အခန်း (၁၄) - ပိုမိုသန်မာလာခြင်း

 “ဒီလိုကြည့်မယ်ဆိုရင် မတန်ဆုံးလို့ ထင်ရတဲ့ [တော်ဝင်ရိက္ခာ] က တကယ်တော့ တွက်ခြေကိုက်ဆုံးပဲ။ ပြီးရင် [ရှင်သန်ရုံရိက္ခာ] လည်းမဆိုးဘူး၊ အများကြီးရပြီး စျေးလည်းမဆိုးဘဲ စားလို့ကောင်းမယ်ထင်ရတဲ့ [အဝစားရိက္ခာ] ကတော့ မတန်ဆုံးပဲ”  

[တော်ဝင်ရိက္ခာ] တွင် ပါဝင်သော အာဟာရဓာတ်မှာ [အဝစားရိက္ခာ] ထက် အဆနှစ်ဆယ်နီးပါး ပိုများသောကြောင့် ပုံမှန်အားဖြင့်ဆိုလျှင် [တော်ဝင်ရိက္ခာ] မှ အာဟာရများကို သူ အပြည့်အဝ စုပ်ယူနိုင်မည်မဟုတ်ပေ။ 

မြို့ထဲရှိ အခြားသူများ [တော်ဝင်ရိက္ခာ] ကို လဲလှယ်စားသောက်သည့်အခါတွင်လည်း ဤကဲ့သို့ပင် ဖြစ်ကြသည်။ အပြင်ပန်းကြည့်လျှင် ခမ်းနားကြီးကျယ်စွာ စားသောက်နေကြသော်လည်း အာဟာရအများစုမှာ စုပ်ယူနိုင်စွမ်းမရှိဘဲ တစ်ရက်အကြာတွင် ပြန်လည်စွန့်ထုတ်လိုက်ကြရရုံသာ ဖြစ်သည်။ 

ဖုန်းပုစီးကမူ [တော်ဝင်ရိက္ခာ] မှ အာဟာရဓာတ်အားလုံးကို အပြည့်အဝ စုပ်ယူနိုင်ခဲ့သည်။ ၎င်းမှာ [အခြေခံကျင့်ကြံမှု အထောက်အကူ] ကြောင့်ပင် ဖြစ်၏။ 

[အခြေခံကျင့်ကြံမှု အထောက်အကူ] ၏ လုပ်ဆောင်ချက်မှာ အခြေခံ ကိုယ်ကာယ လေ့ကျင့်ခန်းများနှင့် အဆင့်မတက်မီ ကျင့်ကြံခြင်း အဆင့်များတွင် ကူညီပေးရန်ဖြစ်သည်။ ဖေးချောင်၏ ပြောပြချက်အရ ဤခုနစ်ရက်အတွင်း လူအများအပြားသည် [အခြေခံကျင့်ကြံမှု အထောက်အကူ] ကို စမ်းသပ်ခဲ့ကြဖူးသည်။ ဖေးချောင် ယခင်က ပါဝင်ခဲ့သော ကျောက်ကန်း၏ အဖွဲ့ထဲရှိ လူအချို့လည်း စမ်းသပ်ခဲ့ကြသော်လည်း ရလဒ်မှာ မကောင်းလှဘဲ အချို့မှာမူ မည်သည့်တုံ့ပြန်မှုမျှပင် မရှိခဲ့ကြပေ။ 

၎င်းမှာ [အခြေခံကျင့်ကြံမှု အထောက်အကူ] က အသုံးမဝင်သောကြောင့်မဟုတ်ဘဲ ထိုလူများက အသုံးပြုနည်းကို သေသေချာချာ နားမလည်သောကြောင့် ဖြစ်၏။ [အခြေခံကျင့်ကြံမှု အထောက်အကူ] ဆိုသည်မှာ ချောက်နက်အမှတ် သုံးလိုက်ရုံဖြင့် ဉာဏ်အလင်းပွင့်သကဲ့သို့ ခွန်အား တိုက်ရိုက်မြှင့်တင်ပေးနိုင်သည့် အရာမျိုး မဟုတ်ပေ။ ၎င်းကို အသုံးပြုရန်အတွက် အခြေခံကိုယ်ကာယလေ့ကျင့်မှု အချို့ လိုအပ်ပေသည်။ 

သာမန်လူတစ်ယောက် အသည်းအသန် လေ့ကျင့်ခန်းလုပ်သည့်အခါ ခန္ဓာကိုယ်၏ လေ့ကျင့်လိုက်သော အစိတ်အပိုင်းများသည် နာကျင်မှုကို ခံစားရပြီးနောက် ခန္ဓာကိုယ်၏ပြန်လည်ကုသခြင်းဖြင့် ပို၍သန်မာလာတတ်သည်။ ယေဘုယျအားဖြင့် ဤဖြစ်စဉ်မှာ အလွန်နှေးကွေးပြီး ရလဒ်ကောင်းရရန်အတွက် ရေရှည်ဇွဲရှိရှိ လေ့ကျင့်ရန် လိုအပ်သော်လည်း၊ [အခြေခံကျင့်ကြံမှု အထောက်အကူ] ကမူ ဤဖြစ်စဉ်ကို ပိုမို မြန်ဆန်စေနိုင်သည်။ 

ဥပမာအားဖြင့် မြို့ထဲတွင် တစ်နေကုန် ပြေးလွှားပြီးနောက် အားအင်ကုန်ခမ်းနေချိန်တွင် [အခြေခံကျင့်ကြံမှု အထောက်အကူ] ကို အသုံးပြုလိုက်ပါက ခန္ဓာကိုယ်ရှိ နာကျင်ကိုက်ခဲမှုများမှာ လျင်မြန်စွာ ပျောက်ကွယ်သွားမည်ဖြစ်ပြီး ယင်းအချိန်တွင် ဆာလောင်မှုကို ခံစားရမည်ဖြစ်သည်။

ထိုအခါ အစားအစာမှတစ်ဆင့် လုံလောက်သော အာဟာရများကို ဖြည့်တင်းပေးလိုက်ပါက ခန္ဓာကိုယ်အား သန်မာစေမည်မည်ဖြစ်သည်။  အဝလွန်နေသူများဆိုလျှင် အာဟာရဖြည့်ရန် ပင်မလိုဘဲ ၎င်းတို့၏ အဆီများက အာဟာရအဖြစ် တိုက်ရိုက်ကူးပြောင်းသွားနိုင်သည်။ သာမန်လေ့ကျင့်ခန်းဖြင့် လပေါင်းများစွာ လေ့ကျင့်မှ ရရှိနိုင်မည့် ရလဒ်များကို [အခြေခံကျင့်ကြံမှု အထောက်အကူ] အသုံးပြု၍ ရက်ပိုင်းအတွင်း ရရှိနိုင်သည့်အပြင် အလွန်အကျွံ လေ့ကျင့်မိ၍ ဒဏ်ရာရမည်ကိုလည်း စိုးရိမ်စရာမလိုပေ။ 

ယေဘုယျအားဖြင့် လေ့ကျင့်ခန်းကို ပိုမိုပြင်းထန်စွာ လုပ်လေလေ [အခြေခံကျင့်ကြံမှု အထောက်အကူ] ၏ အကျိုးသက်ရောက်မှု ပိုမိုကောင်းမွန်လေလေ ဖြစ်သည်။ လုံလောက်သော အာဟာရကိုသာ ပေးနိုင်ပါက ခွန်အား၊ ခံနိုင်ရည်၊ မြန်ဆန်မှုနှင့် တုံ့ပြန်မှု စသည်တို့အားလုံးကို အဆင့်မြှင့်တင်နိုင်ပေသည်။ 

ခန္ဓာကိုယ်၏ သွေးသားကန့်သတ်ချက် ကို ချိုးဖျက်နိုင်သော ဖုန်းပုစီးအတွက်မူ ဤ [အခြေခံကျင့်ကြံမှု အထောက်အကူ] ၏ အာနိသင်မှာ ပို၍ပင် အစွမ်းထက်လှ၏။ 

လူသားတိုင်းတွင် ကန့်သတ်ချက်များရှိပြီး သာမန်လူတို့၏ လေ့ကျင့်ခန်းတွင်လည်း အတိုင်းအတာ ရှိသည်။ ဥပမာအားဖြင့် မီတာ ၁၀၀ အပြေးပြိုင်ပွဲတွင် သာမန်လူတစ်ယောက်သည် ငယ်စဉ်ကတည်းက မည်မျှပင် ကြိုးစားလေ့ကျင့်ပါစေ ၁၀ စက္ကန့်ဝန်းကျင်မှာသာ ရှိပေလိမ့်မည်။ ဤကမ္ဘာတွင် [အခြေခံကျင့်ကြံမှု အထောက်အကူ] ရှိလျှင်တောင်မှ သာမန်လူများအဖို့ ၁၀ စက္ကန့်ဟူသော အတားအဆီးကို ကျော်ဖြတ်ရန်မှာ ခက်ခဲလှပေလိမ့်မည်။ 

သို့သော် ဖုန်းပုစီးကမူ မတူညီပေ။ လူသားမျိုးနွယ်၏ ကန့်သတ်ချက်ဘောင်ကို ချိုးဖျက်လိုက်ခြင်းဖြင့် သူ၏ အရှိန်မှာ မီတာ ၁၀၀ လျှင် ၇ စက္ကန့်အထိ ရှိနိုင်ပြီး ထို့ထက်ပင် ပိုမိုမြန်ဆန်နိုင်သေးသည်။ 

မှန်ပေသည်၊ ခန္ဓာကိုယ်၏ ကန့်သတ်ချက်များကို ချိုးဖျက်ခြင်းမှာလည်း ကိုယ်ကာယ လေ့ကျင့်ခြင်း ပုံစံတစ်မျိုးပင် ဖြစ်၏။ ကိုယ်ကာယ လေ့ကျင့်ခြင်းကြောင့် ဖြစ်ပေါ်လာသည့် ကိုက်ခဲမှုများ၊ ကြွက်သားနာကျင်မှုများနှင့် သူ၏ ကန့်သတ်ချက်ချိုးဖျက်မှုကြောင့် ဖြစ်ပေါ်လာသော တန်ပြန်ရိုက်ခတ်မှု များမှာ တူညီသော ဒဏ်ရာအမျိုးအစားများသာ ဖြစ်ကြပြီး သူ၏ တန်ပြန်ရိုက်ခတ်မှု မှာအဆပေါင်းများစွာ ပိုမိုပြင်းထန်နေခြင်းသာ ဖြစ်သည်။ 

ဒဏ်ရာ အလွန်ပြင်းထန်လွန်းသောကြောင့် ကန့်သတ်ချက်ချိုးဖျက်ခြင်းမှာ ပုံမှန်အားဖြင့် လေ့ကျင့်ခန်းအာနိသင်ကို မရရှိနိုင်ပေ။ သို့သော်လည်း ဤနေရာတွင် [အခြေခံကျင့်ကြံမှု အထောက်အကူ] ရှိနေပေသည်။ 

[အခြေခံကျင့်ကြံမှု အထောက်အကူ] ၏ အာနိသင်အောက်တွင် ဖုန်းပုစီး၏ခန္ဓာကိုယ်မှာ ပိုမိုခိုင်မာလာကာ သွေးသားများနှင့် အရိုးများမှာ ပိုမိုသန်စွမ်းလာနေသည်။ [တော်ဝင်ရိက္ခာ] များက အာဟာရဓာတ်များအဖြစ် ပြောင်းလဲ၍ ခန္ဓာကိုယ်ထဲသို့ ပေါင်းစပ်ဝင်ရောက်သွားသည်နှင့်အမျှ ဖုန်းပုစီး၏ ခန္ဓာကိုယ်မှာလည်း အဘက်ဘက်မှ အဆင့်မြှင့်တင်ခြင်းကို ခံစားနေရ၏။ သူ၏ ကန့်သတ်ချက်ချိုးဖျက်မှုမှာ ခန္ဓာကိုယ်တစ်ခုလုံး ဖြစ်သောကြောင့် ယခု အဆင့်မြှင့်တင်ခြင်း မှာလည်း တစ်ကိုယ်လုံးစာ အလုံးစုံ ဖြစ်နေခြင်းပင်။ 

 “ဘဲကင်က အာဟာရဓာတ်တွေ အများကြီးပါပေမဲ့ ငါ့အတွက်တော့ နည်းနည်းလိုသေးတယ်” 

ဘဲကင်အနည်းငယ်နှင့် အသားပေါက်စီအကြီးတစ်ခု ကျန်သေးသော်လည်း ဖုန်းပုစီးသည် [တော်ဝင်ရိက္ခာ] ကိုပင် ဆက်လက်ရွေးချယ်လိုက်ရာ သူ၏အမှတ်များမှာ ၃၃၈ မှတ်မှ ၃၁၃ မှတ်သို့ လျော့ကျသွားခဲ့သည်။ မကြာမီမှာပင် သိုးကင်တစ်ဝက်နှင့် ဘီယာနှစ်ခွက် ဖုန်းပုစီး၏ ရှေ့မှောက်သို့ ရောက်ရှိလာတော့သည်။ 

မလှမ်းမကမ်းတွင်ရှိနေသော ဝမ်ချန်းနှင့် ဘေးပတ်ဝန်းကျင်ရှိ လူများ၏ အံ့အားသင့်နေသော အကြည့်များအောက်တွင် လက်မောင်းတစ်ဖက်ပြတ်ကာ သွေးအလိမ်းလိမ်းဖြစ်နေသော ဖုန်းပုစီးသည် ဘဲကင်စား၍မပြီးသေးခင်မှာပင် နောက်ထပ် [တော်ဝင်ရိက္ခာ] တစ်ခုကို မှာယူလိုက်ပြီး သိုးကင်စားကာ ဘီယာ သောက်သုံးနေတော့သည်။ 

“[တော်ဝင်ရိက္ခာ] နှစ်ခုတောင်၊ ချောက်နက်အမှတ် ၅၀ ကို ဒီတိုင်းကြီး သုံးပစ်လိုက်တာလား” 

“ဟ ဘောစိပဲ သူ့မှာ အမှတ်တွေ ဘယ်လောက်တောင် ရှိနေလို့လဲ” 

“ဘောစိဟုတ်လား၊ ငါ့ကြည့်ရတာတော့ ကျပ်မပြည့်တဲ့သူနဲ့ တူတယ်” 

“မြူခိုးတွေရဲ့ ရေရွတ်သံကြောင့် စိတ်ဖောက်သွားတာလည်း ဖြစ်နိုင်တာပဲ၊ ပရော်ဖက်ဆာ လီလင်း ဆီမှာ ကုခိုင်းကြည့်ရမယ်” 

ဘေးနားရှိ တန်းစီနေသော လူများက ဖုန်းပုစီး၏လုပ်ရပ်အား တိုးတိုးတိတ်တိတ် ဝေဖန်ပြောဆိုနေကြ၏။ 

ဝမ်ချန်း ထိုလူများ၏ ပြောစကားကို ကြားသောအခါ မျက်လုံးများ အရောင်လက်သွားကာ ဖုန်းပုစီးအား မည်သို့ကိုင်တွယ်ရမည်ကို စဉ်းစားမိသွားသည်။ ၎င်းမှာ ဖုန်းပုစီးကို အပြန်အလှန်ကူညီရေးအသင်း၏ ယာယီဆေးရုံ၊ သို့မဟုတ် ယာယီစိတ်ကျန်းမာရေးဆေးရုံသို့ ပို့ဆောင်ရန် ဖြစ်၏။ 

သာမန်ဒဏ်ရာများအား ချောက်နက်အမှတ် ၁၀၀ သုံး၍ ကုသနိုင်သော်လည်း စိတ်ပိုင်းဆိုင်ရာ ပြဿနာများကိုမူ ချောက်နက်အမှတ် ဖြင့် ကုသ၍မရနိုင်သောကြောင့် အပြန်အလှန်ကူညီရေးအသင်းက ယာယီစိတ်ကျန်းမာရေးဆေးရုံ တည်ထောင်ထားခြင်း ဖြစ်သည်။ လတ်တလောတွင် ထိုဆေးရုံ၌ မြူခိုးများကြောင့် စိတ်ဖောက်နေသူ အချို့ကို ဒေါက်တာနော်တန်နှင့် ပရော်ဖက်ဆာ လီလင်းတို့က နေ့စဉ် ကုသစစ်ဆေးပေးနေကြသည်။ 

အမှန်စင်စစ် ဖုန်းပုစီးအတွက် ကုသမှုမှာ မဖြစ်နိုင်သော်လည်း သူသည် ဖုန်းပုစီးအား ကုသပေးချင်ယောင်ဆောင်ခြင်းဖြင့် ဖေးချောင်၏ ယုံကြည်မှုကို ရယူရန် ကြံစည်နေခြင်း ဖြစ်၏။ ဖေးချောင်ကို အပြန်အလှန်ကူညီရေးအသင်းထဲသို့ သွင်းယူပြီး သူ၏ စေခိုင်းမှုအောက်သို့ အလုံးစုံ ရောက်ရှိသွားချိန်တွင်မှ ဖုန်းပုစီးအား တစ်နည်းနည်းဖြင့် ကိစ္စရှင်းရန် တွေးတောနေသည်။ 

ဝမ်ချန်း ထိုသို့တွေးတောရင်း သိုးကင်စားနေသော ဖုန်းပုစီးက သူ့အား စိုက်ကြည့်နေသည်ကို ရုတ်တရက် တွေ့လိုက်ရ၏။ 

ဝမ်ချန်း မသိမသာ မျက်နှာလွှဲလိုက်ပြီးနောက် ဖုန်းပုစီးအား ခိုးကြည့်လိုက်ရာ ဖုန်းပုစီးမှာ သူ့ကို ကြည့်မနေဘဲ သိုးကင်ကိုသာ မြိန်ရည်ယှက်ရည် စားနေသည်ကို တွေ့ရပြန်သည်။ 

 “ငါ့စိတ်ထင်တာပဲလား…”

ဝမ်ချန်း မျက်မှောင်ကြုတ်ကာ သူ၏ မျက်လုံးများကို လက်ဖြင့် ပွတ်ကြည့်လိုက်မိသည်။ 

ဝမ်ချန်း၏ ထင်မြင်ချက်မှာ မမှားပေ၊ ဖုန်းပုစီး အမှန်တကယ်ပင် လှမ်းကြည့်ခဲ့ခြင်း ဖြစ်၏။ [အခြေခံကျင့်ကြံမှု အထောက်အကူ] မှတစ်ဆင့် ဖုန်းပုစီး၏ ခန္ဓာကိုယ်မှာ ခွန်အား၊ မြန်ဆန်မှုနှင့် တုံ့ပြန်မှု စသည့် အဘက်ဘက်မှ အဆင့်မြှင့်တင်ခြင်း များကို ရရှိနေရုံသာမက ဆဋ္ဌမအာရုံ သို့မဟုတ် သားရဲတစ်ကောင်၏ အလိုလိုသိစိတ်နှင့်တူသော ထူးခြားသော အာရုံခံစားမှုကိုလည်း ရရှိလာခဲ့သည်။

သူ့အပေါ်ထားသော ဝမ်ချန်း၏ ရန်လိုမှုကို ခံစားမိသောကြောင့် လှမ်းကြည့်လိုက်ခြင်း ဖြစ်၏။ သို့သော်လည်း ဖုန်းပုစီး ဆက်၍ဂရုမစိုက်ဘဲ သိုးကင်တစ်ဝက်ကိုသာ မြန်မြန်စားသောက်ပြီး သူ၏ ခန္ဓာကိုယ် အခြေအနေအား ပြန်လည်ခံစားကြည့်နေလိုက်သည်။ 

အာဟာရဓာတ်များ ခန္ဓာကိုယ်ထဲသို့ ပေါင်းစပ်သွားသည်နှင့်အမျှ ခန္ဓာကိုယ်မှာ အဘက်ဘက်မှ တိုးတက်လာခဲ့သည်။ ဖုန်းပုစီးသည် သူ၏ခန္ဓာကိုယ်ကို အလွန်အမင်း ထိန်းချုပ်နိုင်စွမ်းရှိသောကြောင့် မိမိကိုယ်တိုင်၏ ပြောင်းလဲမှုများအား ခံစားသိရှိနိုင်ပေသည်။ 

ခွန်အားကို ဥပမာထား၍ ကြည့်လျှင် သာမန်အရွယ်ရောက်ပြီး အမျိုးသားတစ်ဦး၏ ခွန်အားမှာ ၁၀ ဖြစ်ပါက သူ၏ခွန်အားမှာ ၁၂ ရှိပြီး [အခြေခံကျင့်ကြံမှု အထောက်အကူ] ကို အသုံးပြုပြီးနောက်တွင်မူ ၁၅ ဝန်းကျင်သို့ ရောက်ရှိသွားပြီဖြစ်သည်။ ၎င်းမှာ [အခြေခံကျင့်ကြံမှု အထောက်အကူ] ကို တစ်ကြိမ်သာ အသုံးပြုရသေးသည့် အခြေအနေ ဖြစ်၏။ ဆက်လက်အသုံးပြုသွားပါက သူ၏ ခန္ဓာကိုယ်မှာ ပို၍ပင် သန်မာလာမည်ဖြစ်သည်။ 

ထိုသို့တွေးတောရင်း တင်ပျဉ်ခွေထိုင်နေသော ဖုန်းပုစီးသည် ဒုတိယအကြိမ်မြောက် [အခြေခံကျင့်ကြံမှု အထောက်အကူ] အတွက် သွေးသားကန့်သတ်ချက်ကို ထပ်မံချိုးဖျက်ရန် ဆုံးဖြတ်လိုက်သည်။ 

သူ ငြိမ်သက်စွာ ထိုင်နေသော်လည်း ကြွက်သားများမှာ အနည်းငယ် ဖောင်းကြွလာ၏။ အပြင်ပန်းမှ ကြည့်လျှင် မည်သည့်ထူးခြားမှုမျှ မမြင်ရသော်လည်း တကယ်တမ်းတွင် သူ၏ခန္ဓာကိုယ်မှာ ကန့်သတ်ချက်ချိုးဖျက်ခြင်း အခြေအနေတွင် မိမိကိုယ်ကိုယ် ပြန်လည်စားသုံးနေခြင်း ဖြစ်သည်။ 

ဝမ်ချန်းမှာ ဖုန်းပုစီး၏ ကန့်သတ်ချက်ချိုးဖျက်မှုကို လုံးဝ သတိမထားမိပေ။ သူ၏ အမြင်တွင် ဖုန်းပုစီးမှာ ရုတ်တရက် ငြိမ်သက်သွားသည်ဟုသာ ထင်မြင်နေမိသည်။ ဖုန်းပုစီး၏ စိတ်ပိုင်းဆိုင်ရာမှာ တကယ်ပင် မူမမှန်ဖြစ်နေပုံရသည်ဟု သူ ယူဆလိုက်၏။ 

ဝမ်ချန်းသည် ပြောဆိုမည့် စကားလုံးများကို ပြင်ဆင်ပြီးနောက် ဖုန်းပုစီးကို ဖျောင်းဖျပြီး အပြန်အလှန်ကူညီရေးအသင်း၏ ယာယီစိတ်ကျန်းမာရေးဆေးရုံသို့ ခေါ်သွားရန် ရှေ့သို့ တက်လှမ်းလိုက်တော့သည်။

“ဖွီး….   “

ဝမ်ချန်း စကားမစရသေးမီမှာပင် ကန့်သတ်ချက်ချိုးဖျက်မှု၏ တန်ပြန်ရိုက်ခတ်ဒဏ်  ခံစားလိုက်ရသော ဖုန်းပုစီးသည် သွေးတစ်လုတ်ကို အားရပါးရ အန်ထုတ်လိုက်ရာ ဝမ်ချန်း၏ တစ်ကိုယ်လုံးတွင် သွေးများဖြင့် ရွှဲနှစ်သွားတော့သည်။