အခန်း (၃၉) -ရေခဲနတ်ဆိုး သားရဲလက်စွပ်

လက်နက်ပစ္စည်း ကိရိယာအားလုံး စုံလင်သွားပြီးနောက်တွင် မော့ယွီသည် သုံးလကြာ တံခါးပိတ်ကျင့်ကြံခြင်းကို တစ်ဖန်ပြန်၍ စတင်ခဲ့ပြန်သည်။ ထိုသုံးလတာအတွင်း မော့ယွီသည် သူ ‘ဒိုကျဲ’ အဆင့်သို့ စတင်တက်လှမ်းခဲ့စဉ်က အသုံးပြုခဲ့သည့် ဂူအတွင်း၌ပင် ပစ္စည်းများကို စုပုံကာ လက်နက်သွန်းလုပ်ခြင်းအလုပ်ကို အာရုံစိုက်လုပ်ဆောင်ခဲ့သည်။

‘နတ်ဘုရားအာဏာ အမှောင်မိုးကြိုး လှံတော်’ မှာ စတုတ္ထအဆင့် လက်နက်တစ်ခုဖြစ်ပြီး ‘သားရဲလက်စွပ်’ မှာမူ အဆင့်မြင့် ဟင်းလင်းပြင်လက်စွပ် တစ်မျိုးဖြစ်သည်။ ဤပစ္စည်းနှစ်ခုလုံးမှာ အလွန်တရာ အဖိုးတန်သကဲ့သို့ သွန်းလုပ်ရန်လည်း အလွန်ခက်ခဲလှသည်။ အကယ်၍ သူ၏ယခင်ဘဝကသာဆိုလျှင် တစ်ရက်ပင်မကြာဘဲ ပြီးစီးနိုင်သော်လည်း ယခုဘဝတွင်မူ အစကနေ ပြန်စနေရသည်ဖြစ်ရာ သူ၏ မွေးရာပါ မိုးကြိုးဝိညာဉ်အရင်းအမြစ်မှာလည်း အကြီးအကျယ် ပျက်စီးနေခဲ့ပြီဖြစ်သည်။ သို့သော် သူ၏ ဝိညာဉ်အင်အားမှာမူ တူညီသောအဆင့်ရှိသူများထက် အဆပေါင်းများစွာ သာလွန်နေဆဲပင်။ ထို့ကြောင့် ဒုတိယအဆင့် လက်နက်တစ်ခုကို သွန်းလုပ်သည်ထက် အချိန်ပိုပေးခဲ့ရသည်။

ပထမနှစ်လလုံးလုံး မော့ယွီသည် ပစ္စည်းများကို သွေးခြင်း၊ သန့်စင်ခြင်းနှင့် ပေါင်းစပ်ခြင်းတို့ဖြင့်သာ အချိန်ကုန်လွန်ခဲ့သည်။ နောက်ဆုံးလသို့ ရောက်မှသာ အမှန်တကယ် သွန်းလုပ်ခြင်းကို စတင်နိုင်ခဲ့၏။ ဤလုပ်ငန်းစဉ်မှာ စိတ်စွမ်းအင်ကို အလွန်အမင်း ကုန်ခမ်းစေသော်လည်း ကံကောင်းထောက်မစွာဖြင့် မော့ယွီ၏ ပြောင်မြောက်လှသော လက်နက်သွန်းလုပ်ခြင်း နည်းပညာကြောင့် တစ်လအတွင်း အောင်မြင်စွာ အဆုံးသတ်နိုင်ခဲ့သည်။

ယခုအခါ မော့ယွီ၏ရှေ့တွင် ပစ္စည်းနှစ်ခုမှာ သပ်ရပ်စွာ တည်ရှိနေပြီဖြစ်သည်။ ဘယ်ဘက်ခြမ်းတွင် ခရမ်းရောင်ရင့်ရင့် ဟင်းလင်းပြင်လက်စွပ်တစ်ကွင်းရှိပြီး ထိုလက်စွပ်မှ ခရမ်းရောင်အလင်းတန်းဖျော့ဖျော့ ထွက်ပေါ်နေခြင်းက သာမန် အဆင့်နိမ့်လက်စွပ်များနှင့် မတူညီကြောင်း သက်သေပြနေသည်။ အထူးခြားဆုံးမှာ ထိုလက်စွပ်တွင် ထူးခြားသော သက်ရှိဇီဝအငွေ့အသက်များ ရှိနေခြင်းပင်။ ၎င်းက သက်ရှိသတ္တဝါများကို ထည့်သွင်းသိမ်းဆည်းနိုင်သည့် သဘောရှိသည်။ ဤသည်ကား မော့ယွီ လပေါင်းများစွာ အားသွန်ခွန်စိုက် သွန်းလုပ်ခဲ့ရသည့် ‘သားရဲလက်စွပ်’ ပင် ဖြစ်တော့သည်။

“မင်းကို ‘ရေခဲနတ်ဆိုး သားရဲလက်စွပ်’ လို့ ငါ နာမည်ပေးမယ်... ငါ့ကို သစ္စာဖောက်ခဲ့တဲ့ မော့ရှာနဲ့ ဟန်ရွှမ်းဆိုတဲ့ အဲဒီနှစ်ယောက်ကို ဘယ်တော့မှ မမေ့အောင်လို့ပေါ့”

မော့ယွီသည် လက်စွပ်ကို ကိုင်လျက် ခါးသီးလှသော နာကျည်းချက်များကို ပြန်လည်အမှတ်ရရင်း တိုးတိုးလေး ရေရွတ်လိုက်သည်။ အလွန်ကြီးမားသော ‘တောင်မြစ်ကျောက်တုံး’ ကို သွန်းလုပ်ထားခြင်းဖြစ်ရာ လက်စွပ်အတွင်းပိုင်း ဟင်းလင်းပြင်မှာ ကမ္ဘာငယ်လေးတစ်ခုသဖွယ် ကျယ်ဝန်းလှပြီး ‘ရှန်းရှောင်းတိုက်ကြီး’ ပေါ်တွင်ပင် အကောင်းဆုံးစာရင်းဝင်နိုင်သည်။ လောလောဆယ်တွင် မော့ယွီအနေဖြင့် ထိုမျှကျယ်ဝန်းသော နေရာမလိုအပ်သေးသော်လည်း ဤသားရဲလက်စွပ်၏ ခိုင်ခံ့မှုနှင့် လုံခြုံမှုမှာ သာမန်လက်စွပ်များထက် များစွာ သာလွန်လှသည်။

လက်စွပ်ကို ခဏတာ ကြည့်ရှုပြီးနောက် မော့ယွီသည် သူ၏ဝိညာဉ်အင်အားကို လက်စွပ်အတွင်းသို့ ပို့လွှတ်ကာ ဝိညာဉ်တံဆိပ် ခတ်နှိပ်လိုက်သည်။ သူ၏ လက်ရှိဝိညာဉ်အင်အားဖြင့်ဆိုလျှင် ‘မဟာဒိုရှီ’ တစ်ယောက်ပင်လျှင် ဤတံဆိပ်ကို ဖျက်ဆီးနိုင်မည်မဟုတ်ပေ။ ၎င်းမှာ အဆင့်မြင့် ဟင်းလင်းပြင်လက်စွပ်များ၏ ကာကွယ်ရေးစွမ်းရည်တစ်ခုဖြစ်ပြီး ဤလက်စွပ်တွင်လည်း ထိုစွမ်းရည်ရှိသည်။ ဝိညာဉ်တံဆိပ် ခတ်နှိပ်ပြီးသည်နှင့် လက်စွပ်မှ ခရမ်းရောင်အလင်းတန်းများ ပျောက်ကွယ်သွားကာ သာမန်လက်စွပ်တစ်ကွင်းကဲ့သို့ ဖြစ်သွားသည်။ ထို့နောက်တွင်မူ မော့ယွီသည် ထိုလက်စွပ်ကို သူ၏ ညာဘက်လက်သူကြွယ်တွင် မည်သူမှ မရိပ်မိစေဘဲ စိတ်ချလက်ချ ဝတ်ဆင်လိုက်လေသည်။

လက်စွပ်နှင့် အသားကျသွားပြီးနောက် မော့ယွီ၏ အကြည့်တို့က ညာဘက်ရှိ အနက်ရောင် လှံရှည်ကြီးဆီသို့ ရောက်ရှိသွားသည်။ ထိုလှံကြီးမှာ နက်မှောင်ပြောင်လက်နေပြီး ၉ ပေခန့် ရှည်လျားသည်။ လှံသွားမှာ ၁ ပေနှင့် ၃ လက်မခန့်ရှိကာ အနက်ရောင် လျှပ်စီးတန်းများ ခပ်ဖျော့ဖျော့ ထွက်ပေါ်နေသည်။ လှံကြီးမှာ ငြိမ်သက်နေသော်လည်း တစ်ဂူလုံးကို လွှမ်းမိုးသွားစေသည့် ကြောက်မက်ဖွယ် အရှိန်အဝါများ ထွက်ပေါ်နေ၏။

လှံတော်ကို လက်ဖြင့် ဆုပ်ကိုင်လိုက်သည်နှင့် မော့ယွီ၏ ဟန်ပန်မှာလည်း တမဟုတ်ချင်း ပြောင်းလဲသွားသည်။ ယခုအချိန်တွင် မော့ယွီမှာ ကောင်းကင်ယံကို ဖောက်ထွင်းတော့မည့် မိုးကြိုးလှံတော်တစ်စင်းကဲ့သို့ ထက်မြက်လှသော အရှိန်အဝါများဖြင့် ပြည့်နှက်နေလေသည်။

“နတ်ဘုရားအာဏာ အမှောင်မိုးကြိုး လှံတော်... ဒီတိုက်ကြီးကို အောင်နိုင်ဖို့ မင်းကို ငါတစ်ခါပြန်ပြီး ကိုင်စွဲရလိမ့်မယ်လို့ မထင်ထားခဲ့ဘူး”

မော့ယွီသည် သူ၏ ရဲဘော်ရဲဘက်ဟောင်းတစ်ဦးကို တွေ့ရသကဲ့သို့ လှံတော်ကို မြတ်မြတ်နိုးနိုးဖြင့် ပွတ်သပ်နေမိသည်။

ဝုန်း...

မော့ယွီ၏ ခေါ်သံကို တုံ့ပြန်သည့်အလား လှံတော်မှ အေးစိမ့်လှသော အရှိန်အဝါများ ထွက်ပေါ်လာပြီး ဂူအတွင်းမှတစ်ဆင့် ကောင်းကင်ယံသို့ ထိုးတက်သွားသည်။

“ကောင်းပြီ... မင်းရဲ့ စွမ်းအားကို ငါ တစ်ချက်လောက် ကြည့်ရသေးတာပေါ့”

လှံတော်ကို ပြန်လည်ကိုင်စွဲခွင့်ရသဖြင့် စိတ်လှုပ်ရှားနေသော မော့ယွီသည် ဂူအပြင်ဘက်ရှိ တောင်ကျစမ်းချောင်းဆီသို့ ထွက်လာခဲ့သည်။ သူ၏ မျက်ဝန်းအစုံတွင် စိတ်လှုပ်ရှားမှုများ အရောင်တောက်နေပြီး လှံတော်ကို တင်းကြပ်စွာ ဆုပ်ကိုင်ကာ ‘ဒိုချီ’ စွမ်းအင်များကို လှံအတွင်းသို့ စီးဝင်စေလိုက်သည်။ တောက်ပနေသော လျှပ်စီးတန်းများမှာ လှံအတွင်းသို့ ပြန်လည်ဝင်ရောက်သွားကာ တည်ငြိမ်သွားသော်လည်း လှံသွားထိပ်မှနေ၍ အလွန်ပြင်းထန်လှသော လျှပ်စစ်စွမ်းအင်များက အိုင်ကြီးတစ်ခုကဲ့သို့ လျှံထွက်လာလေသည်။

“အင်မတန် အားရဖို့ကောင်းတာပဲ”

ဤရင်းနှီးနေသော ခံစားချက်ကြောင့် မော့ယွီသည် အားရပါးရ ရယ်မောလိုက်သည်။ ထို့နောက် လက်မောင်းကို အားဖြင့်လှုပ်ရှားကာ လှံတော်ကို ကောင်းကင်သို့ ချိန်ရွယ်လိုက်သည်။ လှံတော်မှ ထွက်ပေါ်လာသော လေတိုးသံမှာ မြည်ဟည်းနေပြီး ထိုမှထွက်ပေါ်လာသော ကြောက်မက်ဖွယ် နောက်ကွယ်စွမ်းအားများက မြေပြင်သို့ စီးဆင်းသွားကာ မော့ယွီ၏ ခြေထောက်အောက်ရှိ ကျောက်သားပြင်မှာပင် အက်ကွဲသွားရသည်။

“ကိုးထပ်ကောင်းကင် မိုးကြိုးတိမ်တိုက် ခွဲဖြတ်ခြင်း!”

မော့ယွီ၏ အသံနှင့်အတူ ‘နတ်ဘုရားအာဏာ အမှောင်မိုးကြိုး လှံတော်’ ထိပ်ဖျားမှနေ၍ လျှပ်စီးစွမ်းအားများမှာ တောင်ကျရေလျှံသကဲ့သို့ ပေါက်ကွဲထွက်ပေါ်လာသည်။ တောက်ပလှသော ငွေရောင်အလင်းတန်းများမှာ ကောင်းကင်ယံကို ဖြတ်သန်းကာ ပြင်းထန်သော အသံလှိုင်းများနှင့်အတူ တောင်ကျစမ်းချောင်းဆီသို့ တဟုန်ထိုး ပြေးဝင်သွားသည်။ ထိုအလင်းတန်း ဖြတ်သန်းသွားရာတစ်လျှောက်ရှိ ငှက်များနှင့် တောရိုင်းတိရစ္ဆာန်များမှာ ကမ္ဘာပျက်တော့မည့်အလား ထိတ်လန့်တကြား ထွက်ပြေးကြကုန်သည်။

ဒိုင်း...

ခဏအကြာတွင် မီးတောင်ပေါက်ကွဲသည့်အလား ကျယ်လောင်လှသော ပေါက်ကွဲသံကြီး ထွက်ပေါ်လာပြီး ဖုန်မှုန့်များမှာ တိမ်တိုက်သဖွယ် ပျံ့လွင့်သွားသည်။ နာရီဝက်ခန့်အကြာ ဖုန်မှုန့်များ စဲသွားသောအခါမှသာ အခြေအနေကို မြင်တွေ့လိုက်ရသည်။ တစ်ချိန်က မြင့်မားလှသော တောင်ကျစမ်းချောင်းမှာ ယခုအခါ ပုံပျက်ပန်းပျက်ဖြင့် အပျက်အစီးများ ဖြစ်သွားခဲ့ပြီဖြစ်သည်။

ဤ ‘ကိုးထပ်ကောင်းကင် မိုးကြိုးတိမ်တိုက် ခွဲဖြတ်ခြင်း’ ကို ထုတ်ဖော်အပြီးတွင် မော့ယွီ၏ ခန္ဓာကိုယ်မှာ ရေညှစ်ထုတ်ခံထားရသည့် ရေမြှုပ်တစ်ခုကဲ့သို့ အင်အားများ လုံးဝကုန်ခမ်းသွားရသည်။ နာကျင်မှုများက သူ၏ အာရုံကြောများကို တိုက်ခိုက်နေပြီး လက်မောင်းရှိ အကြောများမှာလည်း အားအလွန်အကျွံသုံးထားသဖြင့် တဆတ်ဆတ် တုန်ယင်နေသည်။ ဤတိုက်ကွက်မှာ မော့ယွီ၏ ယခင်ဘဝက လှံသိုင်းကွက်ဖြစ်ပြီး ဤလှံတော်နှင့် အထူးတလည် တွဲဖက်အသုံးပြုရခြင်း ဖြစ်သည်။

သို့သော် ဤသိုင်းကွက်မှာ ‘ဒီအဆင့်’ ဒိုချီသိုင်းကွက် တစ်ခုဖြစ်ရာ ယခုလက်ရှိ ‘ကြယ် ၅ ပွင့် ဒိုကျဲ’ အဆင့်မျှဖြင့် အသုံးပြုရန်မှာ အလွန်ပင် ဝန်ထုပ်ဝန်ပိုး ဖြစ်လှသည်။ မှန်ပါသည်။ မော့ယွီသည် ယခုအခါ ‘ကြယ် ၅ ပွင့် ဒိုကျဲ’ အဆင့်သို့ ရောက်ရှိနေပြီဖြစ်သည်။ ‘ကောင်းကင်ဘုံ မိုးကြိုးခန္ဓာ’ ၏ အစွမ်းကြောင့် ကြယ် ၂ ပွင့်အဆင့်မှနေ၍ ရက်သတ္တပတ် နှစ်ပတ်အတွင်းမှာပင် ကြယ် ၃ ပွင့်သို့ ရောက်ရှိခဲ့သည်။ လွန်ခဲ့သည့် သုံးလအတွင်း လက်နက်သွန်းလုပ်နေစဉ်တွင်လည်း သူ သွန်းလုပ်ထားသည့် လက်နက်အချို့ကို ‘မီထဲ့အာ လေလံရုံး’ မှတစ်ဆင့် ရောင်းချခဲ့ပြီး ရရှိသမျှ ရွှေပြားများဖြင့် မိုးကြိုးနှင့် မီးဓာတ်ရှိသော ‘မှော်အမြုတေ’ ၂၀ နီးပါးကို ဝယ်ယူကာ စုပ်ယူခဲ့သဖြင့် ကြယ် ၅ ပွင့်အဆင့်သို့ တက်လှမ်းနိုင်ခဲ့ခြင်းဖြစ်သည်။

မော့ယွီသည် အသက်ကို ပြင်းပြင်းရှူရင်း ရဲရဲနီနေသော သူ၏ ညာဘက်လက်မောင်းကို ကြည့်ကာ နှုတ်ခမ်းကို လျှာဖြင့် သပ်လိုက်သည်။ အေးစိမ့်သော ကျောက်သားပေါ်တွင် ပျော့ခွေစွာ လဲလျောင်းနေရင်း သူ၏ အသက်ရှူသံများမှာ တဖြည်းဖြည်း ပြန်လည်တည်ငြိမ်လာသည်။ သို့သော် ခန္ဓာကိုယ်မှာ ထုံကျင်နေသဖြင့် လက်ချောင်းတစ်ချောင်းကိုပင် မလှုပ်ချင်တော့ပေ။

သူ၏ လက်ရှိအဆင့်ဖြင့်ဆိုလျှင် ဤတိုက်ကွက်ကို တစ်ကြိမ်သာ အသုံးပြုနိုင်မည်ဖြစ်ပြီး အသုံးပြုပြီးသည်နှင့် ဒိုချီစွမ်းအင်များ ပြန်ပြည့်လာသည်အထိ အင်အားကုန်ခမ်းသွားမည်ဖြစ်သည်။ မော့ယွီသည် ကောင်းကင်ယံရှိ လွင့်မျောနေသော တိမ်တိုက်များကို ငေးကြည့်ရင်း လေအဝှေ့တွင် သူ၏ နဖူးပေါ်သို့ ကျလာသော ဆံနွယ်စများကို မဖယ်ရှားနိုင်ဘဲ လဲလျောင်းနေမိသည်။

ဤတိုက်ကွက်က ခန္ဓာကိုယ်ကို များစွာ ထိခိုက်စေသော်လည်း မော့ယွီမှာမူ အလွန် ကျေနပ်နေမိသည်။ ဤတိုက်ကွက်ကိုသာ ထုတ်ဖော်လိုက်လျှင် ‘ဒိုရှီ’အဆင့်အောက် မည်သူမျှ ခံနိုင်ရည်ရှိမည်မဟုတ်ပေ။ ဝှက်ဖဲတစ်ခုအနေဖြင့် ဆိုလျှင်မူ ဤသည်မှာ အလွန်ပင် ပြည့်စုံလွန်းလှပေတော့သည်။