အခန်း (၁၂) - မိသားစုစားသောက်ပွဲ

သုံးရက်တာ အချိန်ကာလ ကုန်ဆုံးသွားပြီးနောက်... ရှောင်မျိုးနွယ်စု၏ ပင်မအဆောင်မ၌ ဖြစ်သည်။ မိသားစုစားသောက်ပွဲသို့ တက်ရောက်ရန် ကတိပေးထားခဲ့သည့်အတိုင်း မော့ယွီသည် ကတိမပျက်စေရန် သူ၏ကျင့်ကြံခြင်းကို စောစီးစွာ အဆုံးသတ်လိုက်သည်။ အိမ်တော်ထိန်း၏ မြေးဖြစ်သူ မော့ယွီအတွက် ယခင်က ယခုကဲ့သို့ မျိုးနွယ်စု၏ အတွင်းပိုင်းစားသောက်ပွဲမျိုးကို တက်ရောက်ခွင့် ရရှိခဲ့ဖူးခြင်း မရှိပေ။ သာမန် ရှောင်မျိုးနွယ်စုဝင်များပင် တက်ရောက်ရန် အရည်အချင်းမပြည့်မီသည့် ပွဲမျိုးဖြစ်သော်လည်း မော့ယွီ၏ ထူးချွန်ထက်မြက်သည့် ပါရမီများ တစ်စစ ပေါ်လွင်လာပြီးနောက်တွင်မူ မျိုးနွယ်စု၏ အထက်တန်းလွှာများက သူ့ကို အသိအမှတ်ပြုလာကြပြီး မိမိတို့ဘက်ပါအောင် သိမ်းသွင်းရန် ကြိုးစားလာကြခြင်း ဖြစ်သည်။

မော့ယွီ ရောက်ရှိသွားချိန်တွင် စားသောက်ပွဲ ပြင်ဆင်မှုများက အားလုံး အဆင်သင့်ဖြစ်နေလေပြီ။ စားပွဲ၏ အဓိကနေရာတွင် ခန့်ညားထည်ဝါစွာ ထိုင်နေသူမှာ ရှောင်ယန်၏ ဖခင်ဖြစ်သူ၊ ရှောင်မျိုးနွယ်စု၏ လက်ရှိခေါင်းဆောင် 'ရှောင်ကျန့်' ပင် ဖြစ်သည်။ သူ၏ မျက်နှာထားမှာ တည်ကြည်လေးနက်နေပြီး ဘေးတစ်ဖက်တစ်ချက်တွင် လက်ရှိ ရှောင်မျိုးနွယ်စု၏ အကြီးအကဲ သုံးဦး ထိုင်နေကြသည်။ ၎င်းတို့၏ နောက်ကွယ်တွင်မူ မျိုးနွယ်စု၏ ထူးချွန်သည့် မျိုးဆက်သစ်လူငယ်များဖြစ်ကြသော ရှောင်ယန်၊ ရွှမ်းအာ၊ ရှောင်နင်နှင့် အခြားသူများ ထိုင်နေကြသည်။

ရှောင်ကျန့်သည် ဂုဏ်သရေရှိလှသော မီးခိုးရောင်ဝတ်ရုံကို ဆင်မြန်းထားပြီး ကျောကိုမတ်မတ်ထားကာ ထိုင်နေပုံမှာ အရှိန်အဝါ ကြီးမားလှသည်။ သူ၏ ထူထဲသော မျက်ခုံးအစုံက ရဲရင့်ပြတ်သားသည့် အသွင်ကို ဆောင်နေသည်။ လက်ရှိ မျိုးနွယ်စုခေါင်းဆောင် တစ်ဦးဖြစ်သလို ၅ မှတ် အဆင့်ရှိ 'မဟာဒိုရှီ' တစ်ဦး ဖြစ်သည့်အတိုင်း မော့ယွီ ဝင်လာသည်ကို သူ ချက်ချင်း သတိပြုမိလိုက်သည်။

"ဒါ ရှောင်ယွီလား... မတွေ့တာ နှစ်အတော်ကြာပြီပဲ၊ အတော်လေး ကြီးကောင်ဝင်လာတာပဲ"

ရှောင်ကျန့်က ပြုံးရွှင်စွာ ပြောဆိုရင်း ထိုင်နေရာမှထကာ မော့ယွီကို လာရောက်ကြိုဆိုပြီး လူငယ်လေး၏ ပခုံးကို အသာအယာ ပုတ်လိုက်သည်။ ရှောင်ကျန့်၏ လုပ်ဆောင်မှုကို ကြည့်ပြီး ရှောင်ယန်၊ ရွှမ်းအာနှင့် အခြားသူများလည်း မော့ယွီကို နှုတ်ဆက်ရန် မတ်တပ်ရပ်လိုက်ကြသည်။

"ဂါရဝပြုပါတယ် မျိုးနွယ်စုခေါင်းဆောင်"

မော့ယွီက လက်သီးဆုပ်ကာ လေးစားစွာ ဦးညွှတ်နှုတ်ဆက်လိုက်သည်။ ယခင်မျိုးနွယ်စုခေါင်းဆောင် ကွယ်လွန်ပြီးနောက် ရှောင်မျိုးနွယ်စု၏ အင်အားကို မယိမ်းယိုင်အောင် ထိန်းသိမ်းနိုင်ခဲ့သည့် ရှောင်ကျန့်ကို မော့ယွီအနေဖြင့် ခေါင်းဆောင်ကောင်းတစ်ဦးအဖြစ်ရော ဖခင်ကောင်းတစ်ဦးအဖြစ်ပါ လေးစားမိပါသည်။

"မင်းက ငါ့နှမရဲ့ သားပဲဟာ... ဦးလေးရှောင်ကျန့်လို့ပဲ ခေါ်ပါ"

ရှောင်ကျန့်က ရှေ့တွင် ရည်မွန်စွာ ရပ်နေသော လူငယ်လေးကို ကြည့်ရင်း ချီးကျူးအံ့သြရိပ်များ မျက်ဝန်းတွင် လက်သွားသည်။ ငယ်ငယ်ရွယ်ရွယ်နှင့် 'ဒိုချီ (အဆင့်နိမ့်)' ၈ ဆင့်အထိ ရောက်ရှိနေပြီး ရှောင်နင်ကို တစ်ချက်တည်းနှင့် အလဲထိုးနိုင်ခဲ့သည့် မော့ယွီ၏ ပါရမီက မျိုးနွယ်စုခေါင်းဆောင်ကိုယ်တိုင် စိတ်ဝင်စားလာရသည်အထိပင် ဖြစ်သည်။

"ကောင်းပါပြီ ဦးလေးရှောင်ကျန့်"

မော့ယွီက ဝန်မလေးဘဲ ပြန်လည်ထူးလိုက်သည်။

"ကောင်းပြီ... ယန်အာရဲ့ ဘေးမှာ သွားထိုင်ချေ"

ရှောင်ကျန့်က ရှောင်ယန်ဘေးရှိ လွတ်နေသော နေရာကို ညွှန်ပြလိုက်သည်။ မော့ယွီ ဝင်ထိုင်လိုက်စဉ် ဒေါသတကြီးနှင့် အစားအစာများကို ဝါးစားနေသည့် ရှောင်နင်ကို တစ်ချက်လှမ်းကြည့်လိုက်သော်လည်း သူ ဂရုမစိုက်မိပေ။ မော့ယွီ၏ အကြည့်များက ခန်းမအတွင်း လှည့်လည်ကြည့်ရှုနေရင်း အကြီးအကဲများ၏ တည်တင်းနေသော မျက်နှာများဆီသို့ ရောက်သွားသည်။

သူက ရှောင်ယန်ဘက်သို့ လှည့်ကာ တိုးတိုးလေး မေးလိုက်သည်။

"ပုံမှန်ဆို မိသားစုစားသောက်ပွဲကို ထူးခြားတဲ့ အခါသမယတွေမှာမှ ကျင်းပတာ မဟုတ်လား၊ အခု မျိုးနွယ်စုထဲမှာ တစ်ခုခု ဖြစ်လို့လား"

ရှောင်ယန်က ခဏမျှ ဝေခွဲမရဖြစ်နေပြီးမှ ပြန်ဖြေသည်။

"ဝူတန်မြို့က 'မီထဲ့အာ' လေလံရုံမှာ မကြာခင် လေလံပွဲတစ်ခု ရှိတယ်လေ၊ စိတ်ဝင်စားဖို့ကောင်းတဲ့ ပစ္စည်းတချို့ ပါလာမယ်ထင်တယ်၊ အဲဒါကြောင့် အဖေနဲ့ တခြားသူတွေက လေလံဆွဲဖို့ ရန်ပုံငွေ စုဆောင်းနေကြတာ"

စင်စစ် ရှောင်ယန် မပြောပြဖြစ်ခဲ့သည့် အခြားအကြောင်းရင်းတစ်ခုလည်း ရှိနေသေးသည်။ မူလက သာမန် မျိုးနွယ်စု အစည်းအဝေးတစ်ခုသာ ဖြစ်သော်လည်း မော့ယွီက ရှောင်နင်ကို အနိုင်ရခဲ့သည်ဟု သိလိုက်ရပြီးနောက် ရှောင်ကျန့်က မော့ယွီကို ကြိုဆိုသည့်အနေဖြင့် ပွဲအဆင့်အတန်းကို မြှင့်တင်လိုက်ခြင်း ဖြစ်သည်။ ရှောင်ယန်ကိုယ်တိုင်ကလည်း မော့ယွီသည် မိမိကဲ့သို့ပင် ရှောင်မျိုးနွယ်စုထက် ပိုမိုမြင့်မားသည့် ရည်မှန်းချက်များ ရှိမှန်း သိသဖြင့် ဖခင်ဖြစ်သူ၏ ဆုံးဖြတ်ချက်ကို သဘောမတူလိုသော်လည်း မော့ယွီနှင့် ရင်းနှီးမှုရှိထားခြင်းက မဆိုးလှဟု သူ တွေးမိသည်။

ရှောင်ယန်၏ ရှင်းပြချက်ကို ကြားရသောအခါ မော့ယွီ၏ ငြီးငွေ့နေသော မျက်နှာထားမှာ စိတ်ဝင်စားမှုဖြင့် ဝင်းလက်သွားသည်။ 'ရှန်းရှောင်းတိုက်ကြီး' တွင်လည်း လေလံပွဲများမှာ အလွန်ရေပန်းစားပြီး သူ၏ ယခင်ဘဝက လေလံပွဲပေါင်းများစွာကို တက်ရောက်ခဲ့ဖူးသည်။ တခါတရံတွင် တန်ဖိုးမဖြတ်နိုင်သော ရတနာများကို မထင်မှတ်ဘဲ တွေ့ရှိတတ်သည် မဟုတ်ပါလား။ သူ၏ ကျင့်ကြံမှုမှာလည်း မကြာသေးမီကမှ တည်ငြိမ်သွားပြီဖြစ်ရာ 'ဒိုချီ (အဆင့်နိမ့်)' ၉ ဆင့်သို့ တက်လှမ်းရန် ကြိုးစားကြည့်ဖို့ အချိန်ကောင်းပင် ဖြစ်သည်။ လေလံပွဲသို့ သွားခြင်းက အကျိုးမယုတ်နိုင်ဘဲ 'ဒိုကျဲ' အဆင့်သို့ ရောက်ရှိရန် အထောက်အကူဖြစ်စေမည့် ပစ္စည်းတစ်ခုခုကိုလည်း တွေ့ကောင်းတွေ့နိုင်ပေသည်။

စားပုသောက်ပွဲမှာ တည်ငြိမ်လေးနက်သည့် အငွေ့အသက်များဖြင့် ဆက်လက်ကျင်းပခဲ့ပြီး ရှောင်ကျန့်က ပွဲပြီးဆုံးကြောင်း အချက်ပြလိုက်သည်နှင့် မော့ယွီသည် ယဉ်ကျေးစွာ နှုတ်ဆက်ကာ သူ၏ အခန်းသို့ အမြန်ပြန်လာခဲ့တော့သည်။

...

အခန်းထဲသို့ ပြန်ရောက်သောအခါ မော့ယွီ ချက်ချင်း အိပ်စက်ခြင်း မရှိပေ။ သန်းခေါင်ယံအချိန် ရောက်ရှိလာပြီး လောကကြီး တစ်ခုလုံး တိတ်ဆိတ်သွားချိန်တွင် မော့ယွီသည် ကုတင်ပေါ်မှ ဖျတ်လတ်စွာ ဆင်းလိုက်ပြီး ဗီရိုထဲတွင် ဝှက်ထားသော 'မှော်သားရဲအနှစ်' သုံးခုကို ထုတ်ယူကာ စားပွဲပေါ်တွင် အသာအယာ တင်လိုက်သည်။ ထိုအနှစ်သုံးခုမှာ ယခင်က ကျန်ရှိနေသည့် ပထမအဆင့် မီးဒြပ်စင်နှင့် မိုးကြိုးဒြပ်စင် အနှစ်များ ဖြစ်ကြသည်။

မော့ယွီအနေဖြင့် 'ဒိုချီ (အဆင့်နိမ့်)' ၈ ဆင့်သို့ ရောက်ရှိခဲ့သည်မှာ နှစ်လနီးပါး ရှိခဲ့ပြီဖြစ်သည်။ ထိုကာလအတွင်း သူသည် "ကောင်းကင်ဘုံ မိုးကြိုးခန္ဓာ" ကို ကျွမ်းကျင်အောင် လေ့ကျင့်နိုင်ခဲ့ရုံသာမက ကျင့်ကြံမှုအဆင့်ကိုလည်း ခိုင်မာအောင် တည်ဆောက်နိုင်ခဲ့သည်။ ယခုမူ နောက်ထပ် အဆင့်တစ်ခုသို့ တက်လှမ်းရန် အချိန်ကျရောက်လာပြီ ဖြစ်သည်။ စားပွဲပေါ်ရှိ မှော်သားရဲအနှစ်များက ထိုအဆင့်တက်လှမ်းမှုအတွက် သော့ချက်ပင် ဖြစ်သည်။

မော့ယွီသည် တုံ့ဆိုင်းမနေဘဲ သူ၏ "ကြက်သွေးရောင် ကောင်းကင်လောင်ကျွမ်းခြင်း မိုးကြိုး" ကို ဆင့်ခေါ်လိုက်ပြီး မှော်သားရဲအနှစ် တစ်ခုကို ထိုမိုးကြိုးလျှပ်စစ်ထဲသို့ ပစ်ထည့်လိုက်သည်။ ယခင်အတိုင်းပင် မိုးကြိုးမီးလျှံ၏ လောင်မြိုက်မှုအောက်တွင် မှော်အနှစ်၏ အပြင်ဘက်အလွှာမှာ အရည်ပျော်သွားပြီး အတွင်းမှ ပြင်းထန်သော စွမ်းအင်များ ထွက်ပေါ်လာသည်။ သို့သော် ထိုစွမ်းအင်များ ပျံ့လွင့်မသွားခင်မှာပင် ဝန်းရံထားသော ကြက်သွေးရောင် လျှပ်စစ်နွယ်များက ဝါးမြိုလိုက်ကြသည်။

ယခုအခါ "ကြက်သွေးရောင် ကောင်းကင်လောင်ကျွမ်းခြင်း မိုးကြိုး" မှာ ပိုမိုအားကောင်းလာပြီဖြစ်ရာ ပထမအဆင့် မှော်အနှစ်၏ စွမ်းအင်ကို ပိုမိုမြန်ဆန်စွာ စုပ်ယူနိုင်လေသည်။ နှစ်နာရီခန့်အတွင်းမှာပင် မိုးကြိုးဒြပ်စင်အနှစ်မှာ လုံးဝဥဿုံ ကုန်ဆုံးသွားသည်။ မော့ယွီသည် အမူအရာမပျက်ဘဲ ကျန်ရှိနေသော မှော်အနှစ်နှစ်ခုလုံးကို မိုးကြိုးမီးလျှံထဲသို့ တစ်ပြိုင်နက် ပစ်ထည့်လိုက်သည်။ ယခုအချိန်တွင် မိုးကြိုးမီးလျှံမှာ မှော်အနှစ်နှစ်ခုကို တစ်ပြိုင်နက် ဝါးမြိုနိုင်လောက်အောင် ကြီးမားနေပြီ ဖြစ်သည်။

မှော်အနှစ်နှစ်ခု အရည်ပျော်သွားသည်နှင့်အမျှ ကြက်သွေးရောင် လျှပ်စစ်များမှာ တဖျတ်ဖျတ် မြည်ဟည်းနေပြီး ၎င်းတို့၏ စွမ်းအင်ကို ဆက်တိုက် စုပ်ယူနေသည်။ နောက်ထပ် သုံးနာရီခန့် ကြာမြင့်သွားပြီး အရုဏ်တက်ချိန်သို့ ရောက်လုနီးနီးတွင် နောက်ဆုံးကျန်ရှိနေသော မှော်အနှစ်များမှာလည်း ကုန်စင်သွားလေပြီ

။

ယခုအခါ "ကြက်သွေးရောင် ကောင်းကင်လောင်ကျွမ်းခြင်း မိုးကြိုး" သည် တစ်ဖန် ပြန်လည် ကြီးထွားလာပြီး ၎င်းမှ ထွက်ပေါ်လာသော ထိတ်လန့်ဖွယ်ရာ အရှိန်အဝါများက ထိတွေ့ကိုင်တွယ်၍ ရနိုင်လောက်အောင်ပင် ဖိအားပေးနေသည်။ ဤသည်ကို မြင်သောအခါ မော့ယွီ ပြုံးလိုက်မိသည်။ မှော်သားရဲအနှစ်များကို ဝါးမြိုခြင်းက သူ၏ 'မိုးကြိုးဝိညာဉ်' ကို အဆင့်မြှင့်တင်ရန် အထိရောက်ဆုံး နည်းလမ်းဖြစ်ကြောင်း သက်သေပြနေသည်။ သို့သော် ဤတစ်ကြိမ် အဆင့်တက်ပြီးနောက်တွင်မူ ပထမအဆင့် မှော်အနှစ်များသည် ၎င်း၏ ကြီးထွားမှုအတွက် အသုံးဝင်တော့မည် မဟုတ်ပေ။ နောင်တွင် အနည်းဆုံး ဒုတိယအဆင့် မှော်အနှစ်များ လိုအပ်လာမည် ဖြစ်သည်။

ဒုတိယအဆင့် မှော်သားရဲအနှစ်များမှာမူ ပထမအဆင့်ထက် အဆပေါင်းများစွာ ပိုမိုဈေးကြီးလှသည်။ ကုန်ကျစရိတ်ကြီးမြင့်မှုကို တွေးမိသောအခါ မော့ယွီ အနည်းငယ် ခေါင်းခဲသွားရသည်။ မိုးကြိုးဝိညာဉ် တစ်ခုတည်းကိုပင် ပြုစုပျိုးထောင်ရန် ဤမျှ ခက်ခဲနေပါက သူ၏ ခန္ဓာကိုယ်ထဲတွင် ငြိမ်သက်နေသော ကျန်ရှိသည့် မိုးကြိုးဝိညာဉ် ၁၁ ခုအတွက်ဆိုလျှင် မည်သို့ရှိမည်နည်း။

မော့ယွီသည် ထိုအတွေးများကို ခါထုတ်လိုက်ပြီး လက်ရှိအခြေအနေကိုသာ အာရုံစိုက်လိုက်သည်။ သူ၏ အင်အားက တစ်ဖန် ပြန်လည် မြင့်တက်လာတော့မည် မဟုတ်ပါလား။ အဆင့်တက်ခြင်းနှင့် ပတ်သက်၍ အတွေ့အကြုံရှိပြီးသား ဖြစ်ရာ မော့ယွီအတွက် မခက်ခဲတော့ပေ။

နာရီဝက်ခန့် ကြာပြီးနောက်တွင် မော့ယွီသည် လန်းဆန်းတက်ကြွသော အမူအရာဖြင့် အခန်းထဲမှ ထွက်လာခဲ့သည်။ တစ်ညလုံး အဆင့်တက်ရန် ကြိုးစားခဲ့ရခြင်းက မည်သည့် အနားယူမှုထက်မဆို ပို၍ ကောင်းမွန်နေခဲ့သည်။

ဒိုချီ (အဆင့်နိမ့်)၊ ၉ ဆင့်!