အခန်း (၁၂၈)  အံ့မခန်း တာအိုကျမ်းစာ ထာဝရအသက်ရှင်ခြင်းသို့ ဦးတည်ရာ

ရွှမ်ယွမ်ဒေါ့ရန် က ကူးယွမ်ကို လေးနက်စွာ ကြည့်ပြီး ပြောလိုက်သည် "လောကမှာ အလကားရတဲ့ ထမင်းထုပ်ဆိုတာ မရှိဘူး။ မင်း ငါပေးတဲ့ အခွင့်အရေးကို လက်ခံလိုက်ပြီဆိုရင် ငါ့လက်ထဲက ကံကြမ္မာအကျိုးအပြစ်တွေကိုလည်း မင်းပါခံယူရလိမ့်မယ်။ ကံကောင်းမလား ကံဆိုးမလား အသက်ရှင်မလား သေမလားဆိုတာ မင်းဘာသာ မင်းပဲ ရင်ဆိုင်ရတော့မယ် ကဲ... မင်းရဲ့ ရွေးချယ်မှုကို ပြောပါ"

ကူးယွမ်က ရိုသေစွာ ဦးညွှတ်လိုက်ပြီး  "တပည့်တော် စီနီယာရဲ့ စမ်းသပ်မှုကို လက်ခံဖို့ အသင့်ပါပဲ"

ဒါဟာ ငြင်းစရာမရှိတဲ့ အခွင့်အရေးပါ။ အနာဂတ်မှာ ကြုံရမယ့် အကျိုးအပြစ်တွေက နောက်မှ ရှင်းရမယ့်ကိစ္စ အခုလောလောဆယ် ကူးယွမ်အတွက် အလိုအပ်ဆုံးက တာအိုလမ်းစဉ်ထဲ ဝင်ရောက်နိုင်မယ့် စစ်မှန်တဲ့ ကျင့်စဉ်ပဲဖြစ်လေသည်။

ရွှမ်ယွမ်ဒေါ့ရန်က ကျေနပ်စွာ ခေါင်းငြိမ့်ပြီး သူ့ရဲ့ ဝိညာဉ်ပုံရိပ်က စတင် မှေးမှိန်လာသည်။ သူဟာ ဝိညာဉ်အကြွင်းအကျန်ပဲဖြစ်တာကြောင့် အပြင်လောကမှာ ကြာကြာမနေနိုင်ဘဲ ဘူးသီးထဲမှာ ပြန်အိပ်စက်ရမှာပါ။ ကျင့်စဉ်ကို အောင်မြင်လို့ ထိုက်ယွမ်ကျန့်ချိရလာမှသာ သူ့ကို ပြန်နှိုးနိုင်မှာ ဖြစ်ပြီး အရေးကြီးကိစ္စမရှိဘဲ နှိုးတာကိုတော့ သူက တားမြစ်ထားလိုက်သည်။

ကူးယွမ်က တစ်ခုကို သတိရပြီး မေးလိုက်စာါ  "စီနီယာ... ကျွန်တော် တခြား အင်မော်တယ်ဂိုဏ်း (ဥပမာ ဆေးဘုရင်တောင်) ထဲ ဝင်ရင်ရော ဖြစ်ပါ့မလား"

ရွှမ်ယွမ်ဒေါ့ရန်က ပြန်ဖြေလိုက်သည်  "ဖြစ်ပါတယ် ဒီထိုက်ယွမ်ကျန့်ရွှေကျင့်စဉ်က လောကမှာရှိတဲ့ ရေဓာတ်ကျင့်စဉ်မှန်သမျှကို အတုယူဟန်ဆောင်နိုင်စွမ်း ရှိတယ်။ မင်းရဲ့ မူလအခြေခံကို ဘယ်သူမှ လွယ်လွယ်နဲ့ သိမှာမဟုတ်ဘူး။ အင်မော်တယ်ဂိုဏ်းထဲ ဝင်ထားတာက မင်းရဲ့ ကံကြမ္မာအကျိုးအပြစ်တွေကို ဖုံးကွယ်ဖို့တောင် အထောက်အကူ ဖြစ်စေဦးမယ်"

ရွှမ်ယွမ်ဒေါ့ရန် ပျောက်ကွယ်သွားပြီးနောက် ကူးယွမ်ဟာ "ထိုက်ယွမ်ကျန့်ရွှေကျင့်စဉ်" ကို စိတ်ဝင်တစား လေ့လာတော့သည်။

ဒီကျမ်းစာဟာ အရင်က သူရခဲ့တဲ့ကျင့်စဉ်ထက် အဆပေါင်းများစွာ သာလွန်ပါတယ်။ အရင်ကျင့်စဉ်က မပြည့်စုံတဲ့အပြင် မိစ္ဆာလမ်းစဉ်ဘက်ဆက်နွယ်တာကြောင့် အန္တရာယ်လည်း ရှိနေသည်။ အဲဒီကျမ်းစာနဲ့ဆိုရင် အကောင်းဆုံးမှ အလယ်အလတ်အဆင့် အမြုတေ လောက်ပဲ ရနိုင်မှာပါ။

ဒါပေမဲ့ ထိုက်ယွမ်ကျန့်ရွှေကျင့်စဉ် ကတော့ မတူပါဘူး။ အစကတည်းက လောကဝိညာဉ်စွမ်းအားတွေကို တိုက်ရိုက်စုပ်ယူပြီး ခန္ဓာကိုယ်ကို ပျိုးထောင်ပေးနိုင်သည်။ ထွက်ပေါ်လာတဲ့ ကျန့်ချီဟာ အလွန်နုနယ်သန့်စင်ပြီး အရာအားလုံးကို အဟာရဖြစ်စေသည်။

နတ်ဘုရားကျင့်စဉ်တွေ ကျင့်ကြံဖို့ နည်းလမ်းပေါင်း ဒါဇင်ကျော် ပါဝင်ပြီး ထိပ်တန်းစွမ်းရည် နှစ်မျိုးတောင် ပါဝင်နေသေးသည်။

အကယ်၍ ကူးယွမ်သာ ထိပ်တန်းစွမ်းရည်တွေကို တတ်မြောက်သွားရင် အဆင့် (၁) ဒါမှမဟုတ် (၂) ရှိတဲ့ အဆင့်မြင့်ရွှေအမြုတေကို ရောက်နိုင်မှာ ဖြစ်ပြီး ထာဝရအသက်ရှင်ခြင်းလမ်းစဉ်ပေါ် တက်လှမ်းနိုင်မှာပါ။

ကူးယွမ် ကျင့်စဉ်ရဲ့ ပထမဆုံး ပုံရိပ် ၁၂ ခုကို မှတ်သားပြီးနောက် ချက်ချင်းပဲ တင်ပျဉ်ခွေထိုင်ကာ ပထမဆုံးပုံရိပ်ကို စတင်အာရုံပြု ကျင့်ကြံလိုက်သည်။