အခန်း (၃၀) ဆန်းကြယ်အင်္ဂါ -  စွမ်းအင်ကြောများ

အရိပ်သည် ဖုန်းပုစီးအား ဖော်ပြရခက်သော မျက်နှာထားဖြင့် စိုက်ကြည့်နေသည်။ သူ ဘာမှမပြောတော့ပေ။ ပို၍တိကျစွာ ပြောရလျှင် ဤမိစ္ဆာနှင့်တူသော လူသားကို ဘာပြောရမည်မှန်း သူ မသိတော့ခြင်း ဖြစ်သည်။

အတန်ကြာမှ အရိပ်က တစ်စုံတစ်ခုကို သတိရသွားပြီး ပြောလိုက်သည်။ 

"မင်းကို ပြောစရာ သတင်းတစ်ခု ရှိတယ်၊ မင်း ဒါကို သိပ်ဂရုစိုက်မယ်လို့တော့ ငါ မမျှော်လင့်ပါဘူး။ မြို့ပြကျောက်စာတိုင်က [အဆင့်မြှင့်တင်ခြင်း]ကို ဘယ်သူက အရင်ဆုံး အောင်မြင်မလဲဆိုတာရော၊ အဲဒီအတွက် ရမယ့် ဆုလာဘ်ကိုရော မင်း စိတ်ဝင်စားမှာ မဟုတ်ဘူးဆိုတာ ငါသိတယ်။

ကျောက်ကန်းရဲ့ အဖွဲ့ထဲက ချန်ကျန့်ဆိုတဲ့တစ်ယောက် မနက်ဖြန် ကျင့်ကြံမှုအဆင့် တက်လှမ်းတော့မယ်။ သူက ကျောက်ကန်းလောက် မသန်မာပေမဲ့ ဗီဇပြောင်းလဲမှု အဆင့်ကိုတော့ ပြီးသွားပြီမို့ အဆင့်တက်စမ်းသပ်ချက်ကို ဖြတ်ကျော်ဖို့က သိပ်မခက်ပါဘူး။ သူတို့ သတ်မှတ်ထားတဲ့ အချိန်က မနက်ဖြန် မွန်းတည့်အချိန်တဲ့ ဟောပြောပွဲလည်း လုပ်မယ်လို့ ကြားတယ်။ အပြောင်းအလဲ ရှိမရှိတော့ မသိပေမဲ့ သူတို့က ဒီအဆင့်တက်လှမ်းတာကို လူအများကြီး ရှေ့မှာ သက်သေပြချင်နေပုံရတယ်။ အကယ်၍ ချန်ကျန့်သာ အောင်မြင်သွားရင် ကျောက်ကန်းက မြို့ထဲက တခြားလူတွေကို မြူခိုးထဲမှာရှိတဲ့ ချောက်နက်ယဇ်ပလ္လင်ဆီကို ခေါ်သွားလိမ့်မယ်။ သူတို့က လူတိုင်းကို ဒီနေရာကနေ ကယ်ထုတ်ချင်နေတာ"

ထိုသို့ပြောပြီးနောက် အရိပ်၏ ပုံရိပ်မှာ လျင်မြန်စွာ ပျောက်ကွယ်သွားတော့သည်။ ညဉ့်နက်လာပြီဖြစ်ရာ အရိပ်မှာ ဆက်လက် ရှိမနေနိုင်တော့ပေ။ ဖုန်းပုစီးသည် အရိပ် ပျောက်ကွယ်သွားသော နေရာကို စိုက်ကြည့်နေပြီးနောက် မြို့၏ မြောက်ဘက်ဆီသို့ ရုတ်တရက် ခေါင်းလှည့်ကြည့်လိုက်၏။

"မြို့ရဲ့ မြောက်ဘက်၊ မြေအောက် တစ်နေရာရာမှာ ရှိနေတာပဲ။ ငါ့ခန္ဓာကိုယ်က ထူးဆန်းတဲ့ အရာတွေနဲ့ တရားဝင် မပေါင်းစပ်ရသေးလို့ သူရှိတဲ့ နေရာအတိအကျကို မသိနိုင်သေးတာများလား" 

ဖုန်းပုစီး တိုးတိုးလေး ရေရွတ်လိုက်သည်။

ထိုမမြင်ရသော အရိပ်သည် အမြဲတစေ တတွတ်တွတ် နားပူတတ်သော်လည်း ဖုန်းပုစီး သူ့အပေါ် အကောင်းမြင်စိတ် ရှိနေဆဲ ဖြစ်၏။ အကယ်၍ အခွင့်အရေး ရခဲ့လျှင် ထိုအရိပ်ကို ကယ်ထုတ်ပြီး လွတ်လပ်ခွင့် ပေးရန် သူ ဆုံးဖြတ်ထားသည်။

"သီအိုရီအရဆိုရင်တော့ ဂေါ်ဘလင် ဒါမှမဟုတ် လူသေအလောင်းတွေထဲ သူဝင်ပူးလို့ရနိုင်တာပဲ။ ဒါပေမဲ့ ဘာလို့လဲမသိဘူး အဲ့လိုပြောတိုင်းသူက အမြဲတမ်း ငြင်းဆန်နေပြန်‌ရော။ အဲ့အကြံကို ပထမ စပြောမိတုန်းကဆို တော်တော်လေး တုန်လှုပ်သွားတဲ့ပုံနဲ့"

ဖုန်းပုစီး ဆက်မစဉ်းစားတော့ဘဲ မြေပြင်ပေါ်ရှိ အိုးများထဲမှ သစ်ကြားသီးခန့်ရှိသော ဝါညိုရောင် ထူးဆန်းသည့် သွေးသားတုံးတစ်ခုကို ထုတ်ယူလိုက်သည်။ ထို့နောက် ပုဆိန်ဖြင့် သူ၏ ဘယ်ဘက်လက်မောင်းကို ခွဲကာ လှုပ်ရှားနေသော ထိုသွေးသားတုံးအား အသားထဲသို့ ထည့်သွင်းလိုက်၏။

ဤဝါညိုရောင် သွေးသားတုံးမှာ လွန်ခဲ့သော ၁၀ ရက်က ရိုင်ယန်ကို သတ်ပြီး ရရှိခဲ့သော ဆန်းကြယ်ရင်းမြစ် မဟုတ်ပေ။ ၎င်းမှာ ပို၍ ထူးဆန်းရှုပ်ထွေးကာ ပိုမို ပြင်းထန်သော ဆန်းကြယ်စွမ်းအားများ ကိန်းအောင်းနေသည့် ဆန်းကြယ်ရင်းမြစ်ဖြစ်သည်။ 【ချောက်နက်ကို စိုက်ကြည့်သော လူသား】 ဟူသော ဘွဲ့ထူးကို မရခင်ကဆိုလျှင် သူကိုယ်တိုင်ပင် ဤအရာအား ထိန်းချုပ်လမ်းညွှန်ရန် ခက်ခဲခဲ့၏။

မကြာမီမှာပင် ဆန်းကြယ်ရင်းမြစ် ထည့်သွင်းထားသော ဘယ်ဘက်လက်မောင်းမှာ စတင် ပြောင်းလဲလာတော့သည်။ ထိုဆန်းကြယ်ရင်းမြစ် ဗဟိုပြု၍ ပတ်ဝန်းကျင်ရှိ အသားများမှာ လျင်မြန်စွာ ကူးစက်ခံရပြီး ဝါညိုရောင်သို့ ပြောင်းလဲသွားလေ၏။ ထိုအသားများမှာ ဖောင်းကြွလာပြီး အညိုရောင် သွေးကြောများအဖြစ် ပြင်ပသို့ ပျံ့နှံ့သွားခဲ့သည်။

ဖုန်းပုစီး သူ၏ ဘယ်ဘက်လက်မောင်းအား အာရုံခံ၍ စိတ်ဆန္ဒနှင့် ဝိညာဉ်ကို အသုံးချကာ ထိုဆန်းကြယ်စွမ်းအားကို တားဆီးလမ်းညွှန်လိုက်သည်။ သူ၏ လမ်းညွှန်မှုအောက်တွင် အညိုရောင် သွေးကြောများသည် အပေါ်ဘက်သို့ ပျံ့နှံ့ခြင်းကို ရပ်တန့်သွားပြီး အောက်ဘက်သို့ ပျံ့နှံ့မှုနှုန်းမှာ မြန်ဆန်လာခဲ့၏။ ထိုဝါညိုရောင် သွေးကြောများသည် လက်ချောင်းထိပ်များအထိ ရောက်ရှိသွားသောအခါ ယားကျိကျိနှင့် ကျဉ်စိမ့်စိမ့် ခံစားချက်များ ပေါ်ပေါက်လာတော့သည်။

သူ့ဘယ်ဘက်လက်သည်းများ စတင် ကျွတ်ထွက်သွားပြီး ချွန်ထက်သော လက်သည်းငါးခု ဖြစ်ပလာခဲ့သည်။ သူ့ ထိန်းချုပ်မှုအောက်တွင် ထိုလက်သည်းများကို ခန္ဓာကိုယ်အတွင်းသို့ အချိန်မရွေး ပြန်လည် ရုပ်သိမ်းနိုင်စွမ်းရှိ၏။

"အကြိမ် ၂၀ ကျော်လောက် စမ်းသပ်ခဲ့ပေမဲ့ ဒီထူးဆန်းတဲ့ အရာတွေကို လုံးဝ ထိန်းချုပ်လမ်းညွှန်ဖို့က ခက်နေတုန်းပဲ။ အပေါ်ယံလောက်ပဲ ထိန်းချုပ်နိုင်သေးတယ် "

မကြာမီမှာပင် လက်မောင်းအတွင်းရှိ ထူးဆန်းသော အရာများသည် အသက်ဝိညာဉ်အား စတင် ကျူးကျော်လာသည်ကို တွေ့ရှိရသဖြင့် ဖုန်းပုစီး ပုဆိန်ကို မြှောက်ကာ ဘယ်ဘက်လက်မောင်းကို ခုတ်ဖြတ်လိုက်သည်။ ခန္ဓာကိုယ်မှ ပြတ်တောက်သွားသော ဘယ်ဘက်လက်မောင်းမှာ အသက်ရှိနေသကဲ့သို့ မြေပြင်ပေါ်တွင် ဆက်လက် လှုပ်ရမ်းနေခဲ့၏။ မိနစ်အနည်းငယ် ကြာမှသာ လုံးဝ ငြိမ်သက်သွားတော့သည်။

ဖုန်းပုစီး လက်မောင်းထဲသို့ ထည့်သွင်းထားသော ဆန်းကြယ်ရင်းမြစ်ကို ပြန်လည် ထုတ်ယူလိုက်၏။ ထိုသွေးသားတုံးမှာ အနည်းငယ် သေးငယ်သွားပြီး တစ်ခါတစ်ရံ သိသိသာသာ တုန်ခါနေတတ်၏။

"ဒီဟာရဲ့ အစွမ်းသတ္တိက အများကြီး လျော့နည်းသွားပြီ။ ငါ့အတွက်တော့ အသုံးမဝင်တော့ဘူး... ဒါပေမဲ့ ..."

ဖုန်းပုစီး မနီးမဝေးတွင် လေ့ကျင့်နေသော ဖေချောင်းကို ကြည့်လိုက်ပြီးနောက် နောက်ဆုံးတွင် ခေါင်းခါလိုက်သည်။ အစွန်းသတ္တိ အလွန်နည်းနေသော ဤသွေးသားတုံးမှာ ဖေချောင်းအတွက်တော့ အလွန် အန္တရာယ်များနေဆဲ ဖြစ်သည်။ ဤကဲ့သို့သော အရာမှာ တီးတိုးသံများကဲ့သို့ မဟုတ်ဘဲ ဒြပ်ရှိသော အရာဖြစ်သည်။ တစ်ခါသာ အသက်ဝိညာဉ်ထဲသို့ ကျူးကျော်ဝင်ရောက်သွားပါက ရလဒ်မှာ ကောင်းသည်ဖြစ်စေ၊ ဆိုးသည်ဖြစ်စေ ပြန်ပြင်၍ ရတော့မည် မဟုတ်ပေ။

ဤသို့ တွေးလိုက်ရင်း ဖုန်းပုစီးသည် ညာဘက်လက်ဖြင့် အားစိုက်ကာ လက်ထဲမှ သွေးသားတုံးကို ချေဖျက်လိုက်တော့သည်။ လတ်တလောရက်များအတွင်း သူသည် ထူးဆန်းသော သွေးသားတုံးများကို ထည့်သွင်းလိုက်၊ ခြေလက်များကို ခုတ်ဖြတ်လိုက်ဖြင့် အကြိမ် ၂၀ ကျော် စမ်းသပ်ခဲ့ပြီးဖြစ်သည်။ အများစုမှာ လက်မောင်းများကို စမ်းသပ်ခြင်းဖြစ်ပြီး ခြေထောက်ကိုမူ နှစ်ကြိမ်သာ စမ်းသပ်ခဲ့ရသေးသည်။

ဂေါ်ဘလင်များကို သတ်ဖြတ်ရာတွင် ထိရောက်မှု မြင့်မားလွန်းသဖြင့် သူ၏ ချောက်နက်မှတ်များမှာ ယခုတွင် လျှံထွက်နေပြီ ဖြစ်၏။ အများကြီး သုံးစွဲပြီးသည့်တိုင် ချောက်နက်မှတ် ၁၇,၀၀၀ ကျန်ရှိနေသေးသဖြင့် [ပြုပြင်ခြင်း] စွမ်းဆောင်ချက်ကို စိတ်ကြိုက် အသုံးပြုနိုင်ခဲ့သည်။

ဤဝါညိုရောင် သွေးသားတုံးများ၏ အရင်းအမြစ်မှာမူ-

သူ နာမည်နီကျိန်စာ ကို ရရှိပြီးနောက် ညဘက် မြူခိုးထဲတွင် ထူးဆန်းသော ပုံစံရှိသည့် သတ္တဝါများ ရံဖန်ရံခါ လာရောက် တိုက်ခိုက်လေ့ ရှိကြသည်။ ထိုသတ္တဝါများသည် သဘာဝလွန် စွမ်းအားများ သို့မဟုတ် ဆန်းကြယ်စွမ်းအင်များကို အသုံးပြုနိုင်ကြ၏။ ဥပမာအားဖြင့် သူတို့၏ လက်မောင်းများ သို့မဟုတ် ဆံပင်များမှာ ရုတ်တရက် ရှည်ထွက်လာခြင်း၊ သို့မဟုတ် သူ့ထံသို့ မီးလျှံအစိမ်းရောင်များနှင့် လျှပ်စီးအနီရောင်များကို လွှတ်ထုတ်ခြင်းမျိုး ဖြစ်သည်။

ထိုထူးခြားသော သတ္တဝါများသည် ညတိုင်းနီးပါး ပေါ်လာလေ့ရှိပြီး အများစုမှာ တစ်ကောင်သာ ဖြစ်သော်လည်း တစ်ခါတစ်ရံ နှစ်ကောင်၊ သုံးကောင်အထိ ပေါ်လာတတ်သည်။ ထိုသတ္တဝါများကို သတ်ဖြတ်ပြီးနောက် သူတို့၏ ခန္ဓာကိုယ်အတွင်းမှ လှုပ်ရှားနေသော ဤထူးဆန်းသည့် သွေးသားတုံးများကို ထုတ်ယူနိုင်ခဲ့ခြင်း ဖြစ်သည်။ ၎င်းမှာ ရိုင်ယန်ထံမှ ‘ဆန်းကြယ်ရင်းမြစ်' နှင့် ဆင်တူသော်လည်း ပို၍ ပြင်းထန်ပြီး ရှုပ်ထွေးလှသည်။ ဖုန်းပုစီး ခုနက အသုံးပြုခဲ့သော ဝါညိုရောင် သွေးသားတုံးမှာ မနေ့က တစ်ဝက်ခန့်ရှိသော ဖားပြုတ်ကြီးတစ်ကောင်၏ အလောင်းမှ ရရှိခဲ့ခြင်း ဖြစ်သည်။

သူ ကျိန်စာမဖြေရသည့် အကြောင်းရင်းမှာလည်း ဤအရာနှင့် သက်ဆိုင်၏။ အကယ်၍ ကျိန်စာဖြေလိုက်လျှင် ထိုထူးခြားသော သတ္တဝါများမှာ သူ့အား လာရောက် တိုက်ခိုက်တော့မည်မဟုတ်ဘဲ ဤသွေးသားတုံးများကို ဆက်လက် ရရှိနိုင်တော့မည် မဟုတ်ပေ။ ၁၀ ရက် ကြာသည့်တိုင် သူသည် အရိပ် သွားစေချင်သော ချောက်နက်ယဇ်ပလ္လင်သို့ မသွားသေးပေ။ ၎င်းမှာ ခန္ဓာကိုယ်မှာ အကန့်အသတ်သို့ မရောက်သေး၍ မဟုတ်ပေ။ သူ၏ ခန္ဓာကိုယ်မှာ လွန်ခဲ့သော ငါးရက်ကတည်းကပင် သူ တွက်ချက်ထားသော အမြင့်ဆုံး အကန့်အသတ်သို့ ရောက်ရှိနေပြီ ဖြစ်သည်။

လွန်ခဲ့သော ရက်အနည်းငယ်အတွင်း တိုးတက်မှုမှာ မရှိသလောက်ပင်။ သူ၏ ခွန်အားမှာ ၃၀ သို့ ရောက်ရှိနေပြီး ခန္ဓာကိုယ်အတွင်းရှိ အဟန့်အတားများကို ချိုးဖျက်လိုက်ပါက ၅၀ အထိ ရောက်ရှိနိုင်၏။ ထိုသို့ ချိုးဖျက်ထားနိုင်မှုမှာ တစ်နာရီမှ နှစ်နာရီအထိ ကြာမြင့်နိုင်ပြီး ခန္ဓာကိုယ်အပေါ် ဝန်ထုပ်ဝန်ပိုးမှာလည်း အများကြီး လျော့နည်းသွားသဖြင့် ၎င်းကို ပုံမှန် စွမ်းရည်တစ်ခုအဖြစ် အသုံးပြုနိုင်သည်။

သူ ချောက်နက်ယဇ်ပလ္လင်သို့ မသွားရသည့် အကြောင်းရင်းမှာ လတ်တလော ရက်များအတွင်း ဆန်းကြယ်အင်္ဂါနှင့် ပတ်သက်သော စိတ်ကူးသစ်တစ်ခု ရရှိလာသောကြောင့် ဖြစ်သည်။၊ 

သူ၏ ခန္ဓာကိုယ်အတွင်းရှိ စွမ်းအင်ကြောများကို ဆန်းကြယ်အင်္ဂါများအဖြစ် ဖွဲ့စည်းလိုခြင်းပင်။

ဖုန်းပုစီးသည် အရိုးအကြောပြောင်းလဲခြင်းကျမ်းကို ကျင့်ကြံရန် လက်မလျှော့သေးပေ။ ဤကမ္ဘာတွင် အတွင်းအား သို့မဟုတ် အလားတူ စွမ်းအားများ မရှိသော်လည်း ဆန်းကြယ်စွမ်းအင်များကို သူ၏ စွမ်းအင်ကြောများအတွင်း လှည့်ပတ် စီးဆင်းစေနိုင်မလားဟု တွေးမိသွား၏။ အရိပ်၏ ပြောကြားချက်အရ ဆန်းကြယ်စွမ်းအင်များမှာ မြောက်မြားစွာ ရှိသလို ၎င်းတို့မှ ထုတ်လုပ်ပေးသော ဆန်းကြယ်အင်္ဂါများမှာလည်း များပြားလှသည်။

အရိပ်၏ အဆိုအရ ဤကမ္ဘာတွင် စွမ်းအင်ကြောများကဲ့သို့သော ဆန်းကြယ်အင်္ဂါများ မရှိဟု ဆိုသော်လည်း ဖုန်းပုစီးကတော့ ၎င်းကို ဖြစ်နိုင်သည်ဟု ယူဆထားသည်။ အကြိမ် ၂၀ ကျော် စမ်းသပ်ပြီးနောက် ဖုန်းပုစီးသည် ထိုသို့လုပ်ဆောင်ရန် ဖြစ်နိုင်ခြေရှိကြောင်း အတည်ပြုနိုင်ခဲ့၏။ ယခုအခါ သူသည် သူ၏ လက်မောင်းများအတွင်းရှိ စွမ်းအင်ကြောများကို ခံစားနေရပြီ ဖြစ်သည်။

စွမ်းအင်ကြောများမှာ အကောင်အထည်ဒြပ်မရှိဟု ထင်ရသော်လည်း ၎င်းတို့မှာ အမှန်တကယ် တည်ရှိ၏။ လူ့ခန္ဓာကိုယ်ရှိ စွမ်းအင်ကြောအများစုမှာ ပိတ်ဆို့နေသော်လည်း ဆန်းကြယ်စွမ်းအင်များက ၎င်းတို့ကို လွယ်ကူစွာ ရှင်းလင်းပေးနိုင်သည်။ သူသည် ထိုစွမ်းအင်များကို စွမ်းအင်ကြောများအတွင်း လည်ပတ်စေသောအခါ ထူးဆန်းသော အရာများ၏ စီးဆင်းမှုမှာ ပိုမို ချောမွေ့လာပြီး မငြိမ်မသက်ဖြစ်သော ခံစားချက်မှာလည်း လျော့နည်းသွားသည်။ ထို့အပြင် ထပ်တလဲလဲ လည်ပတ်စေခြင်းဖြင့် ခန္ဓာကိုယ်ကို ပိုမို ကြံ့ခိုင်လာစေသည့် အကျိုးသက်ရောက်မှုများကိုလည်း ဖြစ်ပေါ်စေသည်။

အကယ်၍ ဤနည်းလမ်းအတိုင်း ဆက်လက် လုပ်ဆောင်ပါက သူ၏ ခြေထောက်များအတွင်းရှိ စွမ်းအင်ကြောများကိုလည်း ရှာဖွေနိုင်မည် ဖြစ်သည်။ ခြေထောက်များအတွင်းသို့ ထူးဆန်းသော သွေးသားတုံးများကို အကြိမ်အနည်းငယ် ထပ်မံ ထည့်သွင်းပြီး ခြေထောက်များကို ခုတ်ဖြတ်လိုက်၊ ပြုပြင်လိုက်ဖြင့် ထပ်တလဲလဲ လုပ်ဆောင်ရုံသာ ဖြစ်သည်။ လက်ရှိ အခက်အခဲမှာမူ ခန္ဓာကိုယ်နှင့် ဦးခေါင်းအတွင်းရှိ စွမ်းအင်ကြောများ ဖြစ်သည်။ ခြေလက်များတွင် စမ်းသပ်ခြင်းမှာ အမှားအယွင်းရှိပါက ခုတ်ဖြတ်ပြီး ပြန်လည် စမ်းသပ်နိုင်သော်လည်း၊ ကိုယ်လုံးနှင့် ဦးခေါင်းအတွင်းသို့ ရောက်ရှိသွားပါက ထိုခုတ်ဖြတ်စမ်းသပ်ခြင်း နည်းလမ်းကို အသုံးပြုနိုင်တော့မည် မဟုတ်ပေ...။