အခန်း (၁၃၅)  စစ်ဆေးမှု စတင်ပြီ

လီမိသားစုဝင်တွေရဲ့ ခမ်းနားထည်ဝါလွန်းတဲ့ ဆိုက်ရောက်လာပုံက သူတို့ဟာ ဘယ်လောက်အထိ မောက်မာဝင့်ကြွားတယ်ဆိုတာကို ပြသနေပါတယ်။ ဒါကိုကြည့်ပြီး ဘေးနားက လုမင် နဲ့ ယုကျန့်မောင် တို့ကတော့ သူတို့ရဲ့ ဂုဏ်ဒြပ်တွေကို အသာစီးရယူသွားတာကြောင့် စိတ်ထဲမှာ မတင်မကျ ဖြစ်နေကြသည်။

"သွားကြစို့ စီနီယာဟယ်လင် မကြာခင် ရောက်တော့မယ် သူ့ကို စောင့်မခိုင်းသင့်ဘူး" ရှရှို့ရွှယ် က အချက်ပေးလိုက်သည်။

ယွီတိန်အဆောက်အဦးရဲ့ နောက်ဖေးကွင်းပြင်ကို ရောက်တဲ့အခါ လူပေါင်း သုံးလေးရာလောက် စုဝေးနေကြသည်။ သူတို့အားလုံးဟာ နယ်မြေလေးခုက ထိပ်တန်းပါရမီရှင်တွေ ဖြစ်ကြပြီး ဒီစစ်ဆေးမှုမှာ ကျရှုံးသွားရင် ဆေးဘုရင်တောင်ကို ဝင်ခွင့်ရမယ့် အခွင့်အရေးကြီးကို ဆုံးရှုံးရမှာ ဖြစ်လို့ အားလုံးက ရင်တထိတ်ထိတ်နဲ့ ရှိနေကြသည်။

ဆေးဘုရင်တောင်ဟာ ချင်ကျိုးနယ်မြေရဲ့ အရှင်သခင်ဖြစ်ပြီး နှစ်ပေါင်းထောင်ချီ သမိုင်းကြောင်းရှိတဲ့ ဂိုဏ်းကြီးပါ။ အဲဒီထဲကို ဝင်ခွင့်ရတာဟာ ကိုယ့်အတွက်တင်မကဘဲ ကိုယ့်မိသားစုအတွက်ပါ အကာအကွယ်ရတာ ဖြစ်သလို ထာဝရအသက်ရှင်ခြင်းလမ်းစဉ်ကို လှမ်းကြည့်ခွင့်ရတာလည်း ဖြစ်ပါတယ်။

လူအုပ်ကြီး တိတ်ဆိတ်သွားရတဲ့ အကြောင်းရင်းကတော့ လူငယ်တစ်ယောက် ဝင်လာလို့ပါပဲ။ သူဟာ ပြာလွင်တဲ့ ဝတ်စုံကို ဝတ်ထားပြီး အလွန်ခန့်ညားလှသည်။ သူ့နောက်မှာတော့ ဖြူဖွေးတဲ့ ဆံပင်တွေနဲ့ အဘိုးအိုတစ်ယောက် လိုက်ပါလာသည်။ အဲဒီအဘိုးအိုဟာ ကောင်းကင်ဘုံပညာရှင်တစ်ယောက်ဖြစ်ပြီး ဒီလူငယ်ရဲ့ သက်တော်စောင့်အဖြစ် လိုက်ပါလာတာပါ။

"ဒါက လီမိသားစုရဲ့ သတ္တမမြောက်သား လီချန်းချင်းပဲ။ သူက ဆေးဘုရင်တောင်ရဲ့ နံပါတ်တစ် တပည့်ရင်း လီချန်းစိန့်ရဲ့ ညီအရင်းပေါ့" တစ်ယောက်က တိုးတိုးလေး ပြောလိုက်သည်။ လီချန်းချင်းဟာ သူ့ရဲ့ ကျင့်ကြံမှုကို တမင်နှိမ်ထားတာဖြစ်ပြီး အကယ်၍သာ သူဆန္ဒရှိရင် ကောင်းကင်ဘုံအဆင့်ကို အချိန်မရွေး တက်လှမ်းနိုင်တဲ့ ပါရမီရှင်တစ်ယောက်ပါ။

ကူးယွမ်က လီချန်းချင်းကို ကြည့်လိုက်တဲ့အခါ သူ့ဆီကနေ မီးဖိုကြီးတစ်ခုလို ပူပြင်းတဲ့ အငွေ့အသက်တွေ ထွက်နေတာကို ခံစားမိလိုက်သည်။ ဒါပေမဲ့ ကူးယွမ်ရဲ့ ထိုက်ယွမ်ကျန့်ရွှေကျင့်စဉ် က အေးမြပြီး ဖုံးကွယ်နိုင်စွမ်း ရှိတာကြောင့် လီချန်းချင်းက ကူးယွမ်ကို သာမန်လူတစ်ယောက်လိုပဲ ထင်မှတ်သွားစေသည်။

"အစ်ကိုကူး အစ်ကိုလည်း ရောက်နေတာပဲ" လို့ ဝမ်းသာအားရ နှုတ်ဆက်လာတာကတော့ နွားယုတယ် ပါ။ ကူးယွမ်က သူ့ကို ပြုံးပြီး ပြန်နှုတ်ဆက်လိုက်သည်။ နွားယုတယ် ပေးခဲ့တဲ့ "တောင်စောင့်နတ်ပုတီး" ကြောင့် ရှောင်ချင်းရဲ့ ကြီးထွားမှုက ၂၆% အထိ ရောက်နေပြီမို့ ကူးယွမ်က သူ့အပေါ်မှာ အမြင်ကောင်း ရှိနေတာပါ။

နေမင်းကြီး ထိပ်တည့်တည့်ရောက်တဲ့ မွန်းတည့်အချိန်မှာတော့...

"ဝေါ..." ဆိုတဲ့ ကြိုးကြာငှက်ရဲ့ အော်သံနဲ့အတူ ဆယ်ပေကျော် မြင့်တဲ့ ဖြူဖွေးတောက်ပတဲ့ ကြိုးကြာဖြူကြီးတစ်ကောင် ကောင်းကင်ကနေ ပျံသန်း ဆင်းသက်လာလေသည်။

အဲဒီကြိုးကြာကြီးရဲ့ ကျောပေါ်ကနေ မျက်နှာထား တင်းတင်းမာမာနဲ့ စီနီယာဟယ်လင် ခုန်ဆင်းလာပြီး စစ်ဆေးမှု စတင်ဖို့ ပြင်ဆင်လိုက်သည်။