အခန်း (၂၉) - ချူယွမ်၏ စိတ်ပိုင်းဖြတ်မှု၊ ထင်ယောင်ထင်မှား ဟင်းလင်းပြင် မိစ္ဆာအရှင်သခင်...
ဝုန်း...
အတွေးတစ်ချက်ဖြင့် ချူယွမ်၏ ပုံရိပ်မှာ ဤဟင်းလင်းပြင် ကျင့်ကြံခြင်းဂူအတွင်းမှ ချက်ချင်း ထွက်ခွာသွားတော့သည်။
ဟင်းလင်းပြင်နယ်မြေသို့ တစ်ကျော့ပြန် ရောက်ရှိလာခဲ့ပြီ ဖြစ်သည်။
"နတ်ဘုရားသားတော်... ဘာဖြစ်လို့လဲ... ဘာဖြစ်သွားတာလဲ..."
ချူယွမ်၏ နှုတ်ခမ်းထောင့်ရှိ သွေးစများကို မြင်လိုက်ရသောအခါ လျော့အာနှင့် ပိုင်စု မိန်းကလေးနှစ်ဦးမှာ မျက်နှာများ ဖြူလျော်သွားကြပြီး အမြန်ပင် ရှေ့သို့တိုးကာ မေးမြန်းလိုက်ကြသည်။
"ဘာမှမဟုတ်ပါဘူး... ကျင့်ကြံနေရင်းနဲ့ ပြဿနာ အနည်းငယ် ကြုံခဲ့ရုံတင်ပါ..."
ချူယွမ်က ခေါင်းခါပြလိုက်ပြီးနောက် လက်ကောက်ဝတ်ကို လှည့်ကာ ဆေးလုံးတစ်လုံး ထုတ်ယူပြီး ပါးစပ်ထဲ ထည့်လိုက်သည်။
ဤဆေးလုံး၏ အဆင့်မှာ မြင့်မားလှသည်တော့ မဟုတ်ပေ၊ ကွာစီ ဧကရာဇ်အဆင့် ဆေးလုံးမျှသာ ဖြစ်ကာ သေသူကို ပြန်ရှင်စေနိုင်ပြီး အရိုးပေါ်တွင် အသားများ ပြန်လည် ပေါက်စေနိုင်သော အစွမ်းသာ ရှိသည်။:p
ဆေးလုံးကို မျိုချလိုက်ပြီးနောက် ချူယွမ်၏ အမူအရာမှာ သိသိသာသာ ပြန်လည် ကောင်းမွန်လာခဲ့သည်။
ကောင်းကင်ဘုံနိယာမနှင့် ရင်ဆိုင်ရာမှ ရရှိခဲ့သော ဒဏ်ရာများမှာလည်း ၎င်းကြောင့် ရှစ်ဆယ်၊ ကိုးဆယ် ရာခိုင်နှုန်းခန့် ပြန်လည် ကောင်းမွန်သွားခဲ့ပြီ ဖြစ်ကာ အခြေခံအားဖြင့် ဘာမျှ မဖြစ်တော့ပေ။
ယခုမူ သူသည် စစ်မှန်သော ဧကရာဇ်ကြီးတစ်ပါး ဖြစ်လာခဲ့ပြီ ဖြစ်သည်။
စနစ်၏ အချက်အလက်များကို ကြည့်လိုက်သောအခါ ၎င်းမှာလည်း ကြီးမားသော ပြောင်းလဲမှုများကို ကြုံတွေ့ထားရသည်ကို တွေ့ရသည်...
[အိမ်ရှင် - ချူယွမ်]
[ကံကြမ္မာအမှတ် -( အနှုတ်၅၅၀) (ထိုက်ချန်းလောက ကောင်းကင်ဘုံနိယာမ၏ ရန်လိုသော ဖိနှိပ်မှုကြောင့် ချိပ်ပိတ်ခံထားရသည်)]
[ကျင့်စဉ် - ဧကရာဇ် နယ်ပယ် ကနဦးအဆင့် (ဗီလိန်မှတ် ဆယ်သန်း အသုံးပြုပါက အလယ်အလတ်အဆင့်သို့ တိုးမြှင့်နိုင်ပါသည်)]
[ခန္ဓာကိုယ် - ထာဝရကပ်ဘေး မိစ္ဆာခန္ဓာကိုယ် (ချိပ်ပိတ်ထားသော အခြေအနေ၊ ကံကြမ္မာအမှတ် -၅၀၀ သို့ ရောက်ရှိပါက "ထာဝရကပ်ဘေး" ၏ စွမ်းအားကို စတင် ထိန်းချုပ်နိုင်မည် ဖြစ်သည်)၊ ရှေးဟောင်းဧကရာဇ်မျက်လုံး (ကောင်းကင်နှင့် မြေကြီး၏ အထွတ်အထိပ် နတ်ဘုရားမျက်သူငယ်များထဲမှ တစ်ခုဖြစ်ကာ အစဉ်တစိုက် ပြောင်းလဲတိုးတက်နိုင်သည်၊ နောက်ဆုံးတွင် အထွတ်အထိပ် "ဖရိုဖရဲ ဧကရာဇ်မျက်လုံး" အဖြစ်သို့ ကူးပြောင်းနိုင်သည်)]
[ဗီလိန်မှတ် - ၁.၂ သန်း]
[ကျင့်စဉ်ကျမ်းစာ - ကောင်းကင်ဧကရာဇ် သံသရာကျမ်းစာ (မပြည့်စုံသော ဖရိုဖရဲနိယာမ၊ ပထမအဆင့်)]
[နတ်ဘုရားစွမ်းရည် - သုံးဆယ့်သုံးဘုံ ကောင်းကင်ဘုံ ဖန်ဆင်းခြင်း နတ်ဘုရားလက်သီး (မသေမျိုးဘုရင် နိယာမ)၊ သေခြင်းတရားကို ထိန်းချုပ်ခြင်း (နိယာမအခြေခံ မသေမျိုးပညာရပ်)၊ ကပ်ဆိုးမြှုပ်နှံခြင်း ချိပ်ပိတ်တံဆိပ် (စစ်မှန်သော မသေမျိုးနိယာမ)၊ နန်းသုံးကောင်းကင်လက်ဝါး (ဧကရာဇ်အဆင့်)၊ ရှေးဟောင်းဧကရာဇ် ကောင်းကင်လွှမ်းမိုးတံဆိပ် (ဧကရာဇ်အဆင့်)...]
[မှော်လက်နက် - ဖျက်ဆီးခြင်း (မသေမျိုးဘုရင်အဆင့် တာအိုလက်နက် မူလပုံစံ)၊ ဟောက်ဧကရာဇ် လျှို့ဝှက်ကောင်းကင်မျှော်စင် (ဧကရာဇ်လက်နက်)၊ ဘေးဒုက္ခပေါင်းသောင်းခြောက်ထောင် နတ်ဘုရားမျှော်စင် (ဧကရာဇ်လက်နက်)၊ ယင်ယန် ထိုက်ယိဓား (ကွာစီ ဧကရာဇ်လက်နက်)၊ နန်းသုံးနဂါး နက်မှောင်သော ရောင်ခြည်ဝတ်ရုံ (ကွာစီ ဧကရာဇ်လက်နက်)...]
ထိုက်ချန်းလောကရဲ့ ကောင်းကင်ဘုံနိယာမက... ရန်လိုပြီး ဖိနှိပ်ထားတယ် ဟုတ်လား...
ဟဲ...
မင်းလို ကောင်းကင်ဘုံနိယာမက ငါ ချူယွမ်ကို နောင်မှာ ဘယ်လိုများ ဆက်ပြီး ဖိနှိပ်ဦးမလဲဆိုတာ ငါ ကြည့်ရသေးတာပေါ့...
ဤသည်ကို မြင်လိုက်ရသောအခါ ချူယွမ်က စိတ်ထဲမှ လှောင်ပြောင်လိုက်သည်။
ကံကြမ္မာ၏သားတော်များအပေါ် သတ်ဖြတ်လိုသော သူ၏ အာသီသမှာ ပို၍ပင် ပြင်းထန်လာတော့သည်...
သူတို့က ကောင်းကင်ဘုံရဲ့ အချစ်တော်တွေ မဟုတ်လား...
ဒါဆိုရင် ငါက သူတို့အားလုံးကို အမဲလိုက်ပြီး သတ်ဖြတ်ပစ်မယ်၊ ဒီကောင်းကင်ဘုံတာအို ကို နောက်ဆုံးအထိ ဆန့်ကျင်သွားပြီး... နောက်ဆုံးမှာ ဘယ်သူက အသက်ရှင်ပြီး ဘယ်သူက သေမလဲဆိုတာ ကြည့်ကြသေးတာပေါ့...
ချူယွမ်၏ စိတ်ထဲတွင် ဒေါသများ ဝေစီနေစဉ်မှာပင်။
မကောင်းတော့ဘူး... အဲ့ဒါ ချူမိသားစုရဲ့ နတ်ဘုရားသားတော်ပဲ၊ ဒီနေရာကနေ အမြန် ထွက်သွားကြရအောင်…”
သူ၏ နောက်ဘက် မိုင်ပေါင်း တစ်ထောင်ခန့် အကွာမှ ထိတ်လန့်တုန်လှုပ်နေသော အသံအချို့ ထွက်ပေါ်လာရာ၊ ချူယွမ်၏ အာရုံမှာ တစ်ခဏချင်းအတွင်း ပြောင်းလဲသွားတော့သည်...
[တိန်... ကြယ်တစ်ပွင့်အဆင့် ကံကြမ္မာ၏သားတော်ကို ရှာဖွေတွေ့ရှိပါသည်၊ အိမ်ရှင်...]
ဘုန်း…
[တိန်... ကြယ်တစ်ပွင့်အဆင့် ကံကြမ္မာ၏သားတော်ကို သတ်ဖြတ်နိုင်သည့်အတွက် ဂုဏ်ယူပါသည်၊ ဗီလိန်မှတ် တစ်သောင်း ရရှိပါသည်]
ထို့နောက် နောက်တစ်ခဏအတွင်းမှာပင်…
စနစ်၏ အချက်ပေးသံ ဆုံးသည်နှင့် ချူယွမ်မှာ တစ်စက္ကန့်မျှပင် တုံ့ဆိုင်းမနေဘဲ ရှေးဟောင်းဧကရာဇ်မျက်လုံး၏ စွမ်းအားကို ပေါက်ကွဲထွက်စေလိုက်သည်…
မျက်စိတစ်မှိတ်အတွင်းမှာပင် ဤနေရာသို့ အဝေးမှ ကျူးကျော်လာသော ကံကြမ္မာ၏သားတော်ကို သူ တိုက်ရိုက် သုတ်သင်ပစ်လိုက်တော့သည်..
"ဟင့်အင်း... အစ်ကိုရှောင်..."
တစ်ချိန်တည်းမှာပင်။
ထိုက်ချန်းလောကအတွင်းရှိ အရှေ့ဟန်နိုင်ငံဟု အမည်ရသော နိုင်ငံငယ်လေးတစ်ခု၌။
အရှေ့ဟန်နိုင်ငံ၏ အဓိကမိသားစု လေးစုထဲမှ တစ်ခုဖြစ်သော ယွမ်မိသားစုမှ မိန်းကလေးတစ်ဦးသည် ဤမြင်ကွင်းကို မြင်လိုက်ရသောအခါ နှလုံးကြေကွဲဖွယ် ငိုယိုလိုက်ပြီး သူမ၏ မျက်လုံးများမှာလည်း မျှော်လင့်ချက်ကင်းမဲ့မှုများဖြင့် ပြည့်နှက်သွားတော့သည်…
ယွမ်ရှောင် ...
သူသည် တစ်ချိန်က ယွမ်မိသားစု၏ အမှိုက်သရိုက် သခင်လေးအဖြစ် သုံးနှစ်တိုင်အောင် လူတိုင်း၏ လှောင်ပြောင်ခြင်းကို ခံခဲ့ရသူ ဖြစ်သည်...
နောက်ပိုင်းတွင်မူ အရှိန်အဟုန်ဖြင့် တိုးတက်လာခဲ့ပြီး အင်ပါယာပေါင်း တစ်ရာ တိုက်ပွဲကို ဖြတ်ကျော်ကာ နဂါးပုန်းအစည်းအဝေးသို့ပင် ဝင်ရောက်နိုင်ခဲ့သော လူငယ်လေး ဖြစ်သည်...
ယခုမူ သူသည် ကောင်းကင်ယံထက်မှ စစ်မှန်သော နဂါးတစ်ကောင်အလား ရှိသည့် ဤချူမိသားစု နတ်ဘုရားသားတော်၏ လက်ထဲတွင် မည်သည့် အကြောင်းပြချက်မျှမရှိ၊ တုံ့ဆိုင်းမှုမျှမရှိဘဲ စိတ်ကြိုက် သတ်ဖြတ်ခြင်းကို ခံလိုက်ရချေပြီ...
"သခင်မလေး..."
ထိုမိန်းကလေးမှာ မြေပြင်ပေါ်တွင် ဒူးထောက်ကာ ငိုယိုနေစဉ်၊ သူမ၏ နောက်ဘက်ရှိ ဟင်းလင်းပြင်ကြီး လိမ်ရှုံ့သွားပြီး ဝတ်ရုံနက်နှင့် ပုံရိပ်တစ်ခု ရုတ်တရက် ပေါ်လာသည်။
အလင်းမျက်နှာပြင်ပေါ်ရှိ မြင်ကွင်းကို မြင်လိုက်ရသောအခါ၊ သူသည် ရှေးဟောင်း လေဟာနယ်မိသားစု မှ ကျွမ်းကျင်သူတစ်ဦး ဖြစ်နေလင့်ကစား၊ ဤအချိန်တွင်မူ အားကိုးရာမဲ့မှုနှင့် ထိတ်လန့်မှုတို့ကိုသာ ခံစားနေရတော့သည်။
ထိုမိန်းကလေး၏ အမည်မှာ ရှန်ယောင် ဖြစ်ကာ သူမမှာ အပေါ်ယံအားဖြင့် ယွမ်မိသားစု၏ မွေးစားသမီး ဖြစ်နေလင့်ကစား။
အမှန်တကယ်တွင်မူ သူမမှာ ထိုက်ချန်းလောက၏ ရှေးဟောင်း လေဟာနယ်မိသားစုကြီးများထဲမှ တစ်ခုဖြစ်သော ရှန်မိသားစု၏ တိုက်ရိုက်သွေးနှော အနွယ်ဝင်တစ်ဦး ဖြစ်သည်...
နှစ်ပေါင်းများစွာတိုင်အောင် ရှန်ယောင်သည် ယွမ်ရှောင်အပေါ် အစဉ်အမြဲ သစ္စာရှိခဲ့ပြီး သူ့ကို တိတ်တဆိတ် အကြိမ်ကြိမ် ကူညီပေးခဲ့ရာ၊ သူတို့နှစ်ဦးမှာ ချစ်သူများပင် ဖြစ်ကြသည်။
ရှန်ယောင်၏ ဖခင်ဖြစ်သူ ကွာစီ ဧကရာဇ် နယ်ပယ်မှ ကောင်းကင်ထိအောင် ကျော်ကြားသည့် ကျွမ်းကျင်သူကြီးပင်လျှင် ဤလက်ထပ်မှုကို ဝေဝါးစွာ ခွင့်ပြုပေးထားခဲ့သည်...
ဒါပေမဲ့ ဒီနေ့မှာတော့...
ယွမ်ရှောင် ကျဆုံးသွားခြင်းနှင့်အတူ အရာအားလုံးမှာ အချည်းနှီး ဖြစ်သွားခဲ့ရချေပြီ...
"ဦးလေးချန်... ကျွန်မ ဒီလူကို သေစေချင်တယ်... သူ့ကို အစ်ကိုရှောင်နဲ့အတူ မြှုပ်နှံပစ်ချင်တယ်... သူ့ကို သေတာထက် ပိုဆိုးတဲ့ ကံကြမ္မာမျိုး ကြုံတွေ့စေချင်တယ်..."
ရှန်ယောင်မှာ ဝမ်းနည်းကြေကွဲမှုနှင့် နာကျည်းမှုများဖြင့် ပြည့်နှက်နေပြီး၊ သူမ၏ လှပသော မျက်ဝန်းများတွင် မျက်ရည်များ ဝေစီလျက် ချူယွမ်၏ ကျောပြင်ကို လက်ညှိုးထိုးကာ ဟိန်းဟောက်လိုက်သည်။
"ဒါက..."
ဤသည်ကို မြင်လိုက်ရသောအခါ ဝတ်ရုံနက်နှင့် ပုံရိပ်မှာ မျက်မှောင်ကြုတ်သွားပြီး နောက်ဆုံးတွင် အားကိုးရာမဲ့စွာ ခေါင်းခါပြလိုက်ရုံသာ တတ်နိုင်တော့သည်။
"သခင်မလေး... အဲ့ဒါ မဖြစ်နိုင်ဘူး..."
"အဲ့ဒီလူရဲ့ ကိုယ်ပိုင်လက္ခဏာက ရှေးဟောင်းမသေမျိုးမိသားစု ချူမိသားစုရဲ့ နတ်ဘုရားသားတော်လေ..."
"ချူမိသားစုရဲ့ အဆင့်အတန်းနဲ့ ငါတို့ ရှန်မိသားစုရဲ့ အဆင့်အတန်းက တစ်တန်းတည်း မဟုတ်ဘူး။ ချူမိသားစုရဲ့ နတ်ဘုရားသားတော်ကို သတ်ဖို့ မပြောနဲ့၊ သာမန် ချူမိသားစု တပည့်တွေကိုတောင်... ငါတို့ ရှန်မိသားစုက ရန်စနိုင်မယ် မထင်ဘူး..."
ဝတ်ရုံနက်နှင့် လူက ဖြည်းဖြည်းချင်း ပြောလိုက်ရာ၊ သူ၏ စကားလုံးများမှာ ပြောထွက်ရန် အလွန်ပင် ခက်ခဲနေပုံရသည်။
ရှေးဟောင်းမသေမျိုးမိသားစုနှင့် ရှေးဟောင်းလူ လေဟာနယ်မိသားစု။
အပေါ်ယံအားဖြင့် နာမည်ချင်း ဆင်တူနေသော်လည်း၊ ထိုနှစ်ခုကြားရှိ ကွာဟချက်မှာ ကောင်းကင်နှင့် ချောက်နက်ကြီးအလား ကျယ်ပြောလှပြီး လုံးဝ နှိုင်းယှဉ်၍ မရနိုင်ပေ…
လက်ရှိတွင် ရှန်မိသားစု၌ အစွမ်းထက်ဆုံး တည်ရှိမှုမှာ သက်တမ်း အနည်းငယ်သာ ကျန်တော့သည့် ဧကရာဇ်ဟောင်းကြီး တစ်ဦးသာ ဖြစ်သည်။
သူသည် ဧကရာဇ်တစ်ပါး ဖြစ်သော်လည်း သူ၏ သက်တမ်းမှာ အလွန်ဆုံးရှိလှ နှစ်တစ်ရာထက် မပိုတော့ပေ။
တခြားတစ်ဖက်မှာရှိတဲ့ ချူမိသားစုကတော့...
သူတို့ဆီမှာ ဧကရာဇ် အဆင့် ကျွမ်းကျင်သူတွေ ငါးယောက်ထက်မနည်း ရှိတယ်လို့ ကောလာဟလတွေ ထွက်နေတယ်။ မနေ့တုန်းက မျက်လုံးသုံးလုံးမျိုးနွယ်စု သူတို့နယ်မြေထဲကို ကျူးကျော်လာတုန်းကတောင်၊ ချူမိသားစုရဲ့ လျှို့ဝှက်ဆန်းပြားတဲ့ ကျွမ်းကျင်သူတစ်ယောက်က သူတို့ကို အတင်းအကျပ် ပြန်မောင်းထုတ်ခဲ့တာလေ...
တိ မိသားစုရဲ့ ထာဝရနယ်ပယ် ခြေတစ်လှမ်းအလို ဘိုးဘေးကြီးတောင် ခေါင်းတစ်ခြမ်း ပြတ်ထွက်သွားပြီး နေရာတင် သေလုနီးပါး ဖြစ်ခဲ့ရတာ...
ဒါက ချူမိသားစုရဲ့ စွမ်းအားကို ပြနေတာပဲ...
အကယ်၍ ရှန်မိသားစုကသာ သူတို့ကို ဆန့်ကျင်ချင်တယ်ဆိုရင်၊ ဒါဟာ ကျောက်တုံးကို ကြက်ဥနဲ့ ထုသလိုမျိုးပဲ ဖြစ်မှာဖြစ်ပြီး ကိုယ့်သေတွင်းကိုယ် တူးတာနဲ့ ဘာမှ မထူးပါဘူး...
"သခင်မလေး... သခင်လေး ယွမ်ရှောင်လည်း သေဆုံးသွားပြီဆိုတော့ ကျွန်တော်နဲ့အတူ ရှန်မိသားစုဆီ ပြန်ကြရအောင်…ဒီအရှေ့ဟန်နိုင်ငံလေးမှာ ဆက်နေနေလည်း ဘာအဓိပ္ပာယ်မှ ရှိတော့မှာ မဟုတ်ဘူး..."
အချိန်အတော်ကြာ တိတ်ဆိတ်သွားပြီးနောက် ဝတ်ရုံနက်နှင့် လူက သူမကို အကြံပေးလိုက်သည်။
"ကောင်းပြီလေ"
သို့သော်လည်း သူ စကားမဆုံးခင်မှာပင် ရှန်ယောင်မှာ ခေါင်းကို အလေးအနက် ညိတ်ပြလိုက်ပြီး သူမ၏ မျက်ရည်များကို သုတ်လိုက်သည်၊ သူမ၏ အကြည့်မှာလည်း ထူးထူးခြားခြား ပြတ်သားလာတော့သည်...
သူမသည် မိသားစုထံ ပြန်သွားပြီး အပြင်းအထန် ကျင့်ကြံပေလိမ့်မည်၊ နောက်တစ်ချိန်တွင်မူ...
သူမသည် ထိုမြင့်မြတ်လှသော ချူမိသားစု နတ်ဘုရားသားတော်ကို သတ်ဖြတ်ပေလိမ့်မည်...
ပြီးတော့ အစ်ကိုရှောင်အတွက် ကတ္တရာစေးနဲ့ လျော်ပေလိမ့်မည်…(ကလဲ့စားချေတယ်သာမှတ်)
တစ်ချိန်တည်းမှာပင် ရှန်ယောင်သည် သူမ၏ ခန္ဓာကိုယ်အတွင်းရှိ တည်ရှိမှုတစ်ခုခုကို ပြောနေသည့်အလား စိတ်ထဲမှ တိုးတိုးလေး ပြောလိုက်သည် -
"မိစ္ဆာအရှင်သခင် ဟွမ်းခုန်း ... ရှင် ကျွန်မကို စွမ်းအားတွေ ပေးနိုင်မယ်ဆိုရင် ရှင့်ရဲ့ ကမ်းလှမ်းချက်အားလုံးကို ကျွန်မ သဘောတူတယ်။ ရှင့်ကို ဘာမဆို ပေးနိုင်တယ်၊ ကျွန်မရဲ့ အသက်... ကျွန်မရဲ့ ဝိညာဉ်ကိုတောင် ပေးနိုင်တယ်..."
"ဂျီး ဂျီး..."
မကြာမီမှာပင် လူသားတစ်ယောက်ဆီက ထွက်ပေါ်လာနိုင်သည့် အသံမျိုး မဟုတ်သော ထူးဆန်းပြီး ရှတတ ရယ်သံတစ်ခု သူမ၏ စိတ်ထဲတွင် ပဲ့တင်ထပ်လာသည်။
"စိတ်ချပါ... ဒီမိစ္ဆာအရှင်သခင်က မင်းကို စစ်မှန်တဲ့ စွမ်းအားတွေ ပေးမှာပါ..."
"အဲ့ဒီ ချူမိသားစု နတ်ဘုရားသားတော်ဆိုတာကလည်း နောက်ဆုံးတော့ သာမန်လူသား တစ်ယောက်ပါပဲ… သူက ဒီမိစ္ဆာအရှင်သခင်နဲ့ ဘယ်လိုလုပ် ယှဉ်နိုင်မှာလဲ..."
"ပေးဆပ်ရမယ့် တန်ဖိုးအတွက်ကတော့၊ နောင်တစ်ချိန်မှာ မင်းကိုယ်တိုင်နဲ့ သက်ရှိပေါင်း ကုဋေတစ်သန်းရဲ့ သွေးတွေကို ယဇ်ပူဇော်ပေးဖို့ပဲ လိုတယ် ဒီမိစ္ဆာအရှင်သခင် အပြည့်အဝ ပြန်လည် နိုးထလာဖို့အတွက် အဲ့ဒါက အတိအကျပဲ... ဂျီး ဂျီး..."
"မင်း... သဘောတူရဲ့လား..."
"သက်ရှိပေါင်း ကုဋေတစ်သန်းလား... ကျွန်မ... ကျွန်မ သဘောတူတယ်"
မိစ္ဆာအရှင်သခင် ဟွမ်းခုန်း၏ ပါးစပ်မှ ထိတ်လန့်စရာ စကားလုံးများ ထွက်ပေါ်လာသော်လည်း… ရှန်ယောင်မှာ ခဏမျှသာ တုံ့ဆိုင်းသွားပြီး တိုက်ရိုက် သဘောတူလိုက်တော့သည်…
သူမကိုယ်တိုင်ရဲ့ အသက်နဲ့ သက်ရှိပေါင်း ကုဋေတစ်သန်းကို တန်ဖိုးအဖြစ် ပေးဆပ်ရမယ်ဆိုရင်တောင် ဘာဖြစ်လဲ...
အဲ့ဒီ ချူယွမ်ကို သတ်နိုင်မယ်ဆိုရင်ပဲ...
သာမန် သက်ရှိ ကုဋေတစ်သန်း မပြောနဲ့၊ ပိုပြီး ပေးဆပ်ရမယ်ဆိုရင်တောင်၊ တစ်မိသားစုလုံးကို ယဇ်ပူဇော်ရမယ်ဆိုရင်တောင်... သူမ တုံ့ဆိုင်းနေမှာ မဟုတ်ဘူး...
"ဂျီး ဂျီး... ကတိကဝတ် ပြုပြီးပြီ..."
"စိတ်မပူပါနဲ့... ဒီမိစ္ဆာအရှင်သခင်က ဘယ်လိုပုဂ္ဂိုလ်မျိုးလဲ... အတိတ်တုန်းက ငါဟာ အထက်လောကက မသေမျိုးတွေကိုတောင် သွေးကျအောင် လုပ်ခဲ့တဲ့ တည်ရှိမှုမျိုးလေ..."
"နောက် သုံးနှစ်မပြည့်ခင်မှာတင် အဲ့ဒီ ချူယွမ်ဟာ မင်းရဲ့ လက်နဲ့ပဲ အသတ်ခံရမှာ သေချာတယ် အဲ့ဒီအချိန်ကျရင် ဒီမိစ္ဆာအရှင်သခင်လည်း လောကထဲကို တစ်ကျော့ပြန် ဆင်းသက်လာပြီး၊ ဒီထိုက်ချန်းလောကရဲ့ သက်ရှိအားလုံးကို ဝါးမျိုပစ်မယ်... ဂျီး ဂျီး"
ရှန်ယောင်၏ စိတ်ထဲတွင် ထူးဆန်းသော အသံမှာ ဆက်လက် ပဲ့တင်ထပ်နေဆဲပင်။
သူမ၏ ဘေးရှိ ရှန်မိသားစု ကျွမ်းကျင်သူပင်လျှင် ဘာမျှ မသိရှိဘဲ၊ ရိုသေသော ပုံစံဖြင့် သူမကို ဆက်လက် စောင့်ရှောက်ပေးနေဆဲ ဖြစ်သည်။
မည်သူမျှ မသိလိုက်ဘဲ၊ ရှန်မိသားစု တစ်ခုလုံးမှာ ရှန်ယောင်ကြောင့် ချောက်နက်ကြီးထဲသို့ ဆွဲချခြင်း ခံလိုက်ရပြီ ဖြစ်ကာ ထာဝရ ပျက်စီးခြင်းသို့ ဦးတည်သွားချေပြီ…