အခန်း (၁၄၀)  ကူးယွမ်၏စမ်းသပ်မှု

"ဒါဝိညာဉ်ခန္ဓာလား"

"ဘယ်လိုလုပ် ဖြစ်နိုင်မှာလဲ လီချန်းချင်းက ထားပါတော့ ဒီကောင်ကပါ ဘယ်လိုလုပ်ဝိညာဉ်ခန္ဓာ ပိုင်ဆိုင်နိုင်ရတာလဲ"

လူအုပ်ကြီးဟာ မယုံကြည်နိုင်ဘဲ ဆူညံသွားကြသည်။ သူတို့အနေနဲ့ ဂုဏ်သရေရှိ လီမိသားစုက လီချန်းချင်း ဝိညာဉ်ခန္ဓာရှိတာကို လက်ခံနိုင်ပေမဲ့ ဝတ်စုတ်ဝတ်ပြတ်နဲ့ ရိုးသားအေးဆေးလှတဲ့ လယ်သမားသား နွားယုတယ်မှာပါ ဝိညာဉ်ခန္ဓာရှိနေတာကိုတော့ မနာလိုဖြစ်ပြီး လက်မခံနိုင်ကြပါဘူး။

"မြေပြင်မှာ အမြစ်တွယ်ပြီး မြေဓာတ်စွမ်းအားနဲ့ နီးစပ်တယ်... ပုံရိပ်ကလည်း တောင်တန်းတစ်ခုလိုပဲ။ ဒါဟာ မြေဓာတ်ဝိညာဉ်ခန္ဓာဖြစ်တဲ့ တောင်ဝိညာဉ် ရတနာခန္ဓာပဲ"

ဒါကို မြင်တဲ့အခါ စီနီယာဟယ်လင် ရဲ့ မျက်နှာက ပြုံးရွှင်သွားပြီး နွားယုတယ်ကို အတွင်းစည်းတပည့် အဖြစ် ချက်ချင်း လက်ခံလိုက်သည်။ စီနီယာဟယ်လင်ဟာ ဒီတစ်ခေါက် တပည့်ရှာပုံတော်ဖွင့်ရာမှာ ဆေးပင်အပေါင်းခန္ဓာ (တစ်ဝက်)၊  မီးဓာတ်ဝိညာဉ်ခန္ဓာ နဲ့ အခုမြေဓာတ်ဝိညာဉ်ခန္ဓာတို့ကို ရရှိလိုက်တာကြောင့် ဂိုဏ်းကိုပြန်ရင် မျက်နှာပန်းလှတော့မှာပါ။

နွားယုတယ်ကတော့ လူတွေရဲ့ မနာလိုတဲ့ အကြည့်တွေကြောင့် ကြောက်ရွံ့နေပေမဲ့ သူ့ရဲ့ တစ်ဦးတည်းသော မိတ်ဆွေ ကူးယွမ် က ခေါင်းငြိမ့်ပြမှ စိတ်အေးသွားတော့သည်။

အဲဒီနောက် စီနီယာဟယ်လင်က ကူးယွမ်ကို လှည့်ကြည့်ပြီး "စလိုက်ရအောင်" လို့ ပြောလိုက်သည်။ ကူးယွမ်ဆီက ထွက်နေတဲ့ သန့်စင်တဲ့ ဓားအရှိန်အဝါကြောင့် စီနီယာက သူ့ကိုလည်း မျှော်လင့်ချက် ထားနေတာပါ။

ကူးယွမ်က ရွှေရောင်လျှို့ဝှက်ဗန်းပေါ်ကို လက်တင်လိုက်တဲ့ ခဏမှာပဲ... ဗန်းကနေ ကြည်လင်တဲ့ ရေလှိုင်းလို အလင်းတန်းတွေ ထွက်ပေါ်လာခဲ့သည်။ အဲဒီအလင်းက သန့်စင်လွန်းပြီး စီးဆင်းနေတဲ့ ရေလှိုင်းသံလေးတွေတောင် ထွက်ပေါ်နေသလိုပါပဲ။

"ဒါ... ဒါလည်း နောက်ထပ် ဝိညာဉ်ခန္ဓာတစ်ခုပဲ ဘယ်လိုလုပ် ဖြစ်နိုင်မှာလဲ"

ကွင်းပြင်တစ်ခုလုံး မှင်သက်ကုန်ကြသည်။ ဒီနေ့ဟာ ဝိညာဉ်ခန္ဓာတွေ လက်ကားချပေးနေတဲ့ နေ့လားလို့တောင် ထင်ရပါတယ် အရင်က ကူးယွမ်ကို သာမန်အရိုးအဆစ်ရှိသူလို့ စစ်ဆေးခဲ့ဖူးတဲ့ ရှမင်ယန် ဆိုရင် ပိုလို့တောင် အံ့ဩနေသည်။ "ဒါဟာ ဖုံးကွယ်ထားတဲ့ ပါရမီများလား" လို့ သူ တွေးမိလိုက်သည်။

လီချန်းချင်းကတော့ မျက်မှောင်ကြုတ်သွားသည်။ နွားယုတယ်နဲ့ ကူးယွမ်တို့လို ပါရမီရှင်တွေ ပေါ်လာတာဟာ သူ့ရဲ့ ဂိုဏ်းအတွင်း အာဏာရယူမယ့် အစီအစဉ်အတွက် အဟန့်အတား ဖြစ်လာနိုင်လို့ပါ။ အထူးသဖြင့် ကူးယွမ်ရဲ့ ရေဓာတ်ဝိညာဉ်ခန္ဓာဟာ သူ့ရဲ့ မီးဓာတ်နဲ့ ဆန့်ကျင်ဘက်ဖြစ်နေတာကြောင့် နောင်တစ်ချိန်မှာ ပြိုင်ဘက် ဖြစ်လာမှာကို သူ စိုးရိမ်နေမိသည်။

စီနီယာဟယ်လင်ကတော့ ဝမ်းသာအားရ လက်ခုပ်တီးပြီး ရယ်မောလိုက်သည်။

"ကောင်းတယ် အလွန်ကောင်းတယ်"

ဗန်းပေါ်က ကြည်လင်တဲ့ အလင်းတန်းတွေဟာ နက်ရှိုင်းတဲ့ ရေပြင်ကြီးတစ်ခုအဖြစ် ပြောင်းလဲသွားပြီး ပင်လယ်လေးခုလုံးကို လွှမ်းခြုံနိုင်မယ့် ခမ်းနားထည်ဝါတဲ့ အရှိန်အဝါမျိုး ထွက်ပေါ်လာလေသည်။