အခန်း(၄၄)  - ရောက်ရှိခြင်း

နောက်တစ်နေ့

လသစ်တစ်ခု စတင်ခဲ့ပြီ။

ဇွန်လသည် တိတ်ဆိတ်သော ပြောင်းလဲခြင်း၏ အရိပ်အယောင်များနှင့်အတူ ရောက်ရှိလာခဲ့သည်။

လေထုထဲတွင် စိတ်လှုပ်ရှားမှုများ ပျံ့လွင့်နေဆဲပင်။

တံတိုင်းဆောက်လုပ်ရေးသည် အရှိန်အဟုန်ဖြင့် ဆက်လက်လုပ်ဆောင်နေပြီး လူတိုင်းမှာ တက်ကြွလန်းဆန်းနေကြသည်။

မေ့လျော့လုနီးပါးဖြစ်နေသော ကတိတစ်ခုကို အမှတ်ရလိုက်သဖြင့် လူစီယန်သည် အခြေခံမှော်ပညာဆိုင်ရာ မှတ်စုများကို ပေးဝေရန် အချိန်ပေးလိုက်သည်။

ဆီဆီးလ်၊ လက်မှုပညာဌာနခွဲနှင့် ရေခဲစွမ်းအားကို နိုးထစေခဲ့သော ဆီဘတ်စ်တို့ဆီသို့။

သူသည် ထိုသုံးဦးကို ခေါ်လိုက်သည်။

ဆီဘတ်စ်၊ ဆီဆီးလ်၊ အဲလ်ခ်။

ပြီးနောက် မှတ်စုများကို သူကိုယ်တိုင် ပေးအပ်လိုက်သည်။

သူတို့၏ မျက်လုံးများတွင် ကျေးဇူးတင်ခြင်းများ ထွက်ပေါ်လာသည်။

အထူးသဖြင့် ဆီဘတ်စ်သည် သူ့အတွင်းတွင် တစ်စုံတစ်ခု တောက်လောင်လာသကဲ့သို့ပင်။ သန္နိဋ္ဌာန်အသစ်တစ်ခုသည် သူ၏ရင်ဘတ်ထဲတွင် လောင်ကျွမ်းနေသည်။

သူသည် လူစီယန်အတွက် ပိုမိုသန်မာလာချင်သည်။

သူခံစားမိသည်။ သူသည် အဆင့် (၇) သို့ ရောက်ခါနီးနေပြီ။

ထိုအလုပ်ပြီးသောအခါ လူစီယန်သည် သူတို့ကို အလုပ်ဆက်လုပ်ရန် ထားခဲ့ပြီး အထူးသီးနှံများရှိရာသို့ တိတ်တဆိတ် သွားရောက်ခဲ့သည်။

ထိုနေရာတွင် အခြားအံ့သြဖွယ်တစ်ခုက သူ့ကို စောင့်ကြိုနေသည်။

အပင်များသည် ပန်းတံများ ထွက်လာခဲ့သည်။

နှစ်နှစ်ခံပင်များဖြစ်သော မုန်လာဥနီများတွင်ပင် ပန်းပွင့်များ ထွက်နေနှင့်ပြီ။ မျှော်လင့်မထားသော်လည်း ကြိုဆိုရမည့်အရာပင်။

အနီးအနားတွင် သူမြှုပ်ထားသော မြေဆီလွှာပုံဆောင်ခဲတုံးများနှင့် ပတ်သက်မှုရှိမည်ဟု သူသံသယရှိသည်။ ထိုအရာများသည် သီးနှံများအပေါ် ပြင်းထန်သော အကျိုးသက်ရောက်မှု ရှိနေခြင်းမှာ ထင်ရှားသည်။

ပန်းပွင့်များသည် မည်သည့်အချိန်တွင်မဆို ပွင့်တော့မည့်ပုံပင်။

သို့သော် လူစီယန်၏မျက်ခုံးများမှာ စိုးရိမ်စိတ်ဖြင့် တွန့်ချိုးသွားသည်။

ဝတ်မှုန်ကူးခြင်း။

သီးနှံများ၏ သဘာဝကြောင့် ပျားများက ကပ်၍မရပေ။ ၎င်းသည် ပြဿနာတစ်ခုဖြစ်လာသည်။

လူစီယန်သည် လက်ပိုက်ပြီး ယိမ်းထိုးနေသော ပန်းပွင့်များကို စိုက်ကြည့်နေသည်။

"နောက်မှပဲ ဖြေရှင်းတော့မယ်" ဟု သူရေရွတ်ရင်း လှည့်ထွက်လာခဲ့သည်။

လူစီယန်သည် သီးနှံများနှင့်ပတ်သက်သည့် စိုးရိမ်စိတ်များကို ခေတ္တဘေးဖယ်ထားပြီး ပို၍အရေးတကြီးကိစ္စကို အာရုံစိုက်ရန် ဆုံးဖြတ်လိုက်သည်။

ရေခဲမှော်ပညာ လေ့ကျင့်ခြင်း။

သူသည် မှော်စွမ်းအား သုံးရသည့် လုပ်ငန်းစဉ်ကို နှစ်သက်လာသည်။

ကြိုးစားတိုင်း သူကိုယ်တိုင် ပိုမိုသန်မာလာသည်ကို ရုပ်ပိုင်းဆိုင်ရာအရ ခံစားရသကဲ့သို့ မှော်တစ်ခုစီ သုံးတိုင်းတွင် ရင်ခုန်စရာကောင်းသော ခံစားချက်ကို ရရှိသည်။ 

ပြီးပြည့်စုံ‌ေသာတွက်ချက်မှု ကွယ်ပျောက်သွားသော်လည်း အရေးမကြီးတော့ပါ။ သူသည် တိုးတက်မှုဆက်လုပ်ရန်အတွက် လိုအပ်သော မြင့်မြတ်စွမ်းအင်ကို ထိန်းချုပ်နိုင်စွမ်း ရရှိထားပြီးဖြစ်သည်။

အချိန်အတန်ကြာပြီးနောက် သူသည် မှော်စွမ်းအားအသစ်များကို စမ်းသပ်ရန် ဒန်ဂျန်ထဲသို့ ဝင်ရောက်ခဲ့သည်။

ဒြပ်စင်မှော်ပညာသည် စလိုင်းများကို တိုက်ခိုက်ရာတွင် အထူးထိရောက်ကြောင်း တွေ့ရှိရသည်။

သူသည် သက်တန့်ရောင်စလိုင်းဘောစ် ကို အနိုင်ယူစဉ်ကပင် ဒြပ်စင်တိုက်ခိုက်မှုများသည် ဤသတ္တဝါများကို ကိုင်တွယ်ရန် ယုံကြည်စိတ်ချရသော နည်းလမ်းဖြစ်ကြောင်း သတိပြုမိခဲ့သည်။

ယခု ဒန်ဂျန်၏ ဒုတိယထပ်တွင် လူစီယန်သည် သူ၏စွမ်းရည်များကို စမ်းသပ်ရန် ရည်ရွယ်သည်။

သူသည် အခြေခံ ရေခဲအပ်မှော်ကို သုံးလိုက်သည်။ ၎င်းသည် စုစည်းထားသော ရေခဲဒုံးပျံဖြစ်သည်။

သူသည် ရန်သူကို ပစ်မှတ်ထားပြီး ပစ်လိုက်သည်။

သို့သော် ပစ်မှတ်ရွေ့လျားနေပါက တိကျစွာထိမှန်ရန် ခက်ခဲကြောင်း သူချက်ချင်းသဘောပေါက်လိုက်သည်။ ထိုမှော်သည် ထိရောက်သော်လည်း သူမျှော်လင့်ထားသလောက် ယုံကြည်စိတ်ချရမှုမရှိပေ။

အခြားတစ်ဖက်တွင်မူ မီးလုံး သည် ဤအခြေအနေများတွင် ပို၍အသုံးဝင်သည်။ ကြီးမားသော မီးလုံးသည် စေးကပ်နေသော စလိုင်းများကို အရည်ပျော်စေပြီး မာနာအူတိုင်များကိုသာ ကျန်ရစ်စေသည်။

မီးလုံး၏ ထိရောက်မှုမှာ မီးမှော်ကြောင့်လား သို့မဟုတ် သူ၏ မီးလုံးထဲတွင် မြင့်မြတ် စွမ်းအင်များ ပေါင်းစပ်ထားသောကြောင့်လားဆိုသည်ကို လူစီယန် မပြောနိုင်ပေ။

လူစီယန်သည် လေ့ကျင့်နေဆဲဖြစ်ပြီး ဒန်ဂျန်ထဲတွင် တစ်ဖန်ပြန်၍ တိုက်ခိုက်မှုများ ပြုလုပ်နေစဉ် ရုတ်တရက် ခံစားလိုက်ရသည်...

သူ၏အူတိုင်ထဲတွင် သိမ်းဆည်းထားသော နတ်စွမ်းအင်များ နည်းပါးလာပြီ။

သူ စိုးရိမ်မနေပါ။ အချိန်နှင့်အမျှ သဘာဝအတိုင်း ပြန်လည်ပြည့်ဝလာမည်ဖြစ်ပြီး ပျားရည်နှင့် အခြားရရှိလာသော ပစ္စည်းများသည် ပြန်လည်ဖြည့်တင်းမှုကို မြန်ဆန်စေနိုင်သည်။

သို့တိုင် အကုန်မခမ်းနားမီ သူရပ်တန့်လိုက်သည်။

ထိုအချိန်တွင် သူသည် အဆင့်သေး (၂၉) သို့ ရောက်ရှိခဲ့သည်။

သူ၏ မာနာအူတိုင်စုဆောင်းမှုသည် သိသိသာသာ တိုးတက်လာသည်... အဆင့်အနိမ့်ဆုံး မာနာအူတိုင် ၁၂,၀၀၀ ကျော်နှင့် အဆင့်နိမ့် ၇ ခုသည် သူ၏ သိုလှောင်နေရာထဲတွင် ရှိနေပြီ။

ဒုတိယထပ်ရှိ စလိုင်းများသည်လည်း အဆင့်အနိမ့်ဆုံး မာနာအူတိုင်များကိုပင် ကျစေသည်။

သို့သော် သူစိတ်ပျက်မိသည်မှာ ပထမထပ်ရှိ စလိုင်းများထံမှ ဒဏ္ဍာရီလာပစ္စည်းများ မရရှိခြင်းပင်... သတ်ဖြတ်မှု ၁၀,၀၀၀ ကျော်ပြီးနောက်တွင်ပင်။

ဘော့စ်များ သို့မဟုတ် အဆင့်မြင့် မွန်းစတားများသာ ဒဏ္ဍာရီလာပစ္စည်းများ ကျရန် အခွင့်အရေးရှိပုံရသည်။

သို့သော်လည်း အလုံးစုံ ဆုံးရှုံးမှုတော့ မဟုတ်ပေ။

သူသည် အဆင့်မြင့် အထူးရှားပါး ပစ္စည်းအချို့ကို စုဆောင်းနိုင်ခဲ့သည် နှင့် ဂျယ်လီကာကွယ်ဒိုင်းနှင့်ကပ်အားမြင့် ဘွတ်ဖိနပ် များဖြစ်သည်။

နှစ်ခုစလုံးသည် တိုက်ပွဲတွင် ခိုင်မာသော အသုံးဝင်မှုရှိသည်။

—သိုလှောင်နေရာ—

ပိုင်ဆိုင်မှုများ:

• အဆင့်နိမ့် မာနာအူတိုင် ၇ ခု

• အဆင့်အနိမ့်ဆုံး မာနာအူတိုင် ၁၂,၃၄၅ ခု

• ရွှေဒင်္ဂါး ၁,၆၉၇ ခု (ရွှေ ၁ ခု = ငွေ ၁၀ ခု/ကြေး ၁၀၀ ခု)

• ငွေဒင်္ဂါး ၅ ခု (ငွေ ၁ ခု = ကြေး ၁၀ ခု)

• ကြေးဒင်္ဂါး ၂ ခု

...

•••

နေ့လယ်ခန့်

အဝေးတွင် ကြီးမားသော လှည်းတန်းတစ်ခုသည် တောအုပ်ထဲမှ ဖြည်းဖြည်းချင်း ထွက်ပေါ်လာသည်။

လူတိုင်း အဝေးသို့ လှည့်ကြည့်လိုက်သဖြင့် ဆောက်လုပ်ရေးလုပ်ငန်းမှာ ရပ်တန့်သွားသည်။

၎င်းမှာ... အခွန်ကောက် လှည်းတန်းဖြစ်သည်။

"သူတို့ နောက်ဆုံးတော့ ရောက်လာပြီ" ဟု တစ်ယောက်ယောက်က ရေရွတ်သည်။

စုစုပေါင်း လှည်း ၁၀ စီးခန့်ရှိပြီး ၎င်းတို့ သယ်ဆောင်လာသည့်အရာများကြောင့် ဘီးများမှာ တကျွိကျွိ မြည်နေသည်။

၎င်းတို့ကြားတွင် ရင်းနှီးသော မျက်နှာတစ်ခုရှိသည်။

ကေးလ်။

သူသည် အစောင့်များနှင့်အတူ ပျော်ရွှင်စွာ စကားပြောနေပြီး နှစ်ပေါင်းများစွာကတည်းက သိကျွမ်းနေသကဲ့သို့ ရယ်မောနေသည်။

နောက်ဆုံးတော့။

လူတိုင်း အဖွဲ့ကို ကြိုဆိုရန် ရွေ့လျားသွားကြသည်။

သို့သော် အသစ်ရောက်လာသူများမှာ သူတို့မြင်လိုက်ရသည့်အရာကြောင့် အံ့အားသင့်ကာ ရပ်တန့်သွားကြသည်။

လုဒ်ဝဲလ် ၏ ကြီးမားသော တံတိုင်းသည် အဝေးတွင် မတ်မတ်ကြီး ရှိနေသည်။

ခန့်ညားသော။

ခိုင်ခံ့သော။

သူတို့ မှတ်မိထားသော ရိုးရှင်းသည့်နေရာနှင့် လုံးဝမတူတော့။

အချို့ဆိုလျှင် လမ်းမှားလာမိပြီလားဟုပင် တွေးတောမိကြသည်။

ကေးလ်သည် သူတို့၏ တည်နေရာကို အတည်ပြုရန် အာကာသ မှော်ကို ချက်ချင်းသုံးလိုက်သည်။

"ဒါက လုဒ်ဝဲလ် အသေအချာပဲ" ဟု သူက အခြားသူများကို အာမခံလိုက်သည်။

သို့သော် သူကိုယ်တိုင်ပင် အံ့အားသင့်စွာဖြင့် ပတ်ဝန်းကျင်ကို ကြည့်နေပြီး လုဒ်ဝဲလ် မည်မျှ ပြောင်းလဲသွားသည်ကို ထိတ်လန့်နေပုံရသည်။

လုဒ်ဝဲလ်၏ ပြောင်းလဲမှုကိုပင် အပြည့်အဝ မယုံကြည်နိုင်သေးခင်မှာပင် အသက်အရွယ်ကြီးရင့်ပြီး အမိန့်ပေးသည့် အသံတစ်ခုက လေထုထဲတွင် ပေါ်ထွက်လာသည်။

မက်ဆင် ရှေ့သို့ တိုးလာသည်။

"မင်းတို့ရဲ့ ယဉ်ကျေးမှုတွေက ဘယ်ရောက်ကုန်တာလဲ။ ငါတို့ ဒီမှာ အလုပ်လုပ်နေတာ မမြင်ဘူးလား? လှည်းတွေကို ဟိုဘက်မှာ ရပ်ပြီး ပြန်လာပြီး ကူညီကြစမ်း!" ဟု သူသည် အစောင့်များကို တုံ့ဆိုင်းခြင်းမရှိဘဲ အော်ဟစ်လိုက်သည်။

ထိုအချိန်တွင် မက်ဆင်သည် လှည်းတန်း၏ အဓိကရည်ရွယ်ချက်ကို လုံးဝမေ့သွားပုံရသည်။

အခွန်ကောက်ရန်။

သို့သော် မည်သူမျှ သူ့ကို မမေးခွန်းထုတ်ရဲကြ။

အစောင့်များသည် ချက်ချင်းပင် လှုပ်ရှားသွားကြသည်။ သူတို့သည် မက်ဆင်၏ အမိန့်ကို ငြင်းဆန်ခြင်းမရှိဘဲ နာခံနေကျဖြစ်ကြောင်း ထင်ရှားသည်။

ကေးလ်ပင် ရပ်တန့်သွားသည်။ မက်ဆင်၏ ရပ်တည်ချက်ကြောင့် သူခေတ္တမျှ ကြောင်သွားသည်။

စကားတစ်ခွန်းမှ မပြောဘဲ သူလည်း ကူညီရန် ရွေ့လျားသွားသည်။

လှည်းများကို ချက်ချင်းပင် ရပ်တန့်လိုက်ပြီး ယခင်က တရားဝင် အခွန်ကောက်သူများသည် အခြားအလုပ်သမားများကဲ့သို့ ပစ္စည်းများ သယ်ယူခြင်းနှင့် တုံးများကို စုပုံခြင်းများ လုပ်ဆောင်နေရသည်။

ထိုနည်းအတိုင်းပင် နောက်ထပ် လူအင်အားများ ဆောက်လုပ်ရေးသို့ ရောက်ရှိလာသည်။

သာမန် လူအင်အား မဟုတ်ပေ...

ဤအစောင့်များသည် သန်မာကြသည်။ သူတို့အများစုမှာ ပြင်းထန်သော မာနာအရိပ်အယောင်များကို ထုတ်လွှတ်နေသည်။ သူတို့ရောက်ရှိလာခြင်းမှာ အသင်းအတွက် ကြိုဆိုရမည့် အားဖြည့်မှုဖြစ်ပြီး တံတိုင်းဆောက်လုပ်ရေးမှာ တစ်ဖန်ပြန်၍ အရှိန်အဟုန် မြင့်တက်လာသည်။

မကြာမီ လူစီယန်သည် ဆောက်လုပ်ရေးလုပ်ငန်းခွင်သို့ ရောက်ရှိလာပြီး ချက်ချင်းပင် ရပ်တန့်သွားသည်။

သူ မျက်တောင်ခတ်လိုက်သည်... အံ့သြသွားသည်။

ရင်းနှီးသော မျက်နှာများ။

မက်ဆင်၏ ကိုယ်ပိုင်အစောင့်များ... အကာအကွယ်အတွက် ရည်ရွယ်ထားသော နိုဘယ်အစောင့်များ... သူ၏ ပြည်သူများနှင့်အတူ လုပ်ဆောင်နေကြသည်။

ပစ္စည်းများ သယ်ယူနေကြသည်။

ကွန်ကရစ်တုံးများကို ချနေကြသည်။

ဘိလပ်မြေ များကို ရောစပ်နေကြသည်။

မာနာကို ထုတ်လွှတ်နေကြသည်။

...သူတို့ တာဝန်ကဲ့သို့ပင်။

ကေးလ်ပင် ရှိနေပြီး တုံးများကို မကာ အခြားသူများနှင့်အတူ စုပုံနေသည်။

လူစီယန် ရယ်မောမိသည်။

ဘာတွေဖြစ်ပျက်ခဲ့သလဲဆိုတာ သူချက်ချင်း နားလည်လိုက်သည်။

"တံတိုင်းက ငါတို့ထင်ထားတာထက် ပိုမြန်မြန် ပြီးသွားမယ့်ပုံပဲ" ဟု သူပြုံး၍ ရေရွတ်သည်။

ယခုတွင် အဖွဲ့သည် ပင်မဝင်ပေါက်ကို ပုံသွင်းရန် အာရုံစိုက်နေသည်။

ပို၍ ရှုပ်ထွေးသော ကွေးညွှတ်သည့် အပိုင်းများကို ပုံဖော်ရန် အထူးပုံစံခွက်များကို သုံးနေကြသည်။ ဒီဇိုင်းမှာ သန့်ရှင်းပြီး ခိုင်ခံ့ကာ အံ့သြစရာကောင်းလောက်အောင် လှပသည်။

လူစီယန်၏ အကြိုက်နှင့် အတိအကျပင်။

ဝင်ပေါက်၏ ဘေးနှစ်ဖက်တွင် စောင့်ကြည့်မျှော်စင်များ ပုံစံစပေါ်လာသည်။

၎င်းတို့သည် မြင့်မားပြီး ဂုဏ်ယူစွာ ရပ်တည်နေသည်။

လူစီယန်အတွက် ၎င်းတို့သည် အခြားအရာတစ်ခုကို သင်္ကေတပြုသည်။

ခံတပ်၊ သန်မာမှုနှင့် အမွေအနှစ်အတွက် လူတစ်ယောက်၏ အိပ်မက်။

သူသည် စိတ်ကျေနပ်စွာ ခေါင်းညိတ်လိုက်သည်။

ဆောက်လုပ်ရေးသည် လျင်မြန်စွာ ရွေ့လျားနေသည်... အလွန်လျင်မြန်လွန်းသည်။ သို့သော် အရည်အသွေးမှာ မထိခိုက်ပေ။

မွန်းစတားများမှ ရရှိသော ပစ္စည်းများသည် သူ၏ ယခင်ဘဝက သိခဲ့သမျှထက် ပို၍ ခိုင်ခံ့သည်။

လူစီယန်သည် တိတ်ဆိတ်စွာ ရပ်နေသည်။

သူသည် အလုပ်သမားများ စလိုင်းဘိလပ်မြေ ရောစပ်နေသည်ကို ကြည့်နေသည်။

၎င်း၏ စည်းချက်။

လှိမ့်ခြင်း။

ဂေါ်ပြားဖြင့် ခတ်ခြင်း။

ဘိလပ်မြေ၏ စိုစွတ်သော အသံ။

၎င်းက... သူ၏စိတ်ထဲတွင် ထူးဆန်းသော ငြိမ်းချမ်းမှုကို ဆောင်ကြဉ်းပေးသည်။

၎င်းနှင့်ပတ်သက်ပြီး အလွန်အမင်း ကျေနပ်ဖွယ်ရာ တစ်စုံတစ်ခုရှိသည်။

၎င်းသည် သူ၏ ယခင်ဘဝကို ပြန်သတိရစေသည်။

"ထူးဆန်းအောင် ကျေနပ်ဖို့ ကောင်းတယ်!" ဟု သူ အော်ဟစ်ကာ ရယ်မောလိုက်သည်။ ထို့နောက် နေရောင်ခြည်စလိုင်း များထံမှ ရရှိသည့် ခေတ်မီပုံစံ စွမ်းအားဖြည့်အချိုရည် ကို မြှောက်လိုက်သည်။

သူသည် နတ်စွမ်းအင်ကို ထိန်းချုပ်ကာ ရေခဲအနည်းငယ် ထည့်လိုက်သည်။

ပြီးတော့... တစ်ငုံကြီး သောက်လိုက်သည်။

•••

အဖွဲ့ထဲသို့ အသစ်ဝင်ရောက်လာသူများသည် အလွန်အမင်း အထောက်အကူဖြစ်ကြောင်း သက်သေပြခဲ့သည်။

ယခုမှသာ မက်ဆင်၏ အစောင့်များသည် မည်မျှသန်မာကြောင်း လူစီယန် အပြည့်အဝ နားလည်လိုက်သည်။

သူတို့သည် အဆင့် (၅) မှ အဆင့် (၇) အထိ ရှိကြသည်။ မည်သည့်စံနှုန်းဖြင့်မဆို ထိပ်တန်းစစ်သည်များဖြစ်သည်။

ဤသူများသည် သာမန်အခွန်ကောက် အစောင့်များ မဟုတ်ကြောင်း ထင်ရှားသည်။ 

သူတို့သည် မက်ဆင်၏ ကိုယ်ပိုင်အကာအကွယ်အတွက် တကယ်ရည်ရွယ်ထားသူများဖြစ်သည်။

သူတို့ရှိနေခြင်းကြောင့် ဆောက်လုပ်ရေး တိုးတက်မှုမှာ အဆမတန် မြန်ဆန်သွားသည်။ တံတိုင်းမှာ ပြီးလုနီးပါးပင်။

ဧည့်ဝတ်ပြုလိုသည့်အနေဖြင့် လူစီယန်သည် စားနပ်ရိက္ခာဌာနခွဲမှ သူတို့၏ ကိုယ်ပိုင်စားဖူးမှူး ဆိုင်နက်ပ်ကို ခေါ်လိုက်သည်။

ဧည့်သည်များအတွက် အစားအစာ ပြင်ဆင်ပေးရန် သူက တောင်းဆိုလိုက်သည်။

လက်ထောက်တစ်ယောက်အနေဖြင့် ဆိုင်နက်ပ်သည် ဝိညာဥ်‌ေရးရာဌာနခွဲမှ အိမ်ဖော် အာဂျီနက်ပ်၏ အကူအညီကို တောင်းဆိုခဲ့သည်။

အာဂျီနက်ပ်၏ အမူအရာတွင် အနည်းငယ် ပြောင်းလဲမှုများရှိသော်လည်း... ကလဲရာ၏ လွှမ်းမိုးမှုကြောင့် ဖြစ်နိုင်သည်။ သူမနှင့် ဆိုင်နက်ပ်တို့သည် အဆင်ပြေနေကြသည်။

မတွန့်ဆုတ်ဘဲ ထိုနှစ်ဦးသည် သင့်လျော်သော အစားအစာကို ပြင်ဆင်ရန် ထွက်သွားကြသည်။

ထိုကိစ္စပြီးသောအခါ လူစီယန်သည် မက်ဆင်ထံသို့ လှည့်လိုက်သည်။

"ဦးလေးမက် အခွန်ပေးရမယ့် အချိန်ရောက်ပြီ" ဟု သူက ပြောသည်။ "လှည်းတန်းက ရောက်နေပြီဆိုတော့ ကျွန်တော် ပေးအပ်ချင်ပါတယ်"

မက်ဆင် ခေါင်းညိတ်ပြီးနောက် သူ၏အစောင့်များကို ခေါ်လိုက်သည်။

"လှည်းတွေကို အတွင်းထဲ ခေါ်လာခဲ့"

လူစီယန်သည် ဆီဘတ်စ်၊ ဆီဆီးလ်တို့နှင့်အတူ မက်ဆင်နှင့် အစောင့်များကို သိုလှောင်ရုံဆီသို့ ဦးဆောင်သွားသည်။

လမ်းလျှောက်လာရင်း မက်ဆင်က သာမန်အတိုင်း ပြောသည်။

"တူ၊ အခွန်အတွက် အလျင်လိုစရာမလိုပါဘူး။ မင်း ဘေးအန္တရာယ်တစ်ခုခု ကြုံခဲ့ရတယ်လို့ ဘုရင်ကို ငါ အလွယ်တကူ အစီရင်ခံနိုင်ပါတယ်။ မင်းကို ကင်းလွတ်ခွင့်ပေးလိမ့်မယ်"

လူစီယန် ပြုံးလိုက်သည်။ "စိုးရိမ်မနေပါနဲ့ ဦးလေးမက်စ်။ ကျွန်တော်တို့ အခွန်ကို သီးသန့်ဖယ်ထားပြီးသားပါ"

မက်ဆင်သည် အားပေးကြောင်း ခေါင်းညိတ်လိုက်သော်လည်း သူ၏မျက်လုံးများတွင် စူးစမ်းလိုစိတ်များ ပေါ်လာသည်။

သူတို့ ရောက်ရှိလာပြီး သိုလှောင်ရုံ တံခါးများ ပွင့်လာသောအခါ မက်ဆင်ပင် တည်ငြိမ်မှု ပျက်သွားသည်။

အတွင်းတွင် ကြီးမားသော သီးနှံများ ရှိနေသည်။

ဧရာမ မုန်လာဥနီများနှင့် မုန်လာဥများ။

၎င်းတို့သည် သူတို့ တစ်ခါမျှ မမြင်ဖူးသည့်အရာများဖြစ်သည်။

"ဒါက..." မက်ဆင် မျက်တောင်ခတ်လိုက်သည်။ ထို့နောက် သူ ကျယ်လောင်စွာ ရယ်မောလိုက်သည်။ "တူလေး! ငါ့ကို နောက်ထပ် ဘယ်နှစ်ခါလောက် အံ့သြအောင် လုပ်ဦးမလဲ? ဟားဟား! ကောင်းတယ်၊ ကောင်းတယ်။ ငါ တွက်ချက်ပြီးပြီ။ ထုံးစံအတိုင်းပဲ ပြည့်စုံတယ်။ မင်းနဲ့ မင်းရဲ့အဖေက ဘယ်လို ခွဲဝေရမလဲဆိုတာ တကယ် သိကြတာပဲ။ အကုန် အပြည့်အစုံပဲ"

တစ်ချက်ကြည့်ရုံဖြင့် မက်ဆင်သည် အကုန်လုံး အဆင်သင့်ဖြစ်နေကြောင်း သိလိုက်သည်။ ပြီးပြည်စုံသောတွက်ချက်မှု သည် ဤနေရာတွင် အဓိကအခန်းကဏ္ဍမှ ပါဝင်နေသည်။

သူ၏အစောင့်များမှာမူ အံ့သြမှုကြောင့် ရပ်တန့်နေကြဆဲပင်။

သီးနှံများသည် ကြီးမားလှသဖြင့် လှည်း ၁၀ စီးနှင့်ပင် အကုန်လုံး ဆံ့နိုင်မဆံ့ မသေချာပေ။

သို့သော် သူတို့ မညည်းညူကြပါ။

လှည်းသေးများအစား လှည်းကြီးများ ယူလာခဲ့ခြင်းမှာ မှန်ကန်ပေသည်။

နယ်စပ်ဒေသများမှ အခွန်များသည် ဒင်္ဂါးပြားပုံစံဖြင့် ရှားပါသည်။ များသောအားဖြင့် သီးနှံနှင့် သတ္တုရိုင်းပုံစံဖြင့် လာလေ့ရှိရာ လုံခြုံရေးထက် နေရာနှင့် ထိန်းသိမ်းမှုမှာ ပို၍ အရေးကြီးသည်။

သူတို့သည် ချက်ချင်း အလုပ်စလုပ်ကြပြီး ဧရာမဟင်းသီးဟင်းရွက်များကို လှည်းများပေါ်သို့ ဂရုတစိုက် တင်ကြသည်။

လူစီယန်သည် တစ်စီးပြီးတစ်စီး ပြည့်သွားသော လှည်းများကို ကြည့်လိုက်သည်။

လှည်းတစ်စီးစီတိုင်းကို သယ်ယူစဉ်အတွင်း သီးနှံများ မပုပ်သိုးစေရန်  မှော်ဖြင့် ခိုင်ခံ့အောင် ပြုလုပ်ထားသည်။

"အကုန်အကျ အများကြီး ရှိမှာပဲ" ဟု လူစီယန် တွေးလိုက်ပြီး ကြိုတင်ပြင်ဆင်မှု အဆင့်အတန်းကြောင့် တိတ်တဆိတ် အံ့သြမိသည်။