အခန်း (၁၀) ဆင့်ကဲပြောင်းလဲခြင်း

ရန်သူ၏ စောင့်ကြည့်ခြင်းကို ခံနေရသော်လည်း ကူးယွမ်သည် ထိတ်လန့်ခြင်းမရှိဘဲ လမ်းမထက်တွင် အေးအေးဆေးဆေး ဆက်လျှောက်နေသည်။

သို့သော် သူ့နောက်မှ လိုက်လာသူမှာ ချန်ဂန်း ကဲ့သို့ပင် ရက်စက်ကြမ်းကြုတ်သော အရှိန်အဝါရှိနေသဖြင့် ကိုယ်ခံပညာရှင်တစ်ဦး ဖြစ်နိုင်ကြောင်း သူရိပ်မိလိုက်သည်။

ကူးယွမ်သည် လမ်းကြားလေးတစ်ခုထဲသို့ အမြန်ဝင်ရောက်ကာ လူရိပ်ဖျောက်လိုက်သည်။ သူ့နောက်မှ လိုက်လာသော လင်းတနှာခေါင်းနှင့် လူကြီးမှာ ကူးယွမ်ကို ရှာမတွေ့တော့သဖြင့် မျက်စိပျက်မျက်နှာပျက် ဖြစ်သွားတော့သည်။

ထိုစဉ် လမ်းကြားထဲ၌ ကူးယွမ်သည် သူ၏ အချက်အလက်များကို စစ်ဆေးလိုက်သည်။

 သားရဲယဉ်ပါးရှင်: ကူးယွမ်

အခြေအနေ: သာမန်

သားရဲအဖော်: တောင်ကြွက် (သံသွားကြွက်အဖြစ် ပြောင်းလဲရန် တာအိုအမှတ် ၃၀ လိုအပ်သည်)

ကျင့်စဉ်: မရှိ

တာအိုအမှတ်: ၄၉ မှတ်

ပညာရှိလင်းကျိုးထံမှ ရရှိခဲ့သော ၄၉ မှတ်မှာ အားဟွမ်ကို ဆင့်ကဲပြောင်းလဲရန် လုံလောက်နေပြီဖြစ်သည်။

"အတည်ပြုမယ်" ဟု ကူးယွမ်က စိတ်ထဲမှ အမိန့်ပေးလိုက်သည်။

ချက်ချင်းပင် အားဟွမ်၏ ခန္ဓာကိုယ်ထက်တွင် နူးညံ့ဖြူစင်သော အလင်းတန်းများ ဖုံးလွှမ်းသွားသည်။ အားဟွမ်၏ ခန္ဓာကိုယ်မှာ တဖြည်းဖြည်း ကြီးထွားလာပြီး အဝါရောင်အမွေးများမှာ မီးခိုးနက်ရောင်သို့ ပြောင်းလဲသွားသည်။ ၎င်း၏ ခြေသည်းနှင့် သွားများမှာလည်း ပိုမိုထက်မြက်လာသည်။

ခဏအကြာတွင် စာတန်းများ ပေါ်လာသည်။

ဆင့်ကဲပြောင်းလဲမှု အောင်မြင်သည်။ သံသွားကြွက်ကို ရရှိသည်။

သံသွားကြွက် (အပြာနုရောင်အဆင့်

မိတ်ဆက်: သတ္တုများကို စားသုံးတတ်သော မျိုးပြောင်းကြွက်မျိုးစိတ် သံအရိုးရှိသည် သာမန်ကြွက်ထက် ကြီးမားသန်မာပြီး ရန်လိုမှုပြင်းထန်သည်။

ဆင့်ကဲပြောင်းလဲရန်: ရတနာရှာကြွက်လေးအဖြစ် ပြောင်းလဲရန် အမှတ် ၈၀၀ လိုအပ်သည်။

အဆင့်: ကြီးထွားမှုအဆင့် (၂၆%)

သံသွားကြွက်၏ ပါရမီစွမ်းရည် သံသွားကို ရရှိသည်။

အားဟွမ်၏ ပုံစံမှာ သိသိသာသာ ပြောင်းလဲသွားသည်။ ၎င်းသည် ကြောင်အိုကြီးတစ်ကောင်ခန့် ကြီးမားလာပြီး ခြေသည်းများမှာ သံချိတ်များကဲ့သို့ ထက်မြက်နေသည်။

ရှေ့သွားနှစ်ချောင်းမှာ တစ်လက်မခန့် ရှည်ထွက်နေပြီး သတ္တုရောင် တောက်ပနေသည်။

"မဆိုးဘူး အခုမှ ကြောင်စားတဲ့ကြွက်နဲ့ တူတော့တယ်" ဟု ကူးယွမ်က ကျေနပ်စွာ ဆိုသည်။

ထိုစဉ် ကူးယွမ်သည် သူ၏ခန္ဓာကိုယ်အတွင်း၌ ပြင်းထန်သော ပြောင်းလဲမှုကို ခံစားလိုက်ရသည်။ အရိုးများအတွင်းမှ ယားယံနာကျင်လာပြီး တစ်စုံတစ်ယောက်က သူ၏အရိုးများကို တူနှင့်ထုနှက်နေသကဲ့သို့ ခံစားရသည်။ ကူးယွမ်သည် အံကြိတ်ကာ အောင့်ထားလိုက်သည်။

နာကျင်မှုများ ပျောက်ကွယ်သွားသောအခါ ကူးယွမ်သည် သူ၏ခန္ဓာကိုယ်မှာ ပိုမိုသန်မာထွားကြိုင်းလာပြီး အရပ်လည်း အနည်းငယ် မြင့်လာသည်ကို သတိပြုမိလိုက်သည်။

သူ၏ အရိုးနှင့် ကြွက်သားများမှာ သိပ်သည်းဆ မြင့်မားလာပြီး လှုပ်ရှားမှုတိုင်းတွင် အားအင်များ ပြည့်ဝနေသည်။

"သံအရိုးပေါ့"

သံသွားကြွက်၏ သံသွားပါရမီမှာ အမှန်စင်စစ်သံအရိုးမှ ဆင်းသက်လာခြင်း ဖြစ်သည်။ အရိုးများ သန်မာမှသာ သွားများမှာလည်း သံကဲ့သို့ မာကျောနိုင်ခြင်း ဖြစ်သည်။

ယခုအခါ ကူးယွမ်သည် သာမန်လူငယ်လေးတစ်ဦးအဆင့်မှ သံမဏိကဲ့သို့ မာကျောသန်မာသော ကိုယ်ခန္ဓာကို ပိုင်ဆိုင်လိုက်ပြီ ဖြစ်သည်။