အခန်း (၁၇) - ရက်စက်သော ဟင်းလင်းပြင်နယ်မြေ၊ ယန်မိုနန်းတော်၏ သခင်လေး…
ဟင်းလင်းပြင်နယ်မြေ၊ အထက်လွှာ။
ကောင်းကင်ယံမှာ မှောင်မှိန်နေပြီး မြေပြင်မှာလည်း ခြောက်သွေ့ဖုန်းဆိုးတောအတိုင်းပင်။
ရံဖန်ရံခါ မြင့်မားသော တောင်တန်းများ ပေါ်ထွက်လာတတ်ပြီး ဖော်ပြ၍မရနိုင်လောက်အောင် ဖိနှိပ်လွန်းသော အရှိန်အဝါများဖြင့် ပြည့်နှက်နေသည်။
ဝိန်း… ဝိန်း…
ဟင်းလင်းပြင် လှိုင်းထမှုများနှင့်အတူ လူပေါင်း တစ်ထောင်ကျော်မှာ ဟင်းလင်းပြင်ထဲ၌ ရုတ်တရက် ပေါ်လာကြသည်။
ချူယွမ်နှင့် သူ၏ နောက်လိုက်မိန်းခလေး နှစ်ဦးမှာလည်း ဤနေရာသို့ ရောက်ရှိလာခဲ့ပြီ ဖြစ်သည်။
"ဟင်းလင်းပြင် ဆွဲငင်အားက တော်တော်လေး ပြင်းတာပဲ… ဒါ ဟင်းလင်းပြင်နယ်မြေလား"
ချူယွမ်သည် ဟင်းလင်းပြင်ထဲ၌ သူ၏ ကိုယ်ဟန်ကို တည်ငြိမ်အောင် ထိန်းလိုက်ပြီး ပတ်ဝန်းကျင်ကို ဝေ့ကြည့်လိုက်သည်။
သူ၏ အပေါ်သို့ သက်ရောက်နေသော ဧရာမ ဖိအားကြီးကို ခံစားမိရင်း သူက အသာအယာ ရေရွတ်လိုက်မိသည်။
ထျန်းချွဲမြို့စားမင်း၏ ရှင်းပြချက်အရ…
ဟင်းလင်းပြင်နယ်မြေကို အထက်၊ အလယ်၊ အောက် ဟူ၍ အလွှာသုံးလွှာ ခွဲခြားထားသည်။
ပို၍ နက်ရှိုင်းစွာ ဆင်းသွားလေလေ ပို၍ ကြောက်စရာကောင်းသော မိစ္ဆာများနှင့် ဖိအားများကို ရင်ဆိုင်ရလေလေ ဖြစ်သည်။
ပတ်ဝန်းကျင်ကို စစ်ဆေးကြည့်ရာတွင် သူသည် ချူမိသားစုမှ အခြားပါရမီရှင်များနှင့် ကွဲကွာသွားပြီဖြစ်ကြောင်း တွေ့လိုက်ရသည်။
သူ၏ ဘေးတွင် လော့အာနှင့် ပိုင်စူးသာ ပါလာခဲ့သည်။
ဤနယ်မြေထဲသို့ ဝင်ရောက်လိုက်သည့် ခဏတွင် ဟင်းလင်းပြင် ဝရုန်းသုန်းကား ဖြစ်မှုကြောင့် သူတို့ ကွဲကွာသွားခဲ့ပုံရသည်။
"ဖူး…"
မလှမ်းမကမ်းတွင်မူ အလွန်တရာ ပြင်းထန်လှသော ဆွဲငင်အား ဖိအားကြောင့်။
နတ်ဘုရားလမ်းစဉ် အဆင့်၉ဆင့် သို့ မရောက်သေးသော လူသားလမ်းစဉ် ၉ဆင့်မှ ပါရမီရှင်အချို့မှာ တစ်ဦးပြီးတစ်ဦး သွေးအန်ကုန်ကြသည်။
သူတို့သည် ဤကမ္ဘာထဲတွင် မိမိတို့၏ သွေးကြောများနှင့် အကြောများမှာ ပေါက်ထွက်တော့မည့်အလား ခံစားနေရပြီး ခံရခက်သော နာကျင်မှုကို ခံစားနေကြရသည်။
"တောက်… ခမည်းတော်က ဒီနဂါးပုန်းအစည်းအဝေး ကျင်းပမယ့် ကမ္ဘာငယ်လေးက ဒီလောက် ကြောက်စရာကောင်းမယ်လို့ တစ်ခါမှ မပြောခဲ့ဘူး ငါ့ရဲ့ နောက်ဆုံးအဆင့် ကျင့်စဉ်နဲ့တောင် ဒီဖိအားကို မနည်း ခံနေရတယ်"
ထောင်လွှားသော အမူအရာရှိပြီး အနီရောင်ရွှေရောင် နဂါးဝတ်ရုံကို ဝတ်ဆင်ထားသည့် လူငယ်တစ်ဦးက သွားကြိတ်၍ ဒေါသတကြီး အော်ဟစ်လိုက်သည်။
သူ၏ ခန္ဓာကိုယ်အတွင်းရှိ စစ်မှန်သော အနှစ်သာရများကို အရူးအမူး လည်ပတ်စေပြီးမှသာ ဤဖိအားကို မနည်း တောင့်ခံနိုင်ခြင်း ဖြစ်သည်။
သို့သော်ငြားလည်း ပြင်းထန်သော ဖိအားကြောင့် သူ၏ ပါးပြင်များမှာ ရဲရဲနီနေပြီး နားထင်မှ ချွေးများမှာလည်း စီးကျနေသည်။
သူသည် လဲကျတော့မည့်အလား ဖြစ်နေချေပြီ…
"အားး!"
ဘုန်း…
သို့သော် ကျင့်စဉ်နိမ့်ပါးပြီး ဤဖိအားကို အတင်းအဓမ္မ အန်တုရန် ကြိုးစားသူများအတွက်မူ ရလဒ်မှာ မလှပပေ။
မျက်စိတစ်မှိတ်အတွင်းမှာပင် သူတို့မှာ ပေါက်ကွဲသွားကြပြီး အသားစများနှင့် သွေးမိုးများအဖြစ် ပြောင်းလဲသွားကြတော့သည်။
"သေကုန်ပြီ"
"ဒီလူတွေဟာ နဂါးပုန်းအစည်းအဝေး စင်မြင့်ပေါ် တက်နိုင်ဖို့အတွက် နိုင်ငံပေါင်းတစ်ရာစစ်ပွဲကို ဖြတ်သန်းပြီး သေဘေးတွေကြားက ရုန်းထွက်လာခဲ့ကြတာ"
"ဒါပေမဲ့ အခုတော့... ပါရမီရှင်တွေကြားက တကယ့် တိုက်ပွဲကိုတောင် မကြုံရသေးဘူး၊ အစမှတ်မှာတင် ဒီလို သေကုန်ကြပြီလား ဒီနယ်မြေထဲကနေ ပြန်ထွက်ဖို့တောင် အချိန်မရဘဲ နေရာတင် အသေဆိုးနဲ့ သေသွားကြတာလား"
နဂါးဝတ်ရုံနှင့် လူငယ်သည် ဤမြင်ကွင်းကို မြင်သောအခါ မျက်နှာမှာ သိသိသာသာ ပျက်သွားပြီး သူ၏ မျက်သူငယ်အိမ်မှာ အပ်နဖားခေါင်းခန့်အထိ ကျုံ့သွားတော့သည်။
"မဖြစ်ဘူး… ငါက နဂါးပြာအင်ပါယာရဲ့ နောက်ဆက်ခံမယ့်သူပဲ နဂါးပုန်းအစည်းအဝေးမှာ ဒီလို အရှက်တကွဲ မသေနိုင်ဘူး"
"ငါ ပြန်ထွက်ချင်တယ်… ကောင်းကင်ထက်မှာ ကောင်းကင်ရှိသလို…လူထက်မှာလည်း လူရှိသေးတာပဲ…ဒီအစည်းအဝေးကို တကယ့် ပါရမီရှင်တွေပဲ လုကြပါစေတော့"
အတွေးများ ရှုပ်ထွေးနေရင်း နဂါးပြာအင်ပါယာ အိမ်ရှေ့မင်းသားသည် ချက်ချင်း ဆုံးဖြတ်ချက် ချလိုက်သည်။
သူ၏ လူသားလမ်းစဉ် အဆင့်နှင့်ဆိုလျှင် ဤအစည်းအဝေးတွင် သူနှင့် ရွယ်တူ ပါရမီရှင်များကို နှိမ်နင်းရန် မဖြစ်နိုင်ပေ။
ထို့ပြင် အသက်ဆုံးရှုံးနိုင်ခြေမှာလည်း အလွန်ကြီးမားသည်။
သူ၏ အဆင့်အတန်းမှာ မြင့်မြတ်လှသဖြင့် ဤနေရာတွင် အသက်စွန့်ရန် မလိုပေ။ အင်ပါယာသို့ ပြန်သွားခြင်းကသာ ပိုကောင်းပေလိမ့်မည်…
နဂါးပြာအိမ်ရှေ့မင်းသားက သူ၏ တိုကင်ပြားကို ထုတ်ယူ၍ ဟင်းလင်းပြင်နယ်မြေမှ ထွက်ခွာရန် ပြင်လိုက်စဉ်မှာပင်။
"ဝှစ်"
မျက်စိတစ်မှိတ်အတွင်း…
ဟင်းလင်းပြင်ထဲမှ အမှောင်ထု ဓားအလင်းတစ်ခု ရုတ်တရက် ပျံသန်းလာသည်။
နောက်တစ်ခဏတွင်…
သူတစ်ကိုယ်လုံးမှာ သွေးမြူများအဖြစ် အပိုင်းပိုင်း ပြတ်သွားပြီး ဝိညာဉ်ပင်လျှင် ဘာမျှမကျန်အောင် ဖျက်ဆီးခံလိုက်ရသည်။
သူသည် ချက်ချင်း သေဆုံးသွားခဲ့ပြီး သူ၏ လမ်းခရီးမှာ ထိုနေရာတင် နိဂုံးချုပ်သွားတော့သည်။
တိုက်ရိုက်ကြည့်ရှုမှု တစ်နေရာမှ…
"မဟုတ်ဘူး... လီအာ…ငါ့ရဲ့ လီအာ”
ဟင်းလင်းပြင်နယ်မြေအတွင်း ဖြစ်ပျက်နေသမျှကို မရေမတွက်နိုင်သော အလင်းမျက်နှာပြင်များမှတစ်ဆင့် ထိုက်ချန်းလောက၏ ကောင်းကင်ယံထက်တွင် ထုတ်လွှင့်ပြသနေသည်။
ယခုအခါ နဂါးပြာအင်ပါယာတွင် လက်ရှိ နဂါးပြာဘုရင်မင်းမြတ်သည် သူ၏ အထူးချွန်ဆုံးသားတော် သတ်ဖြတ်ခံရသည်ကို မြင်လိုက်ရသည်။
သူ၏ မျက်လုံးများမှာ ချက်ချင်း သွေးဆုတ်သွားသလို နီမြန်းလာပြီး နာကျင်စူးရှသော အော်ဟစ်သံမှာ အင်ပါယာတစ်ခုလုံးသို့ ပဲ့တင်ထပ်သွားတော့သည်။
နဂါးပြာအင်ပါယာမှာ သာမန် အင်ပါယာနိုင်ငံလေးတစ်ခုသာ ဖြစ်သည်။
သူတို့ထဲတွင် အသန်မာဆုံးမှာ ကောင်းကင်နတ် အဆင့်သာ ရှိပြီး၊ ရှေးဟောင်းမိသားစုများ သို့မဟုတ် သန့်စင်နယ်မြေများမှ တပည့်များလောက်ပင် အစွမ်းမရှိကြပေ။
နဂါးပြာအိမ်ရှေ့မင်းသားမှာ ဤအင်ပါယာ၏ ထိပ်တန်းပါရမီရှင် ဖြစ်သော်လည်း ထိုက်ချန်းလောကတစ်ခုလုံးနှင့် ယှဉ်လျှင်မူ ဘာမျှ မဟုတ်ပေ။
ဟင်းလင်းပြင်နယ်မြေထဲ ဝင်ပြီးသည်နှင့် တစ်ပါးသူ၏ သတ်ဖြတ်ခြင်းကို ချက်ချင်း ခံလိုက်ရခြင်းပင်…
"ဒါက..."
ခမ်းနားလှသော ရွှေပလ္လင်ခန်းမအတွင်း။
နဂါးပုန်းအစည်းအဝေးကို အတူတူ ကြည့်နေကြသော နဂါးပြာအင်ပါယာမှ ပါရမီရှင်များမှာ ဆွံ့အကုန်ကြသည်။
သူတို့အတွက်မူ အမြဲတမ်း လက်လှမ်းမမီနိုင်သော အထွတ်အထိပ် ပါရမီရှင်ကြီး ဖြစ်သည့် အိမ်ရှေ့မင်းသားမှာ…
ယခုမူ အခြားသူတစ်ဦး၏ လက်ထဲတွင် ကြက်ကလေး၊ ငှက်ကလေးသဖွယ် အလွယ်တကူ သတ်ဖြတ်ခံလိုက်ရသည်။
ဟင်းလင်းပြင်နယ်မြေမှ ထွက်ခွာရန်ပင် အခွင့်အရေး မရခဲ့ချေ…
"ဘယ်သူလဲ…ငါ့ရဲ့ လီအာကို ဘယ်သူ သတ်တာလဲ….ငါ..."
နဂါးပြာဘုရင်မင်းမြတ်သည် နာကျင်စွာ အော်ဟစ်နေသော်လည်း နောက်တစ်ခဏတွင် သူ၏သားကို သတ်လိုက်သော ပုံရိပ် ပေါ်လာသည်ကို မြင်လိုက်ရသောအခါ။
ချက်ချင်းဆိုသလို…
သူသည် ကြမ်းတမ်းသော စကားတစ်လုံးမျှ ထပ်မပြောရဲတော့ပေ။
သူသည် ထိုနေရာတွင်တင် ကြောက်ရွံ့တုန်လှုပ်စွာဖြင့် အေးခဲသွားတော့သည်။
"မင်းတို့လို သူရဲဘောကြောင်တဲ့သူတွေက ဒီလို မြင့်မြတ်တဲ့ ပွဲတော်ကြီးကို လာပြီး မညစ်နွမ်းစေနဲ့"
"သေခြင်းတရားက... မင်းတို့လို လူစားတွေအတွက် အကောင်းဆုံး နိဂုံးပဲ"
ဟင်းလင်းပြင်မှာ အက်ကွဲသွားသည်။
နက်မှောင်သော ဟင်းလင်းပြင်နက်ထဲမှ ဆံပင်နက်နှင့် မျက်လုံးနီနီဖြင့် ပုံရိပ်တစ်ခု ထွက်ပေါ်လာသည်။
သူ၏ တစ်ကိုယ်လုံးမှ အဆုံးမရှိသော ယုတ်ညဏ်သည့် အရှိန်အဝါများ ထွက်ပေါ်နေသည်။
သူသည် လက်တစ်ဖက်တွင် ဓားတစ်စင်ကို ကိုင်ထားပြီး ထိုဓားမှာ အနက်ဆုံးသော ချောက်ကမ္ဘာ၏ အစိတ်အပိုင်းတစ်ခုအလား အရာအားလုံးကို ဝါးမျိုနိုင်ပုံရသည်။
နဂါးပြာဘုရင်မင်းမြတ်သည် တံတွေးကို ခက်ခဲစွာ မျိုချလိုက်ပြီး ထိုသူ၏ အဆင့်အတန်းကို ကြောက်ရွံ့စွာ ရေရွတ်လိုက်သည်။
"ယန်... ယန်မိုနန်းတော်ရဲ့ နန်းတော်သခင်လေး၊ ချင်အန်း"
"ဘာ"
ဤစကားကို ကြားသည်နှင့် နဂါးပြာအင်ပါယာ ခန်းမအတွင်းရှိ အရာရှိအားလုံးမှာ ထိတ်လန့်တုန်လှုပ်စွာဖြင့် တိတ်ဆိတ်သွားကြတော့သည်။
ချက်ချင်းဆိုသလိုပင် မည်သူမျှ အိမ်ရှေ့မင်းသားအတွက် ကလဲ့စားချေရန် မတွေးရဲတော့ဘဲ၊ လူတိုင်း၏ စိတ်ထဲတွင် အလွန်တရာ ကြောက်ရွံ့ထိတ်လန့်မှုများသာ ပြည့်နှက်နေတော့သည်။
ယန်မိုနန်းတော်…
ဒါက ဘယ်လို အင်အားစုမျိုးလဲ…
၎င်းမှာ သန့်စင်နယ်မြေပေါင်းများစွာ၏ အထက်တွင် တည်ရှိပြီး နှစ်ပေါင်း ဆယ်သန်းကျော် သမိုင်းကြောင်းရှိသည့် အင်အားစုကြီး ဖြစ်သည်။
ရှေးဟောင်းမိသားစုများနှင့်ပင် နှိုင်းယှဉ်နိုင်လောက်သော ကြောက်မက်ဖွယ် တည်ရှိမှုကြီးပင်…သတင်းများအရ လက်ရှိ ယန်မိုနန်းတော်သခင်မှာ ဧကရာဇ် များထဲတွင်ပင် ထူးချွန်သူတစ်ဦး ဖြစ်သည်။
သူ၏ အမွေဆက်ခံ ဧကရာဇ်လက်နက် ဖြစ်သော 'ယန်မိုငရဲခန်း ဆယ်ခု' နှင့်ဆိုလျှင် အတိတ်ကာလက... ဧကရာဇ် တစ်ပါးထက်မက သူ၏လက်ထဲတွင် ကျဆုံးခဲ့ဖူးသည်။
ပြီးတော့ ဒီချင်အန်းဆိုတာ ယန်မိုနန်းတော်သခင်ရဲ့ တိုက်ရိုက်တပည့် အစစ်အမှန်ပဲ။
သူ၏ ပါရမီမှာ အလွန်မြင့်မားပြီး အသက် နှစ်ထောင်မှာတင် သူတော်စင်အဆင့် သို့ ရောက်ရှိခဲ့သည်။
ထို့ပြင် ဧကရာဇ်လက်နက် ဖြစ်သော 'ယန်မိုငရဲခန်း ဆယ်ခု' ၏ အသိအမှတ်ပြုမှုကိုပင် ရရှိထားသူ ဖြစ်သည်။
သူသည် ယန်မိုနန်းတော်၏ နောက်ဆက်ခံမည့် နန်းတော်သခင်အဖြစ် လေ့ကျင့်ပေးခြင်း ခံနေရသူဖြစ်ပြီး အနာဂတ်တွင် ထိုက်ချန်းလောက၏ ထိပ်ဆုံးမှာ ရပ်တည်မည့် ကြောက်စရာကောင်းသော ပုဂ္ဂိုလ်ကြီးပင်…
[တိန်…ကြယ်သုံးပွင့် ကံကြမ္မာ၏သားတော် တစ်ဦးကို တွေ့ရှိပါသည်။ အိမ်ရှင်အနေဖြင့် ၎င်းကို အနိုင်ယူခြင်း သို့မဟုတ် သတ်ဖြတ်ခြင်းဖြင့် ဗီလိန်မှတ် အမြောက်အမြားနှင့် အလယ်အလတ်အဆင့် ကောင်းကင်ဘုံကံတရားကို လုယူနိုင်မည် ဖြစ်သည်]
အခြားတစ်ဖက်တွင်။
ဤယန်မိုနန်းတော်သခင်လေး ပေါ်လာသည်နှင့်တစ်ပြိုင်နက်။
ချူယွမ်၏ စိတ်ထဲတွင် စနစ်၏ အသံမှာ မြည်ဟီးလာတော့သည်။
ဤချင်အန်းမှာ စစ်မှန်သော ကံကြမ္မာ၏သားတော် တစ်ဦးဖြစ်ပြီး ကြယ်သုံးပွင့်အဆင့် ရှိနေခြင်းပင်…
[အမည် - ချင်အန်း]
[အဆင့်အတန်း - ယန်မိုနန်းတော်သခင်၏ တိုက်ရိုက်တပည့်၊ ရှေးဟောင်း ဧကရာဇ်ကြီး 'ထာဝရညဉ့် မိစ္ဆာဧကရာဇ်' ၏ အမွေဆက်ခံသူ]
[ကံတရား - ၃၀၅]
[ကံကြမ္မာ၏သားတော် အဆင့် - ကြယ်သုံးပွင့်]
[ကျင့်စဉ် - သူတော်စင်နယ်ပယ် အထွတ်အထိပ်]
[အထူးအခွင့်အရေး - ဧကရာဇ်လက်နက် 'ယန်မိုငရဲခန်း ဆယ်ခု' ၏ ပုံရိပ်ယောင်ကို ထိန်းချုပ်နိုင်ခြင်း၊ ဧကရာဇ်ကျင့်စဉ် 'ထာဝရညဉ့် မိစ္ဆာနယ်မြေ'၊ နိယာမအခြေခံ မသေမျိုးပညာရပ် 'သေခြင်းတရားကို ထိန်းချုပ်ခြင်း' (စတင်လေ့ကျင့်ဆဲသာ ရှိသေးသည်)]
[ကံကြမ္မာရောင်ဝါ အာနိသင် - မသိရသေးပါ]