အခန်း ၁၇၆ ကောင်းကင်မီးလျှံကို သွားခိုးကြစို့

ဝုန်း

သတ်ဖြတ်ခြင်းနတ်ဘုရားနန်းတော်၏ အထက်ကောင်းကင်ယံဆီမှနေ၍ ဧရာမ လျှပ်စီးတန်းကြီးတစ်ခုက တည့်တည့်မတ်မတ် အရှိန်အဟုန်ဖြင့် ကျဆင်းလာခဲ့သည်။

ထို့နောက် ချက်ချင်းဆိုသလိုပင် မိုင်ပေါင်းများစွာ ပတ်ပတ်လည်ရှိ ကောင်းကင်ပြင်ကြီးတစ်ခုလုံးကို မိုးတိမ်မည်းကြီးများက ဖုံးလွှမ်းသွားတော့သည်။

ဂျိန်း

လျှပ်စီးတန်းများက အဆက်မပြတ် စီးဆင်းလာပြီး တစ်ခုပြီးတစ်ခု လျှပ်ခတ် ကျဆင်းလာခဲ့သည်။

"ဘာတွေဖြစ်နေတာလဲ"

"နန်းတော်သခင် အကျဉ်းချထိုင်ကျင့်နေတဲ့ အရပ်ဆီကနေ ကြောက်မက်ဖွယ်ကောင်းတဲ့ အငွေ့အသက်တစ်ခု ထွက်ပေါ်လာတာကို ငါ ခံစားမိတယ်"

"ဒါ... နန်းတော်သခင် ကျင့်စဉ်အဆင့် ထပ်ပြီး တက်လှမ်းအောင်မြင်သွားတာ နေမှာလား"

"ငါတို့ နန်းတော်သခင်က တကယ့်ကို ကောင်းကင်က နတ်ဘုရားတစ်ပါးအတိုင်းပဲ"

လူအများ၏ အကြည့်အားလုံးက လင်းယွမ် အကျဉ်းချထိုင်ကျင့်နေသည့် လျှို့ဝှက်အခန်းဆီသို့ စုပြုံရောက်ရှိသွားကြသည်။

လူတိုင်း၏ မျက်နှာထက်တွင် ပြင်းပြသော ရိုသေကိုးကွယ်မှု အရိပ်အယောင်များ ပြည့်နှက်နေကြ၏။

ဤကဲ့သို့ ထူးဆန်းသော ကောင်းကင်ဖြစ်စဉ်ကြီးသည် နန်းတော်သခင်၏ လက်ချက်သာ ဖြစ်ရမည်ဟု သူတို့ အသေအချာ သိထားကြသည်။

"ဟင်း... ဒီလူကတော့ တကယ့်ကို မနားမနေကို လှုပ်ရှားမှုတွေ လုပ်ပြနေတော့တာပဲ"

ခုနစ်ရောင်ခြယ် ဝတ်ရုံကို ဆင်မြန်းထားသော ဘုရင်မ မဒူဆာ၏ လှပသော မျက်ဝန်းအစုံထဲတွင် ဝမ်းမြောက်ကြည်နူးမှုများ လင်းလက်နေခဲ့သည်။

သူမ၏ ယောက်ျားက တကယ့်ကို ပါရမီရှင်တစ်ယောက်ပင်။ အကျဉ်းချထိုင်ကျင့်ရုံမျှဖြင့် ဤမျှ ကြီးမားသော လှုပ်ရှားမှုကို ဖြစ်ပေါ်စေခဲ့သည်။

"ဟားဟား... နန်းတော်သခင်က သာမန်လူတွေနဲ့ ဘယ်လိုလုပ် တူနိုင်မှာလဲ"

ဟိုင်ပေါ်တုန်းက အကျယ်ကြီး အော်ရယ်လိုက်ပြီး သူ့စကားလုံးများထဲတွင် အတိုင်းအဆမဲ့ ချီးကျူးဂုဏ်ပြုမှုများ ပြည့်နှက်နေသည်။

လင်းယွမ် ပိုမို သန်မာလာလေလေ သူ ပို၍ ပျော်ရွှင်လေလေပင်။

...

"လင်းယီ... ခရမ်းစွမ်းအင် နတ်ဆိုးလျှပ်စီးကို ဆင့်ခေါ်ကြည့်စမ်း"

လျှို့ဝှက်အခန်းအတွင်း၌ တလိမ့်လိမ့် တက်နေသော လျှပ်စီးတန်းများ ဝန်းရံထားသည့် လင်းယီကို ကြည့်ရင်း လင်းယွမ်က စိတ်ဝင်တစားဖြင့် မနေနိုင်ဘဲ ပြောလိုက်သည်။

ဝုန်း

တောက်ပသော ခရမ်းရောင် လျှပ်စီးကြောင်းအချို့က လေထုကို ဖြတ်သန်းသွားပြီးနောက် မြင်းသန်းချီ ဒုန်းစိုင်းပြေးလွှားနေသကဲ့သို့ ကျယ်လောင်လှသော မိုးခြိမ်းသံကြီးက လင်းယီ၏ ပတ်ပတ်လည်မှနေ၍ အုန်းအုန်းကျွက်ကျွက် ထွက်ပေါ်လာခဲ့သည်။

ထို့နောက် ချက်ချင်းဆိုသလိုပင် ကြောက်မက်ဖွယ်ကောင်းသော အငွေ့အသက်များကို ထုတ်လွှတ်နေသည့် ခရမ်းစွမ်းအင် နတ်ဆိုးလျှပ်စီးများက လင်းယွမ်၏ ရှေ့တွင် လွင့်မြော ပေါ်ထွက်လာခဲ့သည်။

"ခရမ်းစွမ်းအင် နတ်ဆိုးလျှပ်စီးရဲ့ စွမ်းအားက တကယ့်ကို ကြောက်စရာကောင်းတာပဲ"

လင်းယွမ်၏ မျက်နှာထက်တွင် အံ့ဩရိပ်များ ဖြတ်ပြေးသွားသည်။

ဤခရမ်းစွမ်းအင် နတ်ဆိုးလျှပ်စီး၏ စွမ်းအားက သူ ပိုင်ဆိုင်ထားသော ကောင်းကင်ယံမီးလျှံထက်ပင် အနည်းငယ်မျှ လျော့နည်းခြင်း မရှိပေ။

အကယ်၍ လင်းယီသာ သူမ၏ အင်အားအပြည့်ကို ထုတ်သုံးပြီး ခရမ်းစွမ်းအင် နတ်ဆိုးလျှပ်စီး၏ အကူအညီကို ယူမည်ဆိုပါက တိုက်ခိုက်ရေးစွမ်းရည်က သူ့မူလခန္ဓာကိုယ်နှင့် အတူတူနီးပါး ဖြစ်သွားလိမ့်မည်။

အကယ်၍ ကိုယ်ပွားနှစ်ခုလုံးက ထူးဆန်းသော လျှပ်စီးများကို တစ်ပြိုင်နက်တည်း စုပ်ယူပြီး အဆင့်မြင့် ကိုယ်ပွားနည်းဗျူဟာကို ထုတ်သုံးလိုက်မည်ဆိုပါက လင်းယွမ်သည် ဒိုချီရိုသေအပ်သောသခင်ကြီး အဆင့် ကျွမ်းကျင်သူနှင့်ပင် ရင်ဆိုင်တိုက်ခိုက်ရန် ဝံ့ရဲပေလိမ့်မည်။

တစ်ချိန်တည်းမှာပင် လင်းယွမ်သည် မိမိခန္ဓာကိုယ်အတွင်းရှိ တိုက်ပွဲစိတ်ဝိညာဉ်စွမ်းအင်များမှာ မီးတောင်ပေါက်ကွဲသကဲ့သို့ ပြင်းထန်စွာ ဆူပွက်တိုးဝှေ့လာသည်ကိုလည်း ခံစားလိုက်ရသည်။

ဝူး

အလင်းတန်းတစ်ခု ဖြတ်ပြေးသွားပြီးနောက် လင်းယွမ်က မိမိ၏ စွမ်းအားကို ဆန်းစစ်ကြည့်လိုက်သည်။

ခုနစ်ကြယ်ပွင့် ဒိုချီဘိုးဘေး အထွတ်အထိပ်။

"ဟဲဟဲ... တကယ့်ကို မမျှော်လင့်ဘဲ ရလာတဲ့ ပျော်ရွှင်မှုပဲ"

လင်းယွမ်က အနည်းငယ် ပြုံးလိုက်မိသည်။ ကိုယ်ပွားက ထူးဆန်းသော လျှပ်စီးကို ဝါးမြိုပြီးနောက် သူ့ကိုယ်ပိုင် ကျင့်စဉ်အဆင့်ကပါ လိုက်ပါ မြင့်တက်လာလိမ့်မည်ဟု သူ လုံးဝ မျှော်လင့်မထားခဲ့မိပေ။

နောင်တွင် ကံကောင်းခြင်းရမှတ်များကို ပိုမို စုဆောင်းရမည်ဖြစ်ပြီး ထူးဆန်းသော လျှပ်စီးများနှင့် လဲလှယ်နိုင်ရန် ကြိုးစားရပေလိမ့်မည်။

ဤနည်းအတိုင်းဆိုပါက သူ၏ စွမ်းအားသည် ဒိုချီရိုသေအပ်သောသခင်ကြီး အဆင့်သို့ အလွန် လျင်မြန်စွာ ဖြတ်ကျော်သွားနိုင်မည် မဟုတ်ပါလား။

"ဒါပေမဲ့ အခု လုပ်ရမယ့် အကောင်းဆုံးအလုပ်ကတော့ ကောင်းကင်မီးလျှံကို အမြန်ဆုံး ရှာဖွေဖို့ပဲ"

ဤအချက်ကို တွေးမိရင်း လင်းယွမ်က နောက်ထပ် ရက်အနည်းငယ်ကြာလျှင် ကျားနန်ကျောင်းတော်သို့ ခရီးတစ်ခု သွားရန် ဆုံးဖြတ်လိုက်သည်။

ကိုယ်ပွားကို မိမိခန္ဓာကိုယ်ထဲသို့ ပြန်လည် သိမ်းဆည်းလိုက်ပြီးနောက် လင်းယွမ်သည် လျှို့ဝှက်အခန်းထဲမှ ဖြည်းညှင်းစွာ လမ်းလျှောက် ထွက်လာခဲ့သည်။

ယခုတစ်ကြိမ် အကျဉ်းချထိုင်ကျင့်ခြင်း၏ ရလဒ်များကို သူ အလွန်ပင် ကျေနပ်အားရနေမိသည်။

စနစ်ဝိညာဉ်က အောင်မြင်စွာ အဆင့်မြှင့်တင်နိုင်ခဲ့ရုံသာမက လုပ်ဆောင်ချက်အသစ်မျိုးစုံကိုပါ ပွင့်သွားစေခဲ့သည်။

သူ့ကိုယ်ပိုင် စွမ်းအားကပင် ခုနစ်ကြယ်ပွင့် ဒိုချီဘိုးဘေး အထွတ်အထိပ်သို့ တိုက်ရိုက် ရောက်ရှိသွားခဲ့ပြီး ရှစ်ကြယ်ပွင့်အဆင့်သို့ ရောက်ရန် ခြေတစ်လှမ်းသာ လိုတော့သည်။

ဘုရင်မ မဒူဆာက အပြင်ဘက်တွင် စောင့်ဆိုင်းနေခဲ့သည်မှာ ကြာပြီ ဖြစ်သည်။

လင်းယွမ် ထွက်လာသည်ကို မြင်လိုက်ရသည့်အခါ ဘုရင်မ မဒူဆာက သိက္ခာရှိရှိဖြင့် အရှေ့သို့ လှမ်းလာပြီး ကြိုဆိုလိုက်သည်။

"ယခုတစ်ကြိမ် အကျဉ်းချထိုင်ကျင့်တာကနေ မင်း ရလဒ်တွေ အများကြီး ရခဲ့ပုံပဲ"

ဘုရင်မ မဒူဆာက လင်းယွမ်ကို အပေါ်အောက် အကဲခတ်ကြည့်လိုက်သည်။

သူမသည် လင်းယွမ်ထံမှ ထွက်ပေါ်နေသော အားကောင်းသည့် ဖိအားတစ်ခုကို ခံစားနေရပြီး ထိုအရာက ဝိညာဉ်၏ နက်ရှိုင်းသော နေရာမှနေ၍ လာခြင်း ဖြစ်သည်။

လင်းယွမ်၏ စွမ်းရည်များသည် ကျင့်စဉ်အဆင့် တက်လှမ်းမှုကြောင့် များစွာ ပိုမို သန်မာလာခဲ့ပြီ ဖြစ်ရမည်။

"ဟဲဟဲ... ငါ့မိန်းမက တကယ့်ကို စမတ်ကျတာပဲ တစ်ချက်ကြည့်ရုံနဲ့တင် သိတာပဲ"

လင်းယွမ်က ပြုံးလိုက်ပြီး ဘုရင်မ မဒူဆာ၏ ပါးပြင်လေးကို လက်လှမ်း၍ တို့ထိလိုက်ရာ သူမက ရှက်သွေးဖြာကာ မျက်နှာလေး ရဲတက်သွားခဲ့သည်။

ချက်ချင်းပင် သူက လက်ဖဝါးကို လှန်လိုက်ရာ ရွှေရောင်အလင်းများ ဖြာထွက်နေသော ကျင့်စဉ်ပေလိပ်တစ်ခု ပေါ်လာခဲ့သည်။

"ချစ်ဇနီး... မင်း ဒီကျင့်စဉ်ကို ယူပြီး လောလောဆယ် ကျင့်ကြံထားလိုက်ဦး"

ထို့နောက် လင်းယွမ်က ပေလိပ်ကို ဘုရင်မ မဒူဆာထံသို့ ကမ်းပေးလိုက်သည်။

ဘုရင်မ မဒူဆာက ငြင်းပယ်ခြင်း မရှိဘဲ ပေလိပ်ကို လှမ်းယူကာ စတင် ဖတ်ရှု စစ်ဆေးလိုက်သည်။

သို့သော်လည်း ပေလိပ်ထဲမှ အကြောင်းအရာများကို မြင်လိုက်ရသည့် အခိုက်အတန့်တွင် သူမ၏ လှပသော မျက်ဝန်းအစုံက ထိတ်လန့်အံ့ဩမှုများဖြင့် ချက်ချင်း ပြည့်နှက်သွားခဲ့သည်။

အဘယ်ကြောင့်ဆိုသော် လင်းယွမ် သူမကို ပေးလိုက်သည့် ကျင့်စဉ်ပေလိပ်၏ အဆင့်က ကောင်းကင်အဆင့် အလယ်အလတ်သို့ ရောက်ရှိနေသောကြောင့် ဖြစ်သည်။

"မဟာကိုးဆင့် ရွှေခန္ဓာကျင့်စဉ်" ကောင်းကင်အဆင့် အလယ်အလတ် ကျင့်စဉ်ဖြစ်ပြီး အောင်မြင်မှုအဆင့်သို့ ရောက်ရှိအောင် ကျင့်ကြံနိုင်ပါက ခန္ဓာကိုယ်ဖြင့်ပင် သူတော်စင်အဆင့်သို့ ရောက်ရှိနိုင်ကာ ကောင်းကင်နှင့် မြေကမ္ဘာကို ဖျက်ဆီးပစ်နိုင်သော စွမ်းအားကို ရရှိစေမည် ဖြစ်သည်။

"မင်း ကောင်းကင်အဆင့် ကျင့်စဉ်ကို ဘယ်ကနေ ရလာတာလဲ"

ဘုရင်မ မဒူဆာသည် အံ့ဩလွန်းသဖြင့် အော်ပင် အော်မိလုနီးပါး ဖြစ်သွားခဲ့သည်။

ထိုအရာက ဒဏ္ဍာရီလာ ကောင်းကင်အဆင့် ကျင့်စဉ် ဖြစ်သည်။ သူမ မအံ့ဩဘဲ မည်သို့ နေနိုင်မည်နည်း။

သိထားရမည်က ဂျားမာအင်ပါယာအတွင်း၌ နက်နဲအဆင့်မြင့် ကျင့်စဉ်များကိုပင် တန်ဖိုးမဖြတ်နိုင်သော ရတနာများအဖြစ် သတ်မှတ်ထားကြပြီး မရေတွက်နိုင်သော သန်မာသည့် ကျွမ်းကျင်သူများကို ရူးသွပ်စေခဲ့သည်။

မြေကမ္ဘာအဆင့် ကျင့်စဉ်ကမူ ဒဏ္ဍာရီထဲတွင်သာ တည်ရှိသောအရာ ဖြစ်သည်။

သူတို့ မြွေလူသားမျိုးနွယ်စု၏ ဘိုးဘေးများပင်လျှင် ထိုအရာကို ကိုယ်တိုင်ကိုယ်ကျ မြင်ဖူးချင်မှ မြင်ဖူးပေလိမ့်မည်။

မြွေလူသားမျိုးနွယ်စု တစ်သိန်းသော တောင်တန်းကြီးများဆီသို့ စတင် ရောက်ရှိလာစဥ်က လင်းယွမ်က မြေကမ္ဘာအဆင့် ကျင့်စဉ်များနှင့် ဒိုချီနည်းဗျူဟာအချို့ကို သာမန်ကာလျှံကာ ထုတ်ပေးခဲ့ခြင်းကပင် ဘုရင်မ မဒူဆာကို အချိန်အတော်ကြာ ဆွံ့အသွားစေခဲ့ဖူးသည်။

ယခုမူ ဤလူက ကောင်းကင်အဆင့် ကျင့်စဉ်တစ်ခုကိုပါ ထပ်မံ ထုတ်ပြလာခဲ့ပြန်ပြီ ဖြစ်သည်။

သူ့လက်ထဲတွင် အဆင့်မြင့်ကျင့်စဉ်များနှင့် ဒိုချီနည်းဗျူဟာများက လမ်းဘေးက မုန်လာဥများလိုမျိုး အလွယ်တကူ ရနေခြင်းလားဟုပင် ထင်မှတ်ရသည်။

"ဟဲဟဲ... အဲဒါတွေကို စိုးရိမ်မနေပါနဲ့ မင်းရဲ့ယောက်ျားက တော်တော်လေး စွမ်းဆောင်နိုင်ရည် ရှိပါတယ်"

လင်းယွမ်က တိုးတိုးလေး ရယ်မောလိုက်သော်လည်း ရှင်းလင်းချက် အများကြီး မပေးခဲ့ပေ။

ယခုတစ်ကြိမ် ဘုရင်မ မဒူဆာကို ပေးလိုက်သည့် ကောင်းကင်အဆင့် ကျင့်စဉ်ကို စနစ်အရောင်းဆိုင်ထဲမှ လဲလှယ်ရယူထားခြင်း ဖြစ်သည်။

စနစ် အဆင့်မြှင့်တင်ပြီးနောက် သူ့ကို ကံကောင်းခြင်းရမှတ် ဆယ်သန်း တိတိ ပေးအပ်ခဲ့သည်။

ခရမ်းစွမ်းအင် နတ်ဆိုးလျှပ်စီးနှင့် လဲလှယ်ရန် ကိုးသန်းခြောက်သိန်း နှုတ်ယူပြီးနောက် လေးသိန်း ကျန်ရှိနေသေးသည်။

ထို့ကြောင့် လင်းယွမ်က ကမ္ဘာပေါင်းစုံ အရောင်းစင်တာထဲမှ ဘုရင်မ မဒူဆာအတွက် သင့်တော်မည့် ကျင့်စဉ်တစ်ခုကို ရိုးရှင်းစွာပင် ရွေးချယ်ပေးလိုက်ခြင်း ဖြစ်သည်။

အမှန်တော့ သူမ၏ လက်ရှိ ကျင့်စဉ်အဆင့်က နက်နဲအဆင့်မျှသာ ရှိသေးသည်။

သူ့မိန်းမတစ်ယောက်အနေဖြင့် ထိုကဲ့သို့သော အမှိုက်ကျင့်စဉ်မျိုးကို သုံးပြီး ကျင့်ကြံနေရမည်ဆိုပါက သူ့မျက်နှာကို ဘယ်နား သွားထားရမည်နည်း။

ကမ္ဘာပေါင်းစုံ အရောင်းစင်တာ၏ ကျင့်စဉ်များသည် မရေတွက်နိုင်သော ကမ္ဘာများဆီမှ လာခြင်းဖြစ်သဖြင့် သတ်မှတ်ထားသော အဆင့်အတန်း မရှိပေ။

အဘယ်ကြောင့်ဆိုသော် မဟာကမ္ဘာကြီးတစ်ခုလုံးနှင့် နှိုင်းယှဉ်ပါက ဒိုချီတိုက်ကြီးသည် သေးငယ်လွန်းနေသေးသောကြောင့် ဖြစ်သည်။

ဤကမ္ဘာ၏ အင်အားသတ်မှတ်ချက် အဆင့်အတန်းသည် မဟာကမ္ဘာကြီးထဲတွင် ထိပ်တန်းအဆင့်အဖြစ် သတ်မှတ်ခြင်း ခံရမည် မဟုတ်ပေ။

"မဟာကိုးဆင့် ရွှေခန္ဓာကျင့်စဉ်" သည် ဒိုချီတိုက်ကြီးသို့ ရောက်ရှိလာသည့်အခါတွင်မူ စနစ်က ထိုအရာကို ကောင်းကင်အဆင့် အလယ်အလတ်အဖြစ် သဘာဝကျကျ သတ်မှတ်ပေးလိုက်ခြင်း ဖြစ်သည်။

အကယ်၍ သူ့တွင် လက်ရှိ ငွေကြေးအခြေအနေသာ ကောင်းမွန်နေပါက လင်းယွမ်သည် ဘုရင်မ မဒူဆာ ကျင့်ကြံရန်အတွက် နတ်ဘုရားအဆင့် ကျင့်စဉ်အချို့ကိုပင် ဝယ်ယူပေးချင်မိသည်။

"မင်းမှာ လျှို့ဝှက်ချက်တွေ ဘယ်လောက်တောင် ရှိနေသေးတာလဲ"

ဘုရင်မ မဒူဆာက မျက်စောင်းလေးထိုးကာ မချွဲတချွဲ ပြောလိုက်သည်။

သူမသည် လင်းယွမ်က အမြဲတမ်း နက်နဲလွန်းသည်ဟု ခံစားနေရသည်။

မိမိအနေဖြင့် ဤလူ့အကြောင်းကို နားလည်သွားပြီဟု ထင်လိုက်တိုင်း သူက အမြဲတမ်း အံ့ဩစရာများကို ဖန်တီးပြပြီး သူမကို အံ့အားသင့်စေခဲ့သည်။

"စိတ်မပူပါနဲ့... မင်းက ငါ့မိန်းမပဲ နောင်ကျရင် မင်း အားလုံးကို နားလည်သွားမှာပါ"

လင်းယွမ်က လျှို့ဝှက်ဆန်းကြယ်စွာ ပြုံးလိုက်ပြီး အကျယ်တဝင့် ရှင်းပြမနေတော့ပေ။

အမှန်တော့ စနစ်ဟူသော အယူအဆက ဒိုချီတိုက်ကြီး၏ နားလည်နိုင်စွမ်းထက် လုံးဝ ကျော်လွန်နေသဖြင့် ဘုရင်မ မဒူဆာကို ရှင်းပြလျှင်ပင် သူမ နားလည်နိုင်မည် မဟုတ်ချေ။

ထို့နောက် ချက်ချင်းပင် လင်းယွမ်က စကားလမ်းကြောင်းကို ပြောင်းလိုက်ပြီး ဘုရင်မ မဒူဆာကို ပြောလိုက်သည်။ "ချစ်ဇနီး... မင်း အရင်ဆုံး အကျဉ်းချထိုင်ကျင့်လိုက်ဦး"

"အမှောင်ထောင့်ဒေသက အခုဆိုရင် အခြေခံအားဖြင့် ငြိမ်သက်သွားပြီ။ မင်း ကျင့်စဉ်ကို အောင်မြင်စွာ ပြောင်းလဲပြီးတာနဲ့ ငါ မင်းကို ကျားနန်ကျောင်းတော်ကို ခေါ်သွားမယ်"

"ကျားနန်ကျောင်းတော်လား"

ဘုရင်မ မဒူဆာက အံ့အားသင့်သွားသည်။ "အဲဒီကို ဘာသွားလုပ်မှာလဲ"

ဂျားမာအင်ပါယာတွင် ရှိစဉ်ကပင် ဘုရင်မ မဒူဆာသည် ကျားနန်ကျောင်းတော်တွင် အစွမ်းထက်သော ကျွမ်းကျင်သူများ ပြည့်နှက်နေကြောင်း ကြားဖူးခဲ့သည်။

ယခု လင်းယွမ်က ဤသို့ ပြောသည်ကို ကြားလိုက်ရသဖြင့် သူမ ချက်ချင်း စိတ်ဝင်စားသွားခဲ့သည်။

ဘုရင်မ မဒူဆာက မေးမြန်းသည့်အခါ လင်းယွမ်က ဘာမှ ဖုံးကွယ်မထားဘဲ သူ့မျက်ဝန်းများထဲတွင် ပြင်းပြသော အလိုဆန္ဒများဖြင့် တောက်လောင်နေခဲ့သည်။

"ကောင်းကင်မီးလျှံကို သွားခိုးကြစို့"