အခန်း (၁၅၄)  ယွမ်မင်ဂိုဏ်း

အလောင်းသုံးကောင် အဘိုးအိုရဲ့ ခန္ဓာကိုယ်ဟာ ပြာအဖြစ် ပြောင်းလဲသွားပြီးနောက်မှာတော့ အထဲကနေ အနက်ရောင် အရိပ်တစ်ခု ပျံထွက်လာသည်။ ကူးယွမ်ရဲ့ ဓားအလင်းတွေက အဲဒီအရိပ်ကို ဖြတ်သန်းသွားပေမဲ့ ရေလှိုင်းလေးတစ်ခု ထသွားရုံကလွဲလို့ ဘာမှ မထိခိုက်စေနိုင်ပါဘူး။

"ကလေးလေး... မင်းက တကယ်ကို တော်တာပဲ မင်းကိုသာ ငါ့ရဲ့ ကိုယ်ပွားအဖြစ် ပြောင်းလဲနိုင်ရင် ငါ့မှာ ဓားသမား နတ်ဘုရားတစ်ပါး ထပ်တိုးလာမှာပဲ" လို့ ထူးဆန်းတဲ့ အသံကြီးနဲ့ ပြောလိုက်သည်။

အဲဒီအရိပ်ဟာ လူပုံသဏ္ဌာန် ပြောင်းလဲသွားပြီး "မင်းရဲ့ ဓားသိုင်းက ကောင်းကင်ဘုံအဆင့်တွေကို သတ်နိုင်ပေမဲ့ ငါ့ရဲ့ လျှို့ဝှက်ကိုယ်ပွားကတော့ ရွှေအမြုတေအဆင့်ထက်တောင် မြင့်မားတဲ့ အဆီအနှစ်တွေ ပါဝင်နေတာ။ အခုတော့ ငါ့ရဲ့ ဝါးမြိုတာကိုပဲ ခံလိုက်စမ်း" လို့ဆိုကာ ကူးယွမ်ရဲ့ ခန္ဓာကိုယ်ကို သိမ်းပိုက်ဖို့ အရှိန်နဲ့ ပြေးဝင်လာသည်။

ကူးယွမ်ကလည်း အလျှော့မပေးဘဲ သူ့ရဲ့ ငွေနဂါးဓား ကို အစွမ်းကုန် အသုံးချပြီး ခုခံဖို့ ကြိုးစားလိုက်သည်။ ဒါပေမဲ့ မိစ္ဆာအိုကြီးရဲ့ စိတ်အာရုံက အလွန်အစွမ်းထက်လွန်းတာကြောင့် သူဟာ အသည်းအသန် တောင့်ခံနေရသည်။

ချွင်

အဲဒီအချိန်မှာပဲ ကောင်းကင်ယံကနေ နေမင်းကြီးလို တောက်ပတဲ့ ဓားအလင်းတန်းကြီး တစ်ခု ကျဆင်းလာပြီး အနက်ရောင်အရိပ်ကို မြေပြင်မှာ သံမှိုရိုက်သလိုမျိုး တွယ်ကပ်ပစ်လိုက်သည်။ မိစ္ဆာအိုကြီးက ဘယ်လိုပဲ ရုန်းကန်ပေမဲ့ အဲဒီဓားအလင်းအောက်ကနေ မလွတ်မြောက်နိုင်ပါဘူး။

"အလောင်းသုံးကောင်... မင်းက ယင်းဝိညာဉ်အဆင့်ရောက်တော့မယ့် လူကြီးတစ်ယောက် ဖြစ်နေပြီးတော့မှ ကောင်းကင်ဘုံအဆင့်တောင် မရှိသေးတဲ့ ကလေးလေးကို အနိုင်ကျင့်နေတာ မရှက်ဘူးလား"

အသံလာရာကို ကြည့်လိုက်တော့ ကူးယွမ်ရဲ့ ဆရာ စီနီယာဟယ်လင်ရောက်ရှိလာတာပါ။

"ဆရာ" ကူးယွမ်က ရိုသေစွာ နှုတ်ဆက်လိုက်သည်။

မြေပြင်မှာ အပိတ်ခံထားရတဲ့ မိစ္ဆာအိုကြီးက "ငါက မိစ္ဆာကျင့်ကြံသူပဲ ဘာလို့ဂုဏ်သိက္ခာကို ဂရုစိုက်နေရမှာလဲ ဒီကလေးရဲ့ အခြေခံက အရမ်းကောင်းလွန်းလို့ ဘယ်သူမဆို လိုချင်ကြမှာပဲ" လို့ အေးအေးဆေးဆေး ပြန်ပြောသည်။ သူက ဆက်ပြီး စီနီယာဟယ်လင်ကို "မင်းကလည်း မင်းရဲ့ဂိုဏ်းကို နာမည်ကြီးအောင် ဒီကလေးကို သုံးဖို့ ကြံနေတာ မဟုတ်လား" လို့ ပြန်လည် မေးခွန်းထုတ်လိုက်သည်။

စီနီယာဟယ်လင်ကတော့ ဒါကို ဂရုမစိုက်ဘဲ "တော်စမ်း မင်းက ဘာလို့ ယွမ်မင်ဂိုဏ်းမှာ မနေဘဲ ရှီကျိုး ကို ရောက်လာတာလဲ ဒီနေရာမှာရှိတဲ့ နဂါးနီနတ်ဘုရားနန်းတော်ရဲ့ ပိုင်ရှင်က မိစ္ဆာတွေကို အရမ်းမုန်းတာ မင်းသိသားနဲ့"

အလောင်းသုံးကောင် အဘိုးအိုက ထူးဆန်းစွာ ရယ်မောလိုက်ပြီး "ငါဘာလို့လာလဲဆိုတာ မင်းတို့ ဆေးဘုရင်တောင်က သိမှာပါ" လို့ ပြောလိုက်သည်။

သူက ဆက်လက်ရှင်းပြတာကတော့... အရင်က ရှီကျိုးအပါအဝင် တောင်ပိုင်းပြည်နယ် ၆ ခုဟာ ယွမ်မင်ဂိုဏ်းရဲ့ နယ်မြေတွေ ဖြစ်ခဲ့တာပါ။ ဒါပေမဲ့ တရားမျှတတဲ့ လမ်းစဉ်ဘက်က ပညာရှင်တွေက သူတို့ကို တိုက်ထုတ်ခဲ့တာကြောင့် သူတို့ဟာ အစွန်အဖျားဒေသတွေဆီ ထွက်ပြေးခဲ့ရသည်။

"အခုတော့ မင်းတို့ရဲ့ အကြီးအကဲ ၃ ယောက်စလုံးလည်း မရှိတော့ဘူး။ ငါတို့ ယွမ်မင်ဂိုဏ်းမှာတော့ နတ်ဘုရားဝိညာဉ်အဆင့်ရှိတဲ့ မိစ္ဆာအဆင့်မြင့် ပညာရှင်သစ်တစ်ယောက် ပေါ်ထွန်းလာပြီ။ ငါတို့ ဆုံးရှုံးခဲ့တာတွေကို ပြန်တောင်းဖို့ အချိန်တန်ပြီလေ"

စီနီယာဟယ်လင်ရဲ့ မျက်နှာဟာ ချက်ချင်းဆိုသလို ပျက်ယွင်းသွားသည်။ ဘာကြောင့်လဲဆိုတော့ နတ်ဘုရားဝိညာဉ်အဆင့်ရှိတဲ့ ပညာရှင်တွေဟာ လောကအရေးမှာ ဝင်မပါကြတာ ထုံးစံဖြစ်ပြီး ယွမ်မင်ဂိုဏ်းကသာ ဒီပြည်နယ် ၃ ခုကို ပြန်သိမ်းဖို့ ကြိုးစားရင် ဘယ်သူကမှ သူတို့နဲ့ မပတ်သက်ချင်တာကြောင့် ဝင်တားမှာ မဟုတ်ပါဘူး။ ဒါဟာ ဆေးဘုရင်တောင် ကြယ်စင်မြစ်ဓားဂိုဏ်း နဲ့ ကူးနတ်ဘုရားဂိုဏ်းတို့အတွက် အကြီးအကျယ် ဘေးတွေ့မယ့် ကိစ္စပါ။