အခန်း (၂၅)  တောင်းပန်ခြင်း

ကူးယွမ်တံခါးဖွင့်၍ အထဲဝင်လိုက်သောအခါ အိမ်ထဲတွင် လူစိမ်းသုံးယောက် ရောက်နေသည်ကို တွေ့လိုက်ရသည်။

ဦးဆောင်လာသူမှာ ပိုးအင်္ကျီဝတ်ထားသော ဗိုက်ရွှဲရွှဲနှင့် အဘိုးကြီးတစ်ဦး ဖြစ်သည်။ သူသည် အရပ်မရှည်သော်လည်း မျက်နှာမှာ ဝိုင်းစက်နီမြန်းနေပြီး ပြုံးရွှင်သော မျက်နှာပေးရှိသည်။

သူ၏ အရှိန်အဝါမှာ သာမန်တောသားများတွင် မရှိနိုင်သော အသွင်အပြင်မျိုး ဖြစ်သည်။

သူ၏နောက်တွင်မူ သန်မာထွားကြိုင်းပြီး မျက်လုံးများ အရောင်တောက်နေသော ခြံရံပါ ၂ ယောက် ပါလာသည်။

ကူးယွမ်၏ မိဘများမှာမူ ထိုသူများကို ပြုံးရွှင်စွာဖြင့် စကားပြောနေကြသည်။ ကူးယွမ် ဝင်လာသည်နှင့် ထိုအဘိုးကြီးက အာရုံရသွားပြီး လှမ်းကြည့်လိုက်သည်။

သူသည် ကူးယွမ်၏ ခါးတွင် ချိတ်ထားသော ယုတိန်ခန်းမ၏ "ဆေးပင်ရှာဖွေသူ" သံပြားကို တစ်ချက်ကြည့်ကာ မျက်လုံးများ ကျဉ်းမြောင်းသွားပြီးနောက် ပြုံး၍ ထရပ်လိုက်သည်။

"ဒီအဘိုးကြီးရဲ့နာမည်ကဝူပါ ချန်အိမ်တော်ရဲ့ ကြီးကြပ်ရေးမှူး တစ်ယောက်ပါ မင်းက မောင်ကူးယွမ် ထင်တယ်"

မြေခွေးအိုကြီးပဲထိုအဘိုးကြီးကို မြင်သည်နှင့် ကူးယွမ်၏ စိတ်ထဲတွင် ထိုအတွေး ပေါ်လာသော်လည်း အပြင်ပန်းတွင်မူ ပြုံးပြလိုက်သည်။

 "ဝူကြီးကြပ်ရေးမှူး ခင်ဗျားက အားနာစရာကြီးပဲ ကျွန်တော်ကူးယွမ်ပါ မောင်ဆိုတဲ့ ဘွဲ့ထူးကြီးတော့ မခေါ်ပါနဲ့ ကူးယွမ်လို့ပဲ ခေါ်ပါ"

မြေခွေးပေါက်စလေးပဲ ကူးယွမ်၏ အပြုံးကို မြင်သောအခါ ဝူကြီးကြပ်ရေးမှူး စိတ်ထဲမှ မျက်မှောင်ကြုတ်လိုက်မိသည်။

အရင်က ကူးယွမ်သည် ချန်အိမ်တော်မှ အမဲလိုက်ခွေးများ၏ အကိုက်ခံရကာ သေလုနီးပါး ဖြစ်ခဲ့ဖူးသလို ဝူကြီးကြပ်ရေးမှူးကိုယ်တိုင်လည်း ကူးယွမ်တို့အိမ်သို့ လာရောက်ကာ ခြိမ်းခြောက်ဖိအားပေး၍ ထိုကိစ္စကို ဖုံးဖိခဲ့ဖူးသည်။

ထို့ကြောင့် ကူးယွမ်နှင့် ချန်အိမ်တော်ကြားတွင် ကြီးမားသော ရန်ငြိုးရှိနေသည်မှာ နှစ်ဖက်စလုံး သိထားပြီးသားဖြစ်သည်။

အကယ်၍ ကူးယွမ်က သူ့ကိုမြင်လျှင်မြင်ချင်း ရန်လိုသော အမူအရာ ပြလိုက်ပါက သူက အထင်မကြီးမိပေ။ သို့သော် ယခုမူ ကူးယွမ်သည် ရန်ငြိုးမရှိသယောင် ပြုံးပြနိုင်ခြင်းမှာ ကူးယွမ်သည် စိတ်သဘောထား အလွန်နက်ရှိုင်းပြီး ရန်လိုမှုကို ဖုံးကွယ်ထားနိုင်သူဖြစ်ကြောင်း သူ သဘောပေါက်လိုက်သည်။

 ဤကောင်လေးမှာ အသက် ၁၇ နှစ်သာ ရှိသေးသော်လည်း မရိုးရှင်းလှပေ။

"ကောင်းပြီလေ ဒါဆိုရင် ငါက ညီလေးကူး လို့ပဲ ခေါ်တော့မယ်" ဝူကြီးကြပ်ရေးမှူးက ရယ်မောရင်း လက်ခုပ်တီးလိုက်ရာ နောက်မှ လူယုံ ၂ ယောက် ရှေ့သို့ တက်လာကြသည်။

တစ်ယောက်က အနုစိတ်ထွင်းထုထားသော ဓားရှည်တစ်လက်ကို ကိုင်ထားပြီး နောက်တစ်ယောက်က သစ်သားသေတ္တာတစ်လုံးကို ပြလိုက်သည်။ သေတ္တာထဲတွင် ငွေတုံးပေါင်း ၅၀ ကျော် ရှိနေသည်။

"ဒါငွေတွေ အများကြီးပါလား" ကူးယွမ်၏ မိဘများမှာ ထိုငွေများကို ကြည့်ရင်း အံ့ဩလွန်း၍ စကားပင် မပြောနိုင်တော့ပေ။

တစ်သက်လုံး ဆင်းရဲလာခဲ့သော သူတို့အတွက် ငွေ ၅၀ ဆိုသည်မှာ တစ်ခါမှ မမြင်ဖူးသော ပမာဏပင်။

ဝူကြီးကြပ်ရေးမှူးက ပြုံး၍ ရှင်းပြသည်။ ညီလေးကူး ဓားသိုင်းသင်နေတယ်လို့ ကြားလို့ ဒီဓားကို လက်ဆောင်ပေးတာပါ ဒါကသံမဏိကောင်းနဲ့ လုပ်ထားတဲ့ ဓားဖြစ်ပြီး ချန်အိမ်တော်ရဲ့ စုဆောင်းမှုတစ်ခုပဲ။ ပြီးတော့ ဒီငွေ ၅၀ ကတော့ အရင်က ဖြစ်ခဲ့တဲ့ ကိစ္စတွေအတွက် လျော်ကြေးပေါ့။

သူက ဆက်ပြောသည် ရန်ငြိုးထားတာထက်ရန်ပြေတာက ပိုကောင်းပါတယ်။ အရင်က ငါတို့သခင်လေးက ခွေးတွေကို သေချာမထိန်းနိုင်လို့ ညီလေး ဒဏ်ရာရခဲ့တာဟာ ငါတို့အမှားပါ။

သခင်လေးကလည်း နောင်တရနေပြီး အခုတော့ အဲဒီခွေးတွေကို ရှင်းပစ်လိုက်ပါပြီ။ ဒါကြောင့် ဒီဓားနဲ့ ငွေတွေကို ညီလေး လက်ခံပေးဖို့ မျှော်လင့်ပါတယ်။

ကူးယွမ် စိတ်ထဲမှ လှောင်ပြုံးပြုံးလိုက်မိသည်။ နောင်တရတယ် တောင်းပန်တယ်

အကယ်၍ သူသာ ယုတိန်ခန်းမ၏ ဆေးပင်ရှာဖွေသူ ဖြစ်မလာခဲ့လျှင် ကိုယ်ခံပညာ သင်မနေခဲ့လျှင် သူတို့ တောင်းပန်ပါ့မလား သူ သေသွားရင်တောင် တစ်ချက်လှည့်ကြည့်ကြမှာ မဟုတ်ပေ။

၎င်းမှာ ချန်အိမ်တော်က ကူးယွမ်၏ နောက်ကြောင်းကို စုံစမ်းပြီး ကူးယွမ်၏ အဆင့်အတန်း ပြောင်းလဲသွားမှုကို အသိအမှတ်ပြုကာ လာရောက်တောင်းပန်ခြင်း ဖြစ်သည်။

ဓားပေးခြင်းမှာ တောင်းပန်ခြင်းလည်း ဖြစ်သလို ၎င်းတို့၏ အင်အားကို ပြသကာ ခြိမ်းခြောက်လိုက်ခြင်းလည်း ဖြစ်သည်။ 

အကယ်၍ ကူးယွမ်က လက်ခံလျှင် ဤကိစ္စ ပြီးဆုံးသွားမည် ဖြစ်သော်လည်း ငြင်းပယ်လျှင်မူ နှစ်ဖက်စလုံး ရန်သူဖြစ်သွားမည် ဖြစ်သည်။

"ကျေးဇူးတင်ပါတယ် ဝူကြီးကြပ်ရေးမှူး။ တကယ်တော့ ကျွန်တော်က အဲဒီကိစ္စကို စိတ်ထဲမှာ မထားပါဘူး ခင်ဗျား မပြောရင် ကျွန်တော်တောင် မေ့နေပြီ" ဟု ကူးယွမ်က ရှက်ကိုးရှက်ကန်း အပြုံးလေးဖြင့် ပြောလိုက်သည်။

 ဒါပေမဲ့ ခင်ဗျားကိုယ်တိုင် လာတောင်းပန်တာဆိုတော့ ကျွန်တော် မယူရင် ခင်ဗျားကို အားနာစရာ ဖြစ်နေလိမ့်မယ် ဒါကြောင့် ဒီပစ္စည်းတွေကို ကျွန်တော် မငြင်းဘဲ လက်ခံလိုက်ပါမယ်။

ဝူကြီးကြပ်ရေးမှူး၏ မျက်နှာ အနည်းငယ် တွန့်သွားသည်။ စိတ်ထဲမထားဘူး ဟုတ်လား အဲဒါကို ယုံတဲ့လူက အရူးပဲ။

ကူးယွမ်၏ မျက်နှာပြောင်တိုက်၍ လိမ်ညာပြောဆိုနိုင်မှုက ဤကောင်လေးမှာ မရိုးရှင်းကြောင်း ဝူကြီးကြပ်ရေးမှူးကို ပို၍ သေချာသွားစေသည်။ အနည်းဆုံးတော့ သူ၏ မျက်နှာအသားက အတော်လေး ထူလှသည်။

ကိစ္စပြီးသွားသဖြင့်ဝူကြီးကြပ်ရေးမှူးသည်ကူးယွမ်နှင့်စကားအနည်းငယ်ထပ်မံပြောဆိုပြီးနောက်ပြန်လည်ထွက်ခွာသွားတော့သည်။