောင်းအလဲတွေ ဖြစ်လာမလဲဆိုတာ ဘယ်သူသိမှာလဲ” ဟု ဆိုသည်။
သည်စကားကို ကြားရသောအခါ နှင်းခဲခြင်္သေ့လင်းကျွင်း ခေတ္တမျှ ကြောင်အမ်းသွားရပြီး “အစ်ကိုကြီး... ဒီအတွေးက... ဖြစ်နိုင်ခြေရှိပုံရတယ်။ မင်းရဲ့ နတ်သမီးသိုင်းဝိညာဉ်က အလွန် ထူးခြားတယ်၊ ပြီးတော့ အဲဒီထဲက အတောင်ပံ ခုနစ်ချောင်းမှာ ရှိတဲ့ အရှိန်အဝါက ဒီမိစ္ဆာအမှောင်စွမ်းအင်နဲ့ ခပ်ဆင်ဆင် တူလှတယ်” ဟု ပြောလာခဲ့သည်။
ဝမ်ဖုန်း ဖွဖွလေး ပြုံးလိုက်မိသည်။ သူ သည်လိုလုပ်ဆောင်ခြင်းမှာ သဘာဝကျစွာပင် သူ၏ အလင်းနှင့်အမှောင်နတ်သမီး၊ မူလပုံစံဖြစ်သော အမှောင်နတ်သမီး သိုင်းဝိညာဉ်ကြောင့် ဖြစ်သည်။ ၎င်းသည် ထိုမိစ္ဆာအမှောင်စွမ်းအင်နှင့် တစ်စုံတစ်ရာ ပတ်သက်မှု ရှိနေရမည်။
ဝမ်ဖုန်း မှတ်မိသည်မှာ ဖျက်ဆီးခြင်းနတ်ဘုရားမင်းနှင့် အခြားသူများက နတ်ဘုရားလောက၏ အမှောင်နတ်သမီးနတ်ဘုရားသည် ကြီးမားသော စွမ်းအားကို ရရှိရန်အတွက် ကျဆင်းပျက်စီးသွားခဲ့သည်ဟု ပြောခဲ့ဖူးခြင်း ဖြစ်သည်။ သို့သော် သူ ဘယ်နေရာမှာ ကျဆင်းခဲ့သလဲ၊ ဘယ်နေရာကနေ ပြင်းထန်တဲ့ စွမ်းအားတွေကို ရရှိခဲ့သလဲဆိုတာကိုမူ ၎င်းတို့ ရှင်းရှင်းလင်းလင်း မပြောခဲ့ကြချေ။ ယခုကြည့်ရသည်မှာ ဝမ်ဖုန်း၏ ခန့်မှန်းချက်အရ ဆိုလျှင် ၎င်းသည် ဤမိစ္ဆာအမှောင်လောကနှင့် ပတ်သက်မှု ရှိနေရပေမည်။ မဟုတ်လျှင် ထိုမိစ္ဆာအမှောင်စွမ်းအင်များသည် ယနေ့ခေတ် အလင်းနှင့်အမှောင်နတ်သမီး သိုင်းဝိညာဉ်မှ ကျင့်ကြံထားသော ခရမ်းရောင် မူလအဆီအနှစ် အလင်းတန်း ခုနစ်ကြောင်း၏ စုပ်ယူခြင်းကို သည်မျှလောက် လွယ်ကူစွာ ခံရလိမ့်မည် မဟုတ်ပေ။
“ဒါဆိုရင် မင်းက သည်ဥခွံတစ်ဝက်ကို အရင်ဆုံး စုပ်ယူလိုက်ပါ။ ငါက အလင်းနှင့်အမှောင်နတ်သမီး သိုင်းဝိညာဉ်နဲ့ တစ်ဖက်လူရဲ့ ဝိညာဉ်ကို စုပ်ယူဖို့ ကြိုးစားကြည့်မယ်။ အကယ်၍ ဝိညာဉ်ချင်း ချိတ်ဆက်သွားရင်တောင် ချိတ်ဆက်သွားတာက အလင်းနှင့်အမှောင်နတ်သမီး သိုင်းဝိညာဉ်ပဲ ဖြစ်မှာပါ...” ဝမ်ဖုန်းသည် စိတ်ဝင်စားစရာကောင်းသော အရာတစ်ခု ဖြစ်ပျက်လာနိုင်သည်ဟု ခံစားမိနေသည်။
သည်အလင်းနှင့်အမှောင်နတ်သမီး သိုင်းဝိညာဉ်သည် မူလကပ်ဘေး နတ်ဘုရားမင်းထံမှ မြစ်ဖျားခံလာခြင်း ဖြစ်သည်။ အမှောင်နတ်သမီးနှင့် အလင်းနတ်သမီးတို့မှာ မူလကပ်ဘေး နတ်ဘုရားမင်း၏ မူလစွမ်းအားမှ ကွဲထွက်လာခဲ့ခြင်း ဖြစ်သည်။ သို့သော် အမှောင်နတ်သမီး သိုင်းဝိညာဉ်သည် နတ်ဘုရားလောကကို သစ္စာဖောက်ဖျက်ပြီး အခြားကမ္ဘာတစ်ခုသို့ ကျဆင်းသွားခဲ့ရာ အကယ်၍ ၎င်းသည် မိစ္ဆာအမှောင်လောကသာ ဖြစ်ခဲ့မည်ဆိုပါက။ သို့ဆိုလျှင် ထိုမိစ္ဆာအမှောင်လောကသည် အလင်းနှင့်အမှောင်နတ်သမီး သိုင်းဝိညာဉ်နှင့် အလွန် ရင်းနှီးကျွမ်းဝင်နေရပေမည်...
“ဘာတွေ ဖြစ်လာမလဲဆိုတာ မသိနိုင်ဘူးပဲ...” ဝမ်ဖုန်း၏ မျက်လုံးထဲတွင် စူးစမ်းလိုစိတ်များ လင်းလက်နေသည်။
သူသည် ပထမဆုံးအနေဖြင့် နှင်းခဲခြင်္သေ့လင်းကျွင်း၏ ဥကို ထိုဥခွံတစ်ဝက်ထဲတွင် ထားရှိပေးလိုက်သည်။ ထို့နောက် အမှောင်နတ်သမီး သိုင်းဝိညာဉ်ကို ထုတ်ဖော်လျက် မိုရင်၏ ဝိညာဉ်စွမ်းအင် အလင်းတန်းကို စုပ်ယူရန် ပြင်ဆင်လိုက်တော့သည်။
ရက်အနည်းငယ် ကြာပြီးနောက်...
ပြင်ပတွင်။
လုံရှဲနှင့် ကျန်းနန်နန်တို့သည် ရက်အတော်ကြာအောင် စောင့်ဆိုင်းနေခဲ့ကြပြီ ဖြစ်သည်။
ထိုရွှေဦးခေါင်းဇီးကွက်မှာလည်း လုံရှဲ၏ ဗိုလ်ကျမှုကို ခံရလျက် ရက်အတော်ကြာအောင် သင်ခန်းစာ ပေးခြင်းကို ခံနေရရှာသည်။ ပထမဆုံးအကြိမ်ကတည်းကပင် ဤရွှေဦးခေါင်းဇီးကွက်သည် ပိုမို တည်ငြိမ်လာပုံရသော်လည်း စိတ်ထဲတွင်မူ ပို၍ ဒေါသထွက်ပြီး စိတ်လှုပ်ရှားနေပုံရသည်။ လုံရှဲက ဆုံးမလိုက်သည်နှင့် ၎င်းသည် ချက်ချင်းပင် ပိုမိုပြင်းထန်သော တန်ပြန်တိုက်စစ်ကို ဆင်နွှဲတတ်သည်။ အကြိမ်တိုင်းတွင်လည်း ဒဏ်ရာအလိမ်းလိမ်း ဖြစ်ရစမြဲပင်။
လုံရှဲသည်လည်း ဤကဲ့သို့ ခေါင်းမာလှသော ရွှေဦးခေါင်းဇီးကွက်ကလေးကို အလွန် စိတ်ဝင်စားနေပြီး ဒီကောင်လေးနှင့် အချိန်ဖြုန်းနေရသည်ကိုပင် ပျော်ရွှင်နေပုံရတော့သည်။