အခန်း (၁၀၉) ဓားလိပ်ပြာဥကို အကောင်ဖောက်ခြင်း

ဆိတ်ငြိမ်တဲ့ တောင်ကြားတစ်ခုမှာ ကူးယွမ်တစ်ယောက် အနားယူရင်း အတွေးနက်နေသည်။ "ကြယ်စင်မြစ်ဓားဂိုဏ်းကတွမ်ချန်းရယ် အဆိပ်နတ်ဘုရားဂိုဏ်းက ဖားပြုပ်မှန်ကန်သူရယ်... ဒီလို အင်အားကြီးဂိုဏ်းတွေက လူကူးတွေတောင် ရှန့်ယန်ပြည်နယ်ကို ရောက်နေပြီပဲ။ ဆေးဘုရင်တောင်က ပညာရှင်တွေရော ရောက်နေမလား"

သူက ခေါင်းခါရင်း "ထားလိုက်ပါတော့ သူတို့လာတာ မလာတာ ငါနဲ့မှ မဆိုင်တာ" လို့ တွေးပြီး အိတ်ထဲက သေတ္တာတစ်လုံးကို ထုတ်လိုက်သည်။ အထဲမှာတော့ ကြက်ဥအရွယ်အစားရှိတဲ့ စိမ်းဖန့်ဖန့် ကျောက်စိမ်းရောင်နဲ့ တောက်ပနေတဲ့ ဓားလိပ်ပြာဥရှိနေသည်။

လွန်ခဲ့တဲ့ ရက်ပိုင်းက သူ အပင်ပန်းခံ စုဆောင်းထားတဲ့ တာအိုအမှတ် ၄၀,၀၀၀ ကျော်ရှိနေပြီ ဖြစ်လို့ အခု အကောင်ဖောက်ဖို့ အချိန်တန်ပါပြီ။

[ရွှေအဆင့် ဓားလိပ်ပြာဥကို တွေ့ရှိသည်။ အကောင်ဖောက်ရန် အမှတ် ၁၃၀၀ အသုံးပြုမည်လား]

[ဤဥသည် အသက်ဓာတ်အားနည်းနေပြီး မူလအရင်းအမြစ် မလုံလောက်ပါ အကောင်ဖောက်ပါက ၉၉% ကျရှုံးနိုင်သည်။ မူလအရင်းအမြစ် ဖြည့်တင်းရန် အမှတ် ၃၉၀၀ လိုအပ်သည်။ အတည်ပြုမည်လား]

"အတည်ပြုမယ်" ကူးယွမ် စိတ်ထဲကနေ နှိပ်လိုက်တာနဲ့ အမှတ် ၃၉၀၀ အနုတ်ခံလိုက်ရပြီး ဥလေးဆီကနေ ဖြူစင်တဲ့ အလင်းတန်းတွေ ထွက်ပေါ်လာသည်။ အားနည်းနေတဲ့ အသက်ဓာတ်ဟာ တဖြည်းဖြည်း ပြန်လည် အားကောင်းလာပြီး ဥခွံပေါ်မှာ စူးရှတဲ့ ဓားအရှိန်အဝါတွေ စိမ့်ထွက်လာခဲ့သည်။

အဲဒီ ဓားအရှိန်အဝါဟာ ဘယ်လောက်တောင် သန့်စင်သလဲဆိုရင် ဘေးကကြည့်နေတဲ့ ကူးယွမ်တောင်မှ သူ့ရဲ့ ဓားသိုင်းနဲ့ ပတ်သက်ပြီး အသိဉာဏ်အသစ်တွေ ပွင့်သွားသလို ခံစားလိုက်ရသည်။

[မူလအရင်းအမြစ် ဖြည့်တင်းပြီးပါပြီ အကောင်ဖောက်မည်လား]

"ဖောက်မယ်"

နောက်ထပ်အမှတ် ၁၃၀၀ ထပ်မံ အနုတ်ခံလိုက်ရပြီးတဲ့နောက်မှာတော့ ကျောက်စိမ်းဥခွံလေးက အက်ကွဲသံတွေ ထွက်လာပါတယ်။

ဂြောက်... ဂြောက်

ဥခွံထဲကနေ ထွက်လာတာကတော့ လိပ်ပြာမဟုတ်ဘဲ လက်မလောက်ရှိတဲ့ တစ်ကိုယ်လုံး ကျောက်စိမ်းလို ကြည်လင်နေတဲ့ အပြာရောင် ပိုးကောင်လေးတစ်ကောင်ပါ။ သူက ထွက်လာတာနဲ့ ကူးယွမ်ကိုတောင် ကြည့်မနေဘဲ သူ့ရဲ့ ဥခွံကို တဂျောက်ဂျောက်နဲ့ အရသာရှိရှိ စားနေလေသည်။

ဒါဟာလိပ်ပြာရဲ့ သားလောင်းအဆင့်ဖြစ်လို့ ကူးယွမ် မအံ့ဩပါဘူး။ အချက်အလက်တွေကို ကြည့်လိုက်တဲ့အခါ ဒီကောင်လေးကို အပြာရောင် ကျောက်စိမ်းဓားလိပ်ပြာအဖြစ် အဆင့်မြှင့်ဖို့ဆိုရင် အမှတ် ၁၆၀,၀၀၀ တောင် လိုအပ်တယ်ဆိုတာ သိလိုက်ရလို့ ကူးယွမ် မျက်နှာလေး အနည်းငယ် ပျက်သွားသည်။

"မင်း အကောင်ဖောက်တာ ဒီလောက်မြန်လိမ့်မယ်လို့ ငါမထင်ထားဘူး"

ရုတ်တရက် ဘေးနားကနေ သာယာတဲ့ အသံလေး ထွက်‌ပေါ်လာသည်။ ကူးယွမ် လှည့်ကြည့်လိုက်တော့ ပြီးခဲ့တဲ့တစ်ခေါက်က တွေ့ခဲ့တဲ့ လှပလွန်းတဲ့ အမျိုးသမီး ချင်းဟုန်ရှို့ဖြစ်နေလေသည်။

"နှုတ်ဆက်ပါတယ် နတ်သမီးချင်း... ကျွန်တော် ကတိအတိုင်း အကောင်ဖောက်ပေးနိုင်ခဲ့ပါပြီ"

ချင်းဟုန်ရှို့က လက်ယပ်ခေါ်လိုက်တာနဲ့ ပိုးကောင်လေးက သူမရဲ့ လက်ဝါးပေါ်ကို ပျံတက်သွားသည်။ သူမ တကယ်ပဲ အံ့ဩသွားရသည်။ သူမရဲ့ သူငယ်ချင်းဖြစ်သူ "အဆိပ်နဲ့ ပိုးမွှားကျွမ်းကျင်သူ" တောင်မှ မကုနိုင်ဘူးလို့ လက်လျှော့ထားတဲ့ ဒီဥကို သာမန်လူသားတစ်ယောက်ဖြစ်တဲ့ ကူးယွမ်က အောင်မြင်အောင် လုပ်ပြနိုင်ခဲ့လို့ပါ။

သူမက ကတိအတိုင်း နောက်ထပ် ဓားလိပ်ပြာဥ တစ်လုံးကို ကူးယွမ်ဆီကို လေထဲကနေ ပို့ပေးလိုက်သည်။ "ငါတို့ ကတိအတိုင်းပဲ မင်း ကူညီပေးလို့ ဒီဥက အခုမင်းပိုင်ပြီ"

ကူးယွမ်ဟာ ကျောက်စိမ်းဥလေးကို လက်ထဲမှာ ဆုပ်ကိုင်ထားရင်း နောက်ဆုံးတော့ သူလိုချင်တာ ရပြီဆိုပြီး စိတ်ထဲကနေ သက်ပြင်းချလိုက်သည်။