အခန်း ၁- ကျင့်ကြံခြင်းကမ္ဘာသို့ ကူးပြောင်းခြင်းနှင့် အဆတစ်ရာ ရွှေလက်ချောင်း
(မင်္ဂလာပါ ဒါဟာ စာရေးသူရဲ့ ပထမဆုံး စာအုပ်ဖြစ်ပါတယ်။ အမှားအယွင်းများ ရှိခဲ့ရင်လည်း နားလည်ပေးကြဖို့ တောင်းပန်ရင်း စာရေးသူက အားလုံးကို ဒီကနေပဲ တောင်းဆို လိုက်ပါတယ် ဇာတ်လိုက်မှာ အဆတစ်ရာ တိုးပွားတဲ့ ရွှေလက်ချောင်း ပါဝင်ပါတယ်။ ဒီဟာက အရမ်း အစွမ်းထက်ပါတယ်။ သူက အစောပိုင်းမှာ လူမသိအောင် အောင်းနေပြီး နောက်ပိုင်းမှာတော့ အရှိန်အဟုန်နဲ့ တိုးတက်လာမှာပါ။ ဒီစာအုပ်က ဦးနှောက်မဲ့ အစွမ်းပြတဲ့ ဇာတ်လမ်းမျိုး မဟုတ်ပါဘူး။
(ထပ်မံ အသိပေးချက်- အဆတစ်ရာ တိုးပွားသော ကျွမ်းကျင်မှု ဒါကို ပုံမှန်ကျင့်ကြံခြင်း အမြင်နဲ့ ကြည့်လို့မရပါဘူး။ ပုံမှန်ကျင့်ကြံခြင်းမှာ မန္တန်တစ်ခုကို အခြေခံအဆင့်ကနေ ထိပ်ဆုံး အဆင့်ထိ ရောက်ဖို့ အချိန်အများကြီး ယူရပါတယ်။ နားလည်သဘောပေါက်မှုနဲ့ အခွင့်အလမ်း မရှိရင် ပြီးပြည့်စုံခြင်း အဆင့်ကို ရောက်ဖို့ ခက်ခဲလွန်းလို့ ကျင့်ကြံသူတွေက အခြေခံအဆင့် မြှင့်တင်ဖို့ကိုပဲ အချိန်ပေးကြပါတယ်။ ဒါပေမဲ့ ဇာတ်လိုက်မှာက အဆတစ်ရာ တိုးပွားတဲ့ စနစ် ရှိနေတယ် သူက ရက်အနည်းငယ်အတွင်းမှာပဲ မန္တန်တစ်ခုကို အမြင့်ဆုံးအဆင့်ထိ ရောက်အောင် လုပ်နိုင်ပါတယ်။ မန္တန်တွေက အရည်အသွေးပိုင်း ပြောင်းလဲသွားပြီး တိုက်ခိုက်နိုင်စွမ်းကလည်း ဆတိုး တိုးတက်လာမှာပါ။ နယ်ပယ်ကျော်ပြီး ရန်သူကို သတ်ဖြတ်နိုင်တာက ကျိုးကြောင်းဆီလျော် တယ်လို့ပဲ မှတ်ပါ)
အခန်း(၁)
အေးစက်သော မိုးစက်များက သူ၏ မျက်နှာပေါ်သို့ ကျရောက်လာသည်။ လင်းကျိုး မျက်လုံးများ ပွင့်လာခဲ့သည်။
"ငါ့ကို ထရပ်ကားက တိုက်လိုက်တာ မဟုတ်ဘူးလား ဒါဘယ်နေရာလဲ"
သူ့အမြင်အာရုံထဲတွင် မြင်နေရသည်မှာ အိမ်တစ်အိမ်၏ မီးခိုးရောင် အမိုးစွန်းဖြစ်သည်။ လေထုထဲတွင် မှိုနံ့များနှင့် ဆေးဖက်ဝင်အပင်များ၏ ခါးသက်သက်အနံ့များ ပြည့်နှက်နေသည်။
သူသည် ထိုင်နိုင်ရန် လက် ထောက်လိုက်သော်လည်း လေးလံသော တူဖြင့် ထုရိုက်ခံထားရသကဲ့သို့ ခေါင်းက ကိုက်ခဲနေသည်။ စိမ်းသက်သော မှတ်ဉာဏ်အပိုင်းအစများက သူ၏ စိတ်ထဲသို့ အလုံးအရင်းနှင့် တိုးဝင်လာသည်။
ကျင့်ကြံသူ မိသားစုတစ်ခု အသက် ၆ နှစ်တွင် ကျင့်ကြံခြင်းကို စတင်ခဲ့သည်။ အသက် ၁၂ နှစ်တွင် မိသားစုတစ်ခုလုံး သုတ်သင်ပယ်ရှင်းခြင်း ခံရပြီး သူတစ်ဦးတည်းသာ အသက်ရှင်ကျန်ရစ်ခဲ့သည်။
ဓာတ်ကြီးငါးပါး အညံ့စား ဝိညာဉ်အမြစ်။ ၁၈ နှစ်တာ ပင်ပန်းဆင်းရဲစွာ ကျင့်ကြံခဲ့သော်လည်း ချီ သန့်စင်ခြင်း တတိယအဆင့်မှာပဲ တစ်ဆို့နေခဲ့သည်။ ကလဲ့စားချေလိုစိတ် ပြင်းပြလွန်းသဖြင့် ချီ သန့်စင်ခြင်း စတုတ္ထအဆင့်သို့ တက်လှမ်းရန် အတင်းအကျပ် ကြိုးစားခဲ့သော်လည်း ဝိညာဉ်ချီများ ဖောက်ပြန်ပြီး သေဆုံးသွားခဲ့ရခြင်း ဖြစ်သည်။
"ဒါဆို... ငါ ကျင့်ကြံခြင်းကမ္ဘာကို ကူးပြောင်းလာတာပေါ့"
လင်းကျိုးသည် မိမိ၏ လက်များကို ငုံ့ကြည့်လိုက်သည်။
သူ မှတ်မိနေသည်ထက် အသားအရေက ပို၍ နုနယ်သော်လည်း ဓားကျင့်စဉ်ကို ကြာရှည်လေ့ကျင့်ထားသဖြင့် လက်ဆစ်များတွင် အသားမာများ ရှိနေသည်။ ၎င်းတို့သည် အသက် ၂၄ နှစ်အရွယ် ခန္ဓာကိုယ်တစ်ခု၏ သန်မာငယ်ရွယ်သော လက်များဖြစ်သည်။
လင်းကျိုးမှာ အသက် ၃၅ နှစ်ရှိပြီဖြစ်ပြီး အိမ်လခ၊ ကားလခ၊ ကျောင်းလခ၊ မိဘများ၏ ဆေးဖိုးနှင့် အထက်လူကြီး၏ အော်ဟောက်သံများကြားတွင် အသက်ရှုကျပ်နေခဲ့သူဖြစ်သည်။
သူ့လူငယ်ဘဝက ဝက်ဘ်၀တ္ထု များကို စွဲစွဲလန်းလန်း ဖတ်ရှုခဲ့ပြီး ကျင့်ကြံခြင်း ဇာတ်လမ်းများထဲကလို ဓားစီးပျံသန်းကာ ကောင်းကင်နှင့် မြေကြီးကြား လှည့်လည်သွားလာရန် စိတ်ကူးယဉ်ခဲ့ဖူးသည်။
ညနက်သည်အထိ အချိန်ပိုဆင်းပြီး အိမ်အပြန်လမ်းမှာ ထရပ်ကားကြီး တိုက်မိပြီးမှ အခုလို ကူးပြောင်းလာလိမ့်မည်ဟု သူ တစ်ခါမျှ မတွေးခဲ့ဖူးပေ။
"ဘဝဆိုတာ တကယ်ကို ခန့်မှန်းရခက်တာပဲ"
သူသည် ကုတင်ပေါ်မှ ဆင်းရန် ရုန်းကန်လိုက်ပြီး ထောင့်တစ်နေရာရှိ အက်ကွဲနေသော ကြေးမုံပြင်ဆီသို့ ယိုင်တိုင်တိုင် လျှောက်သွားလိုက်သည်။
မှန်ထဲက မျက်နှာမှာ သူနှင့် မရင်းနှီးပေ ထင်ရှားသော မျက်ခုံးတန်းများ၊ တောက်ပသော မျက်လုံးများ၊ ဖြောင့်စင်းသော နှာတံနှင့် ပီပြင်သော ရုပ်ရည်ရှိသည်။ မည်သည့်ခေတ်တွင်မဆို ထင်ပေါ်မည့် ချောမောသော ရုပ်ရည်မျိုးပင်။
သို့သော် သူ၏ အသားအရေမှာ သွေးမရှိသလို ဖြူဖျော့နေပြီး မျက်တွင်းများ ချိုင့်ဝင်ကာ နှုတ်ခမ်းများ ခြောက်ကပ်နေသည်။ သူ၏ မူလစွမ်းအင်များ ပြင်းထန်စွာ ထိခိုက်ထားပုံရသည်။
ရုပ်ရည်သက်သက်ကို ကြည့်မည်ဆိုလျှင် သူသည် ကျင့်ကြံခြင်းလောက၏ အလွန်ချောမောသူပင် ဖြစ်သည်။ အဝတ်အစားများမှာ စုတ်ပြတ်နေသော်လည်း အရပ်အမောင်းက မြင့်ပြီး သွယ်လျသည်။
အလွန် ကျေနပ်စရာကောင်းသည်
"လင်းကျိုး... ငါ့နာမည်ကလည်း လင်းကျိုးပဲ" သူသည် အသံသြသြဖြင့် မိမိကိုယ်ကိုယ် ရေရွတ်လိုက်သည်။
လင်းကျိုးသည် မူလပိုင်ရှင်၏ မှတ်ဉာဏ်များကို ဖြည်းဖြည်းချင်း ပြန်လည်စီစစ်လိုက်သည်။
ဤကမ္ဘာတွင် လင်းကျိုး အသက် ၁၂ နှစ်အရွယ်၌ ဝိညာဉ်ကျောက် တုံးတွင်းငယ်လေး တစ်ခုနှင့် ပတ်သက်သည့် အငြင်းပွားမှုကြောင့် သူ၏ မိသားစုမှာ အုပ်စုများစွာ၏ တိုက်ခိုက်ခြင်းကို ခံခဲ့ရသည်။
သူ့မိဘများက သူ့ကို လွတ်မြောက်စေရန် အသက်ပေး တိုက်ခိုက်ခဲ့ကြသည်။ မသေဆုံးမီ သူတို့က လင်းကျိုး၏ လက်ထဲသို့ အိတ် တစ်လုံး ထည့်ပေးကာ "ဆက်ရှင်သန်ပါ ကလဲ့စား မချေပါနဲ့" ဟု မှာကြားခဲ့သည်။
မိဘများက သူတို့သားအကြောင်းကို တကယ် သိကြသည် ဓာတ်ကြီးငါးပါး အညံ့စား ဝိညာဉ်အမြစ်နှင့် ကျင့်ကြံခြင်း အရှိန်က လိပ်သွားသလို နှေးကွေးလွန်းသည်။ ကျင့်ကြံခြင်း နယ်ပယ်များ၏ အတားအဆီးများကလည်း ကျောက်ဆောင်ကဲ့သို့ ခိုင်မာလှသည်။
မိသားစု၏ အရင်းအမြစ် အထောက်အပံ့များ မရှိဘဲ ချီ သန့်စင်ခြင်း စတုတ္ထအဆင့်သို့ တက်လှမ်းရန်မှာ ကောင်းကင်ဘုံသို့ တက်ရသကဲ့သို့ ခက်ခဲလှသည်။ ထို့ကြောင့်လည်း လွတ်မြောက်လာပြီး ခြောက်နှစ်ကြာ ကျင့်ကြံခဲ့သော်လည်း မူလပိုင်ရှင်မှာ မည်သည့်တိုးတက်မှုမှ မရှိခဲ့ခြင်း ဖြစ်သည်။
အင်အားမရှိဘဲ ကလဲ့စားချေရန်မှာ မဖြစ်နိုင်ပေ။ ရန်သူများထဲတွင် အခြေခံတည်ဆောက်ခြင်း ကျင့်ကြံသူများပင် ရှိနေသည်
သူသည် ရန်သူ၏ တံခါးဝသို့ပင် ဝင်နိုင်မည် မဟုတ်။ ရန်သူ့ဘက်က အဆင့်နိမ့် တပည့်အချို့ကပင် သူ့ကို အလွယ်တကူ သတ်ပစ်နိုင်သည်။
ထွက်ပြေးလာပြီးနောက် လူငယ်လေးသည် အခက်အခဲများစွာကို ဖြတ်သန်းပြီး ဤနေရာသို့ ရောက်ရှိလာခဲ့ခြင်း ဖြစ်သည်။ ၎င်းမှာ ချင်းယန်ဂိုဏ်း၏ လက်အောက်ခံ လွတ်လပ်သော ကျင့်ကြံသူများ ဈေးကွက်ဖြစ်သည့် မြစိမ်းဈေး ဖြစ်သည်။
ဤနေရာတွင် ဝိညာဉ်ချီများ ကျဲပါးပြီး အရင်းအမြစ်များ ရှားပါးသည်။ ၎င်းသည် ကျင့်ကြံခြင်းလောက၏ အနိမ့်ဆုံး ရွှံ့ညွန်တွင်းဖြစ်သည်။
ချင်းယန်ဂိုဏ်းမှာမူ တုံးဟွာစီရင်စု၏ အင်အားကြီးဂိုဏ်း ငါးခုအနက် တစ်ခုဖြစ်သည်။ ဂိုဏ်း၏ ဘိုးဘေးမှာ စိတ်ဝိညာဉ် အဆင့် ကျင့်ကြံသူကြီး ဖြစ်သည်
ရွှေအမြုတေ အဆင့် ဂိုဏ်းခွဲအရှင်များနှင့် အကြီးအကဲ ၁၀ ယောက်ကျော်၊ အခြေခံတည်ဆောက်ခြင်းအဆင့် ကျင့်ကြံသူ ၁၀၀ ကျော် ရှိသည်။ သာမန် အင်အားစုငယ်လေးများ သို့မဟုတ် မိသားစုများသည် ထိုကဲ့သို့သော ဘီလူးကြီးကို မဆန့်ကျင်ရဲကြသလို သူတို့၏ နယ်မြေအတွင်း ပြဿနာရှာရန်လည်း မဝံ့ရဲကြပေ။
မူလပိုင်ရှင်မှာ ကလဲ့စားချေရန် အလွန် စိတ်အားထက်သန်ခဲ့သည်။ လွန်ခဲ့သော သုံးရက်က သူသည် တောတောင်ထဲတွင် တွေ့ရှိခဲ့သော ဒေါသချီ မြက် ကို အန္တရာယ်ကြားမှ စားသုံးခဲ့ပြီး စတုတ္ထအဆင့်သို့ တက်လှမ်းရန် ကြိုးစားခဲ့သည်။ ရလဒ်မှာ ဝိညာဉ်ချီများ ထိန်းချုပ်မရဘဲ ကျင့်စဉ်ဖောက်ပြန်ကာ သေဆုံးသွားခဲ့ခြင်းပင်…
ထို့နောက်တွင်မှ ခေတ်သစ် ဘဝဒဏ်ကို ခံခဲ့ရသော လင်းကျိုး၏ ဝိညာဉ်က ကူးပြောင်းလာခဲ့ခြင်းဖြစ်သည်။
"ဒါက တကယ့်ကို... စုတ်ပြတ်သတ်နေတဲ့ ဇာတ်ညွှန်းပဲ" လင်းကျိုးက ခါးသီးစွာ ပြုံးရင်း နားထင်ကို ပွတ်လိုက်သည်။
"ဘာပဲဖြစ်ဖြစ် ငါ ဒီကို ရောက်နေပြီဆိုတော့ ဒါဟာ ငါ့ကျင့်ကြံခြင်း ကမ္ဘာပဲ"
သူသည် အခန်းထဲကို ဝေ့ကြည့်လိုက်သည်။ အခန်းနှစ်ခန်းသာ ရှိသည်။ တစ်ခန်းမှာ စတုရန်းမီတာ ၂၀ ပင် မပြည့်သော သစ်သားတဲအိုဖြစ်ပြီး သစ်သားစားပွဲ၊ သစ်သားကုတင်နှင့် ထောင့်တစ်နေရာတွင် ရှုပ်ပွနေသော မန္တန်စက္ကူပုံများ ရှိသည်။ ကျန်တစ်ခန်းမှာ ရိုးရှင်းသော မီးဖိုချောင် ဖြစ်သည်။
ဒါပါပဲ တကယ့်ကို အခြေခံကျလွန်းသည်။
လင်းကျိုးသည် မူလပိုင်ရှင်၏ မှတ်ဉာဏ်များကို ရှာဖွေကြည့်ရာ-
ချီ သန့်စင်ခြင်း တတိယအဆင့် ကျင့်ကြံမှု။
၁၀ ကုဗမီတာရှိသော သိုလှောင်အိတ် ထဲတွင် အဆင့်နိမ့် ဝိညာဉ်ကျောက် ၁ တုံး၊ အဆင့်နိမ့် အစာငတ်ခံဆေး ၄ လုံး၊ မန္တန်စက္ကူ ၆၃ ချပ်၊ မန္တန်ရေးစုတ်တံ တစ်ခု၊ ဝိညာဉ်မင်ရည် တစ်ဝက်၊ ကျင့်စဉ်တစ်ခု၊ ဓားသိုင်းတစ်ခု၊ အခြေခံမန္တန်ကျမ်းတစ်စောင်နှင့် အဆင့်လတ် မှော်ဓားတစ်လက် တို့ ရှိသည်။
ကျင့်စဉ်မှာ တောက်လောင်သောမီးကျင့်စဉ် ဖြစ်ပြီး အခြေခံတည်ဆောက်ခြင်း အဆင့်အထိ ကျင့်ကြံနိုင်သည်။ ဓားသိုင်းမှာ ကြက်သွေးရောင်နေမင်းဓားသိုင်း ဖြစ်သည်။
ထို့အပြင် သူ့မိဘများက သူ့အတွက် ရွေးချယ်ပေးခဲ့သော မန္တန်များမှာ- မီးလုံးမန္တန်၊ ပေါ့ပါးသောကိုယ်ဟန်မန္တန်၊ လေစီးခြင်းမန္တန်၊ အရာဝတ္ထုထိန်းချုပ်မန္တန်၊ ရွှေကိုယ်ထည်မန္တန် နှင့် ဝိညာဉ်ကြံ့ခြေလှမ်း တို့ ဖြစ်ကြသည်။ မိဘများ၏ မေတ္တာမှာ တကယ့်ကို သနားစရာကောင်းလှသည်။
လွန်ခဲ့သော နှစ်များအတွင်း မူလပိုင်ရှင်သည် မိဘများ ပေးခဲ့သော အရင်းအမြစ်နှင့် ဝိညာဉ်ကျောက်များကို ကုန်သလောက် သုံးစွဲခဲ့ပြီး ၂ တုံးသာ ကျန်တော့သည်။ သူက ကျင့်ကြံရန် မဝင်မီ ဝိညာဉ်ကျောက် ၁ တုံးဖြင့် အစာငတ်ခံဆေး ၅ လုံး ဝယ်ယူခဲ့သည်။
မြစိမ်းဈေးကွက်တွင် အဆင့်နိမ့် ဝိညာဉ်ကျောက် ၁ တုံး၏ တန်ဖိုးမှာ ယခင်ကမ္ဘာက ၁၀ ဒေါ်လာခန့်နှင့် ညီမျှသည်။ အခု သူက ကျင့်ကြံမှု တိုးတက်အောင် လုပ်ရမည့်အပြင် ရှေ့လအတွက် ဂူဗိမာန် ငှားရမ်းခ ဝိညာဉ်ကျောက် ၅ တုံးကိုလည်း ရှာရပေဦးမည်။
အကယ်၍ သူ မပေးနိုင်ပါက နှင်ထုတ်ခံရမည်ဖြစ်သည်။ သူ၏ လက်ရှိ အားနည်းသော အစွမ်းနှင့် အပြင်ထွက်ခြင်းမှာ အလွန် အန္တရာယ်များသည်။ သုံးရက်ထက် ပိုခံမည်မဟုတ်ပေ။
သို့သော် တစ်ဖက်တွင်လည်း ကျင့်ကြံခြင်းကမ္ဘာသို့ ကူးပြောင်းလာရသဖြင့် လင်းကျိုးမှာ စိတ်လှုပ်ရှားနေမိသည်။ မိုးကုတ်စက်ဝိုင်းအထိ မြင့်မားကာ တိမ်ဖုံးနေသော နတ်ဘုရားတောင်တန်းများ၊ တောက်ပသော နန်းတော်များနှင့် လှပသော နတ်သမီးလေးများကို သူ တွေ့မြင်ချင်နေသည်။
လင်းကျိုးသည် လွင့်ပျံ့နေသော အတွေးများကို ပြန်စုစည်းပြီး တင်ပျဉ်ခွေ ထိုင်လိုက်သည်။ မှတ်ဉာဏ်များအတိုင်း တောက်လောင်သောမီးကျင့်စဉ် ကို လည်ပတ်စေပြီး လေထုထဲမှ ဝိညာဉ်ချီများကို စုပ်ယူသန့်စင်လိုက်သည်။
မီးဓာတ်ပါသော ဝိညာဉ်ချီများက သူ၏ ခန္ဓာကိုယ်ထဲသို့ ဝင်ရောက်လာပြီး ဒန်တျန် ထဲတွင် အနည်ထိုင်သွားသည်။ အညစ်အကြေးများကို ဖယ်ရှားပြီး စင်ကြယ်သော ဝိညာဉ်ချီများအဖြစ် ပြောင်းလဲသွားသည်။
ထို့နောက် သူသည် ပင့်ကူမျှင်ကဲ့သို့ သေးသွယ်သော ဝိညာဉ်ချီမျှင်လေးကို ဒန်တျန်ထဲမှ ထုတ်ယူပြီး သွေးကြောများတစ်လျှောက် လည်ပတ်စေခဲ့သည်။ ဝိညာဉ်ချီများ ဖြတ်သန်းသွားသည့်နေရာတိုင်းတွင် ပိတ်ဆို့နေသော သွေးကြောများမှာ တဖြည်းဖြည်း ကျယ်ပြန့်လာပြီး သန်မာလာသည်။ ၎င်းက ခန္ဓာကိုယ်ထဲမှ အညစ်အကြေးများကိုလည်း ဆေးကြောပေးသဖြင့် အသားအရေမှာ နွေးထွေးချောမွေ့လာသည်။
ဤကျင့်ကြံခြင်း လုပ်ငန်းစဉ်တစ်ခုလုံးမှာ အလွန်နှေးကွေးပြီး လိပ်သွားသလိုပင်။ စက်ဝန်းတစ်ခု ပြည့်ရန် ၆ နာရီခန့် ကြာမြင့်သည်။ ဤနှုန်းအတိုင်းဆိုလျှင် အခြေခံတည်ဆောက်ခြင်းအဆင့်သို့ မည်သည့်အခါမှ ရောက်နိုင်မည်နည်း
ရုတ်တရက် သူ တောင့်ခဲသွားသည်။ သူ၏ စိတ်ထဲတွင် တစ်ဝက်တစ်ပျက် မြင်နေရသော စာသားအချို့ ပေါ်လာသည်-
တောက်လောင်သောမီးကျင့်စဉ် ကျွမ်းကျင်မှု +၁၀၀
တောက်လောင်သောမီးကျင့်စဉ် (အခြေခံအဆင့် ၂၃/၁၀ → ကျွမ်းကျင်အဆင့်: ၂၃/၁၀၀၀)
ချီ သန့်စင်ခြင်း တတိယအဆင့် (၃၀/၃၀၀) → ချီ သန့်စင်ခြင်း စတုတ္ထအဆင့် (၁/၆၀၀)
"ဒါက... ငါ့ရဲ့ ရွှေလက်ချောင်း လား" လင်းကျိုး၏ နှလုံးခုန်သံ မြန်လာသည်။
သူ ဆက်မတွေးနိုင်ခင်မှာပင် ခန္ဓာကိုယ်ထဲမှ "ဖောက်" ခနဲ အသံတစ်ခု ထွက်ပေါ်လာသည်။
ဒန်တျန်ထဲတွင် လှိုင်းထနေသော ဝိညာဉ်ချီများမှာ အတားအဆီးတစ်ခုကို ချိုးဖျက်လိုက်သလို တုန်ခါသွားသည်။ သွေးကြောများမှာ ဝိညာဉ်ချီများကြောင့် ကျယ်ပြန့်သွားပြီး နွေးထွေးသော စီးကြောင်းတစ်ခုက လေပြေကဲ့သို့ လျင်မြန်စွာ စီးဆင်းသွားသည်။
သူ၏ ဒန်တျန်မှာလည်း ၃ မှ ၆ အထိ ကျယ်ပြန့်လာသည်။ ဝိညာဉ်ချီများမှာ ပိုမိုသိပ်သည်းလာပြီး တည်ငြိမ်သော ဝဲဂယက် တစ်ခုအဖြစ် လည်ပတ်နေသည်။ တစ်ချိန်တည်းမှာပင် အေးမြသော ချီစီးကြောင်းတစ်ခုက မျက်ခုံးနှစ်ခုကြားသို့ ပြေးတက်သွားသည်။
သူ၏ ဝိညာဉ်ပင်လယ် မှာ ရုတ်တရက် ပွင့်လင်းသွားခဲ့သည်။
မျက်လုံး၊ နား၊ နှာခေါင်းတို့အပေါ် မမှီခိုဘဲ ပတ်ဝန်းကျင် သုံးပေအတွင်းရှိ အရာအားလုံးကို ရှင်းလင်းစွာ မြင်နိုင်သော အာရုံတစ်ခု ပေါ်ပေါက်လာသည်- စားပွဲပေါ်ရှိ သစ်သားအကြောင်းအရာများ၊ ပြတင်းပေါက်အပြင်က ပိုးကောင်လေး၏ တောင်ပံခတ်သံ၊ ထောင့်က ပုရွက်ဆိတ်လေး သွားလာနေသံနှင့် လေထဲမှာ လွင့်နေတဲ့ ဖုန်မှုန့်လေးတွေအထိ အသေးစိတ် သိမြင်နေရသည်။
ဝိညာဉ်အာရုံ
တောက်လောင်သောမီးကျင့်စဉ် ၏ ကျွမ်းကျင်အဆင့်နှင့် ပတ်သက်သော နားလည်သဘောပေါက်မှုများက သူ့ဦးနှောက်ထဲသို့ တိုးဝင်လာသည်။
လင်းကျိုးသည် မထိန်းနိုင်ဘဲ ပြုံးပျော်သွားတော့သည်။