အခန်း (၂၇) - မင်းသမီးလေးကို ကယ်တင်ခြင်းလား

မူလကတော့ ဂူဖေးအနေနဲ့ ဒီရှုပ်ထွေးတဲ့ကိစ္စထဲ ဝင်ပါဖို့ အစီအစဉ်မရှိခဲ့ပါဘူး။ အခုမှ နိုးထလာခါစဖြစ်တဲ့ ဆေးနတ်သမီးလေးနားမှာပဲ ရက်အနည်းငယ်လောက် အတူရှိပေးရင်း သူမရဲ့ 'ဘေးဒုက္ခအဆိပ်ခန္ဓာ' ကြောင့် ဖြစ်လာနိုင်တဲ့ အန္တရာယ်တွေကို ဘယ်လိုဖြေရှင်းရမလဲဆိုတာကိုပဲ အချိန်ပေး စဉ်းစားပေးချင်ခဲ့တာပါ။ ဒါပေမဲ့ သေချာပြန်တွေးကြည့်တဲ့အခါမှာတော့ မူလဇာတ်လမ်းရဲ့ အရေးပါတဲ့ဇာတ်ကောင်တစ်ယောက်ဖြစ်တဲ့ ယွန်းယွန်းဟာ ကံကြမ္မာအထောက်အပံအတော်လေး မြင့်မားနိုင်တယ်ဆိုတာ ဂူဖေး သတိပြုမိသွားပါတယ်။ သူမနဲ့ တိုက်ခိုက်နေတဲ့ 'ခရမ်းရောင်အတောင်ပံခြင်္သေ့ဘုရင်' ဆိုရင်လည်း သာမန်မှော်သားရဲတွေထက် ကံကြမ္မာအထောက်အပံ့ အဆပေါင်းများစွာ ပိုရှိနေမှာ အသေအချာပါပဲ။

ဒါကြောင့် ဂူဖေးဟာ သိပ်ပြီးတွေဝေမနေတော့ဘဲ အခြေအနေကို သွားရောက်ကြည့်ရှုဖို့ ဆုံးဖြတ်လိုက်ပါတယ်။ သူ ရုတ်တရက် ပျောက်ကွယ်သွားတာကြောင့် ဆေးနတ်သမီးလေး စိုးရိမ်နေမှာစိုးတာနဲ့—

"ဆေးနတ်သမီး၊ ငါ အပြင်ခဏသွားစရာရှိလို့၊ ကိုယ့်ကိုယ်ကိုယ် ဂရုစိုက်နော်" လို့ ခပ်တိုတိုပဲ နှုတ်ဆက်ပြီး ထွက်လာခဲ့လိုက်ပါတယ်။

ဆေးနတ်သမီးလေး စိတ်မကောင်းဖြစ်သွားသည်။ ရရှိခဲ့သော စိတ်ခံစားမှုတန်ဖိုး +၁၀၀

သူမ စိတ်ထဲမှာ အနည်းငယ် တွန့်ဆုတ်နေမိပေမဲ့ ဆေးနတ်သမီးလေးဟာ အလိုက်တသိနဲ့ပဲ ခေါင်းငြိမ့်ပြပြီး နာခံခဲ့ပါတယ်။

...

ကောင်းကင်ထက်မှာတော့ ပြင်းထန်လှတဲ့ စွမ်းအင်ဂယက်တွေကြောင့် မိုးခြိမ်းသံလို တဒုန်းဒုန်းမြည်သံတွေ အဆက်မပြတ် ထွက်ပေါ်နေပါတယ်။ ဂူဖေးကတော့ သူ့ရဲ့ အရှိန်အဝါကို ဖုံးကွယ်ထားပြီး အဝေးက မိုးကုတ်စက်ဝိုင်းဆီကို အကြည့်ပို့ရင်း အသံလာရာဘက်ကို အမြန်ဆုံး ဦးတည်သွားနေခဲ့ပါတယ်။ ကောင်းကင်တစ်ခုလုံးဟာ အပြာရောင်နဲ့ ခရမ်းရောင်တွေ လွှမ်းမိုးနေပြီး ပျင်းရိစွာ ရွေ့လျားနေတဲ့ တိမ်စိုင်ဖြူလေးတွေတောင် အဲ့ဒီအရောင်နှစ်မျိုး စွန်းထင်နေပါတယ်။

နောက်ထပ် မိုးခြိမ်းသံတစ်ချက် ဟိန်းထွက်လာပြီးနောက်မှာတော့ ခရမ်းရောင်အတောင်ပံခြင်္သေ့ဘုရင်ဆီက ထွက်ပေါ်လာတဲ့ ခရမ်းရောင်အလင်းတန်းတွေဟာ ကောင်းကင်နဲ့ မြေပြင်ကို လွှမ်းခြုံသွားတာကို ဂူဖေး မြင်လိုက်ရပါတယ်။ ခဏအကြာမှာတော့ အဲ့ဒီကျယ်ပြောလှတဲ့ ခရမ်းရောင်အလင်းတွေဟာ ရုတ်တရက်ဆိုသလို စုစည်းသွားပြီး လက်မဝက်ခန့်သာရှိတဲ့ နက်မှောင်တဲ့ ခရမ်းရောင်အလင်းတန်းတစ်ခုအဖြစ် ပြောင်းလဲသွားပါတယ်။

အဲ့ဒီအလင်းတန်းဟာ လျှပ်စီးလက်သလိုမျိုး အရှိန်အဟုန်ပြင်းစွာနဲ့ ဟိုးအဝေးက လူရိပ်လေးဆီကို ပြေးဝင်သွားပါတယ်။ ဂူဖေးရဲ့ မျက်စိအမြင်နဲ့ဆိုရင် အဝေးကနေတောင် အဲ့ဒီလူရိပ်ရဲ့ ပုံပန်းသဏ္ဍာန်ကို ရှင်းရှင်းလင်းလင်း မြင်နေရပါတယ်။ ကောင်းကင်ထက်က အမျိုးသမီးဟာ သူမရဲ့ ကောက်ကြောင်းအလှကို ပေါ်လွင်စေတဲ့ ရိုးရှင်းတဲ့ ဝတ်စုံကို ဆင်မြန်းထားပြီး စိမ်းဖန့်ဖန့်အလင်းတွေ ထွက်ပေါ်နေတဲ့ သံဓားရှည်တစ်စင်းကို ကိုင်ဆောင်ထားပါတယ်။ သူမရဲ့ ဆံနွယ်တွေကိုတော့ ကျော့ရှင်းတဲ့ ဖီးနစ်ပုံစံ ထုံးဖွဲ့ထားပါတယ်။ လှပတဲ့မျက်နှာလေးဟာ အေးဆေးတည်ငြိမ်နေပေမဲ့ ခရမ်းရောင်အတောင်ပံခြင်္သေ့ဘုရင်ရဲ့ အမြင့်ဆုံး 'တံဆိပ်ခတ်နှိပ်ခြင်း' အတတ်ကြောင့် သူမရဲ့ တည်ငြိမ်မှုတွေ ပျောက်ဆုံးသွားခဲ့ရပါပြီ။

ဒီအမျိုးသမီးဟာ မူလဇာတ်လမ်းထဲကအတိုင်း ခြင်္သေ့ဘုရင်နဲ့ တိုက်ခိုက်နေတဲ့ 'ယွန်းယွန်း' ပဲ ဖြစ်ပါတယ်။

"ခရမ်းရောင် တံဆိပ်ခတ်ခြင်း!"

ခရမ်းရောင်အလင်းတန်းတွေ ကောင်းကင်မှာ ဝေ့ဝဲနေချိန် ခြင်္သေ့ဘုရင်ရဲ့ ဟိန်းဟောက်သံဟာ တောင်တန်းတစ်ခုလုံးကို တုန်ခါသွားစေပါတယ်။ 'ခရမ်းရောင်တံဆိပ်' ဟာ ယွန်းယွန်းရဲ့ ရှေ့က လေဓားစွမ်းအင်တွေနဲ့ ထိတွေ့မိပြီးနောက်မှာတော့ လေဓားတွေကို အစအနမကျန် ချေဖျက်ပစ်လိုက်ပါတယ်။ ဂူဖေး အနားကို ရောက်သွားတဲ့အချိန်မှာတော့ ဒီတိုက်ပွဲကြီးဟာ အဆုံးသတ်ဖို့ နီးကပ်နေပါပြီ။

ခရမ်းရောင်အလင်းတန်းဟာ ယွန်းယွန်း ခုခံထားတဲ့ လေစွမ်းအင်ဒိုင်းတွေကို ဖောက်ထွက်သွားပြီး သူမရဲ့ ခန္ဓာကိုယ်ထဲကို စိုက်ဝင်သွားပါတယ်။ ခြင်္သေ့ဘုရင်ဟာ အခွင့်ကောင်းကို လက်မလွတ်စတမ်း အသုံးချပြီး သူမဆီကို ခုန်အုပ်လိုက်ပါတယ်။ ဒါပေမဲ့ ယွန်းယွန်းဟာ သူမရဲ့ နောက်ဆုံးလက်ကျန်စွမ်းအားနဲ့ ဓားကို ဝေ့ယမ်းလိုက်ရာ အလင်းတန်းလေးတစ်ခု ထွက်ပေါ်လာပြီး ခြင်္သေ့ဘုရင်ရဲ့ ချွန်ထက်တဲ့ ဦးချိုတစ်ဖက်ကို ဖြတ်ချလိုက်နိုင်ပါတယ်။

"ဝူးးး... သောက်ကျိုးနည်း!"

နာကျင်မှုကြောင့် ခြင်္သေ့ဘုရင်ဟာ ဒေါသတကြီး ဟိန်းဟောက်လိုက်ပါတယ်။ မခံမရပ်နိုင်ဖြစ်နေတဲ့ ခြင်္သေ့ကြီးရဲ့ လက်ဝါးချက်ဟာ ယွန်းယွန်းရဲ့ ရင်ဘတ်ဆီကို အားအပြည့်နဲ့ ရောက်သွားပါတယ်။ သံတူကြောင်းကွဲသံတစ်ခု ထွက်ပေါ်လာပြီးနောက် ယွန်းယွန်းဟာ သွေးတစ်လုတ်အန်ကာ မျက်နှာလေး ဖြူလျော့သွားပါတယ်။ သူမဟာ နောက်ဆုံးစွမ်းအားကို စုစည်းပြီး ခြင်္သေ့ဘုရင်ရဲ့ အမြင်ကနေ ကွယ်ပျောက်အောင် ထွက်ပြေးခဲ့ပေမဲ့ မကြာခင်မှာပဲ သတိလစ်ပြီး ပြုတ်ကျသွားခဲ့ပါတယ်။

"ရှူးးး..."

တိုက်တိုက်ဆိုင်ဆိုင်ပါပဲ၊ သတိလစ်နေတဲ့ သူမရဲ့ ခန္ဓာကိုယ်ဟာ ဂူဖေးရှိရာဘက်ကို ဦးတည်ကျလာပါတယ်။

"ဒါက..."

ဂူဖေး ခဏတာ အံ့အားသင့်သွားပေမဲ့ အလိုက်သင့်ပဲ သွေးတွေပေကျံနေတဲ့ ယွန်းယွန်းကို ပွေ့ဖက်ဖမ်းယူလိုက်ပါတယ်။ ထို့နောက် သူတို့နှစ်ယောက်လုံးရဲ့ အရှိန်အဝါကို ဖုံးကွယ်လိုက်ပါတယ်။

"သူမကိုရှာစမ်း... အဲ့ဒီလူသားအမျိုးသမီးကို အမိအရရှာပြီး ငါ့ဆီခေါ်လာခဲ့!"

ယွန်းယွန်းရဲ့ အရှိန်အဝါ ပျောက်ဆုံးသွားတာကို သိလိုက်တဲ့ ခြင်္သေ့ဘုရင်ဟာ ဒေါသတကြီးနဲ့ သူ့ရဲ့ လက်အောက်ခံ မှော်သားရဲတွေကို ရှာခိုင်းလိုက်ပါတယ်။ ဒီအတောအတွင်းမှာတော့ ဂူဖေးဟာ ယွန်းယွန်းကို အနီးအနားက ဂူတစ်ခုထဲကို ခေါ်ဆောင်သွားခဲ့ပါပြီ။

ဂူထဲမှာတော့ စိမ်းဖန့်ဖန့်ကျောက်တုံးနဲ့ လုပ်ထားတဲ့ ကျောက်ခုတင်တစ်ခု ရှိနေပါတယ်။ ယွန်းယွန်းက ဒဏ်ရာ အတော်လေး ပြင်းထန်နေတာကြောင့် ဂူဖေးက သူမကို အသာအယာ ချထားပေးလိုက်ပြီး ခြင်္သေ့ဘုရင်ကို ယှဉ်ပြိုင်ရဲတဲ့ ဒီအမျိုးသမီးကို အနီးကပ် ကြည့်ရှုလိုက်မိပါတယ်။ သူမကို အနီးကပ်မြင်ရတဲ့အခါမှာတော့ ဂူဖေး တကယ့်ကို အံ့အားသင့်သွားရပါတယ်။ ပန်းချီကားတစ်ချပ်လို လှပတဲ့ မျက်ခုံးတန်းလေးတွေနဲ့ ကျောက်စိမ်းလို ဝင်းပတဲ့ အသားအရေဟာ ချီးကျူးစရာတွေချည်းပါပဲ။ သူမရဲ့ အသားအရေက နှင်းလိုဖြူစင်ပြီး ဆံနွယ်တွေကိုလည်း သေသေသပ်သပ် စည်းနှောင်ထားပါတယ်။

ဂူဖေးကို အထင်ကြီးဆုံးဖြစ်စေတာကတော့ သူမဆီက ထွက်ပေါ်နေတဲ့ မြင့်မြတ်ကျော့ရှင်းတဲ့ အရှိန်အဝါပါပဲ။ သူက သူမရဲ့ မျက်နှာလေးကို ကြည့်နေရာကနေ အောက်ဘက်ကို အကြည့်ရွှေ့လိုက်တဲ့အခါမှာတော့ မျက်မှောင်ကြုတ်သွားမိပါတယ်။ သူမရဲ့ ကျောက်စိမ်းလို ဝင်းပတဲ့ လည်တိုင်အောက် ရင်ဘတ်ပေါ်မှာတော့ သွေးတွေရဲရဲနီနေတဲ့ ကြောက်စရာကောင်းတဲ့ လက်သည်းရာ ငါးခုကို တွေ့လိုက်ရလို့ပါပဲ။

"ဒဏ်ရာက တော်တော်ပြင်းတာပဲ..."

ဂူဖေးဟာ သူ့ရဲ့ သိုလှောင်လက်စွပ်ထဲကနေ အဆင့် (၆) ကုသရေးဆေးလုံးတစ်လုံးကို ထုတ်ပြီး ယွန်းယွန်းကို တိုက်ကျွေးလိုက်ပါတယ်။ ဆေးအာနိသင်က ချက်ချင်းပြတာကြောင့် သူမရဲ့ ဒဏ်ရာတွေဟာ အလျင်အမြန်ပဲ တည်ငြိမ်သွားပါတယ်။ ဆေးက ဘယ်လောက်ပဲ ကောင်းပါစေ၊ ကုသနေစဉ်အတွင်းမှာတော့ နာကျင်မှုကို ခံစားရစမြဲပါပဲ။ ဆေးအာနိသင်ပြလာတာနဲ့အမျှ ယွန်းယွန်းရဲ့ မျက်ခောင်လေးတွေ တွန့်သွားပြီး နာကျင်တဲ့အရိပ်အယောင်လေးတွေ မျက်နှာပေါ်မှာ ပေါ်လာပါတယ်။ ဒါတောင်မှ သူမရဲ့ အလှကတော့ လျော့ပါးမသွားပါဘူး။

"ငါဖော်စပ်ထားတဲ့ ဆေးလုံးတွေက အာနိသင် တော်တော်ထက်တာပဲ"

ယွန်းယွန်းရဲ့ မျက်နှာလေး ပြန်လည်တည်ငြိမ်လာတာကို မြင်မှ ဂူဖေးလည်း သက်ပြင်းချနိုင်ပါတော့တယ်။ ဒါပေမဲ့ ခဏအကြာမှာပဲ ယွန်းယွန်းဟာ ရုတ်တရက် မျက်လုံးပွင့်လာပြီး ဂူဖေးကို အေးစက်စက် အကြည့်တွေနဲ့ စိုက်ကြည့်လိုက်ပါတယ်။ စောစောက နုနယ်တဲ့ပုံစံနဲ့ လုံးဝကို ကွဲပြားသွားတာပါ။

ယွန်းယွန်း သတိကြီးစွာ ထားနေသည်။ ရရှိခဲ့သော စိတ်ခံစားမှုတန်ဖိုး +၁၀၀

"မင်းက ဘယ်သူလဲ"

သူမရှေ့က မရင်းနှီးတဲ့ လူငယ်လေးကို ယွန်းယွန်းက သံသယစိတ်နဲ့ မေးလိုက်ပါတယ်။ ဂူဖေးက သူမကို ဂူထဲ သယ်လာတုန်းက သူမ ခဏလေး သတိပြန်ရလာပြီး သူ့မျက်နှာကို ဝေဝေဝါးဝါး မြင်လိုက်မိပေမဲ့ နောက်ပိုင်းမှာတော့ ဘာမှမမှတ်မိတော့ပါဘူး။ ဒီလို မှော်သားရဲတောင်တန်းထဲမှာ သူစိမ်းယောက်ျားတစ်ယောက်နဲ့ တွေ့နေရတာကြောင့် ယွန်းယွန်းအနေနဲ့ သတိထားမိတာက သဘာဝပါပဲ။

"စောစောက ခရမ်းရောင်အတောင်ပံခြင်္သေ့ဘုရင်နဲ့ တိုက်ခိုက်ရင်း မင်း ဒဏ်ရာရသွားတာပါ" ဂူဖေးက တည်ငြိမ်စွာပဲ ပြောလိုက်ပါတယ်။ "ဒါပေမဲ့ ငါ ကုသရေးဆေးလုံး တိုက်ကျွေးထားလို့ အခုတော့ အဆင်ပြေသွားပါပြီ။ မင်းကိုယ်ပေါ်က သွေးတွေကို ကြည့်ရင် ကြောက်စရာကောင်းပေမဲ့ ဒဏ်ရာတွေကတော့ သွေးတိတ်သွားပြီး အတော်လေး သက်သာနေပါပြီ"

ဒါကို ကြားမှ ယွန်းယွန်းလည်း အနည်းငယ် စိတ်လျှော့လိုက်ပါတယ်။ သူမ ထဖို့ ကြိုးစားလိုက်တဲ့အခါမှာတော့ ခန္ဓာကိုယ်က အားအင်ကုန်ခမ်းနေပြီး 'ဒိုချီ' (စွမ်းအင်) တွေကို အသုံးပြုလို့မရဘူးဆိုတာ သိလိုက်ရပါတယ်။ ဒါဟာ ခြင်္သေ့ဘုရင်ရဲ့ 'ခရမ်းရောင်တံဆိပ်' ကြောင့်မှန်း သူမ ချက်ချင်း နားလည်လိုက်ပါတယ်။

ယွန်းယွန်းရဲ့ မျက်နှာမှာ စိတ်ပျက်တဲ့အရိပ်အယောင်တွေ ပေါ်လာတာကို မြင်တော့ ဂူဖေးက ချောင်းတစ်ချက်ဟန့်ပြီး ဆက်ပြောလိုက်ပါတယ်။

"တံဆိပ်ခတ်နှိပ်ခံရတာကိုတော့ စိတ်မပူပါနဲ့။ နောက်နှစ်ရက်လောက်ဆိုရင် အဲ့ဒီတံဆိပ်ကို မင်းကိုယ်တိုင် ချေဖျက်နိုင်ပါလိမ့်မယ်"

ယွန်းယွန်း စူးစမ်းလိုစိတ် ဖြစ်ပေါ်လာသည်။ ရရှိခဲ့သော စိတ်ခံစားမှုတန်ဖိုး +၁၀၀

ဒီအချိန်မှာတော့ ယွန်းယွန်းဟာ ဂူဖေးကို စိတ်ဝင်စားသွားပါပြီ။ ဒီလူငယ်လေးဟာ သူမထက် ငယ်ပုံရပေမဲ့ သူမတောင် ခန့်မှန်းလို့မရနိုင်တဲ့ စွမ်းအားရှိရုံတင်မကဘဲ 'ခရမ်းရောင်တံဆိပ်' လိုမျိုး လျှို့ဝှက်ချက်တွေကိုပါ အသေးစိတ် သိနေတာကြောင့်ပဲ ဖြစ်ပါတယ်။