အခန်း (၂၇) - ချစ်စရာကောင်းသူ
"ဟူး..."
လူစီယန်တစ်ယောက် သက်ပြင်းရှည်ကြီး ချလိုက်သည်။ သူသာ တစ်စက္ကန့်လောက် နောက်ကျခဲ့မည်ဆိုလျှင် အကြောင်းအရင်းကိုပင် မသိလိုက်ဘဲ သေဆုံးသွားနိုင်ပေသည်။ ကံကောင်းစွာဖြင့် အဆင့်မြှင့်တင်ထားမိ၍သာ တော်တော့သည်။
သူသည် အနိုင်ယူပြီးဖြစ်သည့် စလိုင်းဘော့စ်ကို ကြည့်ကာ အပြုံးတစ်ခု ဆင်မြန်းလိုက်သည်။ ထိုစလိုင်းရုပ်သေးရုပ်လေးတွေက သူထင်ထားသည်ထက် ပို၍ အသုံးဝင်နေသည်။
သူသည် ၎င်းတို့ကို အာရုံလွှဲရန်နှင့် အနီးကပ်တိုက်ခိုက်ရန်အတွက် အစီစဉ်ဆွဲနေရာချရာတွင် အသုံးပြုခဲ့သည်။ အစီအစဉ်မှာ အထူးကောင်းမွန်စွာ အလုပ်ဖြစ်ခဲ့သည်။
သူသည် ပထမဆုံးအကြိမ်အနေဖြင့် မိမိကိုယ်ကို ဂုဏ်ယူသည့် အချိန်လေးကို ခွင့်ပြုလိုက်သည်။
ထို့နောက်...
ရုတ်တရက် အသံမြည်လာသည့် စနစ်၏ အကြောင်းကြားချက်များက တိတ်ဆိတ်မှုကို ဖျက်ဆီးလိုက်သည်။
[ တင်! ]
[ သင်သည် စလိုင်းမယဘော့စ်ကို သတ်ဖြတ်လိုက်ပါပြီ။ သင်သည် ရွှေဒင်္ဂါး ၁ ပြား ရရှိပါသည်။ ]
< သင် အဆင့်တက်သွားပါပြီ >
< သိုလှောင်နေရာ +၁ >
< ဂုဏ်ယူပါသည်- အဆင့် ၂၀ သို့ ရောက်ရှိသွားပါပြီ! >
[ အနာဂတ်တွင် ရရှိမည့် ပစ္စည်းများအားလုံးတွင် ပစ္စည်း ၂ ခုမှ ၃ ခုအထိ ပါဝင်တော့မည်ဖြစ်သည်။ ]
...
[ တင်! ]
< အလုပ်အကိုင်ကျွမ်းကျင်မှု ကို သော့ဖွင့်လိုက်ပါပြီ >
< ကျောင်းထွက်ခြင်း >
ဖော်ပြချက် - လူတိုင်းက မင်းကို ဘဝကနေ ကျောင်းထွက်သွားပြီလို့ ထင်ကြပေမယ့်... တခြားအရာအားလုံးက မင်းဆီကို ကျလာလိမ့်မယ်။
• အလုပ်အကိုင်ကျွမ်းကျင်မှု- ပစ္စည်းကျနှုန်း- အမြင့်ဆုံး – အနိုင်ယူထားသည့် သို့မဟုတ် လက်အောက်ခံဖြစ်လာသည့် သက်ရှိပစ်မှတ်အားလုံးသည် ပစ္စည်း ၁၀၀% ကျစေရမည်။
• အလုပ်အကိုင်ကျွမ်းကျင်မှု- အလိုအလျောက်သိမ်းဆည်းခြင်း — ပစ္စည်းများကို အလိုအလျောက် သိမ်းဆည်းပေးခြင်း (ကြိုးစားအားထုတ်မှုဆိုတာ ကျောင်းမထွက်တဲ့ လူတွေအတွက်ပဲ)
• အလုပ်အကိုင်ကျွမ်းကျင်မှု-
— တစ်စုံတစ်ယောက်၏ ကျွမ်းကျင်မှုကို စွမ်းအားလျှော့ချပြီး ခေတ္တ "ကူးယူ" အသုံးပြုနိုင်ခြင်း (အသစ်!)
...
[ တင်! ]
< အောင်မြင်မှု- ဒန်းဂျန်း၏ ဦးညွှတ်ခြင်း >
ဒန်းဂျန်း ဘော့စ်ကို ပထမဆုံးအကြိမ် သတ်ဖြတ်ခြင်း
ဆုလာဘ် - ဘော့စ်ကောင် ကျသွားသည့် ပစ္စည်းများအားလုံး၏ ရှားပါးမှုနှုန်း တိုးမြှင့်သွားမည်
...
လူစီယန်မှာ စကားမပြောနိုင်တော့ပေ။ စကားလုံးများပင် သူ့ကို ကျောခိုင်းသွားခဲ့သည်။
အလုပ်အကိုင်ကျွမ်းကျင်မှု အသစ်တစ်ခု ထပ်မံသော့ပွင့်လာပြီး ၎င်းမှာ အနိုင်ရမည့် အဓိကလက်နက်တစ်ခု ဖြစ်လာနိုင်ဖွယ်ရှိသည်။ သူသာ မှန်ကန်စွာ အသုံးပြုတတ်မည်ဆိုလျှင် သူသည် ရပ်တန့်၍ မရနိုင်သူ ဖြစ်လာပေလိမ့်မည်။
အခြား ကျွမ်းကျင်မှုများနည်းတူ ဤကျွမ်းကျင်မှုအသစ်သည်လည်း သူ၏ စွမ်းအင်စွယ်စုံကျမ်း တွင် စာရင်းမသွင်းထားပေ။ ထို့ကြောင့် သူ ပို၍ပင် စမ်းသပ်ချင်စိတ် ဖြစ်ပေါ်လာသည်။
ဒါပေမဲ့ အရင်ဆုံး...
"ပစ္စည်းတွေ အရင်ကြည့်ရမှာပေါ့!"
သူသည် မွေးနေ့ရောက်သည့် ကလေးတစ်ယောက်ကဲ့သို့ ပြုံးဖြီးနေသည်။
သူ၏ ခြေထောက်နားတွင် ရွှေရောင်တုံးတစ်တုံးနှင့် ပို၍ စိတ်ဝင်စားစရာကောင်းသည်မှာ... ရွှေရောင်ကတ်တစ်ခု ရှိနေသည်။
သူသည် အလိုအလျောက်သိမ်းဆည်းခြင်းကို အသက်မသွင်းထားပေ။
သူသင်ယူခဲ့ရသည့်အထဲမှ တစ်ခုမှာ အလိုအလျောက် သိမ်းဆည်းမှုကို သူ၏ ဆန္ဒဖြင့် ရပ်တန့်နိုင်ခြင်းဖြစ်သည်။ ယခင်ကတစ်ကြိမ်တွင် လုပ်ကြံသတ်ဖြတ်သူများနှင့် တိုက်ပွဲဖြစ်စဉ်အတွင်း ပျံသန်းလာသည့် ဓားမြှောင်ကို ဖမ်းယူရန်အတွက် သူသည် ထိုစွမ်းရည်ကို လမ်းကြောင်းပြောင်းခဲ့ဖူးသည်။
သူသိထားသလောက်ဆိုလျှင် အလိုအလျောက်သိမ်းဆည်းခြင်းသည် သူအသုံးပြုပုံပေါ် မူတည်ပြီး တက်ကြွသည့်စွမ်းရည်ရော၊ မလှုပ်ရှားသည့်စွမ်းရည်ပါ ဖြစ်နိုင်သည်။ စွမ်းအင်စွယ်စုံကျမ်း တွင် စာရင်းမသွင်းထားသောကြောင့် သူကိုယ်တိုင်ပင် စမ်းသပ်ရှာဖွေခဲ့ရခြင်း ဖြစ်သည်။
ယခုအချိန်တွင် သူသည် အလွယ်လမ်းကြောင်းကို မလိုချင်ပေ။
သူသည် ခံစားချင်သည်။
မိမိလက်ဖြင့် ပစ္စည်းများကို ကောက်ယူရသည့် စိတ်လှုပ်ရှားမှုကို!
ခက်ခက်ခဲခဲ ရရှိထားသည့် ဆုလာဘ်ကို ပိုင်ဆိုင်ရသည့် ကျေနပ်မှုကို!
လူစီယန်သည် ငုံ့၍ ရွှေရောင်တုံးကို အရင်ကောက်ယူလိုက်သည်။ သူ၏ လက်ချောင်းများမှာ စိတ်လှုပ်ရှားမှုဖြင့် တဆတ်ဆတ်တုန်နေသည်။
အချိန်မဖြုန်းဘဲ သူ၏ သိုလှောင်နေရာ ကို ဖွင့်ကြည့်လိုက်ရာ...
< စေးကပ်သည့် ဖိနပ် >
အမျိုးအစား - စက်ကိရိယာ
ရှားပါးမှု - အထူးရှားပါး
ဖော်ပြချက် - မျက်နှာပြင်တိုင်းကို ကပ်တွယ်နိုင်သည့် ဖိနပ်များ (ပျော့ပျော့အိအိ၊ အသံမြည်ပြီး အလွန်ထိရောက်မှုရှိသည်)
< စင်ကြယ်မှု၏ အနှစ်သာရ >
အမျိုးအစား - အဖိုးတန်ပစ္စည်း
ရှားပါးမှု - ဒဏ္ဍာရီလာ
ဖော်ပြချက် - ၎င်းကို ထိတွေ့မိသမျှအရာအားလုံးကို စင်ကြယ်စေသည့် ပုံဆောင်ခဲ (ဒါပေမဲ့ ပိုင်ရှင်ရဲ့ ညစ်ညမ်းနေတဲ့ စိတ်ကိုတော့ မစင်ကြယ်စေနိုင်ပါ)
လူစီယန်သည် ပထမပစ္စည်းကို ကြည့်ကာ ခြောက်ကပ်ကပ် ချောင်းဆိုးလိုက်သည်။
"အဟမ်း... အဟမ်း..."
မျက်နှာကြက်ပေါ်တွင် အိမ်မြှောင်ကြီးတစ်ကောင်လို ကပ်နေရသည့် မိမိပုံစံကို တွေးကြည့်ရုံဖြင့် သူ ရှက်ရွံ့သွားသည်။
"ဟုတ်ပြီ၊ မလိုပအပ်ေလာက်ပါဘူး။"
သူသည် မိမိဘာသာ ရယ်မောလိုက်သည်။ ဖိနပ်က အသုံးဝင်ပုံရသော်လည်း သူ့အတွက်ကတော့ ရယ်စရာကောင်းလွန်းသည်။
ထိုစဉ် အတွေးတစ်ခု ဝင်လာသည်။
"ဆီဘတ်စ်စတီယန်ကို ပေးလိုက်ရင် ကောင်းမလား..." သူ၏ အပြုံးမှာ ပို၍ ကျယ်လာသည်။ "ငါ မြင်ယောင်နေပြီ။ တိတ်ဆိတ်သော ခြေလှမ်း နှင့် ဒီဖိနပ်ကို ဝတ်ထားတဲ့ အဲဒီလူကတော့... တကယ့် နင်ဂျာ လုပ်ကြံသတ်ဖြတ်သူပဲ။ ဟားဟားဟား!"
ထိုအတွေးက သူ့ကို ရယ်မောစေသည်။ သူတွေးလေလေ ပို၍ သင့်တော်သည်ဟု ထင်လေလေ ဖြစ်သည်။
"တကယ်တော့... ဒါက ဆီဘတ်စ်အတွက် အသင့်တော်ဆုံးပဲ" ဟု သူရေရွတ်ကာ ခေါင်းညိတ်လိုက်သည်။ "သူက မျက်နှာကြက်ပေါ်ကနေ လျှို့ဝှက်သွားနိုင်မယ်၊ ဘယ်သူမှ မသိအောင် ဆင်းလာနိုင်မယ်... အင်း၊ သူ့စတိုင်နဲ့တော့ အသေအချာပဲ။"
ထို့နောက် သူသည် နောက်ပစ္စည်းတစ်ခုကို အာရုံစိုက်လိုက်သည်။
စင်ကြယ်မှု၏ အနှစ်သာရ...
လူစီယန်၏ အကြည့်မှာ ထိုပစ္စည်း၏ ဖော်ပြချက်ပေါ်တွင် ကပ်ငြိနေသည်။
သူသည် ကွင်းစကွင်းပိတ်ထဲမှ စနောက်သည့် စကားလုံးကို လျစ်လျူရှုလိုက်သည်။
"ဟွန့်၊ ငါက ဒီလို စနစ်ရဲ့ နောက်ပြောင်မှုတွေထက် မြင့်မြတ်ပါတယ်" ဟု သူ လှောင်ပြောင်လိုက်သည်။
သို့သော် ပင်မဖော်ပြချက်ကို ပြန်ဖတ်လိုက်သည့်အခါ သူ၏ မျက်လုံးများမှာ တောက်ပသွားသည်။
"ဒါသာ မှန်ရင်... ကျိန်စာတွေက ငါ့ကို ဘာမှ မလုပ်နိုင်တော့ဘူးပေါ့? ဟားဟားဟား!"
သူ၏ ရယ်သံမှာ အခန်းတစ်ခုလုံးကို ပဲ့တင်ထပ်သွားသည်။
ထို့နောက် သူသည် လျှာသပ်လိုက်သည်။
"စိတ်ညစ်ညစ်နဲ့ အသိစိတ်တွေ ညစ်ညမ်းနေတာကိုတော့ မစင်ကြယ်စေနိုင်ဘူးတဲ့။ တောက်... အဲဒီ ကိုလ်းဟတ် ဆိုတဲ့ ကောင်ကို ဒီဟာနဲ့ ပစ်ပေါက်ပြီး လူကောင်းတစ်ဝက်လောက် ဖြစ်မလားဆိုပြီး စမ်းကြည့်ဖို့ စိတ်ကူးထားတာကို။"
သူသည် သရုပ်ဆောင်သလို သက်ပြင်းချလိုက်သည်။
"တော်တော် နှမြောဖို့ကောင်းတဲ့ အခွင့်အရေးပဲ။"
သူဟာ နောက်ပြောင်နေသော်လည်း သူ၏ အပြုံးမှာ ပျောက်ကွယ်မသွားပါ။
ယခုအချိန်တွင် သူသည် ၎င်းကို စမ်းသပ်ရန်သာ တွေးနေသည်။ ဘာတွေကို စင်ကြယ်စေနိုင်မလဲ၊ ၎င်း၏ ကန့်သတ်ချက်များမှာ မည်မျှရှိမလဲဆိုသည်ကို သိချင်နေသည်။
ဖြစ်နိုင်ခြေများမှာ သူ့ခေါင်းထဲတွင် လည်ပတ်နေသည်။
သို့သော် ထိုစဉ်တွင် အခြားအရာတစ်ခုက သူ့အာရုံကို ဖမ်းစားသွားသည်။
သူ၏ အကြည့်မှာ ကြမ်းပြင်ပေါ်တွင် ရှိနေသည့် ရွှေရောင်ကတ်ဆီသို့ ရွေ့သွားသည်။
သူ၏ နှလုံးခုန်နှုန်းမှာ တစ်ချက် ရပ်တန့်သွားသည်။
"ဒါ... ကြယ် ၅ ပွင့် ကျွမ်းကျင်မှုကတ်လား?" သူ တိုးတိုးလေး မေးလိုက်သည်။
သူသည် ၎င်းကို ဂရုတစိုက်နှင့် လက်နှစ်ဖက်ဖြင့် ကောက်ယူလိုက်သည်။ သူသည် အရှေ့ဘက်မျက်နှာပြင်ကို မြင်တွေ့လိုစိတ် ပြင်းပြနေသည်။
ထို့နောက်... သူ ရပ်တန့်သွားသည်။
၎င်းမှာ ကျွမ်းကျင်မှုကတ် မဟုတ်ပေ။
မှော်ပညာလည်း မဟုတ်ပေ။
၎င်းမှာ... လုံးဝ တခြားအရာတစ်ခု ဖြစ်နေသည်။
"ဒါ ဘာကြီးလဲ?" သူ၏ မျက်ခုံးများမှာ တွေဝေမှုဖြင့် တွန့်ချိုးသွားသည်။
ထို့နောက်...
[ တင်! ]
[ သတ်မှတ်ချက်များ ပြည့်မီပါသည် ]
[...]
[ မွန်းစတားဒက်စ် ကို သော့ဖွင့်လိုက်ပါပြီ။ ]
[ မွန်းစတားကတ်များကို မွန်စတာဒက်စ်တွင် သိမ်းဆည်းထားသည်။ ]
သူ မတုံ့ပြန်နိုင်ခင်မှာပင် ရွှေရောင်ကတ်မှာ ပျောက်ကွယ်သွားသည်။ ၎င်းမှာ တောက်ပသည့် အလင်းတန်းအဖြစ် ပြောင်းလဲသွားပြီး လေထဲတွင် ပျံ့လွင့်သွားသည်။
[ စနစ်မျက်နှာပြင်ကို စတင်လိုက်ပါသည်... ]
< အခြေအနေ >
< သိုလှောင်နေရာ >
< စွမ်းအင်စွယ်စုံကျမ်း >
< မှော်စာအုပ် >
< မွန်းစတားဒက်စ် > (အသစ်!)
<??? > (သတ်မှတ်ချက်များ မပြည့်မီပါ)
လူစီယန်၏ ပါးစပ်မှာ အံ့အားသင့်စွာဖြင့် ဟသွားသည်။
"မွန်းစတားဒက်စ် တဲ့လား။"
သူသည် အသစ်သော့ဖွင့်လိုက်သည့် သူ့ရဲ့ ခိုးဆော့ စွမ်းရည်ကို ချက်ချင်း ဆင့်ခေါ်လိုက်သည်။
သူ့ရှေ့တွင် ပေါ်လာသည်မှာ... စာအုပ်တစ်အုပ်ဖြစ်သည်။
သို့သော် သာမန်စာအုပ်မဟုတ်ပေ။
၎င်း၏ အဖုံးမှာ အနက်ရောင်သားရေဖြင့် ချုပ်လုပ်ထားပြီး အလင်းရောင်တွင် အနည်းငယ် တောက်ပနေသည့် တံဆိပ်ခေါင်းများဖြင့် တန်ဆာဆင်ထားသည်။
ကြည့်ရသည်မှာ လန်းဆန်းသည်။
စတိုင်ကျသည်။
သူ့အတွက် အထူးသီးသန့် လုပ်ထားသကဲ့သို့ပင်။
"သေစမ်း..... ဒါက ငါနဲ့ အတော်ကို လိုက်ဖက်တာပဲ။"
သူ၏ လက်ချောင်းများ စာအုပ်ကို ထိမိသည့်အချိန်မှာပင် သူသည် ချက်ချင်း ရင်းနှီးမှုတစ်ခုကို ခံစားလိုက်ရသည်။
သူသည် ၎င်းကို တစ်ချက်ကြည့်ရုံဖြင့် ကြိုက်သွားတော့သည်
၎င်းကို ကြည့်လိုက်သည်နှင့်ပင် သူသည် ထူးဆန်းစွာ စိတ်သက်သာရာ ရသွားသည်။ ကမ္ဘာ့ဝန်ထုပ်ဝန်ပိုးဖိအားများပေါ့ပါးသွားသကဲ့သို့ပင်။
ထို့နောက် သူသည် စာအုပ်ကို ဖွင့်ကြည့်လိုက်သည်။
ပထမဆုံးစာမျက်နှာတွင် ရင်သပ်ရှုမောဖွယ် ပန်းချီကားတစ်ချပ်ကို မြင်လိုက်ရသည်။ ၎င်းမှာ အသက်ဝင်နေသကဲ့သို့ ခံစားရသည့် ရှုခင်းဖြစ်သည်။
တောက်ပသည့် မြူများဖြင့် ဖုံးလွှမ်းနေသော တောအုပ်တစ်ခု။
ကြည်လင်သည့် ရေကန်တစ်ခု။
အရိပ်များထဲတွင် ပုန်းကွယ်နေသည့် သတ္တဝါများ။
မှော်ဆန်ပြီး... တကယ့်ကို အသက်ဝင်ေနသည့်ပမာ ဖြစ်နေသည်။
သူသည် နောက်စာမျက်နှာကို လှန်လိုက်သည်...
...ပြီးနောက် မယုံနိုင်စွာ မျက်တောင်ခတ်လိုက်သည်။
"အို တကယ်ကြီးအမိုက်စားကြီး" သူရေရွတ်လိုက်သည်။ "...ဒါက ပိုကီဒက်စ် နဲ့ အတူတူပဲ မဟုတ်လား?"
ထိုအသိသည် သူ့ကို ရိုက်ခတ်သွားသလို ဖြစ်သွားသည်။
စာမျက်နှာတစ်ခုပြီးတစ်ခုတွင် သူတွေ့ဆုံခဲ့ပြီးဖြစ်သည့် မွန်းစတားများ၏ အမည်စာရင်းကို ရေးသားထားသည်။
မြေစားပိုးများ။
အနီရောင် စလိုင်းများ။
လိမ္မော်ရောင် စလိုင်းများ။
...
သက်တန့်ရောင် စလိုင်းမ်။
အမျိုးအစားတစ်ခုချင်းစီတိုင်းတွင် အသေးစိတ် အချက်အလက်များ ပါဝင်သည်။
နေထိုင်ရာဒေသများ၊ ထူးခြားချက်များ၊ အပြုအမူများ၊ နှစ်သက်ရာများ၊ အားနည်းချက်များ။
အားလုံး ပါဝင်သည်။ သားရဲထိန်းကျောင်းသူတစ်ယောက်၏ အိမ်မက်မှတ်တမ်းတစ်ခုလို စနစ်တကျ ရှိနေသည်။
လူစီယန်သည် နီးကပ်စွာ ကြည့်လိုက်သည်။
"ဒီအရာက... ငါတိုက်ခဲ့တဲ့ အရာအားလုံးကို သိနေတာပဲ။"
သူ တစ်ခုခုကို သိလိုက်ရသည်။ ၎င်းမှာ အစပျိုးရုံသာ ရှိသေးသည်။
လူစီယန်သည် စာအုပ်ကို စိုက်ကြည့်နေသည်။ ထို့နောက်... ရုတ်တရက် အသိတစ်ခုက သူ၏ စိတ်ထဲသို့ ဝင်ရောက်လာသည်။
"နေပါဦး... ဒါဆိုရင် ငါက တကယ်ပဲ သားရဲထိန်းကျောင်းသူ တစ်ယောက် ဖြစ်နေတာလား?"
ထိုအတွေးက သူမျှော်လင့်ထားသည်ထက် ပို၍ ပြင်းထန်စွာ ရိုက်ခတ်သွားသည်။
သူသည် အချက်အလက်များကို ဆက်စပ်ကြည့်လိုက်သည်။
စွမ်းအင်စွယ်စုံကျမ်း နှင့် မှော်စာအုပ်။ စနစ်က ပြောသည်မှာ ၎င်းတို့မှာ အမွေရထားခြင်း ဖြစ်သည်ဟု ဆိုသည်။
ဒါပေမဲ့ ဘယ်သူ့ဆီကလဲ?
လူနှစ်ယောက်ကိုသာ သူတွေးမိသည်... သူ့ဖခင်နှင့် မိခင်။
သို့သော်... သူတို့က သာမန်လူတွေသာ ဖြစ်သည်။
ကြင်နာတတ်သည်။
ရိုးရှင်းသည်။
စွမ်းအား၏ အရိပ်အယောင်မျှပင် မရှိသလို မှော်ဆန်သည့်အရာဆိုလျှင် ပို၍ပင် ဝေးကွာသည်။
"သူတို့က တစ်ခုခုကို ဖုံးကွယ်ထားတာများလား" ဟု သူ တွေးလိုက်မိသည်။
ရုတ်တရက်၊ ရူးမိုက်သည့် အတွေးတစ်ခု ပေါ်လာသော်လည်း သူ ခေါင်းကို ချက်ချင်း ခါလိုက်သည်။
"မဟုတ်ဘူး။ အဲဒါက... အဲဒါက ဖြစ်နိုင်မှာ မဟုတ်ဘူး။"
သူ၏ ထင်မြင်ချက်သာ မှန်ကန်လျှင် မွန်စတာဒက်စ် သည် စနစ်၏ အစိတ်အပိုင်းမဟုတ်ပေ။ ၎င်းမှာ သူ့ကိုယ်သူ ပိုင်ဆိုင်သည့် အရာတစ်ခု ဖြစ်သည်။
...သူ ဘယ်သူလဲဆိုတာနှင့် ဆက်စပ်နေသည့် တစ်ခုခု။
စနစ်မရှိသည့်တိုင်အောင်ပင်...
သူသည် တိတ်ဆိတ်စွာ သက်ပြင်းချလိုက်သည်။
သူ၏ မျက်လုံးများမှာ သော့ခတ်ထားသည့် စနစ်တက်ဘ်ဆီသို့ ရောက်သွားသည်။
"သော့ခတ်ထားတဲ့ တက်ဘ်နဲ့ စနစ်တစ်ခုလုံးက ပြန်လည်မွေးဖွားခြင်းဆိုင်ရာ အထူးအခွင့်အရေးတစ်ခုခု ဖြစ်ဖို့များတယ်"
သူသည် ခဏ ရပ်လိုက်သည်။ သူတစ်ခုခုကို သဘောပေါက်သွားသည်။
"သေစမ်း... တစ်ယောက်တည်းအတွက် ခိုးဆော့တဲ့ စွမ်းအားတွေက အရမ်းများနေပြီ။"
သူ တွေးလေလေ အရာအားလုံးမှာ ပိုရှုပ်ထွေးလေလေ ဖြစ်လာသည်။
လူစီယန်သည် သက်ပြင်းချကာ ခေါင်းခါလိုက်သည်။
"တွေးနေလို့လည်း အကျိုးမရှိပါဘူး။"
သူသည် အသက်ကို ဝအောင်ရှူကာ နောက်စာမျက်နှာကို လှန်လိုက်သည်။ ၎င်းတွင် သူအခုလေးတင် ရရှိလိုက်သည့် ဘီလူးကတ် ရှိနေသည်။
အမည် - သက်တန့်ရောင် စလိုင်း
နေထိုင်ရာဒေသများ - ဒန်ဂျန်များ ၊ ဂူများ
အချက်အလက် -
ရောင်စုံစလိုင်းတို့၏ ထူးခြားချက်များဖြင့် ပြည့်စုံသည့် ရှားပါးမျိုးကွဲ။ ပေါင်းစပ်နိုင်သည့် ကျွမ်းကျင်မှုများဖြင့် လူသိများသည်။ လှပသော်လည်း အန္တရာယ်ရှိလောက်အောင် လိုက်လျောညီထွေ ပြောင်းလဲနိုင်သည်။
ထူးခြားချက်များ -
• အရွယ်အစားနှင့် စွမ်းအား တိုးတက်စေရန် အခြားရောင်စုံ စလိုင်းမ်များနှင့် ပေါင်းစပ်နိုင်ခြင်း
• ပေါင်းစပ်ထားသည့် စလိုင်းများကို လက်ပါးစေများအဖြစ် ခွဲထုတ်နိုင်ခြင်း
အပြုအမူများ -
• အလွန် ဉာဏ်ရည်ထက်မြက်ခြင်း
• ပြိုင်ဘက်များကို အကဲခတ်ပြီး ဗျူဟာကို လိုက်လျောညီထွေ ပြောင်းလဲခြင်း
• နယ်မြေကို တန်ဖိုးထားခြင်း
နှစ်သက်ရာများ -
• ရောင်စုံစလိုင်းမ်များနှင့် ပေါင်းစပ်ခြင်း
• တောက်ပသည့် အရာဝတ္ထုများ
• မာနာကြွယ်ဝသည့် အရာများ
အားနည်းချက်များ -
• မာနာအူတိုင်
• ဒြပ်စင်မှော်ပညာ (မီး၊ လျှပ်စီး၊ ရေခဲ)
လူစီယန်သည် စာသားများကို ဖတ်ရှုရင်း သူ၏ မျက်လုံးများမှာ တောက်ပသွားသည်။
"ငါ ခုနက တိုက်ခဲ့တဲ့ ဘော့စ်နဲ့ အတူတူပဲ..." ဟု သူရေရွတ်လိုက်သည်။
တွန့်ဆုတ်မနေဘဲ သူသည် ထည့်သွင်းထားသည့် ကတ်ကို လက်ဖြင့် ထိလိုက်သည်။
"အင်း။ ဒါကို ဘယ်လိုသုံးရမလဲ?"
ထိုအချိန်တွင် သူသည် စနစ်၏ အသံကို ကြားလိုက်ရသည်။
[ "ခေါ်ယူမည်" ဟူသော စကားလုံးကို အသုံးပြု၍ မွန်စတာဒက်စ်တွင် သိမ်းဆည်းထားသော "အိမ်မွေးသားရဲ" များကို ခေါ်ယူနိုင်ပါသည်။ ]
လူစီယန်၏ နှလုံးသားမှာ စိတ်လှုပ်ရှားစွာဖြင့် ခုန်ပေါက်နေသည်။
တွန့်ဆုတ်ခြင်း မရှိ။
"ခေါ်ယူမည်!"
သူ၏ လက်ထဲမှ ကတ်မှာ တောက်ပလာပြီး အနုအရွ ရွှေရောင်အလင်းတန်းများဖြင့် လေထဲသို့ ပျံတက်သွားသည်။
၎င်းမှာ တစ်ချက်မျှ လေထဲတွင် ဝဲပျံနေပြီးနောက် အောက်သို့ ပြင်းထန်စွာ ဆင်းသက်သွားကာ အလင်းတန်းတစ်ခုဖြင့် မြေပြင်ပေါ်သို့ ပစ်ပေါက်လိုက်သည်။
အလင်းရောင်များ ပေါက်ကွဲထွက်သွားသည်။
အလင်းရောင် မှိန်သွားသောအခါ...
ကတ်ကျသွားသည့် နေရာတွင် သတ္တဝါလေးတစ်ကောင် ရပ်နေသည်။
၎င်းမှာ နေရာတွင် ခုန်ပေါက်နေသည်။
ဝိုင်းစက်သည်။
ပျော့ပျောင်းသည်။
သက်တန့်ရောင် အလင်းတန်းများဖြင့် တောက်ပနေသည်။
ပွီး! ပွီး!
၎င်းမှာ သူ့ကို နှုတ်ဆက်နေသကဲ့သို့ ပျော်ရွှင်သည့် အသံကို ပြုလုပ်လိုက်သည်။
လူစီယန်သည် မျက်တောင်ခတ်လိုက်... ပြီးနောက် ပြုံးလိုက်သည်။
"အင်း... မင်းက တကယ်ကို ချစ်ဖို့ကောင်းတာပဲ။”