အခန်း (၁၃) - ဒီလူ ပုံမှန်မဟုတ်ဘူး
ဖေးချောင်၏ အထင်သေးသော အမူအရာကို ကြည့်ကာ ကြိုတင်ခန့်မှန်းထားသည့်နှယ် ဝမ်ချန်း ပြောလိုက်၏။
“မင်းက စွမ်းအားတွေပေးတဲ့ ထူးဆန်းတဲ့ ယဇ်ပလ္လင်တွေအကြောင်းကိုတော့ သိပြီးသားပဲ။ ဒါပေမဲ့ အဲဒါတွေကို ထိတွေ့လို့ဖြစ်လာတဲ့ ဘေးထွက်ဆိုးကျိုးတွေကို ဘယ်လို လျှော့ချရမလဲဆိုတာကိုရော သိလား”
ဖေးချောင် ပြန်မေးလိုက်သည်။
“မင်းရော သိလို့လား”
“မြို့အပြင်ဘက်က မြူခိုးတွေပဲဖြစ်ဖြစ်၊ လူတွေကို စွမ်းအားပေးတဲ့ ထူးဆန်းတဲ့ ယဇ်ပလ္လင်တွေပဲဖြစ်ဖြစ်၊ အဲဒါတွေအားလုံးက ငါတို့ရဲ့ စိတ်အာရုံကို ထိခိုက်စေတယ်။ တစ်နည်းပြောရရင် ငါတို့ရဲ့ စိတ်ကျန်းမာရေးကို ဖျက်ဆီးတာပဲ။ ဒီကိုရောက်လာတဲ့ လူပေါင်းနှစ်သောင်းထဲမှာ စိတ်ပညာနဲ့ စိတ်ကျန်းမာရေးဆိုင်ရာ ကျွမ်းကျင်သူ နှစ်ယောက် ပါလာတယ်ဆိုတာ မင်းသိလား”
ဝမ်ချန်း စကားပြောနေစဉ် ရိုင်ယန်က ရှေ့သို့တက်လာပြီး ထောက်ခံပေးလိုက်၏။
“ဒေါက်တာနော်တန်နဲ့ ပရော်ဖက်ဆာ လီလင်းတို့ဆီကုသမှုခံယူပြီး ငါ့ရောဂါလက္ခဏာတွေက သိသိသာသာ သက်သာလာလာတာ... မနေ့ကဆို တကယ့်ကို အေးအေးချမ်းချမ်းနဲ့ အိပ်ပျော်ခဲ့တယ်။ ဒီကမ္ဘာကို ရောက်လာကတည်းက ဒီလောက်ထိ နှစ်နှစ်ခြိုက်ခြိုက် တစ်ခါမှ မအိပ်ခဲ့ရဖူးဘူး”
ဝမ်ချန်း ဖေးချောင်ကို ကြည့်ကာ ဆက်၍မဲဆွယ်လေတော့သည်။
“ခုဆိုရင် ငါပြောတာကို မင်းနားလည်ပြီမလား။ လူအနည်းငယ်ပဲရှိတဲ့ အဖွဲ့က အဝေးကြီးမသွားနိုင်သလို၊ တစ်ယောက်တည်း သွားနေတာကလည်း အနာဂတ်မရှိဘူး။ ဒေါက်တာနော်တန်နဲ့ ပရော်ဖက်ဆာ လီလင်းတို့ရဲ့ အကူအညီနဲ့ ငါတို့ဖွဲ့စည်းထားတဲ့ အဖွဲ့မှာတော့ ပြည့်စုံတဲ့ စိတ်ပိုင်းဆိုင်ရာ ပံ့ပိုးကူညီမှုအဖွဲ့ ပါဝင်မှာဖြစ်သလို၊ ရိက္ခာပိုင်းဆိုင်ရာ အခက်အခဲတွေကိုလည်း စိတ်ပူစရာမလိုတော့ဘူး။ အဲဒီတော့ မင်း 'အပြန်အလှန် ကူညီရေးအသင်း' ထဲကို ဝင်ဖို့ ဆန္ဒရှိလား”
ဝမ်ချန်းသည် စကားပြောရင်း ဖေးချောင်ကို လက်ကမ်းပေးကာ သူနှင့် လက်ဆွဲနှုတ်ဆက်ရန် စောင့်ဆိုင်းနေခဲ့သည်။ ဝမ်ချန်းသည် ဖေးချောင်ကို စည်းရုံးရန် အခိုင်အမာ ဆုံးဖြတ်ထားခြင်း ဖြစ်၏။ အကယ်၍ ဖေးချောင် ကျောက်ကန်းနှင့် ပြဿနာမတက်ခဲ့လျှင်ပင် ဝမ်ချန်းအနေဖြင့် နည်းလမ်းတစ်ခုခုသုံး၍ ဖေးချောင်ကို အဖွဲ့ထဲခေါ်ရန် စီစဉ်ထားပြီးသား ဖြစ်သည်။
သူ၏အပေါ်ယံ စကားများမှာ လူတိုင်း သူနေရာနှင့်သူ အသုံးဝင်နေမည့်ပုံစံမျိုး ဖြစ်သော်လည်း ဖေးချောင်၏ အရေးပါမှုမှာ ဤမြို့ငယ်လေးတွင် မည်သူနှင့်မျှ မနှိုင်းယှဉ်နိုင်ကြောင်း ဝမ်ချန်း ကောင်းကောင်းသိသည်။ ကိုယ်ခံပညာ စွမ်းရည်မှာ ကဏ္ဍတစ်ခုမျှသာ ဖြစ်သော်လည်း ဖေးချောင်၏ အကြီးမားဆုံး အားသာချက်မှာ ထူးဆန်းသော အရာများအား ခုခံနိုင်စွမ်းနှင့် ခိုင်မာသော စိတ်ဓာတ်ရှိခြင်းပင် ဖြစ်သည်။
ဝမ်ချန်း ကိုယ်တိုင်ပင်လျှင် ဤကမ္ဘာသို့ ရောက်ရှိလာပြီးနောက်ပိုင်း ကောင်းကောင်းမအိပ်စက်နိုင်ခဲ့သော်လည်း၊ ကာရေဘီယံ ပင်လယ်ဓားပြဖြစ်သည့် ဖေးချောင်မှာမူ ညတိုင်း နှစ်နှစ်ခြိုက်ခြိုက် အိပ်ပျော်ကာ နိုးထလာသည့်အခါတွင်လည်း လန်းဆန်းတက်ကြွနေတတ်သည်။
ဒေါက်တာနော်တန်၏ ကောက်ချက်အရ စိတ်ဓာတ်ခိုင်မာမှု မြင့်မားလေလေ၊ ထူးဆန်းသော စွမ်းအားများကို ခံနိုင်ရည်ရှိလေလေဖြစ်ပြီး စွမ်းအားများကို ပိုမိုမြန်ဆန်စွာ ရရှိနိုင်မည် ဖြစ်သည်။ တစ်နည်းအားဖြင့် ဖေးချောင်သည် ယခုလက်ရှိတွင် သန်မာရုံသာမက နောင်တွင်လည်း ပိုမိုသန်မာလာဦးမည်ဖြစ်၏။ ထိုကဲ့သို့သော လူမျိုးကို အစောကတည်းက သူ၏လက်အောက်တွင် ထိန်းချုပ်ထားသင့်သည်ဟု ဝမ်ချန်း ယူဆထားခြင်းဖြစ်သည်။
ဖေးချောင် ကမ်းလှမ်းချက်ကို ချက်ချင်း လက်ခံလိမ့်မည်ဟု ဝမ်ချန်းက ခန့်မှန်းထားသော်လည်း ဖေးချောင်က မျက်မှောင်ကြုတ်ကာ ပြောလိုက်သည်။
“မင်းပြောတာ အဓိပ္ပာယ်တော့ ရှိပါတယ်။ ဒါပေမဲ့ ဘာလုပ်မလဲဆိုတာကတော့ ‘ဆရာဖုန်း’ ရဲ့ ဆုံးဖြတ်ချက်အပေါ်မှာပဲ မူတည်တယ်”
အမှန်စင်စစ် ဖေးချောင်သည် ဝမ်ချန်းအပေါ် အမြင်မကြည်သဖြင့် သူနှင့် မပူးပေါင်းလိုခြင်း ဖြစ်သည်။ ဝမ်ချန်း သူ့ကို လှည့်စားရန် ကြိုးစားနေသည်ဟု အမြဲတမ်း ခံစားနေရသည်။ သို့သော်လည်း ဝမ်ချန်း၏ စကားများမှာ အမှန်တရား အချို့ရှိနေသည်ကိုတော့ သူ ငြင်း၍မရပေ။
ဖေးချောင်သည် ထိုသို့ပြောပြီးနောက် ဖုန်းပုစီးရှိရာသို့ လှည့်ကြည့်လိုက်ရာ နားမလည်နိုင်ဖြစ်သွားခဲ့သည်။ ဝမ်ချန်းလည်း လှည့်ကြည့်လိုက်သောအခါ အံ့သြသွားတော့၏။ မြို့လယ်ရင်ပြင်ရှိ ကျောက်စာတိုင်အနီးတွင် သွေးအလိမ်းလိမ်းနှင့် ဖုန်းပုစီးသည် မြေပြင်ပေါ်၌ ထိုင်နေလေသည်။ သူ၏ ဘယ်ဘက်လက်တွင် ဓားငယ်တစ်ချောင်းကို ကိုင်ထားပြီး ဘဲကင်ကို လှီးဖြတ်ကာ မုန့်ပြားထဲသို့ ထည့်နေ၏။ ဆော့စ်နှင့် ကြက်သွန်မြိတ်များကို ထည့်ပြီးနောက် လိပ်ထားသော ဘဲကင်ကို ပါးစပ်ထဲသို့ ထည့်ကာ အားပါးတရ စားနေလေသည်။
ဘဲကင်ကို စားပြီးနောက် ဘေးနားရှိ အသားပေါက်စီများကို ကောက်ယူစားသောက်ပြန်သည်။ ဖုန်းပုစီး၏ ညာဘက်လက်မောင်းမှာမူ ပြတ်တောက်နေဆဲဖြစ်ပြီး သွေးသားများနှင့် ဖြူဖွေးသော အရိုးများကိုပင် အတိုင်းသား မြင်တွေ့နေရသည်။ ဖုန်းပုစီးသည် [ ကုသခြင်း ] လုပ်ဆောင်ချက်ကို ချက်ချင်း အသုံးမပြုဘဲ [ ရိက္ခာ ] ကဏ္ဍကို ဖွင့်ကာ ချောက်နက်အမှတ် ၂၅ မှတ်တန် [ တော်ဝင်ရိက္ခာ ] နှင့် ၅ မှတ်တန် [ အဝစားရိက္ခာ ] တို့ကို မှာယူလိုက်ခြင်း ဖြစ်၏။
ရရှိလာသော အစားအစာမှာ ကျပန်းဖြစ်ပြီး ဖုန်းပုစီးအတွက်မှာမူ ဘဲကောင်လုံးကင်၊ အသားပေါက်စီ ဆယ်လုံးနှင့် ကိုကာကိုလာ တစ်ပုလင်းတို့ ဖြစ်သည်။ လက်တစ်ဖက် ပြတ်နေသော်လည်း ဖုန်းပုစီး၏ ဘဲကင်စားနေသော လှုပ်ရှားမှုများမှာ အလွန်ပင် လျင်မြန်ချောမွေ့လှ၏။ ကိုကာကိုလာကို အရင်သောက်လိုက်ပြီးနောက် မကြာမီမှာပင် ရိက္ခာအများစုကို စားသောက်ပြီးသွားကာ အသားပေါက်စီ အနည်းငယ်သာ ကျန်တော့သည်။
ဖေးချောင်မှာမူ ဖုန်းပုစီး၏ ထူးဆန်းသော အပြုအမူများကို ယခင်ကတည်းက တွေ့မြင်ဖူးသဖြင့် သိပ်ပြီး အံ့သြမနေတော့ပေ။ ဝမ်ချန်းကမူ ဖုန်းပုစီး၏ လုပ်ရပ်အား လုံးဝ နားမလည်နိုင်အောင် ဖြစ်နေရသည်။ ဤလူသည် ညာလက်တွင် ဒဏ်ရာရထားရုံသာမက နှာခေါင်းနှင့် ပါးစပ်တွင်လည်း သွေးများ ခြောက်ကပ်နေသဖြင့် ပြင်းထန်သော ဒဏ်ရာများ ရထားကြောင်း သိသာလှသည်။ ပုံမှန်လူတစ်ယောက်ဆိုလျှင် ဒဏ်ရာကို အရင်ကုသမည် မဟုတ်ပါလား။
ဝမ်ချန်းက ဖုန်းပုစီးသည် မြူခိုးများကြောင့် စိတ်ပိုင်းဆိုင်ရာ ပြဿနာတစ်ခုခု ဖြစ်နေသည်လား သို့မဟုတ် [ ကုသခြင်း ] အတွက် ချောက်နက်အမှတ် မလုံလောက်ခြင်းကြောင့်လားဟု တွေးတောနေမိသည်။ သို့သော် ချောက်နက်အမှတ် မရှိခဲ့လျှင် အဘယ့်ကြောင့် အမှတ် ၂၅ မှတ် အကုန်အကျခံကာ [ တော်ဝင်ရိက္ခာ ] ကို လဲလှယ်ရသနည်း။ ချောက်နက်အမှတ်များမှာ အလွန်ပင် တန်ဖိုးရှိလှသည်။ ဝမ်ချန်းသည် ဖေးချောင်ကို စည်းရုံးရန်အတွက် အခြေအနေကို အကဲခတ်ကာ သူ၏ ဗျူဟာကို ပြန်လည် ချိန်ညှိနေလိုက်၏။
တစ်ဖက်တွင်မူ ဖုန်းပုစီးသည် ဘဲကင်ကို စားနေဆဲပင် ဖြစ်သည်။ ဘဲကင်စားခြင်းမှာ အပေါ်ယံ သာဖြစ်ပြီး၊ အမှန်တကယ်တွင် သူသည် အစားအစာက သူ၏ ခန္ဓာကိုယ်အပေါ် မည်သို့အကျိုးသက်ရောက်မှု ရှိသည်ကို စမ်းသပ်နေခြင်းပင်။
ဖေးချောင်နှင့် ဝမ်ချန်းတို့ စကားပြောနေသည့် အချိန်အတွင်း သူ စမ်းသပ်မှု အတော်များများကို ပြုလုပ်ပြီးစီးခဲ့ပြီဖြစ်သည်။
[ ကုသခြင်း ] လုပ်ဆောင်ချက်နှင့် ပတ်သက်၍မူ ဖုန်းပုစီးက ၎င်းကို နောက်ဆုံးမှ စမ်းသပ်ရန် ဆုံးဖြတ်ထား၏။ မကြာမီမှာပင် ဖုန်းပုစီး ကျောက်စာတိုင်ကို တစ်ဖန် ပြန်လည်ထိတွေ့လိုက်ပြီး [ သတင်းအချက်အလက် ] ကဏ္ဍကို ဖွင့်လိုက်သည်။
...
[ ကိုယ်ရေးအချက်အလက် ]
အမည် - တာမို
မျိုးနွယ် - လူသားမျိုးနွယ်
ကျင့်ကြံမှုအဆင့် - အဆင့်မသတ်မှတ်ရသေး
ဝိညာဉ်အဆင့် - အဆင့်မသတ်မှတ်ရသေး
ချောက်နက်အမှတ် - ၃၃၈
...
[ ကိုယ်ရေးအချက်အလက် ]
အမည် - ဖုန်းပုစီး
မျိုးနွယ် - လူသားမျိုးနွယ်
ကျင့်ကြံမှုအဆင့် - အဆင့်မသတ်မှတ်ရသေး
ဝိညာဉ်အဆင့် - အဆင့်မသတ်မှတ်ရသေး
ချောက်နက်အမှတ် - ၃၃၈
ဖုန်းပုစီး၏ ထိန်းချုပ်မှုအောက်တွင် [ ကိုယ်ရေးအချက်အလက် ] ရှိ အမည်သည် ဖုန်းပုစီး နှင့် တာမို ဟူ၍ အပြန်အလှန် အဆက်မပြတ် ပြောင်းလဲနေ၏။ သူ၏ အဓိကအသိစိတ်မှာ ဖုန်းပုစီး ဖြစ်နေချိန်တွင် [ ကိုယ်ရေးအချက်အလက် ] ကဏ္ဍ၌ ဖုန်းပုစီး ဟု ဖော်ပြပြီး၊ အဓိက အသိစိတ်ကို တာမို သို့ ပြောင်းလဲလိုက်ချိန်တွင် [ ကိုယ်ရေးအချက်အလက် ] ကဏ္ဍရှိ အမည်သည် တာမို သို့ ပြောင်းလဲသွားခြင်း ဖြစ်သည်။
ဖုန်းပုစီးအတွက်မူ ဤကဲ့သို့ အဓိကအသိစိတ် ပြောင်းလဲခြင်းမှာ လွယ်ကူလှပေသည်၊ အဘယ့်ကြောင့်ဆိုသော် ဖုန်းပုစီး နှင့် တာမို နှစ်ဦးစလုံးမှာ သူကိုယ်တိုင်ပင် ဖြစ်သောကြောင့်ပင်။
"ဒါဆို... အသိစိတ်နှစ်ခုစလုံးက တစ်ချိန်တည်းမှာ သီးခြားစီ ပေါ်လာရင်ကော ဘယ်လိုဖြစ်မလဲ"
မိမိဘာသာ တိုးတိုးရေရွတ်ရင်း ပေါင်းစည်းနေသော သူ၏ အသိစိတ်နှစ်ခုကို သီးခြားစီဖြစ်သွားစေရန် အမြန် ထိန်းချုပ်လိုက်သည်။ အဓိက အသိစိတ်ကို အပြန်အလှန်ပြောင်းလဲခြင်းနှင့် နှိုင်းယှဉ်လျှင် အသိစိတ်နှစ်ခုကို သီးခြားစီဖြစ်အောင် ခွဲထုတ်ခြင်းမှာ ပို၍ ခက်ခဲလှသော်လည်း ဖုန်းပုစီးအတွက်တော့ ပြဿနာမဟုတ်ပေ။ နှစ်မိနစ်ခန့် ကြာပြီးနောက်တွင် ဖုန်းပုစီး၏ အသိစိတ်မှာ စတင်ကွဲထွက်သွားပြီး သူ၏ [ ကိုယ်ရေးအချက်အလက် ] မှာလည်း တစ်ဖန် ပြန်လည်ပြောင်းလဲသွားပြန်သည်။
...
[ ကိုယ်ရေးအချက်အလက် ]
အမည် - ဖုန်းပုစီး နှင့် တာမို
မျိုးနွယ် - လူသားမျိုးနွယ်
ကျင့်ကြံမှုအဆင့် - အဆင့်မသတ်မှတ်ရသေး
ဝိညာဉ်အဆင့် - အဆင့်မသတ်မှတ်ရသေး
ချောက်နက်အမှတ် - ၃၃၈
...
"ဒီ [ ကိုယ်ရေးအချက်အလက် ] က အရမ်းတိုလွန်းတယ်။ ပိုပြီး ပြည့်စုံတဲ့ အချက်အလက်တွေကို ဘယ်မှာ ရှာလို့ရမလဲ မသိဘူး" ဖုန်းပုစီး တိုးတိုးလေး ညည်းတွားလိုက်သည်။
တာမိုက ပြန်လည်ဖြေကြားလိုက်၏။
"အဲ့ဒီအရိပ်ကို မေးကြည့်ရင် ရနိုင်မလား"
ကွဲထွက်နေသော အသိစိတ်နှစ်ခုကို ဆက်လက်ဆွေးနွေးခွင့်မပေးတော့ဘဲ ၎င်းတို့ကို ပြန်လည်ပေါင်းစည်းလိုက်ပြီးနောက် [ ကိုယ်ရေးအချက်အလက် ] ရှိ ချောက်နက်အမှတ်ကို ကြည့်လိုက်သည်။
လွန်ခဲ့သော ခုနစ်ရက်က [ ရှင်သန်ရုံရိက္ခာ ] တစ်ခု လဲလှယ်ပြီးနောက် သူ၏ ချောက်နက်အမှတ်မှာ ၃၂၃ မှတ် ကျန်ရှိခဲ့သည်။ ပြီးနောက် မကြာသေးမီက [ ကိုယ်ရေးအချက်အလက် ] ကို ဖွင့်ကြည့်ချိန်တွင် သူ၏ ချောက်နက်အမှတ်မှာ ၃၉၃ မှတ် ဖြစ်နေသည်။
တစ်နည်းအားဖြင့် သူ မြူခိုးထဲတွင် သတ်ခဲ့သော ဂေါ်ဘလင် လေးကောင်နှင့် ပင့်ကူတစ်ကောင်တို့မှာ သူ့အတွက် ချောက်နက်အမှတ် ၇၀ ပေးခဲ့ခြင်း ဖြစ်သည်။ ယခုအချိန်တွင် သူ့၌ ၃၃၈ မှတ်သာ ကျန်တော့ခြင်းမှာ [ တော်ဝင်ရိက္ခာ ] အတွက် ၂၅ မှတ် နှင့် [ အဝစားရိက္ခာ ] အတွက် ၅ မှတ် အသုံးပြုခဲ့သည့်အပြင်၊ [ အခြေခံကျင့်ကြံမှု အထောက်အကူ ] လဲလှယ်ရန်အတွက် ၂၅ မှတ် သုံးစွဲခဲ့ခြင်းကြောင့် ဖြစ်၏။
အတိအကျဆိုရလျှင် သူသည် ဦးစွာ [ အခြေခံကျင့်ကြံမှု အထောက်အကူ ] ကို လဲလှယ်ခဲ့ပြီးမှ [ တော်ဝင်ရိက္ခာ ] နှင့် [ အဝစားရိက္ခာ ] တို့အတွက် ၃၀ မှတ် ထပ်မံအသုံးပြုခဲ့ခြင်း ဖြစ်သည်။ သူ၏ ဝမ်းဗိုက်အတွင်းမှ ဘဲကင်၏ နွေးထွေးသော အာဟာရဓာတ်များ ခန္ဓာကိုယ်အတွင်းသို့ စိမ့်ဝင်ပျံ့နှံ့သွားသည်ကို ခံစားရင်း ဖုန်းပုစီး ပြုံးလိုက်မိ၏။ ပေးရသည်နှင့် တန်ပေသည်။
[ တော်ဝင်ရိက္ခာ ] အတွက် ချောက်နက်အမှတ် ၂၅ မှတ်ဆိုသည်မှာ ဈေးကြီးပြီး မတွက်ချေကိုက်ဟု ထင်ရသော်လည်း၊ ၎င်းမှာ သာမန်အစားအစာ မဟုတ်ဘဲ ပါဝင်သော အာဟာရဓာတ်များမှာ [ အဝစားရိက္ခာ ] ထက် အဆနှစ်ဆယ်နီးပါး ပိုမိုများပြားလှသည်။