အခန်း ၇၅ ကာကွယ်စောင့်ရှောက်သူ ဝူ ၏ သံသယများ
ဝိညာဉ်သားရဲ ဆန်းကြယ်မီးတောက်ကို ဝါးမြိုရန် လိုအပ်သော အချိန်မှာ မြေကမ္ဘာအူတိုင် မီးတောက်ကို သန့်စင်စဉ်ကထက် သိသိသာသာ ပို၍ ကြာမြင့်ခဲ့သည်။
အဘယ့်ကြောင့်ဆိုသော် ဤတစ်ကြိမ်တွင် ရိုးရိုးရှင်းရှင်း သန့်စင်ရုံသက်သက် မဟုတ်သောကြောင့် ဖြစ်သည်။
ယင်းအစား ၎င်းသည် ဝိညာဉ်သားရဲ ဆန်းကြယ်မီးတောက်၏ ကြမ်းတမ်းသော စွမ်းအင်ကို အသုံးပြု၍ ရုပ်ပိုင်းဆိုင်ရာ ခန္ဓာကိုယ်ကိုပါ ပေါင်းတင်သန့်စင် (Tempering) နေခြင်း ဖြစ်သည်။ လင်းယွမ် ကျင့်ကြံနေစဉ်အတွင်း အချိန်များသည် တိတ်ဆိတ်စွာ ကုန်ဆုံးသွားခဲ့သည်။
နောင်တစ်လခွဲအကြာ ယွမ်လန်ဂိုဏ်း၏ နောက်တောင်ကုန်း။
"ဟူး..."
လျှို့ဝှက်ခန်းမအတွင်း၌ ယွမ်ရှန်း သည် သူ၏ မျက်လုံးများကို ဖြည်းညှင်းစွာ ဖွင့်လိုက်ပြီး ခန္ဓာကိုယ်တွင်းမှ ညစ်ညမ်းသော ချီ များအား မှုတ်ထုတ်လိုက်သည်။
ထိုအညစ်အကြေးများကို စွန့်ထုတ်လိုက်သည်နှင့် မှော်သားရဲတောင်တန်းတွင် ရရှိခဲ့သော ယွမ်ရှန်း၏ ဒဏ်ရာများသည် နောက်ဆုံးတွင် လုံးဝ ဥဿုံ ပျောက်ကင်းသွားခဲ့ပြီ ဖြစ်သည်။
လင်းယွမ်နှင့် တိုက်ပွဲတွင် သူ၏ ကိုယ်တွင်းအင်္ဂါများသည် အလွန်ပြင်းထန်သော ထိခိုက်ဒဏ်ရာများကို ခံစားခဲ့ရသည်။ ကံကောင်းထောက်မစွာဖြင့် ယွမ်လန်ဂိုဏ်းတွင် ဂူဟယ်ကဲ့သို့သော ခြောက်ဆင့် ဆေးဆရာ တစ်ဦး ရှိနေခဲ့သည်။
ဂူဟယ် ဖော်စပ်ပေးသော ဆေးလုံးများကြောင့်သာ ယွမ်ရှန်း၏ အတွင်းဒဏ်ရာများသည် တဖြည်းဖြည်း သက်သာလာခဲ့ခြင်း ဖြစ်သည်။ ထိုဆေးလုံးများ၏ အကူအညီသာ မရှိပါက သူ၏ ခွန်အား ဆယ်ပုံတစ်ပုံကိုပင် ပြန်လည်ရရှိရန် ဖြစ်နိုင်မည် မဟုတ်ချေ။
သို့သော်ငြားလည်း ဤကုသမှုမှာ ယွမ်ရှန်းအတွက် တစ်လခွဲခန့် အချိန်ယူခဲ့ရသည်။
"လင်းယွမ်..."
ယွမ်ရှန်း၏ အိုမင်းသော မျက်နှာထက်တွင် နာကျည်းမှု အရိပ်အယောင်များ ဖြတ်ပြေးသွားသည်။ သူ့ကို အလဲလဲအပြားပြား ဖြစ်အောင် ရိုက်နှက်ခဲ့သော ထိုလူငယ်ကို တွေးမိတိုင်း ယွမ်ရှန်း၏ ဒေါသမှာ ထိန်းမနိုင်သိမ်းမရ ဖြစ်ပေါ်လာရသည်။
ဤတစ်ကြိမ်တွင် သူသည် လင်းယွမ်ကို ရှုံးနိမ့်ခဲ့ရုံသာမက လူအများရှေ့တွင်လည်း လှောင်ပြောင်စရာ အဖြစ်သို့ ရောက်ရှိခဲ့ရသည်။ ထို့ကြောင့် ဤအကြွေးကို လင်းယွမ်နှင့် အနှေးနှင့်အမြန် ပြန်ဆပ်မည်ဟု ယွမ်ရှန်းက စိတ်ထဲမှ တိတ်တဆိတ် ကျိန်ဆိုထားလိုက်သည်။
"ဟဲဟဲ... ကြည့်ရတာ မင်းက တကယ့် အမှိုက်တစ်စပဲ ဖြစ်ပုံရတယ်"
ရုတ်တရက် ထူးဆန်းသော ရယ်သံတစ်ခု ယွမ်ရှန်း၏ နားထဲသို့ တိုးဝင်လာသည်။
ဤအသံကို ကြားလိုက်ရချိန်တွင် ယွမ်ရှန်း မျက်မှောင်ကြုတ်သွားပြီး "မင်း ဘယ်သူ့ကို အမှိုက်လို့ ခေါ်နေတာလဲ" သူသည် ရင်ထဲမှ တောက်လောင်နေသော ဒေါသမီးကို ဖိနှိပ်ကာ သွားကို ကြိတ်ထားလိုက်သည်။
နှစ်ပေါင်းများစွာအတွင်း ယွမ်ရှန်း အသည်းအသန်ဆုံး မခံစားနိုင်သော အရာမှာ အခြားသူများ၏ လှောင်ပြောင်ခြင်းပင် ဖြစ်သည်။
သို့သော် ယခုအခါ ထိုအသံပိုင်ရှင်ကို ရင်ဆိုင်ရာတွင် သူ အလွန်အကျွံ မပြရဲချေ။ ထိုသူမှာ ခွန်အားချင်း ယှဉ်လျှင် သူ့ထက် အဆပေါင်းများစွာ သာလွန်ရုံသာမက အလွန်အင်မတန် အစွမ်းထက်သော နောက်ခံ နောက်ကြောင်းလည်း ရှိနေသောကြောင့် ဖြစ်သည်။
"အသက် ၃၀ တောင် မပြည့်သေးတဲ့ လူငယ်လေးတစ်ယောက်ဆီမှာ ဒီလိုအခြေအနေမျိုးအထိ ရိုက်နှက်ခံရတာ မင်းက အမှိုက်မဟုတ်လို့ ဘာလဲ" ထိုအသံ ထပ်မံ ထွက်ပေါ်လာပြန်သည်။
ထို့နောက် အနက်ရောင် မြူခိုးတိမ်တိုက်တစ်ခုသည် လျှို့ဝှက်ခန်းမအတွင်း၌ ကြိုတင်သတိပေးချက် မရှိဘဲ ပေါ်လာတော့သည်။ အနက်ရောင်မြူခိုးများ လွင့်ပြယ်သွားသောအခါ အနက်ရောင်ဝတ်ရုံကို ခြုံထားသော ပုံရိပ်တစ်ခု ယွမ်ရှန်း၏ မျက်စိရှေ့တွင် ပေါ်ထွက်လာသည်။
ထိုသူမှာ ဝိညာဉ်နန်းတော်မှ ကာကွယ်စောင့်ရှောက်သူ ဝူပင် ဖြစ်သည်။
"အဲ့ဒီလူငယ်က သာမန်လူ မဟုတ်ဘူး သူက အနည်းဆုံး ြကယ်နှစ်ပွင့် တိုက်ပွဲဝင်ဘိုးဘေး လောက် သန်မာတယ်"
ဤစကားကို ကြားသောအခါ ယွမ်ရှန်း၏ မျက်နှာမှာ ချက်ချင်းပင် နီရဲသွားပြီး သူကိုယ်သူ အကောင်းဆုံး ခုခံကာကွယ် ပြောဆိုလိုက်သည်။
သူသည် ကြယ်တစ်ပွင့် တိုက်ပွဲဝင်ဘိုးဘေး အဆင့်သို့ ချိုးဖျက်ရောက်ရှိကာစသာ ရှိသေးပြီး လင်းယွမ်နှင့် တိုက်ပွဲကို ကြည့်ခြင်းအားဖြင့် ပြိုင်ဘက်မှာ အနည်းဆုံး ကြယ်နှစ်ပွင့် တိုက်ပွဲဝင်ဘိုးဘေး အဆင့် ကျင့်ကြံခြင်း အရှိန်အဝါ ရှိပေလိမ့်မည်။
သို့ဆိုလျှင် သူ ပြိုင်ဘက်ကို မနိုင်သည်မှာ အကြောင်းပြချက် ခိုင်လုံသည် မဟုတ်ပါလား "မင်းရဲ့ အစွမ်းမရှိမှုကို အကြောင်းပြချက်တွေ ပေးမနေနဲ့ ရှုံးတာက ရှုံးတာပဲ" ကာကွယ်စောင့်ရှောက်သူ ဝူ က ယွမ်ရှန်း၏ စကားကို အထင်အမြင်သေးစွာဖြင့် ပယ်ချလိုက်သည်။
သူ၏ စိတ်ထဲတွင် ရှုံးနိမ့်ခြင်းမှာ ရှုံးနိမ့်ခြင်းသာ ဖြစ်သည်။ အကယ်၍ ပြိုင်ဘက်ထက် မသန်မာပါက မည်သည့် အကြောင်းပြချက်မျှ မပေးသင့်ပေ။ သို့သော်ငြားလည်း ဤသို့ ပြောလိုက်ရသော်လည်း ကာကွယ်စောင့်ရှောက်သူ ဝူ သည် စတင် စဉ်းစားခန်း ဝင်လာတော့သည်။
ဤတိုက်ကြီးတစ်ခုလုံးတွင် အသက် ၂၀ ကျော် အရွယ်နှင့် တိုက်ပွဲဝင်ဘိုးဘေး အဆင့်သို့ ရောက်ရှိနိုင်သူမှာ အလွန်ပင် ရှားပါးလှသည်။ သူတို့၏ ဝိညာဉ်နန်းတော်တွင်ပင် ထိုသို့သော သူမျိုးမှာ အနည်းငယ်သာ ရှိသည်။ထိုသို့သော သူမျိုးမှာ တစ်စုံတစ်ဦးသော အင်အားကြီး အဖွဲ့အစည်းမှ မွေးထုတ်ပေးလိုက်သော ပါရမီရှင်တစ်ဦး ဖြစ်ရပေမည်။
"ဆေးမျှော်စင် က အဘိုးကြီးတွေများ လှုပ်ရှားလာတာလား"
ကာကွယ်စောင့်ရှောက်သူ ဝူ ခေတ္တမျှ စဉ်းစားလိုက်ပြီးနောက် အလယ်ပိုင်းဒေသ ရှိ အင်အားကြီးများထဲမှ စံအိမ်လေးခု နန်းတော်တစ်ခု တာဝါတစ်ခု ဂိုဏ်းနှစ်ခုနှင့် ချိုင့်ဝှမ်းသုံးခုထဲတွင်
သူတို့၏ ဝိညာဉ်နန်းတော်နှင့် ရင်ပေါင်တန်းနိုင်သော ဆေးမျှော်စင် တစ်ခုတည်းသာလျှင် ထိုသို့သော ပုဂ္ဂိုလ်များကို မွေးထုတ်ပေးနိုင်စွမ်း ရှိသည်ဟု ကောက်ချက်ချလိုက်သည်။
"ဒါပေမဲ့ ဆေးမျှော်စင်က အဘိုးကြီးတွေက ဘာလို့ ဂါမာအင်ပါယာ လို နေရာလေးကို ပစ်မှတ်ထားရတာလဲ"ကာကွယ်စောင့်ရှောက်သူ ဝူ လုံးဝ ဝေခွဲမရ ဖြစ်နေသည်။
ရှေးဟောင်း မျိုးနွယ်စုကြီး ရှစ်ခုအကြောင်းကိုမူ သူ လုံးဝ ထည့်မစဉ်းစားခဲ့ပေ။
အဘယ့်ကြောင့်ဆိုသော် သူ၏ အဆင့်အတန်းနှင့်ဆိုလျှင် ထိုအဆင့်မျိုးအထိ သိရှိနိုင်ရန် အလှမ်းဝေးလွန်းနေသေးသောကြောင့် ဖြစ်သည်။ သို့သော် ခဏမျှ သံသယဝင်ပြီးနောက် ကာကွယ်စောင့်ရှောက်သူ ဝူ ၏ နှုတ်ခမ်းထက်တွင် ယုတ်မာသော အပြုံးတစ်ခု ထပ်မံ ပေါ်ပေါက်လာပြန်သည်။
အမှန်တရားက မည်သို့ပင်ဖြစ်စေ သူသည် အမြဲတမ်း မူတစ်ခုကိုသာ ကိုင်စွဲထားသည်။
ယင်းမှာ ဝိညာဉ်နန်းတော်သည် အင်အားအကြီးဆုံး ဖြစ်သည်ဟူသော အချက်ပင်။ မည်သည့် အဖွဲ့အစည်းမဆို ဝိညာဉ်နန်းတော်ကို ဆန့်ကျင်ဝံ့ပါက အမြစ်ပြတ် ချေမှုန်းခံရရန် ပြင်ဆင်ထားသင့်ပေသည်။
"ဟင်း..."
ကာကွယ်စောင့်ရှောက်သူ ဝူ စကားဆုံးပြီးနောက် ယွမ်ရှန်းက အေးစက်စွာ နှာခေါင်းရှုံ့လိုက်သော်လည်း ဘာမှ ထပ်မပြောတော့ပေ။ သူ့ကို အမှိုက်ဟု ခေါ်သည်ကို အလွန် မကျေမနပ် ဖြစ်သော်လည်း ကာကွယ်စောင့်ရှောက်သူ ဝူ ၏ စကားမှာလည်း အကြောင်းပြချက် မရှိသည်တော့ မဟုတ်ပေ။
သန်မာသူက အားနည်းသူကို အနိုင်ယူသော ဤတိုက်ကြီး၏ လောကတွင် မင်းက အားနည်းနေပါက မင်းတွင် စကားပြောပိုင်ခွင့် မရှိချေ။
"ဒါနဲ့... မင်းတို့ ယွမ်လန်ဂိုဏ်းက ခြောက်ဆင့် ဆေးဆရာက တော်တော်လေး အသုံးဝင်ပုံရတယ်။ အဆင့်မြင့် ဆေးဆရာတစ်ယောက်ရဲ့ ဝိညာဉ်ဆိုတာ ငါတို့ ဝိညာဉ်နန်းတော်က အတိအကျ လိုအပ်နေတဲ့ အရာပဲ"
ယွမ်ရှန်းကို အနည်းငယ် စနောက်ပြီးနောက် ကာကွယ်စောင့်ရှောက်သူ ဝူ က လှောင်ပြောင်မှုများကို ရပ်တန့်လိုက်ပြီး ဂူဟယ်အကြောင်းသို့ စကားလှည့်လိုက်သည်။
"ဘာ... ဂူဟယ်က ငါ့ရဲ့ ယွမ်လန်ဂိုဏ်းမှာ ခိုလှုံနေတဲ့သူပဲ သူ့ကိုတော့ မထိပါနဲ့" ကာကွယ်စောင့်ရှောက်သူဝူက ဂူဟယ်အကြောင်းကို ပြောလိုက်သောအခါ ယွမ်ရှန်း ချက်ချင်းပင် ပေါက်ကွဲသွားတော့သည်။
သူသည် ရုတ်တရက် ထရပ်လိုက်ပြီး ကာကွယ်စောင့်ရှောက်သူ ဝူ ကို ဒေါသတကြီး စိုက်ကြည့်လိုက်သည်။ အကယ်၍ ဂူဟယ်သာ တစ်ခုခု ဖြစ်သွားပါက သူ၏ ယွမ်လန်ဂိုဏ်းတွင် အမာခံအဖြစ် ရှိနေသော ခြောက်ဆင့် ဆေးဆရာ တစ်ဦး လျော့နည်းသွားပေလိမ့်မည်။
ထိုအခါ တစ်ဂါမာအင်ပါယာအတွင်းရှိ ယွမ်လန်ဂိုဏ်း၏ အဆင့်အတန်းမှာလည်း သိသိသာသာ ထိုးဆင်းသွားပေလိမ့်မည်။ ဂူဟယ်သည် ယွမ်လန်ဂိုဏ်းတွင် ဂုဏ်ထူးဆောင် ဧည့်သည်တော်အဖြစ်သာ ရှိနေသော်လည်း သူ၏ ခြောက်ဆင့် ဆေးဆရာဟူသော ကျော်ကြားမှုကြောင့် ထူးချွန်ထက်မြက်သော တပည့်များစွာမှာ ယွမ်လန်ဂိုဏ်းသို့ အလုံးအရင်းနှင့် လာရောက်ကြခြင်း ဖြစ်သည်။
အကယ်၍ ယွမ်လန်ဂိုဏ်းက ဂူဟယ်ကို ဆုံးရှုံးလိုက်ရပါက ဂိုဏ်းတစ်ခုလုံးမှာ ပရမ်းပတာ ဖြစ်သွားနိုင်ပေသည ဒါက ယွမ်ရှန်း မြင်လိုသော အခြေအနေ မဟုတ်ပေ။
"ဟမ့်... ဝိညာဉ်နန်းတော်က လုပ်မယ့်အလုပ်ကို မင်းက ဘယ်လိုလုပ်ပြီး ထိန်းချုပ်နိုင်မှာလဲ"
ယွမ်ရှန်း၏ တုံ့ပြန်မှုကို မြင်သောအခါ ကာကွယ်စောင့်ရှောက်သူ ဝူ ၏ လေသံမှာ ချက်ချင်း ပြောင်းလဲသွားပြီး သူ၏ အကြည့်မှာ စူးရှသွားသည်။
နောက်တစ်စက္ကန့်တွင် သူ၏ ခန္ဓာကိုယ်ထဲမှ အနက်ရောင် စွမ်းအင်တစ်ခု ထွက်ပေါ်လာပြီး ယွမ်ရှန်း၏ နဖူးဆီသို့ တိုက်ရိုက် ပြေးဝင်သွားတော့သည်။ အနက်ရောင် ချီ များမှာ အလွန်ပင် မြန်ဆန်လှပြီး မျက်စိတစ်မှိတ်အတွင်းမှာပင် ယွမ်ရှန်း၏ နဖူးအတွင်းသို့ ထိုးဖောက်ဝင်ရောက်သွားသည်။
"အား..."
ချက်ချင်းဆိုသလိုပင် ယွမ်ရှန်း၏ နှုတ်မှ စူးရှသော အော်ဟစ်သံတစ်ခု ထွက်ပေါ်လာသည်။
သူသည် သူ၏ နဖူးကို လက်နှစ်ဖက်ဖြင့် တင်းတင်းဆုပ်ကာ မြေပြင်ပေါ်တွင် ဒူးထောက်ကျသွားပြီး ပြင်းထန်သော ဝေဒနာကို အလူးအလဲ ခံစားနေရတော့သည်။
"မင်း ငါ့ကို ဘာလုပ်လိုက်တာလဲ"
ယွမ်ရှန်း အဆက်မပြတ် ရုန်းကန်နေရသည်။ ယင်းမှာ သူ၏ ဝိညာဉ်ထဲမှ စူးရှသော နာကျင်မှုဖြစ်ပြီး သေခြင်းထက် ပို၍ ဆိုးရွားသော ခံစားချက်ကို ပေးစွမ်းနေသည်။
"ဒါကို မင်း သိဖို့ မလိုပါဘူး"
မြေပြင်ပေါ်တွင် နာကျင်စွာ လဲလျောင်းနေသော ယွမ်ရှန်းကို ကြည့်ကာ ကာကွယ်စောင့်ရှောက်သူ ဝူ ၏ အမူအရာမှာ မပြောင်းလဲပေ။
"ယွမ်ရှန်း... ဒါကို မှတ်ထားပါ မင်းက ဝိညာဉ်နန်းတော်က မွေးထားတဲ့ ခွေးတစ်ကောင်ထက် မပိုဘူး။ ငါ ကာကွယ်စောင့်ရှောက်သူ တစ်ယောက်အနေနဲ့ မင်းကို သတ်ချင်တယ်ဆိုရင် စိတ်ကူးတစ်ချက်တည်းနဲ့တင် ရတယ်" ပြောရင်းနှင့် ကာကွယ်စောင့်ရှောက်သူ ဝူ က လက်ကို ဆန့်ထုတ်ကာ ယွမ်ရှန်း၏ နဖူးကို ဖမ်းကိုင်လိုက်ရာ အနက်ရောင် ချီ များမှာ သူ၏ ခန္ဓာကိုယ်အတွင်းသို့ ပြန်လည် ဝင်ရောက်သွားသည်။
အမှောင်ထု လွင့်ပြယ်သွားသော ခဏတွင် ယွမ်ရှန်း၏ ရုန်းကန်မှုများ နောက်ဆုံးတွင် ရပ်တန့်သွားတော့သည်။ သို့သော် သူသည် ယခုအခါတွင် ချွေးစေးများဖြင့် တစ်ကိုယ်လုံး စိုရွှဲနေပြီး သူ၏ မျက်လုံးများထဲတွင်လည်း ထိတ်လန့်တုန်လှုပ်မှုများ ကျန်ရစ်နေခဲ့သည်။
"ကဲ... အခုရော ငါ ကာကွယ်စောင့်ရှောက်သူ ပြောတဲ့စကားကို မင်း ဆက်ပြီး သံသယဝင်ရဲသေးလား" ကာကွယ်စောင့်ရှောက်သူ ဝူ က ကျေနပ်စွာ ခေါင်းငြိမ့်လိုက်သည်။ သူသည် အခြားသူများကို ကြောက်ရွံ့တုန်လှုပ်အောင် ပြုလုပ်ရသော ခံစားချက်ကို အနှစ်သက်ဆုံး ဖြစ်သည်။
"မရှိပါဘူး... ကျွန်တော်မျိုး မဝံ့ရဲပါဘူး"
ဤအခိုက်အတန့်တွင် ယွမ်ရှန်းသည် တကယ်ပင် ထိတ်လန့်သွားခဲ့ပြီ ဖြစ်သည်။