အခန်း ၁၅  သူ၏အရှိန်အဝါက အကြီးအကဲများကို တုန်လှုပ်စေသည်

"ငရဲကိုသွားတော့"

မဟာအကြီးအကဲမှာ စိတ်လွတ်သွားပုံရသည်။ လင်းယွမ်က ဆုတ်မပြေးဘဲ ရှေ့သို့တိုးလာသည်ကို မြင်သောအခါ သူ၏လက်ဝါးကို လင်းယွမ်၏လည်ပင်းဆီသို့ ချက်ချင်း ဝှေ့ယမ်းလိုက်သည်။

"သေချင်နေတာပဲ"

ဒီအဘိုးကြီး ဘယ်လောက်ရက်စက်တယ်ဆိုတာ မြင်လိုက်ရတော့ လင်းယွမ်၏ဒေါသမှာ ချက်ချင်းဆိုသလို ပေါက်ကွဲထွက်လာသည်။

အရေးကြီးသော အခိုက်အတန့်တွင် လင်းယွမ်သည် လက်မောင်းကို လွှဲလိုက်ပြီး အကြီးအကဲ၏ တွန့်ရှုံ့နေသော မျက်နှာပေါ်သို့ ဖြတ်ခနဲ ရိုက်ချလိုက်သည်။

ဖြန်း

ပြတ်သားသော အသံမှာ လူတိုင်း၏နားထဲသို့ ရောက်ရှိသွားသည်။

ဝေါ့

ပြင်းထန်လှသော ရိုက်ချက်ကြောင့် မဟာအကြီးအကဲ၏ ဦးခေါင်းမှာ မတတ်သာဘဲ ဘေးသို့ စောင်းထွက်သွားသည်။ ထို့နောက် သူ၏ပါးစပ်ထဲမှ သွေးတစ်လုပ် ရုတ်တရက် ပန်းထွက်လာသည်။ ၎င်းထဲတွင် သွားအချို့လည်း ရောပါလာခဲ့သည်။

တစ်ချိန်တည်းမှာပင် အခြားသော တိုက်ခိုက်မှုအချို့မှာလည်း မျက်စိတစ်မှိတ်အတွင်း ရောက်ရှိလာသည်။ လင်းယွမ်ကလည်း ထိုအတိုင်းပင် နောက်သို့လှည့်ကာ ကျန်ရှိသောသူများကို တစ်ယောက်တစ်ချက်စီ ပြန်လည်ရိုက်ချလိုက်သည်။

ဖြန်း ဖြန်း ဖြန်း

မျှော်လင့်ထားသည့်အတိုင်းပင် ကျန်ရှိသော အကြီးအကဲများလည်း ထိုကံကြမ္မာနှင့်ပင် ကြုံတွေ့လိုက်ရသည်။

ဘုန်း ဘုန်း ဘုန်း

လေးလံသော ပြုတ်ကျသံအချို့ ခန်းမတစ်ခုလုံးတွင် ပဲ့တင်ထပ်သွားသည်။

"အစ်ကိုကြီး... ဒုတိယအစ်ကို... စတုတ္ထအစ်ကို"

တတိယအကြီးအကဲမှာ ထိုအချိန်မှ ပြန်လည်သတိဝင်လာပြီး မြေပြင်မှ ခက်ခဲစွာထကာ လူအုပ်ဆီသို့ ပြေးဝင်သွားသည်။

လင်းယွမ်၏ တိုက်ခိုက်မှုမှာ ပြင်းထန်ပုံရသော်လည်း တိုက်ပွဲဝင်စွမ်းအင်တစ်စက်မျှ ပါဝင်ခြင်းမရှိပေ။ မဟုတ်ပါက သူ၏ လက်ရှိခွန်အားနှင့်ဆိုလျှင် ထိုအဘိုးကြီးများကို လက်ဖျားဖြင့် တို့ရုံနှင့်ပင် သေတွင်းသို့ ပို့နိုင်စွမ်းရှိသည်။

လင်းယွမ်တွင် သူ၏ကိုယ်ပိုင် ဆင်ခြင်မှုများ ရှိသည်။ နှစ်ဖက်ဆက်ဆံရေးကို အလွန်အမင်း တင်းမာသွားစေရန် သူ မလိုလားပေ။ မဟုတ်ပါက အခက်တွေ့ရမည့်သူမှာ ဘုရင်မ မဒူဆာသာ ဖြစ်လိမ့်မည်။

တစ်ဖက်တွင် သူရှိနေပြီး အခြားတစ်ဖက်တွင်မူ သူမ အသက်ပေးကာကွယ်ရန် သန္နိဋ္ဌာန်ချထားသည့် မြွေလူသားမျိုးနွယ်စု ရှိနေသည်။ အကယ်၍ လင်းယွမ်က ထိုအဘိုးကြီးများကို တကယ်သတ်လိုက်လျှင် သူနှင့် မြွေလူသားမျိုးနွယ်စုမှာ ပြေလည်နိုင်ခြင်းမရှိသော ရန်ငြိုးများ ဖြစ်သွားလိမ့်မည်။

သူ၏ ရည်မှန်းချက်မှာ ရိုးရှင်းပါသည် ဘုရင်မ မဒူဆာကို တိုက်ပွဲဝင်ဘိုးဘေးအဆင့်သို့ အမြန်ဆုံး တက်လှမ်းနိုင်အောင် ကူညီပေးရန်ဖြစ်သည်။ ထို့နောက် ဤအခွင့်အရေးကို အသုံးချကာ မြွေလူသားမျိုးနွယ်စုကို သူနှင့် ဘုရင်မ မဒူဆာ၏ ပတ်သက်မှုကို အသိအမှတ်ပြုလာစေရန် ဖြစ်သည်။ ထို့ကြောင့် ထိုအဘိုးကြီးများမှာ ယခုအချိန်တွင် ကြည့်ရဆိုးနေသော်လည်း အမှန်တကယ်တွင် ပြင်းထန်သော ဒဏ်ရာရရှိခြင်း မရှိကြပေ။

"တောက်... သူက ဘယ်လိုလုပ် ဒီလောက်တောင် အစွမ်းထက်နေရတာလဲ"

ယောင်ကိုင်းနေသော ပါးကို လက်ဖြင့်အုပ်ရင်း အကြီးအကဲ၏ အကြည့်မှာ အလွန်အမင်း မည်းမှောင်နေသည်။ မျက်နှာပေါ်ရှိ ပူလောင်လှသော နာကျင်မှုမှာ သူ၏အာရုံကြောများကို တရစပ် တိုက်ခိုက်နေပြီး မဟာအကြီးအကဲကို ရူးသွပ်လုနီးပါး ဖြစ်စေသည်။

ဒါဟာ ဘယ်နှစ်နှစ်တောင် ရှိသွားပြီလဲ မြွေလူသားမျိုးနွယ်စု၏ အကြီးအကဲ ရာထူးကို ယူကတည်းက သူ ဤမျှအထိ အစော်ကားမခံခဲ့ရဖူးပေ။ မြွေလူသားမျိုးနွယ်စု၏ ရာထူးကြီး အကြီးအကဲတစ်ဦးအနေဖြင့် လူတိုင်းက သူ့ကို အလွန်ရိုသေလေးစားကြသည်။ ကြယ်ကိုပွင့် တိုက်ပွဲဝင်ဧကရာဇ်အဆင့်၏ အထွတ်အထိပ်တွင် ရှိနေသော ဘုရင်မ မဒူဆာပင်လျှင် ဝါစဉ်အရ သူ့စကားကို လုံးဝ နားထောင်ခဲ့သည်။

သို့သော် ယခုမူ သူသည် လူငယ်လေးတစ်ဦး၏ ပါးရိုက်ခြင်းကို ခံလိုက်ရသည်လား။ ဤမျှကြီးမားသော အရှက်တရားကို မည်သို့ လွှတ်ပေးနိုင်မည်နည်း။

"တတိယညီလေး... အခုချက်ချင်း ငါတို့မျိုးနွယ်စုထဲက အစွမ်းထက်တဲ့သူတွေ အားလုံးကို စုစည်းလိုက် ဒီကောင်လေးကို လုံးဝ လွတ်မသွားစေနဲ့" မဟာအကြီးအကဲက ဒေါသကြောင့် မျက်နှာကြီး နီမြန်းလျက် ဟိန်းဟောက်လိုက်သည်။

"အစ်ကိုကြီး... စိတ်အေးအေးထားပါ"

မဟာအကြီးအကဲ လုံးဝ စိတ်လွတ်နေသည်ကို မြင်တော့ တတိယအကြီးအကဲက သူ၏ ပုခုံးကို ဆုပ်ကိုင်ကာ အော်ဟစ်တားမြစ်လိုက်သည်။ ဤကျယ်လောင်သော အော်သံကြောင့် မဟာအကြီးအကဲမှာ ရူးသွပ်မှု အနားသတ်မှ ပြန်လည် လည်ပတ်လာသည်။

တတိယအကြီးအကဲကို စိုက်ကြည့်ရင်း မဟာအကြီးအကဲက ငြိမ်ကျသွားကာ - "တတိယညီလေး... မင်း ဘာကို စောင့်နေတာလဲ" ဟု မေးလိုက်သည်။

အစ်ကိုကြီး သတိပြန်ဝင်လာပြီဖြစ်သဖြင့် တတိယအကြီးအကဲ သက်ပြင်းချလိုက်မိသည်။

"အစ်ကိုကြီး... သူက ကျွန်တော်တို့အပေါ် သက်ညှာခဲ့တာပါ အဲဒါကို အစ်ကိုကြီး သတိမပြုမိဘူးလား"

တတိယအကြီးအကဲက တည်တည်ငြိမ်ငြိမ်ဖြင့် ဆက်ပြောသည် "သူ့ရဲ့ ခွန်အားနဲ့ဆိုရင် သူဟာ ယွန်းလန်မြူဂိုဏ်းရဲ့ ဂိုဏ်းချုပ် ယွန်းယွန်ထက်တောင် မလျော့ဘူး။ အကယ်၍ သူသာ ကျွန်တော်တို့ကို သတ်ချင်တယ်ဆိုရင် ကျွန်တော်တို့ အခု သေနေလောက်ပြီ"

အကြီးအကဲ ရာထူးတွင် ထိုင်နိုင်ရန်အတွက် မဟာအကြီးအကဲမှာ သာမန်လူ မဟုတ်သည်မှာ သေချာသည်။ ခုနကတော့ သူသည် ဒေါသမျက်စိဖုံးနေသဖြင့် လင်းယွမ်၏ ခွန်အားကို သတိမမူမိခဲ့ခြင်း ဖြစ်သည်။

ယခု တတိယအကြီးအကဲ၏ သတိပေးချက်ကြောင့် သူ၏ရှေ့မှ လူငယ်မှာ ကြယ်လေးပွင့် တိုက်ပွဲဝင်ဧကရာဇ်ထက် သေချာပေါက် ပိုမိုအစွမ်းထက်ပြီး သူတို့အားလုံး ယှဉ်နိုင်မည့်သူ မဟုတ်သည်ကို မဟာအကြီးအကဲ သဘောပေါက်သွားသည်။

သို့သော်လည်း လင်းယွမ်၏ ပါးရိုက်ခြင်းကို ခံလိုက်ရသည့် အရှက်တရားကို သူ မည်သို့ မျိုသိပ်နိုင်မည်နည်း ထို့ကြောင့် အကြီးအကဲက ဆက်ပြောသည်  "သူက တိုက်ပွဲဝင်ဧကရာဇ် ကျွမ်းကျင်သူ ဖြစ်နေရင်တောင် ဘာဖြစ်လဲ ငါတို့ မျိုးနွယ်စုတစ်ခုလုံးရဲ့ အင်အားနဲ့ဆိုရင် ဒီကောင်လေးကို မနိုင်နိုင်ဘူးဆိုတာ ငါ မယုံဘူး"

"မှန်တယ် ငါတို့ မြွေလူသားမျိုးနွယ်စု တစ်ခုလုံးရဲ့ အင်အားနဲ့ဆိုရင် လေးကြယ်ပွင့် ဒါမှမဟုတ်ကြယ်ငါးပွင့် တိုက်ပွဲဝင်ဧကရာဇ်တောင်မှ သေချာပေါက် ခံနိုင်မှာ မဟုတ်ဘူး"

"ဒါပေမဲ့ အစ်ကိုကြီး အကယ်၍ ကျွန်တော်တို့သာ အဲဒီလို တကယ်လုပ်မယ်ဆိုရင် ငါတို့မျိုးနွယ်စုရဲ့ အစွမ်းထက်သူတွေ ဘယ်လောက်တောင် ဆုံးရှုံးသွားမလဲဆိုတာ ထည့်မစဉ်းစားဘူးလား အဲဒီ တန်ဖိုးကို ငါတို့ မပေးနိုင်ဘူး"

ဤနေရာအရောက်တွင် တတိယအကြီးအကဲ၏ လေသံမှာ မတတ်သာမှုများ ပြည့်နှက်နေသည်။

"ဒါက"

မဟာအကြီးအကဲ၏ နှုတ်ခမ်းများ အနည်းငယ် လှုပ်ရှားသွားပြီး လင်းယွမ်ကို တစ်ချက်ကြည့်ကာ ဘာမှထပ်မပြောဘဲ အကြည့်လွှဲလိုက်သည်။ ဒါကို မြင်တော့ တတိယအကြီးအကဲက ဆက်ပြောသည် "ဒါတင် မကသေးဘူး အစ်ကိုကြီး အစောက မဒူဆာ ပြောခဲ့တာတွေကို မှတ်မိသေးလား"

"မဒူဆာ"

အကြီးအကဲက မျက်မှောင်ကြုတ်ကာ အစောပိုင်းက နောက်ခန်းမတွင် ဘုရင်မ မဒူဆာနှင့် ဆွေးနွေးခဲ့သည်များကို ပြန်လည်စဉ်းစားကြည့်သည်။ ရုတ်တရက် အကြီးအကဲ၏ မျက်စိသူငယ်အိမ်များ ကျုံ့သွားကာ ထိတ်လန့်စရာ တစ်ခုခုကို တွေးမိသွားသည့်အလား ရှိနေသည်။

အဆင့် ၇ ဆေးဖော်စပ်သူ  တိုက်ပွဲဝင်ဘိုးဘေး အဆင့် ကျွမ်းကျင်သူ

ဘုရားရေ

အကြီးအကဲ၏ အသက်ရှူသံများမှာ ချက်ချင်းပင် မြန်ဆန်လာသည်။ ဖြစ်ပျက်ခဲ့သည်များကို သေချာ ပြန်စဉ်းစားကြည့်သောအခါ လင်းယွမ်နှင့် တိုက်ခိုက်စဉ်အတွင်း သူ၏ထံမှ စွမ်းအင်လှိုင်းတစ်စက်မျှ ထွက်ပေါ်မလာခဲ့သည်ကို မဟာအကြီးအကဲ ထိတ်လန့်စွာ တွေ့ရှိလိုက်ရသည်။

တစ်နည်းအားဖြင့်ဆိုသော် လင်းယွမ်သည် သူ၏အတွင်း တိုက်ပွဲဝင်စွမ်းအင်ကို လုံးဝ အသုံးမပြုခဲ့ခြင်းပင်။

ရိုးရိုး ကိုယ်ခန္ဓာခွန်အားသက်သက်နှင့်ပင်တိုက်ပွဲဝင်ဘုရင်တစ်ယောက်ကို ခွေးတစ်ကောင်လို ရိုက်နှက်နိုင်ခြင်းမှာ တိုက်ပွဲဝင်ဘိုးဘေး တစ်ဦးတွင်သာ ရှိနိုင်သည့် စွမ်းအားမျိုး မဟုတ်ပါလား။

မဟာအကြီးအကဲ သေချာသိသည်မှာ ကြယ်ကိုးပွင့် တိုက်ပွဲဝင်ဧကရာဇ်အထွတ်အထိပ်တွင် ရှိသော မဒူဆာပင်လျှင် တိုက်ပွဲဝင်စွမ်းအင်မပါဘဲ သူတို့အုပ်စုကို တစ်ချက်တည်းနှင့် ဤသို့ နှိမ်နင်းနိုင်ရန် ခဲယဉ်းလိမ့်မည် ဖြစ်သည်။ မဒူဆာ အစောပိုင်းက ပြောခဲ့သမျှမှာ အမှန်တွေ ဖြစ်နေခဲ့တာလား။

မဟာအကြီးအကဲ၏ အမူအရာ တရစပ် ပြောင်းလဲနေသည်ကို မြင်တော့ သူသည် ပြဿနာ၏ အချက်အချာကို သဘောပေါက်သွားပြီဖြစ်ကြောင်း တတိယအကြီးအကဲ သိလိုက်ပြီး တိတ်တဆိတ် စိတ်သက်သာရာ ရသွားသည်။

 အကယ်၍ လင်းယွမ်သည် တကယ်ပင် အဆင့် ၇ ဆေးဖော်စပ်သူနှင့် တိုက်ပွဲဝင်ဘိုးဘေး ကျွမ်းကျင်သူ ဖြစ်နေပါက မဟာအကြီးအကဲကသာ ဆက်ပြီး ရန်စနေဦးမည်ဆိုလျှင် မြွေလူသားမျိုးနွယ်စုတစ်ခုလုံး မျိုးတုံးပျောက်ကွယ်သွားနိုင်သည် မဟုတ်ပါလား။

သို့သော် ထိုအခိုက်အတန့်တွင်ပင် တံခါးအပြင်ဘက်မှ လူသတ်ငွေ့များ ပါဝင်သော အသံတစ်ခု ရုတ်တရက် ထွက်ပေါ်လာရာ တတိယအကြီးအကဲ၏ စိတ်အေးစပြုနေသော နှလုံးသားမှာ လည်ချောင်းဝသို့ ပြန်လည် ရောက်ရှိသွားပြန်တော့သည်။

"ဘယ်သူက ငါတို့ မြွေလူသားမျိုးနွယ်စုကို ဒီလောက်တောင် ရိုင်းရိုင်းစိုင်းစိုင်း လုပ်ရဲတာလဲ သေချာပေါက် သေတွင်းကို ကိုယ်တိုင်တူးနေတာပဲ"