အပိုင်း (၃) - သတ္တမအဆင့် ဆေးဖော်စပ်ခြင်း အတတ်ပညာ

"မင်းရဲ့ ခင်ပွန်းဖြစ်တဲ့ ငါ့ကို ဘယ်လိုနေရာမှာ ထားထားလို့လဲ ... ငါတို့ လက်ထပ်ထားကြတာတောင် မင်းရဲ့နှလုံးသားကို မင်းကိုယ်တိုင် မထိန်းချုပ်နိုင်သေးဘူးလား"

ဂူဖေး၏ အသံမှာ နိမ့်ရှိုင်းပြီး အေးစက်လှသည်။ ရွှမ်အာ မော့ကြည့်လိုက်မိစဉ် ဂူဖေး၏ မျက်နှာပေါ်ရှိ ခက်ထန်အေးစက်သော အမူအရာကို မြင်လိုက်ရသဖြင့် တုန်လှုပ်သွားရ၏။ သူမ ရှင်းပြချင်သော်လည်း စကားလုံးတို့က လည်ချောင်းဝတွင် တစ်ဆို့နေခဲ့သည်။ အမှန်စင်စစ် ဂူဖေး ပြောသည်မှာလည်း မှန်ကန်နေသည် မဟုတ်ပါလား။ အိမ်ထောင်ပြုပြီးသည့်နောက် အခြားသော အမျိုးသားများနှင့် အထိုက်အလျောက် အကွာအဝေးတစ်ခု ထားရှိရမည်မှာ ဓမ္မတာပင်။ သို့သော် သူမသည် ကိုယ့်စိတ်ကိုယ်သာ ဦးစားပေးခဲ့ပြီး ဂူဖေး၏ ခံစားချက်ကို လျစ်လျူရှုခဲ့မိသည်။ သို့မဟုတ်လျှင်လည်း သူမသည် သိလျက်နှင့်ပင် ဂရုမစိုက်ခဲ့ခြင်း ဖြစ်နိုင်သည်။

တိန် ... ရွှမ်အာ၏ စိတ်ထဲတွင် ကြောက်ရွံ့တုန်လှုပ်ခြင်းနှင့် စိတ်ဓာတ်ကျဆင်းခြင်းများ ဖြစ်ပေါ်နေပါသဖြင့် ရရှိခဲ့သော စိတ်ခံစားမှုတန်ဖိုး +၃၀၀

"တော်ပြီ ... ဆက်ပြောနေဖို့ မလိုတော့ဘူး၊ ငါတို့ လမ်းခွဲကြရအောင်"

"မင်းရဲ့ ခန္ဓာကိုယ်ကိုတောင် ငါ့ကို ပေးအပ်ဖို့ ဝန်လေးနေမှတော့ ငါ မင်းကို လွတ်လပ်ခွင့် ပေးလိုက်မယ်"

ဂူဖေးသည် ရှေ့တွင်ရှိနေသော ရှောင်အာကို တည်ငြိမ်စွာ ကြည့်ရင်း အေးစက်သော လေသံဖြင့် ဆိုလိုက်သည်။

"ကျွန်မ..."

ရွှမ်အာ ပါးစပ်ဟလိုက်မိသည်။ 'ကျွန်မ ခန္ဓာကိုယ်ကို ပေးနိုင်ပါတယ်' ဟု ပြောထွက်လုနီးပါး ဖြစ်သွားသော်လည်း အကြောင်းတစ်ခုခုကြောင့် ထိုစကားတို့သည် နှုတ်ခမ်းဖျားမှ ထွက်မလာခဲ့ပေ။

"ကျွန်မကို အဲ့ဒီလောက်တောင် မယုံကြည်နိုင်တော့တာလား"

ဂူဖေး၏ ပြတ်သားသော အမူအရာကို မြင်လိုက်ရသောအခါ ရွှမ်အာ၏ မျက်နှာမှာ ဖြူလျော်သွားပြီး ရင်ထဲတွင် ဝမ်းနည်းမှုတို့ ပြည့်နှက်သွားတော့သည်။

တိန် ... ရွှမ်အာ၏ စိတ်ထဲတွင် ဝမ်းနည်းခြင်း၊ နာကျင်ခြင်းနှင့် အရှက်ရခြင်းများ ဖြစ်ပေါ်နေပါသဖြင့် ရရှိခဲ့သော စိတ်ခံစားမှုတန်ဖိုး +၃၀၀

"ငါ့မှာ မင်းကို ယုံကြည်ရမယ့် အကြောင်းပြချက် တစ်ခုလောက် ရှိသေးလို့လား" ဂူဖေးက ခနဲ့တဲ့တဲ့ ပြန်ပြောလိုက်သည်။

"ကျွန်မ ... ကျွန်မလေ..."

ယခုအချိန်တွင် ရွှမ်အာ၏ ဦးနှောက်မှာ ဗလာကျင်းနေပြီး စကားတစ်ခွန်းကိုပင် ပြည့်စုံအောင် မပြောနိုင်တော့ပေ။

"တော်ပြီ ... အပြန်အလှန် အခက်မတွေ့စေဘဲ ကောင်းကောင်းမွန်မွန်ပဲ လမ်းခွဲကြစို့။ ဒီညပဲ ငါ ဒီကနေ ထွက်သွားမယ်"

ဂူဖေးသည် ရွှမ်အာနှင့် ဆက်လက် အငြင်းပွားလိုစိတ် မရှိတော့ပေ။ ထိုစကားကို ချန်ထားရစ်ပြီး လှေကားပေါ်မှ ဆင်းရန် နောက်လှည့်လိုက်သည်။ ဤအိမ်သည် ရှောင်အာ၏ အပိုင်ဖြစ်သည်။ ယခင်က ဂူဖေးသည် ရှောင်အာကို အလိုလိုက်ခဲ့သဖြင့် လက်ထပ်ပြီးလျှင်ပင် သူမ၏အိမ်မှာပဲ နေထိုင်ချင်သည်ဆိုသော ဆန္ဒကို လိုက်လျောခဲ့သည်။ ယခုကဲ့သို့ အခြေအနေမျိုးတွင်မူ ဂူဖေးအနေဖြင့် ဤနေရာတွင် ဆက်နေရန် အကြောင်းမရှိတော့ပေ။

"မရဘူး ... မရဘူး! ရှင်က ကျွန်မရဲ့ ခင်ပွန်းပဲ၊ ကျွန်မကို ထားမသွားပါနဲ့"

အခြေအနေ၏ စိုးရိမ်ရမှုကို သတိပြုမိသွားသော ရှောင်အာသည် ဂူဖေးအား အတင်းအကျပ် တောင်းပန်တိုးလျှိုးလိုက်သည်။

"မင်း ငါ့ကို မသွားစေချင်ဘူးဆိုရင် ငါ မင်းကို နောက်ဆုံးတစ်ခု မေးမယ် ... ဒီည ငါတို့ လင်မယားအရာ မြောက်ကြမလား"

ရွှမ်အာ၏ စကားကို ကြားသောအခါ ဂူဖေး မျက်မှောင်ကြုတ်လိုက်မိပြီး ဖော်ပြမတတ်သော စက်ဆုပ်ရွံရှာမှုတို့ဖြင့် နောက်ဆုံးမေးခွန်းကို မေးလိုက်ခြင်း ဖြစ်သည်။

"ကျွန်မ..."

ရွှမ်အာ နှုတ်ဆိတ်သွားရပြန်သည်။ သူမ ဤကိစ္စကို တွေးဖူးသော်လည်း ယခုအချိန်မှာတော့ သူမ အဆင်မသင့်သေးပေ။

"ကောင်းပြီ ... မနက်ဖြန်ကျရင် ဒီကိစ္စကို မျိုးနွယ်စုခေါင်းဆောင်ဆီ ငါ သွားပြောလိုက်မယ်"

ယခုတစ်ကြိမ်တွင်မူ ဂူဖေး၏ ခြေလှမ်းများသည် ဝါးအိမ်လေးထဲမှ ပြတ်ပြတ်သားသား ထွက်ခွာသွားတော့သည်။ ရှောင်အာ မည်သို့ပင် အတင်းအကျပ် တားဆီးနေပါစေ သူ လှည့်မကြည့်တော့ပေ။

ညမှောင်လာသည်နှင့်အမျှ ကမ္ဘာမြေတစ်ခုလုံးကို အမှောင်ထုက ဖုံးလွှမ်းသွားသည်။ အေးမြသော လရောင်သည် ကောင်းကင်ယံမှ ဖြာကျနေပြီး တောင်တန်းတစ်ခုလုံးပေါ်သို့ ငွေရောင်ခြည်မျှင်တန်းလေးများ လွှမ်းခြုံထားသကဲ့သို့ ရှိနေ၏။ တောင်တန်းကြီး၏ အလယ်ဗဟိုတွင် ရှေးဟောင်းသားရဲကြီးများကဲ့သို့ ခံ့ညားထည်ဝါသော နန်းတော်စုကြီး တည်ရှိနေပြီး လရောင်အောက်တွင် ရှေးဆန်သော အငွေ့အသက်များကို ထုတ်ဖော်ပြသနေသည်။

ဂူဖေးသည် ထိုနန်းတော်ကြီးများနှင့် ဝေးရာ တောင်ထိပ်တစ်ခုပေါ်တွင် တစ်ကိုယ်တည်း ရပ်နေခဲ့သည်။ ဤအခိုက်အတန့်တွင် ပတ်ဝန်းကျင်မှာ အလွန်တရာ တိတ်ဆိတ်နေပြီး ဂူဖေး၏ စိတ်ထဲတွင်လည်း အလားတူ တည်ငြိမ်နေခဲ့သည်။

"ဒီနေ့ကစပြီး ရှောင်အာ စိတ်ကျေနပ်အောင် ငါ့ရဲ့ ခွန်အားတွေ အကုန်ခံပြီး ကြိုးစားနေမှာ မဟုတ်တော့ဘူး"

ဂူဖေးသည် သက်ပြင်းတစ်ချက်ကို အဝအလင် ချလိုက်ရင်း ရင်ထဲတွင် ပေါ့ပါးသွားသလို ခံစားလိုက်ရသည်။ ဤတောင်ထိပ်သည် သူ အိမ်ထောင်မပြုမီက နေထိုင်ခဲ့သည့် နေရာဖြစ်သည်။ ဤနေရာကို မရောက်ဖြစ်ခဲ့သည်မှာ အတော်ကြာခဲ့ပြီ။ သူ၏ နေအိမ်ဟောင်းဆီသို့ ဖြည်းဖြည်းချင်း လမ်းလျှောက်သွားရင်း ဂူဖေးသည် သူ၏ ရှေ့ဆက်ရမည့် အစီအစဉ်များကို စတင်စဉ်းစားနေမိသည်။

ဤသည်ကား လူပေါင်းများစွာသည် 'တိုက်ပွဲနတ်ဘုရား' ဖြစ်လာရန် ဘဝကို ပုံအောပြီး ကြိုးစားနေကြသည့် 'ဒိုချီ' တိုက်ကြီးပင် ဖြစ်သည်။ ဂူဖေးသည်လည်း ထိုသူများထဲမှ တစ်ဦးပင် ဖြစ်သည်။ လွန်ခဲ့သော ဆယ်နှစ်ခန့်က ဂူဖေးသည် 'စိတ်ခံစားမှု အဆင့်မြှင့်တင်ရေး စနစ်'ကို ရရှိခဲ့ပြီး သာမန်လူတစ်ယောက်ဘဝမှ ဂူမျိုးနွယ်စု၏ ပါရမီရှင်တစ်ဦး ဖြစ်လာအောင် လုပ်ဆောင်နိုင်ခဲ့သည်။

စိတ်ခံစားမှု အဆင့်မြှင့်တင်ရေး စနစ်!

ဤစနစ်၏ လုပ်ဆောင်ချက်မှာ ရိုးရှင်းပါသည်။ ကံကြမ္မာ အလွန်ကြီးမားသူတို့၏ စိတ်အပြောင်းအလဲများကို တိုက်ရိုက်ဖြစ်စေ၊ သွယ်ဝိုက်၍ဖြစ်စေ လှုံ့ဆော်ပေးခြင်းဖြင့် စိတ်ခံစားမှုတန်ဖိုးများကို စုဆောင်းနိုင်သည်။ ထိုအမှတ်များကို အသုံးပြု၍ သူ၏ စွမ်းရည်အမျိုးမျိုးကို အဆင့်မြှင့်တင်နိုင်သည်။

ဤကမ္ဘာတွင် ကံကြမ္မာ အလွန်ကြီးမားသူ အားလုံးနီးပါးသည် မူရင်းဝတ္ထု၏ ဇာတ်လိုက် 'ရှောင်ယန်' ၏ ပတ်ဝန်းကျင်မှာသာ ရှိကြသည်။ အနာဂတ်၏ 'မီးတောက်ဧကရာဇ်' ဖြစ်လာမည့် ရှောင်ယန်၏ ကံကြမ္မာမှာ သာမန်လူများထက် အဆပေါင်းများစွာ သာလွန်နေသည်မှာ မြေကြီးလက်ခတ်မလွဲပင်။ ထိုမှတစ်ပါး အခြားသော ကံကြမ္မာရှင် အများစုမှာ အနောက်မြောက်တိုက်ကြီးတွင် စုဝေးနေကြသည်။

လွန်ခဲ့သော နှစ်အနည်းငယ်အတွင်း ဂူဖေးသည် ရွှမ်အာတစ်ယောက်တည်းကိုသာ အာရုံစိုက်ခဲ့သည်။ ရှောင်အာကို ဂူမျိုးနွယ်စုသို့ ပြန်လည်ခေါ်ဆောင်လာနိုင်ရန်အတွက် သူသည် ဂူနယ်မြေအတွင်း၌ အပတ်တကုတ် လေ့ကျင့်ခဲ့သည်။ ထို့အပြင် ဂူမျိုးနွယ်စုဝင် အချို့တွင်လည်း ကံကြမ္မာ အနည်းငယ်စီ ပါရှိကြသဖြင့် ဂူဖေး၏ တိုးတက်မှုမှာ အလွန်လျင်မြန်ခဲ့သည်။

သို့သော်လည်း ကံကြမ္မာ နည်းပါးသူနှင့် ကံကြမ္မာ ကြီးမားသူတို့ထံမှ ရရှိသည့် စိတ်ခံစားမှုတန်ဖိုးမှာ ကွာခြားချက် ကြီးမားလွန်းလှသည်။ ဥပမာအားဖြင့် သာမန်လူတစ်ယောက်ကို စိတ်လှုပ်ရှားအောင် လုပ်ခြင်းက ၀.၁ သို့မဟုတ် ၀.၅ အမှတ်သာ ရနိုင်သော်လည်း ရှောင်အာကဲ့သို့သော ကံကြမ္မာရှင်ကို စိတ်လှုပ်ရှားအောင် လုပ်ပါက ရာနှင့်ချီသော အမှတ်များကို ရရှိနိုင်သည်။ ထို့ကြောင့် အမှတ်များ ပိုမိုစုဆောင်းနိုင်ရန်အတွက် ဂူဖေးသည် တောက်ချီတိုက်ကြီးရှိ ကံကြမ္မာရှင်များကို တစ်နေရာတည်းတွင် စုစည်းရန် လိုအပ်နေသည်။

စိတ်ခံစားမှုတန်ဖိုး - ၄၀၀၀

ဂူဖေး၏ မျက်စိရှေ့တွင် သူတစ်ဦးတည်းသာ မြင်နိုင်သော စနစ်မျက်နှာပြင် ပေါ်လာသည်။ ရွှမ်အာကို လမ်းခွဲစကား မပြောမီက သူ၏ အမှတ်များမှာ နှစ်ထောင်ကျော်ရုံသာ ရှိခဲ့သော်လည်း ယခုမူ နှစ်ဆတိုးကာ လေးထောင်အထိ ဖြစ်သွားပြီ ဖြစ်သည်။

"ဒီအမှတ်တွေကို ဒီလောက်ကြာအောင် စုခဲ့ပြီးပြီဆိုတော့ ငါ့ရဲ့ စွမ်းဆောင်ရည်တွေကို မြှင့်တင်ဖို့ အချိန်တန်ပြီ"

ဂူဖေး၏ စိတ်ထဲတွင် အတွေးတစ်ခု လက်ခနဲ ပေါ်လာပြီး စွမ်းဆောင်ရည် ဇယားကို ဖွင့်လိုက်သည်။

အမည် - ဂူဖေး

အသက် - ၁၆ နှစ်

စွမ်းအားအဆင့် - ကြယ်ခုနစ်ပွင့် တိုက်ပွဲဘိုးဘေးအဆင့်

ပါရမီ - ၁၀၁ (၉၀-၁၀၀ သည် ကြယ်တစ်ဆယ်ပွင့် တိုက်ပွဲဧကရာဇ် သွေးမျိုးဆက် ပါရမီဖြစ်သည်)

ခန္ဓာကိုယ်ကြံ့ခိုင်မှု - ၇၈ (သတ္တမအဆင့် မြင့်မြတ်သော သွေးမျိုးဆက်ရှိ နတ်သားရဲတစ်ကောင်၏ နောက်ဆုံးအဆင့်နှင့် ညီမျှသည်)

ဝိညာဉ်အဆင့် - ဝိညာဉ်နယ်ပယ် အစောပိုင်း

ကျင်ကြံမှု နည်းစနစ် - မီးလျှံနှလုံးသား ကျမ်းစာ (ကောင်းကင်အဆင့် နိမ့်)

တိုက်ပွဲစွမ်းရည် - မီးလျှံငရဲ (မြေကမ္ဘာအဆင့် မြင့်)၊ နေခြည်လက်ညှိုး (မြေကမ္ဘာအဆင့် အလယ်)၊ ကြယ်စင်ခြေလှမ်း (မြေကမ္ဘာအဆင့် မြင့် လှုပ်ရှားမှုစွမ်းရည်)...

ဆေးဖော်စပ်ခြင်း - ဆဋ္ဌမအဆင့်

စနစ်မျက်နှာပြင်မှာ ရှင်းလင်းလှပြီး ဂူဖေးအနေဖြင့် အလွတ်ရနေပြီဖြစ်သည်။

"စနစ် ... ဆေးဖော်စပ်ခြင်း စွမ်းရည်ကို အဆင့်မြှင့်မယ်"

ဂူဖေးက အမိန့်ပေးလိုက်သည်။

တိန် ... အသုံးပြုသူ၏ လက်ရှိ ဆေးဖော်စပ်မှုအဆင့်မှာ ဆဋ္ဌမအဆင့် ဖြစ်သည်။ သတ္တမအဆင့်သို့ မြှင့်တင်ရန် စိတ်ခံစားမှုတန်ဖိုး ၃၉၉၉ အသုံးပြုပါမည်။ ယခု အဆင့်မြှင့်တင်နေပါပြီ။

"ဝုန်း!"

ခဏအကြာတွင် အသိပညာ ဗဟုသုတများစွာသည် ဂူဖေး၏ ဦးနှောက်အတွင်းသို့ အလုံးအရင်းနှင့် ဝင်ရောက်လာတော့သည်။ ဆေးဖော်စပ်ခြင်းနှင့် ပတ်သက်သည့် နက်နဲသော အသိပညာတို့သည် သူ၏ မှတ်ဉာဏ်ထဲတွင် အမြစ်တွယ်သွားခဲ့၏။ ဆေးဖော်စပ်ခြင်း အတတ်ပညာသည် ကျယ်ပြောနက်နဲလှပြီး စနစ်က ပေးအပ်လိုက်သော အချက်အလက်များမှာပင် ရေခဲတောင်၏ အဖျားပိုင်းမျှသာ ရှိသေးသည်။

ဂူဖေးသည် သူ၏ ဦးနှောက်ထဲရှိ ဆေးဖော်စပ်နည်းများကို အသေအချာ ပြန်လည်သုံးသပ်ရင်း စိတ်ဝင်တစား နစ်မျောနေခဲ့သည်။ ထိပ်တန်း ဆေးဖော်စပ်ပညာရှင် တစ်ယောက်ဖြစ်လာရန် မည်မျှ ခက်ခဲသည်ကို သူ ကောင်းကောင်း သိထားသည်။ သို့သော် သူ့တွင် ဤစနစ် ရှိနေသရွေ့ တစ်နေ့တွင် တိုက်ကြီးတစ်ခုလုံးကို တုန်လှုပ်စေမည့် ဆေးဖော်စပ်ပညာရှင် ဖြစ်လာနိုင်မည်မှာ အသေအချာပင်။

သူသည် စနစ်မျက်နှာပြင်တွင်သာ အာရုံရောက်နေပြီး သူကိုယ်တိုင်လည်း မိမိနေအိမ်ရှိရာ တောင်ပေါ်တွင် ရှိနေသဖြင့် ပြင်ပမှ အခြေအနေများကို သတိမပြုမိခဲ့ပေ။ ထိုအချိန်တွင် မလှမ်းမကမ်း၌ ဂူမျိုးနွယ်စုမှ ချောမောလှပသော မိန်းကလေးတစ်ဦးသည် ရပ်နေပြီး ဂူဖေးကို တိတ်တဆိတ် စောင့်ကြည့်နေခဲ့လေသည်။