အခန်း (၃၈) - ထျန်းချွဲမြို့၏ မသေမျိုးမြို့တော်သခင်၊ ထိုက်ချန်းလောကကို ထိန်းချုပ်မည့် သူ၏စီမံကိန်း..

"ယွမ်အာ... ငါတို့ ချူမိသားစုက ထျန်းချွဲမြို့နဲ့ ရန်ဘက်ဖြစ်ပြီလို့ ကြေညာလိုက်တဲ့နေ့ကစပြီး"

"ထိုက်ချန်းလောကထဲမှာရှိတဲ့ လူသားမျိုးနွယ် အင်အားစုအားလုံးဟာ အစုအဖွဲ့ သုံးခုကွဲသွားဖို့ ရှိတယ်။ ပထမအစုက ငါတို့ ချူမိသားစုနောက်ကို ဆက်လိုက်မယ့်သူတွေ၊ ဒုတိယအစုကတော့ ထျန်းချွဲမြို့ရဲ့ အမိန့်ကို နာခံမယ့်သူတွေပေါ့"

"တတိယအစုကတော့ ဘယ်ဘက်ကမှမပါဘဲ ကြားနေအနေနဲ့ နေကြမယ့်သူတွေ ဖြစ်လိမ့်မယ်..."

ဟောက်ဧကရာဇ် လျှို့ဝှက်ကောင်းကင်မျှော်စင်၏ အတွင်းကမ္ဘာထဲတွင်၊ ချူချန်းရှန်း နှင့် ချူယွမ် တို့သည် တစ်ဦးနှင့်တစ်ဦး မျက်နှာချင်းဆိုင် ထိုင်နေကြသည်။ 

ချူချန်းရှန်းသည် သူ၏လက်ထဲရှိ ဝိညာဉ်လက်ဖက်ရည်ကို တစ်ငုံသောက်လိုက်ပြီး အေးအေးဆေးဆေး ပြောလိုက်ခြင်းဖြစ်သည်။

"ဦးလေးချန်း... ကျွန်တော်တို့ ချူမိသားစုက ထျန်းချွဲမြို့တော်သခင်ရဲ့ မကောင်းတဲ့ ရည်ရွယ်ချက်တွေကို သိနေတာကြာပြီပဲကို၊ ဘာလို့ ဒီအခွင့်အရေးကို သုံးပြီး သူတို့ကို တစ်ခါတည်း အမြစ်ပြတ် မချေမှုန်းလိုက်တာလဲ"

ချူယွမ်က မျက်မှောင်ကြုတ်ကာ မေးလိုက်သည်။

ချူမိသားစု၏ အစစ်အမှန်အင်အားမှာ ထိုက်ချန်းလောကသားများ စိတ်ကူးထားသည်ထက် များစွာသာလွန်ရမည်မှာ သေချာသည်။

သို့သော်လည်း သူတို့သည် ထိုထျန်းချွဲမြို့တော်သခင်ကို အတော်အတန် သတိထားနေပုံရသည်မှာ သူ့ကို ဇဝေဇဝါ ဖြစ်စေသည်။

"ဟဲဟဲ" ချူချန်းရှန်းက ခပ်တိုးတိုးရယ်လိုက်ပြီး ဖြည်းဖြည်းချင်း ရှင်းပြသည်…

"ယွမ်အာ... ဒီထျန်းချွဲမြို့တော်သခင်က မင်းထင်သလို ရိုးရှင်းတဲ့သူ မဟုတ်ဘူး"

"ဝန်ခံရရင် ငါတို့ ချူမိသားစုရဲ့ ဖဲချပ်အစစ်တွေကို ထုတ်သုံးရင် သူ့ကို အကြိမ်ပေါင်းများစွာ သတ်နိုင်တာပေါ့… ဒါပေမဲ့ အဲ့ဒါက မလုံလောက်သေးဘူး ဒီလူရဲ့ ဝိညာဉ်အနှစ်သာရက ကောင်းကင်တာအိုနဲ့ ဆက်နွှယ်နေတယ်…ကောင်းကင်တာအို မပျက်စီးသရွေ့…သူ ပြာဖြစ်သွားရင်တောင် မသေမျိုးအဖြစ် ရှိနေဦးမှာပဲ"

"ကောင်းကင်တာအိုရဲ့ နတ်ဘုရားစွမ်းအား ကောင်းချီးကို ရထားတဲ့ ဧကရာဇ်တွေလိုပဲ၊ ထိုက်ချန်းလောကရဲ့ ကောင်းကင်တာအိုကို အပိုင်းပိုင်း ဖျက်ဆီးပစ်နိုင်မှသာ သူတို့ကို အမြစ်ဖြတ်နိုင်မှာ။ မဟုတ်ရင်တော့ သူ့ကို ထာဝရ ဖျက်ဆီးပစ်ဖို့ မဖြစ်နိုင်ဘူး"

ပြောနေရင်းနှင့် ချူချန်းရှန်းသည် လက်ဖက်ရည်ကို နောက်တစ်ငုံ သောက်လိုက်ပြန်သည်။ သူ၏မျက်ခုံးနှစ်ခုကြားတွင် လေးနက်သော အရိပ်အယောင်များ ပေါ်လာသည်-

"ဒါကြောင့်လည်း ချူမိသားစုဟာ နှစ်ပေါင်းများစွာ သူနဲ့ ထိပ်တိုက်မတွေ့အောင် ရှောင်ခဲ့တာ တကယ်လို့ တိုက်ပွဲစပြီဆိုရင် အကျိုးဆက်တွေက အများကြီးဖြစ်လာမှာဖြစ်သလို၊ ဒါက ငါတို့မိသားစုအတွက်လည်း အကျိုးမရှိနိုင်ဘူး"

"ဒါပေမဲ့ ဒီတစ်ကြိမ်မှာတော့!" သူ၏မျက်လုံးထဲတွင် အေးစက်သော အလင်းတန်းများ ထွက်ပေါ်လာပြီး ရက်စက်သော အရိပ်အယောင်များ ပြသလာသည်-

"ငါတို့ ချူမိသားစုကတော့ အဆုံးအထိ တိုက်ဖို့ ဆုံးဖြတ်လိုက်ပြီ အနာဂတ်မှာ ထိုက်ချန်းလောကရဲ့ ကောင်းကင်တာအိုကို ငါတို့ အပြည့်အဝ ထိန်းချုပ်မယ်…ဒီလောကရဲ့ အရှင်သခင်က... ပြောင်းလဲရမယ့် အချိန်ရောက်ပြီ"

ချူချန်းရှန်း၏ စကားလုံးများမှာ အလွန်တရာ မောက်မာလှသည်။

ထျန်းချွဲမြို့နှင့် ရန်ဘက်ဖြစ်ဖို့ ဆုံးဖြတ်ပြီးကတည်းက သူသည် အပြတ်အသတ် လုပ်ဆောင်တော့မည်ဖြစ်သည်။

သူသည် ထျန်းချွဲမြို့တော်သခင်ကို အမှန်တကယ် ကျဆုံးစေပြီး၊ ကောင်းကင်တာအို အသစ်တစ်ခုကိုပင် ပြန်လည်ပုံဖော်ကာ နောက်ဆုံးတွင် ချူမိသားစုက ဤလောကတစ်ခုလုံးကို စည်းလုံးစေမည်ဖြစ်သည်။

"ဒါပေမဲ့ အဲ့ဒါတွေ ပြောနေရင်းနဲ့ ယွမ်အာ... မင်းက ဒီစီမံကိန်းမှာ မြို့တော်သခင်ကို သတ်နိုင်မယ့် အဓိကသော့ချက် ဖြစ်လာနိုင်တယ်။"

စကားဆုံးသည်နှင့် ချူချန်းရှန်းက ချူယွမ်ဘက်သို့ လှည့်ကြည့်လိုက်သည်။

"မင်း အခု ဧကရာဇ်အဆင့်ကို ရောက်နေပြီ၊ မင်းရဲ့ ခန္ဓာကိုယ် စွမ်းအားကိုလည်း စတင် တတ်မြောက်နေပြီဆိုတာ ငါ ခံစားမိတယ်"

"မင်းအဖေ ပြောပြချက်အရဆိုရင်၊ ထာဝရဘေးဒုက္ခ စွမ်းအားဟာ ကောင်းကင်ဘုံမှာ အဆန်းကြယ်ဆုံး၊ အကြမ်းတမ်းဆုံး ဖြစ်သလို၊ တစ်ချိန်တည်းမှာ အယုတ်မာဆုံးနဲ့ ဖျက်ဆီးအား အကောင်းဆုံး စွမ်းအားပဲ”

"တကယ်လို့ ထျန်းချွဲမြို့တော်သခင်ဟာ ဒီစွမ်းအားနဲ့ အသတ်ခံရမယ်ဆိုရင် သူရဲ့ အနှစ်သာရက ကောင်းကင်တာအိုနဲ့ 

ဆက်ယှက် နေရင်တောင်မှ ပြန်လည်မွေးဖွားဖို့ မဖြစ်နိုင်တော့ဘူး… သူဟာ လုံးဝ ဥဿုံ ပျက်စီးသွားပြီး မီးခိုးတွေ တိမ်တိုက်တွေလို ပျောက်ကွယ်သွားလိမ့်မယ်"

ချူချန်းရှန်းက ဖြည်းဖြည်းချင်း ပြောလိုက်ရာ သူ၏မျက်လုံးများမှာ တောက်ပနေသည်။

"အဲ့ဒီလိုကိုး..." ချူယွမ်က ခေါင်းငြိမ့်လိုက်သည်။

သူသည် "ထာဝရဘေးဒုက္ခ စွမ်းအား" ၏ ကြောက်မက်ဖွယ်ကောင်းမှုကို သဘာဝအတိုင်း သိရှိထားသည်။ 

ထိုစွမ်းအားကြောင့်ပင် "ထာဝရဘေးဒုက္ခ မိစ္ဆာပျက်စီးခြင်းခန္ဓာ" သည် ကောင်းကင်ဘုံ၌ နံပါတ်တစ် မိစ္ဆာခန္ဓာ ဖြစ်လာခဲ့ခြင်းဖြစ်သည်။

၎င်းမှာ မသေမျိုးဧကရာဇ် တစ်ဦးပင်လျှင် သတိထားရသည့် တည်ရှိမှုမျိုး ဖြစ်သည်။

"ဒါပေမဲ့ ဒီစီမံကိန်းကို တကယ် အကောင်အထည်ဖော်ဖို့ကတော့ နှစ်ပေါင်း ရာချီ…ဒါမှမဟုတ် ထောင်ချီ စောင့်ရဦးမှာပါ။"

"ပြင်ဆင်စရာတွေ အများကြီး လိုသေးတယ်။ နောက်ဆုံးတော့ ဒီတိုက်ပွဲက ထိုက်ချန်းလောကရဲ့ မျိုးနွယ်စုအားလုံးနဲ့ အင်အားစုအားလုံးကို သက်ရောက်မှုရှိမှာဖြစ်သလို ပြင်ပက မိစ္ဆာတွေကလည်း အခွင့်ကောင်းယူကြဦးမှာ”

"ဒါကြောင့် လောလောဆယ်တော့ မင်း ကျင့်ကြံမှုကိုပဲ အာရုံစိုက်ပါ…အများကြီး စိတ်မပူနဲ့…ချူမိသားစုက အားလုံးကို ကိုင်တွယ်သွားမှာပါ”

ချူချန်းရှန်းက ချူယွမ်၏ ပခုံးကို ပုတ်ကာ ပြုံးလျက် ပြောလိုက်သည်။

"ကျွန်တော် နားလည်ပါပြီ" ချူယွမ်က ခေါင်းငြိမ့်လိုက်ပြီးမှ တစ်ခုခုကို သတိရသွားကာ ချူချန်းရှန်းကို ထပ်မေးလိုက်သည်။

"ဦးလေးချန်း... လွန်ခဲ့တဲ့ ရက်ပိုင်းအတွင်းမှာ 'ကိုးပေါက် ထူးချွန်ခန္ဓာ'  မွေးဖွားလာတယ်ဆိုတဲ့ သတင်းမျိုး ကြားမိသေးလား"

"ကိုးပေါက် ထူးချွန်ခန္ဓာ… အဲ့ဒါ လျူမိသားစုက နတ်ဘုရားသမီးတော် ပိုင်ဆိုင်တဲ့ ခန္ဓာကိုယ် မဟုတ်ဘူးလား…ငါ မှတ်မိသလောက်ဆိုရင် သူမကို မင်း နေရာတင် သတ်လိုက်ပြီပဲကို... နေဦး"

ချူချန်းရှန်းသည် ၎င်းကို ကြားသောအခါ ခေတ္တမျှ မှင်တက်သွားပြီးမှ တစ်ခုခုကို သတိရသွားသလိုမျိုး သူ၏ နှုတ်ခမ်းထောင့်တွင် နောက်ပြောင်လိုသော အပြုံးတစ်ခု ပေါ်လာသည်။

"ငါ အခုမှ သတိရတယ်…လွန်ခဲ့တဲ့ ရက်ပိုင်းလေးတင် အဲ့ဒီခန္ဓာကိုယ်နဲ့ ပါရမီရှင်တစ်ယောက် တကယ် မွေးဖွားခဲ့တယ်"

"ဒါက ရှေးဟောင်း ဖျက်ဆီးခြင်းမိသားစုတွေထဲက တစ်ခုဖြစ်တဲ့ ရှန်မိသားစု ပဲ။ ဒီမိန်းကလေး မွေးဖွားလာတာကို ဂုဏ်ပြုဖို့ ရှန်မိသားစုက လောကအရပ်ရပ်က အင်အားစုတွေကို အခမ်းအနားတက်ဖို့ ဖိတ်ကြားနေတယ်၊ ငါတို့ ချူမိသားစုလည်း ဖိတ်စာစာရင်းထဲမှာ ပါတယ်"

"ဘာလို့လဲ ယွမ်အာ… မင်းမှာ ဒီ ကိုးပေါက် ထူးချွန် ခန္ဓာနဲ့ ရန်ငြိုးရှိလို့လား"

ချူချန်းရှန်း၏ မျက်လုံးများမှာ တောက်ပနေပြီး အရာအားလုံးကို ထိုးဖောက်မြင်နေသည့်အလား နောက်ပြောင်ကာ မေးလိုက်သည်။

"လျူယွင်ရှီးရဲ့ တကယ့်ဝိညာဉ်က အထက်လောကက မသေမျိုးဘုရင် လင်လုံ  ရဲ့ ဝင်စားခြင်းပဲ။"

"ဒီရှန်မိသားစုက သမီးကတော့ သူမရဲ့ တတိယအကြိမ်မြောက် ဝင်စားခြင်းပဲ။ နောင်တစ်ချိန်မှာ ချူမိသားစုအတွက် ပြဿနာတွေ မဖြစ်လာအောင် သူတို့ကို အမြစ်ပြတ် သုတ်သင်ပစ်ရမယ်"

ချူချန်းရှန်း၏ မေးခွန်းကို ကြားသောအခါ ချူယွမ်၏ မျက်နှာမှာ အလွန်တရာ တည်ငြိမ်နေသည်။ သူသည် ဘာကိုမျှ ဖုံးကွယ်မထားဘဲ တိုက်ရိုက်ပင် ပြောလိုက်သည်။

"မသေမျိုးဘုရင် လင်လုံ ဟုတ်လား ဟားဟားဟား၊ ငါတို့ ချူမိသားစုရဲ့ ယွမ် ဧကရာဇ် ပီသပါပေတယ်။ မသေမျိုးဘုရင်တစ်ယောက်ရဲ့ ဝင်စားခြင်းကိုတောင် သတ်နိုင်ခဲ့တာလား တကယ့်ကို ထူးကဲတဲ့ နည်းလမ်းတွေပဲ၊ အထင်ကြီးစရာကောင်းလိုက်တာ”

သို့သော်လည်း ၎င်းကို ကြားသောအခါ ချူချန်းရှန်းသည် ကောင်းကင်ကို ကြည့်ကာ ရယ်မောလိုက်သည်။

လျူယွင်ရှီးသည် အထက်လောကမှ မသေမျိုးဘုရင်တစ်ဦး၏ ဝင်စားခြင်း ဖြစ်နေလိမ့်မည်ဟု သူ မထင်ထားခဲ့ပေ။ 

သို့သော်လည်း သူမသည် သူ၏တူဖြစ်သူ ချူယွမ်၏ လက်အောက်တွင် လုံးဝဥဿုံ အနှိမ်ခံခဲ့ရပြီး၊ တစ်ဖန် ပြန်လည်မွေးဖွားလာလျှင်ပင်... ကျဆုံးရမည့် ကံကြမ္မာမှ လွတ်မြောက်နိုင်မည် မဟုတ်ပေ…

"ဒါက ရှန်မိသားစုဆီက ဖိတ်စာပဲ…ယွမ်အာ... မင်း အဲ့ဒီမှာ စိတ်ကြိုက် သောင်းကျန်းနိုင်တယ် ဘာပဲဖြစ်ဖြစ် ရှန်မိသားစုဟာ လျူမိသားစုနဲ့ နှစ်ပေါင်းများစွာ နီးကပ်တဲ့ ဆက်ဆံရေး ရှိခဲ့တာဆိုတော့.. အဲ့ဒီပွဲက တကယ်ကို စည်ကားမှာ သေချာတယ်”

ချူချန်းရှန်း၏ အပြုံးမှာ တဖြည်းဖြည်း ပျောက်ကွယ်သွားပြီး သူ၏ အကြည့်များမှာ နက်ရှိုင်းကာ အေးစက်သွားသည်-

"တကယ်လို့ ဒီတစ်ကြိမ်မှာ ရှန်မိသားစုက မင်းရဲ့ ရန်သူဖြစ်ဖို့ပဲ ရွေးချယ်မယ်ဆိုရင်တော့၊ သူတို့ကို အမြစ်ပြတ် ချေမှုန်းပစ်လိုက်တာ ပိုကောင်းမယ်..."

"ကံစီမံရာ အတိုင်းပေါ့”

သူတို့၏ ပေါ့ပေါ့ပါးပါး စကားဝိုင်းထဲတွင်ပင်၊ ရှန်မိသားစု၏ ကံကြမ္မာမှာ ဆုံးဖြတ်ပြီးသား ဖြစ်သွားပုံရပြီး ကြီးမားသော ဘေးဒုက္ခတစ်ခုနှင့် ရင်ဆိုင်ရတော့မည် ဖြစ်သည်။

... အခြားတစ်ဖက်တွင်။ ရှန်မိသားစု၏ ကျင့်ကြံခြင်း လျှို့ဝှက်နယ်မြေအတွင်း၌။

ဘုန်း…အဆင့်တက်လှမ်းခြင်း၏ ကြီးမားသော လှုပ်ခါမှုမှာ ပတ်ဝန်းကျင်ကို တုန်လှုပ်သွားစေပြီး မိုးကြိုးပစ်သံကဲ့သို့ ပေါက်ကွဲထွက်လာသည်!

ရှန်ယောင် သည် ဟင်းလင်းပြင်ထဲသို့ လှမ်းတက်လိုက်သည်။ သူမ၏ ဝတ်ရုံနက်မှာ တဖျတ်ဖျတ် လွင့်နေပြီး သူမ၏ အရှိန်အဝါမှာ ပိုမိုမြင့်မြတ်ကာ မသေမျိုးဆန်လာပုံရသည်။

အထူးသဖြင့် သူမ၏ မျက်လုံးများမှာ နဂါးငွေ့တန်းများ စီးဆင်းနေသကဲ့သို့ မှောင်မိုက်နက်ရှိုင်းနေပြီး၊ အတိုင်းအဆမရှိသော ဆွဲဆောင်မှုများ ရှိနေသည်။

သူမ၏ လှုပ်ရှားမှုတိုင်းတွင် မြင်မရသော ဂုဏ်သရေရှိမှုများ ပျံ့နှံ့နေပုံရသည်။

ယခုအချိန်တွင် သူမသည် နတ်ဘုရားအဆင့်၉ဆင့် သို့ အမှန်တကယ် တက်လှမ်းနိုင်ခဲ့ပြီး နတ်ဘုရားမီးတောက်ကို လုံးဝ ထွန်းညှိနိုင်ခဲ့ပြီ... သာမန်လူသားအဆင့် ၉ဆင့်မှ လွတ်မြောက်လာပြီ ဖြစ်သည်…

"မဆိုးဘူး တစ်လမပြည့်ခင်မှာတင် နတ်ဘုရားမီးတောက် အဆင့် ကို ချိုးဖျက်နိုင်ခဲ့တာပဲ ငါ မင်းကို ပေးထားတဲ့ 'ကောင်းကင်မိစ္ဆာ ဝိညာဉ်ဝါးမျိုခြင်းအတတ်' က တကယ့်ကို ထိရောက်ပုံရတယ်။ သာမန်လူသား ဝိညာဉ်အချို့ကို ဝါးမျိုရုံနဲ့တင် မင်းရဲ့ ကျင့်ကြံမှုက ဒီလောက်အထိ တိုးတက်လာတာကိုး"

မိစ္ဆာအရှင် ဟွမ်းခုန်း  ၏ ထူးဆန်းပြီး အက်ကွဲနေသော အသံမှာ ထွက်ပေါ်လာပြီး ချီးကျူးစကား ဆိုလိုက်သည်။

ကောင်းကင်မိစ္ဆာ ဝိညာဉ်ဝါးမျိုခြင်းအတတ် သည် လုံးဝဥဿုံ မိစ္ဆာလမ်းစဉ် ကျင့်စဉ်တစ်ခု ဖြစ်သည်။ 

၎င်းသည် သန်မာသော သူများ၏ ဝိညာဉ်အနှစ်သာရကို ဝါးမျိုခြင်းဖြင့် ကျင့်ကြံမှုကို သိသိသာသာ တိုးတက်စေပြီး အစွမ်းကိုလည်း ရူးသွပ်မတတ် မြင့်တက်စေနိုင်သည်။

ဒါပေမဲ့ ယင်း၏ ဘေးထွက်ဆိုးကျိုးများမှာလည်း အလွန်တရာ ကြောက်မက်ဖွယ်ကောင်းလှသည်!

အဘယ်ကြောင့်ဆိုသော် ဤနည်းလမ်းမှာ အထက်လောကမှ မိစ္ဆာစစ်စစ်များ ကျင့်ကြံသည့် ကျင့်စဉ်ဖြစ်သောကြောင့် ဖြစ်သည်!

ဝိညာဉ်အနှစ်သာရကို ဝါးမျိုလိုက်သည့် အကြိမ်တိုင်းတွင်၊ မိမိ၏ ဝိညာဉ်ကို ပိုမို ရှုပ်ထွေးလာစေပြီး သွေးရူးသွပ်ခြင်း အခြေအနေသို့ ရောက်ရှိစေနိုင်သည်။

ထိုကဲ့သို့သော ဘေးထွက်ဆိုးကျိုးများမှာ မိစ္ဆာစစ်စစ် တစ်ဦးအတွက် ဘာမှမဟုတ်သော်လည်း။

သာမန် လူသားမျိုးနွယ် ကျင့်ကြံသူတစ်ဦး ကျင့်ကြံမည်ဆိုပါက သေစေနိုင်သည်…

ဝိညာဉ်တစ်ခုကို ဝါးမျိုလိုက်တိုင်း၊ ဝိညာဉ် ဆုတ်ဖြဲခံရသည့် ပြင်းထန်သော နာကျင်မှုကို မလွဲမသွေ ခံစားရမည်ဖြစ်သည်။ 

အချိန်ကြာလာသည်နှင့်အမျှ မိမိကိုယ်ကိုယ် သိစိတ် ပျောက်ကွယ်သွားပြီး ရူးသွပ်နေသော မိစ္ဆာတစ်ကောင် ဖြစ်လာလိမ့်မည်…

ဒါပေမဲ့ လက်ရှိ ရှန်ယောင်အတွက်တော့ ဒီဘေးထွက်ဆိုးကျိုးတွေက ဘာမှမဟုတ်တော့ဘူး…

ချူယွမ်ကို သတ်နိုင်သရွေ့…လူသားမျိုးနွယ် ဆိုတဲ့ အမှတ်သညာကို လုံးဝ စွန့်လွှတ်ပြီး မိစ္ဆာစစ်စစ် တစ်ကောင်အဖြစ် ပြောင်းလဲသွားရမယ် ဆိုရင်တောင်မှ၊ ရှန်ယောင်ဟာ အနည်းငယ်မျှ တွန့်ဆုတ်နေမှာ မဟုတ်တော့ဘူး…