အခန်း (၂) - မွေးရာပါ မိုးကြိုးပင်မအရင်းအမြစ်

"မိုးကြိုးဝိညာဉ်" ဆိုသည်မှာ ရှန်းရှောင်းတိုက်ကြီး၏ တန်ဖိုးမဖြတ်နိုင်သော ရတနာတစ်ပါး ဖြစ်သည်။ ဒိုချီတိုက်ကြီးတွင် "ကောင်းကင်ဘုံမီးလျှံ" များ ရှိသကဲ့သို့ပင် ကျယ်ပြောလှသော ရှန်းရှောင်းတိုက်ကြီး၏ တစ်နေရာမဟုတ်တစ်နေရာတွင်လည်း ထူးခြားဆန်းပြားသည့် ကောင်းကင်ဘုံမိုးကြိုးဝိညာဉ်များ တည်ရှိကြသည်။ ၎င်းတို့သည် ကမ္ဘာဦးအစ ဖန်ဆင်းချိန်ကတည်းက ကြွေကျလာသော မိုးကြိုးစက်ကွင်းများ ဖြစ်နိုင်သလို၊ ကောင်းကင်ယံအနက်ရှိုင်းဆုံး၌ နှစ်ပေါင်းကုဋေကုဋာတိုင်အောင် အနည်ထိုင်ကျစ်လျစ်လာသည့် ရှန်းရှောင်းမိုးကြိုးများလည်း ဖြစ်နိုင်သည်။ ဤမိုးကြိုးဝိညာဉ်များသည် ကျင့်ကြံသူတို့ ကိုယ်တိုင်ဖန်တီးသော မိုးကြိုးစွမ်းအင်ထက် အဆပေါင်းများစွာ သာလွန်ရုံမျှမက တိုက်ပွဲများတွင်လည်း အစွမ်းထက်လှသော လက်နက်ဆိုးကြီးများအဖြစ် အသုံးတော်ခံကြပေသည်။ သို့သော်လည်း အဆိုပါ မိုးကြိုးဝိညာဉ်များသည် အလွန်အမင်း ရက်စက်ကြမ်းကြုတ်လှသဖြင့် တွေ့ရခဲသလို၊ တွေ့ရှိလျှင်ပင် ၎င်းတို့၏ စွမ်းအားကို ထိန်းချုပ်နိုင်ရန်မှာ မိုးထိအောင်ခဲယဉ်းလှ၏။

ဖမ်းဆီးရယူရန် ခက်ခဲသော်ငြားလည်း ၎င်းတို့သည် ကောင်းကင်ဘုံ၏ လက်ရာမွန်များဖြစ်ကြရာ အရာခပ်သိမ်းကို ချေမှုန်းနိုင်ပြီး မြေကမ္ဘာကို ဆွဲဖြဲပစ်နိုင်စွမ်း ရှိကြသည်။ ထို့ကြောင့်ပင် သန်မာသော လက်ရုံးရှင်တိုင်းအတွက် မက်မောစရာ အကောင်းဆုံးအရာများ ဖြစ်နေကြခြင်းပင်။ မော့ယွီသည် လွန်ခဲ့သော ဘဝက ဆယ်စုနှစ်တစ်ခုအတွင်း၌ပင် တိုက်ကြီး၏ ထိပ်သီးပညာရှင် ဖြစ်လာခဲ့သည်မှာ သူ၌ ရှားပါးလှသော "ကောင်းကင်ဘုံ မိုးကြိုးခန္ဓာ" ရှိခဲ့သောကြောင့် ဖြစ်သည်။ ၎င်းခန္ဓာကိုယ်ကြောင့် မိုးကြိုးဝိညာဉ်များနှင့် နက်နက်ရှိုင်းရှိုင်း ထိတွေ့ခံစားနိုင်ပြီး မိမိကိုယ်ကို ထိခိုက်မှု အနည်းဆုံးဖြင့် ဖမ်းဆီးနိုင်ခဲ့ခြင်း ဖြစ်သည်။ ဤသို့ဖြင့် ရှန်းရှောင်းတိုက်ကြီးရှိ မိုးကြိုးဝိညာဉ် (၁၂) ပါးလုံးကို စုဆောင်းကာ ပေါင်းစပ်နိုင်ခဲ့ပြီးနောက် မော့ယွီသည် အချုပ်အနှောင်အားလုံးကို ဖြတ်ကျော်ကာ လောကက "မိုးကြိုးဧကရာဇ်" ဟု ဘွဲ့ထူးပြုရလောက်သည့် ထိပ်သီးပါဝါရှင်ကြီး ဖြစ်လာခဲ့သည်။

နှမြောစရာကောင်းသည်မှာ "နတ်ဘုရားတစ်ကျိပ် ဟင်းလင်းပြင်ဖောက်ထွက်ခြင်း" တိုက်ပွဲအပြီး မော့ယွီ၏ ဝိညာဉ်အကြွင်းအကျန်များ ဟင်းလင်းပြင်ထဲ လွင့်မျောနေစဉ်အတွင်း နတ်ဘုရားသဖွယ် အစွမ်းထက်ခဲ့သော မိုးကြိုးဝိညာဉ်များသည်လည်း အရှိန်အဝါများ တဖြည်းဖြည်း လျော့ပါးလာခဲ့ပြီး နောက်ဆုံးတွင် မော့ယွီ၏ မွေးရာပါ မိုးကြိုးပင်မအရင်းအမြစ်များအဖြစ် ပြောင်းလဲကာ သူ၏ဝိညာဉ်အာကာသအတွင်း၌ အိပ်မောကျသွားခဲ့ခြင်းပင်။

ဤအချက်ကို သဘောပေါက်လိုက်ချိန်တွင် မော့ယွီ၏ မျက်ဝန်း၌ စိတ်ပျက်ရိပ်ကလေး တစ်ချက်ဖြတ်ပြေးသွားသော်လည်း ခဏချင်းမှာပင် ပျောက်ကွယ်သွားပြီး နှုတ်ခမ်းဖျား၌ အဓိပ္ပာယ်ပါသော အပြုံးတစ်ခု ပေါ်လာသည်။ မူလက သူ၏ရုပ်ကလပ် ပျက်စီးသွားချိန်တွင် ဤမိုးကြိုးဝိညာဉ်များမှာ ရှန်းရှောင်းတိုက်ကြီးမှာပင် ကျန်ရစ်ခဲ့လိမ့်မည်ဟု သူထင်ခဲ့ခြင်း ဖြစ်သည်။ သို့သော် မမျှော်လင့်ဘဲ ၎င်းတို့သည် သူနှင့်အတူ ဒိုချီတိုက်ကြီးသို့ပါ ပါလာခဲ့ချေပြီ။

ဤမိုးကြိုးဝိညာဉ် (၁၂) ပါးလုံးသည် ကောင်းကင်နှင့်မြေကြီးကို ဆွဲဖြဲကာ အရာခပ်သိမ်းကို မှုန့်မှုန့်ညက်ညက် ချေဖျက်နိုင်သော စွမ်းအားရှင်များ ဖြစ်ကြရာ ဒိုချီတိုက်ကြီးတွင်ပင် ကောင်းကင်ဘုံမီးလျှံများနှင့် ယှဉ်နိုင်လောက်အောင် တန်ဖိုးကြီးမားကြပေလိမ့်မည်။ အဆုံးမဲ့ ဟင်းလင်းပြင်ထဲ၌ စွမ်းအင်အတော်များများ ဆုံးရှုံးခဲ့သဖြင့် ပင်မအရင်းအမြစ်မျှသာ ကျန်တော့သည်ဆိုသော်ငြား ပြန်လည်ကုစား၍ မရနိုင်သည်တော့ မဟုတ်။ လုံလောက်သော စွမ်းအင်သာ ကျွေးနိုင်မည်ဆိုပါက တစ်ချိန်က ရှန်းရှောင်းတိုက်ကြီးကို တုန်လှုပ်စေခဲ့သော ဤထိတ်လန့်ဖွယ် မိုးကြိုးဝိညာဉ်များသည် ဒိုချီတိုက်ကြီးတွင်လည်း တစ်ကျော့ပြန် ထွန်းပြောင်လာဦးမည်သာ ဖြစ်သည်။

မှန်ပါသည်၊ မိုးကြိုးဝိညာဉ် တစ်ပါးစီကို မူလအခြေအနေပြန်ရောက်အောင် ပြုပြင်ရန်မှာ များပြားလှသော အရင်းအမြစ်များ လိုအပ်မည်ဖြစ်ပြီး (၁၂) ပါးလုံး အထွတ်အထိပ်ပြန်ရောက်ဖို့ဆိုလျှင် ကြောက်မက်ဖွယ်ကောင်းသော စွမ်းအင်ပမာဏကို သုံးစွဲရပေလိမ့်မည်။ သို့သော်လည်း မော့ယွီကတော့ အမှုမထားပေ။ "မိုးကြိုးဧကရာဇ်" အဖြစ် ဖြတ်သန်းခဲ့သော အတွေ့အကြုံများအရ သူ၌ ဤမိုးကြိုးဝိညာဉ်များကို ပြုစုပျိုးထောင်ရန် လုံလောက်သော ယုံကြည်ချက်နှင့် စိတ်ရှည်မှု ရှိနေသည်။ ဤမွေးရာပါ မိုးကြိုးပင်မအရင်းအမြစ် (၁၂) ခုရှိနေသရွေ့ မော့ယွီအတွက် တစ်ကျော့ပြန် ခေါင်းမော့နိုင်ဖို့ ရင်းနှီးမြှုပ်နှံမှု အပြည့်ရှိနေပြီပင်။

နိုးထလာပြီး ဒိုချီတိုက်ကြီးသို့ ရောက်နေမှန်း သိလိုက်ရသည့် ပထမဆုံးအချိန်၌ မော့ယွီ၏ အတွေးထဲတွင် မိုးကြိုးဝိညာဉ်များနှင့် ဆင်တူသော ကောင်းကင်ဘုံမီးလျှံများအကြောင်းသာ ရှိနေခဲ့သည်။ ပထမဘဝက မှတ်ဉာဏ်များအရ သူသည် ကောင်းကင်ဘုံမီးလျှံများ၏ ကြောက်မက်ဖွယ်စွမ်းအားနှင့် ၎င်းတို့ရှိနိုင်မည့် နေရာအချို့ကို ကောင်းကောင်းသိထားသည်။ ရှောင်ယန်၏ ကံအခွင့်အလမ်းများကို သူလုယူနိုင်လျှင်လည်း လုယူမည်သာ။ အားလုံးက ကမ္ဘာမြေက လာတဲ့ နယ်ကျွံလာသူချင်းပဲ၊ အားနာနေစရာမှ မလိုဘဲ။

သို့သော်လည်း ယခုခန္ဓာကိုယ်၏ ပါရမီမှာ အရင်ဘဝကနှင့် ယှဉ်လျှင် အလွန်နိမ့်ပါးနေသည်။ အရင်ဘဝက သူသည် သာမန်မျိုးနွယ်က ဖြစ်သော်လည်း ရှားပါးလှသော "ကောင်းကင်ဘုံ မိုးကြိုးခန္ဓာ" ကြောင့်သာ မိုးကြိုးဝိညာဉ်အမြောက်အမြားကို ပိုင်စိုးကာ နာမည်ကျော်ကြားခဲ့ခြင်း ဖြစ်သည်။ ယခုဘဝတွင်မူ နောက်ခံရော ပါရမီပါ အားနည်းနေသည်။ ထို့အပြင် ဤလောက၏ ကံကြမ္မာရှင် ရှောင်ယန် ရှိနေသေးရာ ကံကောင်းမှုများက အရင်ဘဝကလို သူ့ဘက်မှာ အမြဲရှိနေလိမ့်မည်ဟု မော့ယွီ အာမမခံနိုင်ပေ။ ထို့ကြောင့် သူ၏ အနာဂတ်အစီအစဉ်နှင့် တိုးတက်မှုလမ်းကြောင်းအတွက် ဝေခွဲမရ ဖြစ်နေခဲ့ခြင်းပင်။

သို့သော် ယခု ဝိညာဉ်အာကာသအတွင်းရှိ မွေးရာပါ မိုးကြိုးပင်မအရင်းအမြစ်များကို မြင်လိုက်ရချိန်တွင်မူ မော့ယွီသည် ရှေ့က လင်းလက်နေသော လမ်းမကြီးကို အတိုင်းသား မြင်လိုက်ရတော့သည်။ သူသည် ဒိုချီတိုက်ကြီးတွင်လည်း "မိုးကြိုးဧကရာဇ်" အဖြစ် နာမည်တစ်လုံး ထပ်မံထုဆစ်ဦးမည်။ ထို့အပြင် ပိုမိုမြင့်မားသော အဆင့်အတန်းသို့ တက်လှမ်းကာ သူ့ကို ချောင်းမြောင်းတိုက်ခိုက်ခဲ့သော "မော့ရှာ"၊ "ဟန်ရွှမ်း" နှင့် အပေါင်းအပါများကို ရှင်းပစ်ရန်လည်း ဆုံးဖြတ်လိုက်သည်။

ဆုံးဖြတ်ချက် ပြတ်သားသွားပြီးနောက် မော့ယွီသည် ဝေခွဲမနေတော့ဘဲ စိတ်အာရုံကို စုစည်းကာ ဝိညာဉ်အာကာသအတွင်းရှိ မိုးကြိုးဝိညာဉ် (၁၂) ပါးကို စစ်ဆေးကြည့်ရှုလိုက်သည်။

အလင်းရောင်စိုးစဉ်းမျှမရှိသော အမှောင်ထုကမ္ဘာကြီးအတွင်း၌ တိတ်ဆိတ်ခြင်းများက သူ့ကို လွှမ်းခြုံထားသည်။ နောက်တစ်ခဏ၌ မော့ယွီက စိတ်ကို တည်ငြိမ်လိုက်သောအခါ မူလက မှောင်မည်းနေသော ဟင်းလင်းပြင်သည် ရုတ်ချည်းပင် အလင်းတန်းများဖြင့် လင်းလက်လာတော့သည်။ တစ်ပြင်လုံးမှာ မိုးကြိုးပင်လယ်ကြီးအလား ဝင်းခနဲ လက်ခနဲ ဖြစ်သွားပြီး ကြောက်မက်ဖွယ် မိုးကြိုးစွမ်းအင်များက ငွေရောင်မြွေနဂါးများအလား တဖျပ်ဖျပ်မြည်ကာ ဟိုဟိုဒီဒီ ပြေးလွှားနေကြသည်။

ထိုသို့ တဖျပ်ဖျပ်လက်နေသော မိုးကြိုးငွေမြွေများ၏ နောက်ကွယ်တွင် မွေးရာပါ မိုးကြိုးပင်မအရင်းအမြစ် (၁၂) ခုသည် မြွေငယ်လေးများအလား ငြိမ်သက်စွာ ခွေနေကြသည်။ ငွေရောင်မိုးကြိုးပင်မတစ်ခုချင်းစီမှာ သေလုမျောပါး ဖြစ်နေသော မြွေကလေးများအလား အလွန်အမင်း အားနည်းနေပုံရသော်လည်း တကယ့်ပညာရှင်တစ်ယောက်သာ မြင်မည်ဆိုလျှင် ၎င်းတို့အတွင်း၌ ကိန်းအောင်းနေသော ကြီးမားလှသည့် အန္တရာယ်နှင့် ဒေါသမာန်တို့ကို သတိပြုမိပေလိမ့်မည်။

ဒိုချီတိုက်ကြီးမှာကဲ့သို့ပင် ရှန်းရှောင်းတိုက်ကြီးတွင်လည်း "မိုးကြိုးဝိညာဉ် အဆင့်သတ်မှတ်ချက်" ဆိုသည်မှာ ရှိသည်။ ထိုစာရင်းတွင် အစွမ်းထက်ဆုံး မိုးကြိုးဝိညာဉ် (၁၂) ပါးကို မှတ်တမ်းတင်ထားပြီး ၎င်းတို့မှာ မော့ယွီ၏ ဝိညာဉ်အာကာသထဲရှိ မိုးကြိုး (၁၂) ပါးပင် ဖြစ်သည်။ အရေအတွက်အားဖြင့် ဒိုချီတိုက်ကြီးရှိ ကောင်းကင်ဘုံမီးလျှံများလောက် မများသော်လည်း အရည်အသွေးမှာမူ ရင်ပေါင်တန်းနိုင်ရုံသာမက သာတောင်သာလွန်နေဦးမည်။

"ဒါပေမဲ့ ရှန်းရှောင်းတိုက်ကြီးရဲ့ မိုးကြိုးဝိညာဉ်စာရင်းက အခုဆို (၁၃) ပါး ဖြစ်နေလောက်ပြီထင်တယ်" ဟု မော့ယွီက တွေးလိုက်မိသည်။ အရင်ဘဝက မိုးကြိုးဝိညာဉ်အားလုံးကို စုစည်းပြီးနောက် မော့ယွီသည် ရှောင်ယန်၏ နည်းလမ်းအတိုင်း မိုးကြိုး (၁၂) ပါးလုံးကို ပေါင်းစပ်ကာ ရှန်းရှောင်းတိုက်ကြီးတွင် တစ်ခါမျှ မပေါ်ဖူးသေးသော ကြောက်မက်ဖွယ် မိုးကြိုးဝိညာဉ်သစ်ကို ဖန်တီးခဲ့ပြီး "နတ်ဘုရား" အဆင့်သို့ တက်လှမ်းနိုင်ခဲ့ခြင်း ဖြစ်သည်။ ကံဆိုးစွာပင် "နတ်ဘုရားတစ်ကျိပ် ဟင်းလင်းပြင်ဖောက်ထွက်ခြင်း" တိုက်ပွဲအပြီး၌ ထိုမိုးကြိုးများသည် ပြန်လည်ကွဲအက်သွားပြီး သူ၏ ဝိညာဉ်အာကာသအတွင်း၌ ပင်မအရင်းအမြစ်များအဖြစ် ပြန်လည်အိပ်မောကျသွားခဲ့ကြသည်။

"ဒိုချီတိုက်ကြီးရဲ့ ခရီးစဉ်မှာ ငါပထမဆုံး ဘယ်မိုးကြိုးဝိညာဉ်ကို နိုးထစေရမလဲ"

မော့ယွီက ဝိညာဉ်အာကာသအတွင်းရှိ အိပ်မောကျနေသော်လည်း အရှိန်အဝါကြီးမားဆဲဖြစ်သော မိုးကြိုးပင်မအရင်းအမြစ်များကို ကြည့်ရင်း ရေရွတ်လိုက်သည်။ မိုးကြိုးဝိညာဉ် (၁၂) ပါးလုံးသည် အဆင့်လိုက် အစွမ်းထက်ကြသည်မှာ အမှန်ပင်။ အဆင့်မြင့်လေ ပို၍ အစွမ်းထက်လေ ဖြစ်သည်။ သို့သော်လည်း ဒိုချီတိုက်ကြီးနှင့် ရှန်းရှောင်းတိုက်ကြီး နှစ်ခုလုံးသည် စွမ်းအင်နိယာမချင်း ဆင်တူသော အောက်ခြေလောကများသာ ဖြစ်ကြရာ အဆင့်မြင့်မိုးကြိုးဝိညာဉ်များမှာ ဒိုချီတိုက်ကြီးတွင်လည်း ထိပ်သီးဖြစ်တည်မှုများ ဖြစ်နေပေလိမ့်မည်။

လောလောဆယ်တွင် မော့ယွီ၏ အဆင့်အတန်းမှာ ရှောင်မိသားစု၏ အိမ်စေအဘိုးအိုတစ်ဦး၏ မြေးမျှသာ ဖြစ်သည်။ ရှောင်မိသားစုဆိုသည်မှာလည်း ဒိုချီတိုက်ကြီး၏ အစွန်အဖျားမှ အရေးမပါသော မျိုးနွယ်စုကလေးတစ်ခုသာ ဖြစ်ရာ အဆင့်မြင့်မိုးကြိုးဝိညာဉ်များကို ပြန်လည်မွေးမြူရန် အရင်းအမြစ် မလုံလောက်ပေ။ ထို့ကြောင့် မော့ယွီသည် အဆင့်နိမ့်သော မိုးကြိုးဝိညာဉ်များကိုသာ အာရုံစိုက်လိုက်သည်။ မိုးကြိုးဝိညာဉ်အားလုံး၏ အရှင်သခင်ဖြစ်သည့်အားလျော်စွာ သူသည် အားလုံးကို တန်းတူဆက်ဆံပြီး အကျိုးကျေးဇူး အများဆုံးရနိုင်မည့်အချက်ကိုသာ စဉ်းစားသည်။

ခဏမျှ စဉ်းစားပြီးနောက် သူ၏ အကြည့်တို့သည် အဆင့် (၁၀) နေရာတွင်ရှိသော မွေးရာပါ မိုးကြိုးပင်မအရင်းအမြစ်ဆီသို့ ရောက်သွားသည်။ အခြားသော အရင်းအမြစ်များနှင့် မတူသည်မှာ ဤမိုးကြိုးမှာ ကြမ်းတမ်းလှသော မိုးကြိုးအရှိန်အဝါအပြင် ပြင်းထန်လှသော မီးလျှံစွမ်းအင်များလည်း ပါဝင်နေခြင်းပင်။ ထိုမီးလျှံစွမ်းအင်မှာ မိုးကြိုးစွမ်းအင်နှင့် ရင်ပေါင်တန်းနိုင်လောက်အောင်ပင် အားကောင်းလှသည်။

ဤမိုးကြိုးမှာ ရှန်းရှောင်းတိုက်ကြီး၏ "မိုးကြိုးဝိညာဉ် အဆင့်သတ်မှတ်ချက်" တွင် နံပါတ် (၁၀) ချိတ်ခဲ့သော...

"ကြက်သွေးရောင် ကောင်းကင်လောင်ကျွမ်းခြင်း မိုးကြိုး!"