အခန်း (၂၀) - လောကကို ဖျက်ဆီးမည့် လက်ဝါးချက်ဖြင့် ချင်အန်းကို သတ်ဖြတ်ခြင်း
သို့သော် ကံမကောင်းစွာဖြင့် ချင်အန်း၏ လက်ထဲရှိ "ယန်မိုနန်းတော် ဆယ်ခု" မှာ ဧကရာဇ်လက်နက်၏ ပုံရိပ်ယောင်မျှသာ ဖြစ်နေသည်။
၎င်းသည် ကွယ်လွန်သွားပြီဖြစ်သော ဧကရာဇ်များကို ဆင့်ခေါ်နိုင်သည်ဆိုဦးတော့၊ သူတို့၏ စွမ်းအားမှာ အထွတ်အထိပ် အခြေအနေနှင့် အလွန်ဝေးကွာလှပြီး သိသိသာသာ အားနည်းနေပေလိမ့်မည်။
သို့သော်ငြားလည်း ဤမျှနှင့်ပင် ဟင်းလင်းပြင်နယ်မြေအတွင်းရှိ မရေမတွက်နိုင်သော ပါရမီရှင်များကို ရှင်းလင်းပစ်ရန် လုံလောက်လှပေသည်။
“ယန်မိုနန်းတော် ဆယ်ခု... ပွင့်စမ်း”
ချင်အန်း၏ မျက်နှာမှာ ကြောက်မက်ဖွယ်ကောင်းအောင် ပုံပျက်ရှုံ့တွသွားပြီး မိစ္ဆာတစ်ကောင်အလား အော်ဟစ်လိုက်သည်။
မျက်စိတစ်မှိတ်အတွင်းမှာပင်။
သူ၏လက်ထဲရှိ နက်မှောင်သော ရတနာနန်းတော်မှာ ချက်ချင်း မြင့်တက်သွားပြီး ဟင်းလင်းပြင်ကြီး အက်ကွဲသွားသည်နှင့်အမျှ စစ်မှန်သော ငရဲပြည်၏ နန်းတော်ကြီးတစ်ခုအဖြစ် ပြောင်းလဲသွားတော့သည်။
၎င်းသည် ကိုးထပ်သော ငရဲပြည်နှင့် ဆက်သွယ်ထားပုံရပြီး အဆုံးမရှိ ကြောက်မက်ဖွယ်ကောင်းသော အရှိန်အဝါများကို ထုတ်လွှတ်နေသည်။
ခရက်ရှ်….
ယန်မိုနန်းတော် ဆယ်ခုသည် ဟင်းလင်းပြင်၌ ဝဲပျံနေပြီး ကုဋေကုဋာမကသော အနက်ရောင် အလင်းတန်းများကို ဖြာထွက်စေကာ ချင်အန်းကို အလယ်တွင် ရစ်ပတ်ကာကွယ်ထားသည်။
တစ်ခဏချင်းမှာပင် ပြင်းထန်စွာ ဒဏ်ရာရထားသော ချင်အန်း၏ ခန္ဓာကိုယ်မှာ သိသိသာသာပင် လျင်မြန်စွာ ပြန်လည်ကောင်းမွန်လာတော့သည်။
ကျွီ….
ထို့နောက် နန်းတော်ကြီး၏ တံခါးမကြီးများ ပွင့်ဟသွားသည်နှင့်...
သေခြင်းတရား အရှိန်အဝါများ စွန်းထင်နေပြီး ဖြူဖတ်ကာ တောင့်တင်းနေသော၊ မည်သည့်အမူအရာမျှ မရှိသည့် ကြောက်မက်ဖွယ် ပုံရိပ်ကြီးများ တစ်ဦးပြီးတစ်ဦး ဖြည်းညှင်းစွာ ထွက်လာကြတော့သည်။
“ယန်မိုနန်းတော် ဆယ်ခု”
“ယန်မိုနန်းတော်ရဲ့ အမွေအနှစ် ဧကရာဇ်လက်နက်ကို လှုံ့ဆော်လိုက်ပြီပဲ ဒီချင်အန်းက ဟင်းလင်းပြင်နယ်မြေထဲမှာ ရှိနေတာတောင် ဧကရာဇ်လက်နက်ရဲ့ ဝိညာဉ်ဆီက အသိအမှတ်ပြုမှု ရထားတာပဲ သူက ပုံရိပ်ယောင်စွမ်းအားကို သုံးနိုင်နေပြီ”
“ဧကရာဇ်လက်နက်ရဲ့ စွမ်းအားရှေ့မှာ ချူမိသားစု နတ်ဘုရားသားတော် ဘယ်လိုတုံ့ပြန်မလဲ… အဲ့ဒီ ကွယ်လွန်သူ ဧကရာဇ်တွေက သူတို့ရဲ့ စစ်မှန်တဲ့ စွမ်းအားကို မထုတ်နိုင်ဘူးဆိုပေမဲ့ အနည်းဆုံးတော့ မဟာသူတော်စင် ဒါမှမဟုတ် သူတော်စင်ဘုရင် အဆင့်လောက် ရှိမှာပဲ”
အပြင်လောကတွင် လူအုပ်ကြီးမှာ မပြတ်တမ်း အာမေဍိတ်သံများ ထွက်ပေါ်နေသည်။
ကျင့်ကြံသူများစွာမှာ ဧကရာဇ်လက်နက်၏ စစ်မှန်သော အရှိန်အဝါကို ပထမဆုံးအကြိမ် မြင်ဖူးခြင်းဖြစ်ရာ လူတိုင်း အလွန်အမင်း ထိတ်လန့်နေကြသည်။
“ဟားဟား… ချူယွမ်... မင်းမှာ ဝှက်ထားတဲ့ စွမ်းအားတွေ အများကြီး ရှိဦးမယ်ဆိုတာ ငါသိပါတယ်… ကျင့်စဉ်သက်သက်နဲ့ဆိုရင် ငါ ချင်အန်းက မင်းကို ယှဉ်နိုင်မှာ မဟုတ်ဘူး”
“ဒါပေမဲ့...”
“အခုတော့ ယန်မိုနန်းတော် ဆယ်ခုလည်း ပွင့်သွာပြီ…ကွယ်လွန်သူ ဧကရာဇ် သုံးပါးလည်း အတူတူ ပေါ်လာပြီ မင်း ဘယ်လို ခုခံမလဲ”
ယန်မိုနန်းတော် ဆယ်ခု ပွင့်သွားပြီ…
ချင်အန်း၏ မျက်နှာတွင် စိတ်လှုပ်ရှားမှုနှင့် ရက်စက်သော အပြုံးများ ပြည့်နှက်နေသည်။
ဤဧကရာဇ်လက်နက်အတွင်း၌ ဧကရာဇ် သုံးပါး၏ ဝိညာဉ်များကို ချိပ်ပိတ်ထားခြင်း ဖြစ်သည်။
ရှေးဟောင်း မိကျောင်းမျိုးနွယ် ဧကရာဇ် - ဝိညာဉ်ဖြတ် ဧကရာဇ်…
မျက်လုံးသုံးလုံးမျိုးနွယ် ဧကရာဇ် …
ပြီးတော့ သုံးဦးထဲမှာ အစွမ်းထက်ဆုံးဖြစ်တဲ့ နဂါးမျိုးနွယ် ဧကရာဇ်ဝိညာဉ် … ကောင်းကင်ဖြဲ ဧကရာဇ်…
ကွယ်လွန်သူ ဧကရာဇ် သုံးပါးသည် ဟင်းလင်းပြင်၌ အတူတကွ ပေါ်လာကြသည်။
သူတို့မှာ လူသားမျိုးနွယ် မဟုတ်သော်လည်း ယခုအခါတွင် လူသားပုံစံ ဖမ်းထားကြပြီး သေခြင်းတရား အရှိန်အဝါများ ဖုံးလွှမ်းလျက် အလောင်းကောင်များအလား ဖြစ်နေသည်။
အထူးသဖြင့် ခေါင်းဆောင်ဖြစ်သော ကောင်းကင်ဖြဲ ဧကရာဇ်မှာ လူသားပုံစံနှင့်ပင် ခန္ဓာကိုယ်မှာ ဧရာမကြီးသဖွယ် ဖြစ်နေပြီး၊ သူ၏ကိုယ်တွင်းမှ စစ်မှန်သော နဂါးတစ်ကောင်၏ ဟိန်းဟောက်သံကို ခပ်တိုးတိုး ကြားနေရကာ ကြောက်မက်ဖွယ်ကောင်းသော အရှိန်အဝါကို ထုတ်လွှတ်နေသည်။
“သတ်ဖြတ်မယ်… ဖျက်ဆီးမယ်…သိမ်းပိုက်မယ်”
ကောင်းကင်ဖြဲ ဧကရာဇ်၏ မျက်လုံးများမှာ အေးစက်စူးရှစွာဖြင့် ပတ်ဝန်းကျင်ကို ဝေ့ကြည့်လိုက်ပြီးနောက် နောက်ဆုံးတွင် ချူယွမ်ထံ၌ ရပ်တန့်သွားသည်။
ကျန်သည့် ဧကရာဇ် နှစ်ပါးသည်လည်း ထို့အတူပင် သူတို့၏ အကြည့်များမှာ သွေးဆာနေသောအရှိန်အဝါဖြင့် ချူယွမ်ကို စိုက်ကြည့်နေကြသည်။
လွန်ခဲ့သော နှစ်သန်းပေါင်းများစွာက သူတို့အားလုံးမှာ ယန်မိုနန်းတော်၏ ယခင်နန်းတော်သခင်၏ လက်ချက်ဖြင့် ကျဆုံးခဲ့ရခြင်း ဖြစ်သည်။
ကျဆုံးပြီးနောက်တွင်ပင် သူတို့၏ ဝိညာဉ်များမှာ ဤဧကရာဇ်လက်နက်အတွင်း၌ အချိန်အတော်ကြာ ချုပ်နှောင်ခံခဲ့ရသည်။
အချိန်ကြာလာသည်နှင့်အမျှ သူတို့မှာ သတ်ဖြတ်လိုသည့် အသိစိတ်တစ်ခုတည်းသာရှိသော ရုပ်သေးရုပ်များအဖြစ် ပြောင်းလဲသွားခဲ့ကြပြီ ဖြစ်သည်။
“ဟဲဟဲ ဒီသားရဲငယ်လေးတော့ သွားပြီပဲ”
ယန်မိုနန်းတော်သခင်၏ နှုတ်ခမ်းထောင့်တွင် ယုတ်မာသော အပြုံးတစ်ခု ပေါ်လာသည်။
ဤကွယ်လွန်သူ ဧကရာဇ် သုံးပါးမှာ ဧကရာဇ်နယ်ပယ် အလယ်အလတ်အဆင့်ခန့်အထိ စွမ်းအားကို ထုတ်ပြနိုင်သည်။
ပုံရိပ်ယောင် အခြေအနေတွင် အလွန်အားနည်းသွားသည်ဆိုသော်လည်း သူတော်စင်ကြီး အထွတ်အထိပ် အဆင့်တွင် ရှိနေဆဲဖြစ်ကာ သူတော်စင်ဘုရင် အဆင့်သို့ပင် နီးစပ်နေသည်။
သူ၏ အမြင်တွင် ချူယွမ်၏ ကျင့်စဉ်မှာ အလွန်ဆုံးရှိလှ မဟာသူတော်စင် နယ်ပယ်သာ ဖြစ်လိမ့်မည်…
မသေနိုင်သော…မပျက်စီးနိုင်သော၊ အဆုံးမဲ့စွမ်းအားရှိသော ဤကွယ်လွန်သူ ဧကရာဇ် သုံးပါးကို သူ မည်သို့ ယှဉ်နိုင်ပါမည်နည်း။
နောက်ဆုံးတွင်တော့ ကျောက်ခဲကို ကြက်ဥနှင့် ပေါက်သလို၊ ပုရစ်က ရထားလုံးကို တားသလိုသာ ဖြစ်ပေလိမ့်မည်…
“ဒါက ဧကရာဇ်လက်နက် ယန်မိုနန်းတော် ဆယ်ခု ပေါ့လေ”
အဝေးတစ်နေရာတွင် ချူယွမ်၏ မျက်နှာထက်၌ ရှားရှားပါးပါး လေးနက်သော အမူအရာတစ်ခု ပေါ်လာသည်။
သို့သော် မကြာမီ ထိုလေးနက်မှုမှာ ပျောက်ကွယ်သွားပြီး အေးစက်တည်ငြိမ်သော အမူအရာနှင့် အစားထိုးလိုက်သည်။
၎င်းတို့မှာ စစ်မှန်သော ဧကရာဇ်ကြီးများ၏ ဝိညာဉ်များ ဖြစ်နေသည်မှာ မှန်ပါသည်။ သို့သော် ယခုအခါ…
သူတို့၏ စွမ်းအားမှာ အလွန်တရာ အားနည်းလွန်းလှသည်။
သူတို့မှာ သူတော်စင်ဘုရင် အဆင့်ကိုပင် မမှီနိုင်ကြချေ။
လင်ရွှီးသန့်စင်ရာနယ်မြေမှ သူတော်စင်ဘုရင်နှင့် ယှဉ်လျှင်ပင် အဆပေါင်း တစ်ထောင်ခန့် ကွာဟနေသေးရာ ချူယွမ်ကို အခက်တွေ့စေရန် လုံးဝ မထိုက်တန်ကြပေ။
“ဒီပြဇာတ်ကို အဆုံးသတ်ရမယ့် အချိန်ရောက်ပြီ”
ချူယွမ်က အသာအယာ ခေါင်းခါလိုက်ပြီးနောက် လက်ကို မြှောက်လိုက်သည်နှင့် တစ်ပြိုင်နက် အဆုံးမရှိသော စွမ်းအားများမှာ သူနှင့်အတူ စုစည်းလာတော့သည်။
ဘုန်း….
ကောင်းကင်ယံထက်တွင်…
ကောင်းကင်တစ်ခုလုံးကို ဖုံးလွှမ်းနိုင်သည့် ကြောက်မက်ဖွယ် ဧရာမ လက်ဝါးကြီးတစ်ခု ပေါ်လာပြီး ကောင်းကင်နှင့် မြေကြီးကို လွှမ်းမိုးသွားသည်။
ထိုလက်ဝါးမှ ထွက်ပေါ်လာသော အရှိန်အဝါတစ်ခုတည်းနှင့်ပင် ကောင်းကင်အမိုးအကာကို ချေဖျက်ပစ်တော့မည့်အလား ဖြစ်နေသည်။
ဧကရာဇ်ကျင့်စဉ် - ရှေးဟောင်းဧကရာဇ် ကောင်းကင်ဖုံးလွှမ်းတံဆိပ်…
၎င်းမှာ အထက်လောကသို့ တက်လှမ်းသွားပြီဖြစ်သော ချူမိသားစု ဘိုးဘေးတစ်ဦးထံမှ ဆင်းသက်လာခြင်း ဖြစ်ပြီး ချူမိသားစု၏ အထွတ်အထိပ် ဧကရာဇ်ကျင့်စဉ်များထဲမှ တစ်ခုပင် ဖြစ်သည်။
ဒဏ္ဍာရီအရ အထွတ်အထိပ်သို့ ရောက်အောင် သုံးနိုင်ပါက စစ်မှန်သော မသေမျိုး ကိုပင် မြှုပ်နှံနိုင်သည်ဟု ဆိုကြသည်။
“ဟမ်”
ရုတ်တရက် ပြောင်းလဲသွားသော အခြေအနေကြောင့် ကြည့်ရှုသူအားလုံး ဆွံ့အသွားကြသည်။
နောက်တစ်ခဏတွင်မူ ထိုဧရာမ လက်ဝါးကြီးမှာ အောက်သို့ ရိုက်ချလိုက်သည်ကို သူတို့ အထင်အသား မြင်လိုက်ရသည်။
ဘုန်း……….
ကမ္ဘာကြီးကို တုန်ခါစေမည့် ဟိန်းဟောက်သံကြီးနှင့်အတူ….
ထိုကွယ်လွန်သူ ဧကရာဇ် သုံးပါးသာမက၊ ယန်မိုနန်းတော် ဆယ်ခု၏ ပုံရိပ်ယောင် တစ်ခုလုံးပင်... လက်ဝါးတစ်ချက်တည်းနှင့် ဘာမျှမကျန်အောင် ချေမှုန်းခံလိုက်ရပြီး အစအနပင် မကျန်တော့ပေ….
[တိန်…ကြယ်သုံးပွင့် ကံကြမ္မာ၏သားတော်ကို အနိုင်ယူနိုင်သည့်အတွက် ဂုဏ်ယူပါသည်၊ ဗီလိန်မှတ် ၁၀၀,၀၀၀ ရရှိပါသည်]
[တိန်… ကံကြမ္မာ၏သားတော် 'ချင်အန်း' ၏ ကံကြမ္မာရောင်ဝါ အာနိသင်ကို စစ်ဆေးတွေ့ရှိရပါသည် ၎င်းမှာ 'သေခြင်းဆယ်ပါးမှ လွတ်မြောက်ခြင်း' ဖြစ်သည် သေလုမျောပါး အန္တရာယ်နှင့် ရင်ဆိုင်ရချိန်တွင် အလိုအလျောက် ပွင့်လာမည်ဖြစ်ကာ သေခြင်းတရားကို တစ်ကြိမ်တိုက်ရိုက် ပယ်ဖျက်နိုင်မည် ဖြစ်သည်]
ထိုလက်ဝါးတစ်ချက်အောက်တွင် ကမ္ဘာကြီးမှာ ပျက်စီးလုနီးပါး ဖြစ်သွားရသည်။
ချူယွမ်မှာ လက်နှစ်ဖက်ကို နောက်ပစ်ကာ ဟင်းလင်းပြင်၌ အေးဆေးစွာ ရပ်နေဆဲပင်။ ဤအချိန်တွင် စနစ်၏ အသံမှာလည်း ထွက်ပေါ်လာသည်။
ချင်အန်းကို အနိုင်ယူရုံနှင့်ပင် ဗီလိန်မှတ် တစ်သိန်းတိတိ ရရှိခဲ့သည်။
ထို့အပြင် တစ်ဖက်လူ၏ ကံကြမ္မာရောင်ဝါမှာ သေခြင်းတရားကို တစ်ကြိမ် ကျော်လွှားနိုင်ကြောင်းလည်း သိလိုက်ရသည်။
ထို့ကြောင့်သာ သူသည် ချူယွမ်၏ ရှေးဟောင်းဧကရာဇ် ကောင်းကင်ဖုံးလွှမ်းတံဆိပ် အောက်တွင် အသက်ရှင်ကျန်ရစ်ခဲ့ခြင်း ဖြစ်သည်။
သို့သော် နောက်တစ်ကြိမ်တွင်မူ... သူ၌ ထိုကဲ့သို့ အခွင့်အရေး ရှိတော့မည် မဟုတ်ပေ…
ဝိန်း…
ချူယွမ်က လက်ကို ဝှေ့ယမ်း၍ လှမ်းဖမ်းလိုက်ရာ ဟင်းလင်းပြင်ကြီးမှာ ဆွဲဖြဲခံလိုက်ရသည်။
သူသည် မိုင်ပေါင်း သောင်းချီဝေးရာသို့ ထွက်ပြေးပြီး တိုကင်ပြားသုံးကာ ဟင်းလင်းပြင်နယ်မြေမှ ထွက်ခွာရန် ပြင်နေသော ချင်အန်းကို ဤနေရာသို့ တိုက်ရိုက် ပြန်ဆွဲခေါ်လိုက်သည်။
“မလုပ်ပါနဲ့…မင်း ငါ့ကို သတ်လို့မရဘူး! ငါ့ဆရာက ယန်မိုနန်းတော်သခင်ပဲ…ငါ့ကို ဝူဟန့်ဧကရာဇ်ကလည်း တန်ဖိုးထားတယ်၊ လျူမိသားစုကလည်း အကာအကွယ် ပေးထားတယ်”
ပြန်ရောက်လာသည်နှင့် ချင်အန်းမှာ အသည်းယားအောင် ထိတ်လန့်နေပြီး သူ၏နောက်ခံများကို အသည်းအသန် ထုတ်ဖော်ပြောဆိုတော့သည်။
ယန်မိုနန်းတော်သခင်…
ပြီးတော့ လျူမိသားစုရဲ့ အစွမ်းထက်ဆုံး ဘိုးဘေးကြီး ဝူဟန့်ဧကရာဇ်…
ဤအမည်များကို ကြားလိုက်လျှင် မည်သည့် ပါရမီရှင်မဆို မျက်နှာပျက်သွားကြမည်မှာ သေချာသည်။
ယန်မိုနန်းတော်သခင်မှာ သာမန်အားဖြင့် ထိုက်ချန်းလောက၏ ထိပ်သီးတစ်ဦးသာ ဖြစ်သော်လည်း… ဝူဟန့်ဧကရာဇ်မှာမူ…
၎င်းမှာ ရှေးဟောင်းမသေမျိုး လျူမိသားစု၏ အုပ်ချုပ်သူ၊ ထာဝရနယ်ပယ် ခြေတစ်လှမ်းအလိုသို့ ရောက်နေသည့် အထွတ်အထိပ် ပုဂ္ဂိုလ်ကြီး ဖြစ်ကာ ထျန်းချွဲမြို့စားမင်းနှင့် အဆင့်တူလုနီးပါး ရှိသူ ဖြစ်သည်။
မည်သူမဆို ထိုလူ၏ မျက်နှာကို ထောက်ထားကြရမည် ဖြစ်သည်။
သို့သော် ထိုစကားများကို ကြားသောအခါ ချူယွမ်က အေးစက်စွာ နှာခေါင်းရှုံ့လိုက်ပြီးနောက် သူ၏လက်ဝါးကို ရိုက်ချလိုက်တော့သည်။
ဘုန်း…ဝုန်း…
ကြည်လင်လှသော အသံမှာ အရပ်ရှစ်မျက်နှာသို့ ပဲ့တင်ထပ်သွားသည်။
ချင်အန်းမှာ ခဏချင်းအတွင်း သွေးမြူများအဖြစ် ပေါက်ကွဲသွားတော့သည်။
သူ၏ ဝိညာဉ်ပင်လျှင် ဖုန်မှုန့်အဖြစ် တိုက်ရိုက် ချေမှုန်းခံလိုက်ရပြီး ထာဝရ ပျောက်ကွယ်သွားရလေပြီ…
[တိန်… ကြယ်သုံးပွင့် ကံကြမ္မာ၏သားတော်ကို သတ်ဖြတ်နိုင်သည့်အတွက် ဂုဏ်ယူပါသည်၊ ဗီလိန်မှတ် ၂၀၀,၀၀၀ ရရှိပါသည်]
[တိန်…ကောင်းကင်ဘုံ ကံတရား ၂၀၀ ကို အောင်မြင်စွာ လုယူနိုင်ခဲ့ပါသည်။ လက်ရှိ အိမ်ရှင်၏ ကံတရား -၇၀၀ ဖြစ်ပါသည်]