အခန်း (၂၈) - လူငယ်လေး... သိပ်ပြီး မာနမကြီးနဲ့ဦး၊ မင်းက တိုက်ပွဲဘိုးဘေး တစ်ယောက်များလား
"ခုနက ကယ်တင်ပေးခဲ့တဲ့အတွက် ကျေးဇူးတင်ပါတယ်..."
ယွန်းယွန်းက စိတ်ရင်းမှန်ဖြင့် ကျေးဇူးတင်စကား ဆိုလိုက်သည်။ သို့သော်လည်း ဂူဖေးကဲ့သို့ ငယ်ရွယ်သူတစ်ယောက်က အန္တရာယ်များလှသော မှော်သားရဲတောင်တန်း၏ အတွင်းပိုင်းအထိ တစ်ကိုယ်တည်း မည်သို့လာရောက် ကျင့်ကြံနေသနည်းဟူသည်ကိုမူ သူမ သိချင်နေဆဲပင်။
ထိုစဉ်က ဂူဖေးမှာ သူ၏အရှိန်အဝါကို ထိန်းချုပ်ထားပြီး အစစ်အမှန် စွမ်းအားကို ထုတ်မပြသေးပေ။ အကယ်၍ ယွန်းယွန်းသာ သိသွားခဲ့လျှင် သေချာပေါက် တုန်လှုပ်ခြောက်ခြားသွားပေလိမ့်မည်။ ယွန်းယွန်းသည် ဂူဖေးအား ခြေဆုံးခေါင်းဆုံး အကဲခတ်ကြည့်ရင်း သူမ၏ မျက်ဝန်းအစုံတွင် ဝေခွဲမရသည့် အရိပ်အယောင်များ ဖြတ်ပြေးသွားသည်။
[ယွန်းယွန်း ဇဝေဇဝါ ဖြစ်သွားသည်။ ရရှိခဲ့သော စိတ်ခံစားမှုတန်ဖိုး +၁၀၀]
"ထူးဆန်းလိုက်တာ... သူ့ရဲ့ ကျင့်ကြံဆင့်က ဘယ်အဆင့်မှာရှိနေလို့လဲ။ ငါ ဘာလို့ လုံးဝအကဲခတ်လို့ မရတာပါလိမ့်"
ယွန်းယွန်းသည် နဖူးကို အသာပွတ်ရင်း မျက်မှောင်ကြုတ်လိုက်မိသည်။ သူမ၏ စွမ်းအားအာရုံခံနိုင်စွမ်းမှာ ချိပ်ပိတ်ခံထားရခြင်းကြောင့် ထိခိုက်နေခြင်း ဖြစ်နိုင်သည်ဟုလည်း တွေးမိသည်။
"မင်းက ဆေးပညာရှင်တစ်ယောက်လား"
ဆေးလုံးတစ်လုံး သောက်ပြီးနောက် သူမ၏ ဒဏ်ရာများ သက်သာသွားသည်ကို သိရှိသွားသဖြင့် ယွန်းယွန်းက မေးမြန်းလိုက်ခြင်းဖြစ်သည်။
"ဟုတ်ပါတယ်..."
ဂူဖေးက ခေါင်းညိတ်ကာ တည့်တည့်တိုးတိုးပင် ဝန်ခံလိုက်သည်။ ထိုစကားကို ကြားလိုက်ရသည့်အခါ ယွန်းယွန်း စိတ်ဝင်တစား ဖြစ်သွားသည်။ ဤမျှ ငယ်ငယ်ရွယ်ရွယ်နှင့် ဆေးပညာရှင် တစ်ယောက် ဖြစ်နေသည်ဆိုလျှင် ဤလူငယ်၏ အနာဂတ်မှာ အမှန်တကယ်ပင် အလားအလာ ကောင်းလှပေသည်။
"ကောင်လေး.. မင်းက ငါ့ရဲ့ အသက်သခင် ကျေးဇူးရှင်ဆိုတော့ နောက်ကျရင် မင်းအတွက် အများကြီး အထောက်အကူဖြစ်စေမယ့် ဆေးပညာရှင် ဆရာကြီးတစ်ယောက်နဲ့ မိတ်ဆက်ပေးမယ်လေ..."
ယွန်းယွန်းသည် သူမနှင့် ရင်းနှီးသည့် ဆေးလုံးဘုရင် 'ဂူဟဲ' အကြောင်းကို တွေးတောလိုက်မိသည်။ ယနေ့ ဂူဖေးထံမှ ကြီးမားသော ကျေးဇူးကို ခံယူထားရသဖြင့် ဂူဟဲနှင့် မိတ်ဆက်ပေးကာ ကျေးဇူးဆပ်ရန် သူမ စိတ်ကူးလိုက်ခြင်းပင်။ အမှန်တကယ်တော့ ဆေးလုံးဘုရင် ဂူဟဲမှာ တစ်ပြည်လုံးတွင် အတော်ဆုံးဖြစ်သည့် အဆင့် ၆ ဆေးပညာရှင်တစ်ဦး ဖြစ်ပေသည်။
"မလိုပါဘူး..."
ဂူဖေးက ပြုံးလျက် ခေါင်းခါပြလိုက်သည်။ ယွန်းယွန်း၏ ဗဟုသုတအရ သူမ သိသမျှတွင် အဆင့်အမြင့်ဆုံးမှာ အဆင့် ၆ ဆေးပညာရှင် ဂူဟဲသာ ရှိပေလိမ့်မည်။ သို့သော်လည်း ဂူဖေးမှာ အဆင့် ၇ ဆေးပညာရှင် တစ်ဦး ဖြစ်နေပြီဖြစ်ရာ ဂူဟဲ၏ လမ်းညွှန်မှုမှာ သူ့အတွက် မလိုအပ်ပေ။ အကယ်၍ ဂူဟဲသာ ဂူဖေး၏ ဆေးဖော်စပ်မှု အတတ်ပညာကို သိသွားလျှင် ဂူဟဲကိုယ်တိုင်ကပင် ဂူဖေးထံ လာရောက်ပညာသင်ယူရပေလိမ့်မည်။
ဂူဖေးက ငြင်းပယ်လိုက်သည်ကို မြင်သောအခါ ယွန်းယွန်းလည်း ဆက်မပြောတော့ဘဲ စကားလမ်းကြောင်း လွှဲလိုက်သည်။ "ဒါနဲ့... မင်းနာမည်ကို မေးဖို့ မေ့နေလို့"
"ဂူဖေး..."
ယွန်းယွန်း ထိုအမည်ကို ကြားလိုက်ရသောအခါ အံ့အားသင့်သွားသည်။ ရှေ့က လူငယ်လေးသည် ဆေးလုံးဘုရင် ဂူဟဲနှင့် မျိုးရိုးအမည် တူနေလိမ့်မည်ဟု သူမ မထင်ထားခဲ့ပေ။
"ဂူ... ဟုတ်လား? မင်းနဲ့ ဆေးလုံးဘုရင် ဂူဟဲနဲ့များ ဘာပတ်သက်မှု ရှိလို့လဲ"
ယွန်းယွန်းက စူးစမ်းစွာ မေးလိုက်သည်။
"ဆံဖျားတစ်ချက်တောင် မပတ်သက်ပါဘူး..." ဂူဖေးက အေးအေးဆေးဆေးပင် ပြန်ဖြေလိုက်သည်။
"အင်း... ငါပဲ အများကြီး လျှောက်တွေးနေတာ နေမှာပါ" ယွန်းယွန်းက အနေခက်စွာ ရယ်မောလိုက်သည်။
"စောစောက စကားသံတွေ ကြားလိုက်ရသလောက်တော့ ခင်ဗျားက ဆေးဖော်ဖို့အတွက် ခရမ်းရောင် ခြင်္သေ့ဝိညာဉ်ကျောက်ပွင့်ကို အလိုရှိနေတာ မဟုတ်လား" ဂူဖေးက မေးလိုက်သည်။
"ဟုတ်တယ်... ဒါပေမဲ့ ခြင်္သေ့ဘုရင်က လဲလှယ်ဖို့ ငြင်းဆန်လို့ အတင်းအဓမ္မ ယူဖို့ ကြိုးစားခဲ့တာ။ ငါ့ဘက်ကလည်း ပေါ့ဆသွားလို့ သူ့ရဲ့ အသက်အန္တရာယ် ချိပ်ပိတ်ပညာနဲ့ အတိုက်ခံလိုက်ရပြီး ဒဏ်ရာရသွားတာ" ယွန်းယွန်းက သူမ၏ ခန္ဓာကိုယ်မှ နာကျင်မှုများကို ခံစားနေရဆဲဖြစ်သဖြင့် ခေါင်းညိတ်ပြလိုက်သည်။
မူလဇာတ်လမ်းကို ကောင်းစွာ သိရှိထားသည့် ဂူဖေးက ခရမ်းရောင် ခြင်္သေ့ဝိညာဉ်ကျောက်ပွင့်အကြောင်း ကြားသည်နှင့် ချက်ချင်းပင် - "ကျွန်တော် မှားမပြောဘူးဆိုရင် အဲဒီကျောက်ပွင့်ကို ဒိုချီဆရာသခင်အဆင့် မြှင့်တင်ပေးနိုင်တဲ့ ခရမ်းရောင် ဝိညာဉ်ဆေးလုံးတွေ ဖော်စပ်ဖို့ သုံးကြတာပဲ။ ခင်ဗျားက အဲဒီဆေးလုံးတွေ ဖော်စပ်ဖို့ ကြံရွယ်နေတာလား"
ဂူဖေး ဤမျှအထိ သိနေသည်ကို မြင်သောအခါ ယွန်းယွန်းမှာ အံ့ဩတုန်လှုပ်သွားရသည်။
[ယွန်းယွန်း အံ့ဩသွားသည်။ ရရှိခဲ့သော စိတ်ခံစားမှုတန်ဖိုး +၁၀၀]
အမှန်တကယ်ပင် သူမသည် ထိုဆေးလုံးများကို သူမ၏ တပည့်ဖြစ်သူ 'နာလန်ယန်ရန်' အတွက် ဖော်စပ်ပေးရန် ရည်ရွယ်ထားခြင်း ဖြစ်သည်။
"ဒါနဲ့ မင်းလို ငယ်ငယ်ရွယ်ရွယ်နဲ့ ဘာဖြစ်လို့ မှော်သားရဲတောင်တန်းရဲ့ ဒီလောက်နက်တဲ့နေရာအထိ လာရတာလဲ" ယွန်းယွန်းက မအောင့်နိုင်တော့ဘဲ မေးလိုက်သည်။
ဂူဖေးကလည်း ဖုံးကွယ်မထားဘဲ သူ၏ ရည်ရွယ်ချက်ကို တိုက်ရိုက်ပြောလိုက်သည်။
"တကယ်တော့ ကျွန်တော်က
ခရမ်းရောင် အတောင်ပံခြင်္သေ့ဘုရင်ကို ကျွန်တော့်ရဲ့ စီးတော်ယာဉ်အဖြစ် လာဖမ်းတာပါ။ ခရမ်းရောင် ခြင်္သေ့ဝိညာဉ်ကျောက်ပွင့်ဆိုတာ သူတို့ရဲ့ မျိုးနွယ်စုအတွက် သိပ်အရေးကြီးတာ။ သူတို့က မလဲချင်ဘူးဆိုရင် အတင်းအဓမ္မ မယူသင့်ဘူး။ နောက်ပြီး ခင်ဗျားရဲ့ လက်ရှိစွမ်းအားနဲ့ဆိုရင် ခြင်္သေ့ဘုရင်ကို အနိုင်ယူဖို့ မဖြစ်နိုင်ဘူး..."
ဂူဖေး၏ စကားများကြောင့် ယွန်းယွန်း ကြောင်အမ်းအမ်း ဖြစ်သွားသည်။ သူမ ကြားလိုက်ရသည်ကိုပင် သူမကိုယ်တိုင် မယုံကြည်နိုင်ဖြစ်နေရသည်။
"ဒီလူငယ်လေးက ခြင်္သေ့ဘုရင်ကို စီးတော်ယာဉ်အဖြစ် ဖမ်းမယ်လို့ ပြောနေတာလား။ ငါများ မှားကြားတာလား"
ယွန်းယွန်း အကြီးအကျယ် အံ့အားသင့်သွားသည်။ ထိုသတ္တဝါမှာ အဆင့် ၆ မှော်သားရဲကြီး ဖြစ်သည့် ခရမ်းရောင် အတောင်ပံခြင်္သေ့ဘုရင် မဟုတ်ပါလား။
[ယွန်းယွန်း အံ့ဩသွားသည်။ ရရှိခဲ့သော စိတ်ခံစားမှုတန်ဖိုး +၁၀၀]
ယွန်းယွန်းက သူမ၏ အံ့ဩမှုကို ကောင်းစွာ ဖုံးကွယ်ထားသော်လည်း စနစ်၏ အသိပေးချက်ကြောင့် ဂူဖေးက အလွယ်တကူ သိရှိသွားသည်။ သူက ခပ်ဖွဖွလေး ပြုံးလိုက်ကာ - "ဟက်... အဆင့် ၆ မှော်သားရဲလေး တစ်ကောင်ပဲဟာ၊ အံ့ဩစရာ မရှိပါဘူး"
ဂူဖေးက ယွန်းယွန်း၏ တုံ့ပြန်မှုကို မထူးဆန်းသလိုပင် အေးအေးဆေးဆေး ပြန်ပြောလိုက်သည်။ ထိုအချိန်တွင်လည်း သူ၏ စွမ်းအားအရှိန်အဝါကို ထုံးစံအတိုင်း ဖုံးကွယ်ထားဆဲပင်။ ထို့အပြင် ခြင်္သေ့ဘုရင်၏ ရန်မှ ရှောင်ရှားရန်အတွက် သူ၏ ကျင့်ကြံဆင့်ကို ထုတ်မပြထားသဖြင့် ယွန်းယွန်းအဖို့မှာမူ ဤလူငယ်လေးသည် ကြွားလုံးထုတ်နေသည်ဟုသာ ထင်မှတ်နေတော့သည်။
'ဒီလူငယ်လေးက ဘာလို့ ဒီလောက်တောင် မာနကြီးတဲ့ စကားတွေကို ပြောနေရတာလဲ'
သို့သော် ဂူဖေးက ရှည်ရှည်ဝေးဝေး ရှင်းမပြတော့ဘဲ ဂူအပြင်ဘက်သို့ လှမ်းထွက်လိုက်သည်။ ဂူဖေး အပြင်ထွက်သည်ကို မြင်သောအခါ ဒဏ်ရာအနည်းငယ် သက်သာနေပြီဖြစ်သည့် ယွန်းယွန်းလည်း နောက်မှ လိုက်လာခဲ့သည်။
ထိုအချိန်တွင် ဂူအပြင်ဘက်၌ မှော်သားရဲများ၏ ဟိန်းဟောက်သံများဖြင့် ဆူညံကာ ရုတ်ရုတ်သဲသဲ ဖြစ်နေသည်။ အစောပိုင်းက ခြင်္သေ့ဘုရင်သည် ယွန်းယွန်းကို ရှာမတွေ့သည့်အပြင် ဦးချိုတစ်ဝက် အကျိုးခံလိုက်ရသည့် နာကျင်မှုကြောင့် တောင်တန်းတစ်ခုလုံး တုန်ဟိန်းသွားအောင် ဟိန်းဟောက်နေခြင်းဖြစ်သည်။ အဆင့်နိမ့် မှော်သားရဲများစွာမှာ ကြောက်လန့်တုန်ရီနေကြပြီး ၎င်းတို့၏ အသိုက်များအတွင်းသို့ ပုန်းလိုကြသော်လည်း ခြင်္သေ့ဘုရင်၏ အမိန့်ကြောင့် ယွန်းယွန်းကို ရှာဖွေနေကြရသည်။
မူလဇာတ်လမ်းတွင် 'ရှောင်ယန်' သည် ယွန်းယွန်းကို ကယ်တင်ပြီးနောက် သူ၏ စွမ်းအားမလုံလောက်မှုကြောင့် သူမ၏ အရှိန်အဝါကို လုံးဝမဖုံးကွယ်နိုင်ခဲ့ပေ။ ထို့ကြောင့် ဂူအပြင်ဘက်တွင် အနံ့ဖျောက်ဆေးမှုန့်များ ဖြူးခဲ့ရပြီး အဆင့်နိမ့်သားရဲများက သေချာမရှာဖွေသဖြင့်သာ လွတ်မြောက်ခဲ့ခြင်းဖြစ်သည်။
သို့သော် ဂူဖေးအတွက်မူ ထိုကဲ့သို့ လုပ်ဆောင်ရန် မလိုပေ။ သူ၏ စွမ်းအားက ယွန်းယွန်း၏ ခန္ဓာကိုယ်မှ အရှိန်အဝါ တစ်စုံတစ်ရာ မပေါက်ကြားအောင် တားဆီးထားနိုင်သည်။ သို့သော် အပြင်သို့ ရောက်သည့်အခါတွင်မူ သူက ယွန်းယွန်း၏ အရှိန်အဝါကို မဖုံးကွယ်ထားတော့ပေ။ ထို့ကြောင့် ဂူအပြင်သို့ ခြေလှမ်းအနည်းငယ် လှမ်းလိုက်သည်နှင့် ယွန်းယွန်း၏ အရှိန်အဝါကြောင့် မှော်သားရဲအုပ်ကြီး ရောက်ရှိလာတော့သည်။
ယွန်းယွန်းသည်လည်း အခြေအနေကို ရိပ်မိသွားပြီး မျက်နှာပျက်သွားကာ - "မကောင်းတော့ဘူး... ဒီသားရဲတွေက ခြင်္သေ့ဘုရင်ရဲ့ လက်အောက်ခံတွေပဲ။ သူတို့ ငါ့အနံ့ကို ရသွားပြီ... ငါ့ကြောင့် မင်းပါ ဒုက္ခရောက်ရတော့မယ်၊ တကယ် တောင်းပန်ပါတယ်"
[ယွန်းယွန်း အားနာသွားသည်။ ရရှိခဲ့သော စိတ်ခံစားမှုတန်ဖိုး +၁၀၀]
သူမ၏ အမြင်တွင် ဂူဖေးမှာ အားနည်းလွန်းသေးသည်။ သူမကိုယ်တိုင်မှာ တိုက်ပွဲဧကရာဇ်တစ်ဦး ဖြစ်သော်လည်း ဒဏ်ရာမသက်သာသေးသဖြင့် ဂူဖေးကို အကာအကွယ်ပေးနိုင်မည် မဟုတ်ပေ။ ယွန်းယွန်းသည် ဂူဖေးကို စောစောက ကြွားလုံးထုတ်နေသူဟုသာ ထင်နေဆဲဖြစ်သည်။
သို့သော်လည်း နောက်တစ်စက္ကန့်တွင် ယွန်းယွန်း မြင်လိုက်ရသည့် မြင်ကွင်းက သူမကို မှင်တက်သွားစေသည်။ ဂူဖေးသည် လေထဲသို့ အေးအေးဆေးဆေး ပျံတက်သွားသည်။ သူ၏ နောက်ကျောတွင် မည်သည့်အရာမှ ရှိမနေပေ။ တိုက်ပွဲဝင်အတောင်ပံများ အသုံးပြုရသည့် ယွန်းယွန်းနှင့် မတူဘဲ ဂူဖေးမှာ ကောင်းကင်ထက်၌ ဘာကိုမျှ အားမကိုးဘဲ တည်ငြိမ်စွာ ရပ်တန့်နေခြင်းဖြစ်သည်။
ယွန်းယွန်း အံ့ဩမှင်တက်သွားရသည်။
[ယွန်းယွန်း အံ့ဩသွားသည်။ ရရှိခဲ့သော စိတ်ခံစားမှုတန်ဖိုး +၁၀၀]
"ဒါက... တိုက်ပွဲဘိုးဘေးတစ်ယောက်လား..."
သူမ၏ စိတ်ထဲတွင် မယုံနိုင်စရာ စကားလုံးတစ်လုံး ပေါ်လာပြီး ယွန်းယွန်း၏ အမြဲတမ်း တည်ငြိမ်နေတတ်သော မျက်နှာတွင် ရှားရှားပါးပါး အံ့ဩတုန်လှုပ်သည့် အမူအရာ ပေါ်လွင်လာတော့သည်။
၁၆ နှစ်၊ ၁၇ နှစ်အရွယ်သာ ရှိဦးမည့် လူငယ်လေးတစ်ယောက်က ဤမျှကြီးမားသော စွမ်းအားကို ပိုင်ဆိုင်ထားသည်တဲ့လား။ ဂျာမာအင်ပါယာတွင် ပါရမီရှင်အဖြစ် အားလုံးက လေးစားအားကျရသော ယွန်းယွန်းအတွက်ပင် ဂူဖေး၏ ထူးကဲလှသော ပါရမီမှာ သူမ၏ စိတ်ကူးစိတ်သန်းထက် ကျော်လွန်နေတော့သည်။