ထိုက်ချန်းလောက လင်ရွှီသန့်စင်နယ်မြေ။
ရှေးဟောင်းဆန်ပြီး ခန့်ညားထည်ဝါလှသော သန့်စင်နယ်မြေ၏ ခန်းမဆောင်ကြီးအတွင်းဝယ်။
"သခင်လေး ချူယွမ်... လွန်ခဲ့တဲ့ သုံးနှစ်ပတ်လုံး သခင်လေးရဲ့ ဂရုစိုက်မှုနဲ့ ပေးသနားခဲ့တဲ့ လက်ဆောင်တွေအတွက် ရွှေယွဲ့ တကယ်ပဲ ကျေးဇူးတင်ပါတယ်။ ဒါပေမဲ့... ရွှေယွဲ့ရဲ့ နှလုံးသားမှာ တခြားသူတစ်ယောက် ရှိနေခဲ့ပြီမို့ သခင်လေးရဲ့ တောင်းဆိုမှုကိုတော့ လက်မခံနိုင်ပါဘူး"
ဝတ်စုံဖြူကို ဆင်မြန်းထားပြီး အပြစ်ပြောစရာမရှိအောင် လှပသော မိန်းကလေးတစ်ဦးသည် ခန်းမအလယ်တွင် ဒူးတစ်ဖက်ထောက်လျက် ရှိနေ၏။
သူမ၏ မျက်ဝန်းများက တုန်ရင်နေသော်လည်း အထက်တွင် ထိုင်နေသော ပုဂ္ဂိုလ်အား ပြောကြားနေသည့် စကားလုံးများမှာမူ အေးစက်လှပြီး လူတစ်ယောက်ကို မိုင်ထောင်ချီဝေးကွာသွားစေမည့်အလား ခံစားရစေသည်။
သို့သော် ကျွန်တော်တို့ ဇာတ်လိုက်မှာ….
"ဟင်... ဒါက ဘယ်လိုဖြစ်တာလဲဟ"
ခန်းမ၏ အမြင့်ဆုံးနေရာတွင် ထိုင်နေသော၊ ရွှေချည်ထိုး အနက်ရောင် ဝတ်စုံကို ဆင်မြန်းထားသည့် လူငယ်လေးသည် မျက်မှောင်ကြုတ်သွားသည်။
သူ၏ မျက်ခုံးများမှာ ဓားကဲ့သို့ ထက်မြက်ပြီး မျက်ဝန်းများမှာ ကြယ်တာရာများအလား တောက်ပနေကာ နတ်ဘုရားတစ်ပါးကဲ့သို့ မြင့်မြတ်သော အရှိန်အဝါရှိ၏။
ဝိညာဉ်ကူးပြောင်းလာခြင်းလော။
ဒါဟာ ထိုက်ချန်းလောကဖြစ်ပြီး သန်မာသူက အုပ်စိုးကာ အားနည်းသူက ပုရွက်ဆိတ်ကဲ့သို့ အနင်းခံရသည့် စစ်မှန်သော ကျင့်ကြံခြင်းလောကပင် ဖြစ်သည်။
သူသည် ထိုက်ချန်းလောက၏ ရှေးဟောင်း မသေမျိုးမိသားစုဖြစ်သော ချူမိသားစု၏ နတ်ဘုရားသားတော် ချူယွမ် ဖြစ်လာခဲ့ပြီ ဖြစ်သည်။
သူ၏ ဖခင်မှာ ယနေ့ခေတ်လောက၏ အစွမ်းထက်ဆုံး ပုဂ္ဂိုလ်များအနက် တစ်ဦးဖြစ်သည့် 'ထျန်းကျင်ဧကရာဇ်' ဖြစ်ပြီး။
မိခင်မှာ ရှေးဦးကာလမှ မသေမျိုးဧကရီတစ်ပါး၏ လူဝင်စားဟု သတင်းထွက်နေသူ ဖြစ်သည်။
သူမသည် လက်ရှိတွင် ဧကရာဇ်လောင်းလျာအဆင့်၌သာ ရှိသေးသော်လည်း သာမန်ဧကရာဇ်များကိုပင် ယှဉ်နိုင်စွမ်းရှိပြီး တားမြစ်ထားသော မသေမျိုးအတတ်ပညာများစွာကို ပိုင်ဆိုင်ထားသူ ဖြစ်သည်။
ဤမျှ ကြီးကျယ်ခမ်းနားလှသော မိဘနှစ်ပါး၏ တစ်ဦးတည်းသော သားဖြစ်သည့်အတွက် ချူယွမ်၏ အဆင့်အတန်းမှာ အထွတ်အထိပ်တွင် ရှိနေသည်။
သို့သော်လည်း မူလခန္ဓာကိုယ်ပိုင်ရှင်၏ မှတ်ဉာဏ်များကို ပြန်ကြည့်လိုက်သောအခါ ချူယွမ်၏ မျက်နှာမှာ ထူးဆန်းသွားတော့သည်။
ဤမျှ မြင့်မြတ်သော ဂုဏ်ဒြပ်ရှိပါလျက်နှင့် မူလချူယွမ်သည် လင်ရွှီသန့်စင်နယ်မြေ၏ နတ်ဘုရားမ ကျန်းရွှေယွဲ့နောက်သို့ တကောက်ကောက်လိုက်နေသည့် အသုံးချခံ လူအတစ်ယောက် ဖြစ်နေခဲ့သည်။
သုံးနှစ်တိတိ… သုံးနှစ်ပတ်လုံး မူလပိုင်ရှင်သည် အရူးတစ်ယောက်ကဲ့သို့ လင်ရွှီသန့်စင်နယ်မြေသို့ အမြဲလာရောက်ကာ အဖိုးတန်ရတနာများ၊ ဆေးလုံးများစွာကို လက်ဆောင်ပေးခဲ့သည်။
သို့သော် ကျန်းရွှေယွဲ့သည် သူ့ကို တစ်ချက်ကလေးပင် ငဲ့မကြည့်ခဲ့ဘဲ လက်ဆောင်များကိုသာ ယူကာ သူပေးသမျှ စာများကို အစေခံများအား လွှင့်ပစ်ခိုင်းတတ်သည်။
ပို၍ ဆိုးသည်မှာ သူပေးသမျှ အဖိုးတန်လက်နက်များမှာ သန့်စင်ရာနယ်မြေရှိ တခြားသော တပည့်ယောက်ျားလေးများ၏ လက်ထဲသို့ ရောက်ရှိနေခြင်းပင်။
အထက်တွင် ထိုင်နေသော ချူယွမ်က လှောင်ပြုံးတစ်ချက် ပြုံးလိုက်သည်။
မူလပိုင်ရှင်မှာ တကယ့်ကို အရူးပင်။ သုံးနှစ်ပတ်လုံး လက်ဖျားနှင့်ပင် မထိခဲ့ရဘဲ အသုံးချခံနေရသည်ကို မသိခဲ့ပေ။
အသံတစ်ခုက လေထဲ ပျံနှံ့လာသည်…
"ချူယွမ်…မင်း အခုကစပြီး စီနီယာအစ်မ ရွှေယွဲ့အပေါ်မှာ မသင့်တော်တဲ့ စိတ်ကူးတွေ မထားနဲ့တော့"
ရုတ်တရက် ခန်းမအတွင်းသို့ ဝတ်စုံဖြူနှင့် လူငယ်တစ်ဦး ဝင်လာသည်။
သူ၏ မျက်နှာမှာ ခိုင်မာပြတ်သားဟန်ရှိပြီး နှုတ်ခမ်းဖျားတွင် လှောင်ပြုံးတစ်ခု ရှိနေသည်။
"စီနီယာအစ်မရဲ့ နှလုံးသားက ငါ ဆိုတဲ့ မုန့်ဟန်ဆီမှာပဲ ရှိတာ မင်းပေးသမျှ အဖိုးတန်ရတနာတွေအားလုံးဟာ ငါ့ရဲ့ကျင့်စဉ် တိုးတက်ဖို့အတွက် သူမက တောင်းပေးခဲ့တာတွေပဲ… မင်းကို အသုံးချဖို့မလ်ိုခဲ့ရင် သူမက မင်းလိုလူကို ဘာလို့ အနားမှာ ထားမလဲ"
ထိုစကားကြောင့် လင်ရွှီသန့်စင်ရာနယ်မြေမှ လူကြီးများမှာ ထိတ်လန့်သွားကြသည်။
သူတို့သည် ချူယွမ်ကို ကွယ်ရာတွင် လှောင်ပြောင်ကြသော်လည်း ရှေ့တွင်မူ ချူမိသားစု၏ အရှိန်အဝါကြောင့် မပြစ်မှားရဲကြပေ။
ချူမိသားစုသည် ဧကရာဇ်များသာမက ထာဝရမသေမျိုးများပင် ထွက်ပေါ်ခဲ့ဖူးသည့် အင်အားကြီး အနွယ်စု ဖြစ်သည်။
မုန့်ဟန်က ရယ်မောလိုက်သည်။
"အကြီးအကဲတို့ မသိသေးဘူးထင်တယ်…ကျွန်တော် မုန့်ဟန်ဟာ အခုအခါမှာ လင်ရွှီဘိုးဘေးကြီးရဲ့ တိုက်ရိုက်တပည့် ဖြစ်သွားပါပြီ နောက်ဆို လင်ရွှီရဲ့ နတ်ဘုရားသားတော်အဖြစ် သတ်မှတ်ခံရတော့မှာ…သူ့ရဲ့ နောက်ခံက ကြီးကျယ်ပေမဲ့ သူ့အစွမ်းကတော့ အမှိုက်ပဲ"
မုန့်ဟန်သည် ယခုသူ အဆင့်နိမ့်နေသေးသော်လည်း သူသည် နောင်တွင် ဧကရာဇ်တစ်ပါး ဖြစ်လာမည်ဟု ယုံကြည်နေသဖြင့် ချူယွမ်ကို လုံးဝ အထင်မကြီးပေ။
ချူယွမ်က …
"ဟက်... ကောင်းတယ်... တကယ့်ကို ကောင်းတယ်"
ချူယွမ်က ခေါင်းကိုဖြည်းဖြည်းချင်း ခါယမ်းက ထွက်သွားရန် ပြင်ဆင်ချိန်…
[တိန်… အမြင့်မြတ်ဆုံး ဗီလိန်စနစ် စတင်အသက်ဝင်ပါပြီ သင်၏ မြင့်မြတ်လှသော ဗီလိန်ဂုဏ်ဒြပ်နှင့် ကိုက်ညီစေရန် ဆုလာဘ်အဖြစ် ကွာစီ-ဧကရာဇ် အဆင့်ကို အပ်နှင်းလိုက်သည်]
စနစ်၏ အသံနှင့်အတူ ချူယွမ်၏ ခန္ဓာကိုယ်အတွင်းသို့ ကြောက်မက်ဖွယ်ကောင်းသော အင်အားများ တိုးဝင်လာသည်။
ထိုက်ချန်းလောက၏ ကျင့်စဉ်အဆင့်များတွင် လူသားအဆင့် (၉) ဆင့်နှင့် နတ်ဘုရားအဆင့် (၉) ဆင့် ရှိရာ၊ ကွာစိီ-ဧကရာဇ် အဆင့်သည် ဧကရာဇ်အဆင့်၏ အောက်တွင် အမြင့်ဆုံးသော အဆင့်ဖြစ်သည်။
လက်တစ်ချက် ဝှေ့ယမ်းလိုက်ရုံဖြင့် ကြယ်တာရာများကိုပင် တုန်လှုပ်စေနိုင်သည့် ထိုအစွမ်းကို ချူယွမ်က ချက်ချင်း ရရှိသွားခဲ့ပြီ ဖြစ်သည်။
[တိန်…ကံကြမ္မာ၏သားတော် မုန့်ဟန်ကို ရှာဖွေတွေ့ရှိပါသည်…သူ့ကို နှိမ်နင်းခြင်း သို့မဟုတ် သတ်ဖြတ်ခြင်းဖြင့် ဗီလိန်မှတ်များစွာကို ရရှိနိုင်ပါသည်]
မုန့်ဟန်သည် ကောင်းကင်ဘုံ၏ စောင့်ရှောက်မှုကို ရရှိထားသော ကံကြမ္မာ၏သားတော် ဖြစ်နေသောကြောင့်ပင် ဤမျှ မောက်မာနေခြင်း ဖြစ်သည်။
သို့သော် ယနေ့တွင်မူ မည်သူမျှ သူ့ကို ကယ်တင်နိုင်မည် မဟုတ်ပေ။
"ဝုန်း…"
ရုတ်တရက်ဆိုသလို နက်ရှိုင်းပြီး လေးလံလှသော ဖိအားတစ်ခုသည် ခန်းမတစ်ခုလုံးကို လွှမ်းခြုံသွားသည်။
ကွာစီ-ဧကရာဇ်၏ အရှိန်အဝါကြောင့် ခန်းမအတွင်းရှိ လူတိုင်းသည် သမုဒ္ဒရာထဲ၌ လှိုင်းပုတ်ခံရသကဲ့သို့ ဖြစ်သွားပြီး မျက်နှာများမှာ ဖြူလျော်သွားကြသည်။
"ဒီလို ဖိအားမျိုးက... ချူယွမ်က ဒီလောက်အသက်ငယ်ငယ်နဲ့ နတ်ဘုရားအဆင့်၉ဆင့်ထဲကို ရောက်နေပြီလား"
လင်ရွှီနယ်မြေ၏ အရှင်သခင်ဖြစ်သော ကျန်းချန်သည် အံ့အားသင့်သွားသည်။
သူကိုယ်တိုင်မှာ နတ်ဘုရားအဆင့်၉ဆင့်ထဲမှ မဟာသူတော်စင်အဆင့်တွင် ရှိသော်လည်း ယခု ချူယွမ်ထံမှ ထွက်ပေါ်လာသော ဖိအားအောက်တွင် အသက်ပင် ဝဝမရှူနိုင်ဘဲ တောင်ကြီးတစ်လုံးနှင့် အဖိခံထားရသကဲ့သို့ ဖြစ်နေတော့သည်။