အခန်း (၁၂၉)  ထိုက်ယွမ်၏ စွမ်းပကား သွေးသစ်လောင်းခြင်း

မကြာခင်မှာပဲ ကူးယွမ်ဟာ ပထမဆုံး အာရုံပုံရိပ်ကို အောင်မြင်စွာ ပုံဖော်နိုင်ခဲ့သည်။ အဲဒီနောက် သူ့ခန္ဓာကိုယ်ထဲက ရေဓာတ်အတွင်းအားတွေဟာ "ထိုက်ယွမ်ကျန့်ရွှေကျင့်စဉ်" ရဲ့ လမ်းကြောင်းအတိုင်း စတင်စီးဆင်းသွားသည်။ လောကထဲက ဝိညာဉ်စွမ်းအားတွေဟာလည်း သူ့ဆီကို တိုးဝင်လာပြီး သန့်စင်ခြင်း ခံလိုက်ရသည်။

ကျင့်စဉ်တစ်ပတ်လည် စီးဆင်းပြီးတဲ့အခါ သူ့ရဲ့ အတွင်းအားပမာဏဟာ အရင်ကထက် ထက်ဝက်ကျော် လျော့နည်းသွားပေမဲ့ အရည်အသွေးကတော့ အဆပေါင်းများစွာ ပိုပြီး သန့်စင်သွားခဲ့သည်။ အတွင်းအားရဲ့ အရောင်ဟာလည်း စိမ်းပြာရောင်ကနေ တောင်ကျစမ်းရေလို ကြည်လင်တဲ့ အစိမ်းနုရောင်အဖြစ် ပြောင်းလဲသွားသည်။

ကူးယွမ်က စမ်းသပ်တဲ့အနေနဲ့ သူ့လက်ညှိုးကို ဓားလိုအသုံးပြုပြီး အတွင်းအားကို ထုတ်လွှတ်လိုက်ရာ ဘေးနားက ကြေးမီးအိမ်လေးဟာ မှန်သားပြင်လို ချောမွေ့စွာ ပြတ်တောက်သွားသည်။

"ဒါဟာ တကယ့်ကို မြေကမ္ဘာအဆင့် ကျမ်းစာရဲ့ စွမ်းပကားပဲ"  သူ ကျေနပ်စွာ ရေရွတ်မိလိုက်သည်။ ဒါတင်မကဘဲ သူအလိုရှိရင် အရင်က သုံးခဲ့တဲ့ အတွင်းအားအရောင်အတိုင်း ပြန်ပြောင်းပြီး ဟန်ဆောင်နိုင်တာကြောင့် သူ့ရဲ့ အခြေခံကို သူများတွေ သိမှာမဟုတ်တော့ပါဘူး။

နောက်ထပ် ရက်သတ္တပတ် နှစ်ပတ်လောက်မှာတော့ ကူးယွမ်ဟာ သူ့ရဲ့ အတွင်းအားအားလုံးကို ထိုက်ယွမ်ကျန့်ချီအဖြစ် အောင်မြင်စွာ ပြောင်းလဲနိုင်ခဲ့သည်။ အခုဆိုရင် သူဟာ ဝိညာဉ်ခန္ဓာပိုင်ရှင် ဖြစ်သွားပြီမို့ သူ့ရဲ့ တိုက်ခိုက်ရေးစွမ်းရည်နဲ့ နားလည်နိုင်စွမ်းဟာ အရင်ကထက် အများကြီး သာလွန်သွားပါပြီ။

လက်ရှိမှာ သူဟာ အင်းနိတ်အဆင့်မှာပဲ ရှိသေးပေမဲ့ အဆင့်မြင့်ပညာရှင်တွေဖြစ်တဲ့ မိစ္ဆာအိုကြီး တို့လိုလူမျိုးတွေကိုတောင် တစ်ယောက်ချင်း ယှဉ်တိုက်နိုင်စွမ်း ရှိနေပြီလို့ သူယုံကြည်သည်။

အခု သူ ရောက်နေတဲ့အဆင့်ကတော့ "သွေးလဲလှယ်ခြင်း"အဆင့်ပါ။ အရိုးသန့်စင်ပြီးတဲ့နောက်မှာ အရိုးတွင်းခြင်ဆီကနေ သွေးသစ်တွေ ထုတ်ပေးတာဖြစ်ပြီး သွေးဟောင်းတွေကို သွေးသစ်နဲ့ လုံးဝအစားထိုးနိုင်ရင် ခန္ဓာကိုယ်ဟာ အထဲရော အပြင်ပါ သန့်စင်သွားပြီး အနာဂတ်မှာ တာအိုအခြေခံ တည်ဆောက်ဖို့အတွက် ခိုင်မာတဲ့ အုတ်မြစ်ကို ရရှိမှာပါ။

သာမန်လူတွေ သွေးလဲလှယ်ချိန်မှာ အားနည်းတတ်ပေမဲ့ ကူးယွမ်ကတော့ ထိုက်ယွမ်ကျန့်ချီရဲ့ အကူအညီကြောင့် တစ်နေ့ကို မိုင်တစ်ထောင်ခရီးနှင်သလို အရှိန်အဟုန်နဲ့ တိုးတက်နေလေသည်။ နောက်တစ်လလောက်ဆိုရင်တော့ သူဟာ အင်းနိတ်အဆင့်ရဲ့ အထွတ်အထိပ်ကို ရောက်ရှိတော့မှာပါ။

တစ်ရက်မှာတော့ ကူးယွမ်ဟာ အိမ်မှာ ကျင့်ကြံနေရတာ ပျင်းလာတာကြောင့် မြို့ထဲကို လမ်းထွက်လျှောက်လာခဲ့သည်။ အခုဆိုရင် နဂါးနီနန်းတော်သတင်းကြောင့် မြို့ထဲမှာ ရှန်ထျန်းပညာရှင်တွေ အများကြီး ရောက်နေကြတာကို သူ သတိထားမိလိုက်သည်။

လမ်းလျှောက်နေတုန်းမှာ အစေခံဝတ်စုံနဲ့ လူလတ်ပိုင်းတစ်ယောက်က သူ့လမ်းကို ပိတ်ရပ်ထားသည်။

"သခင်လေးကူး... ကျွန်တော့်သခင်မလေးက ချွင်းလိုင်စားသောက်ဆိုင်မှာ စားပွဲပြင်ထားပါတယ်။ သခင်လေးကို ဖိတ်ကြားခိုင်းလိုက်လို့ပါ"

"အော်... မမလေးရှက ဖိတ်တာလား"

ကူးယွမ် သိလိုက်ပါပြီ အခုဆိုရင် ဆေးဘုရင်တောင်ရဲ့ စစ်ဆေးမှုခံယူမယ့် ပါရမီရှင်တွေ မြို့ထဲကို ရောက်လာကြပြီမို့ ဒါဟာ အဲဒီကိစ္စနဲ့ ပတ်သက်နေမှာ သေချာသလောက်ပါပဲ။