အခန်း ၁၈ ကန့်ကွက်ရဲတဲ့သူရှိလား

"တတိယအကြီးအကဲ မလုပ်ပါနဲ့"

တတိယအကြီးအကဲ၏ စကားကို ကြားလိုက်ရသည်နှင့် ယွဲ့မေသည် ထိတ်လန့်တကြား အော်ဟစ်လိုက်မိသည်။

မြွေလူသားမျိုးနွယ်စု၏ အကြီးအကဲလေးဦးအနက် တတိယအကြီးအကဲ တစ်ဦးတည်းသာလျှင် မျိုးနွယ်စုအပေါ် စစ်မှန်သော စေတနာထားရှိသူ ဖြစ်သည်။

တတိယအကြီးအကဲသည် သူ၏ အင်အားနှင့် အချိန်အားလုံးကို မြွေလူသားမျိုးနွယ်စု ဖွံ့ဖြိုးတိုးတက်ရေးအတွက်သာ နှစ်ပေါင်းများစွာ ပုံအောပေးခဲ့သောကြောင့် သူ၏ ကျင့်စဉ်အဆင့်မှာတိုက်ပွဲဝင်ဘုရင်အဆင့်တွင်သာ တစ်ဆို့နေပြီး ရှေ့မတိုးနိုင်ခြင်း ဖြစ်သည်။

အကယ်၍သာ သူသည် ထိုနှစ်များအတွင်း ကျင့်စဉ်ဘက်၌သာ အာရုံစိုက်ခဲ့မည်ဆိုပါက သူသည် တိုက်ပွဲဝင်ဧကရာဇ်အဆင့်သို့ ချိုးဖျက်ရောက်ရှိနေပြီးသား ဖြစ်လိမ့်မည်။

ထို့ကြောင့် ယွဲ့မေသည် တတိယအကြီးအကဲကို အမြဲတမ်း အလေးအနက်ထား ရိုသေလေးစားခဲ့သည်။

ယခုအခါ မြွေလူသားများအတွက် တတိယအကြီးအကဲက သူ၏ အသက်ကိုပင် ပေးဆပ်ရန် ဝန်မလေးတော့ပေ။

မြွေလူသားမျိုးနွယ်စုအတွက် တစ်ဘဝလုံး ပေးဆပ်ခဲ့သည့် အဘိုးအိုတစ်ဦး အသက်ပေးရမည်ကို ယွဲ့မေက မည်သို့ ကြည့်ရက်ပါမည်နည်း။

"လင်းယွမ် တောင်းပန်ပါတယ် တတိယအကြီးအကဲကို မသတ်ပါနဲ့နော် ဟုတ်ပြီလား တတိယအကြီးအကဲ ဘာပဲလုပ်လုပ် ဒါဟာ ကျွန်မတို့ မြွေလူသားတွေအတွက်ပါ။ ရှင်သာ အမိန့်ရှိလိုက်ပါ တတိယအကြီးအကဲရဲ့ အသက်အစား ကျွန်မ အသက်ကို ပေးဖို့ အဆင်သင့်ပါပဲ။"

ယွဲ့မေသည် လင်းယွမ်၏ နံဘေးသို့ ပြေးဝင်လာပြီး သူ၏ ဝတ်ရုံစကို ဆွဲကိုင်လိုက်သည်။ မျက်ရည်များ ဝေဝါးနေသော သူမ၏ ပုံစံမှာ အလွန်ပင် သနားစဖွယ် ကောင်းလှသည်။

သူမ၏ ကြည်လင်သော မျက်ဝန်းအစုံတွင် မျက်ရည်ဥများ ဝိုင်းနေပြီ ဖြစ်သည်။ ယွဲ့မေ၏ အပြုအမူက တတိယအကြီးအကဲကို အလွန်ပင် စိတ်လှုပ်ရှားသွားစေသည်။

"မိုက်မဲတဲ့ကလေး... ငါက အဘိုးကြီးတစ်ယောက်ပါ နေဖို့ သိပ်မကျန်တော့ပါဘူး။ ငါတို့ မြွေလူသားတွေသာ ဒီသဲကန္တာရထဲက ထွက်သွားနိုင်မယ်ဆိုရင် ငါ့ရဲ့ အသက်အိုကြီးကို ဆုံးရှုံးရတာ ဘာအရေးလဲ"

ထို့နောက် တတိယအကြီးအကဲ၏ တွန့်ရှုံ့နေသော မျက်နှာပေါ်တွင် အပြုံးတစ်ခု ပေါ်လာသည်။

သူ နှစ်ပေါင်းများစွာ ကြိုးစားခဲ့သမျှက တန်ဖိုးရှိခဲ့သည်ဟု ထင်ရသည်။

အနည်းဆုံးတော့ သူ လုပ်ဆောင်ခဲ့သမျှကို နှလုံးသားထဲမှာ မှတ်ထားပေးတဲ့ ဒီကလေးမလေး ရှိနေသေးတာပဲ။

"ဟင့်အင်း... တတိယအကြီးအကဲ မြွေလူသားမျိုးနွယ်စုက အဘိုးမပါဘဲ မရှင်သန်နိုင်ဘူး ယွဲ့မေက အဘိုးကို အသေမခံနိုင်ဘူး"

ပြောပြီးသည်နှင့် ယွဲ့မေ၏ မျက်နှာပေါ်တွင် မျက်ရည်များမှာ ထိန်းမနိုင်သိမ်းမရ စီးကျလာတော့သည်။ "လင်းယွမ်... ကျေးဇူးပြုပြီး ကျေးဇူးပြုပြီး ဘုရင်မကြီးရဲ့ မျက်နှာကို ထောက်ထားပြီး တတိယအကြီးအကဲကို ချမ်းသာပေးပါ"

အခြားရွေးချယ်စရာ မရှိတော့သည့်အဆုံး ယွဲ့မေသည် ဘုရင်မ မဒူဆာကိုသာ ထုတ်သုံးလိုက်ရတော့သည်။

လင်းယွမ် မြွေလူသားမျိုးနွယ်စုထဲ စဝင်လာစဉ်က ဘုရင်မကြီး၏ အမူအရာကို ကြည့်ခြင်းအားဖြင့် သူတို့နှစ်ဦးကြားတွင် ထူးခြားသော ဆက်ဆံရေး ရှိရမည်ဟု သူမ တွေးမိသည်။

မဟုတ်ပါက အမြဲတမ်း အေးစက်လှသော ဘုရင်မကြီးသည် အမျိုးသားတစ်ဦးနှင့် ဤမျှ ရင်းနှီးသော အပြုအမူမျိုး လုံးဝ ရှိလိမ့်မည် မဟုတ်ပေ။

မြွေလူသားများထဲတွင် လင်းယွမ်၏ ခွန်အားနှင့်ဆိုလျှင် သူသာ လူသတ်ပွဲ ဆင်နွှဲချင်ပါက မည်သူမျှ တားနိုင်မည် မဟုတ်။

ထို့ကြောင့် ဤအခိုက်အတန့်တွင် ယွဲ့မေသည် လင်းယွမ်၏ ဘုရင်မ မေဒူဆာအပေါ်ထားရှိသော ခံစားချက်ကိုသာ မျှော်လင့်ချက်ထားရတော့သည်။

"ငါ ပြောသားပဲ... မင်းတို့က ဒီလိုတွေ ငိုယိုအော်ဟစ်နေကြတာ မပျင်းကြဘူးလား"

လင်းယွမ်သည် သူ၏ ဝတ်ရုံစကို စိတ်မရှည်စွာ ပြန်ဆွဲလိုက်ပြီးနောက် လက်ကို မြှောက်ကာ ယွဲ့မေ၏ မျက်ရည်များကို သုတ်ပေးလိုက်သည်။

တကယ်ပြောရရင် ဒီလိုလုပ်ရတာ တော်တော် ခံစားချက်ကောင်းတယ်။

ထို့နောက် လင်းယွမ်က ပျင်းရိစွာ ပြောလိုက်သည် "ဒီအဘိုးကြီးကို ငါသတ်မယ်လို့ ဘယ်တုန်းက ပြောလို့လဲ"

ဒါကို ကြားလိုက်ရသည်နှင့် ယွဲ့မေ၏ မျက်ဝန်းထဲတွင် အံ့သြဝမ်းသာမှုများ ချက်ချင်း ပေါ်လာတော့သည်။

သို့သော် ယွဲ့မေနှင့် မတူသည်မှာ ကာယကံရှင်ဖြစ်သော တတိယအကြီးအကဲမှာမူ တစ်ကိုယ်လုံး တုန်ရီသွားပြီး မျက်နှာမှာ ပြာနှမ်းသွားတော့သည်။

"ပြီးပြီ... လင်းယွမ်က အဲဒီလို ပြောလိုက်မှတော့ သူက မြွေလူသားတွေကို လုံးဝ လွှတ်ပေးမှာ မဟုတ်တော့ဘူး"

ထိုသို့တွေးမိကာ တတိယအကြီးအကဲသည် မျှော်လင့်ချက်ကင်းမဲ့စွာ ပြောလိုက်သည်  "အရှင်.. အရှင်က ကျွန်တော်တို့ မြွေလူသားမျိုးနွယ်စု တစ်ခုလုံးကို မျိုးတုံးအောင် လုပ်မှပဲ ကျေနပ်မှာလား"

တတိယအကြီးအကဲ၏ စကားကြောင့် လင်းယွမ်မှာ ဆွံ့အသွားရသည်။

"အဘိုးကြီး... ငါ မြွေလူသားတွေကို မျိုးတုံးအောင် လုပ်မယ်လို့ ပြောခဲ့ဖူးလို့လား"

သူ မြွေလူသားတွေကို တစ်ခုခုလုပ်မယ်လို့ မပြောခဲ့ဖူးပါဘူး ဟုတ်တယ်မလား။

မြွေလူသားမျိုးနွယ်စုဆိုတာ အဲဒီ မိုက်မဲတဲ့ ဘုရင်မ မဒူဆာရဲ့ အသက်သွေးကြောပဲလေ

အကယ်၍ ငါက မြွေလူသားတွေကို တကယ် မျိုးတုံးအောင် လုပ်လိုက်ရင် မဒူဆာက ငါ့ကို ကိုက်သတ်မှာပေါ့။

လင်းယွမ်က ဘုရင်မ မဒူဆာကို လက်ထပ်မှာဆိုတော့ သူက ဘယ်လိုလုပ် သူမရဲ့ မျိုးနွယ်စုကို ဆန့်ကျင်မှာလဲ။

ဒါ့အပြင် ဘုရင်မ မဒူဆာကို ခဏဘေးဖယ်ထားရင်တောင် လင်းယွမ်က မြွေလူသားတွေကို တကယ် ဘာမှလုပ်မှာ မဟုတ်ပါဘူး။

မြွေလူသားတွေကို ကယ်ဖို့ သူ့အသက်ကို ပေးမယ်လို့ တတိယအကြီးအကဲ ပြောလိုက်တဲ့အခါ လင်းယွမ်သည် ထိုအဘိုးအိုအပေါ် လေးစားစိတ် ဖြစ်ပေါ်လာမိသည်။

အတိတ်ရော ပစ္စုပ္ပန်မှာပါ ကြည့်မယ်ဆိုရင် ဘယ်နှစ်ယောက်ကများ ဒီလို ကိုယ်ကျိုးစွန့် အနစ်နာခံနိုင်မှာလဲ။

ဒီအဘိုးကြီးက သူ့လူမျိုးအတွက် သူ့အသက်ကို စွန့်လွှတ်ဖို့ အဆင်သင့်ပဲ။ ဘယ်နှစ်ယောက်ကများ ဒီလို ကိုယ်ကျိုးမဖက်တဲ့ စိတ်ဓာတ် ရှိနိုင်မှာလဲ?

ဒါကြောင့် လင်းယွမ်သည် တတိယအကြီးအကဲကြောင့်ပင် မြွေလူသားတစ်ယောက်ရဲ့ အသက်ကိုမျှ ထိခိုက်စေမှာ မဟုတ်ပါဘူး။

လင်းယွမ်၏ စကားအဆုံးတွင် တတိယအကြီးအကဲမှာ အလွန်အမင်း အံ့သြဝမ်းသာ သွားရသည်။

"အရှင်... ကျွန်တော်တို့ကို အပြစ်မယူတော့ဘူးလား" ပြောပြီးနောက် တတိယအကြီးအကဲသည် လင်းယွမ်၏ အမူအရာကို အသက်ရှူပင် မဝံ့ဘဲ သေချာ ဂရုတစိုက် ကြည့်နေမိသည်။

လင်းယွမ်က ခေါင်းညိတ်လိုက်သည်။ "ငါ အစကတည်းက ပြောပြီးသားပဲ ငါဒီကိုလာတာ အကြောင်းရင်း နှစ်ခုရှိတယ် တစ်ခုက မဒူဆာအတွက် အသွင်ပြောင်းဆေးဖော်စပ်ဖို့ ဆေးဖက်ဝင်အပင်တွေ ရယူဖို့ နောက်တစ်ခုက သူမကို "လက်ထပ်ဖို့ပဲ

"ကောင်းပါပြီ... အသွင်ပြောင်းဆေး ဖော်စပ်ဖို့ လိုအပ်တဲ့ ပါဝင်ပစ္စည်းတွေကို ကျွန်တော် အခုချက်ချင်း သွားယူပေးပါ့မယ်"

အစတုန်းကတော့ တတိယအကြီးအကဲသည် ဘုရင်မ မေဒူဆာ အဆင့်တက်ချင်ဇောဖြင့် မသမာသောသူတစ်ဦး၏ လှည့်ဖြားခြင်း ခံရမည်ကို အမှန်တကယ် စိုးရိမ်ခဲ့သောကြောင့် မဟာအကြီးအကဲနောက်သို့ လိုက်ကာ လင်းယွမ်ကို အခက်တွေ့အောင် လုပ်ခဲ့ခြင်းဖြစ်သည်။

အခုတော့ လင်းယွမ်က သူ၏ ခွန်အားကို သက်သေပြခဲ့ပြီးပြီ။

ဒါကြောင့် ထိုအခိုက်အတန့်မှာပင် သူသည် ဘာတွန့်ဆုတ်မှုမျှ မရှိဘဲ သဘောတူလိုက်သည်။

"မလုပ်နဲ့ အသွင်ပြောင်းဆေးအတွက် ပါဝင်ပစ္စည်းတွေကို ပေးနိုင်ပေမဲ့ မဒူဆာက ငါတို့ မြွေလူသားမျိုးနွယ်စုရဲ့ ဘုရင်မပဲ သူမက ပြင်ပလူတစ်ယောက်ကို လက်ထပ်ဖို့ဆိုတာ လုံးဝ မဖြစ်နိုင်ဘူး"

မူလက တတိယအကြီးအကဲသည် လင်းယွမ်အတွက် ဆေးဖက်ဝင်အပင်များ သွားယူရန် ပြင်ဆင်နေပြီဖြစ်သည်။

သို့သော် ထိုအချိန်မှာပင် မဟာအကြီးအကဲ၏ အသံက ရုတ်တရက် ထွက်ပေါ်လာပြန်သည်။

"အစ်ကိုကြီး... ဒါက ဘာသဘောလဲ" တတိယအကြီးအကဲသည် မလှမ်းမကမ်းရှိ မဟာအကြီးအကဲကို ဒေါသတကြီး စိုက်ကြည့်လိုက်သည်။

ဒီအဘိုးကြီးက ဒီလိုအချိန်မှာ ထွက်လာပြီး မြွေလူသားတွေကို သေတွင်းထဲ ဆွဲခေါ်ဖို့ ကြိုးစားနေပြန်တာလား။

"ဟွန်း တတိယညီ... မင်း ငါတို့ မြွေလူသားမျိုးနွယ်စုရဲ့ ဘိုးဘွားအစဉ်အလာ ဥပဒေတွေကို မေ့သွားပြီလား မြွေလူသားမျိုးနွယ်စုရဲ့ ဘုရင်မဆိုတာ ဘယ်တော့မှ လက်မထပ်ရဘူး။ ဒါကြောင့် ဆေးဖက်ဝင်အပင်တွေကို ပေးနိုင်ပေမဲ့ ဒီလက်ထပ်ပွဲကိုတော့ ငါသဘောမတူဘူး"

မဟာအကြီးအကဲက အေးစက်စွာ နှာခေါင်းရှုံ့လိုက်ပြီး ဘိုးဘွားအစဉ်အလာတွေကို ထုတ်သုံးလိုက်သည်။

"ဒါက..."

ရလဒ်အနေဖြင့် တတိယအကြီးအကဲမှာ ဆွံ့အသွားရသည်။

"မင်းရဲ့ ဘိုးဘွားအစဉ်အလာ ကျင့်ဝတ်တွေကို ငရဲကိုသာ ပို့လိုက်တော့" ထိုစဉ်မှာပင် လင်းယွမ်က ရုတ်တရက် အော်ဟစ်လိုက်သည်။

နောက်တစ်စက္ကန့်တွင် တိုက်ပွဲဝင်ဘိုးဘေးအဆင့် အရှိန်အဝါတစ်ခုမှာ မိုးခြိမ်းသံကဲ့သို့ ထွက်ပေါ်လာပြီး ခန်းမတစ်ခုလုံးကို ချက်ချင်း ဖုံးလွှမ်းသွားတော့သည်။

ထို့နောက် အကြီးအကဲ၏ နှာခေါင်းကို လက်ညှိုးထိုးကာ ဆဲရေးလိုက်သည်  "ခွေးအိုကြီး... မဒူဆာနဲ့ ငါက အချစ်ကြီး ချစ်နေကြတာ မင်းက ဘာမို့လို့လဲ ဘယ်သူက မင်းကို ကန့်ကွက်ခွင့် ပေးထားလို့လဲ"

ပြောနေရင်းနှင့် လင်းယွမ်၏ ကိုယ်ပေါ်မှ ကြောက်မက်ဖွယ်ကောင်းသော လူသတ်ငွေ့များ ရုတ်တရက် ပေါက်ကွဲထွက်လာသည်။ "ငါ မဒူဆာကို လက်ထပ်မယ် နောက်ထပ် စကားတစ်လုံး ထပ်ပြောရဲတဲ့သူရှိရင် မယုံရင် အဲဒီနေရာမှာတင် သတ်ပြမယ်"

ထိုသို့ပြောပြီးနောက် လင်းယွမ်၏ လက်တွေ့ဆုပ်ကိုင်၍ ရလုနီးပါး ပြင်းထန်သော လူသတ်ငွေ့များက မဟာအကြီးအကဲအပေါ်သို့ ကျရောက်သွားတော့သည်။

"မင်း..."

လင်းယွမ်၏ လူသတ်ငွေ့များအောက်တွင် မဟာအကြီးအကဲ၏ ကျောပြင်မှာ ချက်ချင်းပင် ချွေးအေးများဖြင့် စိုရွှဲသွားသည်။

သူ ပါးစပ်ကို ဟလိုက်သော်လည်း နောက်ဆုံးတွင် စကားတစ်လုံးမျှ ထပ်မဟရဲတော့ပေ။

သူသာ နောက်ထပ်တစ်ကြိမ် "ဟင့်အင်း" ဟု ပြောရဲပါက လင်းယွမ်က သူ့ကို သေချာပေါက် သတ်လိမ့်မည်ဆိုသည်ကို သူ သံသယ မရှိတော့ပေ။

ထိုအခိုက်အတန့်တွင် ခန်းမတစ်ခုလုံး တိတ်ဆိတ်သွားပြီး မည်သူမျှ အသက်ပင် မရှူဝံ့ကြတော့ချေ။

"ကဲ... ငါ နောက်တစ်ကြိမ် ထပ်မေးမယ် မဒူဆာနဲ့ ငါ့ရဲ့ လက်ထပ်ပွဲကို ကန့်ကွက်ရဲတဲ့သူ ရှိသေးလား"

မဟာအကြီးအကဲ ငြိမ်ကျသွားသည်ကို မြင်တော့ လင်းယွမ်သည် သူ၏ အကြည့်ကို လွှဲလိုက်ပြီး ရောက်ရှိနေသော လူအုပ်ကြီးဆီသို့ ဝေ့ကြည့်လိုက်သည်။

လင်းယွမ်၏ အကြည့်နှင့် ဆုံသူတိုင်း ခေါင်းငုံ့သွားကြပြီး သူ၏ မျက်လုံးကို မကြည့်ဝံ့ကြချေ။

လင်းယွမ်က ကျေနပ်စွာ ခေါင်းညိတ်လိုက်ပြီးနောက် တတိယအကြီးအကဲကို ပြောလိုက်သည် "သွားကြစို့... ငါ့ကို မဒူဆာဆီ အရင် ခေါ်သွားပေး"