အခန်း (၉) - ချန်မျိုးနွယ်စုသို့ ရောက်ရှိခြင်း

"အသုံးပြုမယ်"

"ကူးယူမယ့်ပစ်မှတ် ရွှေမြွေ"

ချန်ချန်သည် စနစ်၏ သတိပေးသံကို ကြားလိုက်ရသဖြင့် ရွှေမြွေနှင့် စကားပြောနေခြင်းကို ရပ်တန့်လိုက်ပြီး ကူးယူခြင်းစနစ်နှင့် စိတ်ချင်းဆက်သွယ်လိုက်သည်။

[ကူးယူမှု အောင်မြင်ပါသည်... အရှင်သခင်သည် စွမ်းရည် 'အဆိပ်အတတ်' ကို ရရှိသွားပါပြီ]

ချန်ချန်သည် မျက်လုံးများကို အသာအယာ မှိတ်လိုက်သည်။ ထိုအခိုက်အတန့်တွင် သူ၏ စိတ်ထဲ၌ ဉာဏ်အလင်းပွင့်မှုတစ်ခု ဖြတ်ပြေးသွားခဲ့သည်။ ထို့နောက် ဗဟုသုတ အမြောက်အမြား သူ၏ အတွေးကမ္ဘာထဲသို့ ရုတ်တရက် စီးဝင်လာသည်ကို ခံစားလိုက်ရသည်။

၎င်းကား ဆေးဝါးဗေဒဆိုင်ရာ အသိပညာများနှင့် အဆိပ်ဖော်စပ်နည်းများ အပါအဝင် ရွှေမြွေ၏ အဆိပ်အတတ်အပေါ် အလုံးစုံ နားလည်သဘောပေါက်မှုပင် ဖြစ်သည်။ စနစ်က ဤမှတ်ဉာဏ်များကို ထည့်သွင်းပေးသောအခါ ချန်ချန်သည် မည်သည့်မသက်မသာ ခံစားချက်မျှ မရှိခဲ့ချေ။ မျက်စိတစ်မှိတ်အတွင်းမှာပင် ၎င်းသည် သူ့ကို အဆိပ်အတတ်၏ ဆရာသခင်တစ်ဦးအဖြစ် ပြောင်းလဲပေးခဲ့သည်။

"ကိုယ်ရေးအကျဉ်းကို ပြပါ" ချန်ချန်က အမိန့်ပေးလိုက်သည်။

ထိုအခါ ကူးယူခြင်းစနစ်နှင့် ဆင့်ခေါ်ခြင်းစနစ် နှစ်ခုစလုံးက ချန်ချန်၏ ကိုယ်ပိုင်အချက်အလက်ပြကွက်ကို ပြိုင်တူ ဆွဲထုတ်ပေးလာခဲ့သည်။

ကူးယူခြင်းစနစ် -

• နာမည် - ချန်ချန်

• ကျင့်ကြံခြင်း - မရှိပါ

• စွမ်းရည်များ - အခြေခံ တိုက်ခိုက်ရေးစွမ်းရည်၊ အဆိပ်အတတ်

ဆင့်ခေါ်ခြင်းစနစ် -

• နာမည် - ချန်ချန်

• ကျင့်ကြံခြင်း - မရှိပါ

• ဘက်စုံတိုက်ခိုက်ရေးစွမ်းအား - ကိုးဆင့်ရှိ ဒိုချီ

• ဆင့်ခေါ်ထားသော ဇာတ်ကောင်များ - ရွှေမြွေ၊ ဟွမ်ယောင်ရှီး

ရန်သူများကို တိုက်ခိုက်ရန် အသုံးပြုနိုင်သော အဆိပ်အတတ် စွမ်းရည်ကို သူ ရရှိသွားခဲ့သဖြင့် ဆင့်ခေါ်ခြင်းစနစ်၏ ချန်ချန်အပေါ် ဘက်စုံတိုက်ခိုက်ရေးစွမ်းအား သတ်မှတ်ချက်မှာလည်း မြင့်တက်သွားခဲ့သည်။

ချန်ချန်သည် သူ၏စိတ်ထဲရှိ ဗဟုသုတများကို အနည်းငယ် ခြေဖျက်လိုက်သည်။ သူ၏ အတွေးအခေါ်များမှာ အလွန်ပင် ရှင်းလင်းပြတ်သားသွားသည်ဟု ခံစားလိုက်ရသည်။ မကြာသေးမီက ရွှေမြွေ သူနှင့် ဆွေးနွေးခဲ့သော အဆိပ်များနှင့် ပတ်သက်သည့် အချက်အလက်များ၏ သဘောတရားများကို ယခုအခါ ချက်ချင်းပင် နားလည်သဘောပေါက်သွားခဲ့ပြီ ဖြစ်သည်။

ခဏအကြာတွင် ချန်ချန် မျက်လုံးများကို ဖွင့်လိုက်သည်။

ထိုအချိန်တွင် ရွှေမြွေသည် စာအချို့ကို ရေးသားနေခဲ့သည်။ စောစောက ချန်ချန် မျက်လုံးမှိတ်ကာ စဉ်းစားနေသည်ကို မြင်သောအခါ သူမက နှောင့်ယှက်ခြင်းမပြုဘဲ ချန်ချန် နားလည်နိုင်ရန်အတွက် ဆွေးနွေးချက်များကို အရှင်းလင်းဆုံးနည်းလမ်းဖြင့် တင်ပြနိုင်ရန် ပစ္စည်းအချက်အလက်အချို့ကို စုစည်းနေခဲ့ခြင်း ဖြစ်သည်။

"ရွှေမြွေ" ချန်ချန်က လှမ်းခေါ်လိုက်သည်။

သူ၏ အသံကို ကြားရလျှင် ရွှေမြွေသည် ကလောင်တံကို ချကာ ချန်ချန်ကို ကြည့်လိုက်ပြီး ပြောသည် -

"သခင်... ခုနတင် သခင် စဉ်းစားနေတာ တွေ့လို့ ကျွန်မတို့ စောစောက ဆွေးနွေးခဲ့တဲ့အချက်တွေကို စုစည်းထားတာပါ... တစ်ချက်လောက် ကြည့်ကြည့်ပါဦး"

သူမက ရေးလက်စ မှတ်စုများကို ချန်ချန်ထံသို့ ကမ်းပေးလိုက်သည်။ သူက ၎င်းကို ယူ၍ အကြောင်းအရာများကို ဖတ်ရှုလိုက်သည်။

ရွှေမြွေ၏ လက်ရေးမှာ အလွန်ပင် လှပလှသည် သပ်ရပ်ပြီး နုနယ်သော စာလုံးများမှာ ကျွမ်းကျင်သူတစ်ဦး၏ လက်ရာမှန်း ထင်ရှားလှသည်။

ချန်ချန်သည် ခပ်သွက်သွက်ပင် ဖတ်လိုက်သည်။ ရွှေမြွေ၏ အဆိပ်အတတ် စွမ်းရည်ကို ရရှိထားပြီးဖြစ်ရာ သူသည် ၎င်းအကြောင်းအရာများကို လွယ်ကူစွာ နားလည်နိုင်ခဲ့သည်။

"အင်း... မင်းရဲ့ စိတ်ကူးက ကောင်းပါတယ်... ကျန့်ယွီချန်ယဲ့ ရဲ့ အာနိသင်က အမှန်တကယ်ပဲ ထူးကဲလှတယ်၊ ဒါပေမဲ့ ၎င်းကို ဖော်စပ်ဖို့က အရမ်း အလုပ်ရှုပ်လွန်းတယ်... အကယ်၍ မင်းကိုယ်တိုင်ပဲ လုပ်မယ်ဆိုရင် ပြီးမြောက်ဖို့ အနည်းဆုံး ညပေါင်း တစ်ထောင်လောက် ကြာလိမ့်မယ်၊ ပြီးတော့ အဲဒီဖြစ်စဉ်အတွင်းမှာ နေရောင်ခြည် အနည်းငယ်မျှတောင် အထိမခံဘူးလေ"

ချန်ချန်က မှတ်စုကို ချရင်း ရွှေမြွေကို ပြောလိုက်သည်။

"မင်းက အဆင့်မြင့် ဆေးဖော်စပ်သူတစ်ယောက်ကို ဆေးဖော်စပ်နည်းလမ်းတွေ အသုံးပြုပြီး ကျန့်ယွီချန်ယဲ့ကို သန့်စင်ခိုင်းဖို့ အကြံပြုထားတာပဲ... ဒါက အချိန်ကို အများကြီး တိုတောင်းသွားစေလိမ့်မယ်၊ ပြီးတော့ ဆေးဖော်စပ်သူရဲ့ မီးတောက်ရဲ့ ထူးခြားတဲ့ သဘာဝကြောင့် အဆိပ်ရဲ့ စွမ်းအင်ကိုလည်း ပိုပြီး ပြင်းထန်စေနိုင်တယ်"

ချန်ချန်က ဆက်ပြောသည် -

"ငါ ဒီအစီအစဉ်ကို သဘောတူတယ်... ငါတို့ ချန်မျိုးနွယ်စုဆီ ရောက်တာနဲ့ မင်းကို ကူညီပေးဖို့ ဆေးဖော်စပ်သူတစ်ယောက် ရှာပေးဖို့ ငါ ကြိုးစားပေးပါ့မယ်"

စောစောက ရွှေမြွေသည် ကျန့်ယွီချန်ယဲ့ကို ဖော်စပ်ရန် အဆိုပြုခဲ့သော်လည်း လိုအပ်သော အချိန်မှာ အလွန်ကြာမြင့်လွန်းလှသည် ပြီးမြောက်ရန် ညပေါင်းတစ်ထောင် ကြာပေမည်။ ထိုကာလအတွင်း သူမသည် မိမိ၏ အလုပ်ကို ပစ်ထား၍မရသဖြင့် ချန်ချန်၏ ဘေးတွင် နေ၍ မကူညီနိုင်ချေ။ ထို့ကြောင့် ချန်ချန်က ရွှေမြွေ၏ ကျန့်ယွီချန်ယဲ့ ဖော်စပ်မည့် တောင်းဆိုချက်ကို ငြင်းပယ်ခဲ့ခြင်း ဖြစ်သည်။

သို့သော် ရွှေမြွေသည် ချန်ချန်က အန်ယန်နယ်စားမင်း၏ တစ်ဦးတည်းသော သားဖြစ်ကြောင်း သိရှိသွားပြီးနောက်တွင် သူ၏ အဆင့်အတန်းကို အသုံးပြု၍ အဆိပ်ဖော်စပ်ရာတွင် ကူညီရန် ဆေးဖော်စပ်သူတစ်ဦးကို ငှားရမ်းရန် စဉ်းစားခဲ့ခြင်း ဖြစ်သည်။

ချန်ချန်သည် ယခင်က အဆိပ်အတတ်ကို မသိရှိခဲ့သဖြင့် ရွှေမြွေ၏ စီမံကိန်းကို ဇွတ်မှိတ် သဘောမတူဝံ့ခဲ့ချေ။ ယခုအခါ သူမ၏ အဆိပ်အတတ် စွမ်းရည်ကို ရရှိထားပြီဖြစ်ရာ သူမ၏ မှတ်စုကို ဖတ်ပြီးနောက် သူမ၏ စိတ်ကူးကို ခန့်မှန်းရန် လွယ်ကူသွားခဲ့သည်။ ထို့ကြောင့် ချန်ချန်သည် အဆိပ်အတတ်နှင့် ဆေးဖော်စပ်ခြင်း ပေါင်းစပ်ထားသော ဤနည်းလမ်းကို လုံးဝ ထောက်ခံလိုက်ခြင်း ဖြစ်သည်။

"သခင်ကို ကျေးဇူးတင်ပါတယ်"

ရွှေမြွေ၏ မျက်နှာတွင် စိတ်လှုပ်ရှားရိပ်များ ပေါ်ထွက်လာခဲ့ပြီး ချက်ချင်းပင် ကျေးဇူးတင်စကား ဆိုလိုက်သည်။

ထို့နောက် ရွှေမြွေသည် အခြားစက္ကူတစ်ရွက်ကို ထုတ်ကာ တစ်ခုခုကို ခပ်သွက်သွက် ရေးသားပြီး ချန်ချန်ထံသို့ ကမ်းပေးလိုက်သည်။

သူမက ပြောသည် -

"သခင်... ဒါတွေက ကျန့်ယွီချန်ယဲ့ကို ဖော်စပ်ဖို့ လိုအပ်တဲ့ ပစ္စည်းတွေပါ... ကျွန်မ ဝိုင်းထားတဲ့အရာတွေကတော့ ကျွန်မ ရှာဖွေစုဆောင်းပြီးသားတွေပါ... ကျန်တဲ့အရာတွေကိုတော့ သခင် ပြင်ဆင်ပေးဖို့ အဆင်ပြေမလားရှင်"

"အင်း" ချန်ချန် ခေါင်းငြိမ့်လိုက်သည်။

ကျန့်ယွီချန်ယဲ့ကို အောင်မြင်စွာ သန့်စင်နိုင်ခဲ့လျှင် ၎င်းသည် ချန်ချန်အတွက်လည်း ကြီးမားသော အထောက်အကူတစ်ခု ဖြစ်လာလိမ့်မည် ဖြစ်သည်။

ရွှေမြွေ အခန်းထဲမှ ထွက်ခွာသွားပြီးနောက် ချန်ချန်သည် သူ၏စိတ်ထဲရှိ အဆိပ်အတတ် ဗဟုသုတများကို ဆက်လက် ပြန်လည်သုံးသပ်နေခဲ့သည်။ ညနက်ပိုင်းမှသာ ချန်ချန် အိပ်ပျော်သွားခဲ့တော့သည်။

နောက်တစ်နေ့တွင် အားလုံး အဆင်သင့်ဖြစ်သဖြင့် သူတို့ ခရီးစတင်ခဲ့ကြသည်။

ကျင့်ကြံခြင်းမရှိသော ချန်ချန်သည် တစ်ဦးတည်းသော အမျိုးသမီးဖြစ်သည့် ရွှေမြွေနှင့်အတူ ရထားလုံးတစ်စီးကို အတူစီးနင်းခဲ့ပြီး အခြားသူများကမူ မြင်းကောင်းတစ်ကောင်စီကို စီးနင်းခဲ့ကြသည်။

ထိုမြို့ငယ်လေးသည် အန်ယန်မြို့ နှင့် အနည်းငယ် ဝေးကွာလှသည်။ ရထားလုံး၏ အရှိန်အပြင် လမ်းခရီးတွင် နားနေခြင်းများကိုပါ တွက်ချက်လျှင် အန်ယန်မြို့သို့ ရောက်ရှိရန် အနည်းဆုံး ငါးရက်ခန့် ကြာပေလိမ့်မည်။ ရထားလုံးမှာ အလွန်ပင် တည်ငြိမ်လှပြီး အရှိန်ပြင်းစွာ မောင်းနှင်သည့်တိုင်အောင် လှုပ်ခါခြင်း မရှိချေ။ အတွင်းပိုင်းမှာလည်း အတော်အတန် ကျယ်ဝန်းပြီး အထူးပြင်ဆင်ထားသော မုန့်ပဲသရေစာများလည်း ရှိနေခဲ့သည်။

မူရုံကျိက ရှေ့မှ လမ်းရှင်းပေးထားသဖြင့် အခြားမြို့များကို ဖြတ်သန်းသွားစဉ် မည်သည့်မျက်စိမရှိသော စစ်သည်မျှ သူတို့ကို တားဆီးခြင်း မပြုဝံ့ကြချေ။ ခရီးစဉ်မှာ ချောမွေ့ပြီး အဟန့်အတား မရှိခဲ့ချေ။

လမ်းခရီးတွင် နားနားနေနေ ရှိစဉ်အခါများ၌ ချန်ယွမ်သည် ချန်ချန်အား ကျင့်ကြံခြင်းနှင့် ပတ်သက်သည့် ဗဟုသုတအချို့ကို ရံဖန်ရံခါ သင်ကြားပေးခဲ့သည်။ သို့သော် အစဦးဆုံးအဆင့်တွင် ကျင့်စဉ်တစ်ခုကို တိုက်ရိုက် မလေ့ကျင့်နိုင်သေးချေ။ ခန္ဓာကိုယ်ထဲတွင် ဒိုအလုပ်သင် စွမ်းရည်များကို စုစည်းရန်အတွက် အခြားသူတစ်ဦး၏ လမ်းညွှန်မှု လိုအပ်သည်။ လမ်းခရီးသွားနေရခြင်းက အနည်းငယ် အဆင်မပြေသေးသဖြင့် ချန်ယွမ်သည် ချန်ချန်အား ကျင့်ကြံခြင်းကို တိုက်ရိုက်လမ်းမညွှန်သေးဘဲ သီအိုရီပိုင်းဆိုင်ရာ ဗဟုသုတအချို့ကိုသာ အသိပေးခဲ့သည်။

ကျင့်ကြံခြင်းကို စတင်ရန်အတွက်မူ တည်ငြိမ်သော ပတ်ဝန်းကျင်တစ်ခု လိုအပ်သည် — ထိုအရာကို သူ ချန်အိမ်တော်သို့ ရောက်ရှိမှသာ ရရှိနိုင်ပေလိမ့်မည်။

ဒိုချီအတောင်ပံများနှင့် နှိုင်းယှဉ်လျှင် ရထားလုံးမှာ အလွန်ပင် နှေးကွေးလှသည်။ ချန်ယွမ်သည် ထိုအတောင်ပံများ၏ အရှိန်ကို ကျင့်သားရနေခဲ့သဖြင့် ဤအရှိန်ကို မနည်း သည်းခံနေရခြင်း ဖြစ်သည်၊ သို့သော် ချန်ချန် သူ၏ဘေးတွင် ရှိနေသဖြင့် သူ အောင့်အည်းသည်းခံနိုင်ခဲ့သည်။

ငါးရက်ကြာပြီးနောက်တွင် ချန်ချန်သည် နောက်ဆုံး၌ အန်ယန်မြို့သို့ ရောက်ရှိခဲ့သည်။

အန်ယန်မြို့သည် စီးပွားရေး၊ ကိုယ်ခံပညာနှင့် ယဉ်ကျေးမှုတို့တွင် ထူးချွန်ပြောင်မြောက်ပြီး စည်ကားလှပသော မြို့ကြီးတစ်မြို့ ဖြစ်သည်။ ကျယ်ဝန်းသော လမ်းမကြီးများပေါ်တွင် ဖြတ်သန်းသွားလာနေသူများသည် အတော်အတန် အင်အားတောင့်တင်းကြသည်။ ဒိုကျင့်ကြံသူများ၊ ဒိုသခင်များ နှင့် ဒိုဆရာကြီးများကို အလွယ်တကူ မြင်တွေ့နိုင်သည်။ ကိုယ်ခံပညာအင်အားကို အလေးထားသော နိုင်ငံတစ်ခုတွင် ယခုကဲ့သို့ မြင်ကွင်းမျိုးမှာ မြို့တော်၏ စည်ကားဝပြောမှုကို ထင်ရှားစွာ ပြသနေခြင်း ဖြစ်သည်။

"ချန်အာ... မင်းအတွက် ဝင်းခြံတစ်ခုကို ငါ ကြိုတင်ပြင်ဆင်ခိုင်းထားတယ်... မင်း လမ်းခရီးမှာ ရထားလုံးစီးလာရတာ ပင်ပန်းလာရောပေါ့... အခုတော့ မင်းရဲ့ ဝင်းခြံမှာပဲ အရင်နားလိုက်ဦး... မနက်ဖြန်ကျမှ အားလုံးနဲ့ မိတ်ဆက်ပေးဖို့ ငါ ခေါ်သွားမယ်"

အန်ယန်မြို့ထဲသို့ ဝင်ရောက်လာစဉ် ချန်ယွမ်သည် သူ၏မြင်းကို အရှိန်လျှော့ကာ ရထားလုံး၏ ဘေးသို့ ကပ်၍ ချန်ချန်ကို ပြောလိုက်သည်။

"ကောင်းပါပြီ အဖေ" ချန်ချန်က ပြန်လည်ဖြေကြားလိုက်သည်။

ချန်အိမ်တော်သည် အန်ယန်မြို့၏ ဗဟိုချက်တည့်တည့်တွင် တည်ရှိပြီး မြင့်မားသော တံခါးကြီးများရှိသည့် ကြီးကျယ်ခမ်းနားသော အိမ်တော်ကြီးတစ်ခု ဖြစ်သည်။ အိမ်တော်တံခါးကြီးထက်ရှိ ဆိုင်းဘုတ်တွင် "အန်ယန်နယ်စားမင်း အိမ်တော်" သို့မဟုတ် "ရန်လင်းမင်းသား အိမ်တော်" ဟူသော မြင့်မြတ်သည့် ဘွဲ့ထူးဂုဏ်ထူးများကို ရေးထိုးထားခြင်း မရှိချေ။ ၎င်းအစား ရိုးရှင်းစွာပင် "ချန်အိမ်တော်" ဟုသာ ရေးသားထားသည် — ထိုနာမသည် မိသားစု၏ အမြစ်တွယ်မှုကို ဖော်ပြနေခြင်း ဖြစ်သည်။

ချန်အိမ်တော်အတွင်းသို့ ဝင်ရောက်ပြီးနောက် ချန်ယွမ်သည် အိမ်တော်ထိန်းတစ်ဦးကို ခေါ်ကာ ညွှန်ကြားချက်အချို့ ပေးပြီးနောက် လျင်မြန်စွာ ထွက်ခွာသွားခဲ့သည်။ အိမ်တော်ထိန်း၏ လမ်းညွှန်မှုအောက်တွင် ချန်ချန်သည် သူ့အတွက် ပြင်ဆင်ထားသော ကိုယ်ပိုင်ဝင်းခြံသို့ ရောက်ရှိခဲ့သည်။

ထိုဝင်းခြံကို "လင်းကျန်းဝင်းခြံ" ဟု ခေါ်သည်။ အိမ်တော်ထိန်း၏ ပြောပြချက်အရ ၎င်းသည် ချန်အိမ်တော်တစ်ခုလုံးတွင် အကောင်းဆုံးဝင်းခြံများထဲမှ တစ်ခု ဖြစ်သည်ဟု ဆိုသည်။ လင်းကျန်းဝင်းခြံသည် ကျယ်ဝန်းသော ဧရိယာကို လွှမ်းခြုံထားပြီး စနစ်တကျ စိုက်ပျိုးထားသော ပန်းမန်များနှင့် ကြီးမားသော ရေကန်တစ်ခုလည်း ရှိနေခဲ့သည်။

ဝင်းခြံအတွင်း၌ အစေခံနှင့် အိမ်ဖော် ဆယ်ဂဏန်းကျော်တို့သည် မြေပြင်ကို တံမြက်လှည်းခြင်းနှင့် အပင်များကို ပြုစုပျိုးထောင်ခြင်းများ ပြုလုပ်နေကြသည်။

"အရှင်လေး... ဒါက အရှင်လေးရဲ့ ဝင်းခြံပါပဲ... စိတ်တိုင်းကျရဲ့လား ခင်ဗျာ... အကယ်၍ အဆင်မပြေတာရှိရင် ကျွန်တော်မျိုးကို အချိန်မရွေး ပြောနိုင်ပါတယ်"

ချန်ချန်ကို လမ်းပြခေါ်ဆောင်လာခဲ့သော အိမ်တော်ထိန်းက ပြောလိုက်သည်။ သူသည် အနည်းငယ် ဝဖြိုးပြီး မျက်နှာတွင် ဖားပြားလိုသော အပြုံးများဖြင့် ချန်ချန်ကို သတိကြီးစွာ ပြောဆိုနေခဲ့သည်။ ဘာပဲဖြစ်ဖြစ် ချန်ချန်သည် ဤမိသားစု၏ သခင်တစ်ဝက် ဖြစ်နေပြီ ဖြစ်သည်။ အစေခံတစ်ဦးအနေဖြင့် သခင်ကို ဖားရခြင်းမှာ သူတို့၏ 'တာဝန်' မဟုတ်ပါလော။

"ငါ အရင်ကြည့်လိုက်ဦးမယ်" ချန်ချန် ခေါင်းငြိမ့်လိုက်ပြီး ဝင်းခြံအတွင်းရှိ လမ်းအတိုင်း လျှောက်လှမ်းခဲ့သည်။

ထိုအခိုက်အတန့်တွင် ဝင်းခြံအတွင်း အလုပ်လုပ်နေကြသော အစေခံများနှင့် အိမ်ဖော်များသည် ချန်ချန် ရောက်ရှိလာသည်ကို သတိပြုမိသွားကြသည်။ သူတို့သည် လုပ်လက်စ အလုပ်များကို ရပ်တန့်လိုက်ကြပြီး သူ၏ဘေးသို့ လာကာ သပ်ရပ်စွာ တန်းစီလိုက်ကြသည်။ သူတို့သည် ခေါင်းများကို ငုံ့ထားကြပြီး အရိုအသေပေးကြကာ သခင်၏ မျက်ဝန်းများကို တိုက်ရိုက်မကြည့်ဝံ့ကြချေ။

"ကျွန်တော်မျိုး/ကျွန်တော်မတို့ အရှင်လေးကို ဂါရဝပြုပါတယ်" သူတို့အားလုံးက တိုက်တိုက်ဆိုင်ဆိုင် ပြိုင်တူ နှုတ်ဆက်လိုက်ကြသည်။

"အင်း" ချန်ချန်က ပြုံး၍ ခေါင်းငြိမ့်ပြလိုက်ပြီး ဝင်းခြံ၏ အတွင်းပိုင်းသို့ ဆက်လက် လျှောက်လှမ်းခဲ့သည်။ အိမ်တော်ထိန်း၏ လမ်းညွှန်မှုအောက်တွင် သူ၏ အခန်းသို့ ရောက်ရှိခဲ့သည်။

ချန်ချန် အဝေးသို့ ရောက်ရှိသွားပြီးနောက်မှသာ အစေခံများနှင့် အိမ်ဖော်များသည် အနည်းငယ် စိတ်သက်သာရာရသွားကြတော့သည်။

"ဒါက အရှင်လေးပေါ့... သူက တကယ်ကို ချောမောတာပဲ"

အိမ်ဖော်မလေးတစ်ဦးက ချန်ချန် ပျောက်ကွယ်သွားသော နေရာကို စိုက်ကြည့်ရင်း တိုးတိုးလေး ပြောလိုက်သည်။

"ဒါပေါ့... ပြီးတော့ သူနဲ့အတူရှိနေတဲ့ အနီရောင်ဝတ်စုံနဲ့ မိန်းကလေးကလည်း လှပလွန်းတယ်... သူတို့က တကယ့်ကို လိုက်ဖက်တဲ့ စုံတွဲပဲ"

အခြားတစ်ယောက်က ပြောလိုက်သည်။

"နင်တို့နှစ်ယောက်ကတော့ တကယ့်ကို ယောက်ျားမက်တဲ့ကောင်မတွေပဲ... ငါတော့ အော့နှလုံးနာတယ်... အရှင်လေး ချောတာ မချောတာက ဘာအရေးလဲ... နင်တို့အတွက်မှ မဟုတ်တာ... ငါကတော့ သူရဲ့ စိတ်နေသဘောထားကို ပိုပြီး စိတ်ပူတယ် — သူနဲ့ ဆက်ဆံရတာ လွယ်ကူပါ့မလားလို့... အခုကစပြီး ငါတို့အားလုံးက သူရဲ့အောက်မှာ အလုပ်လုပ်ရတော့မှာလေ"

အစေခံတစ်ဦးက ပြောလိုက်သည်။

"ဟူး... သူ စိတ်သဘောထား ကောင်းပါစေလို့ပဲ မျှော်လင့်ရတာပဲ... ငါက အရှင်လေး ကျိဟန် ရဲ့ ဆီကနေ အခုတင် ပြောင်းလာရတာ... နောက်ထပ် စိတ်ဆိုးလွယ်တဲ့ သခင်လေးတစ်ယောက်နဲ့ ထပ်မတွေ့ချင်တော့ဘူး"

အခြားအစေခံတစ်ဦးက စိတ်ပျက်သော အမူအရာဖြင့် ပြောလိုက်သည်။

"ဘာလဲ... နင်က အရင်က အရှင်လေး ကျိဟန်ရဲ့ အိမ်မှာ အလုပ်လုပ်ခဲ့တာလား... ငါ မသိခဲ့ဘူးပဲ... သနားစရာလေး သူရဲ့ စိတ်တိုတတ်တဲ့ စရိုက်က နာမည်ကြီးပဲလေ... သူ နင့်ကို ရိုက်မသေတာပဲ ကံကောင်းလှပြီ... နင်က တကယ့်ကို ကံကောင်းတာပဲ"

အိမ်ဖော်မလေးတစ်ဦးက သူတပါးဒုက္ခကို ဝမ်းသာသည့် လေသံဖြင့် ပြောလိုက်သည်။

"ဟေး... နင်တို့ ဘာတွေ ပြောနေကြတာလဲ... သခင်ရဲ့ အကြောင်းကို အတင်းပြောတာက ကြီးလေးတဲ့ ပြစ်မှုပဲ... သွား... အလုပ် ပြန်လုပ်ကြစမ်း"

အစေခံတစ်ဦးက ပြောလိုက်သည်။

"ဟုတ်ပ... ဟုတ်ပ... အလုပ်ပြန်လုပ်ကြစို့... အရှင်လေးက အခုမှ ရောက်ကာစရှိသေးတယ် ငါတို့ အပျင်းထူနေတာကို သူ မြင်သွားလို့ မဖြစ်ဘူး၊ မဟုတ်ရင် ငါတို့ရဲ့ နေ့ရက်တွေ ခက်ခဲလိမ့်မယ်"

အိမ်ဖော်မလေးတစ်ဦးက ပြောလိုက်သည်။

"အလုပ် ပြန်လုပ်ကြစို့!"