အခန်း (၅၀) - ကြယ်ခုနစ်ပွင့် ဒိုကျဲ

ရှောင်ကျန့် ရောက်ရှိလာပြီးနောက်တွင် ရှောင်မျိုးနွယ်စုနှင့် ကျာလီမျိုးနွယ်စုတို့အကြား ဖြစ်ပွားနေသော ပဋိပက္ခမှာ အဆုံးသတ်သွားခဲ့လေသည်။ လက်ရှိတွင် ရှောင်မျိုးနွယ်စုသည် အထွတ်အထိပ်သို့ ရောက်ရှိနေပြီး ရှောင်ကျန့်မှာလည်း အစွမ်းထက်လှသည့် ကြယ်ငါးပွင့် 'မဟာဒိုရှီ' တစ်ဦး ဖြစ်သည်။ အကယ်၍ မျိုးနွယ်စုနှစ်ခုသာ တိုက်ပွဲဖြစ်ပွားခဲ့ပါက နှစ်ဖက်စလုံး အထိနာကြမည်ဖြစ်ပြီး ပါ့လားမျိုးနွယ်စုအတွက် ကြားကနေ အမြတ်ထုတ်ရန် အခွင့်အရေးပေးသလို ဖြစ်သွားပေလိမ့်မည်။ အမှန်စင်စစ်တွင်လည်း ရှောင်မျိုးနွယ်စုနှင့် ကျာလီမျိုးနွယ်စုတို့ အချင်းချင်း အမြစ်ပြတ်ချေမှုန်းကြမည့်အချိန်ကို ပါ့လားမျိုးနွယ်စုက သားကောင်ကို ချောင်းနေသည့် ကျားတစ်ကောင်ကဲ့သို့ အကွက်ချောင်း စောင့်ဆိုင်းနေခဲ့ခြင်း ဖြစ်သည်။

ရှောင်ကျန့်နှင့် ကျာလီပိတို့သည် ခေါင်းပူတတ်သည့် လူငယ်များ မဟုတ်ကြချေ။ ခါးခါးသီးသီး စကားအချေအတင် ပြောဆိုပြီးနောက် ကျာလီပိသည် မကျေမနပ်ဖြင့်ပင် ကျာလီအိုနှင့် အပေါင်းအပါများကို ခေါ်ဆောင်ကာ ထွက်ခွာသွားတော့သည်။

ဤဖြစ်ရပ်ပြီးနောက် ဝူတန်မြို့တစ်ခွင်တွင် ရှောင်မျိုးနွယ်စု၏ 'အမြွှာနဂါး' ဟူသော အောင်မြင်ကျော်ကြားမှုမှာ ပျံ့နှံ့သွားခဲ့လေသည်။ ယခင်က အခြားမျိုးနွယ်စုကြီးများသည် ရှောင်မျိုးနွယ်စု၏ ထိုလူငယ်နှစ်ဦးကို အလားအလာရှိရုံမျှသာ မြင်ခဲ့ကြသော်လည်း ယခုအခါ သူတို့ပြသခဲ့သည့် ခွန်အားနှင့် ပါရမီကို မြင်တွေ့ပြီးနောက်တွင် 'မထိရဲစရာ စာရင်း' ထဲသို့ ချက်ချင်း ထည့်သွင်းလိုက်ကြတော့သည်။ ထို့ကြောင့်ပင် ဤပဋိပက္ခအပြီးတွင် မျိုးနွယ်စု အတော်များများသည် ရှောင်မျိုးနွယ်စုနှင့် တိတ်တဆိတ် မဟာမိတ်ဖွဲ့ရန် ကြိုးပမ်းလာကြသည်။ ရှောင်မျိုးနွယ်စု၏ အမြွှာနဂါးသာ လမ်းခုလတ်မှာ မလဲခဲ့ပါက နောင်တစ်ချိန်တွင် အင်ပါယာတစ်ခုလုံးကို တုန်လှုပ်စေမည့် ထိပ်သီးပညာရှင်များ ဖြစ်လာမည်မှာ မြေကြီးလက်ခတ်မလွဲပင် မဟုတ်ပါလော။

ရှောင်မျိုးနွယ်စုအတွင်း၌လည်း မကြာသေးမီက ဖြစ်ပွားခဲ့သည့် ဈေးတန်းပဋိပက္ခကြောင့် မျိုးနွယ်စုအကြီးအကဲများက မော့ယွီနှင့် ရှောင်ယန်ကို တိတ်တဆိတ် အစောင့်အရှောက်ထားရန် ဆုံးဖြတ်ခဲ့ကြသည်။ အခြေအနေမဲ့ဖြစ်နေသည့် ကျာလီမျိုးနွယ်စုက နောက်ကွယ်မှ လုပ်ကြံမည်ကို စိုးရိမ်သောကြောင့် ဖြစ်သည်။ မော့ယွီ၏ ဈေးတန်းကြီးကြပ်ရေးမှူး တာဝန်ကိုလည်း ခေတ္တရပ်နားထားလိုက်သည်။ မော့ယွီကမူ ထိုအရာကို ဂရုမစိုက်ဘဲ ကျင့်ကြံခြင်းအပေါ်တွင်သာ အာရုံအပြည့်အဝ မြှုပ်နှံထားလိုက်တော့သည်။

သုံးရက်ကြာပြီးနောက် မော့ယွီ ကျင့်ကြံခြင်းမှ ထွက်လာသည့်အခါ သူ၏ အရှိန်အဝါမှာ ယခင်ကထက် ပိုမိုနက်ရှိုင်း ခန့်ညားလာခဲ့ပြီ ဖြစ်သည်။

"ကြယ်ခုနစ်ပွင့် ဒိုကျဲ!"

ဤသုံးရက်အတွင်း လျူရှီ၏ 'အမှောင်ဝံပုလွေမီးလျှံ' ကို ဝါးမြိုပြီးနောက် မော့ယွီသည် ထိုစွမ်းအင်များကို အပြည့်အဝ စုပ်ယူနိုင်ခဲ့သည်။ ထိုသို့စုပ်ယူမှုကြောင့် သူ၏ 'ကြက်သွေးရောင် ကောင်းကင်လောင်ကျွမ်းခြင်း မိုးကြိုး' မှာလည်း နောက်တစ်ဆင့်သို့ တိုးတက်ပြောင်းလဲသွားခဲ့သည်။ ထို့အပြင် ထိုတိုးတက်မှုမှ ပြန်လည်ရရှိလာသည့် တုံ့ပြန်စွမ်းအင်များကြောင့် မော့ယွီ၏ ခွန်အားမှာ နှစ်ဆင့်မျှ တဟုန်ထိုး မြင့်တက်သွားကာ ကြယ်ခုနစ်ပွင့် 'ဒိုကျဲ' အဆင့်သို့ ရောက်ရှိသွားခဲ့လေသည်။

အနည်းငယ်သော လပိုင်းအတွင်း၌ပင် 'ဒိုကျဲ' ကြယ်တစ်ပွင့်မှ ကြယ်ခုနစ်ပွင့်သို့ တက်လှမ်းနိုင်ခြင်းမှာ 'ဒိုချီဧကရာဇ်' သွေးပါသည့် ရှေးဟောင်းမျိုးနွယ်စု ကြီးရှစ်စုထဲတွင်ပင် ထူးချွန်ထက်မြက်သည့် ပါရမီရှင် အနည်းငယ်သာ တတ်နိုင်သည့် ကိစ္စဖြစ်သည်။ 'မိုးကြိုးဝိညာဉ်' နှင့် 'ကောင်းကင်ဘုံ မိုးကြိုးခန္ဓာ' တို့၏ အကူအညီဖြင့် မော့ယွီသည် အဆင့်တက်နိုင်ခဲ့ရုံသာမက သူ၏ အခြေခံမှာလည်း အလွန်အမင်း ခိုင်မာလှသည်။ သူ၏ မိုးကြိုးဓာတ်ခံ 'ဒိုချီ' စွမ်းအင်များမှာ ပိုမိုသိပ်သည်း ကျစ်လျစ်လာခဲ့သည်။ သူ၏ ဝှက်ဖဲများနှင့်ပေါင်းစပ်လိုက်လျှင် အဆင့်နိမ့် 'ဒိုရှီ' များပင်လျှင် သူ့ကို ရင်ဆိုင်ရန် ခဲယဉ်းပေလိမ့်မည်။

မော့ယွီ ကျင့်ကြံခြင်းမှ ထွက်လာပြီး မကြာမီမှာပင် မျိုးနွယ်စု အစည်းအဝေးတစ်ခု ကျင်းပတော့မည်ဖြစ်ကြောင်း အစောင့်တစ်ဦးက လာရောက် အကြောင်းကြားလေသည်။ လွန်ခဲ့သည့် ရက်အနည်းငယ်အတွင်း ပြင်ပလောကတွင် မည်သည်တို့ ပြောင်းလဲသွားသည်ကို သိလိုသဖြင့် မော့ယွီ တက်ရောက်ရန် ဆုံးဖြတ်လိုက်သည်။

ရှောင်မျိုးနွယ်စု၏ အစည်းအဝေးခန်းမအတွင်း၌ -

"ယွီလေး... လာပြီလား၊ ဒီမှာ လာထိုင်လေ" ရှောင်ကျန့်သည် မော့ယွီ ဝင်လာသည်ကို မြင်သောအခါ မျက်နှာတစ်ခုလုံး ပြုံးဖြဖြဖြင့် လှမ်းခေါ်လိုက်သည်။

သူသည် မော့ယွီအပေါ် တစ်နေ့ထက်တစ်နေ့ ပိုမိုသဘောကျလာမိသည်။ သူ့တွင် သမီးမိန်းကလေး မရှိသည်မှာ နှမြောစရာပင်။ သို့မဟုတ်ပါက အကြီးအကဲကို ဤမျှကောင်းသည့် သမက်လောင်းမျိုးအား လက်ဦးအောင် ပေးလိုက်မည် မဟုတ်ချေ။ မော့ယွီသည် 'မိုးကြိုးမီးလျှံပုတီး' ကဲ့သို့ အစွမ်းထက်သည့် ကိရိယာများကို ဖန်တီးနိုင်ရုံသာမက သူ၏ ခွန်အားနှင့် ပါရမီမှာလည်း ထူးခြားပြောင်မြောက်လှသည်။ လျူရှီကို အပြတ်အသတ် အနိုင်ယူနိုင်ခဲ့ခြင်းက ရှောင်မျိုးနွယ်စု၏ ဂုဏ်သိက္ခာကို များစွာ မြင့်တက်စေခဲ့သည်။

"အစ်ကို မော့ယွီ... ဒီမှာ!"

မော့ယွီက ရှောင်ကျန့်ကို ပြုံး၍ နှုတ်ဆက်နေစဉ် တစ်စုံတစ်ဦး၏ လှမ်းခေါ်သံကို ကြားလိုက်ရသည်။ လှည့်ကြည့်လိုက်သောအခါ ရှောင်ယန်က ကုလားထိုင်ပေါ်တွင် ပျင်းရိပျင်းတွဲ ထိုင်ရင်း လက်လှမ်းပြနေသည်ကို တွေ့ရသည်။ သူ၏ ဘေးတွင် ခုံအလွတ်တစ်ခု ရှိနေ၏။ မော့ယွီ ပြုံးလျက် လျှောက်သွားလိုက်သည်။

"ညီလေး ရှောင်ယန်... ဒီနေ့ ရွှမ်းအာနဲ့ အတူမရှိဘူးလား" မော့ယွီက ထိုင်ချရင်း ပြုံးစစဖြင့် မေးလိုက်သည်။

"အစ်ကို မော့ယွီကရော... အစ်မ ရှောင်ယုနဲ့ အတူမရှိဘူးလား" ရှောင်ယန်ကလည်း ပြန်လည် နောက်ပြောင်လိုက်သည်။ ယခင်က ဇောက်ထိုးမိုးမျှော် နိုင်လှသည့် ရှောင်ယုတစ်ယောက် မော့ယွီအနားရောက်လျှင် နူးညံ့သိမ်မွေ့သည့် ဇနီးသည်လေးတစ်ဦးကဲ့သို့ ဖြစ်သွားပုံကို တွေးမိရင်း ရှောင်ယန်တစ်ယောက် လောကကြီး တကယ်ပြောင်းလဲသွားပြီဟု ခံစားနေရသည်။

ရှောင်ယန်၏ စနောက်မှုကို လျစ်လျူရှုကာ မော့ယွီ ငြိမ်ငြိမ်လေး ထိုင်နေလိုက်သည်။ နီးနီးကပ်ကပ် ထိုင်နေသဖြင့် မော့ယွီ၏ အော်ရာအတွင်းမှ သိမ်မွေ့လှသည့် လှိုင်းထန်မှုများကို ရှောင်ယန် ရုတ်တရက် သတိထားမိသွားသည်။ သူ၏ မျက်မှောင်များ အနည်းငယ် ကြုတ်သွား၏။ သူ၏ လျှို့ဝှက်ဆန်းကြယ်လှသော အစ်ကိုဝမ်းကွဲမှာ ထပ်ပြီး အဆင့်တက်သွားပြန်ပြီလား?

ခန်းမအလယ်တွင်မူ ရှောင်ကျန့်သည် လက်အောက်ငယ်သားများ၏ တင်ပြချက်ကို နားထောင်ရင်း ဝမ်းသာအားရ ဖြစ်နေသည်။

"ကျာလီမျိုးနွယ်စုရဲ့ ဆေးဝါးရရှိတဲ့ လမ်းကြောင်း ပြတ်တောက်သွားပြီ ဟုတ်လား?"

အံ့အားသင့်သွားပြီးနောက် ရှောင်ကျန့်သည် စိတ်လှုပ်ရှားမှုကို မထိန်းနိုင်ဘဲ ဝုန်းခနဲ ထရပ်လိုက်သည်။ အလားတူ ဝမ်းသာနေကြသည့် အကြီးအကဲ သုံးဦးကို ကြည့်ရင်း ရှောင်ကျန့်သည် အခန်းတွင်း ခေါက်တုံ့ခေါက်ပြန် လျှောက်နေမိသည်။ ထို့နောက် စိတ်ကို ထိန်းကာ ပြုံးလျက် မေးလိုက်သည်။

"ဒါနဲ့ သူတို့ရဲ့ ဆေးဆရာ လျူရှီကရော?"

"ဘယ်သူမှ မသိပါဘူးခင်ဗျာ။ ကျာလီအိုနဲ့ လျူရှီတို့ သခင်လေးမော့ယွီ၊ သခင်လေးရှောင်ယန်တို့နဲ့ ထိပ်တိုက်တွေ့တဲ့နေ့ကစပြီး နောက်တစ်နေ့မနက်ကတည်းက သူ့ကို ဘယ်သူမှ မမြင်ရတော့ပါဘူး"

ထိုစကားကို ကြားသောအခါ ရှောင်ကျန့်နှင့် အကြီးအကဲ သုံးဦးစလုံး ခေတ္တမျှ ကြောင်အသွားကြသည်။ ထို့နောက် သူတို့၏ အကြည့်များက ခုံပေါ်တွင် အေးအေးဆေးဆေး ထိုင်နေသော မော့ယွီထံသို့ တိတ်တဆိတ် ရောက်ရှိသွားကြသည်။ မော့ယွီကမူ ဤကိစ္စမှာ သူနှင့် ဘာမှမဆိုင်သကဲ့သို့ တည်ငြိမ်နေဆဲ ဖြစ်သည်။

အမှန်စင်စစ်တွင် လျူရှီ သေဆုံးခြင်းမှာ သူနှင့် တိုက်ရိုက် သက်ဆိုင်နေသည်။ ထိုနေ့က သူသည် လျူရှီ၏ ခန္ဓာကိုယ်အတွင်းသို့ 'ဒိုချီမိုးကြိုးဝိညာဉ်' တစ်ခု ထည့်သွင်းပေးလိုက်ခြင်း ဖြစ်သည်။ ၎င်းသည် 'ဒိုချီ' အသုံးပြုလိုက်သည်နှင့် ပေါက်ကွဲမည့်အရာ ဖြစ်သည်။ လျူရှီသည် ဆေးဆရာတစ်ဦး ဖြစ်သဖြင့် တိုက်ပွဲများတွင် မကြာခဏ မပါဝင်သော်လည်း ဆေးဖော်စပ်ခြင်းမှာ နေ့စဉ်အလုပ် ဖြစ်သည်။ ဆေးဖော်ရန်အတွက် 'မီးဓာတ်ခံ ဒိုချီ' ကို အသုံးပြုလိုက်သည်နှင့် သူ၏ အဆုံးသတ် ရောက်လာမည်မှာ ဧကန်မလွဲပင်။

မော့ယွီ၏ ဂရုမစိုက်ဟန်ကို မြင်သောအခါ ရှောင်ကျန့် ခေါင်းကိုသာ ခါလိုက်မိတော့သည်။ လျူရှီ ပျောက်ကွယ်သွားခြင်းမှာ မော့ယွီနှင့် ပတ်သက်နေနိုင်သည်ဟု သူ သံသယရှိသော်လည်း သက်သေမရှိသဖြင့် ဆက်မမေးတော့ချေ။

"ဒါနဲ့ အိမ်ရှေ့မင်း... ကျာလီမျိုးနွယ်စုရဲ့ အတွင်းလူဆီကနေ သတင်းတစ်ခု ရထားပါသေးတယ်။ သူတို့ရဲ့ ဒုတိယအကြီးအကဲ ကျာလီနူဟာ ဆေးဖက်ဝင်ပစ္စည်းတွေ သယ်ယူလာတုန်း လျှို့ဝှက်ဆန်းကြယ်တဲ့ ဝတ်ရုံနက်လူသားတစ်ယောက်ရဲ့ သတ်ဖြတ်ခြင်းကို ခံလိုက်ရတယ်လို့ သိရပါတယ်" အစောင့်က အသံနှိမ့်၍ သတင်းပို့လိုက်ပြန်သည်။

မော့ယွီသည် ရှောင်ယန်ကို ဘေးတိုက် တစ်ချက်ကြည့်လိုက်သည်။ ကျာလီနူသည် လက်နက်လေလံပွဲတုန်းက သူတို့နှင့် တွေ့ခဲ့သူ ဖြစ်သည်။ သူသည် ဝူတန်မြို့၏ ထိပ်တန်း တိုက်ခိုက်ရေးသမားတစ်ဦးဖြစ်ပြီး အစွမ်းထက်သည့် ကြယ်သုံးပွင့် 'မဟာဒိုရှီ' တစ်ဦးလည်း ဖြစ်သည်။ မိမိဘေးတွင် ဆရာအိုကြီး တစ်ယောက်ရှိနေခြင်း၏ အကျိုးကျေးဇူးကို မော့ယွီ မချီးကျူးဘဲ မနေနိုင်တော့ချေ။

ထိုသတင်းကို ကြားသောအခါ ရှောင်ကျန့်၏ မျက်ခုံးများ အနည်းငယ် လှုပ်ခတ်သွားသည်။ ခေတ္တအကြာတွင် သူ ခေါင်းငြိမ့်ပြကာ သတင်းပေးသူကို ပြန်လွှတ်လိုက်သည်။ ထို့နောက် ရှောင်ယန်ကို သံသယမျက်လုံးများဖြင့် ကြည့်လိုက်ပြီး -

"ယန်လေး... ကြယ်သုံးပွင့် မဟာဒိုရှီတစ်ယောက်ဖြစ်တဲ့ ကျာလီနူကို အလွယ်တကူ သတ်နိုင်ဖို့ဆိုတာ... မင်းရဲ့ ဆရာကလွဲရင် ဝူတန်မြို့မှာ တခြားဘယ်သူမှ မရှိနိုင်ဘူး မဟုတ်လား?"

ရှောင်ယန်က အေးဆေးစွာ ပခုံးတွန့်ပြရင်း ခေါင်းငြိမ့်ပြလိုက်သည်။ ယောင်လောင်နှင့် ပတ်သက်၍ အများကြီး ထုတ်မပြောနိုင်သော်လည်း ဤမျှ ဝန်ခံရုံဖြင့် ပြဿနာ မရှိနိုင်ချေ။

"ကဲ... ကျာလီမျိုးနွယ်စု ဒီပြဿနာတွေကို ဘယ်လိုရှင်းမလဲ ကြည့်ရသေးတာပေါ့"

ရှောင်ကျန့်သည် သူတို့၏ ကံဆိုးမှုကို သဘောကျကာ တဟားဟား ရယ်မောလိုက်သည်။ သူတို့၏ တစ်ဦးတည်းသော ဆေးဆရာလည်း မရှိတော့၊ ဆေးဖက်ဝင် ပစ္စည်းများလည်း ပျက်စီးသွားပြီ ဖြစ်ရာ ဤတိုက်ပွဲတွင် ရှောင်မျိုးနွယ်စုက အသာစီးရသွားပြီမှာ ထင်ရှားလှသည်။ ထိုသို့ တွေးမိရင်း ရှောင်ကျန့်သည် ခန်းမထဲတွင် ငြိမ်သက်စွာ ထိုင်နေကြသည့် လူငယ်နှစ်ဦးကို လှမ်းကြည့်လိုက်သည်။ ရှောင်မျိုးနွယ်စု၏ မကြာသေးမီက အောင်မြင်မှုများမှာ ဤပါရမီရှင် လူငယ်နှစ်ဦးကြောင့်ပင် ဖြစ်ပါတော့သည်။