အခန်း ၂၂  အသွင်ပြောင်းဆေးကို အချောသတ်ဖော်စပ်ခြင်း

တတိယအကြီးအကဲသည် ဘုရင်မ မဒူဆာ၏ ရှေ့တွင် ဒူးတစ်ဖက်ထောက်နေသော လင်းယွမ် မြင်လိုက်ရသောအခါ ဘာတွေဖြစ်ပျက်နေသည်ကို နောက်ဆုံးတွင် နားလည်သွားတော့သည်။

ဤအခြေအနေကို လူအူတစ်ယောက်ပင်လျှင် မြင်ရုံနှင့် သိနိုင်ပေသည်။

"ကောင်းတယ်... ကောင်းတယ်... တကယ်ကို ကောင်းတယ်"

တတိယအကြီးအကဲသည် အားရပါးရ ရယ်မောလိုက်တော့သည်။ ဤနည်းဖြင့် တိုက်ပွဲဝင်ဘိုးဘေး ကျွမ်းကျင်သူဖြစ်သော လင်းယွမ်သည် မြွေလူသားမျိုးနွယ်စုနှင့် လုံးဝ တစ်သားတည်း ဖြစ်သွားပေလိမ့်မည်။

လင်းယွမ်ကဲ့သို့ ငယ်ရွယ်ပြီး အစွမ်းထက်သော တိုက်ပွဲဝင်ဘိုးဘေးအဆင့်ကျွမ်းကျင်သူတစ်ဦးအပြင် သူ၏ အဆင့် ၇ ဆေးဖော်စပ်သူအဆင့်အတန်းနှင့်ပါ ပေါင်းစပ်လိုက်လျှင် မြွေလူသားမျိုးနွယ်စု ထိပ်တန်းသို့ ရောက်ရှိမလာရန်မှာ မဖြစ်နိုင်တော့ပေ။

တတိယအကြီးအကဲနှင့် မဟာအကြီးအကဲတို့သည် အခြေခံအားဖြင့် ကွဲပြားကြသည်။ မဟာအကြီးအကဲမှာ သဘာဝအရ သိက္ခာကို အလွန်အမင်း ဂရုစိုက်ပြီး ရှေးရိုးစွဲ အယူအဆဟောင်းများ ရှိသူဖြစ်သည်။

သို့သော် တတိယအကြီးအကဲကမူ သူ၏ မြွေလူသားမျိုးနွယ်စု ပိုမိုအင်အားကြီးမားလာစေရန်အတွက် ခေတ်နောက်ကျသော အယူအဆဟောင်းများကို စွန့်လွှတ်ရမည်ဟု ယုံကြည်ထားသူဖြစ်သည်။

မြွေလူသားဘုရင်မသည် တစ်သက်လုံး လက်မထပ်ရဟူသော ဘိုးဘွားအစဉ်အလာ စည်းမျဉ်းမှာ မှားယွင်းသော ဆုံးဖြတ်ချက်တစ်ခုသာ ဖြစ်သည်။ အမျိုးသားနှင့် အမျိုးသမီးကြားက အချစ်ဆိုသည်မှာ ရှေးယခင်ကတည်းက မပြောင်းလဲသော သဘာဝတရားတစ်ခုပင် မဟုတ်ပါလား ရက်စက်ကြမ်းကြုတ်မှသာ မြွေလူသားများကို အုပ်ချုပ်နိုင်မည်လော။

မဟုတ်ပေ တတိယအကြီးအကဲက ထိုသို့မထင်ပါ။

စကြာဝဠာအတွင်းရှိ အရာအားလုံးတွင် ၎င်းတို့၏ ကိုယ်ပိုင်သဘာဝ ဖွံ့ဖြိုးတိုးတက်မှု နိယာမများ ရှိကြသည်။ နှလုံးသားထဲတွင် ကရုဏာတရားရှိမှသာ အကန့်အသတ်မရှိသော စွမ်းအားများကို ထုတ်ဖော်နိုင်မည်ဖြစ်သည်။

ဘုရင်မ မဒူဆာကိုပင် နမူနာကြည့်ပါ သူမ၏ မျိုးနွယ်စုအပေါ်ထားရှိသော ချစ်ခြင်းမေတ္တာသည် သူမ၏ ကျင့်စဉ်လမ်းကြောင်းအတွက် တွန်းအားတစ်ခု ဖြစ်ခဲ့သည်။ အကယ်၍ သူမ၏ လူမျိုးအပေါ် ဤမျှနက်ရှိုင်းသော ချစ်ခြင်းမေတ္တာသာ မရှိခဲ့လျှင် သူမ၏ ပါရမီတစ်ခုတည်းနှင့် ဤမျှငယ်ရွယ်သော အသက်အရွယ်တွင် ကြယ်ကိုးပွင့်တိုက်ပွဲဝင်ဧကရာဇ် အဆင့်သို့ တက်လှမ်းနိုင်ရန်မှာ မဖြစ်နိုင်ပေ။

ထို့ကြောင့် ကျိုးကြောင်းဆီလျော်မှုအရရော ခံစားချက်အရရော တတိယအကြီးအကဲသည် လင်းယွမ်နှင့် ဘုရင်မ မဒူဆာတို့ ပေါင်းဖက်ခြင်းကို ပို၍ နှစ်သက်မိသည်။

တတိယအကြီးအကဲ အတွေးထဲ နစ်မျောနေစဉ်မှာပင် လင်းယွမ်သည် ထရပ်လိုက်ကာ ဘုရင်မ မဒူဆာ၏ လက်ကိုဆွဲ၍ အကြီးအကဲများခန်းမရှိ အဓိကထိုင်ခုံဆီသို့ လျှောက်လှမ်းသွားသည်။

မဟာအကြီးအကဲ၏ ဘေးမှ ဖြတ်သွားသောအခါ လင်းယွမ်က သူ၏ တင်ပါးကို ခြေထောက်နှင့် တစ်ချက်ကန်လိုက်ပြီး  "ဖယ်စမ်း... ခွေးကောင်းဆိုတာ လမ်းပိတ်မနေဘူးကွ" ဟု ပြောလိုက်သည်။

မဟာအကြီးအကဲမှာ ချက်ချင်းပင် မြေပြင်ပေါ်သို့ မှောက်လျက်လဲကျသွားသော်လည်း သူ၏ ဒေါသကိုသာ အောင့်အည်းမျိုသိပ်ထားရပြီး နောက်ထပ် အဓိပ္ပာယ်မရှိသော စကားတစ်လုံးမျှ မဟရဲတော့ပေ။

ဒုတိယနှင့် စတုတ္ထအကြီးအကဲတို့မှာ တစ်ဦးကိုတစ်ဦး ကြည့်ကာ ပြုံးလိုက်ကြပြီး သူတို့၏ ထိုင်ခုံများကို ပါးနပ်စွာ ဖယ်ပေးလိုက်ကြသည်။ ဒါကို မြင်တော့ လင်းယွမ်က ကျေနပ်စွာ ခေါင်းညိတ်လိုက်သည်။

နောက်တစ်စက္ကန့်တွင် လင်းယွမ်သည် မဒူဆာကို ဆွဲကာ အောက်ရှိ မြွေလူသား အမြောက်အမြားကို ရင်ဆိုင်လိုက်ပြီး သူတို့၏ ဆုပ်ကိုင်ထားသော လက်များကို အထက်သို့ မြှောက်ပြလိုက်သည်။

"ဒီနေ့ကစပြီး မဒူဆာဟာ ငါလင်းယွမ်ရဲ့ ဇနီးပဲ။ မင်းတို့အားလုံးဟာ မဒူဆာရဲ့ မျိုးနွယ်စုဝင်တွေဖြစ်လို့ ငါ့ရဲ့ ကာကွယ်မှုကို ရရှိစေရမယ်"

"ဒါကို မှတ်ထားကြ ငါလင်းယွမ် အသက်ရှိသရွေ့ မြွေလူသားမျိုးနွယ်စုကို ဘယ်သူ့ကိုမှ အထင်သေးခွင့် မပေးဘူး။ မကြာခင်မှာ မင်းတို့ကို တာဂေါသဲကန္တာရထဲကနေ သေချာပေါက် ခေါ်ထုတ်သွားမှာဖြစ်ပြီး ဂါမာအင်ပါယာမှာ မြွေလူသားတွေအတွက် နေရာတစ်ခု ပေးသွားမယ်"

လင်းယွမ်၏ စကားလုံးများထဲတွင် တိုက်ပွဲဝင်စိတ်ဓာတ်များ ကိန်းအောင်းနေပြီး လူတိုင်း၏ နားထဲသို့ ရှင်းလင်းစွာ ရောက်ရှိသွားသည်။

ခဏချင်းမှာပင် ခန်းမထဲရှိ လူတိုင်းမှာ သွေးများ ဆူပွက်လာသလို ခံစားလိုက်ရပြီး သူတို့၏ မျက်ဝန်းများမှာ စိတ်လှုပ်ရှားမှုများကြောင့် တောက်ပလာတော့သည်။

"ဘုရင်ကြီး သက်တော်ရာကျော် ရှည်ပါစေ"

"ဘုရင်ကြီး သက်တော်ရာကျော် ရှည်ပါစေ"

"ကျွန်တော်တို့ ဘုရင်ကြီးနဲ့ ဘုရင်မကြီးကို ယုံကြည်ပါတယ်"

ထိုအခိုက်အတန့်တွင် မြွေလူသားအားလုံး၏ နှလုံးသားထဲ၌ လင်းယွမ်ကို သူတို့၏ ဘုရင်အသစ်အဖြစ် သတ်မှတ်လိုက်ကြပြီဖြစ်သည်။

 မဒူဆာမှာလည်း သဘာဝအတိုင်း "ဘုရင်မ" အဆင့်မှ လင်းယွမ်၏ "မိဖုရား" အဖြစ်သို့ ပြောင်းလဲသွားခဲ့ပြီ။

"ဟဲဟဲ... မဒူဆာ ဒီလို ခင်ပွန်းမျိုးကို ရှာတွေ့ခဲ့တဲ့အတွက် ငါ မင်းအတွက် တကယ် ဂုဏ်ယူမိတယ်"

တတိယအကြီးအကဲသည် ဘယ်ကနေ ရောက်လာမှန်းမသိဘဲ သစ်သားသေတ္တာတစ်လုံးကို ကိုင်ကာ ပြုံးလျက် ချဉ်းကပ်လာပြီး မေဒူဆာကို စစ်မှန်သော ဆုတောင်းစကားများ ဆိုလိုက်သည်။

"ကျေးဇူးတင်ပါတယ် တတိယအကြီးအကဲ"

မေဒူဆာ ရှက်သွေးဖြာသွားသော်လည်း တတိယအကြီးအကဲကို ကျေးဇူးတင်စကား ပြန်ဆိုလိုက်သည်။

"ဟဲဟဲ..."

တတိယအကြီးအကဲက တစ်ဖန် ပြုံးလိုက်ပြန်ပြီးနောက် လင်းယွမ်ဘက်သို့ လှည့်ကြည့်လိုက်သည်။ ထို့နောက် သစ်သားသေတ္တာကို လက်နှစ်ဖက်ဖြင့် မြှောက်ကိုင်ကာ လင်းယွမ်ကို ရိုသေစွာ ပြောလိုက်သည်  "အရှင်မင်းကြီး... အသွင်ပြောင်းဆေးအတွက် လိုအပ်တဲ့ ပါဝင်ပစ္စည်းတွေက ဒီထဲမှာပါ"

"ကောင်းပြီ... ပင်ပန်းသွားပြီနော် ကျေးဇူးပဲ"

လင်းယွမ် ခေါင်းညိတ်ပြလိုက်ပြီး သစ်သားသေတ္တာကို လှမ်းယူလိုက်သည်။ ထို့နောက် မဒူဆာ၏ နှာခေါင်းလေးကို သူ၏ လက်ချောင်းများဖြင့် ချစ်စနိုး ပွတ်သပ်လိုက်ကာ "ငါ့အတွက် လျှို့ဝှက်အခန်းတစ်ခု ရှာပေးပါ မင်းအတွက် အသွင်ပြောင်းဆေးကို အခုချက်ချင်း ဖော်စပ်ပေးမယ်"

"ကျွန်မရဲ့ နန်းတော်ဆီ သွားကြရအောင်"

"ကောင်းပြီလေ"

ပြောပြီးသည်နှင့် လင်းယွမ်နှင့် သူ၏ လက်တွဲဖော်တို့သည် တံခါးဆီသို့ ဦးတည်ထွက်ခွာသွားကြသည်။

"သွားပါပြီ အရှင်မင်းကြီး"

လင်းယွမ်တို့ ထွက်သွားပြီးနောက် တတိယအကြီးအကဲသည် ခန်းမထဲရှိ လူအားလုံးကို ချက်ချင်း ပြန်လွှတ်လိုက်ပြီး ဒုတိယနှင့် စတုတ္ထအကြီးအကဲတို့နှင့်အတူ နောက်ခန်းမသို့ ပြန်သွားတော့သည်။ မဟာအကြီးအကဲကိုမူ သူတို့ တစ်ချက်ပင် လှည့်မကြည့်ဘဲ လုံးဝ လျစ်လျူရှုထားခဲ့ကြသည်။

"လင်းယွမ်"

အားလုံး ထွက်သွားပြီးနောက် မဟာအကြီးအကဲ၏ မျက်နှာမှာ ချက်ချင်းပင် ကြမ်းတမ်းခက်ထန်သွားသည်။ သူသည် သွားများကို တင်းတင်းကြိတ်ထားပြီး လင်းယွမ်အပေါ် သူ၏ မုန်းတီးမှုမှာ ရူးသွပ်လုနီးပါး အဆင့်သို့ ရောက်ရှိနေပြီဖြစ်သည်။

သူသည် ပတ်ဝန်းကျင်ကို တစ်ချက်ကြည့်လိုက်ကာ ယုတ်မာစွာ ပြုံးလိုက်ပြီး သူ၏ စိတ်ထဲတွင် ယုတ်မာသော အစီအစဉ်တစ်ခု ချက်ချင်း ပေါ်ပေါက်လာတော့သည်။

...

အကြီးအကဲများခန်းမမှ ထွက်လာပြီးနောက် လင်းယွမ်သည် မေဒူဆာ၏ နန်းတော်ရှိ လျှို့ဝှက်အခန်းတစ်ခုသို့ ရောက်ရှိလာသည်။

"ရှင် တကယ်ပဲ ကိုယ့်ကိုယ်ကိုယ် ယုံကြည်မှု ရှိရဲ့လား"

လျှို့ဝှက်ခန်းမအတွင်း၌ ဘုရင်မ မဒူဆာသည် လင်းယွမ်ကို စိုးရိမ်တကြီး ကြည့်နေပြီး သူမ၏ စကားလုံးများတွင် တင်းမာမှုများ ဖုံးကွယ်နေသည်။

"အိုး..."

လင်းယွမ်က ခပ်တိုးတိုး ရယ်မောလိုက်ပြီး "စိတ်မပူပါနဲ့ အသွင်ပြောင်းဆေးက အဆင့် ၇ အဆင့်မြင့်ဆေးလုံး တစ်မျိုး ဖြစ်ပေမဲ့ ငါ့အတွက်တော့ အပျော့ပါပဲ" ဟု ပြောလိုက်သည်။

လင်းယွမ်၏ လေသံမှာ ယုံကြည်မှုများဖြင့် ပြည့်နှက်နေသည်။

လင်းယွမ် ဤကမ္ဘာသို့ မကူးပြောင်းမီကပင် ဟန်ဖုန်းသည် သူ၏ အကောင်းဆုံးအချိန်၌ အဆင့် ၆ ဆေးဖော်စပ်သူ ဖြစ်နေပြီးသားဖြစ်သည်။ ထို့ပြင် သူသည် "ယင်ယန် ရွှမ်လုံဆေးလုံး"ဟုခေါ်သော အဆင့် ၇ ဆေးလုံးတစ်မျိုးကိုလည်း အောင်မြင်စွာ ဖော်စပ်ခဲ့ဖူးသည်။ ဤအချက်က ဟန်ဖုန်းသည် သူ၏ ယခင်ခွန်အားနှင့်တင် အချို့သော အဆင့် ၇ အနိမ့်စား ဆေးလုံးများကို ဖော်စပ်နိုင်စွမ်းရှိကြောင်း သက်သေပြနေသည်။

ဤကမ္ဘာသို့ ကူးပြောင်းလာပြီးနောက် လင်းယွမ်သည် "မီးတောက်(မီးလောင်မြိုက်ခြင်း)ကျင့်စဉ်"၏ အပြည့်အစုံကို ရရှိခဲ့ပြီးပင်လယ်နှလုံးသား မီးတောက်ကိုလည်း အကုန်အစင် ဝါးမြိုနိုင်ခဲ့သဖြင့် သူ၏ ခွန်အားမှာ ပိုမို တိုးတက်လာခဲ့သည်။

ထို့ပြင် "ကြာပန်းစိမ်း မြေကမ္ဘာအူတိုင်မီးတောက်" ကိုပါ ထပ်မံ စုပ်ယူနိုင်ခဲ့ခြင်းကြောင့် ထိုထူးခြားသော မီးတောက်နှစ်မျိုး၏ ပေါင်းစပ်မှုက လင်းယွမ်ကို မီးတောက်အမျိုးမျိုးအပေါ် အနှိုင်းမဲ့ ထိန်းချုပ်နိုင်စွမ်းကို ပေးအပ်ထားသည်။ ဒါတင်မကဘဲ သူ၏ ကိုယ်ပိုင်ခွန်အားမှာလည်း တိုက်ပွဲဝင်ဘိုးဘေး အဆင့်သို့ ရောက်ရှိနေပြီဖြစ်သည်။

ဤအချက်များအားလုံးကို ထည့်တွက်ကြည့်လျှင် အဆင့် ၇ ဆေးလုံးနေနေသာသာ အဆင့် ၈ အနိမ့်စား ဆေးလုံးများကိုပင် လင်းယွမ် စမ်းသပ်ဖော်စပ်နိုင်ပြီဟု ယုံကြည်နေသည်။ ထို့ပြင် အဆင့် ၈ ဆေးလုံးကို အောင်မြင်စွာ ဖော်စပ်နိုင်ရန် ၅၀ ရာခိုင်နှုန်းခန့် ယုံကြည်မှု ရှိနေသည်။ ထို့ကြောင့် အသွင်ပြောင်းဆေးမှာ လင်းယွမ်အတွက် ဘာမှ မဟုတ်တော့ပေ။

"အင်း... ရှင့်ကို ကျွန်မ ယုံပါတယ်"

လင်းယွမ်၏ စကားကို ကြားပြီးနောက် မဒူဆာ၏ တင်းမာနေသော စိတ်အခြေအနေမှာ အနည်းငယ် လျော့ပါးသွားသည်။ သူမ ဤမျှ ဂရုတစိုက်ရှိနေသည်မှာ မဆန်းပေ။ သူမသည် လင်းယွမ်ကို အပြည့်အဝ ယုံကြည်သော်လည်း အသွင်ပြောင်းဆေးသည် မဒူဆာအတွက် တိုက်ပွဲဝင်ဘိုးဘေးအဆင့်သို့ ရောက်ရှိရန် အဓိကသော့ချက် ဖြစ်နေသောကြောင့်ပင်။

 မြွေလူသားများသည် ဤဆေးဖက်ဝင်အပင် နှစ်စုံကို ဆယ်စုနှစ်များစွာ ရာစုနှစ်များစွာတိုင်အောင် စုဆောင်းခဲ့ရခြင်းဖြစ်ရာ သူမအနေဖြင့် ပေါ့ဆ၍ မဖြစ်နိုင်ပေ။

"ကောင်းပြီ... ကလေးမလေး စိတ်မပူနဲ့။ မကြာခင်မှာ မင်းဟာ တိုက်ပွဲဝင်ဘိုးဘေးအဆင့်က အရေးပါတဲ့ ပုဂ္ဂိုလ်တစ်ယောက် ဖြစ်လာတော့မှာပါ"

ထို့နောက် လင်းယွမ်သည် လက်ထဲမှ သစ်သားသေတ္တာကို ဖွင့်လိုက်ပြီး ဆေးဖက်ဝင်အပင် နှစ်စုံလုံးကို အတူတူ ထုတ်ယူလိုက်သည်။

လက်ကောက်ဝတ်ကို အသာလေး လှုပ်ရှားလိုက်ရုံဖြင့် သားရဲတစ်ထောင် ဆေးအိုးမှာ သူ၏ လက်ဖဝါးပေါ်တွင် ချက်ချင်း ပေါ်လာတော့သည်။

"ငါ့ကို စောင့်ရှောက်ပေးဦးနော်"

ပြောနေရင်းနှင့် လင်းယွမ်သည် တင်ပလ္လင်ခွေ ထိုင်လိုက်ကာ ဆေးဖက်ဝင်အပင်များကို ဆေးအိုးထဲသို့ ပေါ့ပေါ့ပါးပါးပင် စတင် ထည့်သွင်းလိုက်တော့သည်။

"ခဏလေး"

ထိုခဏမှာပင် မဒူဆာက အံ့သြတကြား အော်ဟစ်လိုက်သည် "ရှင် ဆေးဖက်ဝင်အပင် နှစ်စုံလုံးကို တစ်ပြိုင်နက်တည်း ထည့်မလို့လား"

"မထည့်လို့ ဘာလုပ်ရမှာလဲ" လင်းယွမ်က နားမလည်သလို ပြန်မေးလိုက်သည်။

"ဒါပေမဲ့ ဆေးဖော်စပ်သူ တစ်ယောက်က တစ်ကြိမ်မှာ ဆေးလုံးတစ်လုံးပဲ ဖော်စပ်နိုင်တာ မဟုတ်ဘူးလား ရှင်က အပင်နှစ်စုံလုံးကို တစ်ပြိုင်နက် သုံးနေတာဆိုတော့ ဆေးလုံးနှစ်လုံးကို တစ်ပြိုင်နက် ဖော်စပ်ဖို့ ကြိုးစားနေတာလား" မဒူဆာမှာ အနည်းငယ် ဇဝေဇဝါဖြစ်လျက် မျက်တောင်လေး ခတ်ကာ မေးလိုက်မိသည်။

"ဟွန်း... ငါနဲ့ နှိုင်းယှဉ်ရင် တခြားဆေးဖော်စပ်သူတွေက ဘာအရည်အချင်း ရှိလို့လဲ" လင်းယွမ်၏ စကားလုံးများမှာ မာန်မာနများဖြင့် ပြည့်နှက်နေသည်။

နောက်တစ်စက္ကန့်တွင် မဒူဆာ၏ အံ့သြနေသော အကြည့်အောက်၌ပင် လင်းယွမ်သည် အသွင်ပြောင်းဆေးအတွက် ပါဝင်ပစ္စည်း နှစ်စုံလုံးကို ဆေးအိုးထဲသို့ ပစ်ထည့်လိုက်တော့သည်။