အခန်း ၁၇  ငါ့အသက်နဲ့ပဲ အပြစ်ပေးဆပ်ဖို့ အဆင်သင့်ပါပဲ

"တိုက်ပွဲဝင်ဘိုးဘေးအဆင့် ကျွမ်းကျင်သူတစ်ယောက်လား"

ဝေါ့

မိုဘာစသည် ထိတ်လန့်တကြားဖြင့် ကွင်းပြင်ဆီသို့ လှမ်းကြည့်လိုက်သည်။ သူ မြေပြင်ပေါ်သို့ လဲကျသွားသည့် ခဏချင်းတွင်ပင် လင်းယွမ်၏ ခွန်အားကို အထင်အသား အာရုံရလိုက်သည်။

တိုက်ပွဲဝင်ဘိုးဘေးအဆင့် သူက တကယ်ပဲ တိုက်ပွဲဝင်ဘိုးဘေးအဆင့်ကျွမ်းကျင်သူပဲ

လင်းယွမ်၏ ရုပ်ရည်ကို ကြည့်မည်ဆိုလျှင် အသက် ၃၀ ဝန်းကျင်ခန့်သာ ရှိသေးသည်။ ဤမျှ နုပျိုသော လူငယ်တစ်ဦးကတိုက်ပွဲဝင်ဘိုးဘေး အဆင့်သို့ ချိုးဖျက်ရောက်ရှိနေလိမ့်မည်ဟု သူ ဘယ်တုန်းကမှ မတွေးမိခဲ့ပေ။

လွန်ခဲ့သော နှစ်ပေါင်းတစ်ရာအတွင်း ဂါမာအင်ပါယာ၏ သမိုင်းကို ပြန်ကြည့်လျှင် ဤမျှ နုပျိုသော တိုက်ပွဲဝင်ဘိုးဘေးအဆင့် ခွန်အားရှင်မျိုး တစ်ယောက်မှ မပေါ်ထွန်းခဲ့ဖူးချေ။

အထူးသဖြင့် မကြာသေးမီ ဆယ်စုနှစ်များအတွင်း၌ တိုက်ပွဲဝင်ဘုရင် အဆင့်အထက်ရှိသူများမှာပင် ဂါမာအင်ပါယာကို လွှမ်းမိုးနိုင်စွမ်း ရှိကြသည်။ တိုက်ပွဲဝင်ဘုရင် အဆင့်အထက်တွင် ဒေသတစ်ခုကို စိုးမိုးနိုင်သော တိုက်ပွဲဝင်ဧကရာဇ် ခွန်အားရှင်များမှာ လက်ချိုးရေတွက်၍ပင် ရနိုင်သည်။

ထိုသူများထဲတွင် သူတို့ မြွေလူသားမျိုးနွယ်စု၏ ဘုရင်မမှာ အစွမ်းအထက်ဆုံးဖြစ်ပြီး ဂါမာအင်ပါယာ၏ အားအကောင်းဆုံး ပုဂ္ဂိုလ်ဟုပင် ခေါ်ဆိုနိုင်သည်။ ထိုအချက်ကြောင့်ပင် ဘုရင်မ မဒူဆာ ၏ အဆင့်အတန်းမှာ မြွေလူသားများအကြား နတ်ဘုရားမတစ်ပါးကဲ့သို့ပင် ဖြစ်သည်။

သို့သော် ယခုမူ သူတို့မျက်လုံးထဲမှ "နတ်ဘုရားမ" နှင့် ရှေ့မှလူငယ်လေးမှာ ကောင်းကင်နှင့် မြေကြီးကဲ့သို့ ကွာခြားနေချေပြီ။

ထိုအခိုက်အတန့်တွင် မိုဘာစသည် မိမိကိုယ်မိမိ ပါးရိုက်ချင်စိတ်များ ပေါက်လာတော့သည်။

ဘာလို့လဲ

ဘာလို့ အဲဒီတုန်းက ဒီလောက်တောင် စိတ်လိုက်မာန်ပါ ဖြစ်ခဲ့ရတာလဲ

အကယ်၍ သူတို့သာ ယွဲ့မေ၏ စကားကို နားထောင်ခဲ့လျှင် တိုက်ပွဲဝင်ဘိုးဘေးတစ်ဦးကို ရန်စမိမည့်အရေးမှ ရှောင်လွှဲနိုင်ခဲ့ပေလိမ့်မည်။ သို့သော် ယခုမူ လင်းယွမ်ကသာ အပြစ်ရှာမည်ဆိုပါက သူတို့ မြွေလူသားမျိုးနွယ်စုအနေဖြင့် တိုက်ပွဲဝင်ဘိုးဘေး၏ ဒေါသကို ခံနိုင်ရည် ရှိပါ့မလား။

မျက်စိတစ်မှိတ်အတွင်းမှာပင် မိုဘာစ၏ နှလုံးသားထဲ၌ အဆုံးမရှိသော နောင်တနှင့် ကြောက်ရွံ့မှုများ လှိုင်းလုံးသဖွယ် တိုးဝင်လာတော့သည်။

အလားတူ ခံစားချက်မျိုးမှာ အခြားခေါင်းဆောင်များထံသို့လည်း ပျံ့နှံ့သွားသည်။

ယွဲ့မေမှလွဲ၍ ကျန်ရှိသူအားလုံးမှာ မျက်လုံးများ ပြူးကျယ်လျက် သူငယ်အိမ်ထဲ၌ ထိတ်လန့်မှုများ ပြည့်နှက်နေကြသည်။

မြွေလူသား အစောင့်အရှောက်များမှာမူ လင်းယွမ်ကို မျက်လုံးချင်းဆိုင်ကြည့်ရန်ပင် သတ္တိမရှိကြတော့ပေ။ ဤကဲ့သို့ အစွမ်းထက်သော ပုဂ္ဂိုလ်မျိုးမှာ သူတို့အားလုံးကို အသက်ရှူတစ်ချက်စာအတွင်းမှာပင် အစအနမကျန်အောင် ဖျက်ဆီးပစ်နိုင်စွမ်း ရှိသည်။

"ပြီးပြီ... အကုန်ပြီးပြီ... သူက တကယ်ပဲ တိုက်ပွဲဝင်ဘိုးဘေးအဆင့် ကျွမ်းကျင်သူ ဖြစ်နေတာပဲ"

အကြီးအကဲများထဲတွင် စတုတ္ထအကြီးအကဲမှာ အင်အားများ အကုန်ကုန်ခမ်းသွားသည့်အလား မျက်လုံးများမှာ ဝေဝါးနေတော့သည်။ ထိုအခိုက်အတန့်တွင် သူသည် မဟာအကြီးအကဲအပေါ်၌ပင် နာကျည်းစိတ်များ ဖြစ်ပေါ်လာမိသည်။

အကယ်၍ မဟာအကြီးအကဲသာ မဒူဆာ၏ ရှင်းပြချက်ကို လျစ်လျူမရှုဘဲ လင်းယွမ်ကို ဆန့်ကျင်ရန် ဇွတ်မလုပ်ခဲ့လျှင် သူတို့ မြွေလူသားမျိုးနွယ်စုမှာ ဤမျှအထိ အရှက်ရစရာ အခြေအနေမျိုးသို့ ကျရောက်ပါ့မလား အကယ်၍ လင်းယွမ်သာ သူတို့ကို အခုတိုက်ခိုက်မည်ဆိုပါက သူတို့မျိုးနွယ်စုမှာ အမှန်တကယ် မျိုးတုံးသွားပေလိမ့်မည်။

"တိုက်ပွဲဝင်ဘိုးဘေးအဆင့်... တိုက်ပွဲဝင်ဘိုးဘေး အဆင့်"

လင်းယွမ်က သူ၏ခွန်အားကို ထုတ်ဖော်လိုက်သည့် ခဏမှာပင် ဒုတိယအကြီးအကဲမှာ လွန်စွာ ထိတ်လန့်သွားသဖြင့် စဉ်းစားဆင်ခြင်နိုင်စွမ်းများ လုံးဝ ပျောက်ဆုံးသွားခဲ့သည်။

နှစ်ပေါင်းများစွာအတွင်း မြွေလူသားမျိုးနွယ်စုသည် တည်ငြိမ်မှုနှင့် ခွန်အားကို စဉ်ဆက်မပြတ် တည်ဆောက်ခဲ့ကြပြီး နောက်နှစ်အနည်းငယ်အတွင်း တဂိုးလ်သဲကန္တာရ၏ ကြမ်းတမ်းသော ပတ်ဝန်းကျင်မှ လွတ်မြောက်နိုင်ရန် မျှော်လင့်ခဲ့ကြသည်။ တဂိုးလ်သဲကန္တာရ၏ နေထိုင်မှုအခြေအနေမှာ ဤမျှအထိ မဆိုးဝါးခဲ့လျှင် မြွေလူသားမျိုးနွယ်စုမှာ ယခုထက် အနည်းဆုံး သုံးဆခန့် ပိုမိုအစွမ်းထက်နေပေလိမ့်မည်။

သို့သော် ယခုမူ လူငယ်တိုက်ပွဲဝင်ဘိုးဘေးတစ်ဦးကို ရန်စမိခဲ့ပြီဖြစ်ရာ မြွေလူသားမျိုးနွယ်စုအနေဖြင့် ဆက်လက် ရှင်သန်နိုင်ပါဦးမည်လားဆိုသည်မှာ သံသယဖြစ်စရာပင်။

"ဘာတွေ ဒီလောက် ထိတ်လန့်နေကြတာလဲ မြွေလူသားမျိုးနွယ်စုရဲ့ အကြီးအကဲတွေ ဖြစ်ပြီးတော့ ဘာလို့ ဒီလောက်တောင် သူရဲဘောကြောင်ပြီး ကြောက်နေကြတာလဲ ငါတို့မျိုးနွယ်စုရဲ့ သိက္ခာတွေ ဘယ်ရောက်ကုန်ပြီလဲ"

ဒုတိယနှင့် စတုတ္ထညီအသီးသီး၏ အသုံးမကျသော အမူအရာကို မြင်သဖြင့် မဟာအကြီးအကဲက အသံနှိမ့်၍ ပြောလိုက်သည်။ သူကိုယ်တိုင်လည်း ကြောက်ရွံ့မှုများဖြင့် ပြည့်နှက်နေသော်လည်း မိမိကိုယ်မိမိ တည်ငြိမ်အောင် ထိန်းထားပြီး ဂရုမစိုက်သည့် ဟန်ဆောင်နေခြင်းဖြစ်သည်။

သူ၏အမြင်တွင် လင်းယွမ်က တိုက်ပွဲဝင်ဘိုးဘေး ဖြစ်နေလျှင်ပင် ဘာဖြစ်သနည်း မြွေလူသားမျိုးနွယ်စုဆိုသည်မှာ အလွယ်တကူ အနိုင်ကျင့်၍ရသည့် အထဲတွင် မပါပေ။

ကြယ်ကိုးပွင့် တိုက်ပွဲဝင်ဧကရာဇ် အထွတ်အထိပ်ရှိ မေဒူဆာအပြင် မျိုးနွယ်စု၏တိုက်ပွဲဝင်ဘုရင် (၁၂) ပါးနှင့် နှစ်ပေါင်းများစွာ လေ့ကျင့်ပျိုးထောင်ထားသော အထူးတပ်ဖွဲ့များ ပေါင်းလိုက်လျှင် လင်းယွမ်ကို မနိုင်နိုင်ဟု မဆိုနိုင်ပေ။

"သိက္ခာ မင်း အခု ဘာတွေ လာပြောနေတာလဲ"

ခါတိုင်း စကားနည်းလှသော စတုတ္ထအကြီးအကဲမှာ နောက်ဆုံးတွင် မအောင့်နိုင်တော့ဘဲ ပေါက်ကွဲထွက်လာတော့သည်။

"မင်း ဂရုစိုက်တာက မင်းရဲ့ မာနတစ်ခုတည်းပဲ။ အခု ငါတို့ မြွေလူသားမျိုးနွယ်စုဟာ အသက်ရှင်မလား သေမလားဆိုတဲ့ အဆုံးအဖြတ်ပေးရမယ့် အချိန်ကို ရောက်နေတာ မင်းသိရဲ့လား"

"အကယ်၍ ဒီတိုက်ပွဲဝင်ဘိုးဘေးကျွမ်းကျင်သူကသာ ငါတို့မျိုးနွယ်စုကို တကယ် နှိမ်နင်းချင်တယ်ဆိုရင် ငါတို့ရဲ့ အာဏာစက်တွေက တိုက်ပွဲဝင်ဘိုးဘေးတစ်ယောက်ရဲ့ ဒေါသကို ဟန့်တားပေးနိုင်မှာလား"

စတုတ္ထအကြီးအကဲ၏ စကားအဆုံးတွင် ဒုတိယအကြီးအကဲမှာလည်း သတိပြန်ဝင်လာပြီး မဟာအကြီးအကဲကို အလွန်အမင်း ဒေါသထွက်သော အကြည့်ဖြင့် စိုက်ကြည့်လိုက်သည်။

"စတုတ္ထညီ ပြောတာ မှန်တယ် အကယ်၍ မင်းသာ ခေါင်းမမာဘဲ တိုက်ပွဲဝင်ဘိုးဘေးကျွမ်းကျင်သူတစ်ယောက်ကို ဇွတ်မရန်စခဲ့ရင် ငါတို့မျိုးနွယ်စုဟာ ဒီနေ့ ဒီလို အကြပ်အတည်းမျိုးနဲ့ ကြုံပါ့မလား"

"ငါတို့ အခု အသက်ရှင်ဖို့အတွက် အရေးကြီးနေတဲ့ အချိန်မှာ မင်းရဲ့ အဲဒီ အသုံးမကျတဲ့ မာနတွေကို ခဏလောက် ဘေးဖယ်ထားလို့ မရဘူးလား"

ထိုအခိုက်အတန့်တွင် သူတို့နှစ်ဦးလုံးမှာ ကြိုတင်တိုင်ပင်ထားခြင်း မရှိဘဲ မဟာအကြီးအကဲကို အစိမ်းလိုက် ဝါးစားမတတ် ဝိုင်းဝန်း ပြစ်တင်ကြတော့သည်။ တတိယအကြီးအကဲမှာမူ သူတို့အကြား ငြင်းခုံသံများကို နားထောင်ရင်း မျက်မှောင်ကြုတ်ကာ တိတ်ဆိတ်နေသည်။ သူ တစ်စုံတစ်ခုကို စဉ်းစားနေပုံရသည်။

မဟာအကြီးအကဲမှာ ဤမျှအထိ ပြင်းထန်စွာ ပြစ်တင်ခံရခြင်းမှာ ဤသည်မှာ ပထမဆုံးအကြိမ်ပင်။ သူသည် ဒေါသဖြင့် ပြန်ကြည့်ကာ ပြန်ပက်လိုက်သည် "ပေါက်ကရတွေ ငါလုပ်သမျှ အရာအားလုံးဟာ မြွေလူသားမျိုးနွယ်စုရဲ့ အကျိုးအတွက်ပဲ"

"မမေ့နဲ့ဦး ငါတို့ မြွေလူသားမျိုးနွယ်စုမှာ မရေမတွက်နိုင်တဲ့ လူတွေရှိတယ် တိုက်ပွဲဝင်ဘုရင် ၁၂ ယောက်နဲ့ တိုက်ပွဲဝင်ဧကရာဇ တစ်ယောက်ရှိတယ်။ သူက တိုက်ပွဲဝင်ဘိုးဘေးဖြစ်နေတော့ ဘာဖြစ်လဲ"

"ပြီးတော့ အခု အပြစ်တွေအားလုံးကို ငါ့အပေါ်ပဲ ပုံချနေကြတာလား။ အစောတုန်းက မင်းတို့လည်း လက်မပါခဲ့ကြဘူးလား ဟမ်"

အကြီးအကဲသည် မျက်နှာကြီး နီမြန်းလျက် သူတို့နှစ်ဦးကို ညွှန်ပြကာ ဆဲရေးတော့သည်။

"ငါတို့ တိုက်ခိုက်ခဲ့တာကလည်း မင်းက ဇွတ်ခိုင်းလို့ပဲ"

"ဟုတ်တယ်"

"မင်းက အသက်နည်းနည်း ပိုကြီးပြီး ငါတို့က အစ်ကိုကြီးလို့ ခေါ်နေရုံနဲ့ မင်းကိုယ်မင်း အထူးအဆန်းလို့ မထင်နဲ့"

"မင်းတို့ကို..."

ယခင်က သံယောဇဉ်ကြီးမားခဲ့ကြသော အကြီးအကဲများမှာ ယခုအခါ တစ်ဦးနှင့်တစ်ဦး ရန်သူများကဲ့သို့ ဖြစ်ကုန်ကြချေပြီ။

"အိုး... သူတို့ကြားမှာတင် အချင်းချင်း ပြန်ကိုက်နေကြပြီလား စိတ်ဝင်စားဖို့ ကောင်းသားပဲ"

လင်းယွမ်သည် သူတို့၏ စကားလုံးတိုင်းကို ကြားနေရသည်။ သူ၏ခွန်အားကို ပြလိုက်သည်နှင့် ဤအဘိုးကြီးများမှာ ခွေးများကဲ့သို့ အချင်းချင်း ပြန်ကိုက်ကြလိမ့်မည်ဟု သူ လုံးဝ မထင်ထားခဲ့ပေ။

လင်းယွမ်သည် သူတစ်ပါး အခက်တွေ့သည်ကို ကြည့်၍ ပျော်သောစိတ်ဖြင့် သူတို့၏ ပြဇာတ်ကို စိတ်ဝင်တစား ကြည့်နေလိုက်သည်။

"တော်တော့... ရပ်ကြစမ်း"

သည်အချိန်အထိ တိတ်ဆိတ်နေသော တတိယအကြီးအကဲမှာ သူတို့၏ အပြုအမူကို ဆက်လက် မကြည့်ရက်တော့ဘဲ ရုတ်တရက် ဟိန်းဟောက်လိုက်သည်။ ထိုအော်သံကြောင့် ငြင်းခုံနေသူ သုံးဦးစလုံး ထိတ်လန့်သွားပြီး ပါးစပ်များကို အလိုအလျောက် ပိတ်လိုက်ကြသည်။

တတိယအကြီးအကဲသည် သူတို့အုပ်စုကို ဝေ့ကြည့်လိုက်ပြီးနောက် စိတ်ပျက်လက်ပျက်ဖြင့် ပြောလိုက်သည်  "ဘယ်လို အချိန်ကို ရောက်နေပြီလဲ?ယ မင်းတို့က အခုထိ ငြင်းခုံနေတုန်းလား"

"အခုက အပြစ်တင်နေရမယ့် အချိန်မဟုတ်ဘူး။ ငါတို့ မြွေလူသားမျိုးနွယ်စု ဒီအကြပ်အတည်းကနေ ဘယ်လို ကျော်ဖြတ်မလဲဆိုတာကိုပဲ စဉ်းစားကြစို့"

ထိုသို့ပြောပြီးနောက် တတိယအကြီးအကဲသည် စိတ်ဆိုးမာန်ဆိုးဖြင့် သူ၏ဝတ်ရုံစကို ခါယမ်းကာ ထရပ်လိုက်သည်။ ဆယ်စုနှစ်ပေါင်းများစွာ လက်တွဲခဲ့သော သူ၏ "ညီအစ်ကိုများ" ကို စိတ်ပျက်လက်ပျက် တစ်ချက်ကြည့်ပြီးနောက် လင်းယွမ်ဆီသို့ လျှောက်လှမ်းသွားခဲ့သည်။

"အရှင်.. ကျွန်တော်တို့ မျက်စိမရှိလို့ အရှင်ကို ပြစ်မှားမိခဲ့ပါတယ်။ ကျွန်တော်တို့ရဲ့ မိုက်မဲမှုကို ခွင့်လွှတ်ပေးပါလို့ တောင်းပန်အပ်ပါတယ်"

လင်းယွမ်အနားသို့ ရောက်သောအခါ တတိယအကြီးအကဲသည် လေးလေးစားစားဖြင့် ဦးညွှတ်လိုက်သည်။ လင်းယွမ်က သူ့ကို တစ်ချက်သာ အသာအယာ ကြည့်လိုက်ပြီး ဘာမှ ပြန်မပြောပေ။ လင်းယွမ် တိတ်ဆိတ်နေသည်ကို မြင်သောအခါ တတိယအကြီးအကဲမှာ သက်ပြင်းမချဘဲ မနေနိုင်တော့ပေ။

"တိုက်ပွဲဝင်ဘိုးဘေးအဆင့် တစ်ယောက်ရဲ့ သိက္ခာကို စိန်ခေါ်လို့ မရဘူးဆိုတာ ကျွန်တော် သိပါတယ်။ ဒီနေ့ ကျွန်တော်တို့ အဘိုးကြီးတွေဟာ မျက်စိမရှိလို့ အရှင်ကို ပြစ်မှားမိခဲ့တာပါ"

ဤနေရာအရောက်တွင် တတိယအကြီးအကဲက အနည်းငယ် တုန့်ဆိုင်းသွားသည်။ ထို့နောက် သူ၏နှလုံးသားထဲ၌ ဆုံးဖြတ်ချက် တစ်ခုချလိုက်သည့်အလား သွားကိုတင်းတင်းကြိတ်ကာ ဆက်ပြောသည် "ကျွန်တော်တို့ ခွင့်လွှတ်ဖို့ မတောင်းပန်ရဲပါဘူး ဒါပေမဲ့ ဒီကိစ္စဟာ ကျွန်တော်တို့ကြောင့်ပဲ ဖြစ်တာပါ ကျန်တဲ့သူတွေအားလုံးက အပြစ်မရှိကြပါဘူး"

"အကယ်၍ အရှင်ကသာ ကျွန်တော်တို့ရဲ့ မြွေလူသားမျိုးနွယ်စုကို ချမ်းသာပေးမယ်ဆိုရင် ကျွန်တော် အခုပဲ အသက်နဲ့ အပြစ်ပေးဆပ်ဖို့ အဆင်သင့်ပါပဲ"