သစ္စာဖောက်ခံ သားတော်မြတ်ရဲ့ ဒုတိယအကြိမ် နိုးထခြင်း

"မင်းတို့ ကိုးကွယ်နေတဲ့ နတ်ဘုရားက တကယ့် နတ်ဆိုး ဖြစ်နေတဲ့အခါ... ငါက ဘာလို့ ကယ်တင်ရှင် လုပ်နေရတော့မှာလဲ" ချင်းယန်ဓားဂိုဏ်း၏ ဂိုဏ်းချုပ်နေရာကို လုယူရန်အတွက် ရှောင်ယန်နှင့် ချင်ဖေးတို့ နှစ်တစ်ထောင်ကြာအောင် အသေအကြေ တိုက်ခိုက်ခဲ့ကြသည်ဆိုခြင်းကိုသာ လောကကြီးက သိထားခဲ့သည်။ သို့သော်... အပြစ်ကင်းစင်ပြီး ဖြူစင်လှပါသည်ဆိုသော ချင်ဖေး၏ မျက်နှာဖုံးအောက်တွင် မည်မျှလောက် ယုတ်မာကောက်ကျစ်ပြီး ရက်စက်ကြမ်းကြုတ်သော အဆိပ်ပြင်းမြွေတစ်ကောင် ပုန်းကွယ်နေသနည်း ဆိုသည်ကိုတော့ ရှောင်ယန် တစ်ယောက်တည်းကသာ အသိဆုံး ဖြစ်ခဲ့သည်။ အကြောင်းရင်းမှာ ထိုပါရမီရှင်လေးဆိုသူသည် နတ်ဆိုးဂိုဏ်းက တိတ်တဆိတ် စေလွှတ်ထားသော သခင်လေး၊ အသွင်ယူထားသည့် သူလျှိုတစ်ယောက် ဖြစ်နေသောကြောင့်ပင်။ ဤအမှန်တရားကို သတိပေး ဖွင့်ဟခဲ့သော်လည်း သူ့ကို ယုံကြည်သူ တစ်ဦးတစ်ယောက်မျှ မရှိခဲ့ချေ။ ဆရာအရင်း၊ မိဘနှစ်ပါး၊ သူမြတ်နိုးရသော ဂျူနီယာညီမလေး၊ ညီမအရင်းနှင့် ဂိုဏ်းတူ ညီအစ်ကို မောင်နှမများ အားလုံးက ရှောင်ယန်ကို ကျောခိုင်းပြီး ချင်ဖေးဘက်၌သာ ရပ်တည်ခဲ့ကြသည်။ ချင်ဖေးအပေါ် မနာလိုဝန်တိုဖြစ်ကာ မဟုတ်မမှန် လုပ်ကြံစွပ်စွဲနေသော လူယုတ်မာအဖြစ် လူတိုင်း၏ ဝိုင်းဝန်း ပြစ်တင်ရှုတ်ချမှုကိုသာ ရှောင်ယန် ခံခဲ့ရသည်။ ချင်ဖေးက သရုပ်ဆောင် လွန်စွာ ကောင်းလွန်းခဲ့သည် မဟုတ်ပါလော။ သနားစရာ နောက်ခံဇာတ်ကြောင်းများ၊ အားနည်းပြီး အနိုင်ကျင့်ခံနေရသည့် ပုံစံများဖြင့် လူအများ၏ သနားစာနာမှုနှင့် အကာအကွယ်ကို သူက အလွယ်တကူ ရယူနိုင်ခဲ့သည်။ ထို့အပြင် သူ၏ "မွေးရာပါ တာအိုခန္ဓာကိုယ်" ကြောင့် လူတိုင်းက သူ့ကို ကောင်းကင်ဘုံက ရွေးချယ်ထားသော "ရွေးချယ်ခံ" တစ်ဦးအဖြစ် ကိုးကွယ်ခဲ့ကြသည်။ ကောင်းပြီလေ... ပြန်လည်မွေးဖွားလာသော ဤဒုတိယဘဝတွင်တော့ သူတို့ကို ကယ်တင်ရန် ရှောင်ယန် လုံးဝ ကြိုးစားတော့မည် မဟုတ်ပေ။ သူတို့ အသက်ပေး ကိုးကွယ်ခဲ့သော ဤ "ရွေးချယ်ခံ" ဆိုသူက ချင်းယန်ဓားဂိုဏ်းကြီးကို သွေးချောင်းစီးအောင် မည်သို့ သတ်ဖြတ်သွားမည်နည်း... လောကတစ်ခွင်ရှိ ကျင့်ကြံသူများ၏ သွေးများကို အသုံးပြုကာ "နတ်ဆိုးချောက်ကမ်းပါး" ၏ အတားအဆီးများကို မည်သို့ ရိုက်ချိုးသွားမည်နည်း... ထို့အပြင် ဤလောကကြီး တစ်ခုလုံးကို နတ်ဆိုးများ သောင်းကျန်းရာ သက်ရှိငရဲဘုံအဖြစ် မည်သို့ ပြောင်းလဲပစ်မည်နည်း ဆိုသည်ကို လောကကြီးတစ်ခုလုံး မျက်စိနှင့်တပ်အပ် မြင်တွေ့သွားစေရန် ဘေးမှနေ၍ လက်ပိုက်ကြည့်နေရန်သာ ရှောင်ယန် ဆုံးဖြတ်လိုက်ပါတော့သည်။