အခန်း ၂၉ - ဂူအောင်းကျင့်ကြံခြင်း မပြုမီ ပြင်ဆင်မှုများ
သုံးရက်ကြာပြီးနောက် ဖုယွမ်ခန်းမ၏ အိမ်နောက်ဖေးဝင်း။
နံနက်စောစော နေရောင်ခြည်သည် ဝင်းအတွင်းသို့ ကျရောက်လာချိန်တွင် လင်းကျိုးသည် အခန်းတံခါးကို တွန်းဖွင့်ကာ ထွက်လာခဲ့သည် သူ၏မျက်နှာတွင် အနည်းငယ် ပင်ပန်းနွမ်းနယ်နေသော အရိပ်အယောင်များ ရှိနေသည်။
ဝင်းအတွင်းရှိ ကျောက်စားပွဲတွင် ဆိုင်ရှင်ချန်နှင့် အခြားနှစ်ဦးမှာ စောင့်ဆိုင်းနေသည်မှာ ကြာပြီဖြစ်သည်။ လင်းကျိုး ထွက်လာသည်ကို မြင်လျှင် ဝမ်ရှီဟဲသည် အရင်ဆုံး ထရပ်လိုက်ပြီး စိုးရိမ်တကြီး မေးလိုက်သည်
"ရောင်ရင်းလင်း ဒီသုံးရက်အတွင်းမှာ"
"ရပါတယ်"
လင်းကျိုးက လက်ကာပြရင်း ကျောက်စားပွဲတွင် ဝင်ထိုင်လိုက်သည်
"ကျွန်တော့်ရဲ့ စိတ်စွမ်းအားတွေ နည်းနည်း ကုန်ဆုံးသွားရုံပါ"
လျိုဝမ်ကျောက်သည် စကားတစ်ခွန်းမျှ မပြောဘဲ နွေးထွေးသော လက်ဖက်ရည်တစ်ခွက်ကို လှမ်းပေးလိုက်သည်။ လင်းကျိုးက ၎င်းကို ယူ၍ တစ်ငုံသောက်လိုက်ပြီးမှ သူတို့သုံးဦးကို မော့ကြည့်လိုက်သည်
"ဟိုဆေးလုံး ဆယ်ပုလင်းကို ရောင်းပြီးပြီလား"
ဝမ်ရှီဟဲသည် အသက်ကို ပြင်းပြင်းရှူလိုက်ပြီး သူ၏ရင်ဘတ်ထဲမှ စာရင်းစာအုပ် အပါးလေးတစ်အုပ်ကို ထုတ်ကာ ရှေ့သို့ တိုးလာပြီး ကမ်းပေးလိုက်သည်
"လွန်ခဲ့တဲ့ သုံးရက်က ရောင်ရင်းလင်း ညွှန်ကြားခဲ့တဲ့အတိုင်း ကျွန်တော်တို့ သီးခြားစီ လှုပ်ရှားခဲ့ကြပါတယ် အဆင့်မြင့်ဆုံး အနှစ်သာရဆေးလုံး ဆယ်ပုလင်းကို ရောင်းဖို့အတွက် ယုံကြည်ရတဲ့ လမ်းကြောင်း ခုနစ်ခုကို ကျွန်တော်တို့ ရှာခဲ့ပြီး တစ်ပုလင်းကို ဝိညာဉ်ကျောက် သုံးရာနှုန်းနဲ့ စျေးသတ်မှတ်ခဲ့တယ်"
သူ ခေတ္တရပ်လိုက်ရာ အသံတွင် မထိန်းချုပ်နိုင်သော စိတ်လှုပ်ရှားမှုများ ပါဝင်နေသည်
"မနေ့ကပဲ အကုန်လုံး ရောင်းကုန်သွားပါပြီ"
လင်းကျိုးသည် စာရင်းစာအုပ်ကို ဖွင့်ကာ စာရင်းများကို ကြည့်လိုက်သည်။ ဆိုင်ရှင်ချန်က ဘေးမှ ဖြည့်ပြောသည်
"စုစုပေါင်း အဆင့်နိမ့် ဝိညာဉ်ကျောက် သုံးသောင်းခြောက်ထောင် ရခဲ့ပါတယ် ရောင်ရင်း လင်း အရင်က သတ်မှတ်ထားတဲ့ စည်းမျဉ်းအရ ကျွန်တော်တို့ သုံးယောက်က အမြတ်ရဲ့ တစ်ဆယ်ရာခိုင်နှုန်းစီ ယူပြီး ကျန်တာကိုတော့ လုပ်ငန်းလည်ပတ်ရေး ရန်ပုံငွေအဖြစ် ထားရှိပါတယ်"
သူ ပြောရင်းနှင့် လင်းကျိုး၏ ရှေ့သို့ သိုလှောင်အိတ် သုံးအိတ်ကို တွန်းပေးလိုက်ပြီး သူ၏အင်္ကျီထဲမှ နောက်ထပ်တစ်အိတ်ကို ထုတ်လိုက်သည်
"ဒီအိတ်သုံးအိတ်ထဲမှာ တစ်အိတ်ကို ဝိညာဉ်ကျောက် သုံးထောင်ခြောက်ရာစီ ပါပါတယ် ဒါက ကျွန်တော်တို့ သုံးယောက်ရဲ့ ဝေစုတွေပါ ဒီအိတ်အကြီးထဲမှာတော့ ကျန်တဲ့ ဝိညာဉ်ကျောက် နှစ်သောင်းရှစ်ရာ ပါပါတယ် မိတ်ဆွေလင်း စစ်ဆေးကြည့်ပါဦး"
လင်းကျိုးက ရေတွက်မနေဘဲ စာရင်းစာအုပ်ကို ပိတ်ကာ စားပွဲပေါ်တွင် အသာအယာ တင်လိုက်သည်
"ကောင်းတယ်"
သူ၏အသံမှာ တည်ငြိမ်လှသည်။
ဝမ်ရှီဟဲ၏ မျက်နှာပေါ်တွင် အပြုံးတစ်ခု ပေါ်လာသည်
"အဲဒီ ဆေးပွဲစားတွေက အစကတော့ ဝေခွဲမရ ဖြစ်နေကြတာ ဒါပေမဲ့ ဆေးလုံးရဲ့ အရည်အသွေးကို စစ်ဆေးပြီးတဲ့နောက်မှာတော့ ပစ္စည်းရဖို့ အလုအယက် ဖြစ်ကုန်ကြတာပဲ အချို့ဆိုရင် နောက်ပိုင်းမှာ ရေရှည် ထောက်ပံ့ပေးနိုင်မလားလို့တောင် မေးနေကြသေးတယ်"
လျိုဝမ်ကျောက်က တိုးညှင်းစွာ ပြောသည်
"အခု စျေးကွက်ထဲမှာ ချန်းယွမ်စျေးကွက်မှာ အဆင့်မြင့်ဆုံး အနှစ်သာရဆေးလုံးတွေ ထွက်နေပြီဆိုတဲ့ ကောလာဟလတွေ ထွက်နေပြီ ဒါပေမဲ့ မိတ်ဆွေလင်းရဲ့ ညွှန်ကြားချက်အတိုင်း ကျွန်တော်တို့က လမ်းကြောင်းအမျိုးမျိုးနဲ့ ခွဲရောင်းခဲ့တာမို့ ဘယ်သူမှ ကျွန်တော်တို့ရဲ့ ခြေရာကို မသိနိုင်ပါဘူး"
လင်းကျိုး ခေါင်းညိတ်လိုက်သည်။ ၎င်းမှာ သူတို့ အရင်က ဆွေးနွေးထားသည့်အတိုင်းခေတ္တမျှ အေးအေးဆေးဆေး နေရန်ပင် ဖြစ်သည်။ လင်းကျိုး အခြေခံအုတ်မြစ် တည်ဆောက်ခြင်း အဆင့်သို့ ရောက်ပြီးမှသာ ချင်းရွှမ်ဆောင်ကို တရားဝင် ထုတ်ဖော်မည် ဖြစ်သည်။ အနည်းဆုံးတော့ ချန်းယွမ် စျေးတွင် မည်သူမျှ သူ့တို့ကို ခြိမ်းခြောက်နိုင်မည် မဟုတ်တော့ပေ။
သူသည် သူ၏အင်္ကျီထဲသို့ လက်နှိုက်ကာ သိုလှောင်အိတ်တစ်အိတ်ကို ထုတ်လိုက်ပြီး အိတ်ဝကို ဖြေကာ သူတို့သုံးဦး၏ အကြည့်အောက်တွင် အိတ်ထဲမှ အရာများကို ကျောက်စားပွဲပေါ်သို့ ဖြည်းဖြည်းချင်း ထုတ်လိုက်သည်။
ကျောက်စိမ်းပုလင်းငယ်လေးများမှာ တစ်လုံးပြီးတစ်လုံး ထွက်ပေါ်လာသည်။ စုစုပေါင်း အဖြူရောင် ကျောက်စိမ်းပုလင်းငယ် တစ်ရာ။
ဝင်းအတွင်းမှာ ချက်ချင်းပင် ထိတ်လန့်စရာကောင်းလောက်အောင် တိတ်ဆိတ်သွားသည်။ ဆိုင်ရှင်ချန်၏ လက်ထဲမှ လက်ဖက်ရည်ခွက်မှာ မြေပြင်ပေါ်သို့ ပြုတ်ကျကာ ကွဲအက်သွားသည်။ သို့သော် သူက ထိုအရာကို လုံးဝ သတိမထားမိဘဲ ကျောက်စိမ်းပုလင်းပုံကြီးကိုသာ စိုက်ကြည့်နေမိပြီး သူ၏နှုတ်ခမ်းများမှာ တုန်ယင်နေကာ သူ၏ မျက်လုံးအိုကြီးများမှာ ပြူးကျယ်နေတော့သည်။
ဝမ်ရှီဟဲ၏ မျက်နှာပေါ်မှ အပြုံးမှာ တောင့်ခဲသွားသည်။ သူသည် မျက်တောင်ခတ်လိုက်ပြီးမှ မျက်လုံးကို ပွတ်လိုက်သည် သူ၏ လက်တစ်ဖက်တည်းမှာ လေထဲတွင် တန့်နေပြီး အချိန်အတော်ကြာအောင် စကားမပြောနိုင် ဖြစ်နေသည်။
လျိုဝမ်ကျောက်သည် သူမ၏ လက်ကလေးဖြင့် ပါးစပ်ကို အုပ်ထားမိသည် သူမ၏ အသက်ရှူသံများ မြန်ဆန်လာပြီး ရင်ဘတ်မှာ နိမ့်ချည်မြင့်ချည် ဖြစ်နေသည်။
"ဒါ... ဒါက" ဆိုင်ရှင်ချန်၏ အသံမှာ အက်ကွဲနေသည်
"ဒီသုံးရက်အတွင်း ဖော်စပ်ထားတာပါ"
လင်းကျိုး၏ လေသံမှာ သာမန်ကိစ္စတစ်ခုကို ပြောနေသကဲ့သို့ အေးစက်လှသည်
"အသုတ်ပေါင်း တစ်ရာ တစ်သုတ်မှာ ဆေးလုံး တစ်ဆယ့်နှစ်လုံးစီပါတော့ စုစုပေါင်း အဆင့်မြင့်ဆုံး အနှစ်သာရဆေးလုံး တစ်ထောင့်နှစ်ရာ ရှိပါတယ်"
"သုံး... သုံးရက်ထဲနဲ့... အသုတ်တစ်ရာလား"
ဝမ်ရှီဟဲသည် နောက်ဆုံးတွင် သူ၏အသံကို ပြန်ရှာတွေ့သွားသော်လည်း စကားကို ချောချောမွေ့မွေ့ မပြောနိုင်သေးပေ
"ရောင်ရင်းလင်း… မင်း... မင်း မအိပ်မနား လုပ်ခဲ့တာလား"
"ဆေးဖော်တဲ့ အခြေအနေထဲကို ရောက်သွားတဲ့အခါ အချိန်ကုန်သွားတာကို မသိလိုက်တော့ဘူး"
လင်းကျိုးက သူ၏ မျက်ခုံးနှစ်ခုကြားကို ပွတ်လိုက်သည်
"စိတ်စွမ်းအားတွေ အများကြီး ကုန်သွားတာပဲ ရှိတာပါ ရက်အနည်းငယ်လောက် အနားယူဖို့ လိုမယ်"
သူက သူတို့သုံးဦးကို ကြည့်လိုက်သည်
"ဒီဆေးလုံးတွေကိုလည်း ခင်ဗျားတို့ပဲ ကိုင်တွယ်ပေးပါ လမ်းကြောင်းအမျိုးမျိုးကို သုံးပါ စျေးနှုန်းကိုလည်း သင့်တော်သလို မြှင့်လို့ရတယ် ပစ္စည်းပြတ်တော့မယ် မြန်မြန်ဝယ်ထားကြလို့ပဲ ပြောလိုက်ပါ"
လျိုဝမ်ကျောက်သည် ရုတ်တရက် ထရပ်လိုက်သည်။ သူမ၏ ရိုးရှင်းသော ဝတ်စုံမှာ နံနက်ခင်း လေပြေထဲတွင် အသာအယာ လွင့်မျောနေပြီး သူမသည် လင်းကျိုးကို အလွန်နိမ့်ကျစွာ ဦးညွှတ် အလေးပြုလိုက်သည်
“နန်းဆောင်သခင်"...
သူမ၏အသံမှာ အနည်းငယ် တုန်ယင်နေသော်လည်း အလွန်ပင် ကြည်လင်လှသည်
"ဝမ်ကျောက်... တကယ်ပဲ စိတ်ရင်းမှန်နဲ့ လေးစားမိပါတယ်"
ဝမ်ရှီဟဲ၏ ခန္ဓာကိုယ်မှာ တုန်ခါသွားသည် သူသည် လျိုဝမ်ကျောက်ကို ကြည့်လိုက်ပြီးမှ လင်းကျိုးကို ကြည့်လိုက်သည် သူသည်လည်း လေးလေးနက်နက် ဦးညွှတ်လိုက်ပြီး အသံမှာ တည်ကြည်လှသည်
"နန်းဆောင်သခင် အဘိုးကြီးဝမ်... လေးစားမိပါတယ်"
ဆိုင်ရှင်ချန်သည် တုန်တုန်ချိချိဖြင့် ထရပ်လိုက်သည် သူ၏ မျက်လုံးအိုကြီးများမှာ နီရဲနေပြီး မျက်မှောင်များ ကြုတ်နေမိသည် သူ၏ နှုတ်ခမ်းများမှာ အကြာကြီး တုန်ယင်နေပြီး နောက်ဆုံးတွင် စကားလုံး နှစ်လုံးကိုသာ ပြောနိုင်တော့သည် "နန်းဆောင်သခင်"
"မိတ်ဆွေလင်း" ကနေ "ရောင်ရင်းလင်း" မှ နန်းဆောင်သခင် ဟူသော ခေါ်ဝေါ်မှုသို့ ပြောင်းလဲသွားသည့် အခေါ်အဝေါ် သုံးခု။
(နောက်အပိုင်းတွေမှာ ခန်းမသခင်လို့ လည်း တစ်ခါတစ်ခါ ခေါ်ပါတယ် :p)
၎င်းမှာ ရည်ရွယ်ချက်ရှိရှိ မြှောက်ပင့်ခြင်း သို့မဟုတ် အသက်ရှင်သန်ရန်အတွက် အပေးအယူလုပ်ခြင်း မဟုတ်ပေ။ ဆေးလုံး ဆယ်ပုလင်းကို လူအများက အလုအယက် ဝယ်ယူကြသည်ကို ကိုယ်တိုင်မြင်တွေ့ခဲ့ရပြီး ဝိညာဉ်ကျောက် သုံးသောင်းခြောက်ထောင်ဟူသော များပြားလှသည့် ပမာဏကို ကိုယ်တိုင်လက်ခံရရှိခဲ့ကာ ယခု ဤဆေးလုံး အပုလင်း တစ်ရာကို ထပ်မံ မြင်တွေ့ရပြီးနောက်တွင် သူတို့၏ နှလုံးသား နက်နဲရာမှ ထွက်ပေါ်လာသည့် အသိအမှတ်ပြုမှုနှင့် လေးစားရိုသေမှုတို့ပင် ဖြစ်သည်။
လင်းကျိုးသည် သူတို့သုံးဦးကို ကြည့်ကာ ခေတ္တမျှ တိတ်ဆိတ်သွားသည်
"ကောင်းပြီ" သူက ခေါင်းအနည်းငယ် ညိတ်ပြရင်း ခေါ်ဝေါ်မှုကို လက်ခံလိုက်သည်
"အားလုံး ထိုင်ကြပါ"
သုံးဦးသား ပြန်လည် ထိုင်လိုက်ကြသော်လည်း သူတို့၏ အနေအထားမှာ ယခင်နှင့် လုံးဝ ခြားနားသွားပြီ ဖြစ်သည်။ ယခင်က ဆက်ဆံရေးတွင် သတိကြီးစွာဖြင့် စမ်းသပ်မှုအချို့ ရှိခဲ့သော်လည်း ယခုမူ အထက်လူကြီးအပေါ် လက်အောက်ငယ်သားများ၏ ရိုသေမှုနှင့် နာခံမှုတို့သာ ရှိတော့သည်။ ကြည်ဖြူစွာဖြင့် သဘာဝကျကျ ဖြစ်ပေါ်လာခြင်းပင်။
လင်းကျိုးသည် သူတို့၏ ဝေစုများပါဝင်သော သိုလှောင်အိတ် သုံးအိတ်ကို သူတို့ထံသို့ ပြန်တွန်းပေးလိုက်သည် "ဒီဝိညာဉ်ကျောက်တွေကို သေသေချာချာ သိမ်းထားပါ ကျင့်ကြံခြင်းလမ်းစဉ်မှာ ချမ်းသာကြွယ်ဝမှု၊ အဖော်အသင်း၊ နည်းစနစ်နဲ့ နောက်ခံ ဒီ သုံးခုထဲမှာ ချမ်းသာကြွယ်ဝမှုက ပထမပဲ ခင်ဗျားတို့ရဲ့ ကျင့်ကြံမှု တိုးတက်လာမှသာ ချင်းရွှမ်နန်းဆောင်အတွက် ပိုပြီး လုပ်ဆောင်ပေးနိုင်မှာ"
ထို့နောက် သူသည် စားပွဲပေါ်ရှိ ကျောက်စိမ်းပုလင်းပုံကြီးကို ညွှန်ပြလိုက်သည်
"ဒီဆေးလုံး အပုလင်း တစ်ရာကို ရောင်းပြီးရင် ရလာတဲ့ ဝိညာဉ်ကျောက်တွေရဲ့ ငါးဆယ်ရာခိုင်နှုန်းကို ဝိညာဉ်ဆေးပင် အမျိုးမျိုး ဝယ်ဖို့ သုံးပါ အထူးသဖြင့် အခြေခံအုတ်မြစ် တည်ဆောက်ရေး ဆေးလုံးအတွက် လိုအပ်တဲ့ အဓိက ပါဝင်ပစ္စည်းတွေကိုပေါ့ သုံးဆယ်ရာခိုင်နှုန်းကိုတော့ ဆေးနည်းတွေ၊ ကျင့်စဉ်တွေနဲ့ မှော်အတတ်တွေ စုဆောင်းဖို့ သုံးပါ အဆင့်အတန်းနဲ့ အမျိုးအစားကို မရွေးပါနဲ့ ကျွန်တော်တို့ဆီမှာ မရှိသေးရင် အကုန်ဝယ်ပါ ကျန်တဲ့ နှစ်ဆယ်ရာခိုင်နှုန်းကိုတော့ လုပ်ငန်းလည်ပတ်ရေး ရန်ပုံငွေအဖြစ် ထားပါ"
ဝမ်ရှီဟဲက လေးလေးနက်နက် ခေါင်းညိတ်သည် "နားလည်ပါပြီ"
လျိုဝမ်ကျောက်က တိုးညှင်းစွာ မေးသည်
"နန်းဆောင်သခင် ကျင့်စဉ်တွေနဲ့ မှော်အတတ်တွေအတွက် ဘာထူးခြားတဲ့ လိုအပ်ချက်တွေ ရှိပါသလဲ"
"အကုန်လုံးပဲ"
လင်းကျိုးက အလွန်ရှင်းလင်းစွာ ပြောလိုက်သည် "ချီသန့်စင်ခြင်း ကျင့်စဉ်တွေ၊ အခြေခံအုတ်မြစ် တည်ဆောက်ခြင်း ကျင့်စဉ်တွေ၊ ခန္ဓာကိုယ် သန့်စင်ခြင်း လျှို့ဝှက်ကျင့်စဉ်တွေ၊ မှော်အတတ်တွေနဲ့ လှုပ်ရှားမှု အတတ်ပညာတွေခွန်အားကို မြှင့်တင်ပေးနိုင်သရွေ့ အကုန်လိုချင်တယ် ချင်းရွှမ်ဆောင် ကြီးထွားလာဖို့အတွက် ကျွန်တော် တစ်ယောက်တည်းကိုပဲ အားကိုးလို့ မရဘူး ခင်ဗျားတို့လည်း တိုးတက်ဖို့ လိုတယ် ခင်ဗျားတို့အတွက်လည်း အမွေအနှစ်တွေ လိုအပ်တယ်"
သူ ခေတ္တရပ်လိုက်ပြီး သူတို့သုံးဦးကို ကြည့်လိုက်သည်
"စီနီယာဝမ်ရဲ့ ဖြတ်တောက်ခံထားရတဲ့ လက်မောင်း၊ အားလုံးရဲ့ ကျင့်ကြံမှု အတားအဆီးတွေ၊ အဲဒါတွေကို ဖြေရှင်းဖို့ နည်းလမ်းတွေကို ကျွန်တော် ရှာဖွေပေးပါ့မယ် ဒါပေမဲ့ အခြေခံအုတ်မြစ် လုံလောက်မှု ရှိဖို့ကတော့ လိုအပ်ချက်ပဲ"
ဆိုင်ရှင်ချန်က ရုတ်တရက် ပြောလိုက်သည်
"နန်းဆောင်အရှင် ကြွက်သားနဲ့ အရိုး ပြန်လည်ဖြစ်ပေါ်စေတဲ့ ဆေးလုံးရဲ့ ဆေးနည်းက ရတနာခန်းမဆောင် ဆိုင်ခွဲရဲ့ စာကြည့်တိုက်မှာ မှတ်တမ်းတင်ထားလောက်တယ်"
((နန်းဆောင်သခင် /နန်းဆောင်အရှင် အလျင်းသင့်သလို ခေါ်ပါတယ် ))
လင်းကျိုးက စကားဖြတ်ပြောလိုက်သည် "အခုက ရတနာခန်းမဆောင်နဲ့ ဆက်သွယ်ရမယ့် အချိန်မဟုတ်သေးဘူး"
သူက သူတို့သုံးဦးကို ကြည့်လိုက်သည်
" ရတနာခန်းမဆောင်မှာ ကျွန်တော်တို့ လိုအပ်တာ အကုန်ရှိတယ် အဆင့်မြင့် ကျင့်စဉ်တွေ၊ ရှားပါး ဆေးနည်းတွေနဲ့ ကောင်းကင်နဲ့ မြေကြီး ရတနာတွေပေါ့"
"ဒါပေမဲ့ အဲဒါတွေကို သူတို့ဆီက ရဖို့ဆိုရင် အရင်ဆုံး ကျွန်တော်တို့ရဲ့ တန်ဖိုးကို သက်သေပြရမယ် ကျွန်တော် အခြေခံအုတ်မြစ် တည်ဆောက်ခြင်း အဆင့်ကို ရောက်ပြီး အခြေခံအုတ်မြစ် တည်ဆောက်ရေး ဆေးလုံးတွေကို ဖော်စပ်နိုင်တဲ့အထိ၊ ချင်းရွှမ်နန်းဆောင်က ကိုယ့်ကိုယ်ကိုယ် ယုံကြည်မှု ရှိလာတဲ့အထိ စောင့်ကြရအောင် ပြီးမှ ဆွေးနွေးကြတာပေါ့"
"အဲဒီအချိန်ကျမှပဲ ကျွန်တော်တို့မှာ အပေးအယူလုပ်နိုင်တဲ့ အရင်းအနှီး ရှိမှာ"
ဝမ်ရှီဟဲသည် သူ၏ လက်တစ်ဖက်တည်းကို လက်သီးဆုပ်လိုက်သည်
"စိတ်ချပါ နန်းဆောင်အရှင် ကျွန်တော်တို့ ဘာလုပ်ရမလဲဆိုတာ သိပါတယ်"
လင်းကျိုးက နူးညံ့စွာ ပြုံးလိုက်သည်
"မလောပါနဲ့ လမ်းကို တစ်လှမ်းချင်း လျှောက်ရမယ် ခင်ဗျားတို့ ဒီသုံးရက်အတွင်းမှာ အများကြီး လုပ်ဆောင်ပေးခဲ့ကြတယ် နောက်ပိုင်းမှာ ပိုပြီးတော့ ကောင်းလာမှာပါ"
"နောက်ပြီးရင် ကျွန်တော် အခြေခံအုတ်မြစ် တည်ဆောက်ခြင်း အဆင့်ကို တက်လှမ်းဖို့အတွက် အချိန်တစ်ခုအထိ ဂူအောင်းကျင့်ကြံတော့မယ်"
လင်းကျိုးသည် ထရပ်လိုက်ပြီး သူတို့သုံးဦးကို ကျောခိုင်းကာ အဝေးသို့ ငေးကြည့်လိုက်သည်
"ဒီအတောအတွင်းမှာ ချင်းရွှမ်နန်းဆောင်ရဲ့ ကိစ္စတွေကို ခင်ဗျားတို့ကိုပဲ အပ်နှံထားခဲ့မယ် ဆေးလုံးတွေကို ဖြည်းဖြည်းချင်း ရောင်းပါ ဝိညာဉ်ဆေးပင်တွေကို ကြိုးကြိုးစားစား စုဆောင်းပါ သတင်းအချက်အလက်တွေကိုလည်း သေသေချာချာ စုံစမ်းပါ"
သုံးဦးသား အတူတူ ထရပ်လိုက်ကြသည်
"နန်းဆောင်အရှင်ရဲ့ ယုံကြည်မှုကို အပျက်ခံမှာ မဟုတ်ပါဘူး"
လင်းကျိုး လှည့်ကြည့်လိုက်ရာ ဝမ်ရှီဟဲ၏ လွတ်နေသော ညာဘက် လက်အင်္ကျီစပေါ်သို့ အကြည့်ရောက်သွားပြီး ခေတ္တရပ်လိုက်သည်
"နောက်တစ်ခါ ဝိညာဉ်ဆေးပင်တွေ စုဆောင်းတဲ့အခါ ရိုးတွင်းခြင်ဆီ သန့်စင်တဲ့မြက် နဲ့ ကျောက်စိမ်းအရိုးပန်း (J တွေကိုလည်း သတိထားကြည့်ပေးပါ"
ဝမ်ရှီဟဲ အံ့သြသွားသည် "ဒါတွေက"
"အရိုးသန်မာစေတဲ့ ဆေးလုံး အတွက် အဓိက ပါဝင်ပစ္စည်းတွေပါ"
လင်းကျိုးက အများကြီး ထပ်မပြောတော့ဘဲ "အရင် စုဆောင်းထားလိုက်ပါ နောက်ပိုင်းမှာ အသုံးဝင်လိမ့်မယ်"
သူသည် ကျောက်စားပွဲဆီသို့ ပြန်လျှောက်သွားပြီး ဆေးလုံး အပုလင်း တစ်ရာကို သိုလှောင်အိတ်ထဲ ပြန်ထည့်ကာ ဝမ်ရှီဟဲထံသို့ ကမ်းပေးလိုက်သည်
"သွားကြတော့"
သုံးဦးသား ဦးညွှတ် အလေးပြုပြီး ထွက်ခွာသွားကြသည်။ ဆိုင်ရှင်ချန်က သူ၏ ဘေးမှ နှစ်ဦးကို တိုးတိုးလေး ပြောလိုက်သည် "ငါတို့... မှန်ကန်တဲ့လူနောက်ကို လိုက်မိတာပဲ"
ဝမ်ရှီဟဲက လေးလေးနက်နက် ခေါင်းညိတ်သည်။ လျိုဝမ်ကျောက်ကတော့ စကားမပြောဘဲ နောက်ကို တစ်ချက် ပြန်ကြည့်လိုက်ပြီးမှ ဝင်းတံခါးကို အသာအယာ ပိတ်လိုက်တော့သည်။