ထိုအချိန်တွင်…
ချူမိသားစု၏ ရှန့်ယွန်းနယ်မြေအတွင်း၌…
"ဟက်… ယန်မိုနန်းတော်က အဲ့ဒီကလေးကတော့ ကံကောင်းရှာသားပဲ၊ ထာဝရညဉ့် မိစ္ဆာဧကရာဇ်ရဲ့ အမွေအနှစ်ကိုတောင် ရထားတယ်ပေါ့"
"ဒါပေမဲ့ ကွာစီ ဧကရာဇ် နယ်ပယ်ကို ရောက်နေတဲ့ ယွမ်အာရှေ့မှာတော့ ဘယ်လို လျှို့ဝှက်ပညာရပ်ပဲဖြစ်ဖြစ် ပြောပလောက်စရာ မရှိပါဘူး"
"ဟားဟား… အဲ့ဒါ ငါ ချူကျင်းရဲ့ သားလေ…ဒီယန်မိုနန်းတော်ကတော့ ယွမ် အာကို လူပုံအလယ်မှာတောင် ခြိမ်းခြောက်ရဲတယ်ပေါ့ နောင်ကျရင် သူတို့ကို အမြစ်ပြတ် သုတ်သင်ပစ်ဖို့ စဉ်းစားရမယ်"
ချူမိသားစု၏ ခန်းမဆောင်ကြီးအတွင်း။
ချူကျင်း၊ ချူထျန်းဟယ်နှင့် အခြားသော ဧကရာဇ်အဆင့် ကျွမ်းကျင်သူ အမြောက်အမြား စုရုံးနေကြပြီး နဂါးပုန်းအစည်းအဝေး၏ ထုတ်လွှင့်မှုမျက်နှာပြင်ကို ကြည့်နေကြသည်။
ချင်အန်းက ချူယွမ်ကို သတ်မည်ဟုပင် ဆိုကာ မောက်မာနေသည်ကို မြင်သောအခါ…
အစပိုင်းတွင် လူတိုင်း ဒေါသထွက်သွားကြသော်လည်း..မကြာမီ ချူယွမ်၏ လက်ရှိစွမ်းအားကို သတိရသွားကြပြီး သူတို့၏ အမူအရာများမှာ ခပ်ပြုံး ပြုံး ဖြစ်သွားကြတော့သည်။
အဲ့ဒီကောင်လေးက အခုဆိုရင် စစ်မှန်တဲ့ ကွာစီ ဧကရာဇ် အဆင့်ကို ရောက်နေတာလေ…
ဒါ့အပြင် ပြီးခဲ့တဲ့ ခုနစ်ရက်အတွင်းမှာ သူတို့ထဲက အချို့ဟာ ချူယွမ်ရဲ့ စွမ်းအားကို ကိုယ်တိုင် စမ်းသပ်ခဲ့ကြပြီးသားပါ။
သူက အဆင့်တက်ခါစ ကွာစီ ဧကရာဇ် တစ်ယောက်ထက်တောင် ပိုပြီး အစွမ်းထက်နေပါသေးတယ်။
သူ့ရဲ့ ကိုယ်ပိုင်ကျင့်စဉ် စွမ်းအားတစ်ခုတည်းနဲ့တင် သာမန် ကွာစီ ဧကရာဇ် နောက်ဆုံးအဆင့် တစ်ယောက်နဲ့ ထိပ်တိုက်ရင်ဆိုင်နိုင်စွမ်း ရှိပါတယ်။
ပြီးတော့ ချူယွမ်ဆီမှာရှိတဲ့ ဧကရာဇ်လက်နက် ကိုသာ ထည့်သုံးလိုက်ရင် ကွာစီ ဧကရာဇ် အထွတ်အထိပ် ကျွမ်းကျင်သူတစ်ယောက်တောင်... သူ့ရဲ့ တစ်ချက်တည်းသော တိုက်ခိုက်မှုကို တောင့်ခံနိုင်မှာ မဟုတ်ဘူး…
အခြားတစ်ဖက်မှာတော့ ယန်မိုနန်းတော်သခင်လေး ချင်အန်းပေါ့…
သူက သူတော်စင် အဆင့်လေးပဲ ရှိပါသေးတယ်။
သူတို့ရဲ့ အမွေအနှစ် ဧကရာဇ်လက်နက် 'ယန်မိုနန်းတော် ဆယ်ခု' ကို ယူလာတယ်ဆိုရင်တောင် ဘာဖြစ်မှာလဲ…
စစ်မှန်တဲ့ စွမ်းအားကွာဟချက်ကြီးရှေ့မှာတော့ အရာအားလုံးဟာ သွေးဆုတ်ဖြူလျော်ပြီး အားနည်းနေမှာပဲ…
"ယန်မိုနန်းတော်… သူတို့က လျူမိသားစုနဲ့ ပူးပေါင်းဖို့ လုပ်နေပြီလို့ သတင်းကြားတယ်။ ယွမ်အာကို ဒီလို ခြိမ်းခြောက်ရဲမှတော့ ငါတို့ ဒါကို ဒီအတိုင်း လွှတ်ထားလို့ မရဘူး"
"သူတို့ရဲ့ အမွေအနှစ် ဧကရာဇ်လက်နက် 'ယန်မိုနန်းတော် ဆယ်ခု' ကတော့ တော်တော်လေး ကောင်းပါတယ်။
ပေချန်း….မင်း မနက်ဖြန်ကျရင် ယန်မိုနန်းတော်ကို သွားပြီး နန်းတော်သခင်ကို အဲ့ဒီ ဧကရာဇ်လက်နက် လွှဲပေးဖို့ ပြောလိုက်။
အကယ်၍ သူက ငြင်းမယ်ဆိုရင်တော့... သူ့ရဲ့ ယန်မိုနန်းတော်တစ်ခုလုံးကို မြေလှန်ပစ်လိုက်"
အမြင့်ဆုံး ဂုဏ်ထူးဆောင်နေရာမှနေ၍…
ချူမိသားစု ဘိုးဘေးကြီး ချူထျန်းဟယ်၏ စကားများမှာ အတိုင်းအဆမရှိ ဗိုလ်ကျစိုးမိုးလွန်းလှသည်။
ချင်အန်း၏ ခြိမ်းခြောက်မှုကြောင့်ပင် သူသည် ယန်မိုနန်းတော်၏ အမွေအနှစ် ဧကရာဇ်လက်နက်ကို တိုက်ရိုက် သိမ်းပိုက်ရန် ကြံရွယ်လိုက်ခြင်းပင်…
မပေးလျှင် နန်းတော်တစ်ခုလုံးကို အမြစ်ပြတ် သုတ်သင်ပစ်မည်တဲ့…
"ကျွန်တော့်စိတ်ကလည်း အဲ့ဒီအတိုင်းပါပဲ"
ချူပေချန်းက လှောင်ပြောင်လိုက်ပြီး သူ၏မျက်ဝန်းထဲတွင် ရက်စက်သော အရောင်တစ်ချက် လက်သွားသည်။
ယန်မိုနန်းတော်၏ ဧကရာဇ်လက်နက်မှာ အရည်အသွေး ကောင်းမွန်လှသည်။
စိတ်ကူးလိုက်ရုံနှင့် အဆုံးမရှိသော ငရဲပြည်မှ သေဆုံးပြီးသူများကို ဆင့်ခေါ်ကာ တိုက်ခိုက်ခိုင်းနိုင်စွမ်း ရှိသည်။
သူ ၎င်းကို လိုချင်နေခဲ့သည်မှာ နှစ်ပေါင်း ရာနှင့်ချီနေပြီ ဖြစ်သည်။
ယခုတစ်ခေါက် ၎င်းကို လုယူပြီး သူ၏တူလေးကို ပေးလိုက်ခြင်းက ပို၍ အသုံးတည့်ပေလိမ့်မည်….
ချူမိသားစုဝင်များက ယန်မိုနန်းတော်ကို ဖျက်ဆီးရန် ကြံစည်နေကြစဉ်မှာပင်။
အကြည့်ကို ဟင်းလင်းပြင်နယ်မြေဆီသို့ ပြန်ပို့လိုက်ကြပါစို့။
ထာဝရညဉ့် မိစ္ဆာနယ်မြေကို စတင်လိုက်သည်နှင့် ကမ္ဘာကြီးတစ်ခုလုံးမှာ ကပ်ဆိုးကြီးကျရောက်သကဲ့သို့ ပြောင်းလဲသွားတော့သည်။
အဆုံးမရှိသော မြူခိုးနက်များက နေမင်းနှင့် ကောင်းကင်ယံကို ဖုံးလွှမ်းသွားပြီး ကမ္ဘာပျက်တော့မည့်အလား ဖြစ်နေချေပြီ!
ဝိန်း…..
မိစ္ဆာနယ်မြေ၏ အလယ်ဗဟိုတွင် ချင်အန်း၏ ခန္ဓာကိုယ်ထက်၌ သွေးရောင်နှင့် အနက်ရောင် ရောယှက်နေသော မိစ္ဆာစာလုံးများမှာ လက်ခနဲ ပေါ်လာပြီး သူ၏ ဆံပင်ရှည်များမှာ လေပြင်းထဲတွင် အရူးအမူး လွင့်ပျံနေသည်။
သူ၏မျက်လုံးထဲတွင် နီမြန်းသော မိစ္ဆာမီးတောက်များ တောက်လောင်နေပြီး မမြင်နိုင်သော မိစ္ဆာအသိတစ်ခုမှာ ပျံ့နှံ့နေတော့သည်။
ဤအချိန်တွင် သူသည် လူ့လောကသို့ ဆင်းသက်လာသည့် မိစ္ဆာနတ်ဘုရားတစ်ပါးအလားပင်…
"ဟားဟား… ဟားဟားဟား…”
ချင်အန်းသည် သူ၏လက်နှစ်ဖက်ကို ဖြန့်ကာ ကောင်းကင်ကို မော့၍ အော်ဟစ်လိုက်သည်။
သူ၏အသံမှာ ကိုးထပ်သော ကောင်းကင်ဘုံကို တုန်ခါသွားစေပြီး ကမ္ဘာတစ်ခုလုံးသို့ ပဲ့တင်ထပ်သွားရာ ဟင်းလင်းပြင်နယ်မြေ၏ အထက်လွှာမှာပင် အနည်းငယ် တုန်ခါသွားရသည်။
"အားးး... မဟုတ်ဘူး"
"ထွက်မယ်… ငါ အရှုံးပေးတယ်"
မြူခိုးနက်များ ဖုံးလွှမ်းသွားသော နေရာတိုင်းတွင် သက်ရှိအားလုံးမှာ ခြောက်ကပ်နေသော အရိုးစုများအဖြစ် ပြောင်းလဲသွားကြတော့သည်။
ဟင်းလင်းပြင်နယ်မြေမှ ထွက်ခွာရန် အချိန်မရလိုက်သော နိုင်ငံငယ်လေးများမှ ပါရမီရှင်များမှာ အထဲတွင်ပင် အသေဆိုးနှင့် သေဆုံးကုန်ကြသည်။
ခဏချင်းမှာပင် သူတို့၏ သက်စောင့်အားလုံးမှာ ဝါးမျိုခံလိုက်ရပြီး ချင်အန်း၏ စွမ်းအားအတွက် အာဟာရအဖြစ် ပြောင်းလဲသွားတော့သည်။
"ချူယွမ်…ငါ့ရဲ့ ထာဝရညဉ့် မိစ္ဆာနယ်မြေထဲမှာ မင်းက ဒီလောက်အထိ မောက်မာရဲသေးတယ်ပေါ့"
ချင်အန်း၏ ပုံရိပ်မှာ မြူခိုးနက်များကြားတွင် ဖုံးကွယ်နေပြီး သူသည် အမှောင်ထု မိစ္ဆာနတ်ဘုရားတစ်ပါးအလား ဖြစ်နေကာ သူ၏အသံမှာ ကောင်းကင်နှင့် မြေကြီးကို လွှမ်းမိုးသွားသည်။
ဒီနေ့မှာတော့ ရှေးဟောင်းမသေမျိုးမိသားစုရဲ့ နတ်ဘုရားသားတော်ဆိုတာ အထွတ်အထိပ် ပါရမီရှင် မဟုတ်ကြောင်း သာမန်လူတစ်ယောက်သာ ဖြစ်ကြောင်းကို ထိုက်ချန်းလောကက လူတွေကို သူ သက်သေပြရမည်။
"အသိဉာဏ်မဲ့လိုက်တာ..."
ချူယွမ်၏ အမူအရာမှာ အလွန်တရာ အေးဆေးတည်ငြိမ်နေဆဲပင်။
တဟုန်ထိုး တိုးဝင်လာသော မြူခိုးနက်များမှာ အရပ်မျက်နှာအနှံ့မှ သူ့ကို တိုက်ခိုက်နေသော်လည်း မမြင်နိုင်သော စွမ်းအားတစ်ခုက အားလုံးကို တားဆီးထားသည်။
မည်မျှပင် တိုးဝင်လာပါစေ ချူယွမ်၏ အနားသို့ မကပ်နိုင်ကြချေ….
ဘုန်း….
ထို့နောက် သူက ပေါ့ပေါ့ပါးပါးပင် လက်ဝါးတစ်ချက် ရိုက်ထုတ်လိုက်ရာ စိတ်ကူးကြည့်၍ပင် မရနိုင်သော၊ ကမ္ဘာကြီးကို တုန်ခါစေမည့် မုန်တိုင်းကြီးတစ်ခု ထွက်ပေါ်လာပြီး လွှမ်းမိုးသွားတော့သည်။
ဤလက်ဝါးချက်အောက်တွင် ဟင်းလင်းပြင်၏ မိုင်ပေါင်း သိန်းချီသော ဧရိယာမှာ အတင်းအဓမ္မ ရိုက်ခွဲခံလိုက်ရပုံရသည်။
အဆုံးမရှိသော အမှောင်ထုမှာ တစ်ခဏအတွင်း ဆွဲဖြဲခံလိုက်ရတော့သည်။
ဧရာမ ထာဝရညဉ့် မိစ္ဆာနယ်မြေကြီးမှာ မျက်စိတစ်မှိတ်အတွင်း ပျက်စီးသွားရလေပြီ…
ထိုနယ်မြေ၏ အလယ်ဗဟိုတွင် ရှိနေသော ချင်အန်းမှာ အမြောက်ဆန်တစ်ခုအလား အနောက်သို့ လွင့်ထွက်သွားတော့သည်။
ဘုန်း…ဘုန်…ဘုန်း…
သူ၏နောက်ကွယ်ရှိ ဧရာမ တောင်တန်းကြီး အမြောက်အမြားကို တိုက်မိပြီးနောက်တွင်မှ သူသည် သူ၏ကိုယ်ဟန်ကို မနည်းပြန်ထိန်းနိုင်ခဲ့သော်လည်း သူ၏တစ်ကိုယ်လုံးမှာ သွေးများဖြင့် ရဲရဲနီနေချေပြီ…
"ဒါ... ဘယ်လိုဖြစ်တာလဲ"
တစ်ခဏချင်းမှာပင် ထိုက်ချန်းလောကရှိ အင်အားစု အသီးသီးထဲတွင်။
မရေမတွက်နိုင်သော ကျင့်ကြံသူများမှာ ဤမြင်ကွင်းကို မြင်လိုက်ရသဖြင့် သူတို့၏မျက်လုံးများမှာ မယုံနိုင်လောက်အောင် ပြူးကျယ်သွားကြပြီး နှလုံးသားများမှာလည်း အတိုင်းအဆမရှိ တုန်လှုပ်သွားကြရသည်။
လက်ဝါးတစ်ချက်တည်းလား…
ဒဏ္ဍာရီလာ ဧကရာဇ်ကျင့်စဉ် 'ထာဝရညဉ့် မိစ္ဆာနယ်မြေ' က ဒီလိုမျိုးပဲ ပျက်စီးသွားတာလား… လေပြင်းတစ်ချက် အတိုက်ခံရသလိုမျိုး လွင့်ထွက်သွားတာလား…
"ဒါ ဘယ်လိုလုပ် ဖြစ်နိုင်မှာလဲ"
ယန်မိုနန်းတော်…
ဧကရာဇ်အဆင့် ကျွမ်းကျင်သူဖြစ်သော ယန်မိုနန်းတော်သခင်သည်လည်း ဤအချိန်တွင် သူ၏မျက်လုံးများကို ဖွင့်လိုက်သည်။
သူ၏တပည့်ဖြစ်သူ ရုတ်တရက် ရှုံးနိမ့်သွားသည်ကို မြင်သောအခါ သူ၏မျက်လုံးထဲတွင် အန္တရာယ်ရှိသော အရောင်များ ပေါ်လာသည်။
အလင်းမျက်နှာပြင်ထက်တွင် ဟင်းလင်းပြင်ထဲ၌ ငြိမ်သက်စွာ ရပ်နေဆဲဖြစ်သော ချူယွမ်ကို ကြည့်ရင်း သူ၏စိတ်ထဲတွင် သတိထားရမည့် ခံစားချက်တစ်ခု ပေါ်လာသည်။
ချူယွမ်…
ဒီချူမိသားစု နတ်ဘုရားသားတော်ကတော့ တကယ့်ကို မရိုးရှင်းဘူး…
ချင်အန်းက သူတော်စင်အဆင့် အထွတ်အထိပ် ကျွမ်းကျင်သူလေ။
ထာဝရညဉ့် မိစ္ဆာနယ်မြေရဲ့ စွမ်းအားနဲ့ဆိုရင် သူက သာမန် မဟာသူတော်စင် တစ်ယောက်ကိုတောင် အနိုင်ယူနိုင်စွမ်း ရှိရမှာ။
ဒါပေမဲ့လည်း...
ချူယွမ်ရဲ့ လက်ထဲမှာ မျက်စိတစ်မှိတ်အတွင်း ရှုံးနိမ့်သွားတယ်လား…
တစ်ဖက်လူရဲ့ အဆင့်က ဘယ်အဆင့်အထိ ရောက်နေလို့လဲ…
"တပည့်… နောက်ထပ်ကျရင် ယန်မိုနန်းတော် ဆယ်ခုရဲ့ ပုံရိပ်ယောင်စွမ်းအားကို သုံးစမ်း။ ဆရာက မင်းကို ကူညီပြီး အဲ့ဒါကို လှုံ့ဆော်ပေးမယ်၊ ချူယွမ်ကို အစွမ်းကုန် သတ်ပစ်ကြတာပေါ့"
အတွေးများ ရှုပ်ထွေးနေရင်း ယန်မိုနန်းတော်သခင်က ချက်ချင်းပင် စိတ်အာရုံနှင့်သတင်းပို့လိုက်သည်…
ခုနတင် သူသည်လည်း ဝူဟန့်ဧကရာဇ်ထံမှလည်း စိတ်အာရုံဖြင့် စကားပြောခြင်းကို ရရှိထားခဲ့သည်။
လျူမိသားစု၏ ကျောထောက်နောက်ခံ ရှိနေမှတော့ ယန်မိုနန်းတော်အနေဖြင့် ရှေးဟောင်းမသေမျိုးမိသားစုဖြစ်သော ချူမိသားစုကို ကြောက်နေစရာ မလိုတော့ပေ…
အကယ်၍ ဒီနေ့ ချူမိသားစု နတ်ဘုရားသားတော်ကို သတ်နိုင်မယ်ဆိုရင် ဒါဟာ တစ်သက်စာ အကျိုးရှိမယ့် အောင်မြင်မှုကြီး ဖြစ်လာမှာပဲ…
ယန်မိုနန်းတော်သခင်၏ စကားကို ကြားသောအခါ ချင်အန်းသည်လည်း မနည်းရုန်းကန်၍ ထရပ်လိုက်သည်။
သွေးတစ်လုပ်ကို အားရပါးရ အန်ထုတ်လိုက်ပြီးနောက် သူ၏မျက်လုံးထဲရှိ နီမြန်းမှုများမှာ ပို၍ ပြင်းထန်လာကာ သူက လေးနက်စွာ ခေါင်းညိတ်လိုက်သည်။
"စိတ်ချပါ ဆရာ…တပည့်က ဒီကောင်ကို သေချာပေါက် သတ်ပြီး ယန်မိုနန်းတော်ရဲ့ နာမည်ကို ကျော်ကြားစေရပါမယ်"
ရက်စက်မှုနှင့် ရူးသွပ်မှုများ ပြည့်နှက်နေသော မျက်နှာဖြင့် သူသည် သူ၏ ညာဘက်လက်ဝါးကို ဖြန့်လိုက်ရာ၊ ထိုလက်ဝါးထက်တွင် နက်မှောင်သော ရတနာနန်းတော်တစ်ခု၏ ပုံရိပ်ယောင်မှာ ရုတ်တရက် ပေါ်ထွက်လာသည်။
အဆုံးမရှိသော သေခြင်းတရား အရှိန်အဝါများက ပတ်ဝန်းကျင်ကို လွှမ်းမိုးသွားပြီး ၎င်းမှာ ကိုးထပ်သော ငရဲပြည်၏ ပုံစံငယ်လေးတစ်ခုအလား ဖြစ်နေကာ၊ လူတစ်ယောက်၏ နှလုံးသားကို တုန်လှုပ်စေမည့် ခန့်မှန်းရခက်သော ထူးဆန်းမှုများကို ထုတ်လွှတ်နေသည်။
ယန်မိုနန်းတော် ဆယ်ခု…
ယန်မိုနန်းတော်၏ မျိုးဆက်အလိုက် လက်ဆင့်ကမ်းလာခဲ့သော အမွေအနှစ် ရတနာ…
ဤဧကရာဇ်လက်နက်သည် သေဆုံးသွားသူအားလုံး၏ ဝိညာဉ်များကို အတွင်း၌ ချိပ်ပိတ်ထားနိုင်ပြီး၊ ၎င်းတို့ကို နန်းတော်၏ အစေခံများအဖြစ် ပြောင်းလဲကာ ထာဝရ ခိုင်းစေနိုင်စွမ်း ရှိသည်။
ယန်မိုနန်းတော်ကို တည်ထောင်ခဲ့သည့် လွန်ခဲ့သော နှစ်သန်းပေါင်းများစွာကတည်းက၊ အစွမ်းထက် ကျွမ်းကျင်သူ အမြောက်အမြား၏ ဝိညာဉ်များကို အတွင်း၌ ချိပ်ပိတ်ထားခဲ့ပြီး ဖြစ်ရာ၊ စစ်မှန်သော သေမင်းစစ်တပ်ကြီးတစ်ခုကိုပင် ဆင့်ခေါ်နိုင်စွမ်း ရှိချေပြီ…
ဧကရာဇ်အဆင့် ကျွမ်းကျင်သူများပင်လျှင် ချွင်းချက်မရှိ ပါဝင်နေပေလိမ့်မည်…