အခန်း (၁၁၀) ဆေးဘုရင်တောင်သို့ ဝင်ရောက်နိုင်မည့်အခွင့်အရေး

ဒီကျောက်စိမ်းဥလေးနဲ့ဆိုရင် ကူးယွမ်ဟာ ရွှေအဆင့်ရှိတဲ့ ဝိညာဉ်သားရဲတစ်ကောင်ကို ပိုင်ဆိုင်လိုက်ပြီလို့ ပြောလို့ရပါတယ်။ ဒါကို အကောင်ဖောက်နိုင်ရင် သူ့အတွက် အားကိုးရတဲ့ အဖော်တစ်ယောက်ရမယ့်အပြင် အံ့ဩစရာကောင်းတဲ့ ပါရမီကိုလည်း သူ ရရှိတော့မှာပါ။

"မလိုပါဘူး ဒါက မင်းကြိုးစားမှုနဲ့ ထိုက်တန်တာပဲ"

သူမ လိုချင်နေတဲ့ ဓားလိပ်ပြာလေး အောင်မြင်စွာ အကောင်ပေါက်သွားတာကြောင့် ချင်းဟုန်ရှို့တစ်ယောက် စိတ်ကြည်လင်နေပြီး ရှေ့မှာရှိတဲ့ ကူးယွမ်ကိုတောင် ကြည့်ရတာ အရင်ကထက် ပိုအမြင်ကြည်လင်နေသည်။ သူမက ကူးယွမ်ရဲ့ ခါးက သံပြားလေးကို ကြည့်ပြီး "မင်းက ဆေးဘုရင်တောင်က တပည့်လား" လို့ မေးလိုက်သည်။

ကူးယွမ်က ခေါင်းခါပြပြီး သူက ယွီတိန်ဂိုဏ်းက ဆေးပင်ရှာဖွေသူ တစ်ယောက်သာဖြစ်ကြောင်း ရှင်းပြလိုက်သည်။ ချင်းဟုန်ရှို့က ခေါင်းညိတ်ပြီး ပိုးကောင်လေးကို သားရဲအိတ်ထဲ ထည့်လိုက်ကာ ကူးယွမ်ကို သစ်သားနဲ့လုပ်ထားတဲ့ လန်ခေါ့တောင်ရဲ့ အမှတ်အသား အဆောင်လေးတစ်ခု ပေးလိုက်သည်။

"မင်းမှာ ပိုးမွှားတွေကို ပြုစုပျိုးထောင်တဲ့နေရာမှာ ထူးခြားတဲ့ ပါရမီရှိတယ် နောင်တစ်ချိန်မှာ ငါ မင်းရဲ့အကူအညီ လိုကောင်းလိုနိုင်တယ် ဒါက ငါ့ဆီကို ဆက်သွယ်လို့ရမယ့် အဆောင်ပဲ အရေးကြီးတာရှိရင် ဒါနဲ့ ငါ့ကို ရှာလို့ရတယ်"

ကူးယွမ်က ကျေးဇူးတင်စကားဆိုရင်း အဲဒီအဆောင်ကို သိမ်းထားလိုက်သည်။ သူသာ ဆေးဘုရင်တောင်ကို ဝင်ခွင့်မရရင် ဒီနတ်သမီးချင်းဆီမှာ နည်းလမ်းရှာဖို့ စိတ်ကူးလိုက်သည်။ ချင်းဟုန်ရှို့က ဆက်ပြောပြတာကတော့ သူမဟာ ဂိုဏ်းကြီးတွေက တပည့်မဟုတ်ဘဲ ယွမ်မုန်းတောင်တန်းရဲ့ အနက်ပိုင်းမှာ ကိုယ်ပိုင်ဂူဗိမာန်နဲ့ နေထိုင်တဲ့ တစ်ကိုယ်တော်ကျင့်ကြံသူတစ်ယောက်သာ ဖြစ်တယ်လို့ ကူးယွမ်ကို ပြောပြလိုက်သည်။

ကူးယွမ်က အခွင့်အရေးကို အသုံးချပြီး ဆေးဘုရင်တောင်အကြောင်း မေးမြန်းကြည့်သည်။ ချင်းဟုန်ရှို့က စိတ်ရှည်လက်ရှည် ရှင်းပြပေးပါတယ် 

"ဆေးဘုရင်တောင်ဟာ ချင်ပြည်နယ်မှာ အကြီးဆုံး ကျင့်ကြံခြင်းဂိုဏ်းပဲ။ သူတို့က ဆေးပင်စိုက်ပျိုးတာနဲ့ ဆေးလုံးဖော်စပ်တာမှာ အဓိက ကျွမ်းကျင်ကြတယ်။ သူတို့ရဲ့ အဓိကကျင့်စဉ်တွေက သစ်သားဓာတ်နဲ့ မီးဓာတ်အခြေခံတွေပဲ ဒါပေမဲ့ မင်းရဲ့ ကိုယ်ခန္ဓာက ရေဓာတ် ဘက်ကို ပိုနွယ်နေတော့ အဲဒီ အဆင့်မြင့်ကျင့်စဉ်ကြီးတွေက မင်းနဲ့ သိပ်မကိုက်ညီဘူး"

ကူးယွမ်က ပြုံးလိုက်ပြီး "ကျွန်တော်က အဲဒီလို ကျင့်စဉ်ကြီးတွေ မရည်မှန်းပါဘူး ကျွန်တော့်အတွက် သင့်တော်တဲ့ အခြေခံကျင့်စဉ်လေး ရရင်ပဲ ကျေနပ်ပါပြီ" လို့ ပြောလိုက်သည်။

ချင်းဟုန်ရှို့က ဆက်ပြီး အရေးကြီးတဲ့ အချက်ကို ကူးယွမ်ကို ပြောပြလိုက်သည်။

"အခု နဂါးနီနတ်နန်းတော် ပေါ်လာတဲ့ကိစ္စကြောင့် ဆေးဘုရင်တောင်က အကြီးအကဲတွေ တောင်အောက်ကို ဆင်းလာကြလိမ့်မယ်။ အဲဒါက မင်းအတွက် အခွင့်အရေးပဲ။ ဒါပေမဲ့ သတိထားရမှာက အဲဒီဂိုဏ်းထဲမှာ မျိုးရိုးကြီးအုပ်စု နဲ့ ဂိုဏ်းသားအုပ်စု ဆိုပြီး နှစ်ဖွဲ့ကွဲနေတယ်။ မင်းလို နောက်ခံမရှိတဲ့သူဆိုရင် ဂိုဏ်းသားအုပ်စုဘက်ကနေ ဝင်ဖို့ ကြိုးစားတာက ပိုကောင်းလိမ့်မယ်"

ချင်းဟုန်ရှို့ ထွက်သွားပြီးတဲ့နောက် ကူးယွမ်ဟာ ပေ့လျန်မြို့က သူ့အိမ်ကို ပြန်လာခဲ့လိုက်သည်။ မိဘတွေနဲ့ စကားခဏပြောပြီးတာနဲ့ နောက်ဖေးကို သွားပြီး သူပိုင်ဆိုင်တဲ့ ဓားလိပ်ပြာဥ လေးကို ထုတ်လိုက်သည်။

[ရွှေအဆင့် ဓားလိပ်ပြာဥကို တွေ့ရှိသည်။ အကောင်ဖောက်ရန် အမှတ် ၁၃၀၀ သုံးမည်လား]

[ဤဥသည် အသက်ဓာတ် အားနည်းနေသည်။ မူလအရင်းအမြစ် ဖြည့်တင်းရန် အမှတ် ၃၆၀၀ လိုအပ်သည်။ အတည်ပြုမည်လား]

ကူးယွမ်က တွေဝေမနေဘဲ အတည်ပြုလိုက်သည်။ ဖြူစင်တဲ့ အလင်းတန်းတွေက ဥလေးကို လွှမ်းခြုံသွားပြီး အကောင်ပေါက်ဖို့ ပြင်ဆင်နေတဲ့ မြင်ကွင်းဟာ ကူးယွမ်ရဲ့ မျက်စိရှေ့မှာ တစ်ကျော့ပြန် ပေါ်လာသည်။