အခန်း (၁၅၁)  အမည်မသိ မိစ္ဆာကျင့်ကြံသူ

ကူးယွမ်အတွက် "သက်စောင့်စမ်းရေ"အခြေခံအုတ်မြစ် တည်ဆောက်ဖို့ ရေဓာတ်အဆီအနှစ်တွေ အများကြီး လိုအပ်ပါတယ်။ သာမန်အတိုင်းသာ ကျင့်ကြံရင် နှစ်ပေါင်း ၃၀ ကနေ ၅၀ အထိ ကြာနိုင်ပေမဲ့ အခုရမယ့် "နှစ်တစ်ထောင် လပုလဲ" က သူ့အတွက် အချိန်ကို အများကြီး အတိုချုံးပေးမှာပါ။ အသုံးမလိုတဲ့ "ရာက္ခသ ကျမ်းစာ" ကို ပေးပြီး လိုအပ်တဲ့ ရတနာနဲ့ လဲလှယ်နိုင်တာဟာ သူ့အတွက် တကယ့်ကို တွက်ခြေကိုက်တဲ့ အလုပ်ပါပဲ။

ပေါင်တာထုံ နဲ့ ချိန်းဆိုပြီးလို့ သူ ပြန်ခါနီးမှာပဲ ထူးဆန်းတဲ့ လူတစ်ယောက် ကူးယွမ်ရဲ့ ဘေးမှာ ပေါ်လာသည်။ ပေါင်တာထုံဟာ ဘေးအန္တရာယ်ကို ကြိုတင်သိမြင်နိုင်တဲ့ အစွမ်းရှိသူမို့ ဒီလူ့ဆီက ထွက်နေတဲ့ ကြောက်မက်ဖွယ်ကောင်းတဲ့ အရှိန်အဝါကို ခံစားမိပြီး ချက်ချင်းပဲ လစ်ထွက်သွားလိုက်သည်။

"အဘိုးကြီးချန်"

ကူးယွမ်ဟာ သူ့ရှေ့က လူကို ကြည့်ပြီး အံ့ဩသွားသည်။ အဲဒီလူဟာ အရင်က သူသိတဲ့ အဘိုးကြီးချန်နဲ့ ရုပ်ချင်းမတူဘဲ ပိုပြီး ချောမောခန့်ညားတဲ့ လူလတ်ပိုင်းအရွယ် ဖြစ်နေလို့ပါ။ ဒါဟာ အဘိုးကြီးချန် "ကောင်းကင်မိစ္ဆာ လမ်းစဉ်လုယူခြင်း အတတ်"ကို သုံးပြီး ခန္ဓာကိုယ်အသစ် ပြောင်းလဲထားတာ ဖြစ်မှန်း သူ သိလိုက်သည်။

"ကူးယွမ်လေး... မတွေ့တာ ကြာပြီပဲ" လို့ ချန်ချီက နှုတ်ဆက်ပါတယ်။ "ရေဓာတ်ဝိညာဉ်ခန္ဓာ ဓားနှလုံးသားပါရမီ... ပြီးတော့ စီနီယာဟယ်လင်ရဲ့ တပည့်တောင် ဖြစ်နေပြီပေါ့။ မင်းက ငါ့ကို တကယ် အံ့ဩအောင် လုပ်နိုင်တာပဲ"

အရင်က ဆေးဘုရင်တောင်ရဲ့ အကြီးအကဲဟောင်းဖြစ်ခဲ့တဲ့ အဘိုးကြီးချန်ဟာ အခုတော့ မိစ္ဆာလမ်းစဉ်ကို ကူးပြောင်းသွားသူ ဖြစ်နေပါပြီ။ သူဟာ နဂါးနီနတ်ဘုရားနန်းတော် ကိစ္စအတွက် ရောက်လာတာပါ။ ဒါပေမဲ့ ကူးယွမ်ကတော့ စိုးရိမ်နေပါတယ်။ မိစ္ဆာကျင့်ကြံသူတစ်ယောက်မှန်း ဆရာဟယ်လင် သိသွားရင် အသတ်ခံရမှာ အသေအချာပဲလေ။

ကူးယွမ်က ချန်ချီကို ကြည့်ပြီး "အဘိုးကြီးချန်... ခဏလေးအတွင်းမှာပဲ ခင်ဗျားက ကောင်းကင်ဘုံအဆင့်ကို ရောက်နေပြီလား" လို့ မေးလိုက်သည်။

ချန်ချီက "မိစ္ဆာလမ်းစဉ်က မြန်တာ သဘာဝပဲလေ" လို့ ခပ်အေးအေးပဲ ပြန်ဖြေသည်။ ဒါပေမဲ့ ကူးယွမ်က ရုတ်တရက် မျက်မှောင်ကြုတ်သွားပြီး နောက်ကို ခြေလှမ်းအနည်းငယ် ဆုတ်လိုက်သည်။ သူ့မျက်လုံးတွေက အေးစက်သွားပြီး...

"ခင်ဗျားက အဘိုးကြီးချန် မဟုတ်ဘူး ဘယ်သူလဲ" လို့ အော်မေးလိုက်သည်။

ချန်ချီက အံ့ဩသွားသလိုနဲ့ "ဘာကိုဆိုလိုတာလဲ ငါက အခြေခံသစ်နဲ့ ပြန်စထားလို့ ရုပ်ပြောင်းသွားတာ မင်းလည်း သိသားပဲ" လို့ ပြန်ပြောသည်။ ပြီးတော့ သူတို့နှစ်ယောက်ပဲသိတဲ့ အချက်အလက်တွေ ကူးယွမ်ကို ပေးခဲ့တဲ့ ကျမ်းစာတွေနဲ့ ကူးယွမ်မှာ မိစ္ဆာသားရဲတစ်ကောင် ရှိနေတဲ့အကြောင်းတွေကို ထုတ်ပြောပြီး သက်သေပြလိုက်သည်။

ကူးယွမ်က သက်ပြင်းချလိုက်ပြီး... "ခင်ဗျားပြောတာတွေက အမှန်တွေပါပဲ။ ဒါပေမဲ့ မိစ္ဆာလမ်းစဉ်မှာ သူတစ်ပါးရဲ့ မှတ်ဉာဏ်ကို ခိုးယူတာ ဝိညာဉ်ကို စားသုံးပြီး ကိုယ်ပွားအဖြစ် ဟန်ဆောင်တာတွေ ရှိတယ်ဆိုတာ ကျွန်တော် သိထားတယ်။"

အဲဒီစကားကို ကြားလိုက်ရတဲ့အခါ ချန်ချီရဲ့ မျက်နှာဟာ ထူးဆန်းစွာ တည်ငြိမ်သွားသည်။

"အရမ်းကောင်းတယ်"

သူ့ရဲ့ မျက်လုံးတွေက ကူးယွမ်ကို သားကောင်တစ်ကောင်လို ကြည့်ရင်း အားရကျေနပ်တဲ့ အပြုံးတစ်ခု ပေါ်လာသည်။ ကူးယွမ်ဟာ ရုတ်တရက်ဆိုသလို ကြောက်မက်ဖွယ်ကောင်းတဲ့ အရာတစ်ခုရဲ့ အကြည့်အောက် ရောက်နေသလိုမျိုး တစ်ကိုယ်လုံး ကြက်သီးထသွားလေသည်။