ဗီလိန်များကို အုပ်စိုးသူ

အခန်း (၆) - ကောလာဟလ၏ အရှင်သခင်

ရော့ဒ်မေးလ် (Rodmill) ရှိ ဘဝသည် အာလွန်အတွက် အလွန်ပင် စိတ်ကျေနပ်စရာ ကောင်းလှသည်။

ထိုနေရာ၌ နေထိုင်ခဲ့သည်မှာ သုံးရက်ခန့်သာ ရှိသေးသော်လည်း၊ ရော့ဒ်မေးလ်သည် သူစိတ်ကူးယဉ်ခဲ့သော ပုံစံကျမှူးမတ်တစ်ဦး၏ ဘဝမျိုးကို ပေးစွမ်းနိုင်ခဲ့သည်။

သူအလိုရှိသည့်အချိန်တွင် နိုးထနိုင်သည်။

သူအလိုရှိသည့်အချိန်တွင် အိပ်စက်နိုင်သည်။

သူအလိုရှိသည့်အချိန်တွင် စားသောက်နိုင်သည်။

လွတ်လပ်စွာ လုပ်ဆောင်ခွင့်ရပါက အကြီးမားဆုံးသော ပျော်ရွှင်မှုကို ပေးစွမ်းနိုင်သည့် ဤလုပ်ဆောင်ချက် သုံးခုကို အာလွန်သည် ရော့ဒ်မေးလ်၌ အားစိုက်စရာမလိုဘဲ အပြည့်အဝ ခံစားနေရခြင်း ဖြစ်သည်။

သက်ပြင်းချသံ

ပါလက်တီယို မိသားစု၏ သားကြီး လီယို၏ ဈာပန ကျင်းပနေစဉ်အတွင်း၊ အာလွန်သည် ရှေ့သို့ကြည့်ရင်း တိတ်ဆိတ်စွာ သက်ပြင်းချလိုက်မိသည်။

လီယိုသည် သူ၏ရှေ့မှ တိုနီယိုနှင့် ကွယ်လွန်သူ ကောင့်မင်းကြီးတို့ကဲ့သို့ပင် ဖြူဖျော့ကာ အသက်မဲ့စွာ လဲလျောင်းနေသည်။ အာလွန်၏ မျက်နှာတွင် ဇဝေဇဝါဖြစ်နေသော အရိပ်အယောင်များ ပေါ်လွင်နေသည်။

'ဒီရှုပ်ထွေးနေတဲ့ ကိစ္စတွေကို ဘယ်ကနေ စရှင်းရမှန်းတောင် မသိတော့ဘူး။'

အာလွန် ဇဝေဇဝါ ဖြစ်ရခြင်းမှာ လီယို၏ သေဆုံးမှုသည် သူတွေးထင်ထားသည့်အတိုင်း ဖြစ်မလာသောကြောင့် ဖြစ်သည်။ အရာအားလုံးက လွဲချော်နေသလိုပင်။

'လီယိုက နောက်ထပ် ခြောက်နှစ်ကြာမှ သေရမှာ မဟုတ်လား။'

သူသည် လီယို၏ ရုပ်အလောင်းကို အသေအချာ စစ်ဆေးကြည့်လိုက်သည်။ ဒဏ်ရာများကို အခမ်းအနားဝတ်စုံဖြင့် ဖုံးကွယ်ထားသော်လည်း...

'လပန်း' (Moonflower)။

နိုင်ငံတော်၏ ထုံးတမ်းစဉ်လာအရ ထင်ရှားသော အမာရွတ်များ သို့မဟုတ် သေစေလောက်သော ဒဏ်ရာများကို နိုင်ငံထွက် အပြာရောင် 'လပန်း' များဖြင့် ဖုံးအုပ်လေ့ရှိသည်။ ထိုလပန်းတစ်ပွင့်ကို လီယို၏ ရင်ဘတ်ပေါ်တွင် တင်ထားသည်။

'...နှလုံးကို ဓားနဲ့ အထိုးခံရပြီး သေတာပဲ။'

လီယို သေဆုံးရသည့် အကြောင်းရင်းကို စဉ်းစားရင်း ဤအလုပ်ကို မည်သူလုပ်ခဲ့သနည်းဟု အာလွန် တွေးတောနေမိသည်။

'စဉ်းစားကြည့်ရင် သံသယဖြစ်စရာ လူတွေကတော့ အများကြီးပဲ။'

လီယိုသည် မှောင်ခိုလောကတွင် ပြဿနာပေါင်းစုံ ရှာနေခဲ့သူဖြစ်သဖြင့် ဤကဲ့သို့ ဖြစ်လာခြင်းမှာ မဆန်းပေ။ လီယိုကြောင့် တိုက်ရိုက်ဖြစ်စေ၊ သွယ်ဝိုက်၍ဖြစ်စေ သေဆုံးခဲ့ရသူပေါင်း တစ်ထောင်မက ရှိပေလိမ့်မည်။ သို့သော်လည်း လီယို၏ အနာဂတ်ကို သိထားသော အာလွန်အတွက်မူ ဤအခြေအနေမှာ မေးခွန်းထုတ်စရာ ဖြစ်နေသည်။

'ဘယ်သူ ဖြစ်နိုင်မလဲ...? လီယိုကို ဘယ်သူ သတ်လိုက်တာလဲ?'

ထိုအတွေးများနှင့်အတူ အာလွန်သည် ပတ်ဝန်းကျင်ကို ဝေ့ကြည့်လိုက်သည်။ လီယို၏ ဈာပနသို့ လူတော်တော်များများ ရောက်ရှိနေကြသည်။ ပါလက်တီယို အိမ်တော်မှ အစေခံများ၊ အမှုထမ်းများနှင့် စစ်သည်တော်များ ရှိနေကြသည်။

မှူးမတ်အချို့လည်း လာရောက် ဂါရဝပြုခဲ့ကြသော်လည်း အာလွန် ပြန်ရောက်ချိန်တွင် သူတို့ ထွက်ခွာသွားကြပြီ ဖြစ်သည်။ ဆိုလိုသည်မှာ ယခု ဈာပနတွင် ရှိနေသူများသည် ပါလက်တီယို မိသားစုအတွက် အလုပ်လုပ်နေသူများသာ ဖြစ်သည်။

ပြီးတော့... သူတို့အားလုံးက အာလွန်၏ အကြည့်ကို အတတ်နိုင်ဆုံး ရှောင်လွှဲနေကြသည်။

အာလွန်သာ အရပ်သားအဖြစ် မွေးဖွားခဲ့လျှင် လမ်းဘေးတွင် သေရလိမ့်မည်ဟု အရင်က နောက်ပြောင်ခဲ့ဖူးသော အစေခံတစ်ဦးမှာ ယခုအခါ ချွေးသီးချွေးပေါက်များ ကျကာ ခေါင်းငုံ့ထားသည်။ အာလွန် အိမ်ပြင်ထွက်တိုင်း ရန်စတတ်သော စစ်သည်တော်တစ်ဦးမှာလည်း ယခုအခါ သူ့ကို မမြင်ချင်ယောင်ဆောင်ကာ အကြည့်လွှဲနေသည်။

'သူတို့ လှောင်ပြောင်ခဲ့တဲ့ တတိယသားက ရုတ်တရက်ကြီး ဆက်ခံသူ ဖြစ်လာတော့မယ်ဆိုတော့ သူတို့ အလုပ်ပြုတ်မှာကို စိုးရိမ်နေကြတာလည်း ဖြစ်နိုင်တာပဲ...'

သို့သော်လည်း သူတို့၏ တုံ့ပြန်မှုများတွင် ထိုထက်မကသော အရာတစ်ခုကို အာလွန် သတိထားမိလိုက်သည်။ အာလွန်၏ အကြည့်က အစေခံတစ်ဦးပေါ်သို့ ကျရောက်သွားတိုင်း သူတို့သည် တုန်ရီသွားကြပြီး လက်များမှာလည်း တုန်ယင်နေတတ်သည်။

စောစောက အာလွန်သည် စစ်သည်တော်တစ်ဦးနှင့် အကြည့်ချင်းဆုံကာ ပုံမှန်အတိုင်း ပုခုံးအသာတွန့်ပြလိုက်ရာ၊ ထိုစစ်သည်တော်မှာ ထိတ်လန့်သွားပြီး သူကိုင်ထားသော အခမ်းအနားသုံးဓားကို လွှတ်ချမိကာ ဈာပနအလယ်တွင် အခြေအနေမှာ အတော်လေး အိုးတိုးအောင့်တေး ဖြစ်သွားခဲ့သည်။

ဤအပြုအမူများက အစေခံများသည် အာလွန်အပေါ် မည်သို့ ထင်မြင်နေကြသည်ကို ထင်ရှားစေသည်။

'သူတို့က ငါ့ကို သံသယဖြစ်နေတာတင် မဟုတ်ဘူး... ငါလုပ်တာလို့ကို အခိုင်အမာ ယုံကြည်နေကြတာပဲ။'

နှစ်နာရီအကြာတွင်၊

"သခင်လေး။"

"အင်း?"

"ဒါက ကျွန်တော် ထင်ထားတာထက်တောင် ပိုဆိုးနေပါပြီ။"

"...ဘယ်လောက်တောင် ဆိုးနေလို့လဲ?"

"အခုဆိုရင် သခင်လေးက တစ်ရက်တည်းနဲ့ Avalon ဂိုဏ်းကို အမြစ်ပြတ်အောင် ချေမှုန်းနိုင်တဲ့၊ ပါလက်တီယို မိသားစုရဲ့ ကွယ်ဝှက်ထားတဲ့ အင်အားစုကြီးအဖြစ် နာမည်ကြီးနေပါပြီ။"

အာလွန်သည် သူကိုယ်တိုင်ပင် မသိလိုက်ဘဲ ပါလက်တီယို မိသားစုအတွင်း အင်အားကြီးမားသော နောက်ကွယ်မှ ကြိုးကိုင်သူကြီးအဖြစ် ကောလာဟလ ထွက်နေသည်ကို သိလိုက်ရသည်။

"ငါက... ပေါင်မုန့်ကင်နေရုံတင်ပါ..."

သူ့အပေါ် ထိုကဲ့သို့ ကောလာဟလများ ပျံ့နှံ့နေစဉ်အတွင်း ရော့ဒ်မေးလ်၌ ပေါင်မုန့်ကင်ကာ အေးအေးဆေးဆေး နေထိုင်ခဲ့သည့် အဖြစ်အပျက်ကို အာလွန် ညည်းညူလိုက်မိသည်။

"သခင်လေး ပေါင်မုန့်ကင်နေတဲ့ အချိန်အတွင်းမှာပဲ သခင်လေးက ဓားသခင် (Sword Master) တွေကို ထိန်းချုပ်ထားတဲ့ နောက်ကွယ်က ကြိုးကိုင်သူကြီး ဖြစ်သွားတာပါ။"

"ငါ နောက်နေတာကို နားထောင်ဖို့ စိတ်မပါဘူး။"

"ကျွန်တော် နောက်နေတာ မဟုတ်ပါဘူး သခင်လေး။ တကယ် ပျံ့နေတဲ့ ကောလာဟလပါ။"

"...ဒီလို ကောလာဟလက ဘယ်လိုဖြစ်ပြီး ပျံ့သွားတာလဲ?"

အာလွန် မျက်မှောင်ကြုတ်လိုက်သည်။ အခြေအနေကို သူ လုံးဝ နားမလည်နိုင်ပေ။ ထို့ကြောင့် အီဗန်က သတင်းအဖွဲ့အစည်းထံမှ သူရရှိထားသော အချက်အလက်များကို ရှင်းပြလေသည်။

ခဏအကြာတွင်၊

"အကျဉ်းချုပ်ပြောရရင် လီယို သေပြီး တစ်ရက်အကြာမှာပဲ သူထိန်းချုပ်ထားတဲ့ Avalon အဖွဲ့က မှောင်ခိုလောကထဲကနေ အစအနမကျန် ပျောက်ကွယ်သွားတယ်ပေါ့?"

"ဟုတ်ကဲ့။"

"ပြီးတော့... လူတွေက အဲ့ဒါကို ငါလုပ်တာလို့ ထင်နေကြတယ်?"

"အတိအကျပါပဲ။"

"...ဘာလို့လဲ?"

"ဘာလို့လဲဆိုတော့ ဒီအခြေအနေမှာ အကျိုးအမြတ် အများဆုံးရတာက သခင်လေး ဖြစ်နေလို့ပါပဲ။"

"အဲ့လိုပြောတော့လည်း... ဟုတ်သလိုလိုပဲ..."

အမှန်ပင် အာလွန်အနေဖြင့် သံသယကို ရှောင်လွှဲရန် ခက်ခဲလှသည်။ အာလွန် အိမ်တော်ကနေ ရော့ဒ်မေးလ်ကို ထွက်သွားပြီး မကြာခင်မှာပဲ လီယို အသတ်ခံရပြီး Avalon ဂိုဏ်းလည်း ပျက်စီးသွားသည်။

ဤအခြေအနေမျိုးတွင် အာလွန်က အကျိုးအမြတ် အများဆုံးရရှိသူ ဖြစ်နေသည်။ သူသည် ရော့ဒ်မေးလ်မှာ ရှိနေသဖြင့် ခိုင်လုံသော သက်သေရှိသလို၊ ပါလက်တီယို မိသားစု၏ ဆက်ခံသူနေရာကိုလည်း အလိုအလျောက် ရရှိသွားသည်။ ထို့အပြင် Avalon ပျက်စီးသွားသဖြင့် မိသားစုအပေါ် ကပ်ငြိနေသော မှောင်ခိုလောက၏ အရိပ်အယောင်များလည်း လုံးဝ ကင်းစင်သွားခဲ့သည်။ ဆိုလိုသည်မှာ အာလွန်ကို အနှောင့်အယှက်ပေးမည့် မည်သည့် အမှောင်အင်အားစုမျှ မရှိတော့ခြင်းပင်။

"ဒါပေမဲ့... သခင်လေး တကယ်ပဲ မလုပ်ခဲ့တာ သေချာလား?"

"...မင်းလည်း ငါ့ဘေးမှာ ပေါင်မုန့်ပေါ် ထောပတ်သုတ်နေတာပဲ မဟုတ်လား။"

"ဒါကတော့ ဟုတ်ပါတယ်၊ ဒါပေမဲ့ အရာအားလုံးက ကွက်တိဖြစ်လွန်းနေလို့ ကျွန်တော် မေးကြည့်တာပါ။"

"မင်းက ငါ့ကို သံသယဝင်နေတာလား...?"

"သံယယဝင်တာတော့ မဟုတ်ပါဘူး၊ ဒါပေမဲ့ သခင်လေးက တစ်ခါတလေ အကြောင်းရင်း မရှင်းပြဘဲ အမိန့်တွေ ပေးတတ်လို့ပါ။"

အီဗန်၏ စကားကြောင့် အာလွန် နှုတ်ဆိတ်သွားသည်။ ထိုအချက်မှာ မှန်ကန်နေသောကြောင့် ဖြစ်သည်။ သူသည် ပြန်မဖြေဘဲ စဉ်းစားခန်း ဝင်လိုက်သည်။

'အရှေ့ဘက်ဒေသမှာ Avalon လို အဖွဲ့ကြီးကို ဖြိုဖျက်နိုင်တဲ့ အဖွဲ့မျိုး ရှိသလား? 'တစ်ရာသော သရဲတစ္ဆေများ စီတန်းလှည့်လည်ပွဲ' (The Hundred Ghost Night Parade) လား? မဟုတ်ဘူး၊ သူတို့က နောက်ထပ် ခြောက်နှစ်ကြာမှ ပေါ်လာမှာ။ ဒါဆို 'Root' အဖွဲ့လား? မဟုတ်ဘူး၊ သူတို့က အရှေ့ဘက်မှာပဲ အခြေစိုက်တာဆိုတော့ ဒီအထိ လာမှာမဟုတ်ဘူး...'

အာလွန် ခေါင်းခါလိုက်သည်။ မည်မျှပင် စဉ်းစားစေကာမူ Avalon ကို မျက်တောင်တစ်ခတ်အတွင်း ဖျက်ဆီးနိုင်မည့် အဖွဲ့အစည်းမျိုးကို သူ မတွေးမိပေ။ ထိုစဉ် တစ်ခုကို သူ သတိရသွားသည်။

"...အာ။"

"အာ။"

အီဗန် အရင်က ပြောခဲ့ဖူးသည့် အရာတစ်ခုကို သူ သတိရသွားကာ မေးလိုက်သည်။

"အီဗန်။"

"ဟုတ်ကဲ့?"

"မင်း အရင်က ပြောခဲ့ဖူးတဲ့ တခြားအဖွဲ့တွေကို လိုက်နှိမ်နင်းနေတဲ့ အဖွဲ့အကြောင်း မှတ်မိလား?"

"ဪ၊ 'အပြာရောင်လမင်း' (Blue Moon) ကို ပြောတာလား?"

"အေး၊ အဲ့ဒီအဖွဲ့။ သူတို့များ ဖြစ်နိုင်မလား?"

အာလွန်၏ မေးခွန်းကို အီဗန်က ခေါင်းခါပြသည်။

"မဟုတ်ပါဘူး။ သတင်းအဖွဲ့အစည်းကလည်း 'အပြာရောင်လမင်း' မဟုတ်ဘူးလို့ အတည်ပြုထားပါတယ်။"

"သူတို့က ဘယ်လိုလုပ် သေချာနေတာလဲ?"

"အပြာရောင်လမင်းက အလုပ်တစ်ခုပြီးတိုင်း အမြဲတမ်း အမှတ်အသား ချန်ထားခဲ့လေ့ရှိတယ်။ ပြီးတော့ အပြာရောင်လမင်း ရောက်သွားတဲ့နေရာမှာ အသားစတွေပဲ ကျန်ခဲ့လေ့ရှိပြီး အလောင်းတွေကတော့ အကောင်းပကတိ မကျန်တတ်ဘူး။"

"ဒါပေမဲ့ ဒီတစ်ခါတော့ အဲ့လိုမဟုတ်ဘူးပေါ့?"

"ဟုတ်ကဲ့၊ ငရဲခန်းတစ်ခုလိုပဲ တကယ့်ကို ရက်ရက်စက်စက် ဓားနဲ့ အခုတ်ခံထားရတာလို့ ပြောပါတယ်။"

"အဲ့ဒါကြောင့် ငါ့မှာ ဓားသခင်တစ်ယောက် ရှိနေတယ်လို့ သူတို့ ထင်နေကြတာပေါ့..."

"အတိအကျပါပဲ။"

အီဗန်၏ ရှင်းပြချက်ကို အာလွန် ခေါင်းညိတ်လိုက်သည်။

'နောက်ထပ် ခြောက်နှစ်တောင် မရှင်သန်နိုင်မယ့် အဖွဲ့အစည်းတစ်ခုက လီယိုနဲ့ Avalon ကို အမြစ်ပြတ်အောင် မလုပ်နိုင်တာတော့ အမှန်ပဲ... ဒါဆိုရင် ဘယ်သူများ ဖြစ်မလဲ?'

ထိုညသည် အဆုံးမရှိသော အတွေးများဖြင့် ကုန်ဆုံးသွားခဲ့သည်။

"အစအနတွေ ကျန်ခဲ့သေးလား?"

အရှေ့ဘက်ဒေသရှိ မိဘမဲ့ဂေဟာ၏ မြေအောက်ခန်းတွင် ပုံမှန်အတိုင်း လေးဦးသား စုဝေးမိသည်နှင့် မေးခွန်းက ထွက်ပေါ်လာသည်။

"ကျွန်မ ဘာမှမချန်ခဲ့ဘူး။"

"ကျွန်တော်လည်း အတူတူပဲ!"

"ကျွန်မလည်း ဘာအစအနမှ မကျန်အောင် သေချာလုပ်ခဲ့ပါတယ်။"

စိမ်းဖျော့ဖျော့ မျက်လုံးများ ပိုင်ရှင် ရိုင်း (Rine) က ဆက်ပြောသည်။

"သတင်းအဖွဲ့အစည်းကတော့ Avalon မှာ ဖြစ်သွားတဲ့ကိစ္စနဲ့ ကျွန်မတို့ကို ဆက်စပ်မိပုံမရဘူး။"

"ပြီးတော့ရော?"

"ငရဲခန်းတစ်ခုကို ဖန်တီးခဲ့တဲ့ ဓားသခင်တစ်ယောက်ရဲ့ လက်ချက်လို့ပဲ သူတို့ သတ်မှတ်ထားကြတယ်။"

ဒူးစ် (Deus) ၏ စကားကြောင့် ယူတီယာ (Yutia) သည် ခဏမျှ စဉ်းစားနေပြီးမှ ပြောလိုက်သည်။

"ဒါပေမဲ့ စိတ်ချရအောင် သတင်းအဖွဲ့အစည်းရဲ့ လှုပ်ရှားမှုတွေကို ဆက်ပြီး စောင့်ကြည့်ပါ။ ငါ အကြိမ်ကြိမ် ပြောခဲ့သလိုပဲ၊ မင်းတို့အားလုံး နားလည်ကြတယ် မဟုတ်လား? ဒီသတင်းက 'သူ့' ဆီကို လုံးဝ မရောက်စေရဘူး။ ဘယ်တော့မှ။"

ယူတီယာ၏ ရဲရဲနီသော မျက်လုံးများက ပြင်းထန်စွာ တောက်ပနေသော်လည်း အားလုံးက မတွန့်ဆုတ်ဘဲ ခေါင်းညိတ် သဘောတူကြသည်။

"...ဒါပေမဲ့ ဒါကို ဒီလောက်အထိ ဖုံးကွယ်ထားဖို့ လိုလို့လား?"

ယူတီယာ၏ ထူးထူးခြားခြား တင်းမာနေသော ပုံစံကို ကြည့်ရင်း ဒူးစ်က စိုးရိမ်တကြီး မေးလိုက်သည်။ ခဏအကြာတွင် ယူတီယာက ခိုင်မာစွာ ပြန်ဖြေသည်။

"ဒါပေါ့၊ ဖုံးကွယ်ထားရမယ်။"

"...ဘာလို့လဲ?"

ဒူးစ်၏ မေးခွန်းကို ယူတီယာက မျက်လုံးချင်းစိုက်ကြည့်ရင်း ပြန်ဖြေသည်။

"ငါပြောခဲ့တယ် မဟုတ်လား? ငါတို့က သူ့ရဲ့ ဓားတွေပဲ။ ငါတို့က ကိုယ့်ဖာသာ ဆုံးဖြတ်တာမျိုး၊ စဉ်းစားတာမျိုး မလုပ်ရဘူး။ သူအသုံးပြုတဲ့ ဓားတွေအဖြစ်ပဲ နေရမယ်။"

"ဒါပေမဲ့ ဓားတစ်စောင်က သူ့အလိုလို စဉ်းစားတာ... ဒါက မမှန်ဘူး မဟုတ်လား?"

"ဒါပေမဲ့ ကောင့်မိသားစုရဲ့ သားကြီးက သူ့ကို အရင် ပစ်မှတ်ထားခဲ့တာလေ၊ အဲ့ဒါကြောင့်—"

"အဲ့ဒါက အရေးမကြီးဘူး။ မှားတာက မှားတာပဲ။ 'အမိန့်' မရှိခဲ့ဘူး။ နားလည်လား? ငါတို့က သူ့ရဲ့ အမိန့်ရှိမှပဲ လှုပ်ရှားရမယ်။ သူ ဘာမှမပြောရင် ငါတို့ ဘာမှ မလုပ်ရဘူး။ ဘယ်တော့မှ။"

ဒူးစ်သည် ယူတီယာ၏ မျက်လုံးများကို ကြည့်ရင်း လည်ချောင်းထဲတွင် ခြောက်ကပ်သွားသလို ခံစားလိုက်ရသည်။ မိဘမဲ့ဂေဟာတွင် နေထိုင်သူတစ်ဦး ဖြစ်သော်လည်း သူမ၏ ပုံစံမှာ ဂုဏ်သိက္ခာကြီးမားပြီး မည်သူမျှ မဆန့်ကျင်ဝံ့သော အရှိန်အဝါမျိုး ရှိသည်။ သို့သော် သူမသည် 'သူ့' အကြောင်း ပြောလာလျှင်မူ တစ်စုံတစ်ခု ပြောင်းလဲသွားတတ်သည်။

သူမ၏ ဂုဏ်သိက္ခာရှိသော အကြည့်များသည် ကြောက်မက်ဖွယ်ကောင်းသော အစွန်းရောက်မှုအဖြစ် ပြောင်းလဲသွားပြီး၊ မြင့်မြတ်သော အရှိန်အဝါမှာလည်း ရိုင်းစိုင်းကြမ်းတမ်းသော မိစ္ဆာတစ်ကောင်ကဲ့သို့ ဖြစ်သွားတတ်သည်။ ထို့ကြောင့် ဒူးစ် နားမလည်နိုင်ပေ။

"ဒါကြောင့် အစအနမှန်သမျှကို ဖျောက်ပစ်ပါ။ သူ့ကို စိတ်ပျက်အောင် မလုပ်နဲ့။"

သူမကဲ့သို့ အရှိန်အဝါဖြင့် လူတိုင်းကို လွှမ်းမိုးနိုင်စွမ်း ရှိသူတစ်ဦးက 'အမှန်တရား ပေါ်သွားမှာ' ကို ဘာကြောင့် ဤမျှအထိ စိုးရိမ်ထိတ်လန့်နေရသနည်းဆိုသည်ကို ဒူးစ် မတွေးတတ်ပေ။

"နားလည်ပါပြီ။"

ဒူးစ်သည် သံသယများ ရှိနေသော်လည်း အပြင်ကို ထုတ်မပြောဘဲ ခေါင်းညိတ်လိုက်သည်။ စကားဝိုင်း ပြီးဆုံးခါနီးတွင်၊

"သူတို့ ရောက်လာပြီ။"

မြေအောက်ခန်း တံခါးပွင့်သွားပြီး အမျိုးသားတစ်ဦး ဝင်လာသည်။ အလင်းရောင်မရှိသော မြေအောက်ခန်းထဲတွင်ပင် သူ၏ ဆံပင်များမှာ လရောင်ကို ဖမ်းယူထားသည့်အလား ငွေရောင်များ တောက်ပနေသည်။

"ခေါင်းဆောင် ပြောတဲ့အတိုင်းပါပဲ။"

သူသည် နောင်တွင် ကြီးမြတ်သော အပြစ်ငါးပါးထဲမှ တစ်ဦးဖြစ်သည့် 'စွဲလမ်းခြင်းအပြစ်' (The Sin of Obsession) ဖြစ်လာမည့်သူ ဖြစ်သည်။

"Avalon ရဲ့ ကျန်ရှိနေတဲ့ အင်အားစု ၂၈၆ ယောက်စလုံး..."

လဒန် (Ladan) က သူ၏ စူးရှသော မျက်လုံးများဖြင့် အစီရင်ခံသည်။

"ကျွန်တော် အားလုံးကို နှစ်ပိုင်းပိုင်းပြီး သတ်လိုက်ပါပြီ။"

အက်စတေးရီးယား နိုင်ငံတော်၏ အရှေ့ဘက်ဒေသကို လွှမ်းမိုးထားသော Avalon အဖွဲ့ကြီးမှာ ငါးရက်အတွင်း အစအနမကျန် ပျောက်ကွယ်သွားခဲ့ရသည်။

"ဒါပေမဲ့ အလုပ်ကတော့ လုံးဝ မပြီးသေးဘူး ထင်တယ်။"

"ဘာကို ဆိုလိုတာလဲ?"

"Avalon နဲ့ ဆက်နွယ်နေတဲ့ တခြားမှူးမတ်တွေကို ကျွန်တော် တွေ့ခဲ့တယ်။"

လဒန်သည် သူ၏ ရင်ဘတ်ထဲမှ အသေအချာ ခေါက်ထားသော စာရွက်တစ်ရွက်ကို ထုတ်ကာ စားပွဲပေါ် တင်လိုက်သည်။

"အယ်လ်တီးယား (Altia) ဒျုခ် (Duke) မိသားစုလည်း ပါဝင်နေတယ်။ သူတို့က အတော်လေး နက်နက်ရှိုင်းရှိုင်း ပတ်သက်နေပုံရပြီး စာရင်းဇယားတွေလည်း ရှိနေတယ်။ ဒျုခ်ရဲ့ သားသမီး လေးယောက်လောက် ပါဝင်နေတာ။ သူတို့က ဒီကိစ္စနဲ့ ပတ်သက်ပြီး စုံစမ်းမေးမြန်းတာတွေ လုပ်လာနိုင်တယ်။ ဘာလုပ်ကြမလဲ?"

ယူတီယာသည် ခဏမျှ စဉ်းစားနေပြီးမှ ပြောလိုက်သည်။

"ငါ ဘာပြောမလဲဆိုတာ မင်း သိပြီးသား မဟုတ်လား?"

သူမ၏ ရဲရဲနီသော မျက်လုံးများက ကြောက်မက်ဖွယ်ကောင်းစွာ တောက်ပနေသည်။

"နားလည်ပါပြီ။ တတ်နိုင်သမျှ တိတ်တိတ်ဆိတ်ဆိတ်ပဲ ရှင်းလိုက်ပါ့မယ်။"

လဒန်က တည်ငြိမ်စွာ ခေါင်းညိတ်လိုက်သည်။

လီယို၏ ဈာပနပြီးကတည်းက အာလွန်သည် အလွန်ပင် အလုပ်များနေခဲ့သည်။ ဂိမ်းဇာတ်လမ်းနှင့် ကွဲလွဲနေသော လီယို၏ သေဆုံးမှုကို စုံစမ်းရရုံသာမက၊ သူ မလုပ်ချင်သော်လည်း လုပ်ဆောင်ရမည့် ကိစ္စများစွာက သူ့ကို ဆီးကြိုနေခဲ့သည်။

ရလဒ်အနေဖြင့် သူ၏ နေ့ရက်များသည် လှုပ်ရှားမှုပေါင်းစုံဖြင့် ကုန်ဆုံးသွားခဲ့သည်။ ဈာပနပြီး တစ်လခန့်အကြာတွင် သူသည် ပါလက်တီယို အိမ်တော်၌ မဟုတ်ဘဲ အက်စတေးရီးယား နိုင်ငံတော်၏ တောင်ဘက်ဒေသရှိ အက်စ်ထရိုဗန် (Estrovan) နယ်မြေသို့ ရောက်ရှိနေသည်။

အကြောင်းရင်းမှာ တစ်နှစ်လျှင် နှစ်ကြိမ် ကျင်းပလေ့ရှိသော မှူးမတ်များ၏ ကပွဲသို့ တက်ရောက်ရန် ဖြစ်သည်။ တရားဝင်အားဖြင့်တော့ လူမှုဆက်ဆံရေး နယ်ပယ် ချဲ့ထွင်ရန် ဖြစ်သော်လည်း၊ အမှန်တကယ်တော့ သူသည် ထိုနယ်မြေတွင် လုပ်ဆောင်စရာ လုပ်ငန်းအချို့ ရှိနေသောကြောင့် ဖြစ်သည်။

သို့သော်လည်း သူသည် တရားဝင် ရည်ရွယ်ချက်ကိုလည်း အတိုင်းအတာတစ်ခုအထိ အကောင်အထည်ဖော်ရန် ရည်ရွယ်ထားသည်။ လာမည့်နှစ်တွင် ကောင့်မင်းကြီး ဖြစ်လာရန် သေချာနေပြီဖြစ်ရာ၊ တခြားမှူးမတ်များနှင့် ရင်းနှီးမှု တည်ဆောက်ထားခြင်းက သူ၏ အဆင့်အတန်းအတွက်ရော၊ အနာဂတ်တွင် ကိစ္စရပ်များ အဆင်ပြေစေရန်အတွက်ပါ အရေးကြီးသောကြောင့် ဖြစ်သည်။

... သို့သော် သူ ထင်ထားသလို ဖြစ်မလာခဲ့ပေ။

အာလွန်သည် ကပွဲခန်းမကို ဝေ့ကြည့်လိုက်သည်။ လခြမ်းပုံစံ ဆွဲလဲမီးအိမ်ကြီးက ခန်းမတစ်ခုလုံးကို လှပစွာ လင်းထိန်စေပြီး၊ မှူးမတ်သားပျို၊ သမီးပျိုများသည်လည်း သူတို့၏ အကောင်းဆုံး ဝတ်စုံများဖြင့် ခမ်းနားထည်ဝါစွာ ရှိနေကြသည်။

ပြဿနာက...

မည်သည့် မှူးမတ်ကမျှ အာလွန်နှင့် မျက်လုံးချင်း တည့်တည့် မကြည့်ရဲကြခြင်းပင်။

မှူးမတ်အမျိုးသမီးငယ်တစ်ဦးသည် အာလွန်နှင့် အကြည့်ချင်းဆုံသည်နှင့် ချက်ချင်း ခေါင်းငုံ့သွားသည်ကို သူ မြင်လိုက်ရသည်။ သူ သက်ပြင်းချလိုက်မိသည်။ 'လူမှုဆက်ဆံရေး နယ်ပယ် ချဲ့ထွင်ရန်' ဟူသော သူ၏ ရည်မှန်းချက်မှာ သူ ထင်ထားသည်ထက် ပို၍ ခက်ခဲတော့မည်ကို သူ သိလိုက်ရပြီ ဖြစ်သည်။